1. Hano aniniho misadayto kita misiˈayaw to sapalak hani?

MAFANAˈAY ci Yis o kakaˈintehen no tamdaw ko mikotoday cingranan a tamdaw. Mansa ˈayaw no papatayen cingra a dadaya, palimoˈotan ningra cangra. (Yohani 17:14) Mikitiya misatapang, padadotocay kariˈangen no misafelitay to kimad ko madimadiay a Krisciyang. (2 Timoti 3:12) Mangata mangataay ko hererekan noniya lekakawa, wa matongal ko macadaay ita a sapalak.—Matay 24:9.

2-3. (1) Ciˈangiay to tamdaw a harateng, sasamaan mifiyor kitaanan hani? (2) Oniya lalakaw mamilengo to maanan?

² Sasamaan kita aniniho misaday misiˈayaw to sapalak hani? Hamaan haratengen ita o maanan a demak ko mamalifa ita noikor, ano mihaen o mamalowid no ˈangi ato cariraw kita. Telocto soˈlin ira ko sapalifet i, wa mapadikto no talaw kita. (Taneng 12:25; 17:22) “ˈAda ci Akoma” misaka dademakay to ciˈangiay a falocoˈ a miˈodis kitaanan. (1 Pitiro 5:8, 9) Sasamaan kita aniniho patanektek to pakasoˈlinay falocoˈ no niyah hani?

³ Oniya lalakaw wa milengo kita, sasamaan a patanektek to kalalaˈed no niyah aci Yihofa, Ato hano aniniho a mihaen to demak. Wa milengoho kita sasamaan palahad to timolo, ato sasamaan misiˈayaw to kaˈinteh no tao.

4. Pakayni i Hipray 13:5, 6, pakasoˈlinen ita ko maanan hani? Misamaanay?

⁴ Pakasoˈlinen to maolahay ci Yihofa tisowanan, cowa ko mamiliyas a mifalah tisowanan. (ˈOsien ko Hipray 13:5, 6.) Cecay lalakaw no ˈayaway a Mikecolay, sanay ko sowal: “Ano  matongal ko kafanaˈ no tamdaw to Kawas, ano misiˈayaw to sapalifet wa matongal ko pitadiˈec Cingranan.” Matatodongay koniya sowal! Ano tatahatolas ko pihadidi i sapalak, kalimlaan ko kaolah ita ci Yihofaan, mitadiˈec Cingranan, aka a cisasa to olah Ningra kitaanan.—Matay 22:36-38; Yakop 5:11.

5. O manan ko papadama tisowanan mitinako to olah ni Yihofa hani?

⁵ Romiˈamiˈad miˈosi to Fangcalay Cudad, o sapiingidaw ci Yihofaan ko patosokan a micekiw. (Yakop 4:8) Ano miˈosi kiso i, samacayen ko capeling ni Yihofa, o olah, siniˈada ato sidaˈitay, mikitira i sasowalen ato midemakan Ningra, mitinako to olah ato damsay Ningra. (Kasadakan 34:6) O roma tamdaw pasangaray pakasoˈlin to maolahay ko Kawas cangranan, samanen cowa ka tahatanam cangra to olah no tao. Ano iraay ko mahaenay a harateng iso i, to romiˈamiˈad tanamen mitilid to samanay ci Yihofa a siniˈada tisowanan, midipot tisowanan. (ˈOlic 78:38, 39; Loma 8:32) Tikolen iso miharateng ko malifaay no niyah, midotim to Kimad no Kawas, wa madoloto maharateng ko adihayay nano demak ni Yihofa tisowanan. Ano miakoˈid kiso ci Yihofaan, wa matongal ko tanektek no kalalaˈed iso Cingranan.—ˈOlic 116:1, 2.

6. Pakayni i ˈOlic 94:17-19, ano mingitangi a mitolon wa ira ko maanan a epoc hani?

⁶ Micerid a mitolon. Haratengen ko cecay a wawa mitadiˈecay i falohang no maolahay cingranan a wama, maedeng rihadayay cingra, makahi a pasowal to wama to kihcod a mifekaday a demak. Ano mikifalocoˈ kiso mingitangit mitolon ci Yihofaan i, wa milifok to malecaday ngaˈayay a kalalaˈed Cingranan. (ˈOsien ko ˈOlic 94:17-19.) Ano mitolon kiso ci Yihofaan i, hamaan tereken. O katalawan ka calemceman a demak pasowal han ko ciolahay a Wama. (Radiw no Mararomay 2:19) Ano mihaen i, wa matinakoto iso ko sapafeli no Kawas a ‘rihaday, ikakaay no niharatengan no tamdaw.’ (Filipi 4:6, 7) Ano mararid kiso mifowah to harateng i Kawas, wa matongal ko piingid iso Cingranan.—Loma 8:38, 39.

7. Hano pakasoˈlin to mamalaˈosi maemin ko sapalemed no Hongti Kitakit no Kawas hani?

⁷ Pakasoˈlin to mamalaˈosi maemin ko sapalemed no Hongti Kitakit no Kawas. (Saˈosi 23:19) Ano cangoˈotay ko pakasoˈlin iso to sakiˈok no Kawas, wa madoloto a mapacekid ni Satan ato mihakelongay ciraan a tamdaw. (Taneng 24:10; Hipray 2:15) Sasamaan kiso paˈicel to pakasoˈlin to Hongti Kitakit no Kawas hani? Tongalen ko kacipinang to pakayniay i Hongti Kitakit no Kawas a sakiˈok, mafanaˈ to hano mamalaˈosi koniya sakiˈok. Mihaen kiso mamilifok to samaanay a epoc hani? Nengnengen ita ko nalifetan no salikaka ci Cong Ce-Tan. * Pakayni i pihakelongan  na mapalitay cingra to 7 miheca, toya tatokian hano ngaˈay cingra mitafo to madimadi hani? Sanay cingra: “Cipinangay kako to Hongti Kitakit no Kawas, o soˈlinay koniya Hongti Kitakit, awaay ko mimimiming a sasa, mansa tanektek ko pakasoˈlin ako, cowa ko mamangiyangi.” Ano tanektek ko pakasoˈlin iso to sakiˈok no Kawas, wa matongal ko piingid ci Yihofaan, cowa ko mamakokiˈ.—Taneng 3:25, 26.

8. Misaˈicel mirienang to saˈopo, hano papadama kitaanan misiˈayaw to sapalak hani?

⁸ Micerid mirienang to saˈopo. Papadama ko saˈopo kitaanan matongal ko piingid ci Yihofaan. Misaˈicel kita mirienang to saˈopo anini, wa malaˈosi misiˈayaw to sapalak noikor. (Hipray 10:24, 25) Misamaanay hani? Anini ano pakayniay i mimingay a demak, sawad sa kita mirienang to saˈopo, ano misiˈayaw to katalawan noikor malingadho kiso a masaˈopo ha? Ano mararid kita mirienang to saˈopo anini, soˈlin tahalifa to pisafelit noikor, cowa ko mamisawad a mirienang to saˈopo. Mihaenay aniniho palahad to kaolah a mirienang to saˈopo, mihaen ira ko misafelitay noikor, anca makeceng no mikowanay, wa padadotoc kita midofdof to Kawas eca ko tamdaw.—Dmak 5:29.

9. Misaˈicel minaˈeng i falocoˈ to sinael, hano papadama kitaanan misiˈayaw to sapalak hani?

⁹ Misaˈicel minaˈeng i falocoˈ to kaolahan a sinael. (Matay 13:52) Cowa ka hakowa ko maharatengay iso a sinael alatek, kawra o fangcalay saocor ni Yihofa papadama tisowanan pakaharateng to adihayay sinael. (Yohani 14:26) O cecay salikaka na cecayay paliten i kapalitan no Kawali a Towic, sanay: “Mahemekay kako pinaay soˈot ko maharatengay ako a sinael, soˈlin cecayay kako, kawra ngaˈayay kako midotim to adihayay lalangian no Fangcalay Cudad.” Oniya sinael padamaay toniya salikaka miingid ci Yihofaan, padadotoc a madimadi.

10. Hano saˈicelen minaˈeng i falocoˈ ko sapahemek to Kawas a radiw hani?

¹⁰ Naˈengen i falocoˈ ko sapahemek to Kawas a radiw. Tiya mapalit ci Pawlo aci Silas i Filipi i, ngaˈayay romadiw to maharatengay sapahemek to Kawas a radiw. (Dmak 16:25) Itiniay i Suwiay a salikaka na tahalifaay to sapalak, tiya laplapen tayra i Sipoliya i, samanay milifok to haˈicel padadotoc a tanektek hani? Fafahiyan salikaka ci Mariya Fitu sanay: “Miradiwan niyam ko kihcod maharatengay sapahemek to Kawas a radiw.” Sowal ningra oniya radiw pakalalokay cangranan, padama  cangranan matongal ko piingid ci Yihofaan. Ano romadiw kiso to kaolahan no niyah, sapahemek to Kawas a radiw i, coko taˈangayay ko sapakalalok han? No hatiniho naˈengento i falocoˈ koniya sapahemek to Kawas a radiw!—Nengnengen ko sapatongal a lalakaw “ Nanay Ka Timolo.”

11-12. (1) Pakayni i saka 1 Samuil 17:37, 45-47, hano ira ko timolo ni Tafiti hani? (2) Mikitini mananamay ita ko maanan hani?

¹¹ Misaaliay kiso to timolo ngaˈ ngaˈay misiˈayaw to sapalak. Ano cangoˈotay ko timolo no niyah ano sanay kiso, sasamaan ko hademak hani? Haratengen o soˈlinay a timolo, cowa pilingat to tatirengan, ˈicel ato inaneng. Ngaˈayay haratengen ita ko kaemangay a Tafiti, samanay milood to ˈakawangay tamdaw ci Koliyatan. Palalinien toniya ˈakawangay tamdaw, poeneray mangiliway ci Tafiti, awaay ko sapilood a lalosidan, ano fonosto, awaay. Kawra timoloay cingra talaˈayaw milood toniya misatakalaway ˈakawangay a tamdaw.

¹² Hano ira ko timolo ni Tafiti hani? Samanen pakasoˈlinay cingra to kalacafayay ci Yihofa cingranan. (ˈOsien ko 1 Samuil 17:37, 45-47.) O misinanotan ni Tafiti, cowa ko hakowaay ko kaˈakawang ni Koliyat, ao ikakaay ko kataˈangay ni Yihofa ci Koliyatan. Mikitini o maanan ko mananamay ita hani? Ano pakasoˈlin kita kalacafayay ci Yihofa kitaanan, palinien ko misafelitay a tamdaw to Kawas o kaemingay cangra, mihaen wa taˈangayto ko timolo. (2 Rayray 20:15; ˈOlic 16:8) Sasamaan kita palahad to mahaenay a timolo, misiˈayaw to sapalak noikor hani?

13. Samaanen ita palahad ko timolo hani? Tadtaden.

¹³ Pakapapotal a mitenak to ngaˈayay lihaf no Hongti Kitakit no Kawas, wa ngaˈay kita palahad to timolo. Misamaanay hani? Samanen mitosil ngaˈay padama kitaanan mitadiˈec ci Yihofaan, miremo to matalaway to tamdaw a falocoˈ. (Taneng 29:25) Malecad o picerid ita mionto, kiemelay ko fatil, pakalomalomaˈ kita, itini i kaˈalomanan ato pisasingdian a mitosil, ato icowacowa kitiraan a misawacay, wa matongal ko timolo ita. Aniniho timoloto kita a misawacay, soˈlin maconged ko pitosil noikor, wa padadotocho kita a mitosil.—1 Tisalonika 2:1, 2. 

14-15. Mikitini taˈarawan noniya tatosaay salikaka, mananamay ita ko maanan hani?

¹⁴ Iraay ko tatosa madimadiay fafahiyan salikaka paihkalay to kafahkaˈan a timolo, ngaˈayay  nanamen ita ko ngaˈayay taˈarawan nangra. Salakaten ita minengneng ko tinakoan no salikaka ci Yuan Nai-Wei, o ˈakawang ningra 150 kongfen, kawra timoloay cowa ka talaw cingra, cowa paselaˈ a mitenak to ngaˈayay lihaf no Hongti Kitakit. Telocto, 20 ira ko pina miheca mapalit i Ciwkoku. O misawkitay cingranan a ˈaˈideman, somowalay “o saˈatekakay a tamdaw i polong no kitakit” cingra, sanay. *

¹⁵ Salikaka ci Falentina kinatoloay mapalit i Suwiay, 21 miheca ko halafin. Fanekfekay cingra mitosil, o “mikiriwiˈay katalawan a mapalitay” cingra, sanay ko sowal no mirikecay. * Oniya tatosaay salikaka hano tada timolo hani? Samanen pakasoˈlinay cangra kalacafayay ci Yihofa cangranan.

16. Samaan kita ngaˈ ngaˈayto ira ko soˈlinay a timolo hani?

¹⁶ Sapalahadaw kita to timolo, hamaan mitadiˈec to ˈicel ato inaneng no niyah, ao papakasoˈlinen to kakalacafay ci Yihofa kitaanan, midipotay kitaanan. (Limoˈot 1:29, 30; Cikariya 4:6) Mihaen wa ngaˈayto ira ko soˈlinay a timolo no mita.

17-18. O sowal ni Yis itini i Yohani 15:18-21, o manan ko tatodong hani?

¹⁷ Manaokaniw maolahay kita kangodoen no tao, kawra soˈlin caka olah ko tao kitaanan, o awaayto ko kapo no niyah, hamaan haenen ko harateng. Na pasowalay ci Yis: “Ano kaˈintelen no tamdamdaw kamo, ano mafalah kamo, ano malokes kamo, ano mapakangodo kamo tona mitoor kamo i takowanan i, o malemeday kamo.” (Luka 6:22) O maanan ko tatodong no sowal ni Yis hani?

¹⁸ Maolahay ko Krisciyang kaˈintehen no tamdaw, cowa ka saan ko sowal ni Yis, o aira ko tamdaw mihaen kitaanan, o sanay. Cowa ko noni hekal kita, mitooray to sapasifanaˈ ni Yis a maˈorip, hanaca patenakay to lihaf no Hongti Kitakit, mansa mikaˈinteh ko hekal tamdaw kitaanan. (ˈOsien ko Yohani 15:18- 21.) Maolahay kita ci Yihofaan, sapakahemekaw Cingranan, ano mikaˈinteh ko tao kitaanan i, o nangra a raraw kora, cowa kono mita.

19. Samaan kita minanam to taˈarawan no tarokos hani?

¹⁹ Hamaan pakayni i sowal ato midemakan no tao, ecato ka timolo mihai to Misawacayay Tamdaw ni Yihofa ko niyah. (Mika 4:5) Ikor no mapatay ci Yis, timoloay ko tarokos i Yirusalim a mitosil, mikitini i taˈarawan nangra wa ngaˈay pakalalok kitaanan. Itiya, soˈlin kaˈintehen no ˈaˈideman no Yutaya ko tarokos, kamayan fanekfek tayra i fangcalay sefi a mitosil, caka talaw to tao a mafanaˈ to nisawawaan ni Yis cangra. (Dmak 5:17, 18, 27, 28, 42) Cowa ka pakayni kaciˈangi a misawad mitosil. Malecaday, micerid kita mitosil, caka talaw mafanaˈ ko cafay matayal, cafay micudad, fiyafiyaw to Misawacayay Tamdaw ni Yihofa kita, mihaen mamaremo ko matalaway to tamdaw a falocoˈ.—Dmak 4:29; Loma 1:16.

20. Soˈlin kaˈintehan no tao ko tarokos, misamaanay kamayan cangra a mitafo to lipahakay hani?

²⁰ Mafanaˈay ko tarokos, pakayniay i pidofdof to araaw ni Yihofa a kaˈintehen no tao, mansa malikoen cangra, pakayni ko sakahemek. (Luka 6:23; Dmak 5:41) Sanay ko sowal no tarokos ci Pitiro: “Ano mapadepades kamo to nano nika moecel no demak namo i, o malemeday kamo.” (1 Pitiro 2:19-21; 3:14) Ano mafanaˈ kita pakayniay i matatodongay a demak a kaˈintehen no tao, cowato ko pakayni katalaw a misawad mihodop ci Yihofaan.

21-22. (1) Samanen iso misaday a misiˈayaw ko sapalak hani? (2) Dotoc a lalakaw mamilengo to maanan hani?

²¹ Cowa ka fanaˈ kita to hacowa tahalifa to sapalak, cowa ka fanaˈ to midokoay ci Yihofaan a tayal hacowa makeceng no mikowanay no hekal. Kawra, nohatini ano patanoktoken ko kalalaedˈ ita aci Yihofa, palahad to timolo, mafanaˈ misiˈayaw to pikaˈiteh no tao. Aniniho misadayto ngangaˈay padadotoc a madimadi misiˈayaw to sapalak noikor.

²² Ano makeceng no mikowanay no hekal ko midokoay a demak no mita i, wa samaanto hani? Dotoc a lalakaw wa milengo to, o manan a limoˈot no Fangcalay Cudad papadama kitaanan padadotoc a midoko ci Yihofaan.