1-2. a) Bilondeshile dîyi dituma dia Yezu didi mu Matayi 28:18-20, tshisumbu tshia bena Kristo tshidi ne mudimu munene kayi? b) Netuandamune nkonko kayi?

BAPOSTOLO bavua pamuapa bindile Yezu ne muoyo kuulu kuulu pavuabu badisangishe ku mukuna kampanda. Pavua Yezu mubishibue ku lufu, uvua mubambile bua batuilangane nende ku mukuna au. (Mat. 28:16) Pamuapa ke dîba divuaye ‘mumuenekele bana betu bapite pa 500 musangu umue.’ (1 Kol. 15:6) Bua tshinyi uvua mubabikidishe kuntu aku? Bua kubapesha mudimu muimpe wa dikema. Wakabambila ne: “Ndayi nuvuije bantu ba mu bisamba bionso bayidi.”​—Bala Matayi 28:18-20.

² Bayidi bavuapu pavua Yezu muambe mêyi au bakalua kulua bena mu tshisumbu tshia bena Kristo tshia mu bidimu lukama bia kumpala. Mudimu munene uvua nawu tshisumbu atshi uvua wa kuvuija bantu bakuabu bayidi ba Kristo. * Lelu bisumbu bia bena Kristo balelela bidi binunu ne binunu pa buloba bujima, ne bisumbu bionso ebi bidi ne mudimu wa muomumue au. Mu tshiena-bualu etshi netuandamune nkonko inayi eyi: Bua tshinyi kuvuija bantu bayidi kudi ne mushinga wa bungi? Ntshinyi tshitudi ne bua kuenza? Muena Kristo yonso udi ne tshidiye wenza mu mudimu wa kuvuija bantu bayidi anyi? Bua tshinyi bidi bikengela tuikale ne lutulu patudi tuenza mudimu eu?

3. Bilondeshile Yone 14:6 ne 17:3, bua tshinyi kuvuija bantu bayidi kudi ne mushinga wa bungi?

³ Bua tshinyi kuvuija bantu bayidi kudi ne mushinga wa bungi? Bualu anu bayidi ba Kristo ke badi mua kulua balunda ba Nzambi. Bualu bukuabu, bantu badi balonda Kristo badi ne nsombelu muimpe mpindieu ne badi ne ditekemena dia kuikala ne muoyo kashidi pa buloba matuku atshilualua. (Bala Yone 14:6; 17:3.) Bushuwa, mudimu udi Yezu mutupeshe eu mbujitu bunene, kadi katuena tudienzelawu to. Mupostolo Paulo wakafunda bua bualu buende ne bua bena diende bakuabu ne: “Tudi benzejanganyi ba mudimu ne Nzambi.” (1 Kol. 3:9) Edi ndiakalenga dinene didi Yehowa ne Yezu bapeshe bantu bapange bupuangane!

4. Tshilejilu tshia Ivan ne Matilde tshidi tshitulongesha tshinyi?

⁴ Mudimu wa kuvuija bantu bayidi udi mua kutupetesha disanka dia bungi. Tuangate tshilejilu tshia Ivan ne mukajende Matilde ba mu ditunga dia Colombie. Bavua bayishe muntu kampanda diende Davier, ne uvua mubambile ne: “Ndi musue kushintuluka, kadi mbinkolele.” Davier uvua mututshianganyi wa mbata, munu wa bintu bitu binyungulula mutu, uvua unua maluvu upitshisha, ne uvua mubanjije nsongakaji kampanda diende Erika. Ivan udi wamba ne: “Tuakatuadija kuya kumutangila mu musoko wa kule uvuaye au. Tuvua tuya ne makalu, tuenza mêba a bungi mu njila ya bitotshi. Pavua Erika umona muvuaye wenda ushintuluka, wakitaba bua kulonga Bible pamue nende.” Panyima pa matuku, Davier wakalekela kunua bintu bitu binyungulula mutu ne maluvu, kulekela ne dinaya dia kututangana mbata, kuselaye Erika uvuaye mubanjije. Matilde udi wamba ne: “Pakabatizabu Davier ne Erika mu 2016, tuakavuluka muvua Davier utuambila ne: ‘Ndi musue kushintuluka, kadi mbinkolele.’ Tuakasanka bikole, tuetu kuasa ne muadi.” Kakuyi mpata, patudi tuambuluisha bantu bua balue bayidi ba Kristo tudi tupeta disanka dia bungi.

5. Mbualu kayi bua kumpala butudi ne bua kuenza bua kuvuija bantu bayidi?

⁵ Bualu bua kumpala butudi ne bua kuenza bua kuvuija bantu bayidi ‘nkukeba’ bantu badi bakaje mioyo yabu. (Mat. 10:11) Patudi tudienzeja bua kumanyisha bantu bonso ba mu teritware wetu lumu luimpe ne tutumikila dîyi didi Kristo mututumine bua kuyisha, tudi tuleja mutudi bushuwa Bantemu ba Yehowa ne bena Kristo balelela.

6. Ntshinyi tshidi mua kutuambuluisha bua kuyisha bimpe?

⁶ Bamue bantu batu basue kulonga malu a mu Bible, kadi bantu ba bungi batutu tutuilangana nabu batu bamueneka ku ntuadijilu bu ne: ki mbasue to. Bidi mua kutulomba bua kubajula dijinga dia kulonga. Bua kuyisha bimpe, bidi bikengela kudilongolola bimpe menemene. Ikala usungula biena-bualu bidi mua kukoka ntema ya bantu. Pashishe longolola muudi mua kutuadija nabi.

7. Mmunyi muudi mua kutuadija kuyukila ne muntu? Bua tshinyi mbimpe kumuteleja kuyi ubipisha bidiye wamba?

⁷ Tshilejilu, udi mua kuebeja muntu ne: “Utu wamba pebe bishi bua bualu ebu: Malu a bungi atudi nawu lelu adi atatshisha bantu pa buloba bujima. Buebe wewe, kudi mbulamatadi udi mua kujikija ntatu eyi anyi?” Pashishe nudi mua kukonkonona Danyele 2:44. Anyi udi mua kuebeja muntu ne: “Buebe wewe, ntshinyi tshidi baledi mua kuenza bua kukolesha bana babu bimpe?” Pashishe nudi mua kukonkonona Dutelonome 6:6, 7. Nansha wewe  musungule tshiena-bualu kayi, ikala ne bantu mu lungenyi. Difuanyikijila malu mimpe apetabu pamanyabu tshidi Bible ulongesha menemene. Paudi uyukila nabu, mbimpe ubateleje kuyi ubipisha bidibu bamba. Dîba adi neubumvue bimpe menemene, ne pamuapa nebikale bipepele bua kukutelejabu pabu.

8. Bua tshinyi bidi bikengela kupinganyina muntu misangu ya bungi?

⁸ Kumpala kua muntu kuitaba bua kulonga Bible, bidi mua kukulomba bua kudifila bua kumupinganyina misangu ya bungi. Bua tshinyi? Bualu pamuapa musangu muibidi utuamupinganyina, katuakumupeta kumbelu anyi kakuikala ne dîba dia kuyukila netu to. Bualu bukuabu, kumpala kua muntu kukuibidila ne kudiumvua mudilekelele bua kuitaba bua kulonga Bible, bidi mua kukulomba bua kumupinganyina njila ne njila. Tshilejilu, bobu bela mutshi mâyi pa tshibidilu, udi mua kufika ku dikola kakuyi lutatu. Bia muomumue, tuetu tulongesha muntu Dîyi dia Nzambi pa tshibidilu, udi mua kufika ku dinanga Yehowa ne Yezu bikole.

9-10. Bua tshinyi tudi tuamba ne: mumanyishi yonso udi ne tshidiye wenza mu mudimu wa kukeba bantu badi basue kulua bayidi ba Kristo?

⁹ Mumanyishi yonso udi ne tshidiye wenza mu mudimu wa kukeba bantu badi basue kulua bayidi ba Kristo. Tudi mua kufuanyikija mudimu eu ne dikeba dia muana udi mujimine. Mushindu kayi? Tuangate tshilejilu tshia bualu buvua buenzeke ebu: Muana kampanda wa balume wa bidimu bisatu uvua mujimine. Bantu bu 500 bakaditua mu dimukeba. Bamane kuenza mêba bu 20, umue wa kudibu wakafika ku dimupeta mu budimi kampanda bua matala. Muntu au kakajinga bua bamutumbishe bua muvuaye mupete muana au to. Wakamba  ne: “Muana eu mmumueneke bualu mbamukebe kudi bantu nkama ne nkama.”

¹⁰ Lelu bantu ba bungi mbafuanangane ne muana au. Badi badimona bajimine. Kabena ne ditekemena to, nunku badi dijinga ne diambuluisha. (Ef. 2:12) Bantemu bapite pa miliyo 8 mbaditue mu mudimu wa kukeba bantu ba mushindu eu. Pamuapa kuena upeta muntu wa kulonga nende Bible to. Kadi bena Kristo nebe bakuabu badi bayisha anu mu teritware wenu au badi mua kupeta bantu badi basue kulonga bulelela bua mu Dîyi dia Nzambi. Padi muena Kristo netu upeta muntu, ne muntu au ulua muyidi wa Kristo, muanetu yonso uvua muditue mu dikeba bantu ba muoyo muakane udi ne bualu bua kusankila.

11. Nansha wewe kuyi ulonga Bible ne muntu, mmalu kayi audi mua kuenza bua kuambuluisha mu mudimu wa kuvuija bantu bayidi?

¹¹ Nansha wewe kuyi ulonga Bible ne muntu, kudi malu audi mua kuenza bua kuambuluisha mu mudimu wa kuvuija bantu bayidi. Tshilejilu, udi mua kuakidila bantu bapiabapia badi balua mu bisangilu ne kubambuluisha. Dîba adi, udi mua kubafikisha ku dimona ne: tudi bena Kristo balelela bualu tudi ne dinanga. (Yone 13:34, 35) Mandamuna audi ufila mu bisangilu, nansha owu mîpi menemene, adi mua kulongesha bantu bapiabapia mua kuandamuna ne muoyo mujima ne kanemu bua kuleja ditabuja diabu. Udi kabidi mua kuyisha ne mumanyishi mupiamupia ne kumuleja mua kueleshisha bantu meji ne mvese ya mu Bible. Paudi wenza nanku, udi umulongesha mua kuidikija Kristo.​—Luka 10:25-28.

12. Bidi bikengela tuikale ne mamanya a pa buawu bua kuvuija bantu bayidi anyi? Fila tshilejilu.

¹² Muntu nansha umue wa kutudi kedi meji ne: bidi bikengela kuikala ne mamanya a pa buawu bua kuvuija bantu bayidi ba Yezu to. Bua tshinyi tudi tuamba nanku? Tuangate tshilejilu tshia Faustina wa mu ditunga dia Bolivie. Pavuaye mupetangane ne Bantemu ba Yehowa, kavua mumanye kubala to. Mpindieu ukadi mumanye kubala ndambu. Ukadi mubatijibue, ne utu musue kulongesha bantu bakuabu. Utu ulonga ne bantu batanu lumingu luonso. Nansha mudi Faustina kayi muanji kumanya kubala bimpe bu balongi bende ba bungi, ukadi muambuluishe bantu basambombo, bafike too ne ku batismo.​—Luka 10:21.

13. Nansha tuetu ne bia bungi bia kuenza, ngamue masanka kayi atudi tupeta patudi tuvuija bantu bayidi?

¹³ Bena Kristo ba bungi batu ne malu a bungi a mushinga atu abangata dîba. Nansha nanku, batu bakeba dîba dia kulonga Bible ne bantu, ne bualu ebu butu bubapetesha disanka dia bungi. Tuangate tshilejilu tshia Melanie udi mu tshimenga kampanda tshia kule tshia mu Alaska. Uvua udikoleshila muanende wa bakaji wa bidimu 8, wenza mudimu uvua umuangata mêba a bungi, ne  ulama mamuende uvua ne kansere. Melanie nkayende ke uvua Ntemu mu tshimenga atshi. Bu muvuaye ne dijinga dikole dia kupeta muntu wa kulongeshaye Bible, uvua usambila pa tshibidilu bua kupeta bukole bua kuya kuyisha nansha muvuaku mashike makole menemene. Ndekelu wa bionso, wakapetangana ne Sara; Sara wakasanka bikole pavuaye mumvue ne: Nzambi utu ne dîna. Panyima pa matuku makese, wakitaba bua kulonga Bible. Melanie udi wamba ne: “Mu Ditanu dionso dilolo, mvua ndiumvua mutshioke, kadi meme ne muananyi tuvua tuya kulonga nende, ne bualu abu buvua butuambuluisha tuetu bonso babidi. Tuvua tusanka bua kuenza makebulula bua kuandamuna nkonko ya Sara, ne tuvua ne disanka dia bungi dia kumumona ulua mulunda wa Yehowa.” Sara wakatantamena buluishi bua kudi bena mu tshitendelelu tshiabu ne bena mu dîku diabu ne dikima dionso, kumbukaye mu tshitendelelu atshi, pashishe kubatijibuaye.

14. a) Kuvuija bantu bayidi nkufuanangane ne kuloba mushindu kayi? b) Mêyi a Paulo adi mu 2 Timote 4:1, 2 adi akusaka bua kuenza tshinyi?

¹⁴ Nansha wewe kuyi muanji kupeta muntu udi musue kulua muyidi, kutshioki to. Yezu uvua mufuanyikije mudimu wa kuvuija bantu bayidi ne wa kuloba. Balobi badi mua kulua kukuata tshikele nansha tshimue kadi bamane kuenza mêba a bungi. Misangu ya bungi batu baloba butuku menemene anyi patshiatshia, imue misangu baya ne buatu miaba mile. (Luka 5:5) Bia muomumue, bamue bena Kristo netu batu ne lutulu, bayisha mêba a bungi  mu bikondo bishilashilangane ne miaba mishilashilangane. Bua tshinyi? Bua bamone mua kutuilangana ne bantu ba bungi. Bana betu badi badienzeja bikole batu anu bafika ku dipeta bantu badi banyisha mukenji wetu. Kuenaku mua kuyisha mêba audi mua kupeta bantu anyi muaba uudi mua kubapeta bipepele anyi?​—Bala 2 Timote 4:1, 2.

15. Bua tshinyi bidi bikengela kuikala ne lutulu patudi tulonga Bible ne bantu?

¹⁵ Bua tshinyi bidi bikengela kuikala ne lutulu patudi tulonga Bible ne bantu? Bualu tudi basue kuambuluisha balongi ba Bible bua bamanye malu adi Bible ulongesha ne baanange. Tudi kabidi basue kubambuluisha bua bamanye Yehowa Muena Bible ne bamunange. Bualu bukuabu, pa kumbusha dibalongesha malu adi Yezu ulomba bayidi bende bua kuenza, mbimpe tubalongeshe kabidi mua kuatumikila. Mbimpe tubambuluishe ne lutulu padibu badienzeja bua kutumikila mêyi manene a mu Bible. Bamue balongi batu bashintulula ngelelu wabu wa meji ne bibidilu biabu mu ngondo mikese patupu; bua bakuabu bobu, bitu bikengela ngondo ya bungi.

16. Bualu bua Raúl mbukulongeshe tshinyi?

¹⁶ Bualu buvua bufikile muanetu kampanda uvua misionere mu Pérou budi buleja mudi kuikala ne lutulu kuimpe. Wakamba ne: “Mvua mulonge ne Raúl mikanda ibidi. Kadi utshivua ne malu avua amutatshisha bikole. Uvua mu dibaka dia ndululu, muikale ne tshiakuidi tshibole, ne uvua ne bana bavua kabayi bamunemeka bua tshikadilu tshiende. Uvua ubuela mu bisangilu pa tshibidilu. Nunku ngakatungunuka ne kuya kumutangila bua kumuambuluisha yeye ne dîku diende. Anu panyima pa bidimu bipite pa bisatu ke pakakumbanaye bua kubatijibua.”

17. Ntshinyi tshitualonga mu tshiena-bualu tshialonda?

¹⁷ Yezu mmutuambile bua ‘kuya kuvuija bantu ba mu bisamba bionso bayidi.’ Bua kukumbaja mudimu eu, bidi bitulomba misangu ya bungi bua kuyukila ne bantu badi ne ngelelu wa meji mushilangane bikole ne wetu. Bamue ba kudibu kabatu batendelela anyi bitabuja ne: Nzambi utuku to. Tshiena-bualu tshialonda netshileje mutudi mua kuyisha bantu aba lumu luimpe.