1-2. (a) Ringbisihe kuti gu ga Yesu zinahe du rogo Matayo 28:18-20, gini bangua pa sunge nga ga agu adungurati nga ga aKristano? (b) Gini asanahe ani nika sakapai tipaha rogo gi kekeapai re?

FUO zinga Yesu be kpio, ko amangi mbakadapai tipa gako abawiriki gbiako rii bagangara Gariraya yo. Ho abawiriki adunguratiyo ni ku rogo gu ba re, i aima rengba kadu na bakere maabangirise tipa agu apai nika manga. (Mt. 28:16) Isoke si rengbe kadu nga ti gu regbo re du ko ‘ayugu tiko fu agu awirina nasusi 500.’ (1 Kor. 15:6) Tipagine Yesu ayambu gako abawiriki ti ni i gbiako yo? Ko ayambu yo tipa kafu gu wene zinahe fuyo nga: “Oni ndú tie, ki sa arikaaboro dunduko ni abawiriki.”​—Oni gedi Matayo 28:18-20.

² Agu abawiriki nagi agi afugo Yesu re ada ni papara gu dungurati nga ga aKristano naadu rogo bambata sa kama agarã. Gu bangua pa sunge nangia ga gu dungurati re angia ka sa dungu aboro ni ga Yesu abawiriki. * Areme, badungu adungurati duho nga ga ndikidi aKristano rogo zegino dunduko, na ga agu adungurati re bangua pa sunge nga ka sa aboro ni abawiriki a. Rogo gi kekeapai re, ani nika sakapai tipa asanahe biama: Tipagine du sunge sa aboro ni abawiriki ti ni na nyanyakipaha? Gini apai si akodaha? Ya mo aKristano dunduko si aida i mangi sunge sa aboro ni abawiriki? Na tipagine si aida hipai ti ni tipa ka manga gi sunge re?

3. Ringbisihe kuti Yoane 14:6 na 17:3, tipagine du sunge sa aboro ni abawiriki ti ni na nyanyakipaha?

³ Tipagine du sunge sa aboro ni abawiriki ti ni na nyanyakipaha? Bambiko kina ga Kristo abawiriki sa rengbe kadu ni abakurea Mbori. Kurigure, agu aboro napekafuo Yesu naraka wene raka awere na i na maabangirise tipa ka raka nyeanye kindi kumbatayo. (Oni gedi Yoane 14:6; 17:3.) Nirengo, Yesu ima fu nyanyakipa sunge furani, ono ani amanganga gi sunge re ni sarani te. Gu mokedi nangia Pauro akepai tipa tiko gbiati gu kura aboro ko anaakoda tiko na yo ki ya: “Ani nga ga Mbori abadiasunge.” (1 Kor. 3:9) Nirengo, bakere pa mamu du aYekova na Yesu nafuhe fu kpakpa aboro re!

4. Ginipai rengbe ani ka wirikaha ti gu kpiapai nga ga Ivan na Matilde?

⁴ Sunge sa aboro ni abawiriki ima rengba ka ye na bakere ngbarago furani. Oni berẽnga pa gu kpiapai nga ga Ivan na diako nga Matilde, du Colombia yo. I atungusipai fu kura paranga kumba sa rimo ko angia Davier, nga guko nagumba gupai fuyo nga: “Mi nakpinyemu ka manga ariapai rogo gimi raka, ono gene wa ka mi mangihe te.” Davier angia bata kpata, ko anaadia kere angua kutii kpotoko yo ni bakerehe, na kini raki na gu dee ko aadianga ri adia ya rimori angia, Erika. Ivan aya: “Ani atona wisigo Ziazia Kekeapai na ko. Na gu gbaria ko aaraka rogoho aima turõ, ani anaasi ngbagida koyo tipa dungu asaa rogo dogoro. Fuo Erika bi ariapai ti ga Davier mangaapai na gako berãpai, ri kini tona wisigo Ziazia Kekeapai.” Fuo bete regbo kusa, Davier ambu mangasunge na kere angua, kpibuda, gbiati takpata. Na ko ki mangi rogatise na Erika. Matilde aya: “Ho aDavier na Erika azi bapatiza ni rogo 2016, ani atingidi gu fugo Davier anaagumbaha dedede nga, ‘Mi nakpinyemu ka manga ariapai rogo gimi raka, ono gene wa ka mi mangihe te.’ Ani adu na bakere ngbarago si ki sa gupai nga ani kpari ni aume.” Zanga kapa, ani nadu na bakere ngbarago ho ani aundo aboro ni i da ni ga Kristo abawiriki.

5. Gini bambatapai si aida ani mangihe tipa ka sa aboro ni abawiriki?

⁵ Gu bambatapai si aida ani mangihe ka sa aboro ni abawiriki nga ka “gbáta” agu aboro du na ruru ngbaduyo yo. (Mt. 10:11) Ono si naida ani mangi nyanyaki asadatise tipa ka gbia yo na ki tungusipai fuyo. Ani nayugo gupai nga ani nzunzu nga aDezire Yekova ni tungusa ani pai fu ai gu boro ani agbia ni. Ani nayugo gupai nga ani nzunzu nga ndikidi aKristano ni manga ani pai kuti gu ga Yesu zinahe du tipa tungusapai.

6. Ginipai rengbe ka undo rani ani du na diabese gene tungusapai yo?

⁶ Gu kura aboro kinaho du na bakere nyemu ka wirika agu arengo du rogo Ziazia Kekeapai yo, ono badungu agu aboro ani agbiayo rengbe kaa ngera ti tonatonaha wa ka i ya i na nyemu gupai re te. Ani ima rengba ka ngarasa yo tipa i wiriki dungu apai. Tipa kadu na diabese gene tungusapai yo, si naida ani mbakaditirani wenengai. Si naida mo sia gu riiapai rengbe ka ba nyemupai ti agu aboro mo agbiayo. Na mo ki mbakadi tiro tipa wai mo nika tona fugo tipa ai riipai.

7. Waigu rengbe mo ka tona fugo na boro, na tipagine duhe ti ni ni nyanyakipa pai ka degaturo na ka yugo irisa?

⁷ Ni kpiapai, mo ima rengba ka sana irakporo nga: “Ya mo mi rengbe ka ino gamo berãpai tipa gipai re? Badungu agu akpakarapai ani agbiatirani areme na ni namanga aboro rogo zegino dunduko. Ya mo mo naberã gupai nga gu zogarago nga ga zegino rengbe ka dia agu akpakarapai namanga rogo zegino  dunduko kusayo?” Fuo gure, mo ima rengba ka saka Daniere 2:44 na ni. Watadu mo rengbe ka ya fu boro wẽ: “Gini wene gene duho tipa ka yugopai fu agude i du na wene mangaapai? Mi nakpinyemu ka ino gamo berãpai.” Na fuo gure, mo ki saki Pa Fu Rugute ni Ue he 6:6, 7 na ni. Singia gini riipai mo asiaha tipa ka sakapai tipaha, mo berẽpa agu aboro nika gia gupai mo apehe. Mo berẽpa wai si narengbe ka undo yo i wiriki agu apai Ziazia Kekeapai ayugoho. Ho mo afura ni na yo, si ni nyanyakipa pai tipa mo degeturo kuti gupai i apehe na kidu na irisa tipa gayo bipai. Ngba gi gene re, mo nika rugatiro na yo wenengai, na si ima rengba ka sa gupai nga i degetuyo foro.

8. Tipagine si aida ani naakaraga tirani akaraga ti ni kindi fuo aboro?

⁸ Mbata fu boro diberã tipa ka wirika Ziazia Kekeapai, si naida mo di regbo adia na ki mangi ome tipa kaa karagatiro fuoni. Tipagine? Bambiko aboro arengbanga kadu tiikporo ti gu regbo ani nakaraga tirani berewe fuoyo te. Na berewe a, si ima rengba kadu nga si naida mo karagatiro akaraga bara dunguhe mbata fu irakporo idi ka wirika Ziazia Kekeapai na mo. Oni tingidi gupai nga, ngua rengbe ka sona kina gu ka i aatudaha dedede. Teketeke a, gu nyemuse nga ga gu boro du na nyemupai tipa aYekova na Yesu rengbe ka sona kina gu ka ani asaka Fugo Mbori na ni dedede.

9-10. Tipagine rengbe ani ka ya ti ni wẽ ai gu Kristano nga bamangisunge fu Mbori namanga gu sunge nga ga gbata agu aboro du na ruru ngbaduyo yo?

⁹ Ai gu Kristano nga bamangisunge fu Mbori si aida ni undo ka gbia agu aboro du na ruru ngbaduyo yo. Ani rengbe ka ringbisa gi sunge re kuti agu aboro nagbata gu gude ingi. Ngba gini gene? Mo berẽnga pa gupai namangi kura tooni gude sa garãko adu nga biata nga guko naingi. Aboro bangeyo aima mbeda kuti 500 naagbata ko. Ni yangaraha, fuo susa asa wa 20 fuo inga gu gude re, gu kura boro abi ru ati  ngbaya yo. Gu boro naabi gu gude re aaidanga aboro fu tambuahe fu ni mbiko ni bi ru te. Ni aya, “I bi gu gude re mbiko aboro dunduko mangipai wa sa tipa ka bi ru.”

¹⁰ Badungu aboro wakina gu gude naingi re. I na maabangirise te, ono i naida undo. (Ef. 2:12) Aboro naima susa amirioni muambe namanga asadatise tipa ka gbia gi ingiingi aboro re. Si ima rengba kadu nga mo arengbanga ka bi boro nga guni naida ka wirika Ziazia Kekeapai na mo te. Oni tie, gu kura abatungusipai natungusapai kina rogo gu bangisa dagbarago re ima rengba ka bi boro nga guni naida ka wirika gu rengo du rogo Fugo Mbori yo. Ho wirina agbia boro ni ni kini da ni ga Kristo bawiriki, agu aboro dunduko naaundo ka gbia gu boro re na wene ndupai beyo kadu na ngbarago.

11. Ka si vura du vurũ nga mo awisigongo Ziazia Kekeapai na boro awere te, gini agene rengbe mo ka undo ka sa aboro ni abawiriki ngbaha?

¹¹ Ka si vura du vurũ nga mo awisigongo Ziazia Kekeapai na boro awere te, mo ima rengba ka manga sunge sa aboro ni abawiriki ngba kura gene. Ni kpiapai, mo ima rengba ka dia gu vovo aboro naye ku Bambu Kindo yo kugume na ki sayo ni abakureamo. Ka mo yugu nyemuse ngba gi gene re, mo ima rengba ka undo agu aboro re i bi gupai nga nyemuse nayugo rani ni ndikidi aKristano. (Yo. 13:34, 35) Ka mo vura fu kina wiri guru karagapai, gure nga mo nayugopai fu vovo aboro tipa i naafura tipa gayo idapase. Mo ima rengba a ka ndu na vovo batungusipai gene tungusapai yo na ki undo ni ni mangisunge na Ziazia Kekeapai tipa ka yugopai fu aboro. Ka mo mangihe wo, gure nga mo nayugopai funi ni wiriki Kristo.​—Rk. 10:25-28.

12. Ya mo si naida kparakpara tandu mangaapai aida berani tipa ka sa aboro ni abawiriki? Oni sakingo rogoyo.

¹² Boro ho dagbarani yo si aida ni berẽ gupai nga si naida kparakpara tandu mangaapai aida tipa ka sa aboro ni abawiriki te. Tipagine? Ani bingo gu kpiapai nga ga Faustina, nga guri naraka Bolivia yo. Ho ri atona koda tiri ni na aDezire Yekova ti tonatonaha, ri anaagedanga pai te. Ono awere, ri ima wirika wai kaa gedapai tooni. Ri ima zio bapatiza awere, na ri ima du na nyemu kaa yugopai fu aboro. Dedede, ri naawisigo Ziazia Kekeapai na aboro bisue rogo aposo dunduko. Wa vura duhe nga Faustina arengbanga ka gedapai wenengai wa gari abawisigi Ziazia Kekeapai te, ri ima undo aboro sita i zi bapatiza.​—Rk. 10:21.

13. Ka si vura du nga ani na badungu apai tirani, gini aundo rengbe ani ka gbiaha ho ani asa aboro ni ni abawiriki?

¹³ Badungu aKristano du na dungu nyanyakipa apai tiyo i amangaha. Wa vura duhe wo, i nadia regbo adia kaa wisigo Ziazia Kekeapai na aboro, na i nagbia bakere ngbarago ti mangayo ho wo. Ni kpiapai, wirina du rimori nga Melanie nga guri naraki Alaska yo na wiiri garãri adu nga muambe adu ni gu vungugude adunga kumba beni ya. Ri anaamangasunge amanga a  na kini ngerefuo ba ri naadu na kansa tiko. Melanie nangia yangara Dezire Yekova rogo gu tooni gbata ri adu rogoho. Ri anaakparakpee dedede tipa ome ka ndu gene tungusapai yo si ki vura du vurũ nga rago adu ni kere ba zezerehe bambiko ri aaida nzunzu ka gbia gu boro ka ri awisigo Ziazia Kekeapai na ni. Niyangaraha, ri agbia Sara, nga guri naadu na bakere ngbarago ka wirika gupai nga rimo Mbori kina ti ni. Fuo bete regbo kusa, Sara aidi ka tona wisigo Ziazia Kekeapai. Melanie aya: “ARago Bisue nyemu, mi anaambu ni kerehe, ono ani anaandu kindi na wire kaa wisigo Ziazia Kekeapai na ri na ani dunduko naaima gbia undo. Ani anaagbia ngbarago ti manga wetekapai ka gbia akaragapai kuti ga Sara asanahe, na ani adu na bakere ngbarago ka bi ri ri nada ni bakurea Yekova.” Sara ahi arungosiro ni ngarã, ki mbu gu kanisa ri adu rogoho, na ki zi bapatiza.

14. (a) Waigu du agu aboro namanga sunge sa aboro ni abawiriki wakina abaziatĩo? (b) Gini sangbanapai du agu afugo Pauro du rogo 2 Timoteo 4:1, 2 na ni kuriro?

¹⁴ Ka si vura du vurũ nga mo ata bingo gu boro naida kada ni bawiriki te, mo niigbata ni kindi. Yesu aya agu aboro namangasunge sa aboro ni abawiriki wakina abaziatĩo. Abaziatĩo ima rengba ka dia badungu asa i kini ru ka zio atĩo. Ti kura aregbo, i namangasunge bebere yuru watadu ngbatutu wiso, na ti kura aregbo, si naida i ndu andu tuturũ. (Rk. 5:5) Wakina gure a, gu kura abatungusipai natungusapai tipa dungu asa kini hipai ti aregbo ni bakiakia na rogo aba ni bakiakia a. Tipagine i amangaha ti ni wo? Tipa wa ka i gbia dungu aboro. Agu aboro namangasunge nyanyaki ngba gi gene re nagbia mosoro agbia bambiko i nagbia agu  aboro agbia du na nyemu gu pangbanga ani atungusaha. Ya mo ka mo asadi ka tungusapai ti gu regbo rengbe mo ka gbia aboro agbia ti ni watadu rogo agu aba mo naima rengba ka biyo rogoho?​—Oni gedi 2 Timoteo 4:1, 2.

15. Tipagine si aida ani du ti ni na hipai ho ani awisigo Ziazia Kekeapai ni na aboro?

¹⁵ Tipagine wisigo Ziazia Kekeapai na aboro aida hipai ti ni? Bambata ndupai nga ani naida ka undo bawiriki Ziazia Kekeapai ni wiriki Ziazia Kekeapai na ki kpinyemu agu apai si ayugoho. Na berewe a, si naida ani undo bawiriki Ziazia Kekeapai ni ini gupai nga baenge ke Ziazia Kekeapai nga Yekova na kini kpinyemu ko. Na kupati gu nga ka yugopai fu bawiriki Ziazia Kekeapai tipa gupai si aidaha tipa kadu ni ga Yesu bawiriki, si naida ani undo ni aundo ni ini wai ka raka ni ndikidi Kristano. Si naida ani undo ni wa ni amanga asadatise ka mangapai kuti gu bangua arengo nga ga Ziazia Kekeapai. Gu kura abawiriki Ziazia Kekeapai ima rengba ka manga ariapai ti gayo aberã na mangaapai vuru bete adiwi yo gbua; agu akurayo ima rengba ka dia bakere regbo.

16. Ginipai mo nawirikihe tigu kpiapai nga ga Raúl?

¹⁶ Gu kura mokedi sa Peru yo agbia wene sangbanapai mbiko ko adu na hipai. Gu mokedi re aya, “Mi awisigi abuku ue na bawiriki Ziazia Kekeapai rimoko angia Raúl.” Ono bakere kpakarapai adu kindi rogo gako raka yo. Akpakarapai aima du rogo gako rogatise, ko anaamanga zungahe ni bakerehe, na awiriko anaairisanga ko te mbiko gako gbegberẽ mangaapai. Ono tie, ko anaaye kupati adunguratise dedede, sidu, mi anaandu fuoko kindi ka undo ko gbiati gako aborokporo. Ho mi abi ko ni fuo agarã naima susa biata, ko aima rẽ tipa ka zio bapatiza.”

17. Ginipai ani nika sakapai tipaha rogo gu kekeapai ngbefuo gere?

¹⁷ Yesu aya furani ani “ndú . . . ki sa arikaaboro dunduko ni abawiriki.” Tipa ka digiso gu zinahe re, si naida ani fura na agu aboro du gayo aida kia ti gaani. Agu akurayo kinaho adunga rogo ai kanisa ya watadu aidanga kuti Mbori ya. Gu kekeapai ngbefuo gere nika sakapai tipa wai rengbe ani ka tungusapai fu ngbatunga agu aboro re.