1-2. (1) Mwawiiwanana ni nlamulo na Yesu mu Mateu 28:18-20, tuuvi ori muteko woochuneyaxa mmiloko Seekristu? (2) Makoho taani anahaala waakhuliwa mmwaha yoola?

ARUMMWA yaahitepa ohakalala. Amanle oviihiwa mookhwani, Yesu aahaaveka wi ethukumane va mwaako. (Mat. 28:16) Akhweya ela yaari ekwaha yeela owo oonen’yeiye “wa asinna opwaha masana mathanu, elukuluku emoha yeeyo.” (1 Kor. 15:6) Ntakhara heeni Yesu aachunneiye waathukumanya arummwa awe? Wi aavahe muteko woochuneyaxa: “Haweni wa achu a maloko oothene, mwaapakeke oohuserya aka.”—Mwaalakhanye Mateu 28:18-20.

² Arummwa yaawo yiiwale nlamulo na Yesu yaahipaka makupa a muloko weekristu yoowo waakhanle iyaakha macikhwi meeli muculi. Muteko woochuneyaxa wa muloko yoowo, waari waapaka oohuserya ancipale a kristu. * Olelo, sookhalavo miloko sawaakhwana macikhwi nsana nimoha ni makhumi meeli mu elapo yoothene, nave muteko aya woochuneyaxa ti mmohamoha. Mmwaha yoola, nnahaala waakhula makoho masese: Ntakhara heeni muteko wa waapaka oohuserya oryaaya woochuneyaxa? Tiheeni muteko owo onavolowelaaya? Apwanne Akristu oothene annapaka makupa mmuteko wa waapaka oohuserya? Ntakhara heeni ninnaphwanela opisa murima mmuteko yoowo?

3. Mwawiiwanana ni Yohani 14:6 ni 17:3, ntakhara heeni waapaka oohuserya oryaaya woochuneyaxa?

³ Waapaka oohuserya ori muteko woochuneyaxa. Pahiru, muchu onahaala okhala nthamwene a Muluku wakhala wi murummwa a Kristu. Opwaha yeeyo, yaale anamuchara Kristu annawerya  okhalano ekumi yaphaama olelo ni ophwanya ekari ya okhalano ekumi yoohimala muhoolo. (Mwaalakhanye Yohani 14:6; 17:3.) Moohikhwa minikwa, Yesu oonivaha muteko mutokweene. Nyenya hanri meekhihu mmuteko yoola. Hiiha ntoko murummwa Paulo orempeiye, “hiyo na alipa-muteko akhwawe a Muluku.” (1 Kor. 3:9, NN) Ela ekari etokweene Yehova ni Yesu anivanhaaya hiyo, achu oohiphaameya!

4. Tiheeni nnahuseryahu mu yaweereya elociwe ni Ivan ni Matilde?

⁴ Muteko wa waapaka oohuserya onanwerya oniruuhela ohakalala otokweene. Moone yootakiherya ya Ivan ni mwaariye Matilde yaawo anakhala o Kolompiya. Vaavaa yaamulalenryaaya mmiravo onichaniwa Davier, owo aaloca wa mutheli: “Miyaano kinnachuna otoroka okumi aka, nyenya nkinawerya.” Owo aari namawana a makofi, aanalya mirece, aanahapaliwa nave aakhalano mpwanaawe, awiichaniwa Erika. Ivan onnathariha: “Hiyo naahipacerya ophiya owannyawe, o epooma ekhaani yoorakamela. Wi niwerye ophiya weiwo, naaphwanela weeca ni ecika iwora sincipale mu iphiro sa matope. Nyenya Devier aahipacerya otoroka meecelo ni moonelo awe. Oonaka yeeyo, Erika aahichuna tho ophwanyeya va yoohuserya yeele.” Moovira wa elukuluku, Davier aahihiya olya mirece, ohapaliwa ni owana makofi, nave arepiha othela wawe ni Erika. Matilde oriye: “Vaavaa Davier ni Erika yaapatisiwaaya mu 2016, naahuupuwela yeeyo Davier aalonceiye: ‘Miyaano kinnachuna otoroka okumi aka, nyenya nkinawerya.’ Naahihakalala vancipale ophiyerya omoriha miithori.” Moohikhwa minikwa, waakhaviherya achu okhala oohuserya a Kristu enanwerya oniruuhela ohakalala otokotoko.

5. Echu taani yoopacerya wi naapake oohuserya?

⁵ Echu yoopacerya wi naapake oohuserya ori owaavya yaale arino nchuno na ohuserya vooloca sa Yehova. (Mat. 10:11) Ninnooniherya wi na Anamoona a Yehova eeparipari vaavaa nnaalaleeryaahu achu oothene nnaphwanyaahu. Ninnooniherya wi chiryene na Akristu vaavaa nniiwelelaahu nlamulo nenlo naakhenlaahu orweela wa Kristu, olaleerya michaka saphaama.

6. Tiheeni enahaala onikhaviherya okhumelela phaama mmuteko woolaleerya?

⁶ Mmuteko woolaleerya, nnahaala waaphwanya achu anahaala ochuna ohuserya vooloca sa Piipiliya, nyenya tho nnahaala waaphwanya ancipale anakhala wi hanapwacha michaka nnalaleeryaahu. Mmikhalelo seiho, nnaphwanela ophwanya mukhalelo wa otannya nchuno naya. Mwa yeeyo, nnaphwanela okhala ooreheryeya phaama. Muloce miyaha sinahaala otannya nchuno na achu. Voocharela, muupuwele mukhalelo munahaalaanyu opacerya oloca ni yaawo.

7. Muni mpaceryihe hai ovaanela ni muchu, nave ntakhara heeni munoonaanyu wi ti woochuneya onwiriyana muchu ni ocicimiha moonelo awe?

⁷ Ntoko yootakiherya, munanwerya oloca ni mwaneene a vaate: “Kaamusiveliwa osuwela moonelo anyu vooloca sa mwaha wawunlaana. Olelo, achu mu elapo yoothene annahoolela makacamiho mamohamoha. Apwanne wookhalavo olamulelo onahaala owerya omaliha makacamiho oothene?” Voocharela mmuthokororye Daniyeli 2:44. Mukhalelo mukina ori okoha: “Mmoonelo anyu, tiheeni eni ekhaviherye waaphuwa phaama anamwane?” Voocharela, muthokororye Malamulo 6:6, 7. Moohipwacha mwaheene, nwuupuwele achu yaawo anahaala woowiriyanaani. Mwaanyiherye mukhalelo enahaalaaya okhala yaphaama wa yaawo osuwela yeeyo Piipiliya onahusiheiye. Elukuluku munalocaanyu ni muchu, mmuwiriyane moopwacha vaavaa onahaaleiye oloca moonelo awe. Mweerano hiiha, munahaala owerya omwiiwexexa phaama, nave owo onahaala okhala ootaphuwa owiriyana yeeyo munahaalaanyu oloca.

8. Ntakhara heeni onamuchuneya wiilipiserya ni elukuluku wi nipake osekurya?

 ⁸ Muchu ahaakumve weemererya yoohuserya, akhweya onamuchuneya wiilipiserya ni elukuluku wi nipake oxekurya. Ntakhara heeni? Nthowa nawi owo onanweryeya ohiphwanyeya owannyawe naari ohineemererya oloca wanaawiili ekwaha nnayaahu omuxekurya. Akhweya onamuchuneya wi mpake oxekurya ikwaha sincipale, mwaneene a vaate ahaakumve okhala ootaphuwa weemererya yoohuserya ya Piipiliya. Muupuwelele ela, mwiri onahaala wunnuwa pahiru wakhala wi onnaheliwa maahi wiiliwiili. Mmukhalelo woolikana, osivela wa muchu ntakhara Yehova ni Yesu onampacerya wunnuwa wakhala wi ninnamusekurya wiiliwiili wi nloce sa Piipiliya.

9-10. Ntakhara heeni nnanwerya oloca wi mulaleeryi ti mulaleeryi ookhalano murici mu okhaviherya waaphwanya achu a murima waphaama?

⁹ Mulaleeryi ti mulaleeryi ookhalano murici wa okhaviherya waaphwanya achu a murima waphaama. Nnanwerya olikanyiha yeeyo ni muteko wa omwaavya mwaana orimeenle. Mmukhalelo taani? Muthokororye yaweereya yeeparipari: Mwaana mukhaani a iyaakha chaaru aavinya vaate nave aarimeela. Achu awaakhwana masana mathanu yaahiiveleela wi emwaavye. Evinrevo elukuluku ya iwora sawaakhwana makhumi meeli, mwaana aahiphwanyiwa ni awiiveleela mmoha waacamela mu emaca ya nakhuwo. Awiiveleela ole haachuna waakhela ovuwa ntakhara omphwanya mwaana. Owo aaloca: “Waari woochuneya wiilipiserya wa achu masana wi nimphwanye.”

¹⁰ Achu ancipale analikana ni mwaana yoole. Awo anniisoona okhala oorimeela, oohikhalano ewehereryo, nave annachuna nikhaviheryo. (Éfe. 2:12) Hiyo nri nikhuuru na achu oopwaha amilyawu athanu nararu yaawo analapa vamoha wi yaaphwanye achu oophwanelela. Akhweya nyuwano hamumphwannye muchu yoowo eemerenrye yoohuserya ya Piipiliya. Nyenya alaleeryi akina yaawo analapa mu ekulucu emohamoha  akhweya anahaala omphwanya muchu onahaala ochuna ohuserya iparipari sa Masu a Muluku. Vaavaa munna naari murokora onamphwanyeiye muchu yoowo moovira wa elukuluku onakhala murummwa a Kristu, oothene yaale apanke makupa mu waavya anamukhala oohakalala.

11. Naamwi muhirino yoohuserya ya Piipiliya, ichu taani ikina munaphwanelaanyu opaka wi mukhaviherye waapaka oohuserya?

¹¹ Wakhala wi mu elukuluku yeela himwaano yoohuserya ya Piipiliya, naamwiihiiha munanwerya okhaviherya waapaka oohuserya mmikhalelo mikina. Ntoko yootakiherya, mwaakoheke muxelo avyaani yaawo anaphiya mu Empa ya Omwene naari mooniherye onthamwene ni yaawo. Vaavaa anoonaaya osivela orivovo variyari va hiyo, awo anahaala wiiwexexa wi na Akristu eeparipari. (Yoh. 13:34, 35) Ohiya yeeyo, mwiilipiserye ovaha maakhulo mmithukumanoni. Maakhulo anyu, naamwi eri awaakuveya, ananwerya waakhaviherya avyaani oloca mmukhalelo weeparipari ni woocicimiheya. Nave wakhala wi yookhumelela ekari, mulape ni mulaleeryi muvyaani nave mmuhusihe mukhalelo wa ompharihela Piipiliya wi avaanele ni achu. Ola mukhalelo wa omooniherya mulaleeryi muvyaani mukhalelo wa omutakiherya Kristu.—Luka 10:25-28.

12. Apwanne onnachuneya okhalano mavyakelo avameekhaaya wi naapake oohuserya? Mutharihe.

¹² Ahikhale oni uupuwele wi onaphwanela okhalano mavyakelo a vameekhaaya wi aakhaviherye akina okhala oohuserya a Yesu. Ntakhara heeni? Moone yootakiherya ya Faustina, onakhala o Poliviya. Elukuluku aasuwenleiye Anamoona a Yehova, haasuwenle waalakhanya. Olelo onnawerya waalakhanya, nyenya mmukhalelo wookotakota. Owo vano oopatisiwa nave onnasiveliwa waahusiha akina vooloca sa Piipiliya. Ookhalano yookhovelela ya weeciha soohuserya sa Piipiliya thanu, esumana yoothene. Oohuserya a Faustina annaalakhanya phaama ompwaha yene. Moohipwacha okotakota wawe owo ohaakhaviherya achu athanu nammoha ophiyerya opatisiwa.—Luka 10:21.

13. Naamwi nikhalaka ooweiwa, mareeliho taani nnaakhelaahu vaavaa nniilipiseryaahu wi naapake oohuserya?

¹³ Akristu ancipale ari ooweiwa ni ichu ikina soochuneya. Naamwi hiiha, awo anniivaha elukuluku wi yeecihe soohuserya sa Piipiliya, nave eyo ennaavaha ohakalala wawaaca. Moone yootakiherya ya Melaniye, yoowo aakhala mu epooma yoorakamela yo Alaska. Owo aamphuwa meekheiye mwanawe amwaamuthiyana a iyaakha thanu nararu, aanalapa nihiku noothene nave aanaakhapelela atiithi awe yaarino ereca ya kanser. Mu epooma yoothene Melaniye aari meekheiye ntoko Namoona a Yehova. Owo aanachuna vancipale omphwanya muchu yoowo aahaala osiveliwa omuhuserya Piipiliya. Mwa yeeyo, owo aanavekela ikwaha soothene wa Yehova amvekaka ikuru wi avilele ni oriirya wi awerye okhuma mmuteko woolaleerya. Nihiku nimoha, owo aahimulaleerya muthiyana mmoha  oniichaniwa Sara nave aamuhusiha wi Muluku ookhalano nsina. Sara aahikhala ootikhiniheya ni yeeyo, nave moovira wa elukuluku, aheemererya yoohuserya ya Piipiliya. Melaniye onnathariha: “Miyaano kiisoona okhala oovelaveleene a neethanu oothene ohiyu, nyenya, miyaano ni mwanaka naanaya omuhusiha Sara. Eyo yaananikhaviherya phaama. Naanasiveliwa otholathola maakhulo a makoho a Sara, nave omoona yene akhalaka nthamwene a Yehova, eyo yaananruuhela ohakalala.” Ni olipa murima otokweene, Sara aahivootha waakaaha wa akina, ahiya ekerexa awe nave apatisiwa.

14. (1) Ntakhara heeni muteko wa waapaka oohuserya onnalikana ni ototha ihopa? (2) Tiheeni muhusenryaanyu mmasu a Paulo mu 2 Timóteo 4:1, 2?

¹⁴ Wakhala wi munoona wi muteko anyu woolaleerya honavaha sookhumelela saphaama, muhivelavele. Yesu oolikanyiha muteko wa waapaka oohuserya ni ototha ihopa. Alipa oototha ihopa annamaliha iwora sincipale wi ephare ehopa emoha. Mwawooneya awo anatotha ohaalaka osavo naari woosiiselo ene, nave ikwaha ikina onnachuneya oya mmapuro oorakamela. (Luka 5:5) Muteko wa waapaka oohuserya ti woolikana. Alaleeryi akina annamaliha iwora sincipale ‘etothaka’ moopisa murima mu ilukuluku ni mapuro oohiyanahiyana. Ntakhara heeni anapakaaya yeela? Wi yaacererye ikari sa waaphwanya achu. Wiilipiserya yoola ikwaha sincipale onnaphara muteko, woona wi alaleeryi annawerya waaphwanya achu anooniherya nchuno. Akhweya mu ekulucu anyu, nyuwaano mohoona wi onnakhala wookhweya waaphwanya achu mu ewora yammoori variyari va nihiku naari mmapuro ammoori. Munoona hai weererya olaleerya mu iwora seiho naari mapuro yaawo?—Mwaalakhanye 2 Timóteo 4:1, 2.

15. Ntakhara heeni weeciha soohuserya sa Piipiliya onnachuneya opisa murima?

 ¹⁵ Ntakhara heeni ninnaphwanela okhala oopisa murima vaavaa nneecihaahu soohuserya sa Piipiliya? Nthowa nimoha ti nawi murici ahu tahi pahiru omukhaviherya oohuserya osuwela ni osivela yeeyo Piipiliya onahusiheiye. Nnaphwanela omukhaviherya ohuserya omusuwela ni omusivela mwaneene a Piipiliya, Yehova. Opwaha yeeyo, wi naahusihe oohuserya ahu yeeyo Yesu aalamulenleiye arummwa awe opaka, hiyo nnaphwanela omukhaviherya wiiwexexa mukhalelo wa wiiwelela malamulo awo. Nnaphwanela okhala oopisa murima ni waakhaviherya elukuluku aniilipixeryaaya opharihela muteko malakiheryo a Piipiliya. Akina annawerya otoroka sookhovelela ni mukhalelo aya wa wuupuwela mu miyeeri vakhaani; akina ennachuneya elukuluku yincipale.

16. Tiheeni muhusenryaanyu orweela wa yaweereya ya Raul?

¹⁶ Yaweereya ya misiyonaariyo mmoha o Peru ennanikhaviherya wiiwexexa ntakhara heeni oryaaya waphaama okhala oopisa murima. Misiyonaariyo onnathariha: “Koomuhusiha mulopwana onichaniwa Raul aliivuru apiili. Nyenya owo aanahoolela makacamiho mancipale mweekumini wi amurumeele Yehova. Owo aanahoolela makacamiho moothelani mwawe, aanapharihela masu oohiphwanelela, nave waakhala woovila anaawe omucicimiha. Owo aanaphwanyeya mmithukumano moohihiyererya. Mwa yeeyo, nkaavelavenle ni yene nave kaatitelela omukhaviherya Raul ni emusi awe. Ivinrevo iyaakha opwaha chaaru nimanle osuwelana, Raul aahiphwanelela opatiso.”

17. Tiheeni nnahaalaahu ohuserya mmwaha onacharela?

¹⁷ Yesu oonivaha nlamulo: “Haweni wa achu a maloko oothene, mwaapakeke oohuserya aka.” Wi niiwelele nlamulo nenla, ikwaha sincipale nnaphwanela oloca ni achu yaawo anuupuwela mmukhalelo woohiyana ni hiyaano. Eyo enaphitaanyerya yaale ahirino malapelo ammoori naari ahineemererya wi Muluku ookhala. Mmwaha onacharela, nnahaala woona mukhalelo wa waalaleerya achu si yaawo.