1-2. (a) Kweendelana amalayilile aaJesu aali muli Matayo 28:18-20 ngaali makanze mapati maKristu bakasimpe ngibalaawo? (b) Njiili mibuzyo njitutalange-lange muchiiyo eechi?

KWEELEDE kuti baapostolo bakaliboteledwe nibakabungene kuchilundu. Naakabusigwa Jesu, wakachita mabambe aakuti akaswaanane ambabo kubusena oobo. (Mt. 28:16) Kulakonzeka kuti kuchiindi eecho, mpimpawo Jesu ‘mpaakalibonia kubeenzinyina bayinda ku500 aachiindi chimwi.’ (1 Kor. 15:6) Nkamboonzi Jesu naakabuzya basikwiiya bakwe kuti bakaswaanane anguwe kubusena oobo? Nkaambo wakali kuyanda kubapa malayilile aayandikana aakuti: “Kamuya mukayiisye bantu bazisi zyoonse kuti babe basikwiiya.”​—Bala Matayo 28:18-20.

² Basikwiiya bakamvwa majwi aaJesu, mukuya kwachiindi bakazooba maKristu mumbungano yakusaanguna. Makanze mapati ngibakali aawo aakali aakuti bantu biingi babe basikwiiya baKristu. * Mazubaano, kuli mbungano zyiingi zyamaKristu bakasimpe munyika yoonse alubo zili aamakanze aakozyenie angibakalaawo maKristu bamumbungano yakusaanguna. Muchiiyo eechi, tulalanga-langa mibuzyo iili 4 iitobela: Nkamboonzi mulimu wakugwasya bantu kuti babe basikwiiya nuuyandikana? Mulimu ooyu uswaanizyaanzi? MaKristu boonse beelede kuubeleka na mulimu ooyu? Alubo nkamboonzi nitweelede kuba aamoyo mulamfu mumulimu ooyu?

3. Kweendelana amajwi aali muli Johane 14:6; 17:3 nkamboonzi mulimu wakugwasya bantu kuti babe basikwiiya nuuyandikana?

³ Nkamboonzi mulimu wakugwasya bantu kuti babe basikwiiya nuuyandikana? Nkaambo basikwiiya baKristu mbabo luzutu bakonzya kuba beenzinyina baLeza. Kuyungizya waawo, bantu bayanda kutobela Kristu, bapona buumi bulikabotu lino alubo balangilila kuzoopona buumi butamani muchiindi chili kunembo. (Bala Johane 14:6; 17:3.) Jesu wakatupa mulimu ooyu uuyandikana pesi tatuuchiti aatulikke pe. Naakali kwaamba atala azyanguwe abeenzinyina, mwaapostolo Pawulu wakalemba kuti: “Tuli basimilimonyina a Leza.” (1 Kor. 3:9) Eechi nchilongezyo chipati loko Jehova aKristu nchibapede bantu bali aachibi!

4. Twiiyaanzi kuzintu nzyaakaswaana Ivan aMatilde?

⁴ Mulimu wakugwasya bantu kuti babe basikwiiya upa kuti tubotelwe. Atubone nzyaakaswaana Ivan amukayintu wakwe Matilde bakuColombia. Bakakambawukila umwi mwaalumi uutegwa Davier, mpawo wakababuzya kuti: “Ndilayanda kuchincha maponeno aangu pesi kulandikachila.” Davier wakali kusaana musobano wazyakulwana (boxing), wakali kubelesya ma-drugs, kunywa bukande munzila yiindilide alubo kakkala aamusimbi wakwe Erika. Ivan wakati: “Twakasaanguna kumuyiisya Bbayibbele. Akaambo kakuti nkwaakali kukkala kwakali kule, twakali kuchova mabbasikili katweenda ma-awa miingi mumigwagwa yakali aamadaka. Musimbi wakwe Erika naakabona mbaakali kuya buchincha Davier, anguwe wakasaanguna kwiiya Bbayibbele.” Mukuya kwachiindi, Davier wakaleka kubelesya ma-drugs, kunywa zyiindilide akulwana. Alubo wakachada aErika. Matilde waamba kuti: “Chiindi Davier aErika nibakabbabbatizigwa mu2016, twakayeeya majwi Davier ngaakali kwaamba aakuti, ‘Ndilayanda kuchincha maponeno aangu pesi kulandikachila.’ Twakabotelwa loko zyakuti misozi yakatweenda.” Nisimpe kuti nga twabotelwa loko chiindi nitugwasya bantu kuti babe basikwiiya baKristu.

5. Tweelede kusaanguna kuchitaanzi kuti tugwasye bantu kuti babe basikwiiya?

⁵ Chintu chakusaanguna nchitweelede kuchita kuti tugwasye bamwi kuti babe basikwiiya, ‘nkuyanduula’ bantu beelela. (Mt. 10:11) Nitukambawukila bantu mbituswaana, nga tulikutondeezya kuti tuli Bakamboni baJehova. Alubo chiindi nituswiilila mulawu waKristu wakuti tukambawuke, nga tulikutondeezya kuti tuli maKristu bachoonzyo.

6. Tweelede kuchitaanzi kuti bantu baswiilile nzituyanda kubabuzya?

⁶ Bamwi bantu bali aachiyandisyo chakwiiya kasimpe kamuBbayibbele pesi bamwi mbituswaana balakonzya kubonekaanga tabakwe chiyandisyo kumasaangunino. Tweelede kuyanduula nzila zipa kuti babe aachiyandisyo. Kuti tuzwidilile mumulimu wesu, tweelede kulibambila kabotu. Sala makani aakonzya kupa kuti bantu mbukambawukila babe aachiyandisyo. Kuzwa waawo, babuzye atala amakani aayo.

7. Nga ulachita biyeni kuti kuyanda kukambawukila umwi muntu alubo nkamboonzi kuswiilila akulemeka nikuyandikana?

⁷ Muchikozyano, ulakonzya kubuzya mwining’anda kuti: “Ndikumbila kubuzya, makani aaya mwaabona biyeni? Mapenzi ngituswaana alikozyenie angibaswaana bantu biingi munyika. Mubonaanga mfulumende zyabantu zilakonzya na kumaninsya mapenzi aali munyika?” Kuzwa waawo, mulakonzya kwaambuuzyania majwi aali muli Daniele 2:44. Naakuti ulakonzya kubuzya umwi muntu kuti: “Mubonaanga  niinzi chikonzya kutugwasya kuti tuyiisye bana kuti kabaswiilila? Ndikumbila kumvwa nsandulo yanu.” Kuzwa waawo, mulakonzya kwaambuuzyania majwi aali muli Deuteronomo 6:6, 7. Kufumbwa makani nguyanda kwaambuuzyania aabantu, yeeya atala abantu mbuyookambawukila. Alubo yezya kubona mbubatagwasigwe anziliyiisya Bbayibbele. Kulayandikana kuswiilila akwaalemeka maboneno aabo chiindi nulikwaambuulaabo. Kuti wachita oobo, uyooziba nzibayeeya alubo bayooyanda kukuswiilila.

8. Nkamboonzi nitweelede kubaswaya kwaziindi zyiingi bantu?

⁸ Kulakonzeka kuti weelede kuswaya muntu kwaziindi zyiingi katanasala kwiiya Bbayibbele. Nkamboonzi nweelede kuchita oobo? Nkaambo chimwi chiindi kulakonzeka kuti bantu biingi nga tabawo pe nitubaswaya. Alubo kulakonzeka kuti weelede kuswaya mwining’anda kwaziindi zyiingi katanazumina kwiiya Bbayibbele. Muchikozyano, munsamu weelede kutiliilwa kwaziindi zyiingi kuti ukomene. Munzila iikozyenie, kuti muntu uuli aachiyandisyo ayinkilile kunembo kuyanda Jehova aKristu, tweelede kwaambuuzyania aanguwe kwaziindi zyiingi katubelesya Jwi lyaLeza.

9-10. Nkamboonzi nitukonzya kwaamba kuti muKristu umwi awumwi uliswaanizidwe mukuyanduula bantu bali aamyoyo iibombede?

⁹ MuKristu umwi awumwi ulaswaanizigwa mukuyanduula bantu bali aamyoyo iibombede. Mulimu ooyu tulakonzya kuukozyanisya akuyanduula mwana wasweeka. Ukozyenie biyeni? Atubone chikozyano chachoonzyo chakachitika chamwana mulombe uuli aaminyaka iitatu wakasweekede. Bantu basika ku500 bakasaanguna kumuyanduula. Nikwakayinda ma-awa aali 20, umwi mwaalumi wakamujana mumuunda mwana ooyo. Mwaalumi ooyo taakayanda  pe kuti bantu bamulumbayizye. Wakati: “Bantu biingi bakabelekelaamwi kuti mwana ooyo ajanike.”

¹⁰ Bantu biingi balisweekede mbuuli mwana ooyo. Tabakwe bulangilizi pe alubo bayanda kugwasigwa. (Ef. 2:12) Tuli mamiliyoni aayinda ku8 alubo tulikubelekelaamwi mukuyanduula bantu beelela. Chimwi chiindi, ulakonzya kutamujana muntu uuyanda kwiiya Bbayibbele. Pesi bamwi basikupupulula mbubelekaabo, balakonzya kujana muntu uuyanda kwiiya kasimpe kali muJwi lyaLeza. Kuti mukombima wajana muntu uuyanda kuba sikwiiya waKristu, muntu woonse wali kuswaanizigwa mukuyanduula ulabotelwa.

11. Nziizili zimwi nzila nzukonzya kuchita kuti ugwasilizye mukuchita bantu kuti babe basikwiiya nikuba kutakwe zyiiyo zyaBbayibbele?

¹¹ Nikuba kutakwe chiiyo chaBbayibbele, ulakonzya kugwasilizya azimwi nzila kuti bantu babe basikwiiya. Muchikozyano, ulakonzya kutambula bantu basika kuNg’anda yaBwaami akweezya kuba mweenzinyina. Kuchita oobo, kuyoopa kuti babone kuti luyando ndutulaalo, lutondeezya kuti tuli maKristu bachoonzyo. (Joh. 13:34, 35) Chiindi nupa nsandulo nikuba kazili mfwiifwi, nga ulikugwasya bapya kuti bakonzye kusandula munzila iili kabotu. Alubo ulakonzya kwiinka aasikupupulula mupya kukukambawuka akumugwasya kuti aabelesye kabotu Magwalo nayiisya bantu. Kuti wachita oobo, unooli ulikumuyiisya kuti atobelezye chikozyano chaKristu.​—Lk. 10:25-28.

12. Tweelede kuba bantu bali aachipo chigambya na kuti tugwasye bantu kuti babe basikwiiya? Pandulula.

¹² Tatweelede kuyeeya kuti tweelede kuba aachipo chigambya chakukonzya kugwasya bantu kuti babe basikwiiya baJesu. Nkamboonzi nikuli boobo? Atubone chikozyano chamuchizi Faustina, uukkala kuBolivia. Muchizi ooyu taakali kukonzya pe kubala naakabonana aaBakamboni baJehova kakusaanguna. Kuzwa kuchiindi eecho, lino waabukonzya mbichaani kubala. Muchizi ooyu wakabbabbatizigwa alubo ukuyanda loko kuyiisya bamwi. Chiindi chiingi, uchitisya zyiiyo zyaBbayibbele zili 5 mviki amviki. Nikuba kuti muchizi ooyu takonzyi pe kubala mbuuli bantu mbayiisya Bbayibbele pesi wakagwasya bantu bali 6 kuti babbabbatizigwe.​—Lk. 10:21.

13. Nikuba katujisikini, tujana zilongezyo zili biyeni akaambo kakugwasilizya mumulimu wakugwasya bantu kuti babe basikwiiya?

¹³ MaKristu biingi balijisikini nkaambo bali aamilimu myiingi. Nikuba boobo, balipa chiindi chakuyiisya bantu Bbayibbele alubo kuchita oobo kupa kuti babotelwe. Atubone chikozyano chamuchizi Melanie. Melanie amwanaakwe musimbi wakali aaminyaka iili 8, bakkala kuAlaska alubo muzyali uuli aalikke. Melanie ubeleka kuzwa muMuvulo kusika muli Bwasanu alubo wakali kukkala aawisi wakali kuchiswa bulwazi bwakkensa. Ukkala muchilawu chili  kule akulimbabo alubo nguwe luzutu wakali kamboni. Chiindi chiingi, wakali kukomba kuti ajane manguzu aakuti ayinke kukukambawuka kuti ajane chiiyo chaBbayibbele nikuba kuti kwakali kutontola. Kuzwa waawo, wakajana mwanakazi uutegwa Sara. Sara wakabotelwa naakaziba kuti Leza ulaazina limupeleme. Mukuya kwachiindi, Sara wakazumina kwiiya Bbayibbele. Melanie wakati: “Muli Bwasanu bumwi abumwi goko, nikuba kuti ndakali kunoonga ndilikatede pesi ndakali kwiinka amwanaangu kuti tukayiye aSara alubo kuchita oobo kwakatugwasya. Kwakali kutunoneezya kuyanduulisisya nsandulo zyamibuzyo yaSara alubo twakabotelwa loko chiindi Sara naakasala kuba mweenzinyina waJehova.” Sara wakakuzunda kukazigwa, wakaleka kwiinka kuchikombelo nchaakali kunjila mpawo wakabbabbatizigwa.

14. (a) Mulimu wakugwasya bantu kuti babe basikwiiya ukozyenie biyeni akuteya baswi? (b) Majwi aaPawulu aali muli 2 Timoteyo 4:1, 2 akugwasya biyeni?

¹⁴ Utalengwaani pe kuyanduula basikwiiya bali aachiyandisyo nikuba kuti muchilawu mukambawukila bantu kabatakwe chiyandisyo. Utalubi kuti kuyanduula ooku Jesu wakakukozyanisya aakuteya baswi. Bantu bateya baswi balakonzya kubeleka kwachiindi chilamfu kabatanajata baswi. Chiindi chiingi balakonzya kubeleka mansiku naakuti kuseeni loko alubo chimwi chiindi nga kwayandikana kuti bakateyele kule. (Lk. 5:5) Munzila iikozyenie, bantu bagwasya bamwi kuti babe basikwiiya, babeleka ma-awa miingi kuti bateyele mundawu zisiyene-siyene amuziindi zisiyene-siyene. Nkamboonzi nibachita oobo? Bachitila  kuti bajane bantu biingi. Bantu babeleka changuzu mumulimu ooyu, chiindi chiingi ngabajana bantu bali aachiyandisyo chakuswiilila mulumbe wesu. Kujana weezya na kukambawuka aachiindi mpukonzya kujana bantu biingi naakuti mundawu mukonzya kubajana?​—Bala 2 Timoteyo 4:1, 2.

15. Nkamboonzi kuchitisya zyiiyo zyaBbayibbele nikuyanda kuti tube aamoyo mulamfu?

¹⁵ Nkamboonzi kuchitisya zyiiyo zyaBbayibbele nikuyanda kuti tube aamoyo mulamfu? Kaambo kapati nkakuti, tweelede kuchita zyiingi kutali kugwasya sikwiiya luzutu kuti azibe njiisyo zyamuBbayibbele akuziyanda. Pesi tweelede kumugwasya kuti azibe Mwini Bbayibbele, Jehova akuti amuyande. Kuyungizya mukumuyiisya nzyayanda Jesu kuti basikwiiya bakwe bachite, tweelede kumugwasya kuti azibe mbayelede kupona mbuuli muKristu wachoonzyo. Tweelede kuba aamoyo mulamfu nitumugwasya chiindi nalikweezya kupona kweendelana amalayilile aamuBbayibbele. Bamwi basikwiiya kubatolela myeezi miche kuchincha mizeezo amichito yabo pesi bamwi kubatolela chiindi chilamfu.

16. Wayiyaanzi kuchikozyano chaRaúl?

¹⁶ Umwi mumishinali wakuPeru wakaswaana chiimo chitondeezya mbukuyandikana kuba aamoyo mulamfu. Mumishinali ooyu wakati: “Raúl ngundakali kuyiisya Bbayibbele, wakali wayiya mabbuku aabili. Pesi wakachili kulwana amapenzi miingi mubuumi. Taakali kukkala kabotu amukayintu wakwe, wakali kwaambuula majwi aatali kabotu alubo bana bakwe teebakali kumulemeka pe. Akaambo kakuti wakali kunjila miswaangano chiindi choonse, ndakali kumuswaya kuti ndimugwasye ampuli yakwe. Nikwakayinda minyaka iitatu kuzwa nitwakasaanguna kubonana, wakazooyelela kubbabbatizigwa.”

17. Tuyooyiyaanzi muchiiyo chitobela?

¹⁷ Jesu wakatubuzya kuti ‘twiinke tukayiisye bantu bazisi zyoonse kuti babe basikwiiya.’ Kuti tuzuzikizye malayilile aayo, chiindi chiingi tweelede kwaambuula abantu bali aamaboneno aasiyene angitulaawo, kuswaanizya abantu batakwe chikombelo nchibanjila naakuti batasyomi pe kuti Leza mpali. Chiiyo chitobela, chiyootugwasya kubona mbutukonzya kukambawukila bantu bali amaponeno aasiyene-siyene.