1. Inyuki di nlama ba nkôôbaga i boma ndééñga?

I U ILOLE ba nol Nwet wés Yésu, a bé yi le b’a oo ba bobasôna ba bé lama pohol i yila banigil bé. (Yôhanes 17:14) Ibôdôl ha ngéda i ipam i len ini, Mbôgi Yéhôva i i tiñi ni Djob i mboma ndééñga. (2 Timôtéô 3:12) Nano nu lisuk li hiai hini li yé bebee, di nlama ba nkôôbaga i tehe le baoo bés b’a ke ndigi ni bisu i oo bés.​—Matéô 24:9.

2-3. (a) Kii di nlama yi inyu woñi? (b) Kii di ga tehe munu yigil ini?

² Lelaa di nla kôôba nano i boma ndééñga? Di gwé bé ngôñ i hégda i mam momasôna ma nla pémél bés. Inyule ibale di nke i hégda mo, woñi ni nduña bi ga tômbôs bés. Ibale di nhoñol i mam mabe momasôna ma nla pémél bés, di nla lôôha kon woñi kayéle di waa gwélél Djob ilole di mboma ndutu. (Bingéngén 12:25; 17:22) Woñi u yé jôl gwét ikeñi “nkolba [wés] le Nsohop” a ngwélél inyu kolba bés. (1 Pétrô 5:8, 9) Kii di nla boñ nano inyu ba nkôôbaga i hônba ndééñga?

³ Munu yigil ini, di ga tehe lelaa di nla lédés maada més ni Yéhôva, ni inyuki i nlôôha ba nseñ i boñ hala nano. Di ga pôdôl ki jam di nla boñ inyu kéñbaha ñem wés ngui. Di ga sôk tehe lelaa di nla hônba ôa i bôt ba nkolba bés.

4. Kiki kaat Lôk Héber 13:5, 6 i niiga bés, di nlama ba nkwoog nkwa ni kii, inyuki?

⁴ Ba nkwoog nkaa le Yéhôva a ngwés we ni le a ga yôi bé we kekikel. (Añ Lôk Héber 13:5, 6.) Nano a yé  ngandak nwii le Nkum Ntat a bi kal le: “I mut a nyi Djob loñge loñge, to ngéda ndééñga, a mbôdôl nye ñem i nya i nlôôha.” Kinje maliga! Inyu hônba ndééñga, di nlama gwés Yéhôva, di bôdôl ki nye ñem ni ñem wés wonsôna; di pééna bañ kekikel le Yéhôva a ntôñ bés.​—Matéô 22:36-38; Yakôbô 5:11.

5. Kii i ga hôla we i nôgda le Yéhôva a ngwés bés?

⁵ Ibale u nsômbôl kôôge Yéhôva bebee, añ Bibel hiki kel. (Yakôbô 4:8) Kiki u mba u nke ni bisu i añ, bok mahoñol moñ i ngii bilem bi Yéhôva. I ngéda u ñañ, noode nok ipam limbe likala gwéha yé inyu yoñ i nene bipôdôl gwé ni maboñok mé. (Manyodi 34:6) Hala a nla lédél bahogi i hémle le Djob a ngwés bo inyule ba yé ngi nôgda le mut a ngwés bo. Ibale u nôgda nlélém, soho noode tila mam momasôna Yéhôva a mbôñôl we hiki kel inyu unda we konangoo ni loñgeñem. (Tjémbi 78:38, 39; Rôma 8:32) Ibale u mbigda i mam ma mpémél we, u soñdaga ki ma u ñañ i Bañga i Djob, bebek u yé le u yimbe ngandak mam Yéhôva a ma bôñôl we. Ibale u nti Yéhôva mayéga inyu mam a mboñ, w’a lédés maada moñ ni nye.​—Tjémbi 116:1, 2.

6. Inoñnaga ni kaat Tjémbi 94:17-19, lelaa masoohe ma nlôl ñem ma nla hôla we?

⁶ Soohe hiki ngéda. Hégda yom hisii mañge munlôm hi nôgda i moo ma isañ wé nu gwéha. Mañge nu a nôgda le yom ibe yo ki yo i nla bé pémél nye, kayéle a nyible isañ ñem wé inyu kal nye i mam mabe ni malam a mboma yokela. Yak bés di nla nôgda nlélém jam ibale di nkôôge Yéhôva bebee hiki kel ni njel masoohe. (Añ Tjémbi 94:17-19.) Mu kiki u mba u nsoohe Yéhôva, “kôp yaga ñem woñ wengoñle malép,” u añle ki Isoñ nu gwéha mam momasôna ma nkônha we woñi, yak ni ma ma ntééñga we. (Minlénd mi Yérémia 2:19) Lisuk li mba lelaa? U ga nôgda i yom Bibel i nsébél le “nsañ Nyambe u u nloo mahoñol momasôna.” (Filipi 4:6, 7) Ibale u nke ni bisu i soohe hala, u ga nôgda le u nkôôge Yéhôva bebee.​—Rôma 8:38, 39.

7. Inyuki u nlama ba nkwoog nkaa le mimbônga mi Djob inyu Ane mi ga yon?

⁷ Ba nkwoog nkaa le bisai Ane Djob i nlona bi ga yon. (Ñanga bôt 23:19) Ibale u gwé bé botñem le mimbônga mi Djob mi ga yon, i nla ba jam li ntomb le Satan ni bagwélél bé ba kônha we woñi. (Bingéngén 24:10; Lôk Héber 2:15) Lelaa u nla kéñbaha bôdôl yoñ inyu Ane Djob nano? Tjek ngéda inyu nigil mimbônga Djob a’ yônôs ni njel Ane yé, ni inyuki u nla ba nkwoog nkaa le mi ga yon. Lelaa hala a ga hôla we? Di  yoñ hihéga hi mankéé Stanley Jones nu a bi boñ nwii minsaambok i mok inyu hémle yé. * Kii i bi hôla nye i téñbe? A bi kal le: “Me bééna botñem i ngui, inyule me bé yi kii i yé Ane Djob ni le i ga loo, me bé nkwoog nkaa hala. Jon mut nye ki nye a bi la bé boñ me le me tjôô Yéhôva.” Ibale u gwé hémle i ngui mimbônga mi Djob, u ga kôôge bebee ni Yéhôva ibabé le woñi u tômbôs we.​—Bingéngén 3:25, 26.

8. Umbe nseñ di gwé ngéda di ntôl bé makoda? Toñol.

⁸ Kee makoda hiki ngéda. Makoda ma nhôla bés i kôôge Yéhôva bebee. Ibale di ntôl bé makoda, hala a mba bés jam li ntomb i hônba ngéda ndééñga y’a loo. (Lôk Héber 10:24, 25) Inyuki? Ibale di nwas le disii di mam di kéñ bés nano i ke makoda, kii i nla pémél bés dilo di nlo ibale ngomin a nsôñga le di kodba ni lôk kéé yés i bôda ni i bôlôm? Jam lipe li yé le, ibale di nyoñ makidik ma ngui i ke makoda momasôna, di ga waa bé ke mo to ibale bakolba bés ba nsôñga bés i kodba. Nano nyen di nlama hôlôs gwéha inyu makoda. Ngéda di ngwés di nke makoda, ngolba to yada, to mbén ngomin, bi ga kéñ bé bés i nôgôl Djob iloo bôt.​—Minson mi baôma 5:29.

9. Inyuki i tééda minlôñ mi Bibel i yé loñge njel inyu kôôba ndééñga?

⁹ Tééda minlôñ mi Bibel u nlôôha gwés. (Matéô 13:52) Boña woñ a ta bé peles, ndi Yéhôva a nla gwélél mbuu mpubi wé inyu hôñlaha we minlôñ mi Bibel mi. (Yôhanes 14:26) Béñge jam mankéé wada nu ba bi ha i ndap mok nyetama i pes likôl i loñ Jaman a bi kal: “Kinje bisai le me bi tééda ngandak minlôñ mi Bibel i ño! Hala a bi hôla me i bana ngandak minkwel mi Bibel i soñda mu dilo di tjodisôna.” Minlôñ mi Bibel mi, mi bi hôla mankéé wés i yén bebee ni Yéhôva​—ni i téñbe ni nye.

10. Inyuki di nlama tééda bibuk bi tjémbi ni ño?

¹⁰ Tééda bibuk bi tjémbi bi bi mbégés Yéhôva, u tôp ki tjo. Ngéda Paul bo Silas ba bé i mok i Filipi, ba bi kahal tôp tjémbi ba bé yi. (Minson mi baôma 16:25) Nlélém ni bilôk bikéé gwés bi nlômbi loñ Ruslan, bi ba bi  kena minkôm i Sibéria. Kii ba bi boñ inyu tééda hémle i ngui? Sita Mariya Fedun a mbigda jam ba bi boñ: “Di bé loñge tjémbi tjodisôna di bi nigil mu kaat yés tjémbi.” A nkal le i tjémbi di di bi kônde lédés bobasôna, di bi hôla ki bo i kôôge Yéhôva bebee. Baa u nôgda makénd ngéda u ntôp tjémbi di Ane u ngwés? Ibale ñ, bôdôl tééda bibuk bi tjémbi di ni ño!​—Béñge minkéñék mi matila le “ Ti me ñem ngui.”

11-12. (a) Inoñnaga ni kaat 1 Samuel 17:37, 45-47, inyuki David a bé nyonok ni ñem ngui? (b) Bimbe biniigana di ñôt mu hihéga hi David?

¹¹ Inyu hônba ndééñga, di gwé ngôñ ni ñem ngui. Ibale u nôgda le u nhañ i lem i, kii u nla boñ? Bigda le inyu bana ñem ngui, i mbéda bé le u ba mpémba mut, le u bana ngui minsôn, tole u ba mut likeñge. Di yoñ hihéga hi David nye mañge wanda, ngéda a bé ke i boma Gôliat. I bisu bi mpémba mut u, David a bé lôôha ba isii, mbomba, ngi bañga jôl i gwét. David a bééna bé to pansoñ. Ndi a bé nyonok ni ñem ngui. Jon ni makénd momasôna, David a nyamnda i ke i jôs mut ngôk nunu.

¹² Inyuki David a bé nyonok ni ñem ngui? A bé nkwoog nkaa le Yéhôva a bé ni nye. (Añ 1 Samuel 17:37, 45-47.) David a bi béñge bé le Gôliat a yé mpémba ilel nye, ndi le Gôliat a nhee bé yom yo ki yo bisu bi Yéhôva. Kii ñañ u u niiga bés? Di ga nôgda ñem ngui ibale di nyi ntiik le Yéhôva a yé ni bés, ni le bakolba bés ba nhee bé yom yo ki yo bisu bi Bayemlikok. (2 Miñañ 20:15; Tjémbi 16:8) Lelaa di nla kéñbaha ñem wés ngui nano, ilole ndééñga i mbôdôl?

13. Lelaa di nla kéñbaha ñem ngui? Toñol.

¹³ Di nla kéñbaha ñem wés ngui nano ngeñ di ñañal ñañ nlam u Ane Djob i mbamba. Inyuki? Inyule likalô li nhôla bés i bôdôl Yéhôva ñem, ni i yémbél woñi u mut binam. (Bingéngén 29:25) Nlélém kiki minsôn nwés mi nlet ngéda di nhianda nwo, hala nyen di nkônde bana makénd ngéda di ntéé likalô li mandap ni mandap, li mbamba, li mpaba, ni i bibôm. Ibale di nhôlôs makénd més i téé likalô nano, di ga ba nkôôbaga i ke ni bisu i téé jo to ngéda b’a sôñga bés.​—1 Tésalônika 2:1, 2.

14-15. Bimbe biniigana di nla ôt mu dihéga di Nancy Yuen ni Valentina Garnovskaya?

 ¹⁴ Di nla ôt biniigana mu dihéga di bisita gwés biba, bi bi bi unda lôs ñem. Nancy Yuen a bé loo bé méta wada ni pes, ndi a bé kon bé mut nye ki nye woñi. * Ngéda ngomin a bi ti oda le ba téé ha bañ likalô, a bi tjél nôgôl yo. Inyu hala nyen énél i Kina i bi ha nye i mok inyu 20 ma nwii. Bisôñda bi bé bat nye mambadga bi bi kal le “mut numpe [mu loñ yap] a bééna bé nledek ño kiki nye.”

¹⁵ Yak Valentina Garnovskaya, a bi ke i mok ngélé aa i nlômbi loñ Ruslan, i ndék yosôna a bi tégbaha 21 nwii. * Inyuki? Inyule makidik mé i téñbe ni likalô ma bi boñ le bisônda bi tehe nye kiki “ntonba u mbôk ni u nsôk.” Kii i bi ti bisita bini gwobiba ñem ngui? Bi bé nkwoog nkaa le Yéhôva a bé ni bo.

16. Kii i yé lipigil li bañga ñem ngui?

¹⁶ Kiki di ntehe, di nlama bé bôdôl bésbomede ñem inyu bana ñem ngui. Ndi, di nlama ba nkwoog nkaa le Yéhôva a yé ni bés ni le nyen a njo inyu yés. (Ndiimba Mbén 1:29, 30; Sakaria 4:6) Lipigil li bañga ñem ngui toi li.

17-18. Inoñnaga ni Yôhanes 15:18-21, mambe mabéhna Yésu a bi ti bés? Toñol.

¹⁷ Di yé maséé ngéda bôt bape ba ti bés lipém, ndi di yoba bañ i hoñol le di gwé bé nseñ wo ki wo inyule bôt ba ñoo bés. Yésu a kal le: “Maséé ni bé hiki ngéda bôt ba ñoo bé, ni ngéda ba nhéya bé i ntôñ wap, ba solok bé, ba ôbhak bé jôl le ni yé bibéba bi bôt inyule ni yé banigil ba Man mut.” (Lukas 6:22, MN.) Kii Yésu a bé sômbôl kal?

¹⁸ Yésu a bé kal bé le bikristen bi ga ba maséé inyule ba ñoo bo. Ndi a bé béhe ndik bés inyu jam li nla pémél bés. Di  ta bé ba nkoñ ’isi. Di niñ inoñnaga ni biniigana bi Yésu, di leglak nlélém nwin a bé legel. Jon nkoñ ’isi u ñoo bés. (Añ Yôhanes 15:18-21.) Di gwé ngôñ i lémél Yéhôva. Ibale bôt ba ñoo bés inyule di ngwés Tata, jap li nyoo.

19. Lelaa di nla kôna ndémbél i baôma?

¹⁹ U nwas bañ le yom yo ki yo bôt ba binam ba nkal tole ba mboñ i kônha we hison i yiba kiki Mbôgi Yéhôva. (Mika 4:5) Ndémbél i baôma ba ba bé i Yérusalem i mbus nyemb Yésu i nla bane bés nseñ inyu yémbél woñi u mut binam. Ba bé yi ipam limbe likala baéga base i Lôk Yuda ba bé oo bo. (Minson mi baôma 5:17, 18, 27, 28) Ndi hiki kel ba bé ke i témpel, ba bé kal bôt le ba yé banigil ba Yésu. (Minson mi baôma 5:42) Ba bi nwas bé le woñi u sék bo njel. Yak bés di nla yémbél woñi wés u mut binam i ngeñ hiki ngéda di nyis bôt i mbamba le di yé Mbôgi Yéhôva​—hala wee i homa bôlô, i suklu, tole i het di nyééne.​—Minson mi baôma 4:29; Rôma 1:16.

20. Inyuki baôma ba bé maséé to hala kiki ba bé oo bo?

²⁰ Inyuki baôma ba bé maséé? Ba bé yi inyuki bôt ba bé oo bo, ba yoñok ndééñga ba bé kôs kiki jam li lipém inyule ba mboñ sômbôl Djob. (Lukas 6:23; Minson mi baôma 5:41) Ñôma Pétrô a bi tila i mbus ngéda le: “Ndi to i ba yaa le ni nlama son njonok inyu mam ma téé sép, wee ni yé nsaibak.” (1 Pétrô 2:19-21; 3:14) Tolakii di nyi le ba ñoo bés inyule di mboñ mam ma téé sép, di ga nwas bé kekikel le ôa i bôt ba binam i tômbôs bés.

21-22. (a) Bimbe bitelbene u nyoñ inyu kôôba ndééñga? (b) Kii di ga pôdôl i yigil i noñ?

²¹ Di nyi bé i kel bôt b’a bôdôl tééñga bés, to i kel ngomin a’ kit le di kena ha bañ nson wés ni bisu. Ndi di nyi le nano nyen di nla bôdôl lédés maada més ni Yéhôva, ngéda di nkéñbaha ñem wés ngui, ni ngéda di nigil i yémbél woñi u mut binam. Ngôôba yés i len ini i ga hôla bés i tééda ndéñbe yés dilo di nlo.

²² Ndi kii di ga boñ ibale ba nsôñga nson wés? I yigil i noñ, di ga pôdôl matiñ ma ma ga hôla bés i ke ni bisu i gwélél Yéhôva to ikété lisol.