1-2. (a) Morero o mogolo wa Bakriste ke ofe go ya ka seo Jesu a se laetšego barutiwa ba gagwe go Mateo 28:18-20? (b) Re tlo araba dipotšišo dife sehlogong se?

KA MORAGO ga gore Jesu a tsošwe bahung, o ile a laela baapostola ba gagwe gore ba kopane le yena thabeng ya kua Galilea. Baapostola bao ba swanetše go ba ba be ba thabile kudu ge ba be ba kopane moo. (Mat. 28:16) Go ka direga gore tiragalong ye ke moo Jesu a ilego a “iponagatša go [barutiwa] ba ka godimo ga ba makgolohlano [500] ka nako e tee.” (1 Bakor. 15:6) Ke ka baka la’ng Jesu a ile a kopana le barutiwa ba gagwe? Ka gobane o be a nyaka go ba laela gore: “Eyang le dire batho ba ditšhaba ka moka barutiwa.”—Bala Mateo 28:18-20.

² Barutiwa bao ba bego ba le gona ge Jesu a be a nea taelo yeo, ka morago ba ile ba ba karolo ya phuthego ya pele ya Bokriste. Morero o mogolo wa phuthego yeo e be e le go dira batho ba bangwe barutiwa ba Jesu. * Lehono go na le diphuthego tše dintši tša Bakriste lefaseng ka moka gomme morero wa tšona ga se wa fetoga. Sehlogong se re tlo araba dipotšišo tše latelago tše nne: (1) Ke ka baka la’ng modiro wa go dira batho barutiwa o le bohlokwa kudu? (2) Modiro wo o akaretša’ng? (3) Na Bakriste ka moka ba tšea karolo modirong wo wa go dira barutiwa? (4) Gona ke ka baka la’ng re sa swanela go fela pelo ge re dira modiro wo?

3. Go ya ka Johane 14:6 le 17:3, ke ka baka la’ng modiro wa go dira batho barutiwa o le bohlokwa kudu?

³ Ke ka baka la’ng modiro wo wa go dira batho barutiwa o le bohlokwa kudu? Ka gobane e le gore batho e be bagwera ba Modimo, e swanetše go ba barutiwa ba Jesu. Le gona batho bao e lego balatedi ba Kriste ba phela ka tsela e kaone gona bjale e bile ba tlo hwetša bophelo bjo bo sa felego nakong e tlago. (Bala Johane 14:6; 17:3.) Ruri Jesu o re neile modiro o mogolo kudu. Eupša sa go thabiša ke gore ga re o dire re nnoši. Moapostola Paulo o boletše ka yena le ba bangwe bao a bego a šoma le bona gore: “Re bašomigotee le Modimo.” (1 Bakor. 3:9) Ruri Jehofa le Jesu ba re file tokelo e kgolo kudu!

4. Re ka ithuta’ng phihlelong ya Ivan le Matilde?

⁴ Modiro wa go dira batho barutiwa o ka re thabiša kudu. Nagana ka mohlala wa Ivan le mosadi wa gagwe Matilde ba kua Colombia. Ba ile ba bolela ka Beibele le lesogana leo le bitšwago Davier yoo a ilego a re go bona: “Ke nyaka go fetoša bophelo bja ka, eupša ga ke kgone.” Davier e be e le ramatswele (goba a bapala papadi ya boxing), a diriša dihlaretagi, a enwa kudu e bile a dula le Erika, e lego kgarebe ya gagwe yeo a bego a se a e nyala. Ivan o re: “Re ile ra thoma go etela Davier go yo ithuta Beibele le yena motseng wa gabo woo o bego o le kgojana. Seo se be se bolela gore re be re swanetše go sepela ka dipaesekela diiri tše dintši ditseleng tša maraga. Ka morago ga gore Erika a lemoge gore Davier o dira diphetogo bophelong, le yena o ile a thoma go ithuta Beibele.” Ge nako e dutše e eya Davier o ile a tlogela go diriša dihlaretagi le go nwa e bile a se sa ba ramatswele, gomme mafelelong a nyala Erika. Matilde o re: “Ge Davier le Erika ba be ba kolobetšwa ka 2016 re ile ra gopola mantšu ao Davier a bego a rata go a bolela a rego, ‘Ke nyaka go fetoša bophelo bja ka, eupša ga ke kgone.’ Re ile ra palelwa ke go itshwara gomme ra lla.” Ruri re a thaba ge re thuša batho gore e be barutiwa ba Jesu!

5. Selo sa pele seo re swanetšego go se dira e le gore re dire batho barutiwa ke sefe?

⁵ Selo sa pele seo re swanetšego go se dira e le gore re dire batho barutiwa ke ‘go nyaka’ batho bao ba ka ratago go ithuta ka Jehofa. (Mat. 10:11) Go bontšha gore re tloga re le Dihlatse tša Jehofa, re botša motho yo mongwe le yo mongwe yo re kopanago le yena ditaba tše dibotse tša Mmušo wa Modimo. Le gona re bontšha gore re Bakriste ba kgonthe ge e ba re ekwa taelo ya Jesu ya gore re dire batho barutiwa.

6. Re ka dira’ng gore batho ba re theetše ge re le tšhemong?

⁶ Batho ba bangwe ba tloga ba nyaka go ithuta seo Beibele e se rutago, eupša ge re thoma go kopana le bona ba ka no bonagala ba sa thabele go ithuta. Re ka swanelwa ke go ba kgothaletša gore ba rate go ithuta Beibele. Ka gona re swanetše go lokišetša gabotse e le gore batho ba re theetše ge re le tšhemong. Kgetha ditaba tšeo di tlago go kgahla batho bao o tlago go kopana le bona. Ke moka o nagane e sa le pele gore o tlo thoma ditaba tša gago bjang.

7. O ka thoma poledišano bjang le motho, gona ke ka baka la’ng o nagana gore go bohlokwa go mo theetša le go mo hlompha?

⁷ Ka mohlala o ka re go mong wa ntlo: “Ke be ke kgopela go kwa gore o nagana eng ka taba ye: Mathata a mantši ao re nago le ona a ama batho lefaseng ka moka. Na o nagana gore re hloka mmušo wo o ka re rarollelago mathata a rena ka moka?” Ke moka o ka boledišana le yena ka lengwalo la Daniele 2:44. Goba o ka botšiša motho yo o bolelago le yena gore: “O  nagana gore tsela e kaone ya go ruta bana mekgwa e mebotse ke efe?” Ka morago ga gore a arabe, boledišanang ka lengwalo la Doiteronomio 6:6, 7. Nagana ka batho bao o tlago go bolela le bona ge o kgetha taba yeo o tlago go boledišana le bona ka yona. Le gona nagana kamoo ba tlago go holega ka gona ge ba ithuta seo Beibele e se rutago. Go bohlokwa gore ge o boledišana le bona o ba theetše, e bile o hlomphe kamoo ba ikwago ka gona. Ge o ka dira bjalo, o tla ba kwešiša e bile le bona ba tla kgona go go theetša.

8. Ke ka baka la’ng re swanetše go dira maeto a go boela gantšintši?

⁸ Pele motho a ka dira phetho ya go ithuta Beibele, o ka swanelwa ke go fetša nako e ntši o boela go yena. Ka baka la’ng? Ka gobane o ka no se mo hwetše ge o boela go yena gape. Le gona, o ka swanelwa ke go boela go yena gantšintši pele a ka dumela go ithuta Beibele le wena. Gopola gore gantši mohlare o gola gabotse ge o nošetšwa ka mehla. Ka mo go swanago, motho yo a thabelago le yena o tla rata Jehofa le Jesu kutšwanyana ge e ba re boledišana le yena ka Lentšu la Modimo ka mehla.

9-10. Ke ka baka la’ng re ka re Mokriste yo mongwe le yo mongwe o tšea karolo modirong wa go nyaka batho bao ba ka ratago go ithuta ka Jehofa?

⁹ Mokriste yo mongwe le yo mongwe o tšea karolo modirong wa go hwetša batho bao ba nyakago go ithuta ka Jehofa. Re ka swantšha modiro wo le go nyaka ngwana yo a timetšego. Ke ka baka la’ng re re’alo? Nagana ka seo se ilego sa diragalela mošemane wa mengwaga e meraro yo a ilego a timela. Batho bao e ka bago ba 500 ba ile ba nyakana le yena. Ka morago ga diiri tše 20 mošemane yoo a timetše, yo mongwe wa batho bao ba bego ba mo nyaka o ile a mo hwetša a le ka tšhemong. Ge batho ba be ba mo reta, motho yoo o ile a gana go retwa. O ile  a re: “Mošemane yo o hweditše ke rena ka moka.”

¹⁰ Batho ba bantši ba swana le mošemane yoo ka gobane ba ikwa ba lahlegile. Ga ba na kholofelo ka bokamoso, eupša ba nyaka thušo. (Baef. 2:12) Dihlatse tša Jehofa tša ka godimo ga dimilione tše seswai di šoma gotee go hwetša batho ba mohuta woo. Wena o ka no se hwetše motho yoo a ka nyakago go ithuta Beibele. Eupša bagoeledi ba bangwe bao ba šomago tšhemong yeo o šomago go yona ba ka hwetša motho yo a nyakago go ithuta therešo yeo e lego ka Lentšung la Modimo. Ge ngwanabo rena goba kgaetšedi a hwetša motho yoo mafelelong e bago morutiwa wa Jesu, ka moka bao ba thušitšego go hwetša motho yoo ba a thaba.

11. Gaešita le ge gona bjale o sa ithute Beibele le motho yo a itšego, o ka thuša bjang go dira batho barutiwa?

¹¹ Ge e ba gona bjale o sa ithute Beibele le motho yo a itšego, o ka thuša go dira batho barutiwa ka ditsela tše itšego. Ka mohlala, o ka amogela batho bao ba thomago go tla holong ya rena gomme wa ba nea thušo yeo ba e hlokago. Ge o ka dira bjalo, o tla ba thuša go bona gore Bakriste ba therešo ba tsebja ka go ba le lerato. (Joh. 13:34, 35) Gaešita le ge o nea dikarabo tše kopana dibokeng, seo se ka ruta bao ba thomago go tla dibokeng kamoo le bona ba ka neago dikarabo tše di tšwago pelong. Le gona o ka sepela le mogoeledi yoo e sego kgale a thomile go tšwa tšhemo gomme wa mo thuša go diriša mangwalo ge a ruta batho. Ge o ka dira bjalo, o tla be o mo thuša go ekiša Kriste.—Luka 10:25-28.

12. Na re swanetše go ba le bokgoni bjo bo kgethegilego gore re dire batho barutiwa? Hlalosa.

¹² Ga go na yo a swanetšego go nagana gore re swanetše go ba le bokgoni bjo bo kgethegilego e le gore re thuše ba bangwe go ba barutiwa ba Jesu. Ke ka baka la’ng re sa swanela go nagana bjalo? Nagana ka mohlala wa Faustina yo a dulago Bolivia. O be a sa kgone go bala ge a be a thoma go kopana le Dihlatse tša Jehofa. Gona bjale o kgona go bala ganyenyane. E bile o kolobeditšwe gomme o rata go ruta ba bangwe Beibele. Gantši o swara dithuto tša Beibele tše hlano beke e nngwe le e nngwe. Gaešita le ge batho ba bantši bao a ithutago le bona Beibele ba kgona go bala go mo feta, o šetše a thušitše batho ba tshela gore ba kolobetšwe.—Luka 10:21.

13. Re ka hwetša mehola efe ka go dira batho barutiwa gaešita le ge re dula re swaregile?

¹³ Bakriste ba bantši ba swaregile kudu ka gobane ba na le dilo tše dintši tša bohlokwa tšeo ba swanetšego go di dira. Eupša ba ipha nako ya go ithuta le batho Beibele gomme seo se ba thabiša kudu. Nagana ka mohlala wa Melanie yo a dulago Alaska. O be a se na monna gomme a godiša morwedi wa gagwe wa mengwaga e seswai a nnoši. Le gona o be a šoma ka mehla e bile a hlokomela tatagwe yo a bego a swerwe  ke bolwetši bja kankere. Melanie e be e le Hlatse ya Jehofa a nnoši toropong yeo a bego a dula go yona yeo e bego e le kgole le ditoropo tše dingwe. Ka mehla o be a rapela Jehofa gore a mo thuše go ya tšhemong le ge go be go tonya, ka gobane o be a tloga a nyaka go hwetša motho yo a ka ithutago le yena Beibele. Mafelelong o ile a kopana le Sara yoo a ilego a thaba kudu ge a be a ithuta gore Modimo o na le leina. Ka moragonyana, Sara o ile a dumela go ithuta Beibele. Melanie o re: “O tla hwetša ke lapile mathapama a Labohlano, eupša nna le morwedi wa ka re be re holwa kudu ke go yo swarela Sara thuto ya Beibele. Re be re thabela go dira nyakišišo gore re hwetše dikarabo tša Sara, gomme re ile ra thaba kudu go mmona e eba yo mongwe wa Dihlatse tša Jehofa.” Sara o ile a kgotlelela ge a be a tlaišwa, a tlogela kereke gomme mafelelong a kolobetšwa.

14. (a) Modiro wa go dira batho barutiwa o swana bjang le wa go rea dihlapi? (b) Mantšu a Paulo ao a lego go Timotheo wa Bobedi 4:1, 2 a go kgoma bjang?

¹⁴ Gaešita le ge o se wa tšwa o hwetša motho yo a nyakago go ithuta Beibele, o se ke wa fela matla. Gopola gore Jesu o ile a swantšha modiro wa go dira batho barutiwa le go rea dihlapi. Batho bao ba reago dihlapi ba ka šoma diiri tše dintši pele ba ka di hwetša. Gantši ba šoma bošego kudu goba ka masa, e bile ka dinako tše dingwe ba ka swanelwa ke go sesa monabo o motelele. (Luka 5:5) Ka mo go swanago, ka go se fele pelo Bakriste ba bangwe ba fetša diiri tše dintši ba nyakana le batho bao ba nyakago go ithuta Beibele. Le gona ba dira seo ka dinako tše di sa swanego le mafelong a sa swanego. Ke  ka baka la’ng ba dira se? Ka gobane ba nyaka go hwetša batho ba bantšinyana. Gantši bao ba šomago ka thata ba hwetša meputso ka gobane ba kopana le batho bao ba nyakago go ithuta Beibele. Na o ka leka go fetoša nako yeo o bolelago ditaba tše dibotse ka yona e le gore o hwetše batho ba bantšinyana, goba na o ka ya moo o tlago go hwetša batho gona?—Bala 2 Timotheo 4:1, 2.

15. Ke ka baka la’ng re sa swanela go fela pelo ge re swara dithuto tša Beibele?

¹⁵ Ke ka baka la’ng re sa swanela go fela pelo ge re swara dithuto tša Beibele? Le lengwe la mabaka ke gore re swanetše go thuša morutwana go ithuta dilo tšeo Beibele e di rutago le gore a di rate. Le gona re swanetše go thuša morutwana go tseba Jehofa e lego Mongwadi wa Beibele, le go mo rata. Selo se sengwe seo re ka se dirago ke go ruta morutwana seo Jesu a nyakago barutiwa ba gagwe ba se dira, le go mo thuša go tseba kamoo Bakriste ba therešo ba swanetšego go phela ka gona. Re swanetše go mo thuša re sa mo felele pelo ge a dutše a leka go diriša melao ya motheo ya Beibele bophelong bja gagwe. Barutwana ba bangwe ba kgona go dira diphetogo ka morago ga dikgwedi tše sego kae feela. Eupša ba bangwe ba tšea nako e teletšana.

16. O ithutile’ng phihlelong ya Raúl?

¹⁶ Ka mohlala, moromiwa yo mongwe wa kua Peru o bile le phihlelo yeo e bontšhago mehola ya go se fele pelo. Moromiwa yoo o re: “Ke ile ka ithuta dipuku tše pedi le monna yo a bitšwagoRaúl. Eupša le ka morago ga gore a fetše dipuku tšeo, o be a sa na le mathata a magolo bophelong. Yena le mosadi wa gagwe ba be ba na le mathata lenyalong la bona, o be a rogana e bile bana ba gagwe ba be ba sa mo hlomphe ka baka la boitshwaro bja gagwe bjo bobe. Eupša o be a etla dibokeng ka mehla, ka gona ke ile ka tšwela pele ke thuša yena le lapa la gagwe. Ka morago ga mengwaga e meraro ke thomile go bala le yena, o ile a kolobetšwa.”

17. Re tlo ithuta’ng sehlogong se se latelago?

¹⁷ Jesu o re laetše gore: “Eyang le dire batho ba ditšhaba ka moka barutiwa.” E le gore re phethe taelo yeo, gantši re swanelwa ke go bolela le batho bao ba sa naganego go swana le rena. Batho bao ba ka akaretša bao ba sa tsenego dikereke goba bao ba sa dumelego gore Modimo o gona. Sehlogo se se latelago se tlo re ruta kamoo re ka rutago batho ba mohuta woo ditaba tše dibotse.