1. Taano ta kaipuhan niyatong mag-andam para sa panahon nin pagpersegir?

KAN banggi bago gadanon an satong Kagurangnan na si Jesus, sinabi niya na ikakaungis an gabos na nagdesisyon na magin disipulo niya. (Juan 17:14) Sagkod ngunyan, pinepersegir kan mga kontra sa tunay na pagsamba an maimbod na mga Kristiyanong Saksi ni Jehova. (2 Tim. 3:12) Mantang urog na nagdadangadang an katapusan kan sistemang ini nin mga bagay, inaasahan niyato na urog man kitang kokontrahon kan satong mga kaiwal.—Mat. 24:9.

2-3. (a) Ano an dapat na aram niyato dapit sa takot? (b) Ano an pag-uulayan ta sa artikulong ini?

² Paano niyato iaandam ngunyan an satong sadiri para maatubang an pagpersegir? Dai ta kaipuhan na pagparaisipon an gabos na posibleng mangyari sa sato, huling puwede kitang mangluyang marhay sa takot asin kahaditan. Tibaad magpadaog na kita sa mga peligro na dai pa man aktuwal na napapaatubang sa sato. (Tal. 12:25; 17:22) An takot sarong mapuwersang armas na hinihinguwang gamiton laban sa sato kan satong “kaiwal, an Diyablo.” (1 Ped. 5:8, 9) Ano an puwede niyatong gibuhon ngunyan tanganing pakusugon an satong sadiri?

³ Sa artikulong ini, pag-uulayan niyato kun paano ta mapapakusog an satong relasyon ki Jehova asin kun taano ta mahalagang marhay na ngunyan ta na iyan gibuhon. Pag-uulayan ta man kun ano an puwede niyatong gibuhon tanganing kumusog an satong buot. Panghuri, aaramon ta kun paano niyato maaatubang an pagkaungis kan mga nagkokontra sa sato.

4. Sigun sa Hebreo 13:5, 6, sa ano kita dapat na kumbinsido, asin taano?

⁴ Magin kumbinsido na namumutan ka ni Jehova asin na nungka ka niyang papabayaan. (Basahon an Hebreo 13:5, 6.) Dakul na taon na an nakaagi, an Torrengbantayan nagsabi: “An tawong midbid na marhay an Diyos mananarig na marhay sa saiya sa panahon nin pagbalo.” Totoo nanggad iyan! Tanganing maatubang an persekusyon, dapat na lubos niyatong kamutan si Jehova asin lubos na magtiwala sa saiya, na nungkang nagdududa na namumutan niya kita.—Mat. 22:36-38; Sant. 5:11.

5. Ano an makakatabang sa saimo na mamatian an pagkamuot ni Jehova?

⁵ Basahon an Bibliya aroaldaw sa katuyuhan na magin mas dayupot ki Jehova. (Sant. 4:8) Mantang nagbabasa, magpokus sa mamumuton na mga kuwalidad ni Jehova. Mation mo an saiyang pagkamuot asin pagpadangat na mahihiling sa mga sinabi asin ginibo niya. (Ex. 34:6) Tibaad nasasakitan an nagkapira na maniwala na namumutan sinda nin Diyos huling dai pa lamang ninda namatian na mamutan sinda. Kun arog ka kaiyan, purbaran na ilista kada aldaw an mga paagi na pinahilingan ka nin pagkahirak asin kabuutan ni Jehova. (Sal. 78:38, 39; Roma 8:32) Mantang pinag-iisipan mo an saimong mga eksperyensiya asin hinuhurop-hurop an mga nababasa mo sa Tataramon nin Diyos, posibleng marhay na dakul kang maiisip na mga ginibo ni Jehova para sa saimo. Mantang mas urog mong naaapresyar an mga ginigibo ni Jehova, magigin mas makusog an relasyon mo sa saiya.—Sal. 116:1, 2.

6. Sigun sa Salmo 94:17-19, paano makakatabang sa saimo an udok sa pusong pagpamibi?

⁶ Regular na mamibi. Isipon an sarong aking lalaki na kugos kan saiyang mamumuton na ama. Ligtas na marhay an pagmati kan aki kaya nasasabi niya ki Papa niya an gabos na nangyari sa saiya, marahay man o bako, sa aldaw na iyan. Puwede mo man iyan mamatian kun madulok ka ki Jehova paagi sa udok sa pusong pagpamibi kada aldaw. (Basahon an Salmo 94:17-19.) Mantang namimibi ki Jehova, “siring sa tubig, iula mo an saimong puso” asin sabihon sa saimong mamumuton na Ama an gabos mong ikinakatakot asin ikinakahadit. (Pan. [Lam.] 2:19, An Marahay na Bareta Biblia) Ano an magigin resulta kaiyan? Mamamatian mo an inaapod sa Bibliya na “katuninungan nin Diyos na nakakalabi sa gabos na pakasabot.” (Fil. 4:6, 7) Pag mas parati kang namimibi sa arog kaiyan na paagi, urog mong mamamatian na dayupot ka ki Jehova.—Roma 8:38, 39.

7. Taano ta dapat kang magin kumbinsido na magkakatotoo an mga panuga nin Diyos mapadapit sa saiyang Kahadian?

⁷ Magin kumbinsido na magkakatotoo an mga bendisyon kan Kahadian nin Diyos. (Bil. 23:19) Kun maluya an pagtubod mo sa mga panugang iyan, magigin mas madali ki Satanas asin sa mga alipores niya na takuton ka. (Tal. 24:10; Heb. 2:15) Paano mo mapapakusog ngunyan an pagtubod mo sa Kahadian nin Diyos? Mag-research dapit sa mga panuga nin Diyos manungod sa saiyang Kahadian asin sa mga dahilan kaya  makakasiyerto kang magkakatotoo an mga iyan. Paano iyan makakatabang? Pag-isipan an halimbawa ni Stanley Jones na napreso nin pitong taon huli sa saiyang pagtubod. * Ano an nakatabang sa saiya na maimbod na makatagal? Sinabi niya: “Huling napasarig ako kan kaaraman mapadapit sa kahadian nin Diyos, huling kumbinsido ako na maabot iyan asin ni minsan dai ko pinagdudahan iyan, mayong makakapatalikod sako ki Jehova.” Kun makusog an saimong pagtubod sa mga panuga nin Diyos, magigin mas dayupot ka ki Jehova asin dai ka madadaog nin takot.—Tal. 3:25, 26.

8. An satong sabuot dapit sa pag-atender sa mga pagtiripon sarong indikasyon kan ano? Ipaliwanag.

⁸ Regular na mag-atender sa Kristiyanong mga pagtiripon. Nakakatabang sa sato an mga pagtiripon na magin mas dayupot kita ki Jehova. An satong sabuot dapit sa pag-atender sa mga pagtiripon sarong indikasyon kun baga makakaya niyatong atubangon an maabot na mga persekusyon. (Heb. 10:24, 25) Taano man? Kun tinutugutan ta ngunyan an saradit na bagay na makaulang sa sato na mag-atender sa mga pagtiripon, ano an mangyayari pag-abot nin panahon kun kaipuhan ta nang isapeligro an satong buhay tanganing makipagtipon sa satong mga kapagtubod? Sa ibong na lado, kun magkakaigwa kita nin makusog na determinasyon na mag-atender sa mga pagtiripon, dai kita mapundo sa pag-atender sa mga pagtiripon pag pinurbaran kan mga parakontra na ulangon kita. Ngunyan na an panahon na pakusugon an pagpapahalaga ta sa mga pagtiripon. Kun gustong-gusto niyatong mag-atender sa mga pagtiripon, mayong pagkontra maski pa pagbabawal nin gobyerno, an makakapugol sa sato na sunudon an Diyos imbes na an mga tawo.—Gibo 5:29.

9. Taano ta an pagtuom nin mga teksto marahay na paagi na makapag-andam para sa panahon nin pagpersegir?

⁹ Tuumon an paborito mong mga teksto. (Mat. 13:52) Bakong perpekto an saimong memorya, pero puwedeng gamiton ni Jehova an saiyang mapuwersang banal na espiritu tanganing ibalik sa saimong isip an mga tekstong iyan. (Juan 14:26) Mangnuhon an sinabi nin sarong brother na napreso sa East Germany asin ibinartolina: “Bendisyon nanggad na kan panahon na idto tuom ko na an pirang gatos na teksto! Sa kada aldaw na yaon ako duman, hinurop-hurop ko an manlain-lain na tema sa Bibliya.” Nakatabang sa satong tugang an mga teksto tanganing magdanay na dayupot ki Jehova—asin maimbod na magtagal.

10. Taano ta dapat kitang magtuom nin mga kanta?

¹⁰ Magtuom asin magkanta nin mga kantang nag-uumaw ki Jehova. Kan nakapreso sa Filipos,  nagkanta si Pablo asin Silas kan tuom nindang mga kantang pang-espirituwal. (Gibo 16:25) Siring man, kan idinestiyero sa Siberia an satong mga tugang sa dating Unyon Sobyet, paano ninda pinakusog an saindang sadiri? Sinabi ni Mariya Fedun: “Kinanta mi an gabos na aram ming kanta, su mga kanta sa songbook.” Sinabi niya na an mga kantang idto nakapakusog sainda gabos asin nakatabang sa sainda na mamatian na harani sinda ki Jehova. Napapakusog ka daw pag kinakanta mo an saimong mga paboritong kantang pang-espirituwal? Kun siring, tuumon na ngunyan an mga kantang iyan!—Hilingon an kahon na “ Pakusugon Mo an Buot Ko.”

11-12. (a) Sigun sa 1 Samuel 17:37, 45-47, taano ta makusog an buot ni David? (b) Ano an manunudan ta sa halimbawa ni David?

¹¹ Tanganing maatubang an persekusyon, kaipuhan mo nin kusog nin buot. Kun sa hiling mo bakong makusog an buot mo, ano an puwede mong gibuhon? Tandaan na an tunay na kusog nin buot dai nakadepende sa kun gurano ka kadakula, sa saimong kusog, o sa abilidad mo. Isipa an halimbawa kan hoben na si David kan hampangon niya si Goliat. Kumpara sa higanteng iyan, si David mas sadit, mas maluya, asin bakong armado. Dawa ngani espada mayo si David. Alagad, makusog na marhay an saiyang buot. Daing takot na linabanan ni David an aroganteng higanteng iyan.

¹² Taano ta makusog na marhay an buot ni David? Makusog an pagtubod niya na kaiba niya si Jehova. (Basahon an 1 Samuel 17:37, 45-47.) Dai nagpokus si David sa kun gurano kadakula si Goliat kumpara sa saiya. Imbes, nagpokus siya sa kun gurano kasadit si Goliat kumpara ki Jehova. Ano an manunudan ta digdi? Magigin makusog an buot niyato kun nagtitiwala kita na kaiba ta si Jehova asin kun kumbinsido kita na kumpara sa Diyos na Makakamhan sa Gabos, saditon sana an mga nagkokontra sa sato. (2 Cron. 20:15; Sal. 16:8) Paano ta papakusugon ngunyan an satong buot—mantang dai pa nag-aabot an persekusyon?

13. Paano niyato mapapakusog an satong buot? Ipaliwanag.

¹³ Mapapakusog niyato ngunyan an satong buot paagi sa paghuhulit sa publiko kan maugmang bareta kan Kahadian nin Diyos. Taano? Huling sa paghuhulit, nakakanuod kitang magtiwala ki Jehova asin mapangganahan an ano man na pagkatakot sa tawo. (Tal. 29:25) Kun paanong nagkukusog an satong mga kalamnan pag nag-eehersisyo, nagkukusog man an satong buot pag naghuhulit kita sa harong-harong, sa pampublikong mga lugar, sa impormal na paagi, asin sa mga lugar nin negosyo. Kun ngunyan pa sana magkakaigwa na kita nin kusog nin buot para  maghulit, magigin andam na marhay kita na padagos na maghulit dawa pa kun ipagbawal an satong gibuhon.—1 Tes. 2:1, 2.

14-15. Ano an manunudan ta sa halimbawa ni Nancy Yuen asin ni Valentina Garnovskaya?

¹⁴ Makakanuod kitang marhay sa halimbawa nin duwang maimbod na sister na nagpahiling nin pambihirang kusog nin buot. Mga limang piye sana kalangkaw si Nancy Yuen, pero dai siya basta-basta natatakot. * Dai siya nagpundo sa paghuhulit kan maugmang bareta kan Kahadian nin Diyos. Kaya, napreso siya nin labing 20 taon sa Komunistang Tsina. An mga opisyal na nag-usisa sa saiya nagsabi na siya an “pinakamatagas an payo” sa saindang nasyon!

¹⁵ Napreso man si Valentina Garnovskaya sa dating Unyon Sobyet nin tulong beses asin 21 taon siya sa presuhan kun susumahon. * Taano? Determinado siyang marhay na padagos na maghulit kaya inapod siya kan mga opisyal na “peligroso nanggad na kriminal.” Taano ta makusugon an buot kan duwang maimbod na babaying ini? Kumbinsido sinda na kaiba ninda si Jehova.

16. Ano an pinakakaipuhan tanganing magkaigwa nin tunay na kusog nin buot?

¹⁶ Arog kan napag-ulayan ta na, tanganing magin makusog an buot, dai kita dapat magpokus sa sadiri tang kusog asin abilidad. Imbes, dapat na magtubod kita na kaiba ta si Jehova asin na siya an nakikipaglaban para sa sato. (Deut. 1:29, 30; Zac. 4:6) Iyan an pinakakaipuhan tanganing magkaigwa nin tunay na kusog nin buot.

17-18. Sigun sa nakarekord sa Juan 15:18-21, anong patanid an itinao sa sato ni Jesus? Ipaliwanag.

¹⁷ Nauugma kita pag irinerespeto kita kan iba, pero dai ta dapat isipon na diyan nakadepende an satong halaga. Si Jesus nagsabi: “Maugma kamo pag nauungis sa saindo an mga tawo, asin pag isinisikwal ninda kamo asin tinutuya kamo saka rinaraot an dangog nindo nin huli sa Aki nin tawo.” (Luc. 6:22) Ano an buot sabihon ni Jesus?

¹⁸ Dai buot sabihon ni Jesus na mauugma an mga Kristiyano pag ikinakaungis sinda. Imbes, realistiko sana siya. Bako kitang kabtang kan kinaban.  Namumuhay kita kauyon kan mga katukduan ni Jesus asin ihinuhulit ta an mensaheng ihinulit niya. Kaya, nauungis sa sato an kinaban. (Basahon an Juan 15:18-21.) Gusto niyatong paugmahon si Jehova. Kun nauungis sa sato an mga tawo huling namumutan ta an Ama, dai ta iyan ikinakadisganar.

19. Paano niyato maaarog an halimbawa kan mga apostol?

¹⁹ Dai pagtugutan an ano man na sinasabi o ginigibo nin mga tawo na magin dahilan na ikasupog mo an pagigin Saksi ni Jehova. (Miq. 4:5) Manunudan niyatong atubangon an pagkatakot sa tawo paagi sa paghurop-hurop sa halimbawa kan mga apostol sa Jerusalem dai nahaloy pagkatapos gadanon si Jesus. Aram ninda na grabe an pagkaungis sa sainda kan mga Judiong lider nin relihiyon. (Gibo 5:17, 18, 27, 28) Pero aroaldaw sindang padagos na nagduduman sa templo asin ipinapahiling na disipulo sinda ni Jesus. (Gibo 5:42) Dai sinda nagpadaog sa takot. Kaya man niyatong daugon an satong pagkatakot sa tawo paagi sa pirming pagpamidbid na kita sarong Saksi ni Jehova—sa trabaho, eskuwelahan, asin sa satong pagtaraid.—Gibo 4:29; Roma 1:16.

20. Taano ta maugma an mga apostol dawa pa ikinakaungis sinda?

²⁰ Taano ta maugma an mga apostol? Aram ninda kun taano ta ikinakaungis sinda, asin ibinibilang nindang pribilehiyo na trataron nin maraot alang-alang sa paggibo kan kabutan ni Jehova. (Luc. 6:23; Gibo 5:41) Pag-abot nin panahon, si apostol Pedro nagsurat: “Dawa pa kun magsakit kamo alang-alang sa katanusan, maugma kamo.” (1 Ped. 2:19-21; 3:14) Pag nasasabutan niyato na ikinakaungis kita dahil sa paggibo nin tama, dai ta tutugutan na madaog kita nin takot huli sa pagkaungis sa sato nin mga tawo.

21-22. (a) Ano an determinado mong gibuhon tanganing mag-andam para sa panahon nin pagpersegir? (b) Ano an pag-uulayan niyato sa sunod na artikulo?

²¹ Dai niyato aram kun nuarin magkakaigwa nin persekusyon o nin direktang pagbabawal pa ngani sa satong pagsamba ki Jehova. Alagad, aram niyato na puwede kitang mag-andam na ngunyan paagi sa pagpakusog kan satong relasyon ki Jehova, pagpakusog kan satong buot, asin pag-andam kun paano aatubangon an pagkaungis nin mga tawo. An mga ginigibo tang pag-andam ngunyan makakatabang sa sato na marigon na makapanindugan pag-abot nin panahon.

²² Pero paano kun magkaigwa talaga nin pagbabawal sa satong pagsamba? Sa sunod na artikulo, pag-uulayan niyato an mga prinsipyo sa Bibliya na makakatabang sa sato na padagos na maglingkod ki Jehova dawa may pagbabawal.