1-2. (a) An-akor avek lord ki Zezi ti done dan Matie 28:18-20, ki responsabilite prinsipal lasanble Kretien? (b) Ki bann kestion nou pou examine dan sa lartik-la?

APRE so rezireksion, Zezi ti demann so bann zapot pou zwenn li kot enn montagn dan Galile. Kan zot ti laba, sirman bann zapot ti extra kontan. (Mat. 28:16) Kitfwa se sa zour lamem ki Zezi “finn paret devan plis ki sink-san dimoun anmemtan.” (1 Kor. 15:6) Kifer Zezi ti demann so bann disip pou zwenn li laba? Pou donn zot enn mision bien interesan: “Al dan tou bann pep ki ena e fer zot vinn mo bann disip.”​—Lir Matie 28:18-20.

² Bann disip ki ti tann bann parol Zezi, plitar ti form parti dan lasanble Kretien dan premie siek. Ki ti responsabilite prinsipal sa lasanble-la? Se pou fer plis dimounn vinn bann disip Zezi Kris. * Azordi, ena bann dizenn milye lasanble bann vre Kretien partou lor later, ek responsabilite prinsipal sa bann lasanble-la pa finn sanze. Dan sa lartik-la, nou pou examinn kat kestion: Kifer li bien inportan pou fer bann disip? Ki sa inplike? Eski tou bann Kretien kapav ede pou fer bann disip? Ek kifer nou bizin ena pasians pou fer sa travay-la?

3. Dapre Zan 14:6 ek 17:3, kifer li bien inportan pou fer bann disip?

³ Kifer li bien inportan pou fer bann disip? Parski zis bann disip Zezi Kris ki kapav vinn bann kamarad Bondie. Anplis, bann dimounn ki swiv Kris ena enn pli bon lavi depi asterla mem ek zot ena lespwar pou viv pou touletan dan lavenir. (Lir Zan 14:6; 17:3, NW. *) Wi, Zezi inn donn nou enn responsabilite bien inportan, me nou pa fer sa travay-la par noumem. Lapot Pol ti ekrir konsernan limem ek sertin parmi so bann kamarad: “Nou pe travay ansam avek Bondie.” (1 Kor. 3:9) Zeova ek Zezi inn donn bann imin inparfe enn gran privilez, pa vre!

4. Ki nou aprann ar lexanp Ivan ek Matilde?

⁴ Kan nou fer bann disip, sa kapav fer nou gagn boukou lazwa. Anou get lexanp Ivan ek so madam Matilde, ki res Colombie. Zot ti pres avek enn zenom ki apel Davier. Li ti dir zot: “Mo anvi fer bann sanzman dan mo lavi, me mo pa reisi.” Davier ti enn boxer ki ti droge, ti bwar boukou, ek ti viv avek so kopinn, ki apel Erika. Ivan dir: “Nou ti koumans etidie Labib avek li. So vilaz ti bien-bien lwin, ek nou ti roul bisiklet lor bann sime labou pandan plizir lertan pou ariv laba. Kan Erika ti remark bann progre ki Davier ti pe fer dan so konportman ek so latitid, li osi li ti koumans etidie Labib.” Avek letan, Davier ti aret droge, bwar, ek fer labox. Li ti osi marye ar Erika. Matilde dir: “Kan Davier ek Erika ti pran batem an 2016, nou ti rapel seki Davier ti abitie dir, ‘Mo anvi sanze, me mo pa reisi.’ Nou ti telman kontan ki nou ti plore.” Pena dout ki nou resanti enn gran lazwa kan nou ed bann dimounn pou vinn bann disip Zezi Kris!

5. Ki premie kitsoz nou bizin fer pou fer bann disip?

⁵ Pou fer bann disip, premie kitsoz ki nou bizin fer se rod bann dimounn ki anvi konn Zeova. (Mat. 10:11) Nou montre ki nou bann vre Temwin Zeova kan nou pres avek tou bann dimounn ki nou zwenn dan nou teritwar. Nou montre ki nou bann vre Kretien kan nou obeir lord ki Zezi inn done pou prese.

6. Ki kitsoz kapav ed nou pou gagn bann bon rezilta dan nou minister?

⁶ Sertin dimounn vremem anvi aprann bann verite ki ena dan Labib, me boukou dimounn ki nou zwenn kitfwa pa paret interese o-koumansman. Kitfwa nou pou bizin motiv zot pou zot anvi konn plis. Pou ki nou gagn bann bon rezilta dan nou minister, nou bizin prepar nou bien. Swazir bann size bien presi ki kapav interes bann dimounn ki to zwenn. Apre sa, reflesi kouma to pou prezant sak size.

7. Kouma to kapav koumans enn konversasion, ek kifer to panse li inportan ki nou ekout bann dimounn ek respekte zot?

⁷ Par exanp, to kapav demann enn kikenn ki to zwenn: “Eski mo kapav demann ou ou lopinion lor enn size? Bann dimounn dan lemond antie pe gagn bann mem problem ki nou gagne azordi. Pou rezoud sa bann problem-la, eski ou panse ki nou bizin enn gouvernman ki diriz lemond antie?” Lerla, to kapav explik Daniel 2:44. Ouswa to kapav dir enn kikenn: “Dapre ou, kouma nou kapav ansegn bann zanfan bon manier? Mo ti pou kontan konn ou lopinion lor la.” Lerla, explik Deteronom 6:6, 7. Kan to swazir enn size lor  ki to pou koze, pran an konsiderasion bann dimounn ki pou ekout twa. Pans lor bann bienfe ki zot pou gagne si zot aprann seki Labib ansegne vremem. Kan to koz avek zot, li inportan ki to ekout zot ek respekte zot lopinion. Lerla to pou plis konpran zot, ek zot pou plis anvi ekout twa.

8. Kifer eski nou bizin kontign fer bann vizit?

⁸ Avan ki enn kikenn desid pou etidie Labib, kitfwa to pou bizin donn to letan ek fer bann zefor pou al vizit li. Kifer? Parski boukou dimounn kitfwa pa kot zot kan nou re-al vizit zot. Anplis, kitfwa to pou bizin retourn plizir fwa kot enn dimounn avan ki li santi li ase alez avek twa pou aksepte enn letid Labib. Pa bliye, enn plant ena plis sans pou grandi si aroz li souvan. Dan mem fason, lamour ki enn kikenn ena pou Zeova ek Zezi ena plis sans pou grandi, kan nou koz regilierman lor Parol Bondie avek sa dimounn-la.

9-10. Kifer nou kapav dir ki tou bann Kretien kapav ede pou rod bann dimounn ki ena enn leker sinser?

⁹ Tou bann Kretien kapav ede pou rod bann dimounn ki ena enn leker sinser. Nou kapav konpar sa laktivite-la ar seki bann dimounn fer kan enn zanfan inn perdi. Dan ki sans? Gete ki ti arive kan enn garson trwa-z-an ti perdi. Anviron 500 dimounn ti donn koudme pou rod li. Alafin, apepre 20 er-tan apre ki zanfan-la ti perdi, enn volonter ti retrouv garson-la dan enn karo may. Sa volonter-la pa ti anvi ki bann dimounn dir ki se li ki’nn trouv garson-la. Li ti dir: “Se gras-a koudme ki plizir santenn dimounn inn done, ki’nn reisi trouv garson-la.”

¹⁰ Boukou dimounn parey kouma sa zanfan-la. Zot santi zot perdi, zot pena lespwar, me zot anvi ki ed zot. (Efe. 2:12) Plis ki wit milyon Temwin Zeova pe travay ansam  pou rod sa bann dimounn-la. Kitfwa to pa’nn trouv enn kikenn ki anvi etidie Labib avek twa. Selman, bann lezot proklamater ki pe travay dan mem teritwar ki twa kitfwa inn trouv enn kikenn ki anvi aprann bann verite ki ena dan Parol Bondie. Kan enn frer ouswa enn ser trouv enn kikenn ki plitar vinn enn disip Kris, tou bann dimounn ki’nn ede pou partisip dan sa travay-la ena bann bon rezon pou zwaye.

11. Mem si to pena enn letid Labib, dan ki lezot fason to kapav ede pou fer bann disip?

¹¹ Mem si to pena enn letid Labib pou linstan, to kapav ede dan lezot fason pou fer bann disip. Par exanp, to kapav akeyir bann nouvo ki pe vinn renion ek montre twa amikal avek zot. Si to montre lamour dan sa fason-la, to kapav ed zot pou trouve ki nou bann vre Kretien. (Zan 13:34, 35) Bann repons ki to done dan renion, mem si se bann ti repons, pou montre bann nouvo kouma zot kapav exprim zot lafwa avek sinserite ek respe. To kapav osi akonpagn enn nouvo proklamater dan predikasion ek ed li servi Labib pou rezonn avek bann dimounn. Kan to fer sa, to pe ansegn li pou imit Zezi Kris.​—Lik 10:25-28.

12. Eski nou bizin ena bann kapasite extraordiner pou fer bann disip? Explike.

¹² Fode pa nou panse ki nou bizin ena bann kapasite extraordiner pou fer lezot vinn bann disip Zezi. Kifer? Anou get lexanp Faustina, ki res dan Bolivie. Kan li ti koumans frekant bann Temwin Zeova, li pa ti konn lir. Me asterla, li’nn aprann lir enn tigit. Faustina inn pran batem, ek li kontan ansegn lezot. Sak semenn, li fer sink letid Labib. Mem si Faustina pankor kapav lir osi bien ki laplipar so bann etidian, li finn ed sis dimounn pou pran batem.​—Lik 10:21.

13. Mem si nou bien okipe, sit sertin bienfe ki nou kapav gagne kan nou fer bann disip.

¹³ Boukou Kretien bien okipe parski zot ena boukou kitsoz inportan pou fer. Me kanmem sa, zot trouv letan pou fer bann letid Labib, ek sa rann zot bien zwaye. Anou get lexanp Melanie. Li ti res Alaska, ek li ti elve tousel so tifi ki ti ena wit an. Li ti osi ena enn travay aplintan ek li ti okip so papa ki ti ena enn kanser. Li ti res dan enn lavil bien retire ek li tousel ti Temwin laba. Melanie ti priye Zeova souvan pou gagn lafors pou al prese, mem si ti fer bien fre. Kifer? Parski li ti vremem anvi zwenn enn kikenn ki ti pou kontan etidie Labib avek li. Alafin, Melanie ti zwenn Sara, ki ti extra kontan pou aprann ki Bondie ena enn nom. Apre inpe letan, Sara ti aksepte enn letid Labib. Melanie dir: “Dan Vandredi aswar, mo ti bien fatige, me mwa ek mo tifi nou ti kontign al fer so letid ek nou toulede finn gagn bann bienfe. Nou ti kontan fer  bann resers pou bann kestion ki Sara ti poze, ek nou ti bien kontan pou trouv li vinn kamarad Zeova.” Avek kouraz, Sara ti fer fas ar lopozision, ti kit so legliz, ek ti pran batem.

14. (a) Kifer nou kapav konpar laktivite pou fer bann disip ar lapes? (b) Ki lefe bann parol Pol ki trouv dan 2 Timote 4:1, 2 ena lor twa?

¹⁴ Mem si to pankor trouv enn kikenn ki anvi vinn enn disip, pa bes lebra. Pa bliye ki Zezi ti konpar laktivite pou fer bann disip ar lapes. Bann peser kitfwa bizin atann pandan plizir lertan avan ki zot reisi gagn enn pwason. Souvan zot al lapes bien tar aswar ouswa bien boner gramatin, ek parfwa zot al bien-bien lwin dan zot bato. (Lik 5:5) Dan mem fason, avek pasians, sertin Kretien pas boukou lertan “lapes” dan diferan plas ek ler. Kifer? Pou ki zot reisi zwenn pli boukou dimounn. Bann ki fer sa bann zefor-la souvan gagn bann bon rezilta parski zot zwenn bann dimounn ki interese ar nou mesaz. Eski to kapav esey prese enn ler ouswa enn plas kot to ena plis sans pou zwenn bann dimounn?​—Lir 2 Timote 4:1, 2.

15. Kifer nou bizin ena pasians pou fer bann letid Labib?

¹⁵ Kifer nou bizin ena pasians pou fer bann letid Labib? Enn rezon se parski nou bizin ed nou etidian pou aprann ek pou kontan bann lansegnman ki ena dan Labib. Nou bizin osi ed li pou aprann konn ek kontan Zeova, sa Kikenn ki’nn fer ekrir Labib la. Nou pa zis ansegn nou etidian ki kitsoz Zezi donn lord  so bann disip pou fer, nou osi ansegn li kouma pou met sa an pratik dan so lavi. Avek pasians, nou bizin ed li kan li pe fer zefor pou aplik bann prinsip Labib. Sertin etidian reisi sanz zot fason panse ek zot bann labitid dan zis de-trwa mwa. Me ena lezot ki pran pli boukou letan.

16. Ki to aprann ar lexanp Raúl?

¹⁶ Enn misioner dan Pérou rakont enn lexperyans ki montre bann bon rezilta ki li’nn gagne parski li’nn ena pasians. Li dir: “Mo ti etidie de liv avek mo etidian Labib ki apel Raúl. Me li ti ankor ena bann gro problem dan so lavi. Touletan ti ena problem dan so maryaz, li ti zoure, ek so bann zanfan pa ti respekte li akoz so bann vilin manier. Li ti vinn renion regilierman, alor mo ti kontign vizit li pou ed li ek so fami. Plis ki trwa-z-an apre ki mo ti zwenn li, li ti ranpli bann kondision pou pran batem.”

17. Ki nou pou gete dan prosin lartik?

¹⁷ Zezi inn dir nou “al dan tou bann pep ki ena e fer zot vinn [so] bann disip.” Pou akonpli sa mision-la, souvan nou bizin koz avek bann dimounn ki ena bann krwayans ki bien diferan ar pou nou. Sertin pa frekant okenn legliz ouswa zot pa mem krwar dan Bondie. Dan prosin lartik, nou pou gete kouma nou kapav pres bonn nouvel ar sa bann dimounn-la.