1. Mɛni he je nɛ e sa kaa wa dla wa he kɛ ha yi mi wami ɔ?

GBƆKUƐ nɛ e nɔ jena wa Nyɔmtsɛ Yesu ma gbo ɔ, e tsɔɔ kaa nihi tsuo nɛ a ma ba pee e kaseli ɔ, a maa nyɛ mɛ. (Yoh. 17:14) Kɛ ba si mwɔnɛ ɔ, nihi nɛ a teɔ si kɛ woɔ anɔkuale jami ɔ ngɛ Yehowa Odasefohi yi mi wae. (2 Tim. 3:12) Akɛnɛ je yaya nɛ ɔ nyagbe ngɛ sue he je ɔ, wa ngɛ blɔ hyɛe kaa wa he nyɛli maa te si kɛ wo wɔ pe bɔ nɛ a ngɛ pee amlɔ nɛ ɔ po.​—Mat. 24:9.

2-3. (a) Mɛni e sa nɛ waa le ngɛ gbeye yemi he? (b) Mɛni he wa ma susu ngɛ ní kasemi nɛ ɔ mi?

² Mɛni wa ma nyɛ maa pee amlɔ nɛ ɔ kɛ dla wa he konɛ ke waa kɛ yi mi wami kpe ɔ, wa nyɛ nɛ waa da nya? E he hia we nɛ wa susu ní yayamihi tsuo nɛ ma nyɛ maa ba wa nɔ ɔ he. Ke wa pee jã a, gbeye maa nu wɔ, nɛ wa maa pee yeyeeye. Ke wa ngɛ haomihi nɛ a bɛ lolo ɔmɛ a he susue ɔ, gbeye yemi sɔuu ma nyɛ ma ha nɛ wa kpa Yehowa sɔmɔmi loko haomi ɔmɛ po maa ba. (Abɛ 12:25; 17:22) Gbeye yemi ji nɔ́ ko nɛ wa “he nyɛlɔ Abosiami” kɛ tsuɔ ní wawɛɛ konɛ e kɛ ye wɔ awi. (1 Pet. 5:8, 9) Mɛni wa ma nyɛ maa pee amlɔ nɛ ɔ kɛ dla wa he kɛ ha yi mi wami?

³ Ngɛ ní kasemi nɛ ɔ mi ɔ, wa ma susu níhi nɛ wa ma nyɛ maa pee konɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa a he, kɛ nɔ́ he je nɛ e sa kaa waa pee jã amlɔ nɛ ɔ. Jehanɛ hu ɔ, wa ma susu níhi nɛ wa maa pee konɛ wa ná kã a he. Nyagbe ɔ, wa maa hyɛ nɔ́ nɛ wa ma nyɛ maa pee kɛ da ninyɛ nya.

4. Mɛni Hebri Bi 13:5, 6 deɔ wɔ, nɛ mɛni he je nɛ e sɛ nɛ wa yi mi nɛ pee wɔ enyɔɔnyɔ ngɛ munyu nɛ ɔ he ɔ?

⁴ Mo ná nɔ mi mami kaa Yehowa suɔ mo, nɛ e be mo kuae gblegbleegble. (Kane Hebri Bi 13:5, 6.) Hwɔɔmi Mɔ ko nɛ ba  jehahi babauu nɛ be ɔ de ke: “Nɔ nɛ e le Mawu saminya a, ke kahi ba e nɔ ɔ, e kɛ e hɛ maa fɔ Mawu nɔ.” Munyu nɛ ɔ ji anɔkuale! Loko wa ma nyɛ maa da yi mi wami nya a, ja wa ná suɔmi kɛ ha Yehowa nɛ wa ngɔ wa hɛ kɛ fɔ e nɔ kulaa. Jehanɛ hu ɔ, e sɛ nɛ wa yi mi nɛ pee wɔ enyɔɔnyɔ ngɛ suɔmi nɛ Yehowa ngɛ kɛ ha wɔ ɔ he.​—Mat. 22:36-38; Yak. 5:11.

5. Mɛni maa ye bua mo konɛ o na kaa Yehowa suɔ mo?

⁵ Moo kane Baiblo ɔ daa ligbi kɛ yi mi tomi kaa o suɔ nɛ o hɛ kɛ su Yehowa he haa. (Yak. 4:8) Ke o ngɛ Baiblo ɔ kanee ɔ, moo to Yehowa suhi kaa suɔmi, mɔbɔ nami kɛ mi mi jɔmi a he hɛ. Mo bi o he ke: ‘Kɛ nɔ́ nɛ Yehowa de nɛ ɔ, aloo nɔ́ nɛ e pee ɔ tsɔɔ kaa e suɔ mi, nɛ e susuɔ ye he ha kɛɛ? (2 Mose 34:6) Ngɛ ni komɛ a blɔ fa mi ɔ, akɛnɛ nɔ ko je we suɔmi kpo kɛ tsɔɔ mɛ hyɛ he je ɔ, e he maa wa ha mɛ kaa a ma he ye kaa Mawu suɔ mɛ. Ke jã nɛ e ji ngɛ mo hu o blɔ fa mi ɔ, lɛɛ daa ligbi ɔ, moo bɔ mɔde nɛ o ngma níhi nɛ Yehowa pee ha mo nɛ tsɔɔ kaa e je mɔbɔ nami kɛ mi mi himi kpo kɛ tsɔɔ mo ɔ kɛ fɔ si. (La 78:38, 39; Rom. 8:32) Ke o susu mo nitsɛ o níhi a si kpamihi a he, nɛ o pue o yi mi tɛ ngɛ níhi nɛ o kane ngɛ Mawu Munyu ɔ mi ɔ he ɔ, o ma nyɛ maa na níhi fuu nɛ Yehowa pee kɛ ha mo, nɛ o maa ngma kɛ fɔ si. Ke o hɛ saa níhi nɛ Yehowa peeɔ kɛ haa mo ɔ, lɔ ɔ ma ha nɛ huɛ bɔmi nɛ ngɛ o kɛ lɛ nyɛ kpɛti ɔ mi maa wa wawɛɛ.​—La 116:1, 2.

6. Ngɛ La 94:17-19 ɔ nya a, kɛ sɔlemi nɛ o maa je o tsui mi kɛ sɔle ɔ maa ye bua mo ha kɛɛ?

⁶ Moo sɔle daa. Ngɔɔ lɛ kaa jokuɛ nyumuyo ko hii si ngɛ e tsɛ tɛ nɔ nɛ a ngɛ ní sɛɛe. Jokuɛ ɔ be gbeye yee kaa e ma de e tsɛ ɔ nɔ́ fɛɛ nɔ́ nɛ ya nɔ ngɛ ligbi ɔ mi​—nɔ́ kpakpa jio, nɔ́ yayami jio. O kɛ Yehowa ma nyɛ ma ná huɛ bɔmi kaa jã ke o jeɔ o tsui mi kɛ sɔleɔ daa ligbi. (Kane La 94:17-19.) Ke o ngɛ sɔlee ha Yehowa a, “moo fa kue ha lɛ kɛ o tsui tsuo.” Mo de o Tsɛ nɛ e suɔ mo ɔ níhi tsuo nɛ woɔ o he gbeye nɛ haa nɛ o peeɔ yeyeeye ɔ. (Kɔmɔ 2:19) Ke o pee jã a, mɛni o ma ná? O ma ná nɔ́ nɛ Baiblo ɔ tsɛɔ ke “Mawu tue mi jɔmi ɔ nɛ pã níhi a sisi numi tsuo ɔ.” (Filip. 4:6, 7) Sɔlemi kaa jã ma ha nɛ o hɛ mo kɛ su Yehowa he haa.​—Rom. 8:38, 39.

7. Mɛni he je nɛ e sa nɛ o ná nɔ mi mami kaa jɔɔmihi nɛ Mawu Matsɛ Yemi ɔ maa ngɔ kɛ ba a maa ba mi niinɛ ɔ?

⁷ Mo ná nɔ mi mami kaa jɔɔmihi nɛ Mawu Matsɛ Yemi ɔ kɛ maa ba a maa ba mi niinɛ. (4 Mose 23:19) Ke o yi mi peeɔ mo enyɔɔnyɔ ngɛ Mawu si womi ɔmɛ a he ɔ, e he be wae ha Satan kɛ e we bi ɔmɛ kaa a maa wo o he gbeye. (Abɛ 24:10; Heb. 2:15) Mɛni o ma nyɛ maa pee amlɔ nɛ ɔ konɛ o hemi kɛ yemi ngɛ Mawu Matsɛ Yemi ɔ mi nɛ wa? Mo hla be kɛ kase Mawu si womihi nɛ kɔɔ e Matsɛ Yemi ɔ he, kɛ yi mi tomihi a he je nɛ o ma nyɛ ma ná nɔ mi mami kaa si womi nɛ ɔmɛ maa ba mi ɔ he ní. Kɛ lɔ ɔ maa ye bua mo ha kɛɛ? Mo susu Nyɛminyumu Stanley Jones nɔ hyɛmi nɔ́ ɔ he  nɛ o hyɛ. E hemi kɛ yemi ɔ he je ɔ, a wo lɛ tsu jeha kpaago. * Mɛni ye bua lɛ nɛ e nyɛ nɛ e kɛ anɔkuale yemi fĩ si? E de ke: “Akɛnɛ i kase Mawu Matsɛ Yemi ɔ kɛ níhi nɛ Matsɛ Yemi ɔ maa pee ɔ he ní nɛ ye yi mi pee we mi enyɔɔnyɔ ngɛ he hyɛ he je ɔ, nɔ ko nyɛ we nɛ e je mi kɛ je Yehowa he.” Ke o ná hemi kɛ yemi nɛ mi wa ngɛ Mawu si womi ɔmɛ a mi ɔ, lɔ ɔ ma ha nɛ huɛ bɔmi nɛ ngɛ o kɛ Yehowa nyɛ kpɛti ɔ mi maa wa, nɛ o be hae nɛ gbeye yemi nɛ ha nɛ o kpa Yehowa sɔmɔmi.​—Abɛ 3:25, 26.

8. Bɔ nɛ wa peeɔ wa ní ha ngɛ asafo mi kpehi a yami he mwɔnɛ ɔ ma nyɛ maa tsɔɔ mɛni? Moo tsɔɔ nya.

⁸ Moo ya asafo mi kpehi daa. Asafo mi kpehi yeɔ bua wɔ nɛ wa hɛɛ kɛ suɔ Yehowa he haa. Bɔ nɛ wa peeɔ wa ní ha ngɛ asafo mi kpe yami he mwɔnɛ ɔ maa tsɔɔ kaa wa ma nyɛ maa da yi mi wami nɛ maa ba hwɔɔ se ɔ nya aloo wa be nyɛe. (Heb. 10:24, 25) Mɛni he je? Ke mwɔnɛ ɔ, wa haa nɛ ní tsɔwitsɔwi komɛ tsiɔ wa nya nɛ wa yɛ asafo mi kpehi ɔ, lɛɛ ke hwɔɔ se ɔ, e he ba hia nɛ waa ngɔ wa wami kɛ wo oslaa mi loko wa ma nyɛ nɛ waa kɛ nyɛmimɛ nɛ kpe ɔ, kɛ wa maa pee kɛɛ? Se ke mwɔnɛ ɔ, wa bɔɔ mɔde nɛ wa yaa asafo mi kpehi be fɛɛ be ɔ, lɛɛ hwɔɔ se ke si temi kɛ woli tsi wa nya po ɔ, e he be wae ha wɔ kaa wa maa ya asafo mi kpehi. Amlɔ nɛ ɔ ji be nɛ e sa kaa wa bua nɛ jɔ asafo mi kpehi a yami he wawɛɛ. Ke wa bua jɔ asafo mi kpehi a yami he, nɛ nihi te si kɛ wo wɔ aloo nɔ yemi ko tsi wa nya po ɔ, wa maa ya nɔ maa bu Mawu tue mohu pe adesahi.​—Níts. 5:29.

9. Mɛni he je nɛ ngmamihi nɛ wa maa kase kɛ wo wa yi mi ɔ ji blɔ kpakpa nɛ wa ma nyɛ maa gu nɔ kɛ dla wa he kɛ ha yi mi wami ɔ?

⁹ Kase ngmamihi nɛ o bua jɔ he ɔ kɛ wo o yi mi. (Mat. 13:52) Eko ɔ, o ji nɔ ko nɛ ke o kɛ ngmamihi wo o yi mi ɔ, e kɛ we kɛkɛ o hɛ je nɔ, se Yehowa ma nyɛ maa ngɔ e mumi klɔuklɔu ɔ kɛ ye bua mo konɛ o kai jamɛ a ngmami ɔmɛ. (Yoh. 14:26) Mo kadi nɔ́ nɛ nyɛminyumu ko nɛ a wo lɛ tsu ngɛ East Germany be ko nɛ be ɔ de. E de ke: “Ye bua jɔ wawɛɛ kaa loko a maa wo mi tsu ɔ, i kase ngmami lafahi abɔ kɛ wo ye yi mi! E ngɛ mi kaa imi pɛ nɛ i ngɛ tsu ɔ mi mohu lɛɛ, se i ngɔ be nɛ i kɛ pee we nɔ́ ko ɔ kɛ pue ye yi mi tɛ ngɛ Baiblo mi sane slɔɔtoslɔɔtohi a he.” Ngmamihi nɛ e kase kɛ wo e yi mi ɔ ye bua lɛ nɛ e hɛ kɛ su Yehowa he haa, nɛ e nyɛ nɛ e kɛ anɔkuale yemi fĩ si.

10. Mɛni he je nɛ e sa nɛ waa kase lahi kɛ wo wa yi mi ɔ?

 ¹⁰ Moo kase lahi nɛ jeɔ Yehowa yi kɛ wo o yi mi nɛ o la. Benɛ a wo Paulo kɛ Silas tsu ngɛ Filipi ɔ, a la lahi nɛ a kase kɛ wo a yi mi ɔ kɛ je Yehowa yi. (Níts. 16:25) Benɛ a nuu wa nyɛmimɛ nɛ a hi blema Soviet Union ɔ kɛ ho Siberia ya a, mɛni a pee kɛ wo a sibi he wami? Nyɛmiyo Mariya Fedun de ke: “Wa la lahi tsuo nɛ wa le ngɛ la womi ɔ mi ɔ.” Mariya tsɔɔ kaa la amɛ wo mɛ tsuo he wami nɛ e ye bua mɛ nɛ a hɛ kɛ su Yehowa he haa. Ke o ngɛ Matsɛ Yemi lahi aloo lahi nɛ ngɛ wa wɛbsaiti ɔ nɔ nɛ o bua jɔ he ɔ lae ɔ, anɛ e wui mo he wami lo? Lɛɛ moo kase la nɛ ɔmɛ kɛ wo o yi mi amlɔ nɛ ɔ!​—Hyɛ daka nɛ ji “ Moo Wo Mi Kã.”

11-12. (a) Kaa bɔ nɛ wa na ngɛ 1 Samuel 17:37, 45-47 ɔ, mɛni he je nɛ David nyɛ nɛ e pee kã a? (b) Mɛni wa ma nyɛ maa kase ngɛ David nɔ hyɛmi nɔ́ ɔ mi?

¹¹ O hia kã loko o ma nyɛ maa da yi mi wami nya. Ke e peeɔ mo kaa o be kã a, mɛni o ma nyɛ maa pee? Mo kai kaa tsa pi nɔ ko kami kɛ e timi, e he wami aloo e nyɛmi nɛ tsɔɔ kaa e ngɛ kã. Mo susu benɛ David ji niheyo wayoo nɛ e kɛ Goliat ya kpe ɔ he nɛ o hyɛ. Ke a ngɔ David kɛ to Goliat he ɔ, David ngɛ nyafii, e he wami sui he ko, nɛ e be ta hwumi ní kpakpahi hulɔ. Klaate kpamakpa po David be eko. Se kɛ̃ ɔ, e ná kã. David pee kã, nɛ e tu fo nɛ e kɛ nyumu nɛ e je oblai nɛ e heɔ e he yeɔ ɔ ya kpe.

¹² Mɛni he je nɛ David nyɛ nɛ e pee kã a? E ngɛ hemi kɛ yemi nɛ mi wa kaa Yehowa piɛɛ e he. (Kane 1 Samuel 17:37, 45-47.) David kɛ e juɛmi ma we bɔ nɛ Goliat ka nɛ e ti pe lɛ ɔ nɔ. Mohu ɔ, e kɛ Goliat to Yehowa he nɛ e na kaa Goliat ngɛ nyafii ngɛ Yehowa hɛ mi. Mɛni wa ma nyɛ maa kase ngɛ enɛ ɔ mi? Ke wa ngɛ hemi kɛ yemi kaa Yehowa piɛɛ wa he, nɛ wa ná nɔ mi mami kaa wa he nyɛli ɔmɛ ngɛ nyafii ngɛ Mawu Ope ɔ hɛ mi ɔ, lɔ ɔ ma ha nɛ wa ná kã. (2 Kron. 20:15; La 16:8) Mɛni wa maa pee kɛ ná kã amlɔ nɛ ɔ loko waa kɛ yi mi wami nɛ kpe?

13. Kɛ wa ma plɛ kɛ ná kã ha kɛɛ? Moo tsɔɔ nya.

¹³ Mawu Matsɛ Yemi ɔ he sane kpakpa a nɛ wa maa fiɛɛ ɔ ma ha nɛ wa ná kã amlɔ nɛ ɔ. Mɛni he je? Ejakaa fiɛɛmi ní tsumi ɔ yeɔ bua wɔ nɛ wa ngɔɔ wa hɛ kɛ fɔɔ Yehowa nɔ, nɛ wa yi nɔmlɔ adesa gbeye. (Abɛ 29:25) Kaa bɔ nɛ he mi kami haa nɛ wa náa nɔmlɔ tso mi he wami ɔ, jã kɛ̃ nɛ fiɛɛmi nɛ wa fiɛɛɔ ngɛ wehi a mi, magbɛ nɔ, ní tsumi hehi, kɛ be mi nɛ wa be fiɛɛmi tso mi ɔ haa nɛ wa nyɛɔ peeɔ kã wawɛɛ. Ke waa kɛ kã fiɛɛɔ amlɔ nɛ ɔ nɛ hwɔɔ  se a tsi wa nya po ɔ, wa maa ya nɔ maa fiɛɛ.​—1 Tɛs. 2:1, 2.

14-15. Mɛni wa ma nyɛ maa kase ngɛ Nancy Yuen kɛ Valentina Garnovskaya a níhi a si kpami ɔ mi?

¹⁴ Wa ma nyɛ maa kase níhi fuu ngɛ nyɛmimɛ yihi enyɔ komɛ nɛ a kɛ anɔkuale yemi sɔmɔ Yehowa nɛ a pee kã wawɛɛ ɔ a níhi a si kpami ɔ mi. Nancy Yuen kami sui nanewɛɛ enuɔ, se e ha we nɛ nɔ́ ko nɛ wo e he gbeye. * Akɛnɛ a ngɛ e nya tsie kaa e kpa Matsɛ Yemi sane kpakpa a fiɛɛmi se e kpa we he je ɔ, a wo lɛ tsu jeha 20 kɛ se ngɛ China. Polisihi nɛ a ta e nya mi ɔ tsɔɔ kaa “e lo he wa pe nɔ fɛɛ nɔ” ngɛ China!

¹⁵ A wo Valentina Garnovskaya hu tsu si etɛ ngɛ blema Soviet Union. Ngɛ lɛ tsuo mi ɔ, e ye jeha 21 kɛ se ngɛ tsu womi he. * Mɛni he je? E fia e pɛɛ si kaa e maa ya nɔ maa fiɛɛ, enɛ ɔ he ɔ, ma nikɔtɔma amɛ tsɔɔ kaa e ji “atuã tsɔlɔ nɛ e he ngɛ gbeye.” Mɛni lɛ ha nɛ nyɛmimɛ yihi enyɔ nɛ a yeɔ Yehowa anɔkuale ɔ nyɛ nɛ a pee kã jã a? A ngɛ hemi kɛ yemi kaa Yehowa piɛɛ a he.

16. Mɛni ma ha nɛ nɔ ko nɛ ná kã nitsɛnitsɛ?

¹⁶ Kaa bɔ nɛ wa na a, ke wa suɔ nɛ wa ná kã a, e sɛ nɛ waa ngɔ wa hɛ kɛ fɔ wɔ nitsɛmɛ wa he wami kɛ wa nyɛmi nɔ. Mohu ɔ, e sa nɛ wa he ye kaa Yehowa piɛɛ wa he, nɛ lɛ nɛ e ngɛ hwue ha wɔ. (5 Mose 1:29, 30; Zak. 4:6) Enɛ ɔ ji nɔ́ nɛ haa nɛ nɔ náa kã nitsɛnitsɛ.

17-18. Kaa bɔ nɛ Yohane 15:18-21 ɔ tsɔɔ ɔ, mɛni nɛ Yesu de ke e maa ba wa nɔ? Moo tsɔɔ nya.

¹⁷ Ke nihi buɔ wɔ ɔ, wa bua jɔɔ, se ke nihi sume wɔ ɔ, e sɛ nɛ wa susu kaa wa he be se nami. Yesu de ke: “Be fɛɛ be nɛ nihi maa nyɛ nyɛ, nɛ a ma kua nyɛ, nɛ a ma pue nyɛ hɛ mi si, nɛ a ma puɛ nyɛ biɛ kaa nimli yayamihi ji nyɛ ngɛ nɔmlɔ Bi ɔ he je ɔ, nyɛ bua nɛ jɔ.” (Luka 6:22) Kɛ Yesu ngɛ tsɔɔe kɛɛ?

¹⁸ Pi nɛ Yesu ngɛ tsɔɔe kaa Kristofohi suɔ nɛ a nyɛ mɛ. Mohu ɔ, e ngɛ wɔ nɔ́ nɛ maa ba wa nɔ ɔ dee. Wa piɛɛ we je ɔ he. Wa hiɔ si ngɛ Yesu tsɔɔmi ɔmɛ a nya, nɛ wa fiɛɛɔ sɛ gbi nɛ  Yesu fiɛɛ ɔ. Enɛ ɔ he je nɛ je ɔ nyɛɔ wɔ ɔ nɛ. (Kane Yohane 15:18-21.) Wa suɔ nɛ waa sa Yehowa hɛ mi. Ke suɔmi nɛ wa suɔ wa hiɔwe Tsɛ ɔ he je nɛ nihi nyɛɔ wɔ ɔ, lɛɛ mɛ nitsɛmɛ a nyagba ji lɔ ɔ nɛ.

19. Mɛni wa ma nyɛ maa pee kɛ kase bɔfo ɔmɛ a nɔ hyɛmi nɔ́ ɔ?

¹⁹ Ko ha nɛ níhi nɛ nimli adesahi deɔ aloo a peeɔ ɔ nɛ e pee mo zo kɔkɔɔkɔ kaa o ji Yehowa Odasefo no. (Mika 4:5) Ke wa susu bɔ nɛ bɔfo ɔmɛ pee kã ha ngɛ Yerusalem benɛ a gbe Yesu se ɔ he ɔ, e maa ye bua wɔ nɛ wa be adesa ko gbeye yee. A le kaa Yuda jami hɛ mi nyɛɛli ɔmɛ sume mɛ kulaa. (Níts. 5:17, 18, 27, 28) Se kɛ̃ ɔ, daa ligbi ɔ, a yaa sɔlemi we ɔ, nɛ a haa nɛ nihi leɔ kaa a ji Yesu kaseli. (Níts. 5:42) A ha we nɛ gbeye yemi nɛ ha nɛ a kpa fiɛɛmi. Ke wa ha nɛ nihi nɛ waa kɛ mɛ tsuɔ ní, nihi nɛ waa kɛ mɛ yaa sukuu kɛ nihi nɛ a ngɛ wa kpɔ ɔ mi ɔ le kaa Yehowa Odasefohi ji wɔ ɔ, lɔ ɔ be hae nɛ waa ye adesa gbeye.​—Níts. 4:29; Rom. 1:16.

20. Mɛni he je nɛ benɛ a ngɛ bɔfo ɔmɛ nyɛe ɔ, a bua jɔ ɔ?

²⁰ Mɛni he je nɛ bɔfo ɔmɛ a bua jɔ ɔ? A le nɔ́ he je nɛ a ngɛ mɛ nyɛe ɔ, nɛ a na yi mi nɛ a wa mɛ ngɛ Yehowa suɔmi nya ní nɛ a ngɛ pee ɔ he ɔ kaa e ji hɛ mi nyami. (Luka 6:23; Níts. 5:41) Pee se ɔ, bɔfo Petro de ke: “Ke e sa nɛ nyɛɛ na amanehlu ngɛ dami he je po ɔ, nyɛ ngɛ bua jɔmi.” (1 Pet. 2:19-21; 3:14) Ke wa le kaa nɔ́ kpakpa nɛ wa ngɛ pee ɔ he je nɛ nihi ngɛ wɔ nyɛe ngɛ ɔ, wa be hae nɛ lɔ ɔ nɛ wo wa he gbeye nɛ wa kpa Yehowa sɔmɔmi kɔkɔɔkɔ.

21-22. (a) Mɛni o to kaa o maa pee kɛ dla o he kɛ ha yi mi wami? (b) Mɛni he wa ma susu ngɛ ní kasemi nɛ nyɛɛ se ɔ mi?

²¹ Wa li be nɛ nihi maa wa wɔ yi mi aloo a maa tsi wa sɔmɔmi ní tsumi ɔ nya. Se kɛ̃ ɔ, wa le kaa ke huɛ bɔmi kpakpa ngɛ waa kɛ Yehowa wa kpɛti, wa ná kã, nɛ wa nyɛ da ninyɛ nya a, lɔ ɔ ma dla wɔ amlɔ nɛ ɔ kɛ to. Wa he nɛ wa ma dla amlɔ nɛ ɔ maa ye bua wɔ nɛ wa ma nyɛ ma fĩ si wawɛɛ hwɔɔ se.

²² Se ke e ba kaa a tsi wa sɔmɔmi ní tsumi ɔ nya hu nɛɛ? Baiblo sisi tomi mlaahi ma nyɛ maa ye bua wɔ konɛ waa ya nɔ nɛ wa sɔmɔ Yehowa ke a tsi wa nya po. Wa ma susu Baiblo sisi tomi mlaa nɛ ɔmɛ a he ngɛ ní kasemi nɛ nyɛɛ se ɔ mi.