1, 2. 1) Chuna la wan xlimapakgsin Jesús anta kMateo 28:18-20, ¿tuku tlakg xlakaskinka taskujut lakgayakgo kstalaninanin Cristo? 2) ¿Tuku takgalhskinin nakgalhtiyaw k’uma artículo?

APÓSTOLES max lu xpaxuwamakgo akxni tamakxtumikgolh k’akgtum sipi. Jesús xkawaninit kstalaninanin pi anta x’ama katatanokglha (Mat. 28:16). Max ama kilhtamaku akxni «katasiyanilh liwaka akgkitsis ciento natalan tiku lakatum niku xtamakxtumikgonit» (1 Cor. 15:6). ¿Tuku xlakata Jesús x’ama katatanokglha? Xlakata nakamaxki akgtum lu xlakaskinka taskujut: «Kapitit chu kakamakgtayatit latamanin xliputum kachikinin xlakata kistalaninanin nawankgo» (kalikgalhtawakga Mateo 28:18-20).

² Tiku kgaxmatkgolh xtachuwin Jesús makgtapakgsikgolh kcongregación xalak pulana siglo. Tuku tlakg xlakaskinka xlitlawatkan xwanit wa pi latamanin kstalaninanin Cristo xlitaxtukgolh. * La uku, xlikalanka Katiyatni wilakgolh lhuwa congregaciones xla kstalaninanin Cristo. Chu chuntiya tlawamakgolh uma taskujut. K’uma artículo nakgalhtiyaw uma akgtati takgalhskinin: ¿Tuku xlakata lu xlakaskinka nakamakgtayayaw latamanin kstalaninanin Cristo nalitaxtukgo? ¿La natlawayaw uma taskujut? ¿Makgtayanankgo putum kstalaninanin Cristo xlakata namakgantaxtikan? Chu ¿tuku xlakata talakaskin nalimasiyayaw takgalhkgalhin akxni natlawayaw uma taskujut?

3. Chuna la wan Juan 14:6 chu 17:3, ¿tuku xlakata lu xlakaskinka naliskujaw pi latamanin kstalaninanin Cristo nawankgo?

³ ¿Tuku xlakata lu xlakaskinka naliskujaw pi latamanin kstalaninanin Cristo nawankgo? Xlakata kajwatiya tiku stalanikgo Cristo tlan x’amigo Dios nawankgo. Nachuna, kgalhikgo akgtum tlan latamat la uku chu kgalhikgo akgtum tlan takgalhkgalhin kkilhtamaku nema aku mima (kalikgalhtawakga Juan 14:6; 17:3). Xlikana pi Jesús kinkalakgayawanitan akgtum xlakaskinka taskujut, pero ni ki’akstukan wilaw. Apóstol Pablo lichuwinalh pi xla chu amakgapitsi kstalaninanin Cristo «xtaskujnin Dios» xlitaxtukgo (1 Cor. 3:9). Xlikana, Jehová chu Cristo kinkamaxkikgonitan akgtum lanka talakgalhaman.

4. ¿Tuku katsiniyaw xlakata tuku titaxtukgolh Iván chu Matilde?

⁴ Kamakgtayakan latamanin kstalaninanin Cristo nalitaxtukgo lu nakinkamakgapaxuwayan. Ka’akxilhwi tuku titaxtukgolh Iván chu Matilde, akgtum tamakgaxtokgat xalak Colombia. Litachuwinankgolh Dios chatum kgawasa wanikan Davier, tiku kawanilh: «Ktlawaputun talakgpalit kkilatamat, pero ni kmatlani». Davier chatum boxeador xwanit tiku xmaklakaskin drogas chu lhuwa xwa kuchu. Nachuna akxtum xtawi xtaskin, tiku xwanikan Érika. Iván lichuwinan: «Ktsukuw kalakgapaxialhnanaw asta niku xwilakgocha. Akglhuwa hora xaklichanaw kbicicleta chu kalixkajni xwanit. Akxni Érika akxilhli pi Davier tsukulh tlawa talakgpalit kxlatamat, na tsukulh likgalhtawakga Biblia». Alistalh, uma kgawasa makgxtakgli drogas, kuchu chu boxeo. Nachuna tatamakgaxtokgli xtaskin. Matilde wan: «Akxni Davier chu Érika tamunukgolh, kkata 2016, klakapastakwi tuku wa Davier: “Ktlawaputun talakgpalit kkilatamat, pero ni kmatlani”. Ktsukuw tasayaw». Xlikana pi lu lipaxuwakan akxni makgtayakan chatum lataman xlakata kstalanina Cristo nalitaxtu.

5. ¿Tuku pulana kilitlawatkan xlakata tlan nakamakgtayayaw latamanin kstalaninanin Cristo nalitaxtukgo?

⁵ Pulana talakaskin nakaputsayaw tiku lakgapasputunkgo Jehová (Mat. 10:11). Nalimasiyayaw pi xaxlikana kstalaninanin Cristo akinin komo nakatachuwinanaw putum latamanin nema nakatekgsaw. Chu nalimasiyayaw pi xaxlikana kstalaninanin Cristo akinin komo nakgalhakgaxmataw xlimapakgsin xlakata nalichuwinanaw Dios.

6. ¿Tuku nakinkamakgtayayan xlakata tlan nakinkakitaxtuniyan akxni nalichuwinanaw Dios?

⁶ Makgapitsi latamanin katsiputunkgo tuku xaxlikana masiya Biblia. Pero makgapitsi tasiya pi xapulana ni katsiputunkgo xlakata Biblia, chu max talakaskin nakamakgpuwantiniyaw xlakata nakatsiputunkgo. Xlakata tlan nakinkakitaxtuniyan, talakaskin liwana nakatsiyaw tuku nawanaw. Kalaksakwi tuku tlan nalichuwinanaw nema kaks nakamalakawani chu kalakkaxwiliw tuku pulana nakawaniyaw.

7. 1) ¿La tlan namatsukiyaw akgtum tlan takgalhchuwin? 2) ¿Tuku xlakata wix lakpuwana pi lu xlakaskinka liwana nakakgaxmatniyaw tuku lakpuwankgo latamanin?

⁷ Akgtum li’akxilhtit, max tlan nawanaw: «Kkatsiputun tuku lakpuwana wix xlakata uma. La uku, xlikalanka kakilhtamaku titaxtuyaw tuku tuwa. ¿Lakpuwana pi talakaskin akgtum tamapakgsin nema nalakkaxtlawa kinta’akglhuwitkan?». Alistalh tlan nalikgalhtawakgayaw chu nalitachuwinanaw Daniel 2:44. O max tlan nawanaw: «Ktlawaniputunan akgtum takgalhskinin. ¿Tuku lakpuwana pi talakaskin xlakata kamanan tlan nalikatsikgo?». Chu tlan nalitachuwinanaw Deuteronomio 6: 6, 7. Lata tuku nakalitachuwinanaw, kalilakpuwaw tiku nakalitachuwinanaw. Kalilakpuwaw la nakamakgtaya nakatsinikgo tuku xaxlikana masiya Biblia. Akxni nakatachuwinanaw, talakaskin liwana nakakgaxmatniyaw tuku lakpuwankgo. Komo chuna natlawayaw, tlakg liwana naka’akgatekgsniyaw chu xlakan tlakg nakgaxmatputunkgo.

8. ¿Tuku xlakata ni natlakgwanaw akxni nakalakgtaspitparayaw latamanin?

⁸ Xlakata chatum lataman namakgamakglhtinan akgtum takgalhtawakga xalak Biblia, max natalakaskin makglhuwa nalakgapaxialhnanaw chu lhuwa kilhtamaku nalimaxtuyaw. ¿Tuku xlakata? Pulana, xlakata max akxni naʼanaw putsayaw niti wi kxchik o max wi tuku tlawama. Nachuna, max natalakaskin makglhuwa nalakgapaxialhnanaw xlakata nakinkatasmaniyan chu namakgamakglhtinan akgtum takgalhtawakga xalak Biblia. Kalakapastakwi pi kgantum xanat nastaka komo ankgalhin namunuwiliyaw. Nachuna, max nastaka tapaxkit nema chatum lataman kgalhini Jehová chu Cristo komo ankgalhin nalitachuwinanaw xTachuwin Dios.

9, 10. ¿Tuku xlakata wanaw pi putum tiku lichuwinanaw Dios makgtayananaw nakatekgskan tiku katsiputunkgo xalak Biblia?

⁹ Putum tiku lichuwinanaw Dios makgtayananaw xlakata nakatekgskan latamanin tiku xlikana katsiputunkgo xlakata Dios. Kintaskujutkan tlan natamalakxtumiyaw la akxni putsakan aktsu kgawasa tiku tsankganit. ¿Tuku xlakata? Kaʼakxilhwi tuku lalh akgtum kilhtamaku. Xlakata naputsakan chatum aktsu kgawasa tiku xkgalhi akgtutu kata tiku xtsankganit, makgtayanankgolh 500 latamanin. Alistalh, akxni xtitaxtunita akgpuxam hora lata xtsankganit uma kgawasa, chatum chixku tekgsli kʼakgtum kaxawatna. Pero ni wa  pi xʼakstu tekgsli, wata wa: «Tekgswi uma kgawasa xlakata putum makgtayanaw».

¹⁰ Lhuwa chuna makgkatsikgo pi tsankgakgonit chuna la uma aktsu kgawasa. Ni kgalhikgo takgalhkgalhin, pero lakaskinkgo pi wi tiku nakamakgtaya (Efes. 2:12). Liwaka 8 millones xtatayananin Jehová kaputsamaw umakgolh latamanin. Max akinin ni katitekgswi tiku likgalhtawakgaputun Biblia, pero max atanu tala tlan natekgsa. Akxni chatum tala tekgsa tiku kstalanina Cristo nalitaxtu alistalh, putum akinin tlan nalipaxuwayaw.

11. Maski la uku niti makgalhtawakgayaw, ¿tuku tlan natlawayaw xlakata namakgtayananaw wi tiku kstalanina Cristo nalitaxtu?

¹¹ Maski la uku niti makgalhtawakgemaw, wi tuku atanu tlan natlawayaw xlakata wi tiku kstalanina Cristo nalitaxtu. Akgtum liʼakxilhtit, akxni chatum lataman tsuku min ktamakxtumit, tlan namakgamakglhtinanaw chu natachuwinanaw xlakata tlan namakgkatsi. Chuna namakgtayayaw xlakata nakanajla pi xaxlikana kstalaninanin Cristo lapaxkikgo (Juan 13:34, 35). Nachuna, takgalhtin nema mastayaw ktamakxtumit, maski ni lhuwa, tlan namakgtaya liwana nalichuwinan tuku katsini. Nachuna tlan naʼanaw talichuwinanaw Dios tiku aku tsukunima, chu namakgtayayaw tlan namaklakaskin Biblia xlakata nakatachuwinan latamanin. Akxni chuna natlawayaw, namasiyaniyaw la nastalani xliʼakxilhtit Cristo (Luc. 10:25-28).

12. ¿Talakaskin wi tuku lu nakatsiniyaw natlawayaw xlakata wi tiku tlan namasiyaniyaw la tlan kstalanina Cristo nalitaxtu? Kawili akgtum liʼakxilhtit.

¹² Ni kalakpuwaw pi talakaskin wi tuku lu nakatsiniyaw natlawayaw xlakata wi tiku tlan namasiyaniyaw la tlan kstalanina Cristo nalitaxtu. Xliʼakxilhtit Faustina, tiku lama kBolivia, kinkamakgtayayan naʼakgatekgsaw tuku xlakata. Akxni kalakgapasli xtatayananin Jehová nila xkgalhtawakga, pero la uku tsinu katsini. La uku tamununita, chu lu lakgati kamasiyani latamanin tuku xaxlikana. Akgatunu semana kamakgalhtawakga kgalhkitsis latamanin. Maski Faustina nila liwana kgalhtawakga chuna la makgapitsin tiku kamakgalhtawakga, kamakgtayanit kgalhchaxan latamanin xlakata tlan natamunukgo (Luc. 10:21).

13. Maski ni kgalhiyaw kilhtamaku, ¿tuku tasikulunalin namakglhtinanaw komo naliskujaw nakaputsayaw latamanin tiku katsiputunkgo tuku xaxlikana?

¹³ Lhuwa natalan wi tuku xlakaskinka lakgayakgolh chu wa xlakata ni kgalhikgo kilhtamaku. Maski chuna, limaxtukgo kilhtamaku xlakata nakamakgalhtawakgakgo latamanin, akgtum taskujut nema lu kamakgapaxuwa. Kaʼakxilhwi xliʼakxilhtit Melanie. Chatum tse tiku xʼakstu kuenta tlawa xtsumat tiku kgalhi akgtsayan kata. Nachuna xkgalhi akgtum taskujut niku tantaku kskuja chu na kuenta  xtlawa xtlat tiku xkgalhi cáncer. Xlama kʼakgtum aktsu kachikin xla Alaska, niku ni xʼanan natalan. Ankgalhin kskini Dios pi xmaxkilh litliwakga xlakata naʼan lichuwinan Dios maski lu xlonkgnan, xlakata xtekgsputun tiku tlan xmakgalhtawakgalh. Alistalh, tekgsli Sara, tiku lipaxuwalh akxni katsilh pi Dios xkgalhi xtukuwani. Titaxtulh kilhtamaku, uma puskat makgamakglhtinalh akgtum takgalhtawakga xalak Biblia. Melanie lichuwinan: «Kakgotanun viernes ankgalhin lu xaktlakgwanit akxni xaktaspita. Pero kintsumat chu akit xakanaw makgalhtawakgayaw chu uma lu xkinkamakgtayayan. Lu xaklakgatiyaw xaklakputsananiyaw xlakata nakkgalhtiyaw xtakgalhskinin Sara, chu lu klipaxuwaw akxni tlan tsukulh talalin Jehová». Sara ni pekualh akxni titaxtulh taputsastalanit, makgxtakgli pusikulan niku xʼan chu tamunulh.

14. 1) ¿La tatalakxtumi akxni kaputsakan tiku kstalaninanin Cristo litaxtuputunkgo chu la skitinankan? 2) ¿Tuku kinkamakgpuwantiniyan 2 Timoteo 4:1, 2?

¹⁴ Maski tasiya pi niti katekgsaw tiku katsiputunkgo xalak Biblia, ni kataxlajwaniw chu chuntiya kakaputsaw umakgolh latamanin. Kalakapastakwi pi Jesús tamalakxtumilh uma taskujut la komo skitinankan. Skitinanin max talakaskin lhuwa hora naskujkgo chu nipara tantum skiti nachipakgo. Ankgalhin skujkgo katsisni o xʼitat tsisni chu lakgachunin makgat ankgo (Luc. 5:5). Nachuna makgapitsin xtatayananin Jehová lhuwa horas limaxtukgo xlakata nakaputsakgo latamanin chu kaniwa niku ankgo. Chuna tlawakgo xlakata tlan nakatekgskgo makgapitsi latamanin. Tiku chuna tlawakgo  min kilhtamaku katekgskgo latamanin tiku xlikana katsiputunkgo tuku xaxlikana. ¿Tlan nalichuwinanaw Dios hora chu kilhtamaku akxni max latamanin wilakgolh kxchikkan? (Kalikgalhtawakga 2 Timoteo 4:1, 2).

15. ¿Tuku xlakata talakaskin nalimasiyayaw takgalhkgalhin akxni namakgalhtawakgenanaw?

¹⁵ ¿Tuku xlakata talakaskin nalimasiyayaw takgalhkgalhin akxni namakgalhtawakgenanaw? Pulaktum tuku xlakata wa pi ni kajwatiya namakgtayayaw tiku makgalhtawakgemaw nalakgapasa chu napaxki tuku masiya Biblia. Nachuna talakaskin namasiyaniyaw nalakgapasa chu napaxki tiku Matsokgninalh, Jehová. Chu, nachuna ni kajwatiya namasiyaniyaw tuku kaskini Jesús kstalaninanin, wata na talakaskin namasiyaniyaw la xaxlikana kstalanina Cristo nalitaxtu. Talakaskin namakgtayayaw xlakata nalilatama xtastakyaw Biblia. Makgapitsi tiku kamakgalhtawakgekan lakapala lakgpalikgo tuku xlismanikgonit tlawakgo chu xtayatkan, pero makgapitsi ni chuna tlawakgo.

16. ¿Tuku kinkamasiyaniyan tuku titaxtulh Raúl?

¹⁶ Tuku titaxtulh chatum misionero anta kPerú kinkamasiyaniyan tuku tlan kitaxtu komo nalimasiyayaw takgalhkgalhin. Xla lichuwinalh: «Chatum tiku xlimakgalhtawakgakanit Biblia xwanikan Raúl, xlikgalhtawakganita maktiy libros. Pero chuntiya xkgalhi taʼakglhuwit kxlatamat. Xtamakgaxtokgat nitlan xwi, nitlan la xkgalhchuwinan chu xkamanan ni xmaxkikgo kakni. Pero komo ankgalhin xʼankgo ktamakxtumit chuntiya kkalakgapaxialhnalh. Liwaka akgtutu kata lata xaklakgapasnit chu makgatsilh tuku xtaskini xlakata tlan xtamunulh».

17. ¿Tuku nalichuwinanaw kʼatanu artículo?

¹⁷ Jesús kinkawanin pi kakaputsaw chu kakamakgtayaw «latamanin xliputum kachikinin xlakata [kstalaninanin] nawankgo». Xlakata nakgalhakgaxmataw uma limapakgsin, talakaskin makglhuwa nakatachuwinanaw latamanin tiku nichuna lakpuwankgo la akinin, nachuna tiku ni kgalhikgo xtakanajlakan chu ni kanajlakgo pi Dios xlikana lama. Kʼatanu artículo, nalichuwinanaw la tlan nakalitachuwinanaw tamakatsinin xla Tamapakgsin.