1-2. (a) A doltirakl er a omengelechel er a Jesus el ngar er a Mateus 28:18-20, e ngera klou el ngerechelel a ongdibel er a Rekristiano? (b) Ngera el ker a bo dosaod el ngar tia el suobel?

A RECHAPOSTOL a ulterekokl el kmal mle semeriar er sel taem er a bo el kldibel er a tkul a rois. A Jesus er a uriul er a okisel a ullengit er tir el mo er seikid el basio e mengiil er ngii. (Mt. 28:16) Tiakid a locha sel taem el Jesus a mlo “duum er a re betok er a 500 er a rubengkel.” (1 Ko. 15:6) Me ngera uchul me a Jesus a ullengit er a redisaiplo er ngii el mo obengkel er isei? Me bo el sebechel el mesterir tia el kmal ungil omengelechel el kmo: “Morael el mor a bek el bedengir a re chad er ker me ker e moruul er tir el mo obengkek.”​—Monguiu er a Mateus 28:18-20.

² A redisaiplo el rirenges aika el tekingel a Jesus a mlo chedal sel ongdibel er a Rekristiano er a irechar. A klou el ngerechelel tia el ongdibel a mo meruul er a relmuut el betok el disaiplo er a Kristus. * Chelecha el taem, e ngar ngii a betok el telael el ongdibel er a remera el Kristiano el meliuekl er a beluulechad, e a klou el ngerechelel aika el ongdibel a dirk osisiu. Me ngar tia el suobel, e kede mo mesaod a eua el ker el kmo: Ngera uchul me a omeruul el disaiplo a kmal klou a ultutelel? Ngera bebil er a tekoi el uldimukl er ngii? A rokui el Kristiano, ngar ngii a ngerechelir el meruul er a remo disaiplo? E ngera uchul me kede ousbech er a kllourreng el meruul er tia el ureor?

3. A doltirakl er a Johanes 14:6 me a 17:3, e ngera uchul me a ureor er a omeruul el disaiplo a kmal klou a ultutelel?

³ Ngera uchul me a ureor er a omeruul el disaiplo a kmal klou a ultutelel? E le te di redisaiplo er a Kristus a sebechir el mo sechelil  a Dios. Ngdirrek el di tirke el oltirakl er a Kristus a ungil a klengar er tir e ngar ngii a omeltkir el mo kiei el mo cherechar. (Monguiu er a Johanes 14:6; 17:3.) Me a Jesus a mla meskid a klou a ultutelel el ngerachel, engdi ngdiak di el kid el tang a meruul er tia el ureor. A apostol el Paulus a milluches el kirel me tirke el ulebengkel el kmo: “Kemam choureor el kldemel a Dios.” (1 Ko. 3:9, BT) Me a Jehovah me a Jesus a mla mesterir a rediak lemecherrungel el chad a kmal ileakl el techall!

4. Ngera sebeched el suubii er a tekoi el dilubech el mora Ivan me a Matilde?

⁴ A ureor er a omeruul el disaiplo a sebechel el mo uchul a klou el deuil a rengud. Ka molatk er a tekoi el dilubech el mora Ivan me a bechil er a Matilde, el ngar er a beluu er a Colombia. Te uluusioning el mora kekerei el chad el Davier a ngklel, el dilu er tir el kmo: “Ngsoak el melodech er a klengar er ngak, engdi ngdiak el sebechek.” A Davier a mle chad er a boxing, e uluusbech a mekngit el kar, e di millim a rrom, e kiliei el obengkel a sechelil redil el Erika. A Ivan a mesaod el kmo: “Aki ulemuchel el oldingel er ngii er a blil el mle cheroid er a beluu, me ngmle kiram el ourrat el betok el sikang er a dechudech el rael. A uriul er a lesa el kmo a Davier a mla mo ungil a blekerdelel me a omerellel, e a Erika a mlo omuchel el mesuub er a Biblia.” Cherengel a taem, e a Davier a mlo diak lousbech a mekngit el kar, e mlo diak lolim a rrom, e dirrek el mlo diak el chad er a boxing. Ngdirrek el mlo mekur a chebechiielel ngii me a Erika. A Matilde a kmo: “A Davier me a Erika er a bo lemetecholb er a 2016, e ak dirk melatk a tekingel a Davier el dilu el kmo, ‘Ngsoak el melodech er a klengar er ngak, engdi ngdiak el sebechek.’ Ngkmal mle dmeu a rengmam me aki di lilangel.” Me ngulterekokl el kmal mo dmeu a rengud sel dengesuterir a rechad el mo disaiplo er a Kristus.

5. Ngera kot el tekoi el kired el meruul er ngii me bo doruul er a remo disaiplo?

⁵ A kot el tekoi el doruul er ngii sel bo doruul er a remo redisaiplo a mo ‘osiik’ er tirke el rredemelel. (Mt. 10:11, BT) Me sel douchais er tirke el debetik er tir el kirel a Jehovah, e kede ochotii el kmo kede Sioning er a Jehovah. E sel dolengesenges er a omengelechel er a Kristus el mo omerk er a klumech, e kede ochotii el kmo kede mera el Kristiano.

6. Ngera sebechel ngosukid el mo ungil er a omesiunged?

⁶ A rebebil er a rechad el debetik er tir a kmal sorir el mesuub a klemerang er a Biblia, engdi a rebetok el dongedecheduch er tir a kora ua lak el semeriar er a kot el uchul. Me nglocha mo kired el melisiich er tir me bo el semeriar. Me a bo lungil a omesiunged, e ngkired el mo ungil kutmeklid. Molilt a tekoi el bo lesemeriar er ngii tirke el omongedecheduch er tir. E molatk er a rolel e ngsebechem el mo mesaod er ngii el tekoi.

7. Ngmekera sebechem el omuchel a cheldechedecham el obengkel a chad, e ngera uchul me ngklou a ultutelel el morrenges e molecholt a omengull el mo er tir?

⁷ El ua tiang, nglocha sebechem el oker er a chad er a blai el kmo: “A di lungilbesul er a rengum, e kuker er tia el ker? A betok el mondai el dechelebangel er chelecha el taem a dirrek el lechelebangel a rechad el meliuekl er a beluulechad. Omomdasu, kede ousbech er a kabelment er a klechad el mo sumechokl aika el mondai er a klechad?” E sebechem el mo mesaod er a Daniel 2:44. Me a lechub e ngsebechem el dmu er a chad el kmo: “Omomdasu, e ngera kot el ungil rolel a dolisechakl er a rengeleked el mo ungil a blekerdelir? Ngua ngera uldesuem?” E mosaod er a Duteronomi 6:6, 7. Me a ngii di el tekoi el molilt el mo mesaod, e molatk er a rechad el mo orrenges er  kau. Molatk er a rolel e te ngmai a klungiolir er aike el mera el osisecheklel a Biblia. E sel mongedecheduch er tir, e ngklou a ultutelel a morrenges er tir e molecholt a omengull el kirel a klaumerang er tir. Ngokiu tiaikid el rolel e ke mo ungil medengelterir, me tir a mo beot er tir el orrenges er kau.

8. Ngera uchul me ngkired el blechoel el mo oldingel er a chad?

⁸ Me a uchei er a lekengei a chad el mo mesuub er a Biblia, e nglocha kirem el mengoit a taem el blechoel el oldingel er ngii. E ngera uchul? E le nglocha diak el ngar er a blai er sel taem el mosiik er ngii. Nglocha dirrek el kirem el blechoel el mo oldingel er ngii me bo lungil medengelkau e bochu lekengei el mesuub er a Biblia. Lak dobes, a dellomel a mo ungil a okurulel a lsekum kede blechoel el melubs er ngii. Me ngdi osisiu, a chad el semeriar a mukeroul el mo klou a bltkil a rengul el mora Jehovah me a Kristus sel deblechoel el mesaod a Tekingel a Dios el obengkel.

9-10. Ngera uchul me ngsebeched el melekoi el kmo a rebek el Kristiano a teloi er tia el ureor el osiik er a remelemalt a rengrir el chad?

⁹ A bek el Kristiano a teloi er a ureor el olengeseu el osiik er tirke el melemalt a rengrir. Ngsebeched el omekesiu er ngii el mora skel a ririid el ngalek. Ngoeak a ngera el rolel? Ka molatk er a tekoi el dilubech el mora ta el edei a rekil el buik el ririid. Te bekord el 500 el chad a mle teloi er tia el siik. E a uriul er a bekord el 20 el sikang er a leriid ngii el ngalek, e a ta el chad a miltik er ngii er a chelsel a sers er a mais. Engdi ngii el chad a dimlak el soal a rechad a bo lechat er ngii el kmo ngmiltik er ngika el buik. Ngbai millekoi el kmo: “Kede dilak el rokui e metik er ngika el buik.”

¹⁰ A rebetok el chad a di ua ngika el ngalek el ririid. Ngdiak a omeltkir, engdi ngsorir a ngeso. (Efe. 2:12) Kede kuk betok er a eai el miliol el dmak el oureor el osiik er chouaitirka el chad.  Nglocha mo diak obetik er a chad el bo mosuub a Biblia el obengkel. Engdi, a rekuk bebil el publisher el oureor er a osisiu el basio a locha mo metik er a chad el soal mesuub a klemerang el ngar er a Tekingel a Dios. Me a odam me a lechub e ngodos sel lebetik er a chad el mo disaiplo er a Kristus, e a rokui el chad el mle teloi er tia el siik a ngar ngii a ungil uchul e ngdmeu a rengrir.

11. Alta ngdiak mosuub a Biblia el obengkel a chad, engdi ngoeak a ngera el rolel e ngsebechem el olengeseu el meruul er a remo disaiplo?

¹¹ Me alta ngdiak mosuub a Biblia el obengkel a chad er chelechang, engdi ngsebechem el olengeseu el meruul er a remo disaiplo el okiu a kuk bebil er a rolel. El ua tiang, ngsebechem el outkeu er a rebeches el chad el mei er a Blil a Ongdibel e mo sechelirir. Ngokiu tiaikid el rolel, e ngsebechem el ngosuir el mo mesa el kmo a bltikerreng a olengchelir a remera el Kristiano. (Jn. 13:34, 35) A nger er kau er a miting, alta ngmekedeb, engdi ngsebechel osisecheklterir tirke el beches el me obengked el mo mesaod er a klaumerang er tir el ngar er a ungil el rolel. Ngdirrek el sebechem el obengkel a beches el publisher el mo oldingel e ngosuir el ousbech a Bades el olisechakl er a rechad. Sel moruul el uaisei, e ke osisecheklii el mo oukerebai er a Kristus.​—Lk. 10:25-28.

12. Ngkirel ngar ngii a ileakl el duch er kid me bo el sebeched el meruul er a remo disaiplo? Mosaod.

¹² Ngdiak el kired el omdasu el kmo ngkmal kirel ngar ngii a ileakl el duch er kid me bo el sebeched el osisecheklterir a rechad el mo disaiplo er a Jesus. E ngera uchul? Ka molatk er a Faustina el kiei er a Bolivia. Ngdimlak el sebechel el menguiu er sera lekot el mengedecheduch er ngii a Resioning er a Jehovah. Chelecha el taem, e ngmla mo telkib el meduch el menguiu. Me chelechang e ngmla metecholb, e kmal soal lolisechakl er a rebebil. Ngblechoel el mesuub er a Biblia el obengterir a reteim el chad er a bek el sandei. Me alta Faustina a diak el sebechel el ungil menguiu el uai a ruumesingd er tirke el losuub a Biblia el obengterir, engdi ngmla ngosuterir a retelolem el chad el mo metecholb.​—Lk. 10:21.

13. Me alta kede kmal mechesang, engdi ngera bebil er a klengeltengat el bo dengai sel doruul er a remo disaiplo?

¹³ A rebetok el Kristiano a kmal mechesang el mengetmokl a meklou a ultutelel el ngerechelir. Engdi te dirk mengoit a taem el mesuub a Biblia el obengterir a rechad, e kmal dmeu a rengrir el meruul er tia el ureor. Ka molatk er a Melanie. Ngika mle mesobil el chedil, el ulemekeroul er a eai a rekil el ngelekel el redil el ngar er a beluu er a Alaska. Ngdirrek el uluureor el mui el taem e ullengeseu el omekerreu er a demal el mle smecher el kasinoma. A Melanie a dirrek el di mle ngii el tang a Sioning er a basio el mle cheroid er a beluu. Me ngmle blechoel el meluluuch me bo el sebechel el mo oldingel alta ngkmal mle mekelekolt, e le ngkmal mle soal metik er a chad el bo losuub a Biblia el  obengkel. Me a cherengel a taem, e ngmiltik er a Sara, el ngii a kmal mlo ungil a rengul er a bo lodengei el kmo a Dios a ngar ngii a ngklel. A uriul, e a Sara a kilengei el mo mesuub er a Biblia. A Melanie a melekoi el kmo: “Sel lekebesengei er a Ongeim el Ureor, e ngkmal mesaul a bedengek, engdi ngak me a ngelekek el redil a ngmai a klungiolem sel ki bo mosuub a Biblia lobengkel a Sara. Ngkmal dmeu a rengmam el osiik a nger er a keril a Sara, e kmal mlo ungil a rengmam el mesa el mo sechelil a Jehovah.” A Sara a uluutekangel a ultok, e chilitii a ikelesia er ngii, e mlo metecholb.

14. (a) Ngmekera omeruul el disaiplo e di uai a rolel a omenged? (b) A tekingel a Paulus el ngar er a 2 Timothy 4:1, 2, ngera ngrullii er kau?

¹⁴ Ngmo lmuut me a lsekum ngdiak obetik er a chad el mo disaiplo, e di molemolem el osiik er tir. Lak mobes, a Jesus a ulemekesiu er a ureor er a omeruul el disaiplo el mora rolel a omenged. A rechad er a omenged a sebechir el mengoit a betok el sikang er a uchei er a lebo er ngii a chelderir. Te blechoel el ngar er a chei er a mocha osoi me a lechub e ngdirk tutau, e a lebebil e ngkirir el omekall el mora kmal cheroid el basio. (Lk. 5:5) Me ngdi osisiu, a rebebil el omerk er a klumech a kirir el mengoit a betok el sikang e klou a rengrir el osiik er a rechad er a kakerous el taem er a kakerous el basio. E ngera uchul? Me bo el sebechir el metik er a relmuut el betok el chad. Tirke el blak a rengrir el meruul er tiang a blechoel el mo ngmai a omeksulir e le te mo metik er a rechad el semeriar el orrenges er a klumech el domerk er ngii. Me kau, ngsebechem el omerk er a klumech er a taem el sebechem el metik er a rebetok el chad me a lechub e ke omerk er a basio el betok a rechad er ngii?​—Monguiu er a 2 Timothy 4:1, 2.

15. Ngera uchul me kede ousbech er a kllourreng sel dosuub a Biblia el obengkel a chad?

 ¹⁵ Ngera uchul me a dosuub a Biblia el obengterir a rechad e kede ousbech er a kllourreng? A ta el uchul a kmo, ngkired el meruul a lmuut el betok er a di dolengeseu er a chad el mesuub el mo medengei e mo betik a rengul er aike el osisechakl el ngar er a Biblia. Ngkired el ngosuir el mo medengelii e mo betik a rengul er Ngike el Oubabier er a Biblia el Jehovah. Ngdirrek el diak di dosisecheklii el kmo ngera soal a Jesus a loruul a redisaiplo er ngii, e kede dirrek el kired el osisecheklii el mo medengelii a rolel a lekiei el ua mera el Kristiano. Ngkired el mo oba kllourreng el olengeseu er ngii sel lolasem el oltaut a omellach er a Biblia. A rebebil el mesuub er a Biblia a di ousbech a kedeb el taem el melodech er a uldesuir me a omerellir, engdi a rekuk bebil a ousbech er a klou el taem.

16. Ngera ke siluubii er a tekoi el dilubech el mora Raúl?

¹⁶ A ta el missionari el ngar er a beluu er a Peru a mla er ngii a tekoi el dilubech el mo er ngii el ochotii a klungiolel a doba kllourreng. Ngmelekoi el kmo: “Aki mla mo merek el suub a eru el babier ngak me a Raúl. Engdi ngdirk mla er ngii a meklou el mondai er a klengar er ngii. Ngblechoel el ngar ngii a mondai er a chebechiielel, e blechoel el melius, e a rengelekel a dimlak longull er ngii e le mle ngmekngit a blekerdelel. Engdi ngii a mle blechoel el mei er a miting, me ak millemolem el oldingel er ngii e olengeseu er ngii me a telungalek er ngii. A uriul er a bo lechib a edei el rak er sera ki mkot el chadecheduch, e ngmlo sebechel el mo metecholb.”

17. Ngera kede mo mesaod er a ongingil el suobel?

¹⁷ A Jesus a milengelechel el kmo “morael el mor a bek el bedengir a re chad er ker me ker e moruul er tir el mo obengkek.” Me a bo lsebeched el ungil kutmeklii tia el ureor, e ngkired el blechoel el mengedecheduch er a rechad el kmal ngodech a uldesuir er kid, e tia uldimukl er tirke el diak a klechelid er tir me a lechub e ngdiak loumerang er a Dios. A ongingil el suobel a mo mesaod er a rolel e ngsebeched el omerk er a ungil chais el mora reuaisei el chad.