1, 2. a) Mateo 28:18-20 textopi Jesuspa kamachisqanman jina, ¿ima ruwaymi cristianokunapaq aswan importante? b) ¿Ima tapuykunamantan kay estudiopi yachasun?

JESUSQA kausarimpusqan qhepamanmi apostolninkunata niran Galilea orqopi juñukunankupaq. Apostolkunaqa kusisqachá kasharanku chay kutipiqa (Mat. 28:16). Yaqachus jina Jesusqa chay “kutipi pisqa pachaj más iñiqmasikunaman rijuriran” (1 Cor. 15:6). ¿Imaraykun Jesús discipulonkunata kamachiran chaypi paywan juñunakunankupaq? Kay sumaq llank’ayta qonanpaqmi: “Llapa nacionmanta runakunaman riychis, jinaspa yachachimuychis discipuloykuna kanankupaq”, nispa (leey Mateo 28:18-20).

² Jesuspa rimasqanta uyariqkunawanmi ñaupaq tiempopi iñiq t’aqa qallariran. Paykunaqa runakunatan yanapananku karan Jesuspa discipulon kanankupaq, chaymi karan aswan importante llank’ayninkuqa. * Kay tiempopi mundontinpi askha iñiq t’aqakunapaqpas chay llank’aymi aswan importante. Kay estudiopin kay tapuykunata kutichisun: ¿Imaraykun Jesuspa discipulon kanankupaq runakunata yachachiy importante? ¿Imakunatan ruwananchis chayta junt’anapaq? ¿Llapa cristianokunachu chay llank’aypi yanapakusunman? ¿Imaraykun pacienciayoq kananchis?

3. Juan 14:6, 17:3 textopi nisqanman jina, ¿imaraykun runakunata Jesuspa discipulon kanankupaq yachachiy ancha importante?

³ ¿Imaraykun runakunata Jesuspa discipulon kanankupaq yachachiy ancha importante? Cristoq discipulonkunallan Diospa amigonqa kanku, allinta kausanku, wiñaypaq kausaytapas suyakushanku (leey Juan 14:6; 17:3). Jesusqa ancha importante llank’aytan saqewaranchis, ichaqa manan sapallanchischu llank’anchis. Apóstol Pablon niran: ‘Diospa llank’aqmasinkunan kanchis’, nispa (1 Cor. 3:9). ¡May sumaqpunin Jehová Diospas Jesuspas juchayoq runakunaman chay llank’ayta qosqankuqa!

4. ¿Imatan ruwaranku Ivanwan Matildewan? ¿Imatan chaymanta yachanchis?

⁴ Runakunata Jesuspa discipulon kanankupaq yanapayqa anchatan kusichiwanchis. Ivanmanta esposan Matildemantawan yachasun. Paykunaqa Colombiapin Davier waynaman predicaranku, paymi paykunata niran: “Cambiaytan munani, ichaqa manan atinichu”, nispa. Davierqa boxeadormi karan, drogakunatan mijuran, sinchitan macharan, Erikawantaq tiyaran. Ivanmi nin: “Payqa juch’uy llaqtapin tiyaran, visitanaykupaqqa bicicletapin askha horakunata t’uru ñanninta rinayku karan. Davierqa cambiaytan qallariran, Erikapas Bibliatan estudiaran”, nispa. Tiempowanmi Davierqa manaña drogakuranchu, macharanchu nitaq boxeopi maqanakuranchu, casarakurantaq Erikawan. Matilde nin: “2016 watapi Davierwan Erikawan bautizakusqankuta rikuspan yuyarirayku Davierpa ‘Noqaqa cambiaytan munani, ichaqa manan atinichu’ nispa nisqanta. Jinan kusikuymanta waqarayku”, nispa. Rikusqanchis jina anchatan kusikunchis Jesuspa discipulon kanankupaq pitapas yanapaspaqa.

5. ¿Imatan ñaupaqta ruwananchis runakuna Jesuspa discipulon kanankupaq?

⁵ Ñaupaqtaqa Jehová Diosmanta yachay munaqkunatan maskhananchis (Mat. 10:11). Chaypaqqa manan paykunaraqchu niwananchis: “Estudiaytan munani”, nispaqa. Aswanmi noqanchis tukuyta kallpachakunanchis paykunata tarinanchispaq. Llapa runakunaman predicaspan rikuchinchis Jehová Diospa testigon kasqanchista, cheqaq cristiano kasqanchistapas.

6. ¿Imatan ruwananchis allin predicaq kananchispaq?

⁶ Jujkunaqa anchatan kusikunku Bibliata estudiaspa, askhan ichaqa manapas munankumanchu jina kanku. Chaymi yachayta munanankupaq jina predicananchis. Allinta predicanapaqqa allintan preparakunanchis. Imamantachus tiyasqanchis llaqtapi runakuna parlayta munanku chaykunamantan rimananchis, yachananchistaqmi parla tupachiyta.

7. ¿Imaynatan runakunaman predicayta qallarisunman? ¿Imaraykun tukuy yuyaywan respetowan uyarinanchis?

⁷ ¿Imaynatan chayta ruwasunman? Ejemplopaq, uyariqniykitan kayta niwaq: “Runakunaqa problemanchiskunapi jinan tarikushanku, qhawarisqaykiman jina, ¿mundontinta kamachiq gobierno tukuchinmanchu problemanchiskunata?”, nispa. Jinaspa Daniel 2:44 textota qhawachiwaq. Otaq kay jinata predicawaq: “Munanchismi wawanchiskuna allin runa kanankuta,  qhawarisqaykiman jina, ¿imatan chaypaq ruwasunman?”, nispa. Jinaspa Deuteronomio 6:6, 7 textota qhawachiwaq. Imamantaña rimanki chaypas, uyariqniykikunapin piensanayki, imaynatas Bibliapi yachasqanku vidankupi yanapananpipas. Paykunawan rimashaspaqa tukuy yuyaywanmi uyarinayki rimasqankuta, respetanaykitaqmi imachus nisqankuta. Jinan aswan allinta paykunata entiendenki, paykunapas uyariyta munanqaku.

8. ¿Imaraykun kallpachakunanchis Bibliamanta yachayta munaqkunaman askha kutipi kutinanchispaq?

⁸ Juj runa Bibliamanta estudiayta munananpaqqa tiemponchistan qonanchis askha kutipitaqmi kutinanchis. ¿Imarayku? Wakinqa yaqapaschá kutisqanchis p’unchay niwasunman mana tiempoyoq kasqanta. Wakintaq askha kutita paywan rimasqanchis qhepamanña Biblia estudiayta munanman. Juj planta wiñananpaqqa sapa kutinmi unuta jich’ashanallanchis, chhaynallataqmi pi runapas Jehová Diosta Jesustapas astawan munakunanpaqqa askha kutita Diospa palabranmanta yachachinanchis.

9, 10. ¿Imaraykun nisunman: “Llapa cristianokunan allin sonqoyoq runakunata tariypiqa yanapakunchis”, nispa?

⁹ Llapanchismi yanapakushanchis allin sonqoyoq runakunata tariypiqa. Llank’asqanchisqa chinkasqa wawata tariymanmi comparakun. Chayta entiendenapaq rimasun kinsa watayoq chinkasqa wawamanta. Yaqa 500 runakunan yanapakuranku chay wawata maskhaypi. Jinaspa 20 horas pasasqan qhepaman jujninku chay wawata tariran chajra ukhupi. Payqa manan munaranchu chay wawata tarisqanmanta payllata alabanankuta, aswanmi niran: “Llapallaykun  maskharayku chay wawata tarinaykupaq”, nispa.

¹⁰ Askha runakunan chay chinkasqa wawa jina tarikunku. Mana suyakuyniyoq kashanku yanapananchistataq munanku (Efes. 2:12). Pusaq millón más cristianokunan allin sonqoyoq runakunata maskhaypi yanapakushanchis. Manapaschá Biblia estudiay munaqta tarinkichu, ichaqa juj hermanon predicasqayki territoriopi Bibliamanta yachay munaqta tarinman. Sichus juj hermanonchis juj runata tarispa yanapan Jesuspa discipulon kananpaq chayqa, llapanchismi chay llank’aypi yanapakusqanchismanta kusikunanchis.

11. Manaña kunan ratopi Bibliamanta pimanpas yachachishanchischu chaypas, ¿imaynatan jujkunata yanapasunman Jesuspa discipulon kanankupaq?

¹¹ Manaña kunan ratopi pimanpas estudiota qoshankichu chaypas yanapawaqmi jujkunata Jesuspa discipulon kanankupaq. ¿Imaynatan chayta ruwawaq? Juñunakuykunaman chayllaraq jamuqkunatan sumaqta chaskiwaq necesitasqankupitaq yanapawaq. Munakuywan tratasqanchista rikuspan reparanqaku cheqaq cristianokuna kasqanchista (Juan 13:34, 35). Juñunakuypi pisillapi comentaspapas yanapanchismi mosoqkunata mana manchakuspa respetowan comentayta yachanankupaq. Chaymantapas chayllaraq predicaqkunatan yanapasunman predicacionpi Bibliamanta textokunata leespa explicayta yachanankupaq. Chayta ruwaspan yachachishanchis Jesusta qatikunankupaq (Luc. 10:25-28).

12. ¿Allin umayoqraqchu kananchis runakunata yanapananchispaq?

¹² Jujkunata Jesuspa discipulon kanankupaq yachachinapaqqa manan allin umayoqraqchu kananchis. ¿Imaraykun chayta ninchis? Rimasun Boliviapi tiyaq Faustina hermananchismanta. Jehová Dios llaqtanwan juñukuyta qallarishaspaqa manan leeyta atiranchu. Kunanpas manan allintapuniqa leeyta atinchu. Chaywanpas payqa kusikunmi jujkunaman yachachispa. Sapa semanan pisqa runata jina yachachin, kunankamaqa soqta runatañan yanaparan bautizakunankupaq (Luc. 10:21).

13. Ocupasqaña kasunman chaypas, ¿ima bendicionkunatan chaskinchis jujkunata Jesuspa discipulon kanankupaq yachachispa?

¹³ Askha hermanonchiskunan imaymana ruwanayoq kanku, chaywanpas tiempotan orqonku Bibliamanta jujkunaman yachachinankupaq, kusikunkutaq chayta ruwaspa. Hermananchis Melanimanta rimasun. Alaska ladopin sapallan pusaq watayoq ususinta uywan, cáncer onqoyniyoq  papanta cuidan, ch’isiyaqtataq llank’anpas. Jinaspapas sapallanmi tiyasqan llaqtapiqa Testigo karan. Jinan sapa kutilla Diosmanta mañakuq chay chiri llaqtapi predicashanallanpaq, chhaynapi pillamanpas Bibliamanta estudiota qonanpaq. Jinan Sarata reqsiran, payqa kusikuranmi Diospa sutinta reqsispa, qhepamantaq Biblia estudiayta qallariran. Melanin nin: “Viernes tutapaqqa sayk’usqan tarikuq kani, chaywanpas ususiywan kuskan rillaqpuni kayku Saraman estudiota qoq. Kusikuraykun tapuyninkunaman kutichispa, Jehová Diospa amigan kasqanmantapas anchatan kusikurayku”, nispa. Saraqa aguantaranmi jujkuna Diosmanta yachananta jark’akusqankuta, iglesianmantapas lloqsipuranmi, Testigo jinataq bautizakuran.

14. a) ¿Imaraykun llank’ayninchis challwaywan comparakun? b) ¿Imaynatan kallpachawanchis 2 Timoteo 4:1, 2 textopi apóstol Pabloq nisqan?

¹⁴ Manaña pitapas tarishanchischu Jesuspa discipulon kananpaq chaypas maskhashanallanchismi. Jesusqa challwaywanmi compararan llank’ayninchista. Challwaq runaqa challwata jap’inanpaqqa tutakaman llank’anan, mayninpitaq tutamantankuna, mayninpitaq karutaraq viajanan (Luc. 5:5). Chay jinallataqmi predicaqkunapas pacienciawan maskhananchis allin sonqoyoq runakunata, mayninpiqa karutaraqmi rinanchispas. Chayta ruwasun chayqa askha runakunawanmi parlayta atisun. Chayta ruwanankupaq kallpachakuqkunan astawanqa Bibliamanta yachay munaqkunata  tariranku. Chaymi kallpachakunanchis ima horapichus astawan runakunata tarisunman chay horapi predicananchispaq, otaq maypichus masta runakunata tarisunman chayta rinanchispaq (leey 2 Timoteo 4:1, 2).

15. ¿Imaraykun Bibliata yachachisqanchis runakunawan pacienciakunanchis?

¹⁵ ¿Imaraykun Bibliamanta yachachisqanchis runakunawan pacienciakunanchis? Paykunamanqa manan Bibliapi kaq yachachikuykunallatachu entiendechinanchis, aswanpas yanapanallanchistaqmi Jehová Diosta reqsinankupaq munakunankupaqpas. Chaymantapas yanapananchismi Jesuspa discipulonkuna kanankupaq, cheqaq cristianokuna jina kausanankupaqpas. Pacienciawanmi yanapananchis Bibliapi kaq yachachikuykunata kasukunankupaq. Wakinqa pisi killakunallapin imachus piensasqankuta imayna kausasqankutapas cambianku, wakinmi ichaqa askha tiempopi.

16. ¿Imatan yachanchis Raulta pasasqanmanta?

¹⁶ Perú nacionpin juj misionero pacienciayoq karan. Paymi nin: “Raúl sutiyoq runawanmi iskaynin librokuna estudiayta tukurayku. Chaywanpas esposanwanmi mana allinta kausashallaran, qhelli simikunata rimashallaran, wawankunapas chhayna kasqanraykun mana respetarankuchu. Juñunakuykunamanmi ichaqa jamushallaran, chaymi visitashallarani paytapas familiantapas yanapanaypaq. Kinsa watakuna qhepamanmi ichaqa vidanta cambiaspa bautizakuran”, nispa.

17. ¿Imamantan qatimuq estudiopi yachasun?

¹⁷ Jesusmi niran: “Llapa nacionmanta runakunaman riychis, jinaspa yachachimuychis discipuloykuna kanankupaq”, nispa. Chayta kasukuspan jujnirayta piensaq runakunawan sapa kutilla rimanchis. Paykunamanta wakinqa manan mayqen religionmanpas pertenecenkuchu otaq mana creenkuchu Dios kasqanpi. Qatimuq estudiopin yachasun imaynatas paykunaman allin willakuykunata predicasunman chayta.