1-2. (a) Matthaia 28:18-20-a chhinchhiah Isua thupêk angin, Kristian kohhran hnathawh bulpui ber chu eng nge ni? (b) He thuziakah hian eng zawhnate nge kan sawiho vang?

TIRHKOHTE chu tlâng chunga an inhmuhkhâwm chuan beiseinain an khat a. Isua chuan a thawhleh hnuah, chumi hmuna amah hmu tûrin a hrilh a ni. (Mt. 28:16) Chu chu ‘unau zanga aia tam hnêna a inlâr’ ṭum kha a nih a rinawm. (1 Kor. 15:6) Engvângin nge Isua’n a zirtîrte chu chumi hmuna amah hmu tûra a tih? “Chutichuan kal ula, hnam tina mi zirtîrahte siam ula” tih hnathawh tûr phûrawm tak hi a pêk duh vâng a ni.—Matthaia 28:18-20 chhiar rawh.

² Isua thusawi hretu chûng zirtîrte chu kum zabi khatnaa Kristian kohhrana mite an ni a. Chu kohhran hnathawh bulpui ber chu tam lehzuala Krista zirtîrte siam hi a ni. * Tûn laiah, khawvêl pum huapah Kristian kohhran sâng tam tak a awm a, chûng kohhrante hnathawh bulpui ber chu a la danglam chuang lo. He thuziakah hian, hêng zawhna palite hi kan sawiho vang: Engvângin nge zirtîr siam chu thil pawimawh tak a nih? Chutah chuan eng nge tel? Kristian zawng zawng chu zirtîr siamnaah an tel em? Engvângin nge he rawngbâwlnaah hian dawhtheihna kan neih a ngaih? tihte hi.

3. Johana 14:6 leh 17:3-a sawi angin, engvângin nge zirtîr siam rawngbâwlna chu thil pawimawh tak a nih?

³ Engvângin nge zirtîr siam chu thil pawimawh tak a nih? Krista zirtîrte chauh Pathian ṭhian an nih theih vâng a ni. Chu bâkah, Krista hnungzuite chuan tûnah ngei pawh nun ṭha zâwk an nei a, nakin huna chatuana nun chen theihna pawh an beisei a ni. (Johana 14:6; 17:3 chhiar rawh.) Isua chuan mawhphurhna pawimawh tak min pe a; mahse, chu hna chu keimahni chauhvin kan thawk lo. Tirhkoh Paula chuan amah leh a ṭhian hnaite chungchâng heti hian a ziak a: “Keini zawng Pathian hnathawhpuite kan ni si a,” tiin. (1 Kor. 3:9) Jehova leh Krista’n mihring ṭha famkim lote hnêna an pêk chanvo hlu a va ni êm!

4. Unau Ivan-a leh Matilde-i te thiltawn aṭangin nge nge kan zir theih?

⁴ Zirtîr siam rawngbâwlna chuan hlimna nasa tak min thlen thei a. Colombia rama unau Ivan-a leh a nupui Matilde-i te thiltawn hi han ngaihtuah teh. Ṭhalai Davier-a hnêna thu an hrilh chuan, Davier-a chuan: “Ka nunah inthlâk danglamna siam ka duh a; mahse, ka siam thei lo,” tiin a sawi. Ani chu ruihhlo ngai, zu ngawlvei leh a bialnu Erika-i nêna awm dûn, boxer a ni a. Unau Ivan-a chuan: “Chirhdiak kâra dârkâr tam tak thîrsakâwra kal ngai, a awmna thingtlâng khaw tê kan va tlawh a. Erika-i pawhin, Davier-a nungchang leh rilru put hmang a danglam chho tih a hriat hnu chuan Bible zirnaah a lo tel ve a,” tiin a sawi. A tâwpah, Davier-a chuan ruihhlo te, zuin te, leh boxing te chu a bânsan ta a. Erika-i chu dân angin a nei a. Unaunu Matilde-i chuan: “Davier-a leh Erika-i te chu kum 2016-a baptisma an chan chuan, Davier-a’n, ‘Inthlâk danglam ka duh a; mahse, ka thei lo,’ tia a sawi fo ṭhin chu kan hre chhuak a. Kan insûm zo lo chu kan mittui a tla a ni,” tiin a sawi. Krista zirtîrte ni tûra mite kan ṭanpui hian kan hlim tak zet tih chu rinhlelh rual a ni lo.

5. Zirtîr siamnaa rahbi hmasa ber chu eng nge ni?

⁵ Zirtîr siamnaa rahbi hmasa ber chu rilru dik tak pu mite ‘zawn chhuah’ hi a ni. (Mt. 10:11) Kan mi tawh zawng zawngte hnêna thu hrilhna hmangin Jehova Thuhretute kan nihzia kan târ lang a. Thu hril tûra Krista thupêk zawmna hmangin Kristian dik tak kan nihzia pawh kan lantîr bawk.

6. Rawngbâwlnaa hlawhtling tûrin engin nge min ṭanpui thei?

⁶ Mi ṭhenkhat chuan Bible thutak zir chu an phûr hle a; mahse, kan mi tawh tam takte chuan atîrin an ngaihsak lo niin a lang. An ngaihvenna kan chawhthawhsak a ngai mai thei. Rawngbâwlnaa hlawhtling tûr chuan, inbuatsaihna ṭha tak kan neih a ngai a ni. I mi tawh tûrte ngaihven tûr âwm thute chu thlang ang che. Tichuan, i thusawi tûr thupui i hmêlhriattîr dân tûr chu ngaihtuah lâwk rawh.

7. Engtin nge tuemaw chu i tîtîpui ṭan theih a, engvângin ngaihthlâk leh zahna lantîr chu pawimawh nia i rin?

⁷ Entîr nân, inneitu hnênah heti hian i zâwt thei ang: “Thil pakhat ka zâwt thei che ang em? Tûn laia kan hmachhawn buaina tam tak hian mi tin chungah nghawng a nei a. Khawvêl buainate chingfel tûrin sawrkâr pakhat kan mamawh niin i hria em?” tiin. Tichuan, Daniela 2:44 chu i sawipui thei a. A nih loh leh, heti hian i sawi thei a ni: “Naupangte chu nungchang ṭha neia enkawl seilian tûr chuan eng nge pawimawh ber nia i rin? I ngaih dân min hrilh thei ang em?,” tiin. Tichuan, Deuteronomy 6:6, 7 chu sawipui rawh. Eng chungchâng pawh sawipui la,  i thu ngaithlatu tûrte chu ngaihtuah rawh. Bible zirtîrna dik tak an hriat huna an hlâwkpui dân tûr chu mitthla ang che. In inbiak hunah, an thusawi i ngaihthlâk a, an ngaih dânte i zahsak chu thil pawimawh tak a ni. Chutiang chuan, anmahni i hre thiam lehzual ang a, i thusawi pawh an ngaithla duh lehzual ngei ang.

8. Engvângin nge tlawhkîrna kan neih zawm zêl a ngaih?

⁸ Tuemawin Bible zir duhna a neih hmain, hun leh thate sênga tlawhkîrna kan neih a ngai mai thei a. Engvângin nge? Mite chu kan tlawhkîr huna an awm loh mai theih vâng a ni. Chu bâkah, in neituin Bible zir duhna a neih hmain vawi engemaw zât kan tlawhkîr a ngai mai thei bawk. Kan thing phun chu tui pêk ziah a nih chuan a ṭhang lehzual ngei ang tih hre reng ang che. Chutiang bawkin, ngaihventu chu Pathian Thu kan sawipui ziah chuan Jehova leh Krista a hmangaihna a pung lehzual ang.

9-10. Kristian rawngbâwltu zawng zawng chu rilru dik pute zawnnaah an tel vek tih engvângin nge kan sawi theih?

⁹ Kristian rawngbâwltu zawng zawng chu mi rilru dikte zawn chhuahnaah an tel a. Chu rawngbâwlna chu naupang bo zawn nên kan tehkhin thei a ni. Eng kawngin nge? In aṭanga kal bo, kum thum mi mipa naupang thiltawn dik tak hi han ngaihtuah teh. Amah zawnnaah mi 500 vêl an tel a. A tâwpah, naupang bo hnu dârkâr 20 vêlah, a zawngtute zînga tlâwmngai pakhatin naupang chu vaimin huanah a hmu a. A hmutu chuan naupang a hmuh avânga chawimawi nih chu a duh lo. Ani chuan: “Naupang zawngtu chu mi a za têl kan ni alâwm,” tiin a sawi.

¹⁰ Mi tam tak chu, chu naupang ang an ni a. Anni chuan bo niin an inhria a. Beiseina an nei lo va; mahse, ṭanpuina erawh an  dawng duh a ni. (Eph. 2:12) Mi maktaduai riat chuangte chu chutiang mite zawnnaah theih tâwp chhuahin an tel a. Nang chuan Bible zir duh tuemaw i hmu lo pawh a ni mai thei. Mahse, i thawhna biala thuchhuahtu dangte chuan Pathian Thu-a thutak zir duh tuemaw chu an hmu mai thei a ni. Unaute’n Krista zirtîr ni duh tuemaw an hmuh hian, chutiang mite zawnnaa tel zawng zawngte chuan hlimna tûr chhan ṭha kan nei ṭheuh a ni.

11. Bible zirpui i nei lo a nih pawhin, eng kawng dangtein nge zirtîr siamna chu i ṭanpui theih?

¹¹ Tûnah, Bible zirpui i nei lo a nih pawhin, zirtîr siamna chu kawng dangin i ṭanpui thei a. Entîr nân, chûng mi tharte chu Kingdom Hall-a an lo kal hunah i lo lâwmin ṭhianah i siam thei a. Chutiang kawng chuan hmangaihna chu Kristian dik takte chhinchhiahna a ni tih ring nghet tûrin i ṭanpui thei a ni. (Joh. 13:34, 35) Inkhâwma chhânna i pêkte chu tawi tê pawh ni se, chu chuan, mi tharte chu thinlung tak leh zah thiam taka an rinna sawi ngam tûrin a ṭanpui thei a. Rawngbâwlnaa thuchhuahtu thar nên in inkawp hunah, mite thil chhûtpui nân Bible hmang tûrin i ṭanpui thei bawk. Chutianga i tih chuan, Krista entawn tûrin i zirtîr tihna a ni ang.—Lk. 10:25-28.

12. Zirtîr siam tûrin thiam bîkna kan neih a ngai em? Hrilhfiah rawh.

¹² Kan zînga tumah hian Isua zirtîr ni tûra mi dangte zirtîr tûrin thiam bîkna kan neih a ngai niin kan ngai tûr a ni lo. Engvângin nge? Bolivia rama awm Faustina-i entawn tûr siam hi han ngaihtuah ta ila. Ani chuan Jehova Thuhretute nêna an inkawm ṭan chuan lehkha chhiar a thiam lo va. A hnuah, tlêm azâwng a chhiar thei ṭan a. Tûnah chuan, baptisma a chang tawh a, mi dangte zirtîr chu nuam a ti hle a ni. Chawlhkâr tinin Bible zirpui panga a kaihruai ṭhîn a. Faustina-i chuan a Bible zirpuite tlukin lehkha chhiar thiam lo mah se, baptisma chang tûrin mi paruk a ṭanpui tawh a ni.—Lk. 10:21.

13. Kan buai hle a nih pawhin, zirtîr siamnaa hlimna min neihtîr thei malsâwmna ṭhenkhat chu eng nge ni?

¹³ Kristian tam tak chu mawhphurhna pawimawh tak takte chelhin an buai hle a. Chuti chung pawhin, Bible zirna kaihruai tûrin hun an insiam a, chumi aṭangin hlimna nasa tak an nei a ni. Melanie-i entawn tûr siam hi lo chhinchhiah ang che. Ani chuan pasal tel lovin a fanu kum riat mi chu Alaska ramah a enkawl seilian a. Hunbi kima hna a thawh bâkah, cancer natna vei a nu leh pa pawh a enkawl bawk. Melanie-i chu an awmna thingtlâng khuaa Thuhretu awmchhun a ni a. Ani chuan Bible zir duh tuemaw hmuh a duh êm avângin khaw vawt tuar thei tûr leh thu hrila kal chhuak thei tûra chakna nei leh thei tûrin a ṭawngṭai fo va. A tâwpah, Pathianin mi mal hming a nei tih a hriat avânga lâwm  êm êm Sara-i chu a hmu ta a. Hun engemaw chen a liam hnu chuan, Sara-i chuan Bible zir a duh a. Melanie-i chuan: “Zirtâwp tlaiah chuan chau ṭhîn hle mah ila, ka fanu nên Bible kan va zirpui ṭhin avângin kan hlâwkpui a ni. Sara-i zawhnate chhâng thei tûrin zir bingna kan nei ṭhîn a, tichuan, Jehova ṭhian a rawn ni ta chu kan hlim hle,” tiin a sawi. Sara-i chuan dodâlnate chu huaisen takin a hmachhawn a, an kohhran a chhuahsan a, tichuan, baptisma a chang ta a ni.

14. (a) Engtin nge zirtîr siamna chu sangha man nên a inan? (b) Timothea thawn hnih 4:1, 2-a Paula thusawi chuan i chungah eng nghawng nge a neih?

¹⁴ I rawngbâwlna biala mite chu ngaithla duh lo angin lang mah se, zirtîr ni thei tûr âwm zawn hmuh chu beisei tlat rawh. Isua chuan zirtîr siamna chu sangha man nên a khaikhin tih hre reng ang che. Sangha mantute chuan sangha pakhat an man hma pawhin dârkâr tam tak hun an hmang mai thei a. Zân rei tak hnuah emaw, zîng hma takah emaw an man ṭhîn a, lawnga hla tak taka kal châng pawh an nei bawk. (Lk. 5:5) Chutiang bawkin, zirtîr siamtu ṭhenkhat chu dawhthei takin leh dârkâr tam tak hmangin, hun leh hmun hrang hrangah “sangha manin” an kal chhuak ṭhîn a ni. Engvângin nge? Mite an hmuh tam lehzual theih nân a ni. Thawkrim lehzualte chuan kan thuchah ken ngaihventute hmuin malsâwmna an dawng ṭhîn a ni. Mite i hmuh tam lehzual theihna hun leh hmuna thu hrilh chu i tum thei ang em?—2 Timothea 4:1, 2 chhiar rawh.

15. Engvângin nge Bible zirna kaihhruainaah dawhtheihna kan neih a ngaih?

 ¹⁵ Engvângin nge Bible zirna kaihhruainaah dawhtheihna neih a ngaih? A chhan pakhat chu zirlai chu Bible zirtîrte hre tûr leh ngaina tûra ṭanpuina pêk mai aia tam kan tih a ngaih vâng a ni. Kan Bible zirpui chu Bible Ziaktu Jehova hre tûr leh hmangaih tûra kan ṭanpui a ngai a. Chu bâkah, Isua’n a zirtîrte laka a thil phûtte kan zirtîr a, Kristian dikte nun dân tûr chungchâng hre tûra kan ṭanpui a ngai bawk. Bible thu bulte nunpui a tum laiin dawhthei takin kan ṭanpui tûr a ni. Mi ṭhenkhat chuan thla rei lo te chhûngin an ngaihtuahna leh chîn dânte chu an thlâk danglam thei a; mi dangte tân chuan chu aia rei a duh mai thei bawk.

16. Raul-a thiltawn aṭangin eng nge kan zir theih?

¹⁶ Peru rama missionary pakhat chuan dawhtheihna lantîr a hlâwkzia târ langtu thiltawn a nei a. Ani chuan: “Ka Bible zirpui Raul-a nên chuan lehkhabu pahnih kan zir tawh a. Mahse, a nunah buaina khirh tak tak a la hmachhawn reng a ni. An nupa inkâr a ṭha lo hle a, ṭawngkam bawlhhlawhte an hmang a, an fate’n an zah lo bawk. A rawn inkhâwm ziah avângin amah leh a chhûngte ṭanpui tûrin ka tlawh zawm zêl a. Ka hmuh ṭan aṭanga kum thum aia tam a liam hnu chuan, baptisma a chang thei ta a ni,” tiin a sawi.

17. A dawta thuziakah eng nge kan sawiho vang?

¹⁷ Isua chuan: “Kal ula, hnam tina mi zirtîrahte siam ula,” tiin min hrilh a. Chu hna hlen chhuak tûr chuan, sakhaw vawn nei lote leh Pathian a awm tih ring lote pawh tiamin, kan ngaihtuah dân anga ngaihtuah lo mite chu kan biak fo a ngai a ni. A dawta thuziakah chuan ṭo bul chi hrang hrang nei mite hnêna chanchin ṭha kan thlen theih dân sawiho a ni ang.