1. Pingo omyero wayubbe pi aunauna?

I DYEWOR ma peya kineko Rwotwa Yecu, en owaco ni lobo bikwero jo ducu ma giyero me bedo lupwonnyene. (Jon 17:14) Cakke i kare meno me o wa i kare-ni, Lukricitayo ma lugen gukato ki i aunauna ma a ki bot jo ma gidag woro me ada. (2 Tem. 3:12) Ka wawoto ki nyiko cok ki agikki me lobo-ni, omyero wange ni lumonewa gibimedde ki keto aunauna magwar i komwa.​—Mat. 24:9.

2-3. (a) Pingo lworo rac adada? (b) Ngo ma wabinyamo i pwony man?

² Gin ango ma omyero watim kombeddi wek wayubbe me ciro aunauna? Pe mitte ni wabed ka goyo i wiwa jami maraco ducu ma twero timme i komwa. Ka watimo kit meno, ci par ki lworo bibwoyowa woko. Watwero doko lwor adada ma wajuko tic pi Jehovah woko ma nongo peya wakato ki i aunauna mo keken. (Car. 12:25; 17:22) Lworo tye i kin jami lweny ma pigi tek ma ‘lakworwa Catan’ tiyo kwede i komwa. (1 Pet. 5:8, 9) Gin ango ma waromo timone me yubbe pi ciro aunauna?

³ I pwony man, wabineno kit ma waromo jingo kwede watwa ki Jehovah ki dok pingo pire tek ni watim meno kombeddi. Wabinyamo bene gin ma watwero timo me dongo tekcwinywa. Ki dong me agikkine, wabineno kit ma watwero kanyo kwede aunauna ma a ki bot jo ma gidagwa.

4. Ma lubbe ki Jo Ibru 13:5, 6, gin ango ma omyero wabed ki gen iye, dok pingo man pire tek?

⁴ Mok i cwinyi ni Jehovah marri dok en pe biweki matwal. (Kwan Jo Ibru 13:5, 6.) Mwaki mapol angec, Wi Lubele owaco ni: “Dano ma ngeyo Lubanga maber aye  geno Lubanga matek i kare me atematema.” Man lok ada! Wek walo atematema, omyero wamar Jehovah dok wagene ki cwinywa ducu, dok pe myero wabed ki akalakala i kom marre piwa.​—Mat. 22:36-38; Yak. 5:11.

5. Ngo ma bikonyi me winyo ni Jehovah mari?

⁵ Kwan Baibul nino ducu ki miti me nyiko cok bot Jehovah. (Yak. 4:8) Ka itye ka kwan, ket cwinyi i kom kit pa Jehovah me mar ki kica. Tem niang kit ma en nyuto marre piri i lokke ki ticce. (Nia 34:6) Jo mukene ginongo tek mada me ye ni Lubanga marogi pien ma naka pe tye ngat mo ma onyutigi mar. Ka iwinyo kit meno, ci nino ducu tem coyo piny yo mapatpat ma Jehovah onyuto kwede kica boti. (Jab. 78:38, 39; Rom. 8:32) Ka iwoto ki tam i kom jami mutimme i kwoni kacel ki lwodo lok i kom gin ma ikwano i Lok pa Lubanga, ibinongo ni itwero coyo piny jami mapol ma Jehovah otimo piri. Ka pwocci pi jami ma Jehovah otimo piri woto ki dongo, ci watti kwede bene bidongo bedo matek.​—Jab. 116:1, 2.

6. Ma lubbe ki Jabuli 94:18, 19, lega ki cwinyi ducu twero konyi nining?

⁶ Leg kare ducu. Go kong latin awobi mo ma wonne otingo i kore. Latin-ni winyo agonya adada mumiyo en loko ki wonne i kom jami mabeco ki maraco ducu ma otimme i kome i nino meno. In bene itwero bedo ki wat ma kit meno ka inyikke cok ki Jehovah kun ilego lega ma a ki i cwinyi nino ducu. (Kwan Jabuli 94:18, 19.) Ka itye ka lega bot Jehovah, “ony can ma tye i cwinyi woko macalo pii” i nyimme kun itito bot Wonwa ma lamar-ri jami ducu ma keli lworo nyo par. (Koko 2:19) Adwogine bibedo nining? Ibinongo gin ma Baibul lwongo ni “kuc pa Lubanga ma kato ngec pa jo ducu.” (Pil. 4:6, 7) Ka imedde ki lega kit man, ci ibiwinyo ni itye cok ki Jehovah.​—Rom. 8:38, 39.

7. Pingo omyero ibed ki gen ni mot ma Lubanga ocikke me kelone i Kerre bibino ada?

⁷ Bed ki gen ni mot ma Lubanga ocikke me kelone i Kerre bibino ada. (Wel 23:19) Ka niyeni i kom cikke magi goro, ci bibedo yot pi Catan ki luticce me mini bwura. (Car. 24:10; Ibru 2:15) Itwero dongo genni i kom Ker pa Lubanga kombeddi nining? Kwany kare me kwan ki kwedo lok i kom cikke ma lubbe ki Ker pa Lubanga ki dok tyen lok mumiyo itwero bedo ki gen ni gibicobbe ada. Man bikonyi nining? Tam kong i kom labol pa Omego Stanley Jones, ma kitweyo i buc pi mwaki abiro pi niyene. * Gin ango ma okonye me cirone kun gwoko gennene? En owaco ni: “Niyena onongo tye matek pien angeyo lok i kom Ker pa Lubanga ki jami ma bicobone, dok pe abedo ki akalakala mo iye. Dong,  pe tye ngat mo keken ma onongo twero miyo aweko Jehovah.” Ka itye ki niye matek i kom cikke pa Lubanga, ci ibinyikke cok ki Jehovah dok pe ibiweko lworo juki ki tic pire.​—Car. 3:25, 26.

8. Kit ma watero kwede lok me bedo tye i cokke nyuto ngo? Tit kong.

⁸ Bed tye i cokke kare ki kare. Cokke konyowa me nyiko cok ki Jehovah. Kit ma watero kwede lok me bedo tye i cokke nyuto ka wabitwero kanyo aunauna i anyim. (Ibru 10:24, 25) Pingo tye kit meno? Ka waweko jami matino tino gengowa ki bedo tye i cokke kombeddi, ci dong ngo ma bitimme i anyim ka mitte ni waket kwowa ka mading me cokke kacel ki luye luwotwa? Ki tungcel, ka wamoko tamwa pe me keng cokke, ci wabimedde ameda kadi bed jo ma gidagwa guket kigeng i kom cokkewa. Man aye kare me dongo mar pi cokkewa. Ka wamaro cito i cokke, ci pe tye aunauna mo, kadi wa kigeng ma gamente keto i kom cokkewa, ma bigengowa ki winyo Lubanga makato dano.​—Tic 5:29.

9. Pingo mako ginacoya mogo i wiwa obedo yo maber me yubbe pi aunauna?

⁹ Mak Ginacoya mogo ma imaro i wi. (Mat. 13:52) Kadi bed itye ki peko me wil wic, ento Jehovah twero tic ki cwiny mere maleng me poyo wi i kom ginacoya magi. (Jon 14:26) Nen kong lok pa omego mo ma kitweyo i buc i East Germany ci kiloro wiye obedo kene. En owaco ni: “Obedo twon mot madit adada ni onongo amako tyeng miya mapol i wiya! Dong kadi bed onongo atye kena, abedo ka lwodo lok mapatpat me Baibul.” Tyeng magi okonyo ominwa-ni me bedo cok ki Jehovah​—dok me kanyo aunauna ki gen.

10. Pingo omyero wamak wer mogo i wiwa?

¹⁰ Mak i wi wer me pako Jehovah dok ibed ka werone. I kare ma kitweyo Paulo ki Cira i buc i Pilipi, gin gubedo ka wero wer me pako Lubanga ma onongo gumako i wigi. (Tic 16:25) I yo acel-lu, i kare ma kimako utmegiwa ma i lobe ma yam tye i te loc me Soviet Union ci kitweyogi i lobo Siberia, gin gunongo kero nining? Lamego Mariya Fedun wiye opo ni: “Wawero wer ducu ma wangeyo werone, ki i buk werwa.” En owaco ni wer magi ocuko cwinygi ducu dok okonyogi me winyo ni gitye cok ki Jehovah. Tika inongo cuko cwiny ka iwero wer ma imaro ki i buk  werwa nyo kabedowa me Intanet? Ka kumeno, mak wer magi i wi i kare-ni!​—Nen bok ma wiye tye ni “ Miya Tekcwiny.”

11-12. (a) Ma lubbe ki 1 Camuel 17:37, 45-47, pingo Daudi obedo ki tekcwiny? (b) Pwony ma pire tek ango ma wanongo ki i labol pa Daudi?

¹¹ Me kanyo aunauna, myero ibed ki tekcwiny. Ka iwinyo calo ipe ki tekcwiny, ngo ma iromo timone? Wi myero opo ni tekcwiny kikome pe jenge i kom dit komi, tekoni, nyo ryekoni. Tam kong i kom labol pa Daudi i kare ma ocito ka lweny ki Goliac. Ka kiporo Daudi ki Goliac, Daudi onongo kome tidi, goro, dok pe ki jami lweny muromo. Daudi onongo pe kadi ki pala lucwan. Ento, en onongo tye ki tekcwiny madwong adada. Daudi oringo atir ka rwatte ki oteka lweny ma lawakke-ni.

¹² Pingo Daudi obedo ki tekcwiny tutwal? En onongo ye labongo akalakala mo ni Jehovah tye kwede. (Kwan 1 Camuel 17:37, 45-47.) Daudi pe oketo cwinye i kom kit ma Goliac onongo dit kate kwede. Me ka meno, en oketo cwinye i kom kit ma Goliac tidi kwede ka kiporo ki Jehovah. Ngo ma wapwonyo ki i lok man? Wabibedo ki tekcwiny ka waye labongo akalakala mo ni Jehovah tye kwedwa dok ni lukworwa gitino adada ka kiporogi ki Lubanga Won Twer Ducu. (2 Tekwaro 20:15; Jab. 16:8) Watwero dongo tekcwiny kombeddi nining​—ma peya aunauna ocakke?

13. Watwero dongo tekcwiny nining? Tit kong.

¹³ Watwero dongo tekcwinywa kombeddi ki tito lok me kwena maber me Ker pa Lubanga. Pingo tye kit meno? Pien tito kwena pwonyowa me geno Jehovah dok weko waloyo lworo ma watye kwede i kom dano. (Car. 29:25) Kit macalo ler komwa jing ka wamaro tuko me ryeyo ler, tekcwinywa bene jing ka watito kwena i ot ki ot, i dye lwak, i kabedo me biacara, ki dong ma pe wayubbe iye. Ka wadongo tekcwiny me tito kwena i kare-ni, ci wabibedo atera me medde ki tito kwena kadi wa i kare ma kiketo kigeng i kom ticwa.​—1 Tec. 2:1, 2.

14-15. Pwony ango ma watwero nongo ki i labol pa Nancy Yuen ki Valentina Garnovskaya?

¹⁴ Waromo nongo pwony mapol ki bot lumegiwa aryo ma gunyutu tekcwiny adada. Nancy Yuen onongo bor ma romo futi  abic (mita 1.5) keken, ento onongo pe kitwero bwurre kulu. * En okwero juko tito kwena maber me Ker pa Lubanga. Macalo adwogine, kitweye i buc pi mwaki makato 20 i lobo China. Ludito ma gubedo ka penye lapeny guwaco ni en aye “obedo ngat ma oding loyo” ki i lobogi!

¹⁵ I yo acel-lu, lamego Valentina Garnovskaya kitweye i buc i lobo Russia tyen adek mapatpat, ma wel mwaki ducu ma en obedo kwede i buc romo 21. * Pingo kitweye? En omoko tamme matek me medde ki tito kwena ma oweko luloc gulwonge ni “latim bal ma kite tek adada.” Gin ango ma oweko mon aryo magi cwinygi obedo tek tutwal? Onongo gingeyo labongo akalakala mo ni Jehovah tye kwedgi.

16. Ngo ma mitte wek wabed ki tekcwiny me ada?

¹⁶ Kit ma dong wanyamo kwede, wek wadong tekcwiny, omyero pe wagen tekowa ki ryekowa. Me ka meno, omyero waye ni Jehovah tye kwedwa dok ni en aye tye ka lweny piwa. (Nwo. 1:29, 30; Jek. 4:6) Meno aye yo me nongo tekcwiny me ada.

17-18. Kit ma kicoyo kwede i Jon 15:18-21, lok ango ma Yecu owaco me cikowa? Tit kong.

¹⁷ Wan ducu cwinywa bedo yom ka jo mukene giminiwa woro, ento omyero wagwokke ki tamo ni konywa pe ka dano pe gimarowa. Yecu owaco ni: “Wutye ki gum ka dano dagwu, ka ce giryemowu woko ki i kingi, ka gingalowu, ka gicayo nyingwu ni rac, pi Wod pa dano.” (Luka 6:22) Lok pa Yecu-ni tyen lokke ngo?

¹⁸ Yecu onongo pe tye ka waco ni Lukricitayo gibinongo yomcwiny ka dano daggi. Me ka meno, en onongo tye ka cikowa i kom gin ma bitimme i komwa. Wan pe wabedo jo me lobo. Wakwo ma lubbe ki pwony pa Yecu dok watito kwena ma en bene otito. Macalo adwogine, lobo kwerowa bene. (Kwan Jon 15:18-21.)  Wamito yomo cwiny Jehovah. Ka dano dagwa pien ni wamaro Wonwa, meno pekogi.

19. Watwero lubo lanen pa lukwena nining?

¹⁹ Pe iwek gin mo keken ma dano adana waco nyo timo omi ibed ki lewic me bedo Lacaden pa Jehovah. (Mika 4:5) Watwero pwonnye me loyo lworo ma watye kwede i kom dano ki tam i kom gin ma lukwena ma onongo gitye i Jerucalem gutimo i nge to pa Yecu. Onongo gingeyo ni lupwonye dini pa Lujudaya daggi adada. (Tic 5:17, 18, 27, 28) Kadi bed kit meno, nino ducu gumedde ki tito kwena i ot pa Lubanga kun ginyutte ka maleng i dye lwak ni gin lupwonnye pa Yecu. (Tic 5:42) Pe guweko lworo obwoyogi. Wan bene watwero loyo lworowa ka waweko jo mukene gingeyo ni watye Lucaden pa Jehovah​—i ka ticwa, i cukul, ki ka ma wabedo iye.​—Tic 4:29; Rom. 1:16.

20. Pingo lukwena gubedo ki yomcwiny kadi bed onongo kidaggi?

²⁰ Pingo lukwena onongo cwinygi yom? Gin onongo gingeyo tyen lok ma oweko dano daggi, dok guneno calo obedo mot ka kiunogi pi tiyo miti pa Jehovah. (Luka 6:23; Tic 5:41) Lakwena Petero lacen ocoyo ni: “Kadi bed wuneno can pi lubo kit ma atir, ci wutye ki gum [yomcwiny].” (1 Pet. 2:19-21; 3:14) Ka waniang ni dano dagwa pi timo gin matir, ci pe wabiweko lworo jukowa ki tic pi Jehovah.

21-22. (a) Ngo ma imoko tammi me timone me yubbe pi aunauna? (b) Ngo ma wabinyamo i pwony ma lubo man?

²¹ Pe wangeyo awene ma aunauna nyo kigeng ma gamente keto bigudo kwede worowa bot Jehovah. Ento, wangeyo ni watwero yubbe kombeddi ka wajingo watwa ki Jehovah, wadongo tekcwiny, dok wapwonnye me kanyo adegadega ma a ki bot dano. Yubbe i yo magi i kare-ni bikonyowa me cung matek i anyim.

²² Ento ka gamente oketo kigeng i kom ticwa kono? I pwony ma lubo man, wabinyamo cik ma igi lac me Baibul ma twero konyowa me medde ki tic pi Jehovah kadi bed kiketo kigeng i kom ticwa.