1-2. (a) Base ed samay ingganggan nen Jesus ya nabasa ed Mateo 28:18-20, anto so manunan kimey na Kristianon kongregasyon? (b) Anto ran tepet so ebatan tayo ed sayan artikulo?

SEGURADON eksayted iray apostol nen nantitipon ira ed gilig na palandey. Kayari na inkioli nen Jesus, imbaga tod sikara ya manbabana ra ed satan a lugar. (Mat. 28:16) Nayarin satan may inkagawa ya “sikatoy nampanengneng ed masulok a 500 ya agagi.” (1 Cor. 15:6) Akin et imbaga to ya mannengneng ira diman? Lapud iter tod sikara iyan makapaliket a kimey: “Onla kayo sirin tan ibangat yo iray totoo ed amin a nasyon pian magmaliw iran disipulok.”​—Basaen so Mateo 28:18-20.

² Saraman ya disipulo ya akadngel ed imbaga nen Jesus so nagmaliw a kabiangan na Kristianon kongregasyon nen inmunan siglo. Say manunan kimey na satan ya kongregasyon et bangatan iray totoo pian mas ondakel so disipulo na Kristo. * Natan, nilibo lay kongregasyon na saray tuan Kristiano diad interon mundo, tan pareho nin siansia so manunan kimey na sarayan kongregasyon. Diad sayan artikulo, ebatan tayo irayan apatiran tepet: Akin ya importantin maong so kimey a panagbangat? Anto ray kaukolan pian nagawaan tayo itan? Kasin makakatulong so kada Kristiano ed satan a kimey? Tan akin et kaukolan so anos ed pambangat tayod saray totoo?

3. Base ed Juan 14:6 tan 17:3, akin ya importante ya bangatan tayo iray totoo pian magmaliw iran disipulo na Kristo?

³ Akin ya importante ya bangatan tayo iray totoo pian magmaliw iran disipulo na Kristo? Lapud saray disipulo na Kristo labat so nayarin magmaliw a kaaro na Dios. Sakey ni, natan ni labat et magmamaliw lan maliket so bilay na saray disipulo na Kristo tan walaan met ira na ilalo ya panliketan so andi-anggaan a bilay diad arapen. (Basaen so Juan 14:6; 17:3.) Importante sirin iyan responsabilidad ya inmatalek nen Jesus ed sikatayo, balet agtayo bukbukor ed sayan kimey. Imbaga nen apostol Pablo ya sikato tan saray maapit ya kakaaro to et ‘kakimeyan na Dios.’ (1 Cor. 3:9) Talagan baleg a pribilehyo so inter nen Jehova tan say Kristo ed saray agperpekton totoo!

4. Antoy naaralan tayo ed eksperiensya nen Ivan tan Matilde?

⁴ Makapaliket so kimey a panagbangat. Imanoen so alimbawa nen Ivan tan say asawa to, si Matilde, diad Colombia. Pinulongan da so sakey a kabataan a laki ya say ngaran to et Davier. Imbaga na sayan kabataan: “Labay kon umanen so kabibilay ko, balet agko sarag.” Si Davier et sakey a boksingero. Sikatoy mandrudruga, alabas so kakainum to, tan ka-live in toy girlfriend ton si Erika. Oniay imbaga nen Ivan: “Sikatoy ginapoan min iyaralan na Biblia. Arawdawi so baryo ya panaayaman to, tan kaukolan mi manbisikleta na pigaran oras ed mapitek a dalan. Sanen naimano nen Erika ya walay angumanan na ugali nen Davier, sikatoy akila met la ed panagaral na Biblia.” Asabi panaon, intunda nen Davier so pandrudruga tan kakainum to, pati say boksing. Inkasal to met si Erika. Imbaga nen Matilde: “Nen nampabautismo si Davier tan Erika nen 2016, anonotan mi may datin ibabaga nen Davier ya, ‘Labay koy manguman, balet agko sarag.’ Akaakis kami ed liket.” Seguradon malikeliket tayo no natulongan tayo iray totoo ya magmaliw a disipulo na Kristo.

5. Anto so unona ya kaukolan tayon gawaen pian naunor tayo imay ganggan nen Jesus ya bangatan iray totoo?

⁵ Say unona ya kaukolan tayon gawaen et anapen tayo iray totoon walaan na dugan kipapasen na puso. (Mat. 10:11) Papaneknekan tayo ya talagan sakey itayon Tasi nen Jehova no ipapaamta tayod amin so nipaakar ed si Jehova. Papaneknekan tayo met ya tua itayon Kristiano no manpupulong tayo ta satan so ingganggan na Kristo.

6. Antoy makatulong pian magmaliw tayon epektibo ed ministeryo?

⁶ Wala ray totoo ya labalabay dan naaralan iray katuaan ed Biblia, balet dakel ya nakakatongtong tayo et nayarin singa anggapoy interes da diad gapo. Ompan kaukolan tayoy manggawa na paraan pian nasagyat so interes da. Magmaliw tayon epektibo ed ministeryo no manparaan tayon maong. Manpili na saray topic ya nayarin paninteresan na saray nakatongtong mo. Insan nonot mo no panon mon ipresenta itan.

7. Antoy nayarin ibagam pian nigapom so tongtongan, tan akin et importante so idengel tan pangipanengneng na respeto?

⁷ Singa bilang, nayarin oniay ibagam ed unabung: “Labay kon naamtaan so opinyon mo. Dakel ya problema so aarapen na totoo ed interon mundo. Parad sika, kasin nasolusyonan iray problema tayo no walay sakey ya gobierno ya manuley ed interon mundo?” Insan yo pantongtongan so Daniel 2:44. Odino  nayarim ya itepet ed sakey a too: “Parad sika, antoy makatulong pian ombaleg ya makalakal iray ananak?” Insan yo pantongtongan so Deuteronomio 6:6, 7. Antokaman so topic ya pilien mo, nonot mo ray totoo ya nakatongtong mo. Isip mo no panon iran nagunggonaan no naaralan da iray ibabangat na Biblia. No mitotongtong kad sikara, importante ya ondengel kan maong, tan respetom iray opinyon da. No ontan so gawaen mo, mas natalosan mo ra tan mas dengelen da ka.

8. Akin et kaukolan tayon pansagpotan a pawilen so sakey ya interesado?

⁸ Antis ya manpaiyaral na Biblia so sakey a too, ompan kaukolan mo nin pansagpotan a pawilen. Akin? Lapud say arum a totoo et nayarin agtayo nasabi o nakatongtong diad onsublay ya ibisita tayod sikara. Ontan met, ompan kaukolan moy ompawil a maminpiga ya anggad labay la na unabung so manpaiyaral na Biblia. Tandaan, say sakey a tanaman et mas ombaleg no naynay a nasasalog. Mipadpara, say sakey ya interesado et mas ombaleg so panangaro to ed si Jehova tan ed Kristo no naynay tayon itotongtong ed sikato so Salita na Dios.

9-10. Akin ya nibaga tayo ya kada Kristiano et ontutulong ed pananap ed saray matuan impanpuso ya totoo?

⁹ Kada Kristiano et ontutulong ed pananap ed saray matuan impanpuso ya totoo. Sarag tayon ikompara iya ed pananap na abalang ya ugaw. Imanoen so tuan agawa nen abalang so sakey ya ugaw a laki a mantaon na talora. Manga 500 a totoo so tinmulong ya nananap ed sikato. Kayari na manga 20 oras manlapud impakabalang na ugaw, walay akaromog ya siansia ed sikato diad alog ya ataneman na mais. Satan ya laki ya akaromog ed ugaw et agto labay  so nirayew. Imbaga to: “Nilasus a totoo so tinmulong kanian aromog so ugaw.”

¹⁰ Dakel ya totoo so singa samay abalang ya ugaw. Anggapoy ilalo ra kanian kaukolan day tulong. (Efe. 2:12) Masulok itayon waloran milyon ya ontutulong pian naanap iray makanepegan. Nayarin anggapoy naromog mo ya naiyaralan mo na Biblia ed teritorya yo. Balet ompan saray arum ya manangipalapag ya manpupulong ditan et makaromog na interesadon manaral na Salita na Dios. No say sakey ya agi et walay naromog to ya magmaliw ya disipulo na Kristo, amin ya tinmulong ed pananap et walaan na rason a manliket.

11. No bilang ta anggapoy iyaaralan mo na Biblia, anto ray arum a paraan ya makatulong ka nin siansia ed kimey a panagbangat?

¹¹ No bilang ta anggapoy iyaaralan mo na Biblia natan, makatulong ka nin siansia ed kimey a panagbangat ed arum a paraan. Singa bilang, sarag mon abrasaen tan kaaroen iray interesado ya miaral ed Kingdom Hall. No ontan so gawaen mo, makakatulong ka pian nanengneng da ya ipapatnag tayoy panangaro ya pakabidbiran na saray tuan Kristiano. (Juan 13:34, 35) No mankomento ka ed aral, anggano antikey labat, makaaral iray balo ni ya ibalikas met so pananisia da diad pankomento ra ya impapuso tan marespeto. Sarag mo met so miulop ed balon manangipalapag tan tulongan mo no panon ton usaren so Kasulatan diad ministeryo. No ontan so gawaen mo, sikatoy ibabangat mo ya aligen toy Kristo.​—Luc. 10:25-28.

12. Kasin kaukolan ya maabilidad itayo pian natulongan tayo so arum ya magmaliw a disipulo? Ipaliwawa.

¹² Agtayo nepeg ya isipen a kaukolan ya maabilidad itayo pian natulongan tayo so arum ya magmaliw a disipulo nen Jesus. Imanoen so alimbawa nen Faustina ya taga Bolivia. Agto amtay manbasa nen inmunan akatongtong na saray Tasi nen Jehova. Balet natan et sikatoy makabasa met lay daiset tan bautismado la. Labalabay ton ibangat so arum. Maslak et limara so iyaaralan to na Biblia kada simba. Anemira la so atulongan to ya manpabautismo, anggano mas marunong ya manbasa iray iyaaralan to nen say sikato.​—Luc. 10:21.

13. Anggano okupado itayo, anto ray bendisyon ya napanliketan tayo no ontutulong tayod arum ya magmaliw a disipulo?

¹³ Dakel ya Kristiano so okupadon maong lapud pangaasikaso ra ed saray importantin responsabilidad da. Balet siansia nin ipapanaon da so pangiyaral na Biblia ed arum, tan panliliketan dan maong itan. Imanoen so alimbawa nen Melanie ya taga Alaska. Bukbukor toy mamapabaleg ed anak ton bii ya mantaon na walora. Walay full-time ya trabaho to tan  ontutulong met ya mangasikaso ed tatay to ya walaay kanser. Si Melanie labat so Tasi diad nisulinek ya baley da. Talagan labay toy makaromog na iyaralan toy Biblia, kanian lanang ton ipipikasi ya nawalaan komon na biskeg ya manpulong anggano agaylay betel ed lugar da. Ag-abayag, akabat toy Sara. Malikeliket si Sara nen naamtaan to ya wala manayay ngaran na Dios. Asabi panaon, inawat nen Sara so panagaral na Biblia. Imbaga nen Melanie: “Naknaksawan ak kada Biernes na labi, balet nabebendisyonan kami nen ana’ko diad pangiyaaral mid si Sara. Labalabay min i-research iray ebat ed saray tepet to, tan naliliketan kamin nanengneng ya sikatoy magmamaliw lan kaaro nen Jehova.” Makpel ya inarap nen Sara so isusumpa, inmekal ed datin relihyon to, tan nampabautismo.

14. (a) Akin ya say kimey a panagbangat et nikompara ed panagsigay? (b) Antoy epekto ed sika na samay imbaga nen Pablo ya nabasad 2 Timoteo 4:1, 2?

¹⁴ Anggano singa aliwan mabunga so ministeryom, agka onsusuko ya mananap ed saray totoo ya posiblin magmaliw ya disipulo. Tandaan ya say kimey a panagbangat et inkompara nen Jesus ed panagsigay. Nayarin dakel ya oras so usaren na saray managsigay pian makala ira na sira. Maslak et mansigay ira anggano lablabi la odino diad palbangon, tan no maminsan et manbiahe ni ray arawi diad dayat. (Luc. 5:5) Mipadpara, wala ray manangipalapag ya mansasagpot ya manpulong ed nanduruman oras tan lugar. Akin? Pian mas dakel ya totoo so nakatongtong da. Saramay maan-anos ya manggagawa ed satan et nabebendisyonan  lapud wala ray naroromog dan interesado ed mensahe tayo. Sarag mo kasi manpulong diad oras odino lugar ya mas dakel so nakatongtong mo?—Basaen so 2 Timoteo 4:1, 2.

15. Akin ya kaukolan so anos ed panangiyaral na Biblia?

¹⁵ Akin ya kaukolan so anos ed panangiyaral na Biblia? Say sakey a rason et lapud agtayo labat nepeg ya tulongan so iyaaralan tayo pian naamtaan tan naaro to iray ibabangat na Biblia. Kaukolan tayo met a tulongan pian nakabat tan naaro to so Autor na Biblia, si Jehova. Nilikud ed pambangat ed sikato no anto iray ingganggan nen Jesus ya nepeg a gawaen na saray disipulo to, kaukolan tayo met ya tulongan no panon so pangiyaplika to ed saratan diad bilay to. Nepeg ya maanos tayon tulongan legan ton pansasagpotan ya unoren iray prinsipyo na Biblia. Say arum ya iyaaralan na Biblia et asarag dan umanen so panagnonot tan kagagawa da kayari labat na pigaran bulan; say arum balet et mas mabayag so panguman da.

16. Antoy naaralan mo ed eksperiensya nen Raúl?

¹⁶ Walay eksperiensya na sakey a misionero ed Peru ya mangipanengneng ya maong so resulta no maanos tayo. “Duara lan libro so inyaral ko ed si Raúl,” so kuan na sayan misionero. “Balet nanairapan nin siansia ya iyaplika ed bilay to iray arum ya nanaaralan tod Biblia. Lanang iran mankokolkol nen asawa to, maayew, tan agrerespetoen na saray anak to lapud ugali to. Anggaman ontan, regular ya mimiaral kanian intultuloy kon tinulongan, pati say pamilya to. Kalabas na masulok ya taloy taon manlapud impankabat mi, sikatoy kinmualipika parad bautismo.”

17. Antoy aralen tayo ed onsublay ya artikulo?

¹⁷ Ingganggan itayo nen Jesus: “Onla kayo . . . tan ibangat yo iray totoo ed amin a nasyon pian magmaliw iran disipulok.” Pian nagawaan tayo itan a kimey, mabetbet ya kaukolan tayoy mitongtong ed totoo ya baleg so pidumaan na saray papanisiaan da ed sikatayo. Say arum et aliwa ran membro na sakey a relihyon odino ag-ira ingen manisia ed Dios. Aralen ed onsublay ya artikulo no panon tayon nipaamta so maong a balita ed saratan ya totoo.