1-2. (a) Vwo nene iji ri Jesu rọhẹ Matiu 28:18-20, die yen ọdavwẹ rẹsosuọ rẹ ukoko rẹ Inenikristi? (b) Enọ vọ yen avwanre cha fuẹrẹn vwẹ uyono nana?

OMA vwerhen iyinkọn na mamọ ọke rẹ ayen vwo koko vwẹ enu rẹ ugbenu ọvo. Jesu ru ọrhuẹrẹphiyotọ nẹ ayen vwoma vwẹ etiyin, ọke ra vwọ rhọvwọn nushi nu. (Mat. 28:16) Ọ sa dianẹ ọke yena yen ọ vwọ “vwẹ oma phia kẹ imoni ri bunọ ujori iyori ẹsiẹvo.” (1 Kọr. 15:6) Diesorọ Jesu vwọ vuẹ idibo na nẹ ayen vwoma vwẹ etiyin? Rọ vwọ kẹ ayen iji nana: “Ovwan gba yanran, rere we re gbe idibo rẹ ihworakpọ na ejobi.”—Se Matiu 28:18-20.

² Idibo ri Jesu ri nyo eta rọyen ọke yena da rhe dia ẹbẹre ọvo rẹ ukoko rẹ Inenikristi rẹ ẹgbukpe ujorin rẹsosuọ. Ra vwọ chọn ihwo efa uko vwọ dia idibo ri Jesu yen ọdavwẹ rẹsosuọ rẹ ukoko yena. * Ukoko rẹ Inenikristi rẹ uyota buebun hẹ akpọeje nonẹna. Ọdavwẹ vuọvo yena yen ji rhe ayen. Vwevunrẹ uyono nana, avwanre cha fuẹrẹn enọ ẹne: Diesorọ iruo rẹ idibo egbe na vwọ ghanre mamọ? Die yen iruo rẹ idibo egbe na churobọ si? Inenikristi eje yen che vwobọ vwẹ iruo rẹ idibo egbe na? Diesorọ iruo rẹ idibo egbe na vwọ guọnọ erhiorin?

3. Vwo nene obo rehẹ Jọn 14:6 vẹ 17:3, diesorọ iruo rẹ idibo egbe na vwọ ghanre mamọ?

³ Diesorọ iruo rẹ idibo egbe na vwọ ghanre mamọ? Kidie idibo ri Jesu ọvo yen sa dia ugbeyan rẹ Ọghẹnẹ. Vwọba, ihwo ri nene Jesu yeren omamọ akpọ asaọkiephana, ayen ji vwo iphiẹrophiyọ rẹ arhọ ri bẹdẹ vwẹ obaro na. (Se Jọn 14:6; 17:3.) Vwọrẹ uyota, iruo rọ pha ghanghanre yen Jesu vwọ kẹ avwanre na, ẹkẹvuọvo, ọ dia avwanre ọvo yen ruiruo na-a. Ọyinkọn Pọl tare nẹ ọyen vẹ iniọvo evo re kẹrerẹ mamọ, “iruiruo rẹ Ọghẹnẹ.” (1 Kọr. 3:9) Ọnana uphẹn rode yen Jihova vẹ Jesu vwọ kẹ ihworakpọ ri jẹgba na.

4. Die yen avwanre se yono vwo nẹ udje rẹ Ivan vẹ Matilde?

⁴ Iruo rẹ idibo egbe na kẹ ohwo aghọghọ. Roro kpahen udje rẹ Ivan vẹ aye rọyen Matilde re dia Colombia. Ayen ghwoghwo ota kẹ eghene ọshare ọvo re se Davier rọ vuẹ ayen nẹ: “Me guọnọ ru ewene vwẹ akpeyeren mẹ, jẹ ọ bẹn kẹ vwẹ.” Davier ọyen ohwo ro djubi, ọ reyọ ihuvwun egangan, ọgbaudi, ọ vẹ ọsen rọyen re se Erika je dia. Ivan da ta: “Avwanre da vwẹ uyono ri Baibol vwo mu kẹ vwẹ ọko rọ dia, rọ pha shesheri. Idjighere kọyen avwanre djẹ inọke buebun vwẹ idjerhe re vọnre vẹ ibehre. Erika vwo noso nẹ akpeyeren rẹ Davier wene re, ọ da rhe vwomaba uyono na.” Ọke vwọ yan obaro, Davier de rhi siobọnu ihuvwun egangan, idiẹda, vẹ ubiedje. Kọ je rhe rọvwọn Erika. Matilde da ta: “Ọke rẹ Davier vẹ Erika vwo bromaphiyame vwẹ ukpe rẹ 2016, kẹ avwanre rhe karophiyọ eta rẹ Davier nẹ, ‘Me guọnọ ru ewene vwẹ akpeyeren mẹ, jẹ ọ bẹn kẹ vwẹ.’ Ameoviẹ rẹ aghọghọ de sun nẹ ẹro avwanre rhe.” Vwọrẹ uyota, a mrẹ vwo dje omavwerhovwẹn ra vwọ vwẹ ukẹcha kẹ ihwo vwọ dia idibo rẹ Kristi-i.

5. Die yen owọẹjẹ rẹsosuọ vwẹ iruo rẹ idibo egbe na?

⁵ Owọẹjẹ rẹsosuọ vwẹ iruo rẹ idibo egbe na, ọyen a vwọ “guọnọ” ihwo ri vwo ẹwẹn esiri. (Mat. 10:11) Siẹrẹ avwanre de ghwoghwo ota kẹ kohwo kohwo ra mrẹre, ọnana che djephia nẹ avwanre ghini Iseri ri Jihova. E de nene iji ri Jesu re vwo ghwoghwo kẹ ihwo, ọyen odjephia nẹ avwanre uvi rẹ Inenikristi.

6. Die yen avwanre se ru, rere ihwo vwo vwo omavwerhovwẹn kpahen ovuẹ na?

⁶ Ihwo evo vwo owenvwe rẹ ayen vwo yono uyota rehẹ Baibol na, jẹ, ọhọhọre nẹ ihwo buebun ghwe dje omavwerhovwẹn phia kpahọn ẹsosuọ-ọ. Ofori nẹ a chọn ihwo nana uko vwo vwo omavwerhovwẹn kpahen ovuẹ na. A guọnọ egbemuo rọ nabọ ghwotọ a sa vwọ vwẹ ukẹcha ro fori vwọphia. Sane iyovwinreta ri se si ihwo urhuru, rere wo ji muegbe rẹ oborẹ wọ cha vwọ tuon eta na phiyọ.

7. Mavọ yen wẹ vẹ ihwo efa sa vwọ tuon ota phiyọ, diesorọ ọ vwọ dia obo re ghanre a vwọ kerhọ, ji muọghọ kẹ ayen?

⁷ Kerẹ udje, wọ sa nọ ọrovwuwevwin na: “Biko me sa nọ wẹ onọ ọvo? Ihwo buebun vwẹ akpọ na nonẹna vwo ebẹnbẹn re họhọ e rẹ avwanre. Ẹkẹvuọvo, wo rori nẹ o vwo usuon ọvo ro se si ebẹnbẹn na no?” Gbe se Daniẹl 2:44, rere ovwan ta ota kpahọn. Yẹrẹ wọ sa nọ  ohwo ru wọ mrẹre na: “Die yen idjerhe ro me yovwin re se vwo yono emọ vwo vwo omamọ uruemu? Die wo rorori?” Gbe se Urhi Rivẹ 6:6, 7, rere ovwan ta ota kpahọn. Wọ da cha sane uyovwinrota rẹ wo che vwo ghwoghwo, roro kpahen ihwo ru wo che ghwoghwo ota kẹ. Vwẹ ẹro roro erere ro che te ayen obọ siẹrẹ ayen da riẹn oborẹ Baibol na ghini yono. Wẹ vẹ ayen da ta ota, muọghọ kẹ ayen, je nabọ kerhọ rayen. Ọnana cha nẹrhẹ wọ nabọ vwo ẹruọ rayen, kẹ ayen ji che vwo owenvwe rẹ ayen vwọ kerhọ wẹn.

8. Diesorọ orhivwinbrura vwọ guọnọ erhiorin?

⁸ Ọkievo, ọ guọnọ ẹgbaẹdavwọn vẹ ọke tavwen ohwo ke rhọnvwe nẹ ọyen che yono Baibol na. Diesorọ? Kidie a ghwa fobọ mrẹ ihwo evo vwẹ uwevwi-in. Vwọba, ihwo evo ke rhọnvwephiyọ uyono ri Baibol, ofori e vwo rhivwin bru ayen ra abọ buebun tavwen. Karophiyọ nẹ okakọn re ku ame kuẹ ọkieje yen sa riẹn djẹ. Ọtiọyen ọ jẹ hepha, a da vwẹ Baibol na vwo yono ohwo ọkieje, ẹguọnọ rẹ ohwo na kpahen Jihova vẹ Jesu kọ je cha ganphiyọ.

9-10. Diesorọ a vwọ tanẹ Inenikristi eje yen che vwobọ vwẹ iruo ra vwọ guọnọ ihwo ri vwo ẹwẹn esiri?

⁹ Inenikristi eje yen che vwobọ vwẹ iruo ra vwọ guọnọ ihwo ri vwo ẹwẹn esiri. A sa vwẹ iruo nana vwo dje owian ra vwọ guọnọ ọmọ ro ghwruru. Idjerhe vọ? Roro kpahen obo re phia kẹ ọmọshare rẹ ẹgbukpe erha ọvo rọ yan ghwru. Omarẹ ihwo 500 yen yanran ra guọnọ. Omarẹ inọke 20 vwọ wan nu, ọvo usun rayen da rhe mrẹ ọmọ na vwẹ udju rẹ eka. Ohwo rọ mrẹ ọmọ na rhọnvwere nẹ e jiri  ọye-en. Ọ da ta: “Avwanre eje yen wian kugbe vwọ guọnọ ọmọ na.”

¹⁰ Ihwo buebun họhọ ọmọ yena ro ghwruru na. Ayen guọnọ ukẹcha kidie ayen vwo iphiẹrophiyọ-ọ. (Ẹfe. 2:12) Avwanre otu re vrẹ oduduru ẹrenren yen vwobọ vwẹ iruo ra vwọ guọnọ ihwo nana. Ọ sa dianẹ wẹwẹ komobọ je rhe mrẹ ohwo rẹ wọ vwẹ Baibol yono-o. Ẹkẹvuọvo, ighwoghwota efa re je wian vwẹ ekogho vuọvo na sa mrẹ ohwo rọ guọnọ uyono ri Baibol. Siẹrẹ oniọvo ọvo da sa vwẹ ukẹcha kẹ ohwo ọvo vwọ dia Onenikristi, ihwo ejobi ri vwobọ vwẹ owian na yen oma vwerhan.

11. Ọ da tobọ dianẹ wo vwo ohwo ru wọ vwẹ Baibol yono-o, idjerhe efa vọ yen wo se vwo vwobọ vwẹ iruo rẹ idibo egbe na?

¹¹ Ọ da tobọ dianẹ wo vwo ohwo ru wọ vwẹ Baibol yono enẹna-a, wọ je sa vwẹ ukẹcha phia vwẹ iruo rẹ idibo egbe na vwẹ idjerhe efa. Kerẹ udje, wo se dede ihwo kpokpọ re rhe Ọguan Ruvie, je vwẹ ayen mu igbeyan. Ọnana cha nẹrhẹ ayen riẹn nẹ ẹguọnọ yen e vwo vughe avwanre kerẹ Inenikristi rẹ uyota. (Jọn 13:34, 35) Ẹkpahọnphiyọ krẹn rẹ wọ vwọ phia vwevunrẹ uyono, se yono ihwo kpokpọ oborẹ ayen sa vwọ ta obo rehẹ ẹwẹn rayen phia vwẹ idjerhe rẹ ọghọ. Wo ji se nene oghwoghwota kpokpọ wian kugbe vwẹ iruo rẹ aghwoghwo na, rere wọ vwẹ ukẹcha kẹ vwọ riẹn obo ra vwẹ Baibol na vwo yono ihwo. Wo de ru ọnana, jẹ wo yono nẹ ọ vwẹrokeri Kristi.—Luk 10:25-28.

12. A guọnọ ẹgba oghẹresan tavwen e ki se ruiruo rẹ idibo egbe na? Djekpahọn.

¹² E jẹ ohwo vuọvo roro nẹ a guọnọ ẹgba oghẹresan tavwen e ki se yono ihwo vwọ dia idibo ri Jesu-u. Diesorọ? Roro kpahen udje ri Faustina rọ dia Bolivia. Ẹsosuọ rọ vwọ vwomaba Iseri ri Jihova, ọ riẹn ọbe se-e. Enẹna, ọ riẹn se emerha re. O bromaphiyame re, oma je vwerhọn ro vwo yono ihwo efa. Ihwo iyorin yen ọ vwẹ Baibol yono kudughwrẹn kudughwrẹn. Dede nẹ Faustina riẹn ọbe se te ihwo buebun ro yono na-a, jẹ ọ vwẹ ukẹcha kẹ ihwo esan vwo bromaphiyame re.—Luk 10:21.

13. Ọ da tobọ dianẹ avwanre ghwa mrẹ ọke-e, erere vọ yen a sa mrẹ vwẹ iruo idibo egbe na?

¹³ Inenikristi buebun mrẹ ọke-e, fikirẹ iruo eghanghanre efa rẹ ayen ruẹ. Dedena, ayen je rhuẹrẹ ọke phiyọ vwo yono ihwo Baibol na, je mrẹ aghọghọ vwọ. Kerẹ udje, Melanie ọyen oniọvo aye rẹ ọyen ọvo vwẹrote ọmọtẹ rọyen ro te ẹgbukpe ẹrenren re vwẹ Alaska. O vwo owian ọkieje rọ wian, ọ ke je vwẹrote ọsẹ rọyen rọ muọga ri kansa.  Ọyen ọvo yen Oseri ri Jihova vwẹ orere rọyen jovwo. Ọkieje yen ọ vwọ nẹrhovwo vwọ kẹ ẹgba ro se vwo kpo aghwoghwo dede nẹ aruọke na muekpahen, kidie ọ guọnọ vwo ohwo rọ sa vwẹ Baibol yono. Ukuotọ rọyen, kọ rhe mrẹ Sara rẹ oma vwerhenre gangan ọke rọ vwọ riẹn nẹ Ọghẹnẹ vwo oderhi. Ọkievo vwọ wan nu, Sara de rhiabọreyọ uyono ri Baibol. Melanie da ta: “Dede nẹ oma ghwọrovwẹ vwẹ ovwọnvwọn ri Friday, jẹ mẹ vẹ ọmọtẹ mẹ ji re yono Sara, avwanre mrẹ erere nẹ uyono na rhe. Ọ kẹ avwanre aghọghọ ra vwọ hiẹ guọnọ ẹkpahọnphiyọ rẹ enọ ri Sara, oma vwerhen avwanre mamọ ọke rọ rhe vwọ dia ugbeyan ri Jihova.” Sara fiudugberi chirakon rẹ omukpahen, vrẹn nẹ ishọshi rọ hepha jovwo, o de rhi bromaphiyame.

14. (a) Mavọ yen iruo rẹ idibo egbe vwọ họhọ iruo re vwo hwe iyerin? (b) Die yen eta ri Pọl rehẹ 2 Timoti 4:1, 2 che mu we vwo ru?

¹⁴ Ọ da tobọ dianẹ wọ je sa rhe vwẹ ukẹcha kẹ ohwo vuọvo vwọ dia odibo-o, wo jẹ ofu dje we-e. Karophiyọ nẹ Jesu vwẹ iruo rẹ idibo egbe na vwo dje iruo re vwo hwe iyerin. Ihwiyerin sa ghwọrọ inọke buebun tavwen ayen ke sa mrẹ iyerin hwe. Ọke buebun, ayen wian ro ason yẹrẹ re te edegburhiọke, ọkievo, ayen se bi okọ kpo asan ri sheri. (Luk 5:5) Vwẹ idjerhe vuọvo na, ighwoghwota evo je ghwọrọ inọke buebun vẹ “erhiorin” vwo ghwoghwo vwẹ ọke vẹ asan sansan. Diesorọ? Ayen sa vwọ mrẹ ihwo. Ọke buebun, ighwoghwota re davwẹngba tiọyena  mrẹ ihwo ri vwo omavwerhovwẹn kpahen ovuẹ rẹ avwanre. Wo se ghwoghwo ota vwẹ ọke vẹ asan ra da sa mrẹ ihwo vwẹ ekogho wẹn?—Se 2 Timoti 4:1, 2.

15. Diesorọ a vwọ guọnọ erhiorin vwevunrẹ uyono ri Baibol?

¹⁵ Diesorọ a vwọ guọnọ erhiorin vwevunrẹ uyono ri Baibol? Ẹsosuọ, avwanre che ru vrẹ a de vwọ vwẹ ukẹcha kẹ ohwo re yono na vwọ riẹn iyono rehẹ Baibol na, ji vwo ẹguọnọ rayen. A je cha vwẹ ukẹcha kẹ vwọ riẹn, ji vwo ẹguọnọ ri Jihova rọ dia ohwo ro vwo Baibol na. E de yono ohwo na oborẹ Jesu guọnọ mie idibo rọyen nu, ofori nẹ a je vwẹ ukẹcha kẹ vwọ riẹn obo ro yeren akpọ wan kerẹ Onenikristi rẹ uyota. Ofori a vwọ vwẹ erhiorin vwọ chọn uko, rọ vwọ davwẹngba ro vwo ru nene odjekẹ ri Baibol na. Ọ reyọ ọke grongron tavwen ihwo evo ki wene iroro vẹ iruemu rayen. Efa reyọ ọke-e.

16. Die yen wo yono nẹ udje ri Raúl rhe?

¹⁶ Oborẹ imishọnare ọvo rọ dia Peru rhiẹromrẹ, dje erere rọ herọ e de vwo erhiorin. Ọ da ta: “Me vẹ Raúl yono ẹbe ivẹ re re, ẹkẹvuọvo o ji vwo ebẹnbẹn vwẹ akpeyeren rọyen. Orọnvwe rọyen vwo ebẹnbẹn, ọ harhan ekan, emọ rọyen ji muọghọ kẹ-ẹ. Dedena, jẹ ọ cha uyono ọkieje, ọtiọyena ke me kọn bro ra rere me vwọ vwẹ ukẹcha kẹ vẹ orua rọyen. Ọ vrẹ ẹgbukpe erha, vwo nẹ ọke me vwọ mrẹ re te ọke ro vwo muwan vwọ kẹ omaebrophiyame.”

17. Die yen a cha ta ota kpahen vwẹ uyono rọ cha na?

¹⁷ Jesu vuẹ avwanre nẹ a “yanran . . . re gbe idibo rẹ ihworakpọ na ejobi.” Re vwo ru iji nana gba mudiaphiyọ nẹ e che nene ihwo rẹ iroro rayen fẹnẹ ọ rẹ avwanre ta ota kugbe, tobọ te ihwo ri kpo ẹga vuọvo-o, yẹrẹ ri vwo imuẹro nẹ Ọghẹnẹ herọ-ọ. Uyono rọ vwọ kpahen ọnana che dje oborẹ avwanre se vwo ghwoghwo iyẹnrẹn esiri na kẹ ihwo tiọyena.