1. Mulandu nshi tulingile ukuipekanishisha libela ilyo bashilatendeka ukutucusha?

MU NSHITA ya bushiku ilyo Shikulu Yesu tabalamwipaya, alandile ukuti bonse abali no kuba abasambi bakwe bakabapata. (Yoh. 17:14) Ukushinta na lelo, Abena Kristu bonse aba cishinka balabacusha ku bantu abashipepa Yehova. (2 Tim. 3:12) Ilyo impela ya cino calo ileya ilepalama, tuleenekela ukuti abalwani bakacilanamo ukutucusha.—Mat. 24:9.

2-3. (a) Finshi tulingile ukwishiba pa mwenso? (b) Finshi twalasambilila muli cino cipande?

² Finshi tufwile ukulacita pa kuti tuipekanye ilyo bashilatampa ukutucusha? Kwena tatulingile ukulatontonkanya pa fyabipa fyonse nalimo ifikatucitikila ilyo bakalatucusha. Nga ca kuti tuletontonkanya pa fya musango uyu, kuti twaba no mwenso sana kabili kuti twasakamana nga nshi. Na kabili pa mulandu wa mwenso, kuti twaleka ukubombela Yehova ilyo bashilatampa no kutucusha. (Amapi. 12:25; 17:22) Umwenso canso ica maka ico ‘umulwani wesu, Satana Kaseebanya’ abomfya pa kuti tunenuke. (1 Pet. 5:8, 9) Finshi tufwile ukulacita pa kuti tukashipikishe ilyo bakalatucusha?

³ Muli cino cipande, twalasambilila ifyo twingacita pa kuti tube sana ifibusa na Yehova e lyo ne co cacindamina ukucita ifyo fine ino ine nshita. Twalasambilila ne fyo twingacita pa kuti tube abashipa sana. Na mu kulekelesha twalasambilila ifyo twingacita nga ca kuti abantu batupata.

4. Ukulingana ne fyaba pa AbaHebere 13:5, 6, finshi tulingile ukushininkisha, kabili mulandu nshi?

⁴ Mufwile ukushininkisha ukuti Yehova alimutemwa kabili takamulekeleshe.  (Belengeni AbaHebere 13:5, 6.) Ulupungu lwa kwa Kalinda ulwa June 1, 1963 lwatile: “Umuntu uwaishiba bwino bwino Lesa nga balemucusha, alamucetekela sana.” Aya mashiwi ya cine! Pa kuti tushipikishe ilyo baletucusha, tulingile ukutemwa Yehova no kumucetekela umupwilapo, kabili tatufwile ukulatwishika nampo nga alitutemwa nelyo iyo.—Mat. 22:36-38; Yako. 5:11.

5. Finshi mwingacita pa kuti mukaimwene ukuti Yehova alimutemwa?

⁵ Mulebelenga Baibolo cila bushiku pa kuti mulepalama sana kuli Yehova. (Yako. 4:8) Ilyo mulebelenga Baibolo, mulebika amano ku mibele ya kwa Yehova. Mulemona ifyo Yehova amutemwa ilyo mulebelenga ifyo alanda ne fyo acita. (Ukufu. 34:6) Kwena bamo cilabakosela ukusumina ukuti Lesa alibatemwa pantu takwaba nangu umo uwabalangapo ukuti alibatemwa. Na imwe nga e fyo mumfwa, ninshi cila bushiku mulebika amano ku fintu ifisuma ifyo Lesa alangilamo ukuti alimubelela uluse kabili alimulanga icikuuku. (Amalu. 78:38, 39; Rom. 8:32) Nga muletontonkanya pali ifi no kutontonkanya sana pa fyo mulebelenga mu Cebo ca kwa Lesa, mukamona ukuti ifyo Yehova amucitila fingi nga nshi. Nga ca kuti muletasha pa fyo Yehova amucitila, bucibusa bwenu na ena bukakoselako.

6. Nga fintu Amalumbo 94:17-19 yalanda, finshi fikacitika nga mulepepa no mweo onse?

⁶ Mulepepa lyonse. Elenganyeni ukuti umwana umunono umwaume nabamufukatila kuli bawishi. Umwana aleumfwa uwacingililwa ica kuti alelanda fyonse fye ifisuma ne fibi ifimucitikile muli ubo bushiku. Na imwe nga mulepepa no mweo onse mukapalama sana kuli Yehova kabili mukalaumfwa abacingililwa nge fyo uyu umwana twalandapo aleumfwa. (Belengeni Amalumbo 94:17-19.) Ilyo mulepepa kuli Yehova, ‘mulepongolola ifya mu mitima yenu nga menshi’ kabili muleeba Shifwe uwatutemwa fyonse ifilemutiinya ne filemusakamika. (Inyimbo 2:19) Finshi fikacitika nga mulecita ifi? Mukakwata ico Baibolo ita ukuti “umutende wa kwa Lesa uwacila amatontonkanyo yonse.” (Fil. 4:6, 7) Kabili lyonse nga mulepepa no mweo onse, mukapalama sana kuli Yehova.—Rom. 8:38, 39.

7. Mulandu nshi mulingile ukushininkishisha ukuti Ubufumu bwa kwa Lesa bukalenga ifyo Lesa alaya fikafikilishiwe?

⁷ Mufwile ukushininkisha ukuti amapaalo ya Bufumu bwa kwa Lesa yakafikilishiwa. (Impe. 23:19) Nga ca kuti tamwashininkisha ukuti Lesa akafikilisha ifyo alaya, Satana na abo atungulula bakalamutiinya. (Amapi. 24:10; Heb. 2:15) Finshi mwingacita pa kuti mushininkishe ukuti Ubufumu bwa kwa Lesa bukalenga ifyo Lesa alaya fikafikilishiwe? Muleisambilisha pa malayo ya Bufumu bwa kwa Lesa kabili mulemona ne fingalenga mwashininkisha ukuti yakafikilishiwa. Bushe ukucita ifi kukamwafwa shani? Natulandeko pali ba Stanley Jones abo bakakile pa myaka 7 pa  mulandu ne fyo basuminemo. * Finshi fyalengele bashipikishe? Batile: “Icitetekelo candi cali icakosa pantu nalishibe Ubufumu bwa kwa Lesa ne fyo bukatucitila kabili nshaletwishika nangu panono. Kanshi takwali nangu umo uwali no kulenga naleka ukubombela Yehova.” Nga namucetekela sana ukuti fyonse ifyo Lesa alaya fikacitika, mukapalama sana kuli ena kabili tamwakaleke ukumubombela pa mulandu wa kuba no mwenso.—Amapi. 3:25, 26.

8. Bushe ifyo tumona ukulongana filanga cinshi? Londololeni.

⁸ Mulelongana lyonse. Ukulongana kulalenga twapalama sana kuli Yehova. Ifyo tumona ukulongana e fikalanga nampo nga tukashipikisha ilyo bakalatucusha nelyo iyo. (Heb. 10:24, 25) Cinshi twalandila ifi? Nga ca kuti pali ino nshita tulefilwa ukulongana pa mulandu ne fintu ifishilingile, pali bufi ilyo tukalabika ubumi bwesu mu kapoosa mweo pa kuti fye tulongane pamo na bamunyinefwe na bankashi! Nomba nga tulelongana lyonse, tatwakaleke ukulongana na lintu abalwani bakatulesha. Kanshi ino e nshita tufwile ukutemwa sana ukulongana. Nga twatemwa sana ukulongana, takuli nangu cimo icikalenga tukafilwe ukunakila Lesa ukucila ukunakila abantu. Na lintu ubuteko bukatubinda tukatwalilila ukulongana.—Imil. 5:29.

9. Mulandu nshi cawamina ukusungilako amalembo?

⁹ Mulingile ukusungila amalembo ayo mwatemwa. (Mat. 13:52) Nalimo te kuti mwibukishe amalembo yonse, lelo Yehova kuti abomfya umupashi wakwe uwa mushilo uwa maka ukumwibukishako amalembo ayo mwasungila. (Yoh. 14:26) Moneni ifyo munyinefwe umo uo bakakile mu cifungo ku East Germany alandile, atile: “Naleba sana ne nsansa ilyo nali mu cifungo pantu nalisungile amalembo ayengi nga nshi. Apo naleikala fye neka, nalepoosa inshita iikalamba ku kutontonkanya sana pa malyashi yalekanalekana aya mu Baibolo.” Amalembo ayo munyinefwe asungile yalimwafwile ukupalama sana kuli Yehova no kushipikisha amafya akwete.

10. Mulandu nshi tulingile ukulasungilako inyimbo?

¹⁰ Mulesungilako inyimbo sha kulumbanya Yehova kabili muleshimba. Ilyo Paulo na Sila bali mu cifungo mu Filipi, baleimba inyimbo isho basungiile pa kuti balelumbanya Yehova. (Imil. 16:25) Bamunyinefwe aba ku calo ico kale baleita ukuti Soviet Union balibakakile no kubatwala ku Siberia. Cinshi calengele benenuka?  Nkashi Mariya Fedun atile: “Twaleimba inyimbo shonse isha mu citabo ca nyimbo isho twaishibe.” Nkashi Fedun alandile ukuti inyimbo isho baleimba shalebakoselesha bonse kabili shalengele bapalama sana kuli Yehova. Bushe mulakoselako nga mwaimba inyimbo sha Bufumu isho mwatemwa? Kanshi mufwile ukusungila isho inyimbo!—Moneni akabokoshi akaleti “Ngafweni Ukuba Uwashipa.”

11-12. (a) Ukulingana na 1 Samwele 17:37, 45-47, finshi fyalengele Davidi abe uwashipa? (b) Lisambililo nshi ilyacindama ilyo tulesambilila kuli Davidi?

¹¹ Mufwile ukuba abashipa pa kuti mutwalilile ukushipikisha ilyo balemucusha. Finshi mulingile ukucita nga ca kuti mulemona kwati tamwashipa? Muleibukisha ukuti iciimo ca muntu, amaka akwata nelyo ifyo engacita te fingalenga aba uwashipa. Tontonkanyeni pali Davidi uwali fye umulumendo ilyo alwile na Galyati. Nga kumulinganya kwi paka ilyo alwile nalyo, Davidi alicepelepo umubili, takwete amaka ayakwete Galyati, kabili takwete ifyanso ifyo alingile ukukwata pa kulwa. Takwete no lupanga. Nangu cali ifi, Davidi alishipile sana. Alishipile ica kuti alibutukiile kuli lilya ipaka ilyali sana no musaalula ku kulwa nalyo.

¹² Cinshi calengele Davidi abe uwashipa? Ni co alishininkishe ukuti Yehova ali nankwe. (Belengeni 1 Samwele 17:37, 45-47.) Davidi tabikile amano ku kuilinganya kuli Galyati uwali ipaka. Lelo abikile amano ku fyo Galyati acepele nga nshi nga ku mulinganya kuli Yehova. Finshi tulesambilila kuli ili ilyashi? Kuti twaba abashipa nga natushininkisha ukuti Yehova ali na ifwe, kabili nga natushininkisha ukuti abalwani besu balicepelela fye nga kubalinganya kuli Lesa wa Maka Yonse. (2 Imila. 20:15; Amalu. 16:8) Finshi mwingacita pa kuti mukabe abashipa ilyo bakalamucusha?

13. Finshi tulingile ukulacita pa kuti tube abashipa? Londololeni.

¹³ Tufwile ukulabila imbila nsuma ya Bufumu bwa kwa Lesa pa kuti tukabe abashipa sana ilyo bakalatucusha. Cinshi twalandila ifi? Ni co nga tulebila imbila nsuma, tulacetekela sana Yehova kabili tulaleka ukutiina abantu. (Amapi. 29:25) Nga filya fine imicincili ikoselako nga tuletukusha umubili, e fyo na ifwe tuya tuleshipilako nga tulebila ku ng’anda ne ng’anda, mu fifulo umuba sana abantu, nga tulecita ubunte bwa mu lyashi, na lintu tulebila mu fifulo fya makwebo. Nga tuli abashipa ilyo tulebila imbila  nsuma pali ino nshita, na lintu ubuteko bukabinda umulimo wesu tukatwalilila ukubila imbila nsuma.

14-15. Finshi twingasambilila kuli ba Nancy Yuen na ba Valentina Garnovskaya?

¹⁴ Kuti twasambililako kuli bankashi babili abali ne cishinka kabili abashipile sana. Ba Nancy Yuen balepele fye nalimo amamita 1.5 lelo tabali bacamwenso. * Balikeene ukuleka ukubila imbila nsuma ya Bufumu bwa kwa Lesa. Ici calengele babakake ku China ukucila pa myaka 20. Abalashi abalebalubulwisha batile mu calo cabo “tabatalile abamonapo umuntu uushalealuka mu fyo asuminemo” nga uyu nkashi!

¹⁵ Ba Valentina Garnovskaya nabo balibakakile mu calo ico kale baleita ukuti Soviet Union pa miku itatu kabili imyaka yonse iyo babakakile yali nalimo 21. * Cinshi babakakile? Ni co balitwalilile ukubila imbila nsuma ica kuti abalashi baletila bali “cipondo icabipa nga nshi.” Cinshi calengele aba abanakashi babili aba cishinka babe abashipa sana? Ni co balishininkishe ukuti Yehova ali nabo.

16. Finshi tufwile ukucita pa kuti tube aba abashipa?

¹⁶ Nga fintu twasambilila, pa kuti tube abashipa, tatufwile ukulabika amano ku maka twakwata e lyo na ku fyo twingacita. Lelo tulingile ukucetekela ukuti Yehova ali na ifwe no kuti e uletulwilako. (Amala. 1:29, 30; Seka. 4:6) Nga twacita ifi e lyo twingaba abashipa.

17-18. Finshi Yesu atwebele ifyaba pali Yohane 15:18-21? Londololeni.

¹⁷ Tulatemwa abantu nga balitucindika, lelo tatufwile ukuisuula abantu nga batupata. Yesu atile: “Mwalipaalwa nga abantu bamupata, kabili nga bamukaana no kumupontela no kumusaalula ukuti muli babi pa mulandu wa Mwana wa muntu.” (Luka 6:22) Ni mwi Yesu aloseshe?

¹⁸ Yesu taloseshe mu kuti Abena Kristu bali no kulatemwa abantu nga babapata. Lelo aletweba fye ifyali no kulatucitikila. Tatuli ba muli cino calo. Tukonka ifyo Yesu alesambilisha kabili  tubila imbila iyo alebila. E calenga abantu muli cino calo batupate. (Belengeni Yohane 15:18-21.) Tufwaya ukulasekesha Yehova. E ico tatusakamana abantu nga batupata pa mulandu wa kuti twalitemwa Shifwe.

19. Finshi tufwile ukulacita pa kuti tulepashanya abatumwa?

¹⁹ Tamufwile ukuleka ifyo abantu balanda ne fyo bacita fyalenga mwalaumfwa ububi pa mulandu wa kuti muli Nte ya kwa Yehova. (Mika 4:5) Kuti twaleka ukutiina abantu nga twatontonkanya pa fyo abatumwa bacitile mu Yerusalemu ilyo abalwani baipeye fye Yesu. Balishibe ifyo intungulushi shamapepo isha baYuda shabapatile. (Imil. 5:17, 18, 27, 28) Lelo cila bushiku baleya kwi tempele kabili abantu balishibe ukuti basambi ba kwa Yesu pantu balebila imbila nsuma. (Imil. 5:42) Tabalekele ukubila pa mulandu wa kutiina abantu. Na ifwe kuti twaleka ukutiina abantu nga ca kuti tuleeba abo tusambilila nabo, abo tubomba nabo na bena mupalamano ukuti tuli Nte sha kwa Yehova.—Imil. 4:29; Rom. 1:16.

20. Cinshi calengele abatumwa batwalilile ukusekelela nangu ca kuti abantu balibapatile?

²⁰ Cinshi calengele abatumwa batwalilile ukusekelela? Ni co balishibe ico abantu babapatile, kabili balemona ukuti Yehova alibacindamike filya baleculila ishina lyakwe. (Luka 6:23; Imil. 5:41) Umutumwa Petro alembele ati: “Nga mwaculila ubulungami, ninshi mwalipaalwa.” (1 Pet. 2:19-21; 3:14) Nga twaishiba ukuti abantu batupatila pa mulandu wa kuti tulacita icalungama, tatwakaleke ukubombela Yehova nangu batupate shani.

21-22. (a) Finshi mulefwaisha ukulacita pa kuti mukashipikishe ilyo bakalamucusha? (b) Finshi tukasambilila mu cipande cikonkelepo?

²¹ Tatwaishiba ilyo abantu bakatampa ukutucusha nelyo ilyo amabuteko yakatubinda ukupepa Yehova. Lelo twalishiba ukuti tufwile ukuipekanya pali ino ine nshita, e kutila tulingile ukukosha bucibusa bwesu na Yehova, tufwile ukulacita ifingalenga twaba abashipa, kabili tulingile ukwishiba ifyo twingacita abantu nga batupata. Nga tuleipekanya pali ino nshita, tukatwalilila ukuba abashipa na lintu bakalatucusha.

²² Nomba finshi tulingile ukucita nga ca kuti batubinda ukupepa Yehova? Mu cipande cikonkelepo tukasambilila amashinte ya mafunde aya mu Baibolo ayengatwafwa ukutwalilila ukubombela Yehova nangu batubinda.