1-2. (a) Tuir Jesus nia mandamentu iha Mateus 28:18-20, kongregasaun Kristaun nia knaar primeiru mak saida? (b) Iha lisaun neʼe, ita sei buka resposta ba pergunta saida deʼit?

KARIK apóstolu sira kontente tebes bainhira sira halibur iha foho ida. Jesus neʼebé moris-hiʼas ona, husu sira atu hasoru nia iha fatin neʼe. (Mt 28:16) Karik neʼe mak tempu neʼebé “nia mosu ba maun-alin naʼin-500 liu iha tempu ida”. (1 Kor 15:6) Tanbasá mak Jesus husu ninia dixípulu sira atu hasoru nia? Atu fó sira mandamentu furak ida: “Laʼo bá no hanorin ema husi nasaun hotu atu sai haʼu-nia dixípulu.”—Lee Mateus 28:18-20.

² Ikusmai dixípulu sira neʼebé rona Jesus nia liafuan sai parte ba kongregasaun Kristaun. Kongregasaun neʼe nia knaar primeiru mak atu hanorin ema sai Kristu nia dixípulu. * Ohin loron, iha kongregasaun Kristaun neʼebé loos rihun ba rihun iha mundu tomak, no kongregasaun sira-neʼe nia knaar primeiru mós hanesan. Iha lisaun neʼe ita sei buka resposta ba pergunta haat: Tanbasá hanorin ema atu sai dixípulu mak importante? Neʼe envolve saida? Ema Kristaun hotu bele ajuda atu hanorin ema sai dixípulu ka lae? No tanbasá mak ita presiza pasiénsia atu halo serbisu neʼe?

3. Tuir João 14:6 no 17:3, tanbasá hanorin ema sai dixípulu mak importante?

³ Tanbasá hanorin ema sai dixípulu mak importante? Tanba Kristu nia dixípulu deʼit mak bele sai belun ho Maromak. Liután neʼe, ema neʼebé halo tuir Kristu halaʼo moris neʼebé diʼak liu no iha esperansa atu moris ba nafatin iha futuru. (Lee João 14:6; 17:3.) Jesus fó responsabilidade importante ida ba ita, maibé laʼós ita mesak mak halo serbisu neʼe. Apóstolu Paulo hakerek kona-ba ninia an no ninia belun sira, hodi dehan: “Ita mak Maromak nia maluk serbisu-naʼin.” (1 Kor 3:9) Jeová no Kristu fó priviléjiu boot ba ema neʼebé la perfeitu.

4. Saida mak ita aprende husi Ivan no Matilde nia esperiénsia?

⁴ Hanorin ema sai dixípulu lori ksolok boot ba ita. Hanoin toʼok ezemplu husi Ivan no ninia feen Matilde iha rai-Kolómbia. Sira haklaken ba mane joven ida naran Davier, no Davier hatete ba sira: “Haʼu hakarak halo mudansa ba haʼu-nia moris, maibé labele.” Davier mak boksista neʼebé uza droga, hemu tua demais, no hela hamutuk ho ninia namorada Erika. Ivan esplika: “Ami komesa vizita nia iha knua neʼebé izoladu. Neʼe katak ami tenke saʼe bisikleta ba oras barak liuhusi dalan neʼebé iha tahu. Bainhira Erika nota katak Davier troka ninia hahalok, Erika mós komesa estuda Bíblia.” Liutiha tempu balu, Davier para uza droga, la hemu tua, no la sai tan boksista. Nia mós kaben ho Erika. Matilde hatete: “Bainhira Davier no Erika hetan batizmu iha tinan 2016, ami hanoin fali Davier nia liafuan neʼebé nia dehan beibeik: ‘Haʼu hakarak halo mudansa, maibé labele.’ Ami kontente tebes toʼo matan-been tun.” Ita sente kontente tebes bainhira ita ajuda ema sai Kristu nia dixípulu.

5. Saida mak hakat primeiru atu hanorin ema sai dixípulu?

⁵ Hakat primeiru atu ajuda ema sai dixípulu mak hodi buka ema sira neʼebé hakarak atu aprende kona-ba Jeová. (Mt 10:11) Kuandu ita fó-hatene ema hotu kona-ba Jeová, ita hatudu katak ita mak Testemuña ba Jeová. Ita mós hatudu katak ita mak ema Kristaun neʼebé loos bainhira ita halo tuir Kristu nia mandamentu atu haklaken.

6. Saida mak bele ajuda ita atu hetan susesu bainhira haklaken?

⁶ Ema balu karik hakarak tebes atu aprende lia-loos husi Bíblia, maibé ema barak foufoun ladún interese. Karik ita presiza ajuda sira atu iha interese hodi aprende liután. Atu bele hetan susesu bainhira haklaken, ita presiza prepara didiʼak. Hili tópiku sira neʼebé karik ema sei gosta. Tuirmai halo planu kona-ba oinsá atu fahe tópiku neʼe.

7. Oinsá mak Ita bele komesa koʼalia ho ema? Tanbasá mak importante atu rona no hatudu respeitu ba ema?

⁷ Porezemplu, karik Ita bele husu ba uma-naʼin: “Haʼu bele husu Ita-nia hanoin kona-ba buat ruma? Problema barak neʼebé ita hasoru ohin loron mós kona ema iha mundu tomak. Tuir Ita-nia hanoin, iha ka lae governu ida neʼebé bele rezolve problema sira iha mundu tomak?” Tuirmai Ita bele koʼalia kona-ba Daniel 2:44. Ka karik Ita bele dehan  ba ema seluk: “Tuir Ita-nia hanoin, saida mak xave atu haboot oan hodi iha hahalok diʼak?” Tuirmai koʼalia kona-ba Deuteronómio 6:6, 7. Diʼak atu hanoin kona-ba Ita-nia rona-naʼin bainhira hili tópiku ruma. Hanoin kona-ba benefísiu neʼebé sira sei hetan hodi aprende kona-ba Bíblia nia hanorin. Bainhira koʼalia ho sira, importante atu rona didiʼak no respeitu sira-nia opiniaun. Ho ida-neʼe, Ita bele komprende sira diʼak liután, no karik sira mós sei prontu atu rona ba Ita.

8. Tanbasá ita tenke hakaʼas an atu vizita beibeik?

⁸ Antes ema ida deside atu estuda Bíblia, karik Ita presiza uza tempu no hakaʼas an atu vizita beibeik. Tanbasá? Karik ema neʼe sai hela bainhira ita vizita. No mós, karik Ita presiza vizita beibeik atu uma-naʼin sai toman ho Ita no hakarak atu estuda Bíblia. Hanoin-hetan, ai-horis ida bele sai buras bainhira rega beibeik. Nuneʼe mós, ema nia domin ba Jeová no Kristu bele sai buras bainhira ita vizita beibeik hodi koʼalia kona-ba Maromak nia Liafuan.

9-10. Tanbasá mak ita bele dehan katak ema Kristaun hotu ajuda atu buka ema laran-loos sira?

⁹ Ema Kristaun ida-idak bele ajuda atu hetan ema laran-loos sira. Ita bele kompara ida-neʼe ho buka labarik neʼebé lakon. Oinsá? Hanoin toʼok ezemplu ida neʼebé akontese duni. Labarik-mane tinan tolu laʼo lakon. Maizumenus ema naʼin-500 buka labarik neʼe. Ikusmai, liutiha oras 20, ema ida hetan labarik neʼe iha toʼos laran. Ema neʼe lakohi atu ema seluk gaba nia maski nia hetan labarik neʼe. Nia esplika katak tanba ema atus ba atus serbisu hamutuk mak bele hetan labarik neʼe.

 ¹⁰ Ema barak mak hanesan labarik neʼebé lakon dalan. Sira la iha esperansa, no hakarak simu ajuda. (Éf 2:12) Ita hamutuk naʼin-millaun ualu liu mak hola parte hodi buka ema sira hanesan neʼe. Maski karik Ita rasik la hetan ema ida neʼebé hakarak estuda Bíblia. Maibé, karik irmaun-irmán seluk neʼebé haklaken iha fatin hanesan hetan ema neʼebé hakarak atu aprende lia-loos husi Maromak nia Liafuan. Bainhira irmaun ka irmán hasoru ema ida no ikusmai ema neʼe sai Kristu nia dixípulu, ema hotu neʼebé hola parte iha serbisu neʼe bele sente kontente.

11. Maski Ita la estuda Bíblia ho ema, Ita bele ajuda iha dalan saida?

¹¹ Maski agora Ita la estuda Bíblia ho ema ida, maibé iha dalan seluk atu ajuda ema sai Kristu nia dixípulu. Porezemplu, bainhira ema foun mai Reuniaun-Fatin, Ita bele fó benvindu no habelun sira. Se Ita hatudu domin iha dalan hanesan neʼe, Ita bele ajuda sira fiar katak ita mak ema Kristaun loos. (João 13:34, 35) Ita-nia komentáriu durante reuniaun, maski badak, bele hanorin ema foun oinsá atu fó sai sira-nia fiar husi laran no ho respeitu. Ita mós bele akompaña haklaken-naʼin foun atu haklaken no ajuda nia atu uza eskritura atu hanorin ema. Hodi halo nuneʼe, Ita sei hanorin nia atu banati-tuir Kristu.—Lc 10:25-28.

12. Ita presiza abilidade espesiál atu hanorin ema sai dixípulu ka lae? Esplika toʼok.

¹² Ita labele hanoin katak ita presiza abilidade espesiál atu hanorin ema seluk sai Jesus nia dixípulu. Tanbasá? Hanoin toʼok ezemplu husi Faustina neʼebé hela iha rai-Bolívia. Nia la hatene lee bainhira nia hasoru Testemuña ba Jeová. Hahú husi tempu neʼebá, nia aprende atu lee uitoan. Agora nia batizmu ona, nia gosta tebes atu hanorin ema seluk. Baibain, nia estuda ho ema naʼin-lima semana-semana. Maski Faustina labele lee ho diʼak se kompara ho ninia estudante Bíblia sira, maibé nia ajuda ona ema naʼin-neen atu hetan batizmu.—Lc 10:21.

13. Maski ita okupadu loos, ita hetan bensaun saida bainhira ita hanorin ema sai dixípulu?

¹³ Ema Kristaun barak okupadu ho buat importante oioin. Maski nuneʼe, sira fahe tempu atu estuda Bíblia ho ema, no sira hetan kontente husi ida-neʼe. Hanoin toʼok ezemplu husi irmán Melanie iha Alaska. Nia mesak mak haboot ninia oan-feto neʼebé tinan ualu. Nia mós serbisu tempu-tomak atu manán osan no tau matan ba ninia aman  neʼebé moras-kankru. Nia mesak deʼit mak Testemuña iha ninia sidade neʼebé izoladu. Nia halo orasaun beibeik atu hetan forsa hodi tahan malirin no bá haklaken tanba nia hakarak tebes atu hetan ema neʼebé gosta atu estuda Bíblia. Ikusmai, nia hasoru Sara. Sara kontente tebes atu hatene Maromak nia naran. Liutiha tempu balu, Sara hakarak estuda Bíblia. Melanie hatete: “Sesta kalan, maski haʼu sente kole loos, haʼu no haʼu-nia oan-feto bá estuda Bíblia ho Sara no ami hetan benefísiu. Ami kontente atu halo riset ba Sara nia pergunta sira, no ami mós kontente atu haree nia sai Jeová nia belun.” Sara tahan ho aten-brani bainhira ema fó-terus ba nia, no nia rezigna an husi igreja no hetan batizmu.

14. (a) Oinsá mak ema Kristaun sira hanesan ho peskadór? (b) Oinsá mak Paulo nia liafuan iha 2 Timóteo 4:1, 2 kona Ita?

¹⁴ Maski karik Ita seidauk hetan ema ida neʼebé hakarak sai Jesus nia dixípulu, keta lakon esperansa. Hanoin-hetan katak Jesus kompara serbisu atu hanorin ema sai dixípulu hanesan kail ikan. Peskadór uza tempu barak atu bele kail ikan. Dala barak sira serbisu toʼo kalan-boot ka toʼo madrugada, no dala ruma sira presiza hean ró dook. (Lc 5:5) Nuneʼe mós, ema Kristaun balu ho pasiénsia uza oras barak atu buka ema iha tempu no fatin oioin. Tanbasá? Atu nuneʼe sira bele hasoru ema barak liután. Dala barak, sira neʼebé hakaʼas an hetan  bensaun tanba hasoru ema neʼebé gosta atu rona mensajen neʼebé sira hatoʼo. Ita bele hakaʼas an atu haklaken iha tempu ka fatin neʼebé Ita bele hetan ema ka lae?—Lee 2 Timóteo 4:1, 2.

15. Tanbasá presiza pasiénsia atu estuda Bíblia ho ema?

¹⁵ Tanbasá presiza pasiénsia atu estuda Bíblia ho ema? Razaun ida mak ita presiza ajuda estudante atu aprende no hadomi Bíblia nia hanorin. Ita mós presiza ajuda estudante atu hatene no hadomi Jeová. Ita presiza hanorin estudante kona-ba saida mak Jesus hakarak atu ninia dixípulu sira halo, no mós ajuda estudante atu hatene oinsá atu halaʼo moris nuʼudar ema Kristaun loos. Ita tenke pasiénsia atu ajuda estudante nuʼudar nia koko atu aplika Bíblia nia prinsípiu sira. Ema balu konsege troka sira-nia hanoin no toman durante fulan balu deʼit. Maibé ema seluk presiza tempu kleur.

16. Saida mak Ita aprende husi Raúl nia ezemplu?

¹⁶ Esperiénsia husi misionáriu ida iha rai-Perú hatudu tanbasá diʼak atu hatudu pasiénsia. Misionáriu neʼe dehan: “Haʼu estuda ona livru rua hamutuk ho estudante Bíblia ida naran Raúl. Maibé nia presiza halo tan mudansa barak. Ninia moris kaben nian runguranga, nia toman atu tolok, no ninia oan sira sente susar atu respeitu nia. Maski nuneʼe nia tuir reuniaun beibeik, entaun haʼu kontinua vizita atu ajuda nia no ninia família. Tinan tolu liutiha mak nia kumpre kritéria atu hetan batizmu.”

17. Saida mak ita sei aprende iha lisaun tuirmai?

¹⁷ Jesus haruka ita atu ‘bá no hanorin ema husi nasaun hotu atu sai ninia dixípulu’. Atu kumpre mandamentu neʼe, dala barak ita presiza koʼalia ho ema neʼebé iha hanoin la hanesan duni ho ita, inklui ema sira neʼebé la iha relijiaun ka la fiar Maromak. Iha lisaun tuirmai ita sei aprende oinsá ita bele haklaken ba ema sira hanesan neʼe.