1-2. (a) Soleki fa Mateyus 28:18-20 e sori, dan san na a moro prenspari wroko fu a Kresten gemeente? (b) Sortu aksi o kisi piki na ini na artikel disi?

BAKA di Yesus kisi wan opobaka a taigi den disipel fu en fu miti en na tapu wan bergi na ini Galilea. Di den disipel doro drape a ben musu fu de so taki den no ben man wakti fu yere san Yesus ben abi fu taigi den (Mat. 28:16). A kan taki na a okasi dati „a sori ensrefi na moro leki feifi hondro brada na a srefi ten” (1 Kor. 15:6). Fu san ede Yesus aksi den disipel fu miti en drape? Fu gi den a prenspari wroko disi: „Go na sma fu ala kondre èn meki den tron disipel.”​—Leisi Mateyus 28:18-20.

² Bakaten den disipel di yere den wortu disi fu Yesus tron memre fu a Kresten gemeente. A moro prenspari wroko fu a gemeente ben de fu meki moro sma tron disipel fu Krestes. * Na ini a ten disi furu gemeente de na heri grontapu èn te now ete disi na a moro prenspari wroko di den e du. Na ini na artikel disi wi o piki fo aksi: Fu san ede a prenspari fu meki disipel? San na den difrenti sani di wi musu du fu meki disipel? Ibri Kresten kan yepi fu meki disipel? Fu san ede wi musu abi pasensi te wi e du a wroko disi?

3. Te wi luku san skrifi na Yohanes 14:6 nanga 17:3, dan fu san ede a prenspari fu meki disipel?

³ Fu san ede a prenspari fu meki disipel? Fu di na soso den disipel fu Krestes kan tron mati fu Gado. Boiti dati, den wan di e waka baka Krestes abi wan moro bun libi nownow kaba èn den abi a howpu fu libi fu têgo na ini a ten di e kon. (Leisi Yohanes 14:6; 17:3.) A de krin taki Yesus gi wi wan prenspari frantwortu. Ma wi no e du a wroko disi wi wawan. Na apostel Paulus ben skrifi fu ensrefi nanga tra mati fu en: „Wi e wroko makandra nanga Gado” (1 Kor. 3:9). Disi na trutru wan bigi grani di Yehovah nanga Yesus gi sondu libisma!

4. San wi kan leri fu na eksempre fu Ivan nanga Matilde?

⁴ A wroko fu meki disipel kan gi wi furu prisiri tu. Luku na eksempre fu Ivan nanga en wefi Matilde di e libi na ini Kolombia. Den ben preiki gi wan yonguman di nen Davier. A yonguman disi ben taigi den: „Mi wani kenki mi libi, ma mi no man.” Davier ben bòks fu wini moni, a ben gebroiki drugs, a ben dringi furu sopi èn a ben libi nanga en vriendin Erika. Ivan e taki: „Wi ben go studeri nanga Davier na a farawe dorpu pe a ben tan. Fu man doro drape wi ben musu rèi den baisigri fu wi omeni yuru langa na tapu tokotoko pasi. Baka di Erika si taki Davier ben bigin kenki, en srefi bigin studeri.” Baka wan pisi ten Davier no ben gebroiki drugs moro, a no ben dringi sopi moro èn a no ben feti tu. Boiti dati a trow nanga Erika. Matilde e taki: „Di Davier nanga Erika dopu na ini 2016, wi ben prakseri a sani di Davier ben gwenti taki: ’Mi wani kenki, ma mi no man.’ Wi ben breiti so te taki wi bigin krei.” A no de fu taki dati a e gi wi furu prisiri te wi e yepi sma fu tron disipel fu Krestes.

5. San na a fosi sani di wi musu du efu wi wani meki disipel?

⁵ A fosi sani di wi musu du na taki wi musu „suku” den wan di wani leri moro fu Yehovah (Mat. 10:11). Wi e sori taki wi na Kotoigi fu Yehovah te wi e preiki gi ala sma di wi e miti na ini a kontren fu wi. Wi e sori tu taki wi na tru Kresten te wi e gi yesi na Yesus èn wi e preiki.

6. San o yepi wi fu du a preikiwroko moro bun?

⁶ Son sma de fayafaya fu kon sabi moro fu Bijbel, ma furu fu den sma di wi e miti no e broko den ede nanga Bijbel te wi miti den a fosi leisi. Wi musu yepi den fu wani kon sabi moro. Efu wi wani du a preikiwroko bun, dan wi musu sreka bun. Prakseri sortu tori o hari a prakseri fu den sma di yu e miti. Baka dati yu musu luku san na a moro bun fasi fu bigin taki nanga sma fu a tori disi.

7. (a) Fa yu kan bigin wan takimakandra nanga wan sma? (b) Fu san ede yu denki taki a prenspari fu arki den sma èn fu sori lespeki gi den?

⁷ Kande yu kan aksi a sma: „Mi kan aksi yu fa yu e denki fu a tori disi? Furu sma na grontapu abi den srefi problema. Yu denki taki den problema fu wi ben o lusu efu heri grontapu ben abi wán regering?” Baka dati yu kan taki fu Danièl 2:44. Noso kande yu kan aksi wan sma: „San na a moro bun fasi fa wi kan leri den pikin fu wi fu abi bun maniri? Fa yu e denki fu a tori?” Baka dati yu kan taki fu  Deuteronomium 6:6, 7. Awinsi fu sortu tori yu o taki, denki den sma di o arki yu. Prakseri sortu wini den o kisi te den e leri moro fu Bijbel. Te yu e preiki gi sma, dan a prenspari taki yu e arki den èn taki yu e lespeki a fasi fa den e denki. Te yu e du dati yu o man frustan den moro bun, èn den o wani arki yu.

8. Fu san ede wi musu tan meki muiti fu go baka na den sma?

⁸ A kan taki fosi wan sma wani bigin studeri Bijbel, yu musu go wan tu leisi na en. Fu san ede? Kande a sma no de na oso te wi go na en baka a fosi leisi. A kan de fanowdu tu fu go wan tu leisi na wan sma fosi a wani studeri Bijbel nanga wi. Hori na prakseri taki wan sani di yu prani e gro moro bun te yu e tan gi en watra. Na so a de tu taki wan sma en lobi gi Yehovah nanga Yesus o gro te wi e taki ibri leisi nanga en fu Gado Wortu.

9-10. Fu san ede wi kan taki dati ibri tru Kresten e yepi fu feni sma di wani tron disipel?

⁹ Ibri preikiman e yepi fu feni reti-ati sma. Wi kan agersi a preikiwroko nanga wan grupu sma di e suku wan pikin di lasi. Fa so? Prakseri a tori fu wan boi fu dri yari di ben waka gowe fu oso. Sowan 500 sma ben yepi fu suku en. Baka 20 yuru wan fu den sma disi feni a pikin boi na ini wan karu gron. Ma a sma disi no ben wani taki sma ben gi en grani taki a feni a boi. A ben taki: „Wi feni en fu di hondrohondro sma wroko makandra fu suku en.”

¹⁰ Furu sma de leki a pikin boi disi di ben lasi. Den no abi howpu èn den wani taki wan sma yepi den (Ef. 2:12). Moro leki aiti milyun Kotoigi e wroko makandra fu feni den sma disi. Kande yu no feni wan sma di wani studeri Bijbel nanga  yu. Ma kande den tra preikiman di e preiki na ini a srefi kontren leki yu e feni wan sma di wani kon sabi moro fu Gado Wortu. Te wan brada noso sisa feni wan sma di tron wan disipel fu Krestes, dan ala sma di yepi fu suku a sma kan prisiri.

11. Efu yu no abi wan Bijbelstudie, dan na sortu tra fasi yu kan yepi fu meki disipel?

¹¹ Efu yu no abi wan Bijbelstudie na a momenti disi, dan tra fasi de fa yu kan yepi fu meki disipel. Yu kan gi den nyun sma di e kon na a Kownukondre zaal wan switikon èn yu kan tron mati fu den. Te yu e sori lobi gi den na a fasi disi, dan yu o yepi den fu si taki wi na tru Kresten (Yoh. 13:34, 35). Den piki di yu e gi na den konmakandra kan leri nyun sma fa den kan taki na wan lespeki fasi fu a bribi fu den. Yu kan du disi awinsi den piki fu yu syatu. Boiti dati yu kan wroko makandra nanga wan nyun preikiman èn yu kan sori en fa a kan gebroiki Bijbel fu gi sma leri. Te yu e du den sani disi yu e yepi en fu teki na eksempre fu Krestes.​—Luk. 10:25-28.

12. Fu san ede a no de so taki wi musu koni srefisrefi fu man meki disipel? Gi wan eksempre.

¹² Nowan fu wi musu denki taki wi musu koni srefisrefi fu yepi trawan fu tron disipel fu Yesus. Fu san ede? Luku na eksempre fu Faustina di e libi na ini Bolifia. A no ben man leisi di a miti nanga den Yehovah Kotoigi. Baka dati a leri fu leisi pikinso. Now a dopu èn a lobi gi trawan leri fu Bijbel. A e studeri nanga feifi sma ibri wiki. Aladi Faustina no man leisi so bun leki furu fu den Bijbelstudie fu en, toku a yepi siksi sma fu dopu.​—Luk. 10:21.

13. Awinsi wi abi furu fu du, sortu blesi wi o kisi te wi e meki ten fu feni disipel?

¹³ Furu Kresten abi furu prenspari sani fu du. Toku den e meki ten fu studeri Bijbel nanga sma èn a sani disi e gi den furu prisiri. Luku na eksempre fu Melanie di e tan na ini Alaska. En wawan ben e kweki a meisje fu en di abi aiti yari. A sisa disi ben musu wroko tranga èn a ben musu sorgu gi en papa di ben abi kanker. Melanie ben de a wan-enkri Kotoigi na ini wan foto di ben de bun fara. Fu di a ben wani feni wan Bijbelstudie meki ala ten a ben aksi Yehovah fu gi en a krakti fu go preiki aladi a ben kowru. Te fu kaba a miti Sara, di ben breiti taki a ben leri san na a nen fu Gado. Baka wan pisi ten Sara bigin studeri Bijbel. Melanie e taki: „Te freida neti mi ben weri, ma toku mi nanga a meisje fu mi ben go na a studie èn wi ala tu ben feni wini fu disi. Wi ben  lobi fu ondrosuku sani so taki wi ben kan piki den aksi fu Sara èn a ben gi wi prisiri fu si taki a ben tron wan mati fu Yehovah.” Sara horidoro aladi a kisi tesi, a tapu fu go na en kerki èn a dopu te fu kaba.

14. (a) Fu san ede wi kan agersi a wroko fu meki disipel nanga a fisiwroko? (b) San den wortu fu Paulus na ini 2 Timoteyus 4:1, 2 e leri yu?

¹⁴ Efu yu no feni wan sma ete di wani tron wan disipel, dan no gi abra. Hori na prakseri taki Yesus ben agersi a wroko fu meki disipel nanga a fisiwroko. A kan teki omeni yuru fosi wan fisiman fanga wan sani. Nofo tron den e wroko lati neti noso fruku mamanten èn son leisi den musu go bun fara fu feni fisi (Luk. 5:5). Na a srefi fasi son preikiman e wroko omeni yuru langa nanga pasensi fu suku sma na difrenti ten èn na difrenti presi. Fu san ede den e du disi? Fu di den wani miti nanga moro sma. Nofo tron den wan di e wroko so tranga e feni sma di wani kon sabi moro fu a boskopu fu wi. Yu kan pruberi fu preiki na wan ten noso na wan presi pe yu kan miti nanga moro sma?​—Leisi 2 Timoteyus 4:1, 2.

15. Fu san ede wi musu abi pasensi te wi e studeri nanga sma?

¹⁵ Fu san ede wi musu abi pasensi te wi e studeri nanga sma? Fu di wi no wani yepi a sma nomo fu kon sabi èn fu kon lobi den sani di Bijbel e leri. Wi wani yepi  a sma fu kon sabi èn fu kon lobi Yehovah, a sma di skrifi Bijbel. Èn boiti taki wi e leri a sma san Yesus e fruwakti fu den disipel fu en, wi musu yepi en tu fu kon sabi fa a musu libi leki wan tru Kresten. Wi musu abi pasensi nanga en te a e pruberi fu du san Bijbel e leri. Son sma man kenki a fasi fa den e denki nanga den gwenti fu den na ini wan tu mun nomo. Ma trawan abi moro ten fanowdu.

16. San yu leri fu na ondrofenitori fu Raúl?

¹⁶ Na ondrofenitori fu wan zendeling na ini Peru e sori wi fu san ede a prenspari fu abi pasensi. A zendeling e taki: „Mi ben klari tu buku kaba nanga wan Bijbelstudie fu mi di nen Raúl. Ma toku a ben abi bigi problema ete. A trowlibi fu en no ben go bun, a ben e kosi èn den pikin fu en no ben sori lespeki gi en fu di a no ben tyari ensrefi bun. Ma fu di a ben kon na den konmakandra ibri wiki meki mi ben tan go na en fu yepi en nanga en osofamiri. Baka di mi studeri dri yari nanga en, a ben kan dopu.”

17. San wi o leri na ini a tra artikel?

¹⁷ Yesus taigi wi fu ’go na sma èn fu meki den tron disipel’. Fu man du a wroko disi, wi abi fu taki son leisi nanga sma di e denki heri tra fasi leki wi, di no e go na kerki noso di no e bribi na ini Gado srefi. Na ini a tra artikel wi o leri fa wi kan preiki a bun nyunsu gi ala sortu sma.