1, 2. 1) Itech Mateo 28:18, 19, ¿toni kinnauatij Jesús itatojtokakauan maj kitayekanaltikan? 2) ¿Toni netajtanilmej tiknankilitij itech nejin tamachtilis?

TATITANILMEJ xa semi yolpakiaj keman mosentilijkej itech se tepet tein moajsia ompakauin Galilea. Satepan ke Jesús moajokuik kiniluij ke ompa iniuan monechikoskia (Mat. 28:16). Xa ijkuak monextij ininixpan “keme makuil ciento tokniuan taneltokani” (1 Cor. 15:6). ¿Keyej iniuan mosentilij? Porin kinnauatij: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan” (xikonixtajtolti Mateo 28:18, 19).

² Akin kikakkej Jesús satepan poujkej itech nechikol kampa kichiuayaj kemej Cristo itech yekinika siglo. Yejuan kitayekanaltijkej kinchiuaskej okachi imomachtijkauan Jesús. * Itech totonaluan, noyampa taltikpak onkak tel miak nechikolmej kampa yekmelauj kichiuaj kemej Cristo uan kisentokaj kichiuaj nejin tekit tein motelneki. Itech nejin tamachtilis tiknankilitij naui netajtanilmej: ¿Keyej semi moneki maj tikinchiuakan imomachtijkauan Cristo? ¿Keniuj tikchiuaj? ¿Tinochin titapaleuiaj maj mochiua nejin tekit? Uan ¿keyej amo moneki tiyolijsiuiskej?

3. Kemej kijtoua Juan 14:6 uan 17:3, ¿keyej motelneki maj tikinchiuakan imomachtijkauan Cristo?

³ ¿Keyej semi moneki maj tikinchiuakan imomachtijkauan Cristo? Porin sayoj akin kitojtokaj Cristo uelis mochiuaskej itasojikniuan Dios. Uan no, axkan okachi kuali nemij uan uelis kipiaskej nemilis nochipaya (xikonixtajtolti Juan 14:6; 17:3). Jesús techmakani se ueyi tekit, sayoj ke amo tikchiuaj toselti. Tatitanil Pablo kijtoj ke yejua uan okseki tokniuan tekitiaj iuan Dios (1 Cor. 3:9). Kemej tikitaj, Jiova uan Cristo techmakanij se ueyi tatiochiualis maski titajtakouanij.

4. ¿Toni techmachtia tein kipanok Iván uan Matilde?

⁴ Tikinchiuaskej imomachtijkauan Cristo uelis semi techyolpaktis. Maj tikitakan tein kipanok Iván uan inamik Matilde, akin nemij Colombia. Kinojnotskej Davier, se telpoch akin kiniluij: “Nikuelitaskia nikpatas kemej nimonejnemiltia, sayoj ke amo niueli”. Davier katka boxeador, kikuia drogas uan semi tauanaya. Uan no sennemia iuan inovia Érika. Iván kijtoua: “Peujkej tikalpanouaj itech xolal kampa nemia tein uejka moajsia. Monekia tiyaskej itech bicicleta miak horas kampa tel sokitaj. Keman Érika kiitak keniuj Davier peuak mopata, yejua no peuak momachtia Biblia”. Satepan, nejin telpoch kikauak drogas, tauanalis uan boxeo. No monamiktij iuan inovia. Matilde kijtoua: “Keman Davier uan Érika moauijkej, itech xiuit 2016, tikelnamikkej tein Davier kijtouaya: ‘Nikuelitaskia nimopatas, sayoj ke amo niueli’. Ompa peujkej tichokaj”. Kemej tikitaj, semi tiyolpakij keman tikpaleuiaj aksa maj mochiua itatojtokakauj Cristo.

5. ¿Toni yekinika moneki uan ijkon tikinchiuaskej imomachtijkauan Cristo?

⁵ Yekinika moneki tikintemoskej akin kinekij kiixmatiskej Jiova (Mat. 10:11). Tiknextiaj ke yekmelauj tiitaixpantijkauan Jiova komo tikinnojnotsaj nochin akin tikinajsij. Uan tiknextiaj ke yekmelauj tikchiuaj kemej Cristo komo titanojnotsaj.

6. ¿Toni techpaleuis maj techkakikan itech tanojnotsalis?

⁶ Seki taltikpakneminij kinektokej kimatiskej tein Biblia tamachtia. Sayoj ke oksekin, yekinika amo kinekij momachtiskej uan xa moneki tiktemoskej maj kinyolnotsa tamachtilis. Komo achto kuali timomachtiaj toni tikiniluiskej kinekiskej techkakiskej. Maj tikixpejpenakan tamachtilis tein xa taltikpakneminij kinyolnotsas uan maj tiknemilikan keniuj ika tikinnojnotsaskej.

7. 1) ¿Keniuj ueliskia tipeuaskej titajtoskej iuan aksa? 2) ¿Keyej tikonnemilia ke moneki maj titekakikan uan maj titepoujkaitakan?

⁷ Kemej neskayot, ueliskia tikijtoskej: “Nikuelitaskia nikmatis keniuj tikonita nejin taman. Axkan, tinochin tikpanouaj miak ouijkayomej. ¿Tikonnemilia ke motayektaliskia komo se tekiuaj taixyekana semanauak taltikpak?”. Satepan, ueliskia tikixtajtoltiskej Daniel 2:44 uan ika titajtoskej. Oso xa ueliskia tikijtoskej: “Nikuelitaskia nimitsontajtanis. ¿Toni kinpaleuis tetatmej maj kuali kinojtokaltikan ininkoneuan?”. Ompa ueliskia ika  titajtoskej Deuteronomio 6:6, 7. Keman tikixpejpenaskej tamachtilis maj ininka titanemilikan akin tikinnojnotsaskej uan keniuj kinpaleuis tein Biblia tamachtia. Keman iniuan titajtoskej, semi moneki maj tikinkakikan uan maj tikpoujkaitakan tein techiluiskej. Ijkon, okachi tikinajsikamatiskej uan xa okachi techkakiskej.

8. ¿Keyej moneki tiksentokaskej tikinkalpanoskej taltikpakneminij?

⁸ Achto ke aksa kinekis momachtis Biblia, xa monekis timochikauaskej miakpa tikalpanoskej. ¿Keyej? Porin keman tiktemotiuij xa amo yetos oso amo uelis touan tajtos. Uan no, ijkon okachi techixmatis uan kinekis maj tikmachtikan ika Biblia. Maj tikelnamikikan ke se xochit okachi moskaltia komo miakpa tikatekiaj. No ijkon, aksa okachi uelis kitasojtas Jiova uan Cristo komo miakpa tiknojnotsaj ika Biblia.

9, 10. ¿Keyej tikijtouaj ke tinochin uelis tikinajsiskej akin yekmelauj kinekij kiixmatiskej Dios?

⁹ Nochin akin titanojnotsaj uelis tikinajsiskej akin yekmelauj kinekij kiixmatiskej Dios. Nejin tamati kemej ijkuak kitemouaj se konet tein poliuik. ¿Keyej? Maj tikitakan tein kipanok se konetsin akin kipiaya eyi xiuit. Yejua poliujka. Keman kitemojkej tapaleuijkej kemej quinientos taltikpakneminij. Veinte horas satepan semej akin tapaleuij kiajsik milaj. Sayoj ke amo kijtoj ke yejua kiajsika, ta kijtoj: “Tikajsikej porin tel miakej titapaleuijkej”.

¹⁰ Kemej nejon konetsin miakej kemej yeskia no poliujtokej. Amo kimatij tein kuali tein Dios kichiuas, sayoj ke kinekij maj kinpaleuikan (Efes. 2:12). Panoua ocho millones tiitaixpantijkauan Jiova tikintemojtokej nejon taltikpakneminij.  Kampa titanojnotsaj xa tejuan amo tikajsinij aksa akin kineki momachtis Biblia, sayoj ke okseki tokniuan kemaj. Keman se tokniuj kiajsi aksa uan kipaleuia maj mochiua imomachtijkauj Cristo, tinochin tiyolpakij.

11. Maski amo tikmachtiaj aksa ika Biblia, ¿keniuj uelis titapaleuiskej maj mochiuakan imomachtijkauan Cristo?

¹¹ Maski axkan amo tikmachtijtokej aksa ika Biblia, uelis titapaleuiskej ika okseki taman. Kemej neskayot, keman aksa yekinika youi nechikol, uelis kuali tikseliskej uan tikchiuaskej maj kuali momachili. Ijkon kiitas ke yekmelauj tikchiuaj kemej Cristo porin timotasojtaj (Juan 13:34, 35). Uan maski amo tikijtoskej miak taman keman titanankiliskej, uelis kipaleuis maj kimelaua ika poujkaitalis tein momachtijtok. Uan no uelis titanojnotsatiuij iuan se tokniuj akin yekin mochiuak tanojnotskej uan tikpaleuiskej maj kintanemililti taltikpakneminij ika Biblia. Komo tikchiuaj nejon, tikpaleuiaj maj kichiua kemej Cristo (Luc. 10:25-28).

12. ¿Sayoj tikpaleuiskej aksa maj mochiua imomachtijkauj Cristo komo titeluelij titamachtiaj? Xikonijto se neskayot.

¹² Maj amo tiknemilikan ke sayoj uelis tikpaleuiskej aksa maj mochiua imomachtijkauj Cristo komo titeluelij titamachtiaj. ¿Keyej tikijtouaj nejon? Maj tikitakan ineskayo Faustina akin nemi Bolivia. Keman kinixmatik itaixpantijkauan Jiova, amo uelia taixtajtoltiaya, sayoj ke axkan uelia tepitsin. Moauijya, uan yolpaki kinmachtis tein melauak oksekin. Chijchikueyitika kinmachtia makuil taltikpakneminij. Maski Faustina amo semi ueli taixtajtoltia kemej kichiuaj akin kinmachtia, kinpaleuiani chikuasen maj moauikan (Luc. 10:21).

13. Maski tikpiaskej miak tekit, ¿toni tikseliskej komo titapaleuiaj maj mochiuakan imomachtijkauan Cristo?

¹³ Miakej akin kichiuaj kemej Cristo kipiaj miak tekit. Maski ijkon, kitemouaj kinmachtiskej oksekin ika Biblia uan nejon semi kinyolpaktia. Maj tikitakan ineskayo Melanie akin nemi Alaska, itech se xolal tein moajsi uejka, kampa sayoj yejua itaixpantijkauj Jiova. Yejua iselti kiiskaltijtoya se isiuapiltsin akin kipiaya chikueyi xiuit; tekitia lunes hasta viernes uan tapaleuiaya maj moyekpia ipopaj akin kipiaya cáncer. Miakpa kitajtaniaya Dios maj kipaleui maj youi tanojnotsati maski semi taseseyaya porin kinekia kiajsis aksa akin kimachtis Biblia. Satepan kiajsik Sara, akin semi yolpakik keman kimatik ke Dios kipia itokay. Amo uejkauak, nejin siuat kinekik momachtis. Melanie kijtoua:  “Viernes tiotakpa semi nisioujtoya. Sayoj ke nosiuapiltsin uan nejua tiyayaj tikmachtitij uan nejon semi techpaleuiaya. Tikuelitayaj tiktemoskej tamachtilis tein ika tiknankiliayaj inetajtaniluan Sara uan semi techyolpaktij tikitaskej keniuj mochiuak itasojikniuj Jiova”. Maski akin pouiaj itech itiopan uan ichankauan kiixnamikkej, Sara kikauak itaneltokalis uan moauij.

14. 1) ¿Keniuj keman titanojnotsaj kemej yeskia tiamichkitskiaj? 2) ¿Toni techolinia maj tikchiuakan tein kijtoj Pablo itech 2 Timoteo 4:1, 2?

¹⁴ Maski titanojnotsaj uan amo akin tikpaleuianij maj mochiua imomachtijkauj Cristo, maj amo timosenkauakan, se tonal uelis tikajsiskej aksa. Maj tikelnamikikan ke Jesús kijtoj ke akin kichiuaj nejin tekit kemej yeskia amichkitskiaj. Amichkitskianij uelis miak horas tatemojtoskej uan amo kikitskiskej nion se amichij. Miakpa tekitij youak oso keman ayamo tanesi uan kemansa moneki yaskej kampa okachi uejka itech at (Luc. 5:5). No ijkon, seki itaixpantijkauan Jiova miak horas uan kampa yeski kintemouaj taltikpakneminij. Akin mochikauaj ijkon kichiuaskej, okachi uelij tajtouaj iniuan miakej akin kinekij momachtiskej iTajtol Dios. ¿Ueliskia titanojnotsaskej keman uan kampa okachi uelis tikinajsiskej taltikpakneminij? (Xikonixtajtolti 2 Timoteo 4:1, 2.)

15. ¿Keyej moneki amo tiyolijsiuiskej keman titamachtiaj?

¹⁵ ¿Keyej moneki amo tiyolijsiuiskej keman titamachtiaj ika Biblia? Porin  amo sayoj moneki tikpaleuiskej momachtijkej maj kiixmati uan maj kitasojta tein Biblia tamachtia, ta no moneki tikpaleuiskej maj kiixmati uan maj kitasojta Jiova, Akin iaxka Biblia. Uan amo sayoj tikmachtiskej toni kineki Jesús maj kichiuakan itatojtokakauan, ta no moneki tikpaleuiskej maj kimati keniuj monejnemiltis kemej se yekmelauj itatojtokakauj. Moneki amo tiksenkauaskej keman mochikaua kitakamatis tein Biblia kijtoua. Seki momachtianij niman uelij kipataj kemej tanemiliaj uan tein kichiuaj, sayoj ke oksekin okachi uejkauaj.

16. ¿Toni techmachtia tein kipanok Raúl?

¹⁶ Tein kipanok se tokniuj misionero ompa Perú kinextia keyej semi tapaleuia maj amo se yolijsiui. Tokniuj kijtoj: “Nikmachtiaya se takat akin itokay Raúl. Yejua momachtijkaya ome amatajkuilolmej. Sayoj ke kiouijmakaya kichiuas tein momachtijtoya. Amo kuali mouikaya iuan inamik, kijtouaya pitsotik tajtolmej uan ikoneuan amo kipoujkaitayaj. Sayoj ke, kemej yaya nechikolmej niksentokak nikalpanoj yejua uan ikalyetouanij. Eyi xiuit satepan ke nikixmatik, mopatak uan uelik moauij”.

17. ¿Toni tikitaskej itech okse tamachtilis?

¹⁷ Jesús technauatij maj tikinchiuakan imomachtijkauan noyampa taltikpak. Tiktakamatij keman iniuan titajtouaj akin amo tanemiliaj kemej tejuan, hasta iniuan akin amo kipiaj se taneltokalis oso amo kineltokaj Dios. Itech okse tamachtilis, tikitaskej keniuj uelis ika tikinnojnotsaskej iTekiuajyo Dios akin ijkon tanemiliaj.