1-2. (a) Tumuhụ parentang Yesus su Matius 28:18-20, apa tugasẹ̌ kahumotongange sidang Kristen? (b) Kakiwal᷊o apa sarung simbaheng i kitẹ su pěngangěndungang ini?

MANGA rasulẹ̌ tantu sěbạe mapulu makasingkạ apa sarung mariadi su tempong i sire nẹ̌komol᷊ẹ̌ su sěmbaụ bul᷊udẹ̌. Su tempong seng saụ nipěbiahẹ̌ bọu papatene, i Yesus nẹ̌diandi gunang mẹ̌sombang dingangi sire su wul᷊udẹ̌ ene. (Mat. 28:16) Aramanung su tempo ene i Yesus ”nẹ̌těngkatodẹ su 500 su kataune anạu sěmbaụ”. (1 Kor. 15:6) Kawe nụe i Yesus něngomol᷊ẹ̌ manga murite su tampạ ene? Gunang měgělị tugasẹ̌ ini si sire: ”Dakọe kụ koạko taumata bọu haghing bangsa mariadi muritẹ̌ku.”​—Basa Matius 28:18-20.

² Manga muritẹ̌ apang nakaringihẹ̌ bawerang i Yesus ene nakoạ bageang bọu sidang Kristen su abad humotong. Tugasẹ̌ kahumotongange sidang ene kai měkoạ limembong mal᷊awọ muriti Kristus. * Orasẹ̌ ini, piạ nal᷊iu bọu mahasụ su hiwune sidang Kristen su patikụ dunia, kụ tugasi sire kahumotongange tatapẹ̌ mẹ̌sul᷊ung. Su pěngangěndungang ini, i kitẹ sarung sumimbahẹ̌ ěpạ kakiwal᷊o: Kawe nụe hal᷊ẹ̌ měkoạ muritẹ̌ sěbạe penting? Apa harusẹ̌ koateng i kitẹ gunang měkoạ muritẹ̌? Apa kěbị tau Kristen botonge měkoạ muritẹ̌? Kụ, kawe nụe i kitẹ harusẹ̌ masabarẹ̌ měkoạ hal᷊ẹ̌ ini?

3. Tumuhụ Yohanes 14:6 dingangu 17:3, kawe nụe hal᷊ẹ̌ měkoạ muritẹ̌ sěbạe penting?

³ Kawe nụe hal᷊ẹ̌ měkoạ muritẹ̌ sěbạe penting? Ual᷊ingu kětạeng muriti Kristus botonge makoạ hapị u Mawu. Bọu ene lai, tumatol᷊eng Kristus botonge měbiahẹ̌ limembong mapaelẹ̌ orasẹ̌ ini dingangu měbiahẹ̌ kěkalẹ̌ su ěllo mahi.  (Basa Yohanes 14:6; 17:3.) Tugasẹ̌ nighělị i Yesus si kitẹ ini sěbạe penting, katewe i kitẹ tawe měkoạ hala tugasẹ̌ ini. Rasul Paulus nẹ̌běra soal i sie dingangu manga hapịe, ”I kami kai hapị sěngkapěhal᷊ẹ̌ dingangu Mawu.” (1 Kor. 3:9) Ini kai hak istimewa nighělị u Mawu dingangi Kristus su taumata tawe nasukụ!

4. Apa kaěndungang i kitẹ bọu pengalaman i Ivan dingangi Matilde?

⁴ Hal᷊ẹ̌ měkoạ muritẹ̌ sěbạe makal᷊uasẹ̌ si kitẹ. Pẹ̌tiněna contoh i Ivan dingangu kawinge, i Matilde, su Kolombia. I sire nẹ̌sombang dingangu sěngkatau anạ mangudạ arenge i Davier. Davier naul᷊ị, ”Iạ mapulu měmal᷊ui pěbawiahẹ̌ku, katewe iạ tawe makakoạ.” Davier kai sěngkatau petinju kụ masau měpẹ̌pakẹ narkoba dingangu měbẹ̌bukang. I sie lai mětẹ̌tanạ dingangu sintịe, i Erika. Ivan nělahẹ, ”I kami něnětạ něněntiro Alkitapẹ̌ si sie. I sie mětẹ̌tana su kampong marau bọu tampạ i kami. I kami harusẹ̌ sumake sepeda lumiu dal᷊eng mal᷊egẹ. Su tempong nakasilo sipatẹ̌ dingangu kakanoạ i Davier nẹ̌bal᷊ui, i Erika timol᷊e něngěndung Alkitapẹ̌.” Samurine, i Davier něngědo něpakẹ narkoba, nẹ̌tinju, dingangu nẹ̌bukang. I sie lai nẹ̌kawing dingangi Erika. Matilde nẹ̌bera, ”Su tempong i Davier dingangi Erika nibaptisẹ̌ su taung 2016, i kami nakatahěndung bawerang i Davier, ’Iạ mapulu měmal᷊ui pěbawiahẹ̌ku, katewe iạ tawe makakoạ.’ I kami simangị ual᷊ingu mal᷊uasẹ̌.” Nal᷊ahẹ, mẹ̌tul᷊ung taumata wal᷊inẹ makoạ muriti Kristus makal᷊uasẹ̌ si kitẹ.

5. Gunang měkoạ muritẹ̌, apa kahumotongange koateng i kitẹ?

⁵ Gunang měkoạ muritẹ̌, humotong i kitẹ harusẹ̌ mědeạ taumata apang mapulu měngěndung soal i Yehuwa. (Mat. 10:11) Mạeng i kitẹ měmahiạ habarẹ̌ mapia su kěbị taumata, ene něnodẹ i kitẹ kai Sahiding Yehuwa dingangu tau Kristen tutune.

6. Apa makatul᷊ung si kitẹ tadeạu piạ hasilẹ̌ mapaelẹ̌ su pelayanan?

⁶ Pirang katau masěmangatẹ̌ měngěndung katěngadu Alkitapẹ̌. Katewe, kal᷊awokange taumata nipẹ̌sombangeng i kitẹ humotong kakělaěng madiri měngěndung. I kitẹ harusẹ̌ měkoạ si sire mapulu měngěndung. Tadeạu piạ hasilẹ̌ mapaelẹ̌ su pelayanan, i kitẹ harusẹ̌ měkoạ persiapan mapaelẹ̌. Pěmilẹe topik mapaelẹ̌ kụ nẹ̌tatahino dingangu taumata sarung pẹ̌sombangeng i kitẹ. Bọu ene, pẹ̌tiněna kerea i kau měnětạ mẹ̌bawěke soal u topik ene.

7. Kerea i kau botonge měnětạ mẹ̌bawěke, kụ kawe nụe dumaringihẹ̌ dingangu měngarěga apa niul᷊ị i sire sěbạe penting?

⁷ Contone, i kau botonge mẹ̌kiwal᷊o su taghuangu wal᷊e, ”Botonge iạ masingkạ pěndang i Bapạ soal u masalah nikahombangengu taumata su patikụ dunia? Tumuhụ si Bapạ apa piạ pěměrenta botonge makailang kěbị masalah su dunia ini?” Bọu ene, lahẹ Daniel 2:44. Arau, i kau botonge maul᷊ị su lampungu, ”Tumuhụ si kau, apa cara kapaelange měněntiro anạ tadeạu makoạ anạ mapia?” Bọu ene, lahẹ Ulangan 6:6, 7. Maning topik apa nipilenu, kěnang pẹ̌tiněna soal u taumata sarung pẹ̌sombangengu. Pẹ̌tiněna apa al᷊amatẹ̌ sarung kaěbakeng i sire bọu těntirong Alkitapẹ̌. Su tempong mẹ̌bisara dingangi sire, i kitẹ harusẹ̌ dumaringihẹ̌ dingangu měngarěga apa niul᷊ị i sire. Mạeng měkoạ ene, i kau sarung limembong makaěna si sire, kụ i sire lai limembong mapulu dumaringihẹ̌ si kau.

8. Kawe nụe harusẹ̌ masau mẹ̌tiwo?

⁸ Těntal᷊ang i sire bědang tawe mapulu  měngěndung Alkitapẹ̌, i kau aramanung harusẹ̌ měpakẹ lawọ tempo dingangu katatoghasẹ̌ gunang saụ mẹ̌tiwo si sire. Kawe nụe kerene? Ual᷊ingu su tempong i kitẹ saụ mẹ̌tiwo, aramanung i sire tawe dịe su wal᷊e arau masibukẹ̌. Bọu ene lai, aramanung i kau harusẹ̌ masau mẹ̌tiwo tadeạu taghuangu wal᷊e mawiasa kụ mapulu měngěndung Alkitapẹ̌. Pẹ̌tahěndung, sasuang sarung tumuwo mapaelẹ̌ mạeng masau sěbohang. Kerene lai, mạeng i kitẹ masau mělahẹ Hengetangu Mawu si sire, kakěndagi sire si Yehuwa dingangi Yesus sarung tumuwo.

9-10. Su tempong piạ u nakaěbạ taumata apang mapulu měngěndung Alkitapẹ̌, kawe nụe i kitẹ botonge mẹ̌bera kěbị tau Kristen nakaěbạ tau ene?

⁹ Kěbị tau Kristen botonge mẹ̌tul᷊ung mědeạ taumata apang mapulu měngěndung Alkitapẹ̌. Ini mẹ̌sul᷊ung kere mědeạ anạ nailang. Kěnang pẹ̌tiněna sěmbaụ contoh kahěngang-hěngang nariadi ini. Su sěngkatempo, piạ sěngkatau dariọ kadodọ umurẹ̌ tělu taung nailang. Ěndịu piạ 500 su kataune nědeạ anạ ene. Su apang seng nědeạ aramanung 20 su kaorase, sěngkatau wọu i sire nakaěbạ anạ ene su baelu tuhigu. Tau esẹ ene madiri dalong ual᷊ingu nakaěbạ anạ ene. I sie nẹ̌bera, ”Ual᷊ingu tul᷊umangu hasụe taumata, anạ ini nikaěbạ.”

¹⁰ Lawọ taumata kere anạ ene. I sire napal᷊idẹ̌, tawẹ apa pělaharapẹ̌, kụ mapulu makaěbạ tul᷊umang. (Ef. 2:12) Nal᷊iu bọu ual᷊u juta taumata mětẹ̌tawakal᷊i mědẹ̌deạ si sire. Aramanung i kau tawe nakaěbạ taumata apang mapulu měngěndung Alkitapẹ̌ dingangu. Katewe, penyiar wal᷊inẹ kụ něnginjilẹ̌ su tampạ mẹ̌sul᷊ung nakaěbạ taumata mapulu měngěndung Alkitapẹ̌. Su tempong anạu sěmbaụ nẹ̌sombang dingangu taumata apang mapulu makoạ muriti  Kristus, kěbị taumata apang timol᷊e nědeạ lai mal᷊uasẹ̌.

11. Maning tawẹ apa taumata něngěndung Alkitapẹ̌ dingangu, kerea i kau botonge mẹ̌tul᷊ung měkoạ muritẹ̌?

¹¹ Maning tawẹ apa taumata něngěndung Alkitapẹ̌ dingangu, i kau tatapẹ̌ botonge mẹ̌tul᷊ung hal᷊ẹ̌ měkoạ muritẹ̌ ini dingangu cara wal᷊inẹ. Contone, i kau botonge měněnsomahẹ̌ dingangu měndingang taumata wuhu apang diměnta su Banalang Kararatuang. Mạeng i kau měnodẹ kakěndagẹ̌ su tau ene, i sie makaěna i kitẹ kai tau Kristen tutune. (Yoh. 13:34, 35) Su tempong i kau něgělị komentarẹ̌ su pěngangibadang, maning ene manibụ, ene botonge makoạ contoh su taumata wuhu kerea mělahẹ pangangimange dingangu cara mapia. I kau lai botonge měndingang penyiar wuhu su tempong měnginjilẹ̌, dingangu mẹ̌tul᷊ung si sie měpakẹ Alkitapẹ̌ gunang mělahẹ sěmbaụ topik. Mạeng měkoạ ene, i kau něněntiro si sie carane mẹ̌těno si Yesus.​—Luk. 10:25-28.

12. Apa i kitẹ harusẹ̌ makoạ taumata sěbạe pande gunang měkoạ muritẹ̌? Lahẹko.

¹² Abe pẹ̌tiněna i kitẹ harusẹ̌ makoạ taumata sěbạe pande gunang mẹ̌tul᷊ung taumata wal᷊inẹ makoạ muriti Yesus. Kawe nụe? Kěnang pẹ̌tiněna contoh i Faustina su Bolivia. I sie běga mẹ̌basa su tempong i sie nẹ̌sombang dingangu Sahiding Yehuwa. Dongkeng tempo ene, i sie něngěndung mẹ̌basa kadodọ-kadodọ. Orasẹ̌ ini, i sie seng nibaptisẹ̌ dingangu mal᷊uasẹ̌ měněntiro taumata wal᷊inẹ. Biasane, piạ limang katau něngěndung Alkitapẹ̌ dingange sabang misa. Maning i Faustina tawe makapẹ̌basa mapaelẹ̌ kere manga murite, i sie seng nẹ̌tul᷊ung ěnungu katau sarang nibaptisẹ̌.​—Luk. 10:21.

13. Maning i kitẹ sěbạe masibukẹ̌, apa pul᷊ise botonge kaěbakeng i kitẹ bọu hal᷊ẹ̌ měkoạ muritẹ̌?

¹³ Lawọ tau Kristen sěbạe masibukẹ̌ ual᷊ingu harusẹ̌ měkoạ lawọ hal᷊ẹ̌ penting. Maning kerene, i sire něnadia tempo gunang měněntiro Alkitapẹ̌, kụ nakapěndang karal᷊uasẹ̌. Pěmanda pěngalaman i Melanie su Alaska. I sie kai sěngkatau wawine wal᷊u kụ piạ anạe umure ual᷊u taung. I sie měhal᷊ẹ̌ su kanandụu ěllo kụ harusẹ̌ mẹ̌tangkiang matimade masakị kanker. Su soa ene kětạeng i Melanie Sahiding Yehuwa. I sie masau mẹ̌doa mẹ̌dorong katatoghasẹ̌ gunang měnginjilẹ̌ su cuaca matěho, ual᷊ingu i sie kahěngang-hěngang mapulu makaěbạ taumata apang mapulu měngěndung Alkitapẹ̌. Samurine, i sie nẹ̌sombang dingangi Sara. I Sara sěbạe himěkosẹ̌ su tempong nakasingkạ Mawu piạ arenge. Tawe nararěna bọu ene, i Sara mapulu měngěndung Alkitapẹ̌. Melanie nẹ̌bera, ”Su Sambaiang hěbi, biasane iạ nal᷊owe, katewe iạ dingangu anạku wawine  tatapẹ̌ siměbang gunang měněntiro Alkitapẹ̌, kụ i kami nakaěbạ pul᷊ise. I kami mal᷊uasẹ̌ mědeạ sasimbahu kakiwal᷊ong i Sara, kụ i kami sěbạe mal᷊uasẹ̌ ual᷊ingu i sie nakoạ hapị i Yehuwa.” Sara bahani timatěngo sasal᷊ukạ, siměbang bọu gahědane, kụ samurine nibaptisẹ̌.

14. (a) Apa sul᷊unge hal᷊ẹ̌ měkoạ muritẹ̌ dingangu mẹ̌baẹ? (b) Su apang bọu nẹ̌basa bawerang i Paulus su 2 Timotius 4:1, 2, apa sarung koatengu?

¹⁴ Maning i kau bědang tawe nakaěbạ taumata mapulu makoạ muritẹ̌, abe pěngědo! Turusẹ̌e pědeạ! Pẹ̌tahěndung, Yesus napẹ̌sul᷊ung hal᷊ẹ̌ měkoạ muritẹ̌ dingangu mẹ̌baẹ. Tahawaẹ aramanung měpakẹ lawọ tempo gunang makaěbạ kinạ. Kasauange i sire harusẹ̌ mẹ̌baẹ sarang hěbi ral᷊ung arau kalonge, kụ pẹ̌sěngsul᷊ẹ i sire harusẹ̌ mẹ̌baẹ sarang tampạ marau. (Luk. 5:5) Kerene lai, pirang katau penyiar měpakẹ lawọ tempo dingangu kasasabarẹ̌ ”mẹ̌baẹ” su manga tampạ dingangu tempo nẹ̌tatěntang. Kawe nụe? Gunang mẹ̌sombang limembong lawọ taumata. Kasauange i sire nakaěbạ taumata apang mapulu dumaringihẹ̌. Apa i kau botonge mẹ̌tawakal᷊i měnginjilẹ̌ su tempo dingangu tampạ taumata botonge kapěsombangeng?​—Basa 2 Timotius 4:1, 2.

15. Kawe nụe i kitẹ harusẹ̌ masabarẹ̌ gunang měněntiro Alkitapẹ̌?

¹⁵ Kawe nụe i kitẹ harusẹ̌ masabarẹ̌ gunang měněntiro Alkitapẹ̌? Ual᷊ingu i kitẹ harusẹ̌ měkoạ limembong mal᷊awọ sul᷊ungu kětạeng mẹ̌tul᷊ung si sie makasingkạ dingangu  kuměndagẹ̌ těntirong Alkitapẹ̌. I kitẹ lai harusẹ̌ mẹ̌tul᷊ung si sie makasingkạ dingangu kuměndagẹ̌ su Pengarang Alkitapẹ̌, Yehuwa. Bọu ene, i kitẹ harusẹ̌ měněntiro su muritẹ̌ ene bal᷊inẹ kětạeng apa niparentang i Yesus, katewe lai kerea carane tumol᷊e parenta ene su pěbawiahi sire. I kitẹ harusẹ̌ masabarẹ̌ mẹ̌tul᷊ung si sire gunang tumol᷊e prinsip Alkitapẹ̌. Piạ taumata měmal᷊ui tiněna dingangu kebiasaan i sire kětạeng su ral᷊ungu pira wul᷊ang; taumata wal᷊inẹ harusẹ̌ limembong marěngụ.

16. Apa wotonge kaěndungang i kitẹ bọu pengalaman i Raúl?

¹⁶ Pengalaman sěngkatau utusan injil su Peru něnodẹ kawe nụe kasasabarẹ̌ sěbạe penting. I sie nẹ̌bera, ”Ia seng něpakẹ darua bukẹ̌ gunang měněntiro Alkitapẹ̌ si Raúl. Katewe, i sie nakahombang masalah sěbạe mawěhạ. Piạ lawọ masalah su rumah tanggane. I sie masau mẹ̌dohang, kụ manga anạe tawe měngẹ̌ngadatẹ̌ si sie ual᷊ingu kakanoạe dal᷊akị. I sie masau duměnta su pěngangibadang, hakị u ene iạ tatapẹ̌ mětẹ̌tiwo si sie gunang mẹ̌tul᷊ung si sie dingangu kěluargane. Nal᷊iu wọu tělu taung, i sie nibaptisẹ̌.”

17. Apa sarung ěndungang i kitẹ su pěngangěndungang tuhụe?

¹⁷ Yesus nẹ̌parenta si kitẹ gunang ’měkoạ taumata bọu haghing bangsa mariadi murite’. Gunang tumol᷊e parenta ini, i kitẹ hanesẹ̌ harusẹ̌ mẹ̌bisara dingangu taumata apang tiněnane nẹ̌tatěntang dingangi kitẹ. Contone, taumata apang tawẹ apa agama arau tawe mangimang piạ Mawu. Pěngangěndungang tuhụe sarung mělahẹ kerea i kitẹ botonge měhabarẹ̌ habarẹ̌ mapia si sire.