1-2. (a) Mwakukoliyana ndi dangu laku Yesu la pa Mateyu 28:18-20, kumbi mpingu Wachikhristu ukupaskika ntchitu wuli? (b) Kumbi tikambiskanengi mafumbu nanga mu nkhani iyi?

YESU wati wayuskika, wangukambiya akusambira ŵaki kuti akakumani nayu paphiri ku Galileya. Akutumika ŵati awungana kwenuku, atenere kuti alindizganga mwalikondwa kuti waŵakambiyengenji. (Mate. 28:16) Yitenere kuti yenga nyengu yeniyi po “wanguwoneke kwa abali akujumpha 500 pa nyengu yimoza.” (1 Akori. 15:6) Ntchifukwa wuli Yesu wangukambiya akusambira ŵaki kuti wakakumani nawu kwenuku? Iyu wakhumbanga kuti wakaŵapaski ntchitu yakuti achiti. Wanguŵakambiya kuti: “Lutani mukasambizengi ŵanthu amitundu yosi kuti aje akusambira.”—Ŵerengani Mateyu 28:18-20.

² Akusambira wo anguvwa mazu ngaku Yesu ndiwu pavuli paki angupanga mpingu wakwamba Wachikhristu. Ntchitu yikulu ya mpingu wenuwu yenga kusambiza ŵanthu anandi kuti aje akusambira aku Khristu. * Mazuŵa nganu, pacharu chosi chapasi pe mipingu yinandi ya Akhristu auneneska ndipu ntchitu yikulu ya mipingu yeniyi yechendasinthi. Mu nkhani iyi, tikambiskanengi mafumbu nganayi yanga: Ntchifukwa wuli ntchitu iyi njakukhumbika ukongwa? Kumbi tikhumbika kuchitanji kuti tisambizi ŵanthu kuja akusambira? Kumbi Mkhristu  weyosi watenere kuchitaku ntchitu yeniyi? Ntchifukwa wuli tikhumbika kuzikira pakuchita ntchitu iyi?

3. Mwakukoliyana ndi Yohane 14:6; 17:3, ntchifukwa wuli kusambiza ŵanthu kuti aje akusambira nkhwakukhumbika ukongwa?

³ Ntchifukwa wuli kusambiza ŵanthu kuti aje akusambira nkhwakukhumbika ukongwa? Chifukwa akusambira aku Khristu pe ndiwu angaja mabwezi ngaku Chiuta. Kusazgiyapu yapa, wo alondo Khristu aja ndi umoyu wamampha sonu kweniso alindizga kuzija ndi umoyu wamuyaya kunthazi. (Ŵerengani Yohane 14:6; 17:3.) Yesu wakutipaska nadi ntchitu yakukhumbika ukongwa kweni tigwira tija cha ntchitu iyi. Pakukamba vaku iyu ndi anyaki, wakutumika Paulo wanguti: “Tigwiriya ntchitu limoza ndi Chiuta.” (1 Akori. 3:9) Yehova ndi Khristu akuŵapaska ntchitu yapade ukongwa ŵanthu ambula kufikapu!

4. Kumbi tisambiranji pa vo vinguchitikiya Ivan ndi Matilde?

⁴ Tikondwa ukongwa asani tisambiza ŵanthu kuti aje akusambira. Mwakuyeruzgiyapu, wonani vo vinguchitikiya Ivan ndi muwolu waki Matilde a ku Colombia. Yiwu angupharazgiya Davier yo wanguŵakambiya kuti: “Ndikhumba kuti ndisinthi umoyu wangu kweni nditondeka.” Davier wachitanga masaza nga nkhonyu, wagwiriskiyanga ntchitu munkhwala wakutimbanyizga wongu, wenga muloŵevu kweniso wajanga ndi Erika chibwezi chaki. Ivan wangukamba kuti: “Tingwamba kusambira nayu Bayibolu. Iyu wajanga kutali ukongwa ndipu tapalasanga njinga mu ulambwi kwa maora nganandi kuti tikafiki ko wajanga. Erika wati wawona kuti Davier wayamba kusintha nkharu yaki, nayu wangwamba kusambira Bayibolu.” Pati pajumpha nyengu, Davier wanguleka kugwiriskiya ntchitu munkhwala wakutimbanyizga wongu, kuloŵe ndi masaza nga nkhonyu ngo wachitanga. Kweniso yiwu angutorana mwakulondo marangu nga boma. Matilde wangukamba kuti: “Davier ndi Erika ŵati abatizika mu 2016, tingukumbuka kuti Davier wayanjanga kukamba kuti, ‘Ndikhumba kuti ndisinthi kweni nditondeka.’ Tingukondwa ukongwa mwakuti tinguliya.” Tikondwa nadi ukongwa asani titovya ŵanthu kuti aje akusambira aku Khristu.

5. Kambani chinthu chakwamba cho tikhumbika kuchita kuti tisambizi ŵanthu kuja akusambira.

⁵ Chinthu chakwamba cho tikhumbika kuchita kuti tisambizi ŵanthu kuja akusambira, ‘nkhupenja’ ŵanthu wo mbakwenere. (Mate. 10:11) Asani tilondo dangu laku Khristu ndi kupharazgiya munthu weyosi muchigaŵa chidu, tilongo kuti te Akaboni aku Yehova kweniso te Akhristu auneneska.

6. Kumbi ntchinthu wuli cho chingatiwovya kuti tisambizengi umampha mu uteŵeti?

⁶ Ŵanthu anyaki akhumbisiska kuti asambiri Bayibolu. Kweni pakwamba anandi angawoneka nge kuti akhumba cha. Tingakhumbika kuŵachiska kuti asambiri vinandi. Kuti tisambizengi umampha mu uteŵeti, titenere kunozgeke umampha. Mukhumbika kusankha nkhani yo yingachikondwesa ŵanthu wo mwamukumana nawu. Pavuli paki, munozgekiyengi mo mungachikambiskiyana nawu.

7. Kumbi mungachita wuli kuti muyambi kukambiskana ndi munthu? Nanga ntchifukwa wuli muwona kuti nkhwakukhumbika kuvwisiya ndi kutumbika vo munthu wakamba?

⁷ Mwakuyeruzgiyapu, mungafumba munthu kuti: “Kumbi ndingakufumbaniku chinthu chinyaki? Masuzgu ngo tikumana nangu mazuŵa  nganu, ngakwaska weyosi pacharu chapasi. Kumbi muwona kuti maboma nga ŵanthu ngangatuzgapu masuzgu pacharu?” Pavuli paki mungaŵerenga Danyele 2:44. Pamwenga mungamufumba kuti: “Ndikhumba kuvwa maŵanaŵanu nginu. Kumbi muwona kuti ntchinthu wuli cho chingawovya kuti tilerengi umampha ŵana?” Pavuli paki mungakambiskana nayu Marangu 6:6, 7. Nkhani yeyosi yo mungasankha, muŵanaŵaniyengi ŵanthu wo mwamukambiskana nawu. Muŵanaŵaniyengi so mo angayanduliya asani asambira vo Bayibolu lisambiza. Asani mukambiskana nawu, muŵavwisiyengi kweniso mutumbikengi vo akamba. Ivi vingakuwovyani kuti muŵavwisi ndipu nawu angavwisiya vo mutiŵakambiya.

8. Ntchifukwa wuli tikhumbika cha kuchita daka kuweriyaku ku munthu yo tamupharazgiya?

⁸ Kuti munthu wazomeri kusambira Bayibolu, mungakhumbika kuweriyaku kananandi ŵaka. Chifukwa wuli? Chifukwa nyengu zinyaki mungamusaniya cha asani mwaweriyaku. Mungakhumbika so kuweriyaku kananandi ŵaka kuti wakufwatukiyeni. Kumbukani kuti chimiti chikuwa umampha asani atichidiriya maji nyengu zosi. Mwakuyanana ŵaka, munthu wangayamba kumuyanja ukongwa Yehova ndi Khristu asani tikambiskana nayu Mazu ngaku Chiuta nyengu zosi.

9-10. Ntchifukwa wuli tingakamba kuti Mkhristu weyosi wagwiraku ntchitu yakusaniya ŵanthu kuti aje akusambira?

⁹ Mkhristu weyosi wagwiraku ntchitu yakovya ŵanthu kuti aje akusambira. Ntchitu iyi tingayiyeruzgiya ndi kupenja mwana yo wasoŵa. Mu nthowa wuli? Ŵanaŵaniyani vo vinguchitikiya mwana wa vyaka vitatu yo wangusoŵa. Pafufupi ŵanthu 500 anguwovya kupenja mwana uyu. Pati pajumpha maora 20 kutuliya  po mwana uyu wangusoŵe, munthu munyaki wangumusaniya mu munda wa vingoma. Munthu uyu wangukana kuti ŵanthu amulumbengi chifukwa chakuti wangusaniya mwana. Iyu wangukamba kuti: “Ntchitu iyi ndagwira ndija cha.”

¹⁰ Ŵanthu anandi ayanana ndi mwana mwenuyu. Palivi chamampha cho alindizga ndipu akhumba kuti munthu munyaki waŵawovyi. (Aefe. 2:12) Abali ndi azichi akujumpha 8 miliyoni ayesesa kupenja ŵanthu ŵenaŵa. Vingachitika kuti mungatondeka kusaniya munthu yo wakhumba kusambira Bayibolu. Kweni apharazgi anyaki wo mupharazga nawu chigaŵa chimoza angasaniya munthu yo wakhumba kusambira Mazu ngaku Chiuta. Asani mubali pamwenga mzichi wasaniya munthu yo wazomera kusambira Bayibolu ndi kuja wakusambira waku Khristu, weyosi yo wangugwiraku ntchitu ya kupenja, wangaŵa ndi chifukwa chakukondwe.

11. Chinanga kuti sonu musambira Bayibolu ndi munthu weyosi cha, kumbi mungawovya wuli pa ntchitu yakusambiza ŵanthu kuti aje akusambira?

¹¹ Chinanga kuti sonu musambira Bayibolu ndi munthu weyosi cha kweni mungawovya mbwenu pa ntchitu yakusambiza ŵanthu kuti aje akusambira. Mwakuyeruzgiyapu, mungaŵalonde umampha ŵanthu wo ayamba sonu kuwungana asani ŵaza ku Nyumba ya Ufumu. Asani muchitengi viyo, angasimikiza kuti Akhristu auneneska aziŵika ndi chanju. (Yoha. 13:34, 35) Fundu zo mumuka pa maunganu zingawovya ŵanthu wo ayamba sonu kuwungana kuti nawu ayambi kumukapu kutuliya pasi pa mtima kweniso mwaulemu. Mungaluta so mu uteŵeti ndi munthu yo wayamba sonu kupharazga ndi kumuwovya kuti wagwiriskiyengi ntchitu Malemba pakupharazga. Asani muchitengi viyo, mungamusambiza kuti wachitengi vo Khristu wachitanga.—Luka 10:25-28.

12. Kumbi tikhumbika kuŵa ndi malusu ngapade kuti tiwovyi ŵanthu kuja akusambira? Konkhoskani.

¹² Tikhumbika cha kuŵanaŵana kuti titenere kuŵa ndi malusu ngapade kuti tisambizi ŵanthu kuja akusambira aku Yesu. Ntchifukwa wuli tikamba viyo? Wonani vo vinguchitikiya Faustina yo waja ku Bolivia. Pa nyengu yo wangwamba kuwungana ndi Akaboni aku Yehova waziŵanga cha kuŵerenga. Kweni mazuŵa nganu wabalabasaku viyo. Sonu wakubatizika ndipu watanja kusambiza anyaki. Kanandi wachitiska masambiru nga Bayibolu 5 sabata yeyosi. Chinanga kuti Faustina wabalabasa ŵaka pakuŵerenga nge mo achitiya so ŵanthu anandi wo wasambira nawu, kweni wawovyapu ŵanthu 6 kuti abatiziki.—Luka 10:21.

13. Chinanga kuti titangwanika ukongwa, kumbi tingasaniya vitumbiku wuli asani tiwovya ŵanthu kuti aje akusambira?

¹³ Akhristu anandi atangwanika so ndi ntchitu zinyaki zakukhumbika. Kweni apatuwa  nyengu yakusambiriya Bayibolu ndi ŵanthu ndipu akondwa ukongwa asani achita viyo. Mwakuyeruzgiyapu, wonani vo vinguchitikiya Melanie. Iyu waleranga yija mwana waki wa vyaka 8 ku Alaska. Wagwiranga so ntchitu kwa maora nganandi kweniso waphweriyanga awisi wo atamanga kansa. Pa nyengu iyi, Melanie wenga yija Kaboni mutawuni yo wajanga. Tawuni iyi yenga kutali ndi matawuni nganyaki. Iyu wapempheranga kwaku Yehova kuti waleki kopa kuzizira chifukwa wakhumbanga kusaniya munthu yo wangasambira nayu Bayibolu. Melanie wangukumana ndi Sara, yo wangukondwa ukongwa wati waziŵa kuti Chiuta we ndi zina. Pati pajumpha nyengu, Sara wanguzomera kusambira Bayibolu. Melanie wangukamba kuti: “Chinanga kuti ndavukanga kweni pa Chinkhondi peposi ndi mazulu, ini ndi mwana wangu tayanduwanga ukongwa asani taluta kuchisambira Bayibolu ndi Sara. Tafufuzanga asani Sara watifumba mafumbu ndipu tingukondwa wati waja mubwezi waku Yehova.” Sara wanguchita chiganga pa nyengu yo abali ŵaki ndipuso ŵanthu wo wapempheranga nawu pakwamba amunyozanga. Iyu wanguleka tchalitchi laki ndipu wangubatizika.

14. (a) Kumbi ntchitu yakusambiza ŵanthu yiyanana wuli ndi ulovi? (b) Kumbi mazu ngo Paulo wangukamba pa 2 Timote 4:1, 2 ngatikuchiskani wuli?

¹⁴ Chinanga kuti mwechendawovyepu munthu kuja wakusambira kweni mungavukanga cha. Kumbukani kuti Yesu wanguyeruzgiya ntchitu yakusambiza ŵanthu ndi ulovi. Alovi agwira ntchitu kwa maora nganandi kwambula kubaya somba. Kanandi aluta ndi usiku pamwenga kumatandakucha ndipu nyengu zinyaki  aluta kutali. (Luka 5:5) Mwakuyanana ŵaka, Akhristu anyaki apharazga kwa maora nganandi, nyengu zakupambanapambana kweniso malu ngakupambanapambana. Ntchifukwa wuli achita viyo? Akhumba kuti asaniyengi ŵanthu anandi. Wo achita phamphu kanandi atumbikika ukongwa chifukwa asaniya ŵanthu wo akhumbisiska kuvwisiya uthenga widu. Kumbi namwi mungapharazga pa nyengu kweniso malu ngo mungasaniyaku ŵanthu anandi?—Ŵerengani 2 Timote 4:1, 2.

15. Ntchifukwa wuli tikhumbika kuzikira asani tisambiza ŵanthu Bayibolu?

¹⁵ Ntchifukwa wuli tikhumbika kuzikira asani tisambiza ŵanthu Bayibolu? Chifukwa chimoza ntchakuti tikhumbika kuchita vinandi kuluska ŵaka kuŵawovya kuti aziŵi kweniso kwanja vo Bayibolu lisambiza. Tikhumbika so kuŵawovya kuti aziŵi ndi kwanja Yehova yo wakulemba Bayibolu. Kusazgiyapu pakusambiza munthu vo Yesu wakhumba kuti akusambira ŵaki achitengi, tikhumbika so kumuwovya kuziŵa mo wangachitiya venivi. Titenere kuzikira pakumuwovya penipo watesesa kugwiriskiya ntchitu fundu za mu Bayibolu. Anyaki aswera cha kusintha nkharu yawu kweni anyaki vitiŵatore nyengu yitali.

16. Kumbi mwasambiranji kwaku Raúl?

¹⁶ Vo vinguchitikiya mumishonale munyaki ku Peru vilongo umampha wakuzikira asani tisambira Bayibolu ndi ŵanthu. Iyu wangukamba kuti: “Ndingusambira mabuku ngaŵi ndi munthu munyaki zina laki Raúl. Kweni wagwiriskiyanga ntchitu cha vo wasambiranga. Iyu ndi muwolu waki ajaliyanga ŵaka kupwakasana, Raúl wayanjanga kutuka ndipuso ŵana ŵaki amutumbikanga cha chifukwa cha nkharu yaki yiheni. Chifukwa chakuti wazanga ku maunganu, ndinguleka cha kumuyende kuti nkhamuwovyi ndi banja laki. Raúl wangubatizika pati pajumpha vyaka vitatu kutuliya po ndingukumana nayu.”

17. Kumbi tazamukambiskananji mu nkhani ya sabata yamawa?

¹⁷ Yesu wakutikambiya kuti ‘tiluti tikasambizengi ŵanthu amitundu yosi kuti aje akusambira.’ Kuti tifiski ntchitu iyi, tikambiskana ndi ŵanthu wo tipambana nawu vigomezgu, kusazgapu wo aleka kusopa pamwenga wo agomezga kuti Chiuta kulivi. Nkhani ya sabata yamawa, yikonkhoska vo tingachita kuti tipharazgi uthenga wamampha ku ŵanthu ŵenaŵa.