1, 2. a) Né ni ná Mateo 28:18-20, ¿gunáʼ nga dxiiñaʼ jma risaca bisaana Jesús guni ca xpinni? b) ¿Gunáʼ nga ca pregunta chiguicábinu lu artículo riʼ?

BIASA si Jesús de lade gueʼtuʼ, gunábabe ca apóstol stibe gúʼyabe laacaʼ lu ti dani nuu Galilea. Guizáʼ nayecheʼ biʼniʼ sentir ca discípulo que ora yendacaʼ lugar que (Mat. 28:16). Zándaca biaje riʼ nga «uyé be ra nuu jma de gaayu gayuaa hermanu tobi si lugar» (1 Cor. 15:6). ¿Xiñee bidagulisaané Jesús laacabe yaʼ? Para gudiibe laacaʼ ti dxiiñaʼ guizáʼ galán. Sicaríʼ gúdxibe laacaʼ: «Laché ne lagacané binni de guiráʼ guidxi gaca discípulo stinneʼ» (biindaʼ Mateo 28:18-20, TNM).

² Ca binni ni binadiaga ca diidxaʼ guníʼ Jesús beeda gácacaʼ parte de congregación ni guyuu lu primé siglu. Dxiiñaʼ ni jma bisaca para laacabe nga gacanécabe xcaadxi gaca discípulo stiʼ Cristu. * Tiempu riʼ maʼ nuu stale mil de congregación lu guidubi naca Guidxilayú. Ne dede yanna cayacanenu binni gaca discípulo stiʼ Cristu. Lu artículo riʼ chiguicábinu tapa pregunta: ¿Xiñee nabé risaca gacanenu binni gaca discípulo stiʼ Cristu? ¿Xi guiráʼ raca lu dxiiñaʼ riʼ? ¿Ñee racané guiráʼ ca xpinni Cristu para gaca dxiiñaʼ riʼ la? Ne ¿xiñee naquiiñeʼ gápanu paciencia ora maʼ cayúninu dxiiñaʼ riʼ?

3. Né ni ná Juan 14:6 ne 17:3, ¿xiñee nabé risaca gacanenu binni gaca discípulo stiʼ Cristu?

³ ¿Xiñee nabé risaca gacanenu binni gaca discípulo stiʼ Cristu yaʼ? Purtiʼ ca ni runi si ni bisiidiʼ Cristu nga zanda gaca xhamigu Dios, nabánicaʼ galán ne nánnacaʼ zanda gápacaʼ ti guendanabani ni qué zaluxe (biindaʼ Juan 14:6; 17:3). Dxandíʼ nga bidii Jesús laanu ti dxiiñaʼ nabé risaca, peru cadi stúbinu cayúninu ni. Guníʼ apóstol Pablo laa ne xcaadxi xpinni Cristu tobi si runinecaʼ Dios dxiiñaʼ (1 Cor. 3:9). Neca binni ruchee laanu, maʼ bidii Jiobá ne Jesús laanu ti dxiiñaʼ nabé risaca.

4. ¿Xi rusiidiʼ ni bizaaca Iván ne Matilde laanu?

⁴ Guizáʼ nayecheʼ runi sentirnu ora racanenu binni gaca discípulo stiʼ Cristu. Guidúʼyanu ni bizaaca Iván ne Matilde, ti guendaxheelaʼ de Colombia. Biʼniʼ predicárcabe ti joven láʼ Davier, ne laa gudxi laacabe: «Guizáʼ ñuuladxeʼ nuchaaʼ caadxi cosa lu xquendanabaneʼ, peru qué ganda diʼ guneʼ ni». Guca Davier ti boxeador profesional ne nabé guca drogar ne guizáʼ guxudxi. Ne laaca nabezanésibe Érika, xnoviabe. Iván guníʼ: «Guyuudu yegánnadu laacabe neca zitu guidxihuiiniʼ ra nabézacabe. Gupa xidé biʼniʼ viajardu stale hora lu bicicleta ne gudídidu neza ra daʼ beñe. Ora biʼyaʼ Érika pabiáʼ cuchaa Davier, laaca bizulú biindaʼ Biblia». Ne ra gudiʼdiʼ tiempu bisaana Davier de gaca drogar, maʼ qué nixudxi, maʼ qué niguite box ne bichaganáʼ xnovia. Matilde guníʼ: «Lu iza 2016, dxi guyuunisa Davier ne Érika, bietenaláʼdxidu ca diidxaʼ guníʼ Davier: “Guizáʼ ñuuladxeʼ nuchaaʼ caadxi cosa lu xquendanabaneʼ, peru qué ganda diʼ guneʼ ni”. Guizáʼ bidúʼnadu». Ejemplu riʼ rusihuinni guizáʼ nayecheʼ runi sentirnu ora racanenu binni gaca discípulo stiʼ Cristu.

5. ¿Gunáʼ nga primé cosa ni naquiiñeʼ gúninu para gacanenu binni gaca discípulo stiʼ Cristu?

⁵ Primé cosa ni naquiiñeʼ gúninu nga guyúbinu ca ni racalaʼdxiʼ guni ni ná Jiobá (Mat. 10:11). Rusihuínninu dxandíʼ testigu stiʼ Jiobá laanu ora rúninu stipa pur guinínenu guiráʼ binni ne ora rinándanu mandatu bisaana Jesús de guni predicarnu.

6. ¿Xi zacané laanu cueendunu ni galán lu predicación?

⁶ Nuu binni racalaʼdxiʼ guiziidiʼ ni zeeda lu Biblia. Peru nuu xcaadxi ora rigánnanu laacaʼ ruluíʼ qué riuuláʼdxicaʼ guiziidicaʼ, ne zándaca naquiiñeʼ guyúbinu modo chuuláʼdxicabe guiziidicabe. Naquiiñeʼ gánnanu xi guininu para cueendunu ni galán lu predicación. Guyúbinu tema ni chuulaʼdxiʼ binni ne guiníʼ íquenu ximodo gusiénenu ni laacaʼ.

7. a) ¿Ximodo zanda guzulú guinínenu binni? b) ¿Xiñee nabé risaca gucaadiaga chaahuinu binni ne guni respetarnu ni gábicabe laanu?

⁷ Zanda guininu sicaríʼ: «Ñuuladxeʼ ñannaʼ xi riníʼ íqueluʼ de tema riʼ. Ratiica si nuunu nabé rápanu guendanagana ca dxi nabáninu riʼ. ¿Ñee rábiluʼ caquiiñeʼ ti gobiernu ni guni mandar lu guidubi guidxilayú riʼ para gaca chaahuiʼ ca guendanagana ca la?». Despué zanda guidúʼndanenu laacabe Daniel 2:44 ne gusiénenu ni. O laaca zanda guininu: «Ñuuladxeʼ ninabadiidxaʼ lii, ¿xi zanda guni binni para guzuubaʼ ca xiiñiʼ diidxaʼ?». De racá zanda guidúʼndanu Deuteronomio 6:6, 7.  Intiica si tema iquiiñenu, naquiiñeʼ guiníʼ íquenu ca binni ni chiguinínenu. Guxuíʼlunu xi zabeendúcabe pa guiziidicabe ni rusiidiʼ Biblia. Ne ora guinínenu laacabe, guizáʼ risaca gucaadiaga chaahuinu laacabe ne guni respetarnu ni gábicabe laanu. Pa gúninu zacá la? ziénenu laacabe ne zucaadiágacabe laanu.

8. ¿Xiñee cadi naquiiñeʼ guireʼnu gana ora gúninu revisita?

⁸ Ante gabi tuuxa laanu napa gana guidúʼndanenu laa Biblia la? zándaca naquiiñeʼ cueenu stale tiempu o gúninu stipa para chigánnanu laa stale biaje. ¿Xiñee yaʼ? Purtiʼ zándaca qué guínnibe ra lídxibe ora chigánnanu laabe o que zanda guni tenderbe laanu. Ne zándaca naquiiñeʼ chigánnanu laabe stale biaje para gápabe confianza laanu ne cuibe guidúʼndanenu laabe. Naquiiñeʼ guietenaláʼdxinu jma nagueenda zaroobaʼ ti yaga pa qué gusaana de guzeʼnu ni. Zacaca zannaxhii tuuxa Jiobá ne Cristu jma pa qué gusaana de guinínenu laa de Stiidxaʼ Dios.

9, 10. ¿Xiñee rininu racanélisaa guiráʼ ca xpinni Cristu para guidxela binni ni dxandíʼ racalaʼdxiʼ guiziidiʼ?

⁹ Guiráʼ ca xpinni Cristu ni runi predicar racanélisaanu para guidxélanu binni ni dxandíʼ racalaʼdxiʼ guiziidiʼ de Jiobá. Zanda guchaaganu dxiiñaʼ riʼ casi ora cuyúbicabe ti xcuidihuiiniʼ ni biniti. ¿Ximodo nga yaʼ? Guzéʼtenu ni bizaaca dxi biniti ti xcuidihuiiniʼ de chonna iza. Para gunda bidxélacabe laabe la? gucané biaʼ gaayuʼ gayuaa binni. Ne despué de gande hora de binítibe, bidxela tobi de ca binni que laabe lu ti layú lade guela. Peru qué ninádibe nusisaca binni laabe pur bidxélabe  xcuidihuiiniʼ que, sínuque guniʼbe: «Gunda bidxéladu laabe pur stipa biʼniʼ de guiráʼ».

¹⁰ Stale binni cananiti cásica xcuidihuiiniʼ ni bizéʼtenu riʼ. Qué gápacabe nin ti esperanza peru racaláʼdxicabe gacané tuuxa laacabe (Efes. 2:12). Jma de xhono millón de testigu stiʼ Jiobá canayubi binni ni racalaʼdxiʼ guiziidiʼ. Zándaca qué guidxélaluʼ binni ni gúʼndaneluʼ Biblia lu territorio stiluʼ, peru ora ridxela ti hermanu tuuxa ne gueeda gaca discípulo stiʼ Cristu la? de guiranu nápanu razón para guiéchenu.

11. Neca qué gápanu nin ti estudiu, ¿xi zanda gúninu para gacanenu binni gaca discípulo stiʼ Cristu?

¹¹ Neca qué gápanu nin ti estudiu, zanda gúninu xcaadxi cosa para gacanenu gaca binni discípulo stiʼ Cristu. Guzéʼtenu ti ejemplu. Primé biaje cheʼ tuuxa ra Yoo stiʼ Reinu, gudíʼnanu laa ne guidxaagalunu laa galán. Pa gúninu zacá la? zusihuínninu guendarannaxhii ne zacanenu laabe gudiibe cuenta dxandíʼ xpinni Cristu laanu (Juan 13:34, 35). Ne ora runi comentarnu ra reunión, neca nachucu ni, rusíʼdinu laabe ximodo guiniʼbe de ni runi crebe sin guituílube ne gúnibe ni né respetu. Laaca zanda guni predicarnenu ti publicador nacubi ne gacanenu laa guiziidiʼ iquiiñeʼ Biblia para gusiene xiixa zeeda luni. Ora rúninu ca ni maʼ bizéʼtenu riʼ la? rusíʼdinu laabe chinándabe ejemplu stiʼ Cristu (Luc. 10:25-28).

12. ¿Ñee caquiiñeʼ gápanu stale habilidad galán para gacanenu binni gaca discípulo stiʼ Jesús la? Bizeeteʼ ti ejemplu.

¹² Cadi caquiiñeʼ diʼ guiníʼ íquenu napa xidé gápanu stale habilidad galán para gacanenu binni gaca discípulo stiʼ Cristu. Ejemplu stiʼ Faustina ni nabeza Bolivia zacané laanu guiénenu xiñee. Dxi binibiaʼbe ca testigu stiʼ Jiobá, qué gánnabe gúʼndabe, peru chaahuidugá biziidibe. Yanna maʼ guyuunísabe, ne guizáʼ riuuláʼdxibe gusiidibe binni ni rusiidiʼ Biblia. Ruundanebe gaayuʼ binni guiráʼ semana. Neca huaxiéʼ nanna Faustina guʼndaʼ, maʼ gucané xhoopaʼ binni chúʼnisa (Luc. 10:21).

13. Neca nabé nuu xhiiñanu, ¿xi ndaayaʼ zacaanu pa gacanenu binni gaca discípulo stiʼ Cristu?

¹³ Stale xpinni Cristu napa stale dxiiñaʼ ndaaniʼ xquidxi Dios ne pur laani nabé nuu xhiiñacaʼ. Neca zacá, ribeecaʼ tiempu para guni estudiarnecaʼ binni, ti dxiiñaʼ ni nabé rusiecheʼ laacaʼ. Guidúʼyanu ni bizaaca Melanie. Stúbisibe cusiniisibe ti dxaapahuiiniʼ de xhono iza. Laaca rúnibe dxiiñaʼ guidubi dxi ne gúpabe bixhózebe purtiʼ gupa cáncer. Nabézabe ndaaniʼ ti  guidxihuiiniʼ nuu Alaska, ti lugar nuu zitu, ne laasibe nácabe Testigu raqué. Stale biaje gunábabe Jiobá gudii laabe stipa para ganda guni predicarbe neca guizáʼ nananda ra nabézabe, purtiʼ racaláʼdxibe guidxélabe tuuxa para gusiidibe laa ni ná Biblia. Dede ra bidxélabe ti gunaa láʼ Sara, ni guizáʼ biecheʼ ora gunna napa Dios láʼ. Ne ra gudiʼdiʼ tiempu gudxi gunaa riʼ laabe guni estudiárnebe laa. Melanie guníʼ: «Ca viernes huadxí ca guizáʼ maʼ bidxagaʼ. Peru naa ne xiiñeʼ runi estudiárnedu laabe Biblia, ne gucaneni laadu stale. Guizáʼ riuuláʼdxidu guyúbidu información para guicábidu ca pregunta runi Sara laadu, ne guizáʼ riéchedu gúʼyadu cayaca xhamígube Jiobá». Nabé bicaalúcabe Sara peru guca nadxibalú, maʼ qué ñé yuʼduʼ ra rié ne guyuunisa.

14. a) ¿Xiñee zanda guininu zeeda gaca dxiiñaʼ riʼ casi ora rié tuuxa guuzeʼ benda? b) ¿Xi rucaa ca diidxaʼ zeeda lu 2 Timoteo 4:1, 2 laanu gúninu?

¹⁴ Pa caʼruʼ guidxélanu tuuxa ni racalaʼdxiʼ guiziidiʼ de Jiobá ne gaca discípulo stiʼ Cristu la? cadi guireʼnu gana. Cadi guiaandaʼ laanu bichaaga Jesús dxiiñaʼ riʼ casi ora rié binni guuzeʼ benda. Nuu biaje stale hora riuu ca pescador ca lu nisadóʼ ne qué rinaazecaʼ nin ti benda. Ne zándaca rúnicabe dxiiñaʼ huaxhinni o nacanda ne laaca naquiiñeʼ chécabe zitu lu nisadóʼ (Luc. 5:5). Zacaca nga runi ca Testigu, casi xa ora ñecaʼ «guuzeʼ benda», ruyúbicaʼ binni né stale paciencia, stale hora ne gadxé gadxé lugar. Rúnicabe ni para guidxélacabe jma binni. Ca ni runi ni  maʼ bizéʼtenu riʼ randa riníʼnecaʼ binni ni riuulaʼdxiʼ guiziidiʼ. ¿Ñee zanda guni predicarnu ti dxi o ti lugar ra nánnanu zadxélanu binni la? (Biindaʼ 2 Timoteo 4:1, 2).

15. ¿Xiñee caquiiñeʼ gápanu paciencia ora runi estudiárnenu binni?

¹⁵ ¿Xiñee caquiiñeʼ gápanu paciencia ora runi estudiárnenu binni? Tobi de ca razón ca nga purtiʼ cadi chigacanésinu laabe guiziidibe ne gannaxhiibe ni rusiidiʼ Biblia, sínuque laaca naquiiñeʼ gacanenu laabe gunibiaʼbe ne gannaxhiibe Jiobá, ni guníʼ xi guicá lu Biblia. Ne cadi naquiiñeʼ si gusíʼdinu laabe xi canabaʼ Jesús ca discípulo stiʼ guni, laaca naquiiñeʼ gacanenu laabe gánnabe ximodo gusihuínnibe dxandíʼ nácabe xpinni Cristu. Laaca naquiiñeʼ chuʼnu gaxha de laabe ora gaca nagana para laabe chinándabe ca principiu zeeda lu Biblia. Nuu estudiante randa ruchaa modo riníʼ ique ne ca ni maʼ biaa guni lu chupa chonna si beeu, peru nuu xcaadxi caquiiñecaʼ jma tiempu para guchaacaʼ.

16. ¿Xi rizíʼdinu de ni bizaaca Raúl?

¹⁶ Ni bizaaca ti misioneru ndaaniʼ guidxi Perú rusihuinni xiñee nabé risaca gápanu paciencia. Laabe guniʼbe: «Neca maʼ biindanécabe ti hombre láʼ Raúl chupa libru la? caquiiñeruʼ guchaabe xcaadxi cosa lu xquendanabánibe. Nápabe guendanagana lu xquendaxheelabe, nabé riniʼbe diidxaʼ guidxa ne qué runi respetar ca xiiñibe laabe. Peru cumu gatigá riebe reunión la? qué nusaanaʼ de nigannaʼ laabe ne familia stibe. Jma de chonna iza despué de binebiaʼyaʼ laabe gunda guyuunísabe».

17. ¿Xi chiguidúʼyanu lu sti artículo ca?

¹⁷ Gudxi Jesús laanu gusíʼdinu binni de guiráʼ guidxi gaca discípulo stiʼ. Ne para ganda gúninu dxiiñaʼ riʼ, naquiiñeʼ guinínenu binni ni qué riníʼ ique modo riníʼ íquenu, ni qué gapa religión o ca ni qué runi cré pa nuu Dios. Lu sti artículo ca chiguidúʼyanu ximodo guinínenu laacabe de ca noticia galán stiʼ Reinu stiʼ Dios.