1. Boasa ingkon taparade dirinta tu penganiayaan?

DI BORNGIN andorang so mate Jesus, didok ibana laho dihasogohon portibi on do angka siseanna. (Joh. 17:14) Sahat tu saonari pe, dianiaya angka halak na so sisomba Jahowa do angka halak Kristen na setia. (2 Tim. 3:12) Jala ala lam jonok ajal ni portibi on, lam marsitutu do nasida laho mambahen hita susa.​—Mat. 24:9.

2-3. (a) Aha do na boi masa molo mabiar hita? (b) Aha do na laho taulas di parsiajaran on?

² Songon dia do hita saonari paradehon diri laho mangadopi penganiayaan? Unang ma sai tapingkiri angka hasusaan na boi masa tu hita. Alana, on boi mambahen hita gabe mabiar jala marsak. Molo mabiar hita, olo do gabe tatadingkon Jahowa andorang so tahilala dope penganiayaan i. (Poda 12:25; 17:22) Biar ni roha, i ma sada cara na dipangke ‘musunta Sibolis’ laho mambahen hita gabe ndang setia tu Jahowa. (1 Ptr. 5:8, 9) Alani i, aha do na ingkon taulahon asa boi hita martahan mangadopi penganiayaan?

³ Di parsiajaran on, taulas ma songon dia carana asa lam togu parale-aleonta tu Jahowa, jala boasa ringkot taulahon i saonari. Asing ni i, taulas ma songon dia carana asa lam barani. Jala aha do na boi taulahon tingki mangadopi penganiayaan.

4. Di Heber 13:5, 6, aha do janji ni Debata tu hita, jala boasa ingkon pos rohanta tu janji i?

⁴ Pos ma rohamuna na dihaholongi Jahowa do hamu jala ndang tadingkononna hamu. (Jaha Heber 13:5, 6.) Piga-piga taon naung salpu, sada artikel di Joujou Paboahon hea mandok, “Halak na solhot tu Debata tongtong do  porsea tu Ibana tingki adong penganiayaan.” Alani i, asa boi hita martahan tingki mangadopi penganiayaan, ingkon tahaholongi do Jahowa jala porsea tu Ibana. Pos ma rohanta, sai disarihon do hita.​—Mat. 22:36-38; Jak. 5:11.

5. Aha do na boi mangurupi hamu mangkilala holong ni Jahowa?

⁵ Asa lam solhot tu Jahowa, jaha ma Bibel ganup ari. (Jak. 4:8) Tingki dijaha hamu Bibel, parrohahon ma angka parange ni Jahowa. Parrohahon ma songon dia Jahowa patuduhon holong sian aha na dihatahon dohot na diulahon Ibana. (2 Mus. 34:6) Ra adong do piga-piga halak na maol porsea tu holong ni Debata ala nasida sandiri ndang hea dihaholongi halak na asing. Molo songon i na dihilala hamu, ganup ari bahen ma daftar jala surat ma songon dia Jahowa tongtong patuduhon haburjuon dohot asi ni rohana tu hamu. (Ps. 78:38, 39; Rom 8:32) Molo sai dirimangi hamu pengalamanmuna dohot aha na dijaha hamu di Bibel, gabe godang ma na boi disurat hamu taringot naung diulahon Jahowa tu hamu. Molo diargai hamu do sude na hea diulahon Jahowa tu hamu, lam togu ma parale-aleonmuna tu Ibana.​—Ps. 116:1, 2.

6. Hombar tu Psalmen 94:17-19, aha do hasilna molo ringgas hamu martangiang?

⁶ Ringgas ma martangiang. Bayangkon ma sahalak dakdanak baoa na gomos dihaol bapakna. Dame do pangkilalaan ni dakdanak i jala pos do rohana paboahon tu bapakna sude na di pingkiran dohot na di rohana. Hamu pe, boi do mangkilala na sarupa molo martangiang hamu tu Jahowa ganup ari. (Jaha Psalmen 94:17-19.) Tingki martangiang, “usehon ma roham songon aek” jala paboa ma sude na mambahen hamu marsak jala mandele. (And. 2:19) Molo diulahon hamu songon i, hilalaonmuna ma na didok Bibel, i ma “hadameon na so boi diantusi jolma”. (Plp. 4:6, 7) Molo lam ringgas hamu martangiang, gabe lam togu ma parale-aleonmuna tu Jahowa.​—Rom 8:38, 39.

7. Boasa ingkon togu haporseaonmuna tu angka janji ni Debata taringot Harajaonna?

⁷ Marpos ni roha ma tu Harajaon ni Debata. (4 Mus. 23:19) Molo ndang togu haporseaonmuna tu janji ni Debata, gabe mura ma Sibolis dohot angka na mangihuthon ibana mambahen hamu mabiar. (Poda 24:10; Heb. 2:15) Alani i, songon dia do carana asa boi pos rohanta tu Harajaon ni Debata? Sian saonari, riset hamu ma taringot janji ni Debata di Harajaonna jala boasa boi pos rohanta na laho saut do janjina i. Songon dia on boi mangurupi hita? Parrohahon ma pengalaman ni si Stanley Jones, na hea dipenjara saleleng pitu taon alani haporseaonna. Aha do na mangurupi  ibana asa martahan? Didok ibana, “Gabe togu do haporseaonku ala huboto janji taringot Harajaon ni Debata. Pos do rohangku tusi. Alani i, ndang adong manang ise na boi mangambati ahu manomba Jahowa.” Molo togu haporseaonmuna tu janji ni Jahowa, lam solhot ma hamu tu Ibana jala ndang adong na boi mambahen hamu mabiar.​—Poda 3:25, 26.

8. Aha do pengaruhna molo lomo rohanta marpungu sian saonari? Patorang ma.

⁸ Tongtong ma ro tu parpunguan. Parpunguan boi do mangurupi hita asa lam solhot tu Jahowa. Molo ringgas hita marpungu, boi ma hita martahan tingki adong penganiayaan di ari na naeng ro. (Heb. 10:24, 25) Boasa? Alana, molo sian saonari tapaloas masalah na gelleng mambahen hita gabe ndang ro marpungu, tarlumobi ma haduan molo adong penganiayaan. Alana haduan olo do ra ditangkup hita manang dipamate ala marpungu. Alai molo marsitutu do hita ro tu parpunguan, tontu di ari na naeng ro pe ndang adong na boi mangambati hita ro marpungu. Alani i, sian saonari ma ingkon lomo do rohanta marpungu. Molo lomo rohanta marpungu, manang ise pe ndang adong na boi mangambati hita mangoloi Debata.​—Ul. 5:29. 

9. Boasa molo taingot angka ayat ni Bibel boi paradehon dirinta laho mangadopi penganiayaan?

⁹ Ingot ma angka ayat favoritmuna. (Mat. 13:52) Tontu ndang boi taingot sude ayat ni Bibel. Alai boi do tondi parbadia mangurupi hita laho mangingot muse angka ayat na hea tajaha. (Joh. 14:26) Parrohahon ma sahalak donganta baoa na dipenjarahon di Jerman Timur. Sahalakna do dibahen di sada penjara. Didok ibana, “Las hian do rohangku ala boi huingot marratus ayat ni Bibel! Nang pe sahalakku, boi ma hurimangi angka ayat i.” Angka ayat ni Bibel i mangurupi donganta on asa tongtong togu parale-aleonna tu Jahowa jala boi do ibana martahan.

10. Boasa porlu taingot angka endenta?

¹⁰ Ingot jala endehon ma angka ende laho mamuji Jahowa. Tingki dipenjarahon si Paulus dohot si Silas di Pilippi, marende do nasida laho mamuji Jahowa sian angka ende na diingot nasida. (Ul. 16:25) Suang songon i ma angka donganta na sian Rusia na diboan tu Siberia. Aha do na mangurupi nasida asa tongtong martahan? Donganta si Mariya Fedun  mandok, “Huendehon hami do angka ende na diingot hami na adong di buku endenta.” Didok ibana, angka ende i mangurupi nasida asa tongtong solhot tu Jahowa. Hea do dipatogu rohamu tingki mangendehon ende favoritmuna? Alani i, sian saonari ingot ma angka ende i!​—Ida kotak “ Bahen ma Hami Gabe Barani.”

11-12. (a) Hombar tu 1 Samuel 17:37, 45-47, boasa mansai barani si Daud? (b) Aha do na boi taparsiajari sian contoh ni si Daud?

¹¹ Ingkon barani do hamu tingki mangadopi penganiayaan. Alai molo dihilala hamu ndang barani hamu, aha ma na porlu ulahononmuna? Ingot ma, habaranion ndang ditontuhon sian balga ni dagingmuna, gogomuna manang hapistaranmuna. Pingkirhon ma songon dia si Daud mangalo si Goliat tingki poso ibana. Gelleng jala gale hian do si Daud marimbangkon si Goliat, jala ndang adong sinjata ni si Daud. Nang pe songon i, ndang mabiar si Daud. Barani do si Daud mandapothon si Goliat laho mangalo ibana.

¹² Boasa mansai barani si Daud? Ala pos do rohana na sai didongani Jahowa do ibana. (Jaha 1 Samuel 17:37, 45-47.) Nang pe dao umbalga si Goliat sian si Daud, alai ndang i na sai dipingkiri si Daud. Alana dibayangkon ibana, dao do umbalga Jahowa sian si Goliat. Aha ma na boi taparsiajari? Boi do hita gabe barani molo pos rohanta na sai didongani Jahowa do hita. Jala taingot ma, dao do umgelleng angka na marsogo ni roha tu hita sian Jahowa, Debata na Marhuaso. (2 Kron. 20:15; Ps. 16:8) Songon dia do carana asa lam barani hita andorang so ro dope penganiayaan?

13. Songon dia do carana asa lam barani hita? Patorang ma.

¹³ Molo ringgas hita marbarita na uli paboahon taringot Harajaon ni Debata, boi ma hita gabe lam barani. Boasa? Alana tingki marbarita, diajari do hita asa lam marpos ni roha tu Jahowa jala ndang mabiar tu angka halak. (Poda 29:25) Songon otot, lam gogo do molo dilatik. Hita pe boi do gabe lam barani tingki marbarita sian jabu tu jabu, di inganan na ribur, tingki kesaksian tidak resmi, manang di daerah bisnis. Molo lam barani hita marbarita saonari, boi ma lam rade hita marbarita nang pe diorai pamarenta.​—1 Tes. 2:1, 2. 

14-15. Aha do na boi taparsiajari sian pengalaman ni si Nancy Yuen dohot si Valentina Garnovskaya?

 ¹⁴ Boi do hita marsiajar sian dua donganta borua na mansai barani. Donganta si Nancy Yuen, timbona holan 1,5 meter. Alai ndang parbiar ibana. * Tongtong do ibana marbarita na uli nang pe diorai pamarenta. Ujungna, dipenjarahon pamarenta Cina ma ibana saleleng 20 taon. Angka na manangkup ibana mandok, molo donganta on “sahalak na jogal situtu” di negara i.

¹⁵ Suang songon i ma si Valentina Garnovskaya. Dipenjara do ibana tolu hali di Rusia saleleng 21 taon. * Boasa? Ala tongtong do ibana marbarita nang pe diorai. Angka na manangkup ibana mandok molo ibana “halak na berbahaya”. Aha do na mambahen dua donganta on mansai barani? Ala pos do roha ni nasida sai didongani Jahowa do nasida.

16. Aha do na boi mambahen hita barani?

¹⁶ Songon naung taulas, asa boi barani, ndang boi hita holan mangasahon gogonta sandiri. Alai ingkon pos do rohanta na sai didongani Jahowa do hita jala Ibana do na marporang humongkop hita. (5 Mus. 1:29, 30; Sak. 4:6) On ma na boi mambahen hita barani.

17-18. Songon na disurat di Johannes 15:18-21, aha do sipaingot na dilehon Jesus tu hita? Patorang ma.

¹⁷ Lomo do rohanta molo diargai halak. Alai unang ma metmet rohanta molo ndang lomo roha ni angka halak tu hita. Jesus mandok, “Marlas ni roha ma hamu molo dihasogohon halak hamu, dipasiding, dileai, jala diparoa-roa goarmuna tudos songon parjahat alani Anak ni jolma i.” (Luk. 6:22) Aha do lapatan ni hata ni Jesus i?

¹⁸ Ndang didok Jesus na lomo roha ni siseanna dihasogohon halak. Alai ibana naeng paingothon aha na laho masa tu hita. Ndang sian portibi on hita. Taihuthon  do ajaran ni Jesus di ngolunta jala marbarita do hita songon ibana. I do alana umbahen na dihasogohon portibi on hita. (Jaha Johannes 15:18-21.) Alani i molo dihasogohon halak hita ala mangkaholongi Jahowa, unang ma metmet rohanta.

19. Songon dia hita boi maniru angka apostel?

¹⁹ Aha pe na didok manang na diulahon halak, unang ma maila hamu ditanda gabe sahalak Sitindangi ni Jahowa. (Mik. 4:5) Hita boi marsiajar sian angka apostel di Jerusalem. Diboto nasida do sogo hian roha ni pamimpin agama Jahudi tu nasida. (Ul. 5:17, 18, 27, 28) Nang pe songon i, marbarita do nasida ganup ari di bagas joro jala barani do nasida mangangku na sisean ni Jesus nasida. (Ul. 5:42) Ndang mabiar nasida. Hita pe boi do gabe barani molo tapatandahon dirinta sahalak Sitindangi ni Jahowa tingki di parkarejoan, di singkola, dohot tu hombar jabunta.​—Ul. 4:29; Rom 1:16.

20. Boasa marlas ni roha angka apostel nang pe dihasogohon halak?

²⁰ Diboto angka apostel do boasa dihasogohon nasida, i ma ala mangulahon lomo ni roha ni Jahowa. I do na mambahen nasida marlas ni roha. (Luk. 6:23; Ul. 5:41) Alani i, didok apostel Petrus ma, “Nang pe marsitaonon hamu ala mangulahon na sintong, dapotmuna do las ni roha.” (1 Ptr. 2:19-21; 3:14) Tontu ndang tatadingkon Jahowa nang pe dihasogohon halak hita ala mangulahon na sintong.

21-22. (a) Songon dia do hamu paradehon diri andorang so ro penganiayaan? (b) Aha do na laho taulas di parsiajaran na mangihut?

²¹ Ndang taboto andigan ro penganiayaan tu hita manang andigan diorai pamarenta ulaonta. Alai taboto do sian saonari boi do hita paradehon diri. Tapatogu ma parale-aleonta tu Jahowa, tongtong patuduhon habaranion, jala tongtong marlas ni roha nang pe dihasogohon halak. Molo taulahon i, boi ma hita tongtong manomba Jahowa.

²² Alai songon dia do molo diorai pamarenta ulaonta? Di parsiajaran na mangihut, laho taulas ma angka prinsip ni Bibel na boi mangurupi hita asa tongtong manomba Jahowa tingki diorai pamarenta.