1. Биске нениҥ учун истежӱлерге белетенер керек?

ИИСУС ХРИСТОС божоор алдында, тӱнде, оныҥ ӱренчиктерин улус јаман кӧргӱлеер деп айткан (Иоанн 17:14). Анайып, Кудайдаҥ јана баспай турган христиандарды чындыктыҥ ӧштӱлери бӱгӱнги кӱндерге јетире истежип јат (2 Тим. 3:12). Чындык христиандарда, Сатананыҥ телекейиниҥ учы јууктаган сайын, истежӱлер оноҥ тыҥ болор (Матф. 24:9).

2, 3. а) Коркыыры керегинде нени билер керек? б) Бу јӧрмӧлдӧ нени шӱӱжерис?

² Истежӱлерге канайып белетенер? Бисле не болорын озодоҥ ло, ӧйинеҥ ӧткӱре кӧпчидип сананбас керек. Нениҥ учун дезе анайып бис коркып, санааркап баштаар болорыс. Санаабыста јуралып турган кӱчтер, истежӱлер башталгалактаҥ озо, ийде-кӱчибисти айрып салардаҥ айабас (Укаа 12:25; 17:22). Коркыыры — Сатананыҥ биске удура тузаланып турган коркышту једимдӱ јепсели (1 Петр 5:8, 9). Оныҥ учун истежӱлерди ӧдӱп чыгатан ийде-кӱчти аларга нени эдер керек?

³ Бу јӧрмӧлдӧ Иеговала колбуларысты тыҥыдарга нени эдер керек ле мыны нениҥ учун тӱрген эдер керек деп сурактар шӱӱжип кӧрӧрис. Анайда ок јалтанбас болорго нени эдерин ле улуска јаман кӧрдӱрип турзаас нени эдерин база билип аларыс.

4. Еврейлерге 13:5, 6-да бичилгениле биске неде алаҥзыбас керек, нениҥ учун?

⁴ Иегова слерди сӱӱп турган ла качан да артыргыспас деп алаҥзыбагар. (Еврейлерге 13:5, 6 кычырыгар.) Канча јылдар кайра «Каруулчы шибееде» мынайып айдылган: «Кудайды јакшы билер кижи кӱч ченелтелерде ого алаҥзу јогынаҥ бӱдӱп јат». Кандый чын сӧстӧр! Истежӱлерди ӧдӧргӧ, Иегованы сӱӱр керек, ого бӱдер керек ле оныҥ сӱӱжинде алаҥзыбас керек (Матф. 22:36—38; Иак. 5:11).

5. Иегованыҥ сӱӱжин сезип турарга не болужар?

 ⁵ Агару Бичикти кажы ла кӱн кычырыгар. Иеговага јууктаарга амадап турганаарды ундыбагар (Иак. 4:8). Агару Бичикти кычырып тура, Иегованыҥ сӱӱжине ле јалакайына ајарып туругар. Кудайдыҥ нени айтканын ла нени эткенин кычырып, оныҥ слерди сӱӱп ле кичееп турганын кӧрӧргӧ албаданыгар (Чыг. 34:6). Кезик улуска Кудай олорды сӱӱп турган деп бӱдерге кӱч болот, нениҥ учун дезе олорды кем де, качан да сӱӱбеген. Слерде мындый сезимдер бар болзо, Иегова слерге буурзаганын ла јалакайын канайып кӧргӱскенин кажы ла кӱн бичип кӧрӱгер (Сар. 78:38, 39; Рим. 8:32). Јӱрӱмеерде болгон немени Агару Бичикте бичилгениле тӱҥдештирип турзагар, Иегованыҥ слерге кӧп јакшыны эткенин кӧрӧригер. Андый керектерди канча ла кире тыҥ баалап турзагар, Кудайла колбулараар ончо ло кире бек болор (Сар. 116:1, 2).

6. Сарын 94:17—19-ла болзо, биске нениҥ учун акту јӱректеҥ мӱргӱӱр керек?

⁶ Јаантайын мӱргӱп туругар. Адазыныҥ койнына отурган баланыҥ сезимдерин сананып ийзеер. Ого амыр, јакшы болот, ол кере тӱжине нени эткенин — јакшыны да, јаманды да ӱзе адазына куучындап берет. Слер Иеговала андый ла јуук колбуларлу болорго кӱӱнзейдеер бе? Андый болзо, кажы ла кӱн ого акту јӱрегердеҥ мӱргӱп туругар. (Сарын 94:17—19 кычырыгар *.) Мӱргӱген тужыгарда теҥеридеги сӱӱштӱ Адагарга бойыгардыҥ јӱрегердеги санааркаштараарды суу чылап тӧгӱп, куучындап беригер (Ыйы 2:19). Анайып, Агару Бичикте айдылганыла, јӱрегерде «Кудайдыҥ не ле сагыштаҥ бийик амырын» сезеригер (Флп. 4:6, 7). Иеговага јӱрегерде не барын канча ла кире кӧп куучындап турзагар, ого ончо ло кире јуук болорыгар (Рим. 8:38, 39).

7. Кудайдыҥ Каандыгыныҥ алкыштары бӱдер деп, биске нениҥ учун алаҥзыбас керек?

⁷ Кудайдыҥ Каандыгыныҥ алкыштарында алаҥзыбагар (Тоол. 23:19). Кудайдыҥ берген сӧзиниҥ бӱдеринде алаҥзып турган болзогор, Сатанага ла оныҥ ишчилерине слерди коркыдып аларга јеҥил болор (Укаа 24:10; Евр. 2:15). Оныҥ учун Кудайдыҥ алкыштарында алаҥзыбаска нени эдер керек? Таҥынаҥ ӱренген ӧйдӧ Кудайдыҥ Каандыгыныҥ алкыштары керегинде теманы шиҥдеп, олорго нениҥ учун бӱдерге јараарыныҥ керелерин табып алыгар. Бу слерге канайып болужар? Бойыныҥ бӱдери учун јети јыл тӱрмеде отурган Стэнли Джоунз аканыҥ темин кӧрӱп ийектер *. Кудайга чындык артарга ого не болушкан? Ол куучындайт: «Меге Каандык керегинде билгирлер болушкан. Бу Каандык бар деп, бир де секундка алаҥзыбагам, оныҥ учун мениҥ бӱдӱмјимди кем де, не де бузып болбогон». Слер Кудайдыҥ берген сӧзине алаҥзыбай бӱдӱп турган болзогор, Иеговала  колбулараар бек болор ло недеҥ де, кемнеҥ де коркыбазыгар (Укаа 3:25, 26).

8. Христиан туштажуларга кандый кӧрӱмдӱ болгоныстаҥ не кӧрӱнет? Јартап беригер.

⁸ Христиан туштажуларга јаантайын јӱрӱп туругар. Биске туштажулар Иеговага јууктаарга болужат. Јуундарга јӱрерине кандый кӧрӱмдӱ болгоныстаҥ келер ӧйдӧги истежӱлерди канайып ӧдӧрис кӧрӱнет (Евр. 10:24, 25). Бӱгӱнги кӱнде јуундарга болор-болбос шылтактардаҥ улам јӱрбей турзаас, келер ӧйдӧ ака-эјелерле кожо јуулыжарга јеткерлӱ боло берзе, канайдар эдис? Је јуундарды бӱгӱнги кӱннеҥ ала баалап турган болзоос, ӧштӱлер кожо јуулыжып турганысты буудактап баштаза да, јуундарга јӱрерин токтотпозыбыс. Оныҥ учун бӱгӱнги ле кӱннеҥ ала христиан туштажуларыска сӱӱжисти тыҥыдып алактар. Бис туштажуларды сӱӱп турзаас, кандый да удурлажу, керек дезе ороонныҥ јаҥдары јасак аайынча бисти токтодып та салза, бис «Кудайга улустаҥ артык багар керек» деген библиялык принципти буспазыс (Ап. ижи 5:29).

9. Нениҥ учун библиялык ӱлгерлерди ӱренери — истежӱлерге белетенип аларыныҥ јакшы аргазы болот?

⁹ Јарап турган библиялык ӱлгерлереерди ӱренип алыгар (Матф. 13:52). Санаагарга не де артпай турган болзо, Иегова агару тыныныҥ болужыла ӱлгерди эске алындырып ийер (Иоанн 14:26). Кӱнчыгыш Германияда јаҥыскан отуратан камерада отурган ака мынайып куучындайт: «Тӱрмеге кирердеҥ озо, 200-теҥ ажыра библиялык ӱлгерлер ӱренип алганымга сӱӱнип јадым! Отурган ӧйдӧ библиялык башка-башка темаларды јаантайын шӱӱп сананып туратам». Бу акага Агару Бичиктиҥ ӱлгерлерин шӱӱп сананганы Иеговала колбуларын кичееп аларга ла ого чындык артарга болушкан.

10. Биске нениҥ учун кожоҥдор ӱренер керек?

¹⁰ Иегованы мактап турган кожоҥдорды ӱренип, кожоҥдоп туругар. Павелди ле Силаны Филиппыдагы тӱрмеге отургызып саларда, олор Иегованы мактаган кожоҥдор кожоҥдогон (Ап. ижи 16:25). Је Совет јаҥныҥ ӧйинде Сибирьдӧӧн ссылкага аткарылган ака-эјелер ийде-кӱчти кайдаҥ алган? Мария Федунь эје эске алат: «Бис сагыжыска келген кожоҥдордыҥ ончозын кожоҥдоп туратаныс». Бу кожоҥдор олордыҥ кӱӱнин кӧдӱрип, Иеговала јуук колбуларын кичееп аларга болушкан деп, эје куучындайт. Јарап турган кожоҥдороорды кожоҥдозоор, слердиҥ кӱӱнигер кӧдӱрилет пе? Оныҥ учун олорды не ӱренип албас? (« Јалтанбас болорго болуш» деген рамканы кӧрӱгер.)

11, 12. а) 1 Самуил 17:37, 45—47-ле болзо, Давид недеҥ улам јалтанбас болгон? б) Бисти Давидтиҥ теми неге ӱредет?

¹¹ Истежӱлердиҥ ӧйинде јалтанбас болор керек. Је слерге андый кылык-јаҥ јетпей турган болзо, нени эдер? Чыннаҥ јалтанбас болоры кижиниҥ сынынаҥ, аргазынаҥ ла ийде-кӱчинеҥ камаанду эмес деп ундыбагар. Голиафка удура чыккан јиит Давидти сананып ийзеер. Голиафка кӧрӧ, Давид кичинек, ийде-кӱчи ас, јуулажатан јепсели де уйан деп кӧрӱнген. Ондо кылыш та болбогон. Је андый да болзо, ол сӱрекей јалтанбас болгонынаҥ улам, бийиркек ӧштӱге удура чыккан.

¹² Давид недеҥ улам јалтанбас болгон? Давид Иегованыҥ болужына алаҥзыбай бӱткен. (1 Самуил 17:37, 45—47 кычырыгар *.) Ол Голиафтыҥ ого кӧрӧ, канча кире јаан болгонына јаан ајару этпеген, карын Голиафты Иеговага кӧрӧ, канча киреге кичинек деп кӧргӧн. Бу учурал бисти неге ӱредет? Иегова бисле кожо, анайда ок Иегова ӧштӱлеристеҥ канча киреге кӱчтӱ деп алаҥзыбай турзаас, бир де коркыбазыс (2 Лет. 20:15; Сар. 16:8). Је эм тургуза истежӱлер болголокто, оноҥ тыҥ јалтанбас болорго нени эдер керек?

13. Биске оноҥ тыҥ јалтанбас болорго не болужар? Јартап беригер.

¹³ Биске оноҥ тыҥ јалтанбас болорго, Кудайдыҥ Каандыгы керегинде сӱӱнчилӱ јарды јарлаар керек. Нениҥ учун? Бис јарлап турзаас, Иеговага иженерге ле улустаҥ коркыбаска ӱренедис (Укаа 29:25). Канайып эди-канысты тазыктырып турзаас, балтырларыс тыҥыйт, анайып ла айылдар сайын, кӧп улусту јерлерде, улустыҥ иштеер јерлеринде, керектерисле јӱрген ӧйдӧ јарлап турзаас, оноҥ тыҥ јалтанбас болуп каладыс. Анайып, бисти токтодып та салган болзо, јарлаар ишти токтотпозыс (1 Фес. 2:1, 2).

14, 15. Нанси Юэн ле Валентина Гарновская эјелердиҥ теми бисти неге ӱредет?

¹⁴ Бистиҥ бӱткенисти бир де јалтанбас эки эјениҥ теми тыҥыдар аргалу. Олордыҥ бирӱзи Нанси Юэн эје коммунисттер башкарып турган Кыдат јеринде јаткан. Бу эјениҥ сыны  бӱдӱн јарым метрдеҥ бийик эмес те болгон болзо, ол коркышту јалтанбас кижи болгон *. Јаҥныҥ улузы оны Каандык керегинде сӱӱнчилӱ јарды јарлабазын деп токтодып та турарда, ол јарлаар ишти бир де токтотпогон. Оныҥ тӱрмеде отурган ӧйин чотозо, 20 јыл кире болот. Юэн эјени шылаган улус: «Бӱдӱн ороондо оноҥ кедер кижи болбогон» — деп айдатан.

¹⁵ Совет јаҥныҥ ӧйинде Валентина Гарновская эје ӱч катап тӱрмеде отурган. Оныҥ тӱрмеде отурган ӧйлӧрин бӱдӱнге алза, 21 јылга једе берет *. Бу эје неде бурулаткан? Ол јарлаар ишти бир де токтодор кӱӱни јок болгон. Оныҥ учун јаргы оны эҥ ле јаман кинчектер эткен улустыҥ тоозына кошкон. Бу эки чындык эје Иегованыҥ болужында бир де алаҥзыбаган. Оныҥ учун олор јалтанбас болуп арткан.

16. Чыннаҥ ла јалтанбас болорго биске не болужар?

¹⁶ Бу темдердеҥ биске бойыска иженбес керек деп кӧрӧдис. Карын Иегова бисле кожо, ол бис учун тартыжып јат деп бӱдер керек (Јаҥ. т. 1:29, 30; Зах. 4:6). Јӱк анайып, бис чыннаҥ јалтанбас болорыс.

17, 18. Иоанн 15:18—21-ле болзо, Иисус биске не керегинде озодоҥ айдып салган? Јартап беригер.

¹⁷ Кажы ла кижи улус ого тоомјылу баштанзын деп кӱӱнзейт. Је улус бисти јаман кӧрӱп турза, биске оны јӱрегиске јуук албас керек. Иисус мынайып айткан: «Кижи Уулы учун улус слерди јаман кӧрӱп, сӱрӱп, айткылап, адыгарды јамандап турза, кежиктӱ болгоныгар ол» (Лука 6:22). Бу сӧстӧрлӧ ол нени айдарга сананган?

¹⁸ Мында улуска јаман кӧрдӱрерге јарап турар керек деп айдылбай јат, је христиандар улуска јаман кӧрдӱрер деп, Иисус озодоҥ айдып салган. Бис бу «телекейдеҥ эмезис». Бис Христостыҥ ӱредӱлериле јӱрӱп јадыс, Кудайдыҥ Каандыгы керегинде јарлап јадыс. Оныҥ да учун бу телекей бисти сӱӱбей јат. (Иоанн 15:18—21 кычырыгар.) Бис озо ло баштап Иегованы сӱӱндирерге кӱӱнзеп јадыс. Је улуска теҥеридеги Адабысты сӱӱп турганыс јарабай турза, биске оны јӱрекке јуук албас керек.

19. Элчилер биске кандый тем кӧргӱскен?

 ¹⁹ Улус нени де айдып эмезе нени де эдип турза, Кудайга бӱдӱп турганаардаҥ бир де уйалбагар (Мих. 4:5). Улустаҥ коркыбай турарга, Иисусты ӧлтӱргениниҥ кийнинеҥ Иерусалимде элчилердиҥ нени эткенин шӱӱп сананары болужар. Иудейлердиҥ кудай јаҥыныҥ башчылары олорды кӧрӧр кӱӱни јок деп, элчилер билер болгон (Ап. ижи 5:17, 18, 27, 28). Андый да болзо, олор ӧргӧӧгӧ кажы ла кӱн барып, Христостыҥ ӱренчиктери болгонын јажырбай, ачыгынча јарлап турдылар (Ап. ижи 5:42). Олор бир де коркыбаган. Бис те олор чылап, Иегованыҥ Керечилери болуп турганысты иште, школдо, айылдаштарга уйалбай айдып турзаас, коркыбай барарыс (Ап. ижи 4:29; Рим. 1:16).

20. Элчилер улуска јаман кӧрдӱрип турган да болзо, сӱӱнчизин недеҥ улам јылыйтпаган?

²⁰ Элчилер јаман кӧрдӱрткен де болзо, сӱӱнчизин јылыйтпаган. Улустыҥ нениҥ учун анайып баштанып турганын олор билер болгон, оныҥ учун Иегованыҥ табын бӱдӱрип јӱргениле оморкоп туратан (Лука 6:23; Ап. ижи 5:41). Элчи Петр соондо мындый сӧстӧр бичиген: «Чындык учун шыралап та јӱрген болзогор, слер кежиктӱ [ырысту, ЈТ]» (1 Петр 2:19—21; 3:14). Оныҥ учун бисти де, чынды эдип турганыс учун, јаман кӧрӱп јадылар. Бис мыны ундыбай турзаас, качан да улустаҥ коркыбазыс.

21, 22. а) Истежӱлерге белетенип аларга, слер нени эдерге шӱӱп алдаар? б) Келер јӧрмӧлдӧ нени шӱӱжерис?

²¹ Бис истежӱлердиҥ толкуны качан табарарын эмезе Иеговага бажырары качан чек токтодылып каларын билбезис. Оныҥ учун бӱгӱннеҥ ле ала Иеговала колбуларысты тыҥыдар керек, јаман кӧрдӱрип те турзаас, јалтанбас болорго ло сӱӱнчилӱ артарга ӱренер керек. Анайып бис келер ченелтелерге белен болорыс.

²² Је слердиҥ јадып турган јереерде, Иеговага бажырары токтодуда болзо, нени эдер? Келер јӧрмӧлдӧ мындый айалгада Иеговага иштеерге болужатан библиялык принциптер шӱӱжилер.