1-2. (a) Mungya musoñanya wa Yesu udi mu Mateo 28:18-20, le i mwingilo’ka mukatampe upelwe kipwilo kya bwine Kidishitu? (b) Le i bipangujo’ka byotusa kulondolola mu kino kishinte?

BATUMIBWA kebābudilwepo kusangala kitatyi kyobēbungile ku lūlu. Yesu pa kupwa kusanguka, wēbanenene baketane ku kino kifuko. (Mat. 28:16) Padi kino kyo kitatyi kyaāmwekēle “banabetu 500 ne musubu kya pamo.” (1 Ko. 15:6) Mwanda waka Yesu wānenene bandi bana ba bwanga bakebunge? I mwanda wa kwibapa mwingilo usangaja. Wēbasoñenye amba: “Nanshi, endai mukalonge bana ba bwanga mu bantu ba ku mizo yonso.”​—Tanga Mateo 28:18-20.

² Bana ba bwanga bāivwene binenwa bya Yesu, bābadilwe mu kipwilo kibajinji kya bwine Kidishitu. Mwingilo mukatampe wa kino kipwilo wādi wa kulonga bana babwanga bavule ba Kidishitu. * Dyalelo, kudi bipwilo tununu makumi na makumi bya bene Kidishitu ba bine kujokoloka ntanda yonso, kadi mwingilo mukatampe wingila bino bipwilo i umo onka. Mu kino kishinte, tusa kulondolola’mo bino bipangujo biná: Mwanda waka kulonga bana ba bwanga kudi na mvubu mpata? Le kulomba bika ne bika? Le i bene Kidishitu bonso ba kulonga bana ba bwanga? Ne mwanda  waka tusakilwa kitūkijetyima potwingila uno mwingilo?

3. Mungya Yoano 14:6 ne 17:3, mwanda waka mwingilo wa kulonga bana ba bwanga udi na mvubu mpata?

³ Mwanda waka mwingilo wa kulonga bana ba bwanga udi na mvubu mpata? Mwanda i enka bana ba bwanga ba Kidishitu kete babwanya kupwana na Leza. Ne kadi, boba balonda Kidishitu badi na būmi buyampe dyalelo, kadi badi na lukulupilo lwa kukekala na būmi bwampikwa mfulo mu mafuku a kumeso. (Tanga Yoano 14:6; 17:3.) Na bubine, Yesu i mwitupe mwingilo wa mvubu, ino ketwingilanga’opo batwe bene. Mutumibwa Polo wālembele pa mwanda wandi ne wa bengidi nandi bakwabo amba: “Twi bengidi bengila pamo na Leza.” (1 Ko. 3:9) Bine, dino shadyo i dyese dyobapele bantu bampikwa kubwaninina kudi Yehova ne Kidishitu!

4. Le i ñeni’ka yotubwanya kuboila ku myanda yemwenine ba Ivan ne Matilde?

⁴ Mwingilo wa kulonga bana ba bwanga ubwanya kwituletela nsangaji mikatampe. Tulangulukilei bidi pa kimfwa kya Ivan ne wandi mukaji, Matilde, ba mu Kolombi. Basapwidile nsongwalume umo witwa bu Davier, webalombola’mba: “Nsakanga kushinta būmi bwami, ino nkomenwa.” Davier wadi muyuke biyampe makayo a kwikupila bikoni, utoma dyamba, ukolwa mālwa, kadi wadi ushikete na wandi abala Erika. Ivan ushintulula’mba: “Twashilwile kukamupempula mu kabo kakibundi ka kufula, twenda mansá mavule na makinga mu mashinda a bitoto. Erika paamwene amba Davier washinta mwiendelejo ne mwikadila wandi, nandi washilula kwifunda Bible.” Kupwa, Davier waleka kutoma dyamba, mālwa, ne kwikupila bikoni. Kadi wasonga ne Erika. Matilde unena’mba: “Ba Davier ne Erika pobabatyijibwe mu 2016, twavulukile byadi bivudile kunena Davier amba, ‘Nsakanga kushinta būmi bwami, ino nkomenwa.’ Twasangele bininge ne impolo yetusūma.” Na bubine, tusangalanga bininge kitatyi kyotukwasha bantu bekale bana ba bwanga ba Kidishitu.

5. Le i kintu’ka kibajinji mu mwingilo wa kulonga bana ba bwanga?

⁵ Kintu kibajinji mu mwingilo wa kulonga bana ba bwanga i ‘kukimba’ boba ba mityima miyampe. (Mat. 10:11) Na bubine tulombolanga’mba twi Batumoni ba Yehova na kusapwila bantu bonso botutana. Tulombolanga’mba twi bene Kidishitu ba bine na kukōkela musoñanya wa Kidishitu wa kusapula.

6. Le i bika bibwanya kwitukwasha tusapule biyampe?

⁶ Bantu bamo basangelanga kwifunda bubine bwa mu Bible, ino bavule botwitana nabo bamwekanga bu kebasangelangapo ku ngalwilo. Tubwanya padi kulangula kusangela kwabo. Pa kusapula biyampe, tufwaninwe kwiteakanya senene. Tonga myanda mipotoloke ikasangela bantu boketana nabo. Kupwa teakanya ntwelelo ya mwanda ne mwanda.

7. Le i muswelo’ka obwanya kushilula kwisamba na muntu, ne mwanda waka i biyampe kumuteja ne kumulēmeka?

⁷ Kimfwa, ubwanya kwipangula mwinē njibo amba: “Le nkokeja kuyuka molangila pa uno mwanda? Makambakano mavule otwikonda nao dyalelo asusulanga bantu mu ntanda yonso. Le ulanga tusakilwa umbikalo wa ntanda wa kupwa makambakano ntanda yonso?” Kupwa  ubwanya kwisambila nandi pa Danyele 2:44. Nansha padi ubwanya kwipangula muntu amba: “Molangila, i bika bya kulonga pa kutamija bana senene? Le ulanga’po namani?” Kupwa mwisambilei pa Kupituluka mu Bijila 6:6, 7. Mwanda o-onso otonga kukesambila’po, langulukila bidi pa bantu bakewivwana. Langulukila pa muswelo obakamwena mu kwifunda byobya bine bifundija Bible. Powisamba nabo, i biyampe kwibateja ne kulēmeka mumweno wabo. Mu uno muswelo, ukebevwana biyampe, kadi nabo bakasangela padi kukuteja.

8. Mwanda waka kulonga kujokela’mo kulombanga kininga?

⁸ Kumeso kwa muntu etabije kwifunda Bible, padi bikakulomba kitatyi ne bukomo bwa kumujokela. Mwanda waka? Mwanda bantu kebekalangapo padi ku mobo kitatyi kyotwibajokela. Ne kadi, padi bikakulomba kwibajokela misunsa mivule pa kwitabija kwifunda Bible. Vuluka’mba mutyi utamanga biyampe shi beusangila mema kitatyi ne kitatyi. Muswelo umo onka, muntu usangedile nandi ukatamija buswe bwaswele Yehova ne Kidishitu shi twisambila nandi pa Kinenwa kya Leza kitatyi ne kitatyi.

9-10. Mwanda waka tubwanya kunena’mba mwingidi ense mwine Kidishitu ukwashanga ku mwingilo wa kusokola bantu ba mityima miyampe?

⁹ Mwingidi ense mwine Kidishitu ukwashanga ku mwingilo wa kusokola bantu ba mityima miyampe. Tubwanya kudingakanya uno mwingilo na kukimba mwana mujimine. Muswelo’ka? Tulangulukilei pa kimfwa kimweke kya mwana wa myaka isatu wajimine. Bantu badi bamukimba i kintu kya bantu 500. Mfulo mfulō, kintu kya mansá 20 pa kupita’po, muntu umo wamusokola mu budimi. Uno muntu wapelele kutumbijibwa pa mwanda  wa mwana waasokwele. Wanenene amba: “I bantu tutwa na tutwa balonga bukomo bwa kusokola uno mwana.”

¹⁰ Bantu bavule badi pamo bwa uno mwana. I bajimine. Kebadipo na lukulupilo, ino basakilwa bukwashi. (Ef. 2:12) Twi bantu midiyo mwānda ne kupita balonga bukomo bwa kusokola boba bafwaninwe. Padi kwasokwele muntu wa kwifunda nandi Bible. Inoko, padi basapudi bakwabo bomwingila nabo mu mwaba umo ke basokole muntu usaka kwifunda bubine budi mu Kinenwa kya Leza. Shi tutu nansha kaka wasokwele muntu waikala ke mwanā bwanga wa Kidishitu, muntu yense wakweshe ku mwingilo wa kukimba udi na bubinga bwa kusangela.

11. Nansha shi kwendejangapo kifundwa kya Bible, le i miswelo’ka mikwabo yobwanya kukwasha ku mwingilo wa kulonga bana ba bwanga?

¹¹ Nansha shi pano kwendejangapo kifundwa kya Bible, ubwanya kukwasha mu miswelo mikwabo ku mwingilo wa kulonga bana ba bwanga. Kimfwa, ubwanya kutundaila bapya ne kupwana nabo kitatyi kyobāya ku Njibo ya Bulopwe. Mu uno muswelo, ubwanya kwibakwasha bakulupile amba buswe bwituyukanyanga bu bene Kidishitu ba bine. (Yoa. 13:34, 35) Malondololo oleta ku kupwila, nansha ekale mēpi, abwanya kufundija bapya nabo balondolole’ko mu muswelo muyampe kadi bya bulēme. Kadi ubwanya kwenda na musapudi mupya mu busapudi ne kumukwasha engidije Bisonekwa pa kulanguluka na bantu. Shi ulonge namino, ukamufundija eule Kidishitu.​—Luka 10:25-28.

12. Le tusakilwa bwino bwa pa bula pa kulonga bana ba bwanga? Shintulula.

¹² Ketufwaninwepo kulanga’mba tusakilwa bwino bwa pa bula pa kufundija bakwetu bekale ke bana ba bwanga ba Yesu. Mwanda waka? Tulangulukilei bidi pa kimfwa kya Faustina, ushikatanga mu Bolivi. Kadipo uyukile kutanga paashilwile kwifunda na Batumoni ba Yehova. Ino pano katañenga’ko bidi. Pano ke mubatyijibwe kadi usenswe kufundija bakwabo. Divule dine wendejanga bifundwa bya Bible bitano yenga ne yenga. Nansha Faustina byakabwanyapo kutanga biyampe na mutangila bantu baefunda nabo, i mukwashe bantu basamba bafike ne ku kubatyijibwa.​—Luka 10:21.

13. Nansha shi twi bavudilwe bya kulonga, le i madyese’ka amoamo otubwanya kwimwena mu mwingilo wa kulonga bana ba bwanga?

¹³ Bene Kidishitu bavule badi na bintu bivule bya mvubu bya kulonga. Inoko, belamijanga’ko kitatyi kya kwendeja bifundwa bya Bible, kadi kino kibaletelanga nsangaji mikatampe. Tulangulukilei pa kimfwa kya Melanie. Wadi ulelele bunka wandi mwana mwana-mukaji wa myaka mwānda mu Alaska. Kadi wadi wingila kaji  ka mansá mavule ne kukwatakanya mbutwile wandi wadi ubela dyaya. Melanie wadi Kamoni bunka bwandi mu kibundi kyabo kya kufula. Wadi ulombela mwanda wa ekale na bukomo bwa kusapula pampikwa kubanga mashika, mwanda wadi ukimba kusokola muntu wa kwifunda nandi Bible. Mfulo mfulō, wetana na Sara, mwine wasangele bininge pa kuyuka dijina dya Leza. Kupwa Sara waitabija kwifunda Bible. Melanie unena’mba: “Mu Dya Butano kyolwa, nadi mpungila, ino ami ne wami mwana mwana-mukaji twadi tumwena mu kwendeja kino kifundwa. Twadi tukimba malondololo ku bipangujo bya Sara, kadi twasangele bininge pawaikele ke mulunda na Yehova.” Sara waūminine na bukankamane kukankajibwa, watamba mu kyabo kipwilo, kupwa wabatyijibwa.

14. (a) Le mwingilo wa kulonga bana ba bwanga udingakene namani na buluwe? (b) Le binenwa bya Polo bidi mu 2 Temote 4:1, 2 bikulomba ulonge bika?

¹⁴ Nansha shi mu mwingilo obe kwasokwele muntu usaka kwikala mwanā bwanga, kokikōka. Vuluka’mba Yesu wādingakenye mwingilo wa kulonga bana ba bwanga na buluwe bwa lui. Babiluwe babwanya kulonga mansá mavule kwampikwa kukwata keta. Divule dine bapoyanga kufika’nka ne bufuku nansha ku lubanga, kadi kyaba kimo bendanga’nka ne kulampe. (Luka 5:5) Mu muswelo umo onka, bantu bamo balonga bana ba bwanga ‘bapoyanga’ mansá mavule na kitūkijetyima mu bitatyi ne bifuko bishileshile. Mwanda waka? Mwanda wa kutana bantu bavule.  Divule dine boba bekankila’ko bapalwanga mpalo na kutana bantu basangela musapu wetu. Le ubulwepo kusapula mu kitatyi kyobwanya kutana bantu, nansha pa kifuko kyobwanya kwibatana?​—Tanga 2 Temote 4:1, 2.

15. Mwanda waka kwendeja bifundwa bya Bible kulombanga kitūkijetyima?

¹⁵ Mwanda waka kwendeja bifundwa bya Bible kulombanga kitūkijetyima? Bubinga bumo bidi, i mwanda tufwaninwe kulonga bivule kupita’ko’tu kukwasha mwifundi ayuke bufundiji bwa mu Bible ne kwibusanswa. Tufwaninwe kukwasha mwifundi ayuke ne kusanswa Yehova, Nsulo mine kutambile Bible. Kadi, kutentekela pa kufundija mwifundi byobya byobasakila bana ba bwanga kudi Yesu, tufwaninwe ne kumukwasha ayuke mwa kwiendejeja bu mwine Kidishitu wa bine. Tufwaninwe kumukwasha na kitūkijetyima palonga bukomo bwa kwingidija misoñanya ya mu Bible. Bamo babwanya kushinta mulangilo ne bibidiji byabo mu myeji’tu mityetye; bakwabo nabo bibalombanga kitatyi kilampe.

16. Le i ñeni’ka yowaboila ku kimfwa kya Raúl?

¹⁶ Mishonele umo wa mu Peru wemwenine mwanda umo ulombola’mba kitūkijetyima kidi na mvubu. Uno mishonele unena’mba: “Nefundile Bible na muntu umo witwa bu Raúl mu mabuku abidi. Ino wadi ukikonda na makambakano makatampe mu būmi bwandi. Wadi na bimyanda mu busongi, utukana mutonko, kadi bana kebadipo bamulēmekele. Wadi wiya ku kupwila kitatyi ne kitatyi, nami naendelela na kumupempula mwanda wa kumukwasha aye ne kyandi kisaka. Myaka isatu ne musubu pa kupita’po, wabwanya bisakibwa bya kubatyijibwa.”

17. Le i bika byotukesambila’po mu kishinte kilonda’ko?

¹⁷ Yesu wētunenene amba: “Endai mukalonge bana ba bwanga mu bantu ba ku mizo yonso.” Potwingila uno mwingilo, tuvudile kwisamba na bantu badi na mulangilo mwishile bininge na wetu, kubadila’mo ne boba kebadipo mu bipwilo, ne boba batuna kwikala’ko kwa Leza. Kishinte kilonda’ko kikesambila pa muswelo otubwanya kusapwila bantu ba uno muswelo.