1-2. (a) Kala kya zwela Jezú mu kitumu ki tu sanga mu divulu dya Matesu 28:18-20, kyebhi o kikalakalu kya dyanga mu kilunga kya Jikidistá? (b) O milongi yiyi ya-nda tambwijila ibhwidisu yebhi?

KYOSO kya mu fukununa, Jezú wayi phala ku di sanga ni maxibulu mê ku mulundu wa kexile ku Ngalileya. Kyoso kya dyongeka mu kididi kyokyo, o jipoxolo nange a mesenene kyavulu kwijiya o maka eji ku a tangela. (Mat. 28:16) Nange mwene wa “tukulukila hama jitanu ja axikani bhwa-moxi,” mu kithangana kyenyókyo. (1 Kol. 15:6) Mukonda dyahi Jezú wexana o maxibulu mê phala kudyongeka bhenyobho? Phala ku a bhana o kikalakalu kiki kya katunda: “Enu-phe ndenu, mwa ka longe jixibulu ku akwa jixi joso.”—Tanga Matesu 28:18-20.

² Ku pholo dya kwenda, o maxibulu evwile o izwelu yiyi ya Jezú, a bhangele mbandu mu kilunga kya Jikidistá ku hama ya dyanga. O kikalakalu kya dyanga mu kilunga kya Jikidistá, kyexile kubhanga dingi maxibulu a Kidistu. * Lelu kwene ilunga yavulu ya Jikidistá ja kidi ku mundu woso. O ikalakalu ya dyanga ya ilunga yiyi, yene imoxi. O milongi yiyi, ya-nda tambwijila ibhwidisu iwana: Mukonda dyahi kubhanga maxibulu kima kya tokala? Ima yebhi ya tokala phala kubhanga kiki? O kwila o Jikidistá joso a tena kukwatekesa mu kikalakalu kya kubhanga maxibulu? Ni mukonda dyahi twa bhingi kukala ni mwanyu mu kikalakalu kiki?

3. Kala ki londekesa o divulu dya Nzwá 14:6; 17:3, mukonda dyahi kubhanga maxibulu kima kya tokala?

³ Mukonda dyahi kubhanga maxibulu kima kya tokala? Mukonda o maxibulu a Kidistu, ene ngó a tena kukala makamba a Nzambi. Ku mbandu yengi yó a kayela Kidistu ala ni mwenyu wambote kindala. Ala we ni kidyelelu kya kukala ku mwenyu katé ku hádya. (Tanga Nzwá 14:6; 17:3.) Mu kidi, Jezú wa tu bhana kikalakalu kya katunda. Maji ki tu bhange o kikalakalu kiki mu nguzu yetu. Mu kuzwela ya lungu ni mwene ni Jikidistá jengi, poxolo Phawulu wa soneka: “Etu twala tu jingunza, tu kalakala kumoxi phala Nzambi.” (1 Kol. 3:9) Ujitu wa dikota wa bhana Jihova ni Jezú, ku athu akwa ituxi!

4. Ihi i tu tena ku di longa mu phangu ya Ivan ni Matilde?

⁴ O kikalakalu kya kubhanga maxibulu ki tena ku tu kubhekela kisangu-sangu kya dikota! Xinganeka mu phangu ya Ivan ni muhatu’ê Matilde, ku ixi ya Colômbia. Ene a bhanene umbangi ku munzangala wa diyala a mwixanene Davier. Davier wa a ambele: “Nga mesena kulungulula o mwenyu wami, maji ki nga mu tena.” Davier wa wabhelele kyavulu o boxiki, kunwa jidroga ni uhólwa wavulu. Wa tungile ni sayí yê Erika. Ivan wa jimbulula: “Twa mateka ku mu longa o Bibidya. O dyembu yê dya kexile dikanga. Phala kubhixila-ku kwa bhingile kwenda ola javulu ni bixi. O ikoka yezalele ni malôwa. Kyoso Erika kya mono kwila, Davier wa kexile mu lungulula o ukexilu ni ifwa yê ya bolo, mwene wa mateka we ku di longa o Bibidya.” Mu kubhita thembu, Davier ka kexile dingi mu nwa jidroga ni uhólwa. O boxiki wa i xisa we. Mwene wa kazala ni Erika. Matilde wambe: “Kyoso Davier ni Erika kya a batizala, ku muvu wa 2016, etu twa lembalala o izwelu ya Davier kyoso kyambe: ‘Nga mesena kulungulula o mwenyu wami, maji ki nga mu tena.’ Etu twa sangulukile kyavulu, katé twa didi.” Sé phata, etu tu sanguluka kyavulu kyoso ki tu kwatekesa o athu kukituka maxibulu a Kidistu.

5. Kyebhi o kima kya dyanga ki twa bhingi phala kubhanga maxibulu?

⁵ O kima kya dyanga ki twa bhingi phala kubhanga maxibulu, o ‘kusota’ o athu a mesena kudilonga ya lungu ni Jihova. (Mat. 10:11) Kyoso ki tu zwela ya lungu ni Jihova ku athu oso u tu sanga, tu londekesa ni kidi kyoso kwila, tu Jimbangi ja Jihova. Kyoso ki tu belesela o kitumu kya Kidistu kya kuboka, tu londekesa kwila, tu Jikidistá ja kidi.

6. Ihi i tu tena kubhanga phala ku twívwa ku athu mu ukunji?

⁶ Sayi athu ala ni vondadi ya kudilonga o kidi kya Bibidya. Maji amukwá ku dimatekenu, nange a moneka kala ka mesena. Etu nange twa bhingi ku a swinisa kukala ni vondadi ya kudilonga dingi. Phala ku di tunda kyambote mu ukunji twa bhingi ku di sokejeka kyambote. Sola milongi ya-nda wabhela o athu u wa-nda zwela na-u. Mu kusuluka, fikisa kyebhi ki wa-nda mateka kuzwela ni athu.

7. Kyebhi ki u tena kumateka kuzwela ni muthu? Mukonda dyahi kima kyambote kwívwa o muthu ni ku mu xila?

⁷ Mu kifika u tena kwibhwidisa o mukwa dibhata: “Nga mesena kwijiya ihi i u banza ya lungu ni maka u ngeza na-u. Ibhidi yavulu i twala na-yu lelu, athu avulu ku mundu woso ene mu bhita na-yu we. Mu dyé o kwila twa bhingi nguvulu i tumina o mundu woso phala kubatula o maka?” Mu kusuluka tanga-nê o divulu dya Daniyele 2:44. Mba u tena we kwibhula o muthu: “Mu dyê, kyebhi ki tu tena kusasa  kyambote o twana? Ihi i u banza?” Mu kusuluka tanga-nê o divulu dya Matendelelu 6:6, 7. Mu kusola o maka u wa-nda zwela, xinganeka o muthu u wa-nda zwela-nê. Xinganeka kyebhi o milongi i tena kukwatesa o muthu se u dilonga o Bibidya. Kyoso ki u zwela na-u, kima kyambote kwívwa ni kuxila o ixinganeku yá. Mu kubhanga kiki, wa-nda kwa tendela kyambote. Ene a-nda kala dingi ni vondadi ya kwívwa.

8. Mukonda dyahi twa tokala kusuluka ni kukunda o athu?

⁸ Ande dya muthu kusola kudilonga o Bibidya, nange wa bhingi kithangana ni nguzu phala ku a kunda dingi. Mukonda dyahi? Mukonda kyoso ki tu kunda dingi o athu, nange ki tu a sange kubhata. Ku mbandu ya mukwá, nange wa bhingi kukunda dingi o muthu veji javulu, ande dya kuxikina kudilonga o Bibidya, katé kya divwa kyambote neye. Mu kifika, o kithulu ki kula dingi se a ki tekela ithangana yoso. Kyene kimoxi we ni muthu wa mesena ku mu zolo kwa Jihova ni Jezú. Mwene u kula dingi se a mu tangela o Mak’â Nzambi ithangana yavulu.

9-10. Mukonda dyahi tu zwela kwila, o Jikidistá joso ja kidi, a tena kukwatekesa o athu a mesena kukala maxibulu?

⁹ O Jikidistá joso a bhanga mbandu mu kukwatekesa kusanga athu a mesena kwijiya o kidi. Tu tena kusokesa o kikalakalu kyetu ni athu a mu sota kambonga ka texika. Mu ukexilu webhi? Xinganeka ya bhiti ni kambonga ka mivu itatu wa texika. Kwexile 500 ja athu akexile mu mu sota. Mu ku bhita 20 a ola o kambonga ka texikile a ka sange. Sayi muthu wa sange o mona ndenge mu dibhya dya masa. O muthu wa sange o kambonga wa  ditunu ku tambula kijingu. Mwene wambe: “Athu oso a kalakala kumoxi phala ku mu sanga.”

¹⁰ Athu avulu edi kala o kambonga kaka. Ene a dívwa kala a texika. Ene kala ni kidyelelu, maji a mesena kikwatekesu. (Efe. 2:12) Mazunda a nake a aboki ndenge, ene mu kalakala kumoxi phala kusanga o athu enyá. Nange ubheka wé kwa-nda sanga muthu wa mesena kudilonga o Bibidya neye. Maji, aboki amukwá a kalakala kumoxi mu mbambe a tena kusanga athu a mesena kudilonga o kidi kyala mu Mak’â Nzambi. Se phang ya diyala mba ya muhatu u sanga muthu u kituka dixibulu dya Kidistu, oso a kwatekesa phala ku mu sanga a tena kusanguluka.

11. Né mwene se kwa mu longa o Bibidya ku muthu, u tena kukwatesa kubhanga maxibulu mu mawukexilu ebhi?

¹¹ Né mwene se mu kithangana kiki kwa mu longa o Bibidya ku muthu, eye u tena kusuluka ni kukwatesa kubhanga maxibulu, mu mawukexilu engi. Mu kifika, se u mona muthu wa ubhe mu Kididi kya Ubhezelu, eye u tena ku mu sangesa ni henda ni ku mu kwatekesa. Se u londekesa henda mu ukexilu yú, u tena ku mu kwatekesa kumona kwila, tu Jikidistá ja kiki. (Nzwá 13:34, 35) Né mwene se u bhana itambwijilu ya butu mu yônge, u londekesa ku athu a ubhe se kyebhi kya tena kuzwela ya lungu ni kixikanu kyâ, ni kidi kyoso ni kulenduka. Eye u tena we kutunda mu kikalakalu kya kuboka ni aboki a ubhe. Ni ku a kwatekesa kukalakala ni Bibidya phala kulonga o athu. Mu kubhanga kiki, wa-nda kwa longa kukayela o phangu ya Kidistu.—Luka 10:25.

12. O kwila twa bhingi kukala ni mawuhete a katunda phala kulonga o athu kukituka maxibulu? Jimbulula.

¹² Sé-ku muthu mudyetu wa tokala kubanza kwila, wa bhingi kukala ni mawuhete a katunda phala kulonga o athu kukituka maxibulu a Jezú. Mukonda dyahi? Tala o phangu ya Faustina, wa tungu ku ixi ya Bolívia. Kyoso kya mateka ku di lunga ni Jimbangi ja Jihova, mwene kejidile kutanga. Tundé kya mateka, mwene wa mu tanga-ku kya bhofele. Lelu a mu batizala kyá, wa wabhela kulonga akwá. Mwene wene mu longa maxibulu atanu semana joso. Sumbala Faustina kejidile kutanga kyambote kala o maxibulu mê, maji mwene wa kwatekesa kisamanu kya athu ku di batizala.—Luka 10:21.

13. Né mwene se ki twala ni kithangana kya soko, mabesá ebhi u tu tena kutambula mu kikalakalu kya kubhanga maxibulu?

¹³ Jikidistá javulu kala ni kithangana kya soko, mukonda ala ni ikalakalu yavulu. Né kiki, a sota kithangana phala kulonga o Bibidya ku athu. Kubhanga kiki, kyene mu a sangulukisa kyavulu. Tala o phangu ya Melanie ku mbanza ya Alasca. Wexile mu sasa mona a muhatu wa dinake dya mivu ubheka wê.  Mwene wexile mu kalakala kizuwa kya muvimba, ni kulanga tat’ê wa kexile ni uhaxi wa câncer. Melanie mwene ngó wexile Mbangi ya Jihova mu banza yê ya dikexidile. Mwene wa kexile mu samba ithangana yoso, phala kukala ni nguzu ya kuboka sumbala ni mbambi, mukonda wa mesenene kyavulu kusanga muthu phala ku mu longa o Bibidya. Ku disukilu wa sange Sala wa sangulukile kyavulu mu kwijiya kwila Nzambi wala ni dijina. Mu kubhita kithangana, Sala wa xikina ku di longa o Bibidya. Melanie wambe: “Mu ji Sesa mu usuku ngi bhwila kyavulu, maji eme ni mon’ami, twene mu katula mbote yavulu mu kulonga o Bibidya kwa Sala. Twexile mu sanguluka mu kutokwesa milongi phala kusanga itambwijilu ya ibhwidisu ya Sala. Twa sangulukile we mu kumona Sala kukituka dikamba dya Jihova.” Sala wa kolokotele mu izukutisu, wa xisa o ngeleja yê anga a mu batizala.

14. (a) Kyebhi o yo a bhanga o maxibulu a difu ni atambi a jimbiji? (b) Kyebhi ki u divwa mu kutanga o izwelu ya Phawulu mu mukanda wa 2 Timote 4:1, 2?

¹⁴ Né mwene se ku sange luwa muthu wa mesena kukituka dixibulu, suluka ni kusota. Lembalala kwila, Jezú wa sokesa yo a bhanga o maxibulu ni atambi a jimbiji. Ande dya kusanga o jimbiji, o atambi a bhita ola javulu ni kutamba. Mu veji javulu, ene a kalakala katé mu usuku mba mu kamenemene. Sayi ithangana, ene a bhinga kwenda njila ya lebha. (Luka 5:5) Kyene we kimoxi ni yo a bhanga o maxibulu. Sayi aboki, a bhanga ji ola javulu, ‘atamba’ ni mwanyu woso mu ididi ni mu ithangana ki idifu.  Mukonda dyahi? Phala kudisanga dingi ni athu avulu. Oso a bhanga dingi nguzu, a tambula o dibesá dya kusanga athu a wabhela o njimbu yetu. O kwila utena kuboka mu ola i wejiya kwila, wa-nda tena kusanga athu mba kididi ki wejiya kwila mwala athu avulu?—Tanga 2 Timote 4:1, 2.

15. Mukonda dyahi kulonga o Bibidya kubhinga kukala ni mwanyu?

¹⁵ Mukonda dyahi kulonga o Bibidya kubhinga kukala ni mwanyu? Kiki ki bhita mukonda twa bhingi kukwatekesa o dixibulu kwijiya ni kuzola o milongi ya Bibidya. Twa bhingi we ku mu kwatekesa kwijiya ni kuzola Jihova, Wavu o Bibidya. Ki twa tokala ngó kulonga ku dixibulu ihi ya tumina Jezú ku maxibulu mê. Maji twa tokala we ku a longa kyebhi kya belesela o itumu yiyi ku mwenyu wâ. Kyoso kyaya ni kubhanga nguzu phala kukayela o itumu ya Bibidya, twa tokala ku a kwatekesa ni mwanyu woso. Sayi maxibulu, a tena kulungulula o ixinganeku ni ifwa yâ mu kubhita tu mbeji, amukwá a laleka dingi.

16 Ihi i wa dilongo mu musoso wa Raul?

¹⁶ Sayi musoso wa bhiti ni mukunji wa jixi ku Peru, ulondekesa o mbote ya kukala ni mwanyu. Mwene wambe: “Nga longo o Bibidya kwa Raul ni kikwatekesu kya madivulu ayadi. Maji mwene wexile hanji ni maka avulu ku mwenyu wê. Wexile ni maka mu ukaza, wexile mu xinga, o twana twê ki twexile ku mu xila mukonda dya wendelu wê. Maji, mwene wa mateka kuya mu yônge mu semana joso. Kyenyiki, nga suluka ni kukwatekesa, kikale mwene, kikale o mwiji wê. Tundé ki nga mateka ku mu longa, kwa bhiti mivu itatu phala ku mu batizala.”

17. Ihi i twa-nda dilonga mu milongi ya kayela?

¹⁷ Jezú wa tu tendelesa: “Enu-phe ndenu, mwa ka longe jixibulu ku akwa jixi joso.” Phala kukumbidila o kitumu kiki, mu veji javulu twene mu zwela ni athu ala ni ixinganeku ki i difu ni yetu, ni yó ka tokala mu jingeleja mba yó ka xikina kwila kwene Nzambi. O milongi ya kayela ya-nda londekesa kyebhi ki tu tena kutudila o njimbu yambote ku athu yá.