1-2. a) Toko cinthoonyeraaya itthu irumalyaawe Yesu nhina Matewus 28:18-20, ntekoni muulupale urinaaya nloko no makristau? b) Makohoni anhala waakhuliya nhina ula mwahoola?

MAAPOSTOLU yaari ootteeliya cinene. Wunwelelihiya wawe, Yesu ahaalepela wiira athukumane wamwaakoni. (Mat. 28:16) Atthunaka ule phaari ukati Yesu ‘waakhumelenlyaawe mayamunna oopwaha 500 wo nkwaha mmoca.’ (1 Akor. 15:6) Nlattuni Yesu waaphenlyaawe waathukumaniha eetthucyaawe? Wiira aavahe nteko wofayita cinene: “Coo, nrwee ni mwaapanke eetthuci atthu olapo cotheene.”—Usome Matewus 28:18-20.

² Etthuci yiiwale moolumo a Yesu yahopanka mphantte nloko no makristau noopacera. Nteko muulupale waarinaaya nno nlokonno waari waapanka eetthuci a Kristu enci. * Ilelo, ahaavo maloko o makristau menci ntuninyani motheene, ni nteko muulupale urinaaya, nanlelo khuvirikanale. Nhina ula mwahoola, ninaahala waakhula makoho macese: Kontha isiyani nteko wo waapanka eetthuci uhaana ifayita cinene? Citthuni coovirikanaca ninlamuliyeehu upanka wiira naapanke eetthuci? Niireke makristau otheene pooti ukavihera waapanka eetthuci? Ni kontha isiyani nihaana nivilelaka ukati woovara uyo ntekooyo?

3. Toko cinthoonyeraaya ilivuru ya Joau 14:6 ni 17:3, kontha isiyani nteko wo waapanka eetthuci uhaana ifayita cinene?

³ Waapanka eetthuci ukhanle nteko wofayita cinene. Kontha  ule nkhala mwiitthuci a Kristu phinkhala paasi mpatthani a Nluku. Uhiya commo, ale anontthara Krisu anaakhitiri ukhalana ukumi womaana ilelo ni anaaweherera uphwanya ukumi woohimala uhoolo. (Usome Joau 14:6; 17:3.) Unawoonannya wiira Yesu honivaha nteko muulupale. Masi uyo ntekooyo khaninvara veekha. Toko apostolu Paulu cantikhalyaawe, “hiivano naatthu ninvara nteko nkhayi ni Nluku.” (1 Akor. 3:9) Khweeliini Yehova ni Yesu ahonivaha iparakha yuulupale hiiva, apinaatamu oopahuwa!

4. Isiyani inniitthucihaaya itthu yankhumelenle Ivan ni Matilde?

⁴ Nteko wo waapanka eetthuci pooti unitteeliha nrima cinene. Woone itthu yankhumelenle Ivan nokhala u Colômbia ni amwaarawe, Matilde. Unlalyeera waya mmirawo neehaniya Davier, uyo mmirawooyo aheera: “Mi kaanaapheela urukunusa makhalelwaaka, masi akinkhitiri.” Uyo aanaapanka masinttaano o waattakaniya, aanaalya citthu coohapala, aanaahapaliya cinene ni aakhala naamweettyaawe, Erika. Ivan neera: “Hiiva nahancera urwaa umootola uwanuwawe, aliteeya oottayi. Wiira niphiye nahaana nivirihaka iwoora cene neettaka niicinka mmaparapaarani comarove. Masi Davier ahancera urukunusa nrimaawe ni meettelwaawe. Erika ukati woonalyaawe iyo, ciicammo ahopheela usomihiya Ibiiblya.” Nuukatyaaya, Davier ahohiya ulya citthu coohapala, uhapaliya ni masinttaano o waattakaniya, ni ahothelanaca ni Erika. Matilde neera: “Ukati Davier ni Erika waapattisiyaaya mwaakha wo 2016, nahoopuwela wiira Davier aaneeraka: ‘Mi kaanaapheela urukunusa makhalelwaaka, masi akinkhitiri.’ Nahotteeliya cinene, mpaka nahonla.” Unawoonannya wiira waakavihera atthu ukhala eetthuci a Kristu pooti unitteeliha nrima cinene.

5. Itthuni yoopacera ninlamuliyeehu upanka wiira naapanke eetthuci?

⁵ Itthu yoopacera ninlamuliyeehu upanka wiira naapanke eetthuci ukhanle waatotha ale ampheela wiitthuca myaha ca Yehova. (Mat. 10:11) Hiiva ninthoonyera wiira nikhanle Masaahiti a Yehova eekhweeli naalalyeeraka otheene anaaphwanyeehu. Hiiva ninthoonyera wiira nikhanle makristau eekhweeli neewelelaka itthu inirumalyaawe Kristu, ikhanle ulalyeera ihapari comaana.

6. Isiyani ninlamuliyeehu upanka wiira atthu aniviriyane?

⁶ Wuulalyeerani, ninaahala waaphwanya atthu ampheela wiitthuca Ibiiblya, masi ciicammo ninaahala waaphwanya atthu enci anhala ukhala toko khampheela ihapari cinlalyeehu. Wakhalaka commo, nihaana niphwanyaka mananna o waakurumica atthu wiira apheele wiitthuca. Wiira nikhitiri upanka iyo, nihaana niitthenkacaka ratta. Uthanle myaha cinaacivela atthwaayo. Vano, wuupuwele mananna weeva cinhalaa wancera wuuluma nnyo myahannyo.

7. Manannani weeva cinlamuliyaa wancera umoopana mwaha ntthu, ni kontha isiyani weeva unoonaa ukhala itthu yofayita unviriyana ntthuuyo ni uhisimu inoopuwelaawe?

⁷ Wootakihera, wuulalyeerani weeva pooti umwiirela ntthuuyo co: “Waanaakicivela ucuwela itthu inoopuweleenyu. Ilelo masakha menci anniphwanya, anawaaphwanya ciicammmo atthu ntuninyani motheene. Woonela winyu, wiira ayo masakhaayo amale, niireke nimpheela ikuvernu yoohala ulamulela ituninya yotheene?” Vano woopele mwaha Daniele 2:44. Mananna makhwaawe, ukhanle unkoha ntthuuyo co: “Woonela winyu, manannani ayari cinlamuliyaaya uwuunuwiha asaanaaya wiira akhale asaana owaahisimu atthu?” Vano, woopele mwaha Deuteronomiyu 6:6, 7. Ukati  woohalaka utaphulela khula mwaha, upace uwuupuwela atthu anhala wuuviriyana. Wuupuwele mananna ayo cinhalaaya ukaviheriya yeetthucaka itthu inhimyaaya Ibiiblya. Ukati woomuulumana ntthu, uviriyane ratta itthu inhimyaawe ni unhisimu oolumaka itthu inoopuwelaawe. Ala manannaala, weeva unaahala ukhitiri umwiiweeha, ni uyo naahala upheela uviriyana itthu weeva impheelaa unhimyera.

8. Kontha isiyani nihaana nikumihaka ukati ni niikurumicaka wiira nituruwele umootola ntthu imaara cinci?

⁸ Ntthu hinaaya utthuna usomihiya Ibiiblya, atthunaka hiivano nihaana nikumihaka ukati ni niikurumicaka wiira nituruwele umootola imaara cinci. Kontha isiyani? Kontha ntthuuyo pooti khankhalaka uwaanuwawe awula khankhalanaka ukati woonuulumana narwaaka umootola. Ni atthunaka weeva uhaana umootolaka imaara cinci ntthuuyo hinaaya utthuna usomihiya Ibiiblya. Wuupuwele wiira mwiri mwankaani unoonuwa waahihinnyeke umiceriya. Inanna imoca, nifento ntthu ninonthoonyeraawe Yehova ni Yesu ninhala wuunuwa hiiva naahihiyeke umootola ntthuuyo wiira ninhimyere myaha co mbiiblyani.

9-10. Nlattuni uneereehu wiira khula namalalyeera naakavihera waaphwanya atthu ooreera nrima?

⁹ Khula namalalyeera naakavihera waaphwanya atthu ooreera nrima. Pooti wanlattaniheehu iyo ni nteko wontotha mwanhima oorimela. Manannani? Woone itthu imoca yaakhumelenle: mwanhima mmoca o myaakha miraru ahorimela. Atthu ookhalaka 500 yaheevaherera wiira yaanaahala untotha. Uvira waya iwoora 20, ntthu mmoca eevaherenre ahomphwanya mwanhimoole mmattani yo nakhuwo. Ule ntthuule ahokhotta uttottopeliya nlattu womphwanya mwanhima aarimenle. Uyo aheera: “Atthu enci phiikurumicale wiira mwanhimoola aphwanyiye.”

 ¹⁰ Atthu enci ankhala toko ule mwanhimoole. Ayo aneecoona ukhala oorimela, khanweherera citthu comaana uhoolo, masi anaapheela ukaviheriya. (Efesu 2:12) Hiiva nikhanle ikhurupu ya atthu oopwaha 8 milhões anvara nteko nkhayi wiira yaaphwanye atthu oophwanela. Atthunaka weeva, veekha caa, khunapaca umphwanya ntthu mpheela usomihiya Ibiiblya. Masi anamalalyeera akhwaawe ukati woolalyeera nipuro weeva ninlalyeeraa, pooti ukhala wiira ahomphwanya ntthu mpheela wiitthuca ikhweeli co Nuulumo na Nluku. Munneehu awula nrokorihu amphwanyaka ntthu wahoolo nokhala mwiitthuci a Kristu, otheene akavihenre untotha pooti ciicammo ukhala ootteeliya.

11. Weeva hataa nna co uhikhalanaka ntthu onsomiha Ibiiblya, manannani makiina cinlamuliyaa ukavihera waapanka eetthuci?

¹¹ Wakhala wiira nna co weeva khurina ntthu onsomiha Ibiiblya, pooti ukavihera waapanka eetthuci ni mananna makiina. Wootakihera, waasalaamihe ale anwa phiyaaru Usalau yo Umwene ni waawacere ratta. Ayo yoonaka mananna hiivano cinfentaneehu, anaahala ucuwelela wiira nikhanle makristau eekhweeli. (Joau 13:34, 35) Uhiya commo, wiikurumice uvaha ikomentaariyu umikutthaanoni. Ikomentaariyu weeva cinhalaa uvaha, hataa cikhalaka cankaani, pooti waalakihera ale anwa phiyaaru mananna oovaha ikomentariyu yuulumaka irinaaya wanrimani ni yathoonyeraka ihisima. Weeva ciicammo pooti urwaa ulalyeera nkhayi ni namalalyeera o phiyaaru ni umwiitthuciha mananna oovarela nteko Ibiiblya wiira awoopane myaha atthu. Commo, unaahala unthoonyera namalalyeera o phiyaaru mananna cinlamuliyaawe untakiha Kristu.—Luka 10:25-28.

12. Niireke nihaana nikhalaka oocuwelaca cinene wiira naapanke eetthuci? Utaphulele.

¹² Khaavo nlamuliya wuupuwela wiira haana akhalaka oocuwelaca cinene wiira aakavihere atthu akhwaawe ukhala eetthuci a Yesu. Kontha isiyani? Wuupuwele ntakihero na Faustina, nokhala u Bolívia. Ukati waacuwenlyaawe Masaahiti a Yehova, uyo khaacuwela usoma. Ilelo naakhitiri usoma, masi khancuweleeha usoma ratta. Nna va uyova hopattisiya ni unancivela cinene uwiitthuciha Ibiiblya atthu akhwaawe. Khula isumana, uyo nawaasomiha Ibiiblya atthu 5. Atthu enci Faustina anaasomihaawe Ibiiblya anaakhitiri usoma ratta unvikana uyova. Masi hataa ukhalaka commo, uyo haasomiha Ibiiblya atthu 6 mpaka wapattisiyaaya.—Luka 10:21.

13. Hataa nihikhalanaka ukati mwinci, iparakhani cinhaleehu waakhela neekurumicaka waapanka eetthuci?

¹³ Makristau enci arina ukati vakaani kontha ahaana yawaceraka citthu cikhwaawe cofayita. Unookhalaru commo, ayo anaakumiha ukati wiira yaasomihe atthu Ibiiblya, ni iyo inawaatteeliha nrima cinene. Wuupuwele ntakihero na Melanie, aakhala isitati yankaani u Alasca. Uyo aamuunuwiha veekha mwanawe o myaakha 8, aanaavara nteko ukhuma uwicisu mpaka  ucoocilo ni aanawaawereeha athumwaane arina iretta yo cancro. Melanie veekha phaari Saahiti a Yehova isitati yaakhalaawe. Uyo aanaapheela cinene umphwanya ntthu aahala upheela usomihiya Ibiiblya. Phimaana, Melanie khaahiya unlompa Yehova anlepelaka ikuru wiira avilele uririya ni arwee wuulalyeerani. Nihuku nimoca, uyo ahonlalyeera nthiyana neehaniya Sara ni ahomwiitthuciha wiira Nluku haana ncina. Sara ahokhala ootikhinihiya ni, wahoolo waya, ahotthuna usomihiya Ibiiblya. Melanie naattonka eeraka: “Mi kaakhala owoocya cinene uhiyu wo khula Icumaa, masi hataa kikhalaka commo, mi ni mwanaka naanaarwaa unsomiha Ibiiblya Sara. Iyo yaanaanikavihera cinene. Waanaanicivela utotha macipwa o makoho a Sara, ni waanaanitteela nrima cinene namoonaka Sara akhalaka mpatthani a Yehova.” Athoonyeraka ulipa nrima, Sara ahovilela ulupatthiya, ahohiya ikereecaawe ni hopattisiya.

14. a) Kontha isiyani nteko wo waapanka eetthuci unaalattanaca ni nteko woomenca ihopa? b) Isiyani yiitthucalyaa ni moolumo a Paulu nhina 2 Timotiyu 4:1, 2?

¹⁴ Wakhalaka toko wiira weeva khunkhitiri waaphwanya atthu oohala waapanka eetthuci, uhoocye. Yesu holattaniha waapanka eetthuci ni nteko woomenca ihopa. Anakhavoko awula mayoomenca pooti ukhala ukati mwinci ahinavara nanka ihopa imoca. Imaara cinci, ayo anvara nteko uhiyu awula mapikoosa, ni ukati nkiina ahaana yarwaaka ni ikalawa mapuro oottayi. (Luka 5:5) Nteko wo waapanka eetthuci phiryaaya ciicammo. Yooniheraka uvilela, anamalalyeera akhwaawe anaaviriha ukati mwinci yaatothaka atthu iwoora ni mapuro oovirikanaca. Ampankelani commo? Wiira akhitiri waaphwanya atthu. Wiikurumica commo unaareera, kontha ayo anamalalyeeraayo anaakhitiri  waaphwanya atthu ampheela wiitthuca ikhweeli. Atthunaka weeva unawoona wiira ncoko unlalyeera, cihaavo iwoora ni ahaavo mapuro uhinrikaaya waaphwanya atthu. Unoonela cani weeva urwaa ulayeera caphiyaka nnyo iwoorannyo awula ulalyeera yaayo mapurwaayo?—Usome 2 Timotiyu 4:1, 2.

15. Kontha isiyani nihaana nivilelaka ukati wo waasomiha atthu Ibiiblya?

¹⁵ Kontha isiyani nihaana nivilelaka ukati wo waasomiha atthu Ibiiblya? Woopacera, kontha ntekweehu khunakhala paasi waakavihera ale anaasomiheehu wiira acuwele ni yaacivele itthu ineetthucihaaya Ibiiblya. Masi ciicammo nihaana ninkaviheraka ntthu nonsomiheehu uncuwela ni unfenta Mwaneene Ibiiblya, Yehova. Uhiya iyo, ale anaasomiheehu khaninlamuliya uwiitthuciha paasi citthuni Yesu caarumalyaawe attharyaawe upanka, masi ninlamuliya ciicammo waakavihera ucuwela manannani cinlamuliyaaya weettela nnyo citthunnyo. Nihaana naavilelaka ni waakavihera ukati uneekurumicaaya weettela mattharelelo o mbiiblyani. Ahaavo atthu ankhitiri urukunusa nrimaaya ni moopuwelelwaaya nhina wo myeeri vakaani paasi. Masi atthu akhwaawe ampheela ukati mwinci.

16. Isiyani weeva yiitthucalyaa niitthu yankhumelenle Raúl?

¹⁶ Itthu yankhumelenle misiyonaariyu mmoca u Perú inaanikavihera ucuwela nlattuni unreeraaya uvilela. Uyo naattonka: “Mi kihonsomiha ilivuru piili nlopwana mmoca neehaniya Raúl. Masi uyo nanlelo ahaana citthu cinci muukumini wawe canrikihela unswalela Yehova. Muuthelanani wawe ahaana itafaawuti cinci, ahaana nhapo wo wuuluma citthu cooveha, ni asaanaawe waanaarikela unhisima nlattu wo meettelwaawe. Uyo khaalova umikutthaanoni. Phimaana, akaamoocyaale ni akaahiyale unkavihera Raúl naamucyaawe. Uvira waya myaakha miraru ukhuma ukati waacuwelanneehu, Raúl ahokhitiri wiitthenkaca wiira apattisiye.”

17. Ninhala wiitthucani nhina mwaha nkiina unhaleehu usoma?

¹⁷ Yesu honiruma: “Nrwee ni mwaapanke eetthuci atthu olapo cotheene.” Wiira neettele ayo moolumwaayo, imaara cinci nihaana niwuulumanaka atthu ahinoopuwela toko hiiva cinoopuweleehu, nihaahiyaka uttuli ale ahirina ittiini awula ale ahinaamini wiira Nluku haavo. Nhina mwaha nkiina unhaleehu usoma, ninaahala wiitthuca manannani cinlamuliyeehu waalalyeera ayo atthwaayo.