1-2. (a) Moloʼö fareta niwaʼö Yesu ba Mataiʼo 28:18-20, hadia ohitö dödö siföföna nifalua mbanua niha Keriso? (b) Hadia wanofu-nofu nitutunöda ba wamahaʼö daʼa?

ME NO aefa tesusugi Yesu, iʼandrö khö ndra sinengenia ba wamalukhaisi yaʼia ba hili. Ba labalo-baloi sibai ginötö daʼö ira sinenge. (Mat. 28:16) Te daʼö ginötö me ”isamuzaigö wamalukhaisi ira talifusö si töra 500 niha”. (1 Kor. 15:6) Hana wa iʼandrö Yesu khö ndra nifahaʼönia ba wamalukhaisi yaʼia ba nahia daʼö? Yaʼia daʼö ba wameʼe khöra fareta, ”Börö daʼö, miʼae mibaliʼö nifahaʼögu fefu niha moroi ba ngawalö soi.”​—Baso Mataiʼo 28:18-20.

² Ira nifahaʼö zamondrongo fehede Yesu, ba gafuriata tobali ira mbanua niha Keriso ba abad siföföna. Ohitö dödö siföföna mbanua niha Keriso, yaʼia daʼö enaʼö itugu ato niha tobali nifahaʼö Keriso. * Iadaʼa, töra otu ribu mbanua niha Keriso ba zi sagörö ulidanö, ba oi fagölö ohitö dödöra. Ba wamahaʼö daʼa, tatutunö öfa ngawua wanofu: Hana wa moguna sibai ba wombaliʼö nifahaʼö? Hadia manö zinangea tafalua ba wombaliʼö nifahaʼö? Hadia fefu niha Keriso tola fao ba wombaliʼö nifahaʼö? Ba hana wa moguna so khöda waʼebolo dödö ba wamalua halöwö daʼa?

3. Moloʼö Yohane 14:6 ba 17:3, hana wa moguna sibai ba wombaliʼö nifahaʼö?

³ Hana wa moguna sibai ba wombaliʼö nifahaʼö? Börö me ha nifahaʼö Keriso si tola fahuwu khö Lowalangi. Aefa daʼö, niha soloʼö khö Keriso tola sökhi waʼaurira iadaʼa ba laʼokhögö wanötöna faʼauri si lö aetu ba zi so miföna. (Baso Yohane 14:6; 17:3.) Tobali, no ibeʼe khöda Yesu noro dödö sebua, hizaʼi tenga ha yaʼita samösa zamalua halöwö daʼa. Isura sinenge sotöi Faulo sanandrösa khönia hegöi ira talifusö si sara lala wamati khönia, ”Si falulu fohalöwö sa ndraʼaga ba halöwö Lowalangi.” (1 Kor. 3:9) Hewaʼae lö moʼahonoa ita, tola falulu fohalöwö ita khö Yehowa hegöi Keriso. Daʼa no töi sebua khöda!

4. Hadia wamahaʼö nihalöda moroi ba zalua khö Ivan hegöi Matilde?

⁴ Halöwö ba wombaliʼö nifahaʼö, tola itugu taʼokhögö faʼowua-wua dödö. Nehegö duma-duma Ivan hegöi foʼomonia Matilde ba Kolombia. Manuriaigö ira khö ndra matua sawuyu-wuyu sotöi Davier, samatunö khöra, ”Omasido ubulöʼö waʼaurigu, hizaʼi tebai ufalua.” Davier andre niha si fatezu ba iʼogunaʼö narkoba, mabu ba sambua omo ia khö kawania, Erika. Imane Ivan, ”Mabörötaigö wamahaʼö yaʼia ba Zura Niʼamoniʼö. Toröi ia ba mbanua si fandröndröu sibai moroi ba kota, matörö gureta ba zi hauga za, ba fatambu sibai lala nitöröma. Me inehegö Erika wa tebulö gamuata hegöi lagu Davier, fao ia göi ba wamahaʼö ba Zura Niʼamoniʼö.” Ba gafuriata, ibato Davier wangogunaʼö narkoba, mabu hegöi fatezusa. Ba mangowalu ia göi khö Erika. Imane Matilde, ”Ba ginötö labayagö idanö Davier hegöi Erika me döfi 2016, itörö tödöma me imane Davier, ’Omasido ubulöʼö ndraʼo, hizaʼi tebai ufalua.’ Omuso sibai dödöma irugi tebai mataha weʼema.” Tatu göi taʼokhögö waʼomuso dödö ba ginötö tatolo niha tobali nifahaʼö Keriso.

5. Hadia lala si oföna nifaluada ba wombaliʼö nifahaʼö?

⁵ Lala si oföna nifaluada ba wombaliʼö nifahaʼö, yaʼia daʼö ba wangalui niha somasi mamahaʼö yaʼira sanandrösa khö Yehowa. (Mat. 10:11) Na manuriaigö ita ba niha, no taforomaʼö wa yaʼita samösa Samaduhuʼö Yehowa. Ba no göi taforomaʼö wa yaʼita niha Keriso sindruhu na taʼoʼö fareta Keriso weʼamöi manuriaigö.

6. Hadia zinangea tafalua enaʼö omasi niha ba wamondrongo hadia niwaʼöda?

⁶ So ösa niha si terou tödö ba wamahaʼö yaʼira ba zindruhu si so ba Zura Niʼamoniʼö, hizaʼi ato niha nifalukhaisida lö omasi ira ba wamobörö. Börö daʼö, moguna so nifaluada enaʼö adöni dödöra. Enaʼö mofozu ita ba wanuriaigö, moguna tahaogö ba wamaʼanö yaʼita. Tatugöi hadia zinangea öfaʼema enaʼö adöni dödö niha nifalukhaisimö. Aefa daʼö, angeragö hewisa lalamö ba wamaʼema yaʼia.

7. Hewisa wamörögömö fahuhuosa ba niha, ba hana wa moguna sibai öfondrondrongo ba öfosumange ira?

⁷ Duma-dumania, tola ösofu khö zokhö omo, ”Hadia tola uʼila mbua gera-eramö? Ba zi sagörö ulidanö, ato niha zanaögö abula dödö sebua. Moloʼö yaʼugö, hadia so gamatöröwa si tola mangeheta fefu gabula dödö daʼö?” Aefa daʼö, tutunö Danieli 2:44. Mazui tola ösofu khö zi samösa niha, ”Moloʼö yaʼugö, hadia lala si sökhi ba wamahaʼö iraono enaʼö itugu sökhi? Omasido ufondrondrongo mbua wangera-ngeramö.” Aefa daʼö, tutunö 5 Moze 6:6, 7. Gofu  hadia nifaʼemamö ba niha, angeragö niha samondrondrongo huhuomö. Khalaigö hewisa wamahaʼö moroi ba Zura Niʼamoniʼö ba wanolo yaʼira. Ba ginötö fahuhuo ndraʼugö khöra, moguna öfondrondrongo hadia niwaʼöra, ba böi osilöʼögö lala wangera-ngerara. Na öfalua daʼö, tola itugu aboto ba dödömö sanandrösa khöra ba omasi ira göi ba wamondrondrongo hadia nifaʼemamö.

8. Hana wa moguna sibai taforege ba wamalukhaisi yaʼira?

⁸ Fatua lö ihalö gangetula si samösa niha ba wamahaʼö yaʼia ba Zura Niʼamoniʼö, moguna oya öbeʼe ginötömö hegöi faʼabölömö ba wamalukhaisi yaʼira mangawuli. Hadia mbörö? Börö me tola manö lö niha ba nomo ba ginötö tafuli tafalukhaisi ira mazui oya halöwöra. Aefa daʼö, moguna göi öfalukhaisi ira mato hauga kali, irege so khöra waʼadöni dödö ba wanemaʼö famahaʼö ba Zura Niʼamoniʼö. Törö tödömö, tola tedou zinanö na lö tebulö muhawui faoma nidanö. Simanö göi, tola itugu adöni dödö niha ba wangomasiʼö Yehowa hegöi Yesu, na lö tebulö tadunö-dunö khönia Daromali Lowalangi.

9-10. Hana wa tola tawaʼö wa fefu niha Keriso fao ba wangalui niha satulö tödö?

⁹ Fefu niha Keriso fao ba wangalui niha satulö tödö. Halöwö nifaluada fagölö simane wangalui iraono si taya. Hewisa wamalua yaʼia? Duma-dumania, samösa nono matua side-ide si no irai taya, tölu fakhe ndröfinia. Arakhagö 500 relawan si fao ba wangalui yaʼia. Ba gafuriata, me arakhagö 20 za taya nono andrö, samösa sukarelawan zanöndra yaʼia ba kabu rigi. Lö omasi ia lasuno börö me no isöndra nono daʼö. Imane sukarelawan andrö, ”Tola musöndra  nono andrö, börö me falulu fohalöwö fefu ba wangalui yaʼia.”

¹⁰ Ato niha iadaʼa simane iraono si taya. Lö khöra wanötöna, andrö moguna tatolo ira. (Ef. 2:12) Töra walu zuta ita si fao falulu fohalöwö ba wangalui niha simane daʼö. Te lö ösöndra niha somasi mamahaʼö yaʼia ba Zura Niʼamoniʼö ba ginötö öʼalui. Hizaʼi, tola manö so zanuriaigö tanö böʼö sanöndra niha somasi mamahaʼö yaʼia ba Daromali Lowalangi, me manuriaigö ira ba mbanua si no möiʼö manuriaigö. Ba ginötö lasöndra ndra talifusöda niha somasi tobali nifahaʼö Keriso, fefu zangalui fao ba waʼomuso dödö.

11. Hewaʼae iadaʼa lö hadöi niha nifahaʼömö ba Zura Niʼamoniʼö, hadia manö si tola öfalua ba wefao wombaliʼö nifahaʼö?

¹¹ Hewaʼae iadaʼa lö hadöi niha nifahaʼömö ba Zura Niʼamoniʼö, tola öfalua lala böʼö ba wombaliʼö nifahaʼö. Duma-dumania, tola ötemaʼö niha sawena mangondrasi Balai Mbanua Lowalangi ba fahuwu ndraʼugö khöra. Na öfalua daʼö si fao faʼomasi, tola laʼila wa yaʼita niha Keriso sindruhu. (Yoh. 13:34, 35) Hewaʼae no adogo-dogo bua gera-eramö ba gangowuloa, no ötolo niha sawena mangondrasi ba wangiʼila hewisa lalara ba wangoromaʼö famatira, na labeʼe mbua gera-era soroi ba dödö ba lö möi fangafökhöiʼö dödö niha böʼö. Tola göi fao ndraʼugö khö zi samösa sanuriaigö si bohou ba weʼamöi manuriaigö, ba ötolo ia ba wangogunaʼö Daromali Lowalangi ba wamahaʼö niha. Na öfalua daʼö, no öfahaʼö ia ba woloʼö Keriso.​—Luk. 10:25-28.

12. Hadia dali onekhe ita ba wombaliʼö nifahaʼö? Tutunö.

¹² Böi irai so ba wangera-ngerada wa dali onekhe sibai ita awena tafahaʼö niha böʼö tobali nifahaʼö Yesu. Hadia mbörö? Angeragö duma-duma moroi khö Faustina si toröi ba Bolivia. Lö iʼila mombaso me awena falukha ia khö ndra Samaduhuʼö Yehowa. Iʼotarai daʼö, ifahaʼö ia maʼi-maʼifu ba wombaso. Iadaʼa, no tebayagö ia idanö ba omuso dödönia ba wamahaʼö niha böʼö. Si toʼölönia, so dalima niha nifahaʼönia ero migu ba Zura Niʼamoniʼö. Ato ba gotalua niha nifahaʼönia, abölö onekhe mombaso moroi khö Faustina. Hewaʼae simanö, so daönö niha nitolonia irugi tebayagö idanö.​—Luk. 10:21.

13. Hewaʼae oya halöwöda, hadia manö howu-howu nitemada na fao ita ba wombaliʼö nifahaʼö?

¹³ Ato niha Keriso iadaʼa, oya laʼogunaʼö ginötö ba wohalöwö. Hewaʼae simanö, tola labeʼe ginötöra ba wamahaʼö niha ba Zura Niʼamoniʼö, ba larasoi waʼomuso dödö sebua. Nehegö duma-duma Melanie si toröi ba Alaska. Yaʼia samösa lakha mbanua, ba so khönia nono alawe side-ide, walu fakhe ndröfinia. Mohalöwö göi ia lima hari ba zi samigu ba irorogö zatuania si no göna  fökhö kanker. Fandröndröu sibai mbanuania moroi ba kota ba ha yaʼia Samaduhuʼö ba daʼö. Lö tebulö ia ba wangandrö enaʼö so khönia waʼabölö weʼamöi manuriaigö, börö me sindruhu-ndruhu omasi ia ba wanöndra niha somasi mamahaʼö ba Zura Niʼamoniʼö, hewaʼae okafu sibai cuacania. Ba gafuriata, falukha ia khö Sara, somasi mangila haniha döi Lowalangi. Lö ara aefa daʼö, omasi Sara ba wamahaʼö yaʼia ba Zura Niʼamoniʼö. Imane Melanie, ”Si toʼölönia ba zi tanö owi Zumaha erege sibai dödögu, hizaʼi yaʼo hegöi onogu alawe, möiga khönia ba wamahaʼö yaʼia ba Zura Niʼamoniʼö. Omuso sibai dödöma ba wangalui fanema li moroi ba wanofu-nofu nibeʼe Sara, ba omuso göi dödöma me maʼila tobali ia si fahuwu khö Yehowa.” Lö khö Sara faʼataʼu ba wanaögö fanandraigö, iröi gerejania ba ibayagö ia idanö.

14. (a) Hana wa fanuriaigö lafagölösi simane niha si fagai? (b) Hadia zomasi öfalua me no aefa öbaso wehede Faulo si so ba 2 Timoteo 4:1, 2?

¹⁴ Hewaʼae na lö hadöi niha nisöndramö tobali nifahaʼö, böi awuwu ndraʼugö ba wangalui niha somasi nifahaʼö. Törö tödömö niwaʼö Yesu, wa niha sanuriaigö simane niha si fagai. Tola manö oya ginötö niʼogunaʼö niha si fagai enaʼö tola isöndra ngawalö giʼa. Sasesenia, fagai ira ba zi talu mbongi mazui si hulö wongi sibai, ba itaria fandröndröu sibai nahiara fagai. (Luk. 5:5) Simanö göi, so ösa ndra sanuriaigö si fao faʼebolo dödö lahorigö ginötöra ba zi hauga za ba weʼamöi manuriaigö ba mbanua misa hegöi ba ginötö si faböʼö-böʼö. Hana wa lafalua daʼö? Enaʼö ato niha nifalukhaisira. Ira sanuriaigö sowölö-ölö, sasesenia  lasöndra niha somasi ba duria nifaʼemada. Hadia tola öfaudugö ginötö hegöi nahia weʼamöi manuriaigö enaʼö ato niha si tola öfalukhaisi?​—Baso 2 Timoteo 4:1, 2.

15. Hana wa moguna so waʼebolo dödö ba ginötö tafahaʼö niha ba Zura Niʼamoniʼö?

¹⁵ Hana wa moguna faʼebolo dödö ba ginötö tafahaʼö niha ba Zura Niʼamoniʼö? Sambua mbörönia yaʼia daʼö, börö me omasi tatolo niha nifahaʼö enaʼö aboto ba dödönia ba iʼomasiʼö wamahaʼö si so ba Zura Niʼamoniʼö. Moguna göi tatolo ia enaʼö aboto ba dödönia ba iʼomasiʼö Zangokhögö Bua Gera-era Sura Niʼamoniʼö sotöi Yehowa. Aefa daʼö, tenga ha asala tafahaʼö ia hadia niʼandrö Yesu khö ndra nifahaʼönia, moguna göi tatolo nifahaʼö enaʼö aboto ba dödönia hewisa wamalua fefu waretania. Moguna so khöda waʼebolo dödö ba ginötö tatolo ia ba wamalua goi-goi Zura Niʼamoniʼö. So ösa niha nifahaʼö, ha mato hauga waŵa tola ibulöʼö lala wangera-ngerania hegöi si toʼölö ifalua. Tanö böʼönia ara sibai awena tola tebulö.

16. Hadia wamahaʼö si tola öhalö moroi ba zalua khö Raúl?

¹⁶ Samösa dalifusöda ira matua utusan injil ba Peru, itema mbua si sökhi börö me so khönia faʼebolo dödö. Imane, ”No dombua mbuku niʼogunaʼögu ba niha nifahaʼögu ba Zura Niʼamoniʼö sotöi Raúl. Hizaʼi, abua khönia ba wamalua hadia zi no ifahaʼö. Asese alua gabula dödö ba wongambatönia, iʼogunaʼö fehede si lö baga, ba lö lafosumange ia iraononia börö me lö baga gamuatania. Hewaʼae simanö, lö tebulö ia weʼamöi ba gangowuloa, andrö wa lö uböhöli wamalukhaisi yaʼia enaʼö tola utolo ia hegöi ösi nomonia. Töra tölu fakhe iʼotarai me falukha ndraʼaga, awena tebayagö ia idanö.”

17. Hadia nitutunöda ba wamahaʼö fönada?

¹⁷ Imane khöda Yesu, ”Miʼae mibaliʼö nifahaʼögu fefu niha moroi ba ngawalö soi.” Enaʼö tola tafalua halöwö daʼa, moguna asese fahuhuo ita ba niha si faböʼö lala wangera-ngera khöda, simane niha si lö mangokhögö agama, mazui si lö faduhu tödö wa so Lowalangi. Ba wamahaʼö fönada, tatutunö hewisa lalada ba wamaʼema turia somuso dödö ba niha simane daʼö.