1. Ka uagu lunti lubéi waranserun lubá éibaahouni?

GUÑOUN le lubaragiñebei lounwen Wabureme Hesusu, ariñagati heyereeguduba lan lani disipulugu lun ubóu (Huan 17:14). Lúmagiñeti dan ligía, éibaaha hamutiña ha máhabaña lun áhuduraguni inarüniti, kristiánugu úaraguatiña (2 Tim. 3:12). Agurabatiwa laganwounduba lan éibaahouni eibu layarafadun lagumuchagüle ubóu le (Mat. 24:9).

2, 3. a) Ka uagu dencha lubéi anufudei? b) Kaba wariha lidan arütíkulu le?

² Ida luba waranserun lubá éibaahouni? Mama mosu wasaminaruni sun le gayaraabei lasuseredun. Ánhawa hamuga adügei le, gayaraabei hamuga ladügün lun meseriwidun wamá lun Heowá, íbini lubaragiñe wásügürün lídangiñe aban óuchawaguni, lugundun gayaraabei ladügün anufudei luma idiheri lun lábürühan warüna (Ari. 12:25; 17:22). Anufudei aban áruma gabafutu to layusuruboun ‘Mafia le wágani’ (1 Fe. 5:8, 9). Ligíati, kaba wadüga lun derebugu wamá?

³ Lidan arütíkulu le, warihibei ida luba lan wibihin lun derebugu lan wamadagua luma Heowá luma ka lan uagu súdini lubéi lun wadügüni guentó. Ani wakutihabei kaba lan wadüga lun ganigitima wamá luma giñe kaba lan wadüga dan le wagía lan asufurirubei.

4. Según Ebüréu 13:5, 6, ka lunbei wachoururuni ani ka uagu súdini lubéi?

⁴ Chouru waméi hínsiñe wamá lun Heowá ani maweiyasunbei ígirawa (aliiha huméi Ebüréu 13:5, 6). Átiri irumu guentó, lúmagiñe lariñawagún tidan Garüdia Awisahatu: “Gürigia lan ha subudihabúbaña lun Bungiu buidu, hagíabatima afiñera luagu lidan lidaani óuchawaguni”. Inarüni dimurei le. Lun gayara lan  wawanduni éibaahouni, mosu ínsiñe lan Heowá woun ani afiñe wagíame luagu tau sun wanigi, maweiyasunga asaminara mínsiñe wamá lun (Mat. 22:36-38; Sant. 5:11).

5. Kaba íderaguawa arihei línsiñehabu Heowá?

⁵ Aliiha wamóun Bíbülia sagü weyu lun wayarafaduntima lun Heowá (Sant. 4:8). Lidan awanha lan aliihoun, teni wamá lun lubuidun ligaburi. Sandí waméi línsiñehabu lidan le lariñagubei luma le ladügübei (Afu. 34:6). Añahein gürigia hénrenguti houn hafiñerun hínsiñe hamá lun Bungiu ladüga úatiña ni aban arufudutiña ínsiñehabuni houn. Anhein ligía lubéi asuseredubei woun, ka uagu madügün wabéi aban lísüta sagü weyu luagu ida liña lan larufuduni Heowá lugudemehabu woun luma lareini? (Sal. 78:38, 39; Rom. 8:32). Másiñati gayara lan wabürüdün saragu katei ánhawa asaminara luagu le winwan wamaalibei luma le uágubei waliiha tidan Bíbülia. Eibu gebegitima lan le ladügübei Heowá woun, derebugutimaabei wamadagua luma (Sal. 116:1, 2).

6. Según le lariñagubei Sálumu 94:17-19, ida luba líderaguniwa furíei le wadügübei tídangiñe sun wanigi?

⁶ Furíei wamá súnwandan. Samina wamá luagu aban irahü le lóuburubei lúguchi lau saragu ínsiñeni. Chóuruti lasansiragun lungua lurugabu lúguchi ábati labahüdahani sun le asuseredubei lun weyu ligía, dandu le buídubei kei le wuribabei. Gamadaguabadiwa giñe luma Heowá ánhawa afurieida lun tídangiñe sun wanigi sagü weyu (aliiha huméi Sálumu 94:17-19). Sagá waméi sun le tídanbei wanigi ligibugiñe Wáguchi le hínsiñehabubei, ítara kei “léibaagun [...] duna éibaaguati”, abahüdaha waméi lun ka lan wanufudebei luma le adiheridagüdübaliwa (Aya. 2:19). Ladügüba katei le lun wibihini le tariñagubei Bíbülia ‘lidarangilan Bungiu, le wéiritimabei luéi sun subudi’ (Fili. 4:6, 7). Eibu wafurieidun lun Heowá, yarafatimabadiwa lun (Rom. 8:38, 39).

7. Ka uagu lunti lubéi chouru wamani lagunfuliruba lan le füramase lubéi Bungiu luagu Larúeihan?

⁷ Chouru waméi lagunfuliruba lan abiniruni le lunbei lanügüni Larúeihan Bungiu (1 Lur. 23:19). Anhein débili lubéi wafiñen luagu füramasei le, ménrengunbei lun Satanási luma houn ha afalarubalin lun hádarun anufudei wawagun (Ari. 24:10; Ebü. 2:15). Ka lunbei wadügüni lun wederebudagüdüni wafiñen luagu Larúeihan Bungiu? Direi wamá dan lun waturiahani le füramase lubéi Heowá luagu Larúeihan luma lébuna chouru wamani lagunfuliruba lan. Lun gunfuranda wamani súdini lan katei le, ariha waméi le asuseredubei lun Stanley Jones, le meha adaürǘbei luagu sedü irumu ladüga lafiñen. * Ariñaga lumuti ka lan íderagubalin lun úaragua lan: “Le nasubudirubei luagu Larúeihan Bungiu, le nachoururubei luma masandirun nan ni murusun machouruni luagu füramase le, ruti erei nun. Siñá hamuti nafiñen agidara nuéi”. Anhein derebugu wafiñen luagu le füramase lubéi Bungiu, wayarafadatimaba  lun ani magañeirun lubadiwa anufudei (Ari. 3:25, 26).

8. Afuranguagüda huméi ida liña lan ligaburi warihini adamuridaguni?

⁸ Mígira waméi woudin adamuridagua. Íderagua lumutiwa lun wayarafadun lun Heowá. Igaburi le warufudubei luagu adamuridaguni larufudubei anhein wawanduba lubéi o mawandubadiwa lan danme le liabin éibaahouni (Ebü. 10:24, 25). Ariha waméi ka lan uagu. Anhein ígira wabéi lun ladügün lirahüñü katei lun moudin wamá adamuridagua, kaba asusereda danme le lídanñein lan denchaü wadamuridagun hama wíbirigu? Luagu amu oubaü, anhein aranseediwa lubéi lun mígirun wabéi lan wadamuridagun, siñabei heredehaniwa wáganiñu. Ligíati, aniha dan lun wasandirun ínsiñeni luagu wadamuridagun. Ánhawa adügei, meredehan habadiwa gumadimatiña lun maganbadi wamá lun Bungiu (Adü. 5:29).

9. Ka uagu buidu lubéi lun laranserun gürigia lubá éibaahouni lau lafurendeirun bérusu tídangiñeti Bíbülia?

⁹ Adüga wamá lun lerederun bérusu le hínsiñetimabei woun wachügüwagu (Mat. 13:52). Gayaraati hénrengu lan lun lerederun somu ariñahani wachügüwagu, gama lumoun gayaraati layusuruni Heowá lani sífiri le gabafubei lun burí waritaguni bérusu (Huan 14:26). Rédeiti aban íbiri dáüwañu díseñu hawéi gürigia tidan aban furisun to erederuboun luagun oubaü le ñéingiñe lubéi laboucha weyu Yámani, ariñagati: “Buiti meha nadüga lau lafurendeirun lóugiñe bián-san bérusu tídangiñeti Bíbülia, lugundun sügǘ numuti weyu burí le madügün nubéi ni kata asaminara hulili luagu ámuñegueinarügü tema le tídangiñeti Bíbülia”. Íderagua lumuti bérusu burí ligía íbiri le lúntima yarafañu lan lun Heowá luma lun úaragua lan lun.

10. Ka uagu mosu lubéi wafurendeirun wachügüwagu uremu le lánina lalawahóun Heowá?

¹⁰ Furendei wamá wachügüwagu uremu lánina alawahani lun Heowá ani eremuha waméi. Dan le ladaürǘnbei Pábulu luma Sílasi Filipu, eremuhatiña lun Heowá uremu le hafurendeirubei hachügüwagu (Adü. 16:25). Adüga hamuti giñe wíbirigu ha lídangiñetiña Binadu Unión Sowiétika ha óunahoubaña Siberioun ligiaméme lun hederebudagüdüni hafiñen. Haritaguatagili íbiri Mariya Fedun ani ariñagatu: “Aba weremuhani sun uremu le waritagubei”. Ariñagatu sun lan uremu ligía ru lan gurasu houn súngubei ani íderagua lumutiña lan lúntima hayarafadun lun Heowá. Ruti san dǘgüdaguaü woun weremuhani uremu le hínsiñebei woun tídangiñe waliburun luma le lídanbei  Internet? Ligíati, furendei wamá eremuhei guentó (ariha waméi rekuáduru “ Ruba ganigi nun”).

11, 12. a) Según 1 Samueli 17:37, 45-47, ka uagu ganigi lubéi Dawidi? b) Ka katei súdiniti wafurendeirubei lídangiñe lani Dawidi hénpulu?

¹¹ Lun wagagibudagun luma éibaahouni, mégeitiwa ganigi. Ka gayaraabei wadügüni anhein sandigua wabéi woungua lougua lan ganigi wamá? Haritagua waméi létima lan ganigi le tímatimaati mámañein luagu wágubu, ni luagu were, ni luagu wayaraati. Aritagua waméi lidan likesin Dawidi. Dan meha le nibureingili aba lagagibudagun luma hígandei Goliadi. Ñǘraüti meha Dawidi lóubawagun Goliadi ani genegeti meha mere lan. Maranserunti meha lun lageindagun luma hígandei ligía ni eféin úagubeitu luma. Gama lumoun, ganigiti meha ani ñǘdünti ageindagua luma hígandei pántati ligía.

¹² Ka uagu ganigi lubéi Dawidi saragu? Ladüga chouru lumuti lan buidu buidu Heowaba lan íderaguei (aliiha huméi 1 Samueli 17:37, 45-47). Meteniti luagu ni kata lan laríawagun lóubawagun Goliadi, le unbei letenira ni kata lan Goliadi lóubawagun Heowá. Furendeitiwa aban katei lídangiñe abahüdaguni le: ganigibadiwa ánhawa afiñera luagu Heowaba lan íderaguawa luma lun wachoururuni ni kata lan wáganiñu lóubawagun Wabungiute le Suntigabafu (2 Kro. 20:15; Sal. 16:8). Ka lunbei wadügüni guentó lun ganigi wamá, lubaragiñe liabin éibaahouni?

13. Ka lunbei wadügüni lúntima ganigi wamá? Afuranguagüda huméi.

¹³ Líderagubadiwa wapurichihani uganu buiti luáguti Larúeihan Bungiu lúntima ganigi wamá. Ka uagu? Ladüga ladügüba lun wafiñerun luagu Heowá luma lun manufudedun wamá hawéi gürigia (Ari. 29:25). Ítara kei adüga lan wánhingichuni wágubu lun here wamá ítarameme giñe ganigibadiwa danme le wapurichihan tidan burí muna, lidan burí guririguaü, tidan burí bísinisi luma dan le gachansin wamá. Ánhawa apurichiha guentó lau ganigi, aranseñu waba lun ítarameme wamá adügei íbini lamahadún lun wapurichihan (1 Tesa. 2:1, 2).

14, 15. Ka wafurendeirubei túmagiñe Nancy Yuen luma túmagiñe Valentina Garnovskaya?

¹⁴ Furendei wamá lídangiñe le hadügübei bián íbirigu würiña úaraguatiña ha arufudubaña aban lanarime ganigi. Nancy Yuen aban hádangiñe. Kéiburi aban méturu dimí (5 ugudi) túgubu, gama lumoun, hénrenguti meha lun  hanufudedagüdünun. * Kei maha tubéi tígiruni tapurichihan luagu Larúeihan Bungiu, rédeitu dáüwañu 20 irumu China. Aba hariñagun lúrudugu ha álügüdagubarun luagu “tuguyatima lan gürigia” tótima dereboun aganbun lidan ageiraü.

¹⁵ To aban íbiri Valentina Garnovskaya tíribei. Daüwatu meha lidan Binadu Unión Sowiétika 3 wéiyaasu lidan sun adaürǘni ligía barütu 21 irumu furisunrugu. * Aranseñutiña meha lun tapurichihan darí lun hariñagun gumadimatiña tuagu “weiri lan turiban ani dencha tan”. Ka san uagu ganigi habéi íbirigu úaraguatiña ha? Ladüga chouru hamani líderagubaña lan Heowá.

16. Ka adügübei lúntima ganigi wamá?

¹⁶ Kei le aubei warihei, lun ganigi wamá moun lumuti wafiñerun luagu were ni luagu le wayaraabei adüga. Le lunbei wadügüni wafiñerun luagu líderagubadiwa lan Heowá luma lageindaguba lan waweigiñe (2 Lur. 1:29, 30; Sak. 4:6). Ligía katei le adügübei lúntima ganigi wamá.

17, 18. Según Huan 15:18-21, ka lariñagubei Hesusu lasusereduba lan woun, ani ka uagu?

¹⁷ Hínsiñeti woun lun inebe wamá houn amu, gama lumoun, mabulieidagua wamá asaminara mebegi wamá ladüga uá lan subudiwa wamá. Ariñagati Hesusu: “Fuleseiwatün dan le iyereegu humá houn gürigia nuéigiñe, dan le habugagunün hawariua, dan le hanabagunün, dan le hanügüni hiri kei ni kata, kei wuribati, nuéigiñe, au le Wügüri Garaüwarügüti” (Luk. 6:22). Ka mini lubéi dimurei burí le?

¹⁸ Mama lariñaguña Hesusu hínsiñe lan houn kristiánugu lun iyereegu hamá houn amu gürigia, lariñaguñein meha ligíaba lan asusereda houn. Iyereegutiwa houn gürigia ladüga mama lan lánigu ubóu wagía, wawinwanduñein le larufudahabei Hesusu ani apurichiha waméi luganute (aliiha huméi Huan 15:18-21). Busentiwa wagundaaragüdüni Heowá. Anhein  iyereegu wabéi houn gürigia ladüga hínsiñe lan Wáguchi Bungiu woun, haturóbulin lira.

19. Ida luba wáyeihani le hadügübei apostolugu?

¹⁹ Maweiyasun wamá asandira busiganu luagu le hariñagubei o le hadügübei gürigia ladügarügü gefén wamá luagu Heowá (Mik. 4:5). Aban katei le lunbei líderaguniwa lun manufudedun wamá hawéi gürigia wakutihani le hadügübei apostolugu Herusalén murusun dan lárigiñe lafarún Hesusu. Subuditi meha houn iyereegu lan meha Hesusu houn huríu ha alidihatiña relihión (Adü. 5:17, 18, 27, 28). Íbini ítara sagü meha weyu houdin ténpulurugu aba harufudagun houngua hagibugiñe gürigia kei lánigu Hesusu disipulu (Adü. 5:42). Mígiruntiña lun lararamuniña anufudei. Mararamun lubadiwa giñe anufudei ánhawa arufudagua woungua súnwandan kei gefentiña luagu Heowá, lidan yebe wawadigimari, leskuelarugu o le ñein lubéi wawinwanda (Adü. 4:29; Rom. 1:16).

20. Ka uagu gúndaañu haña lubéi meha apostolugu íbini iyereegu hamá houn amu?

²⁰ Ka uagu gúndaañu haña lubéi meha apostolugu? ladüga subudi hamani ka lan uagu iyereegu habéi houn gürigia. Gúndaatiña meha ladüga ariha lániña Bungiu keisi gürigia gadünamatiña lun hasufurirun busiganu luagu liri (Luk. 6:23; Adü 5:41). Dan lárigiñe aba labürühan apostolu Féduru: “Fuleseiwatün anhaün asufurira ladüga surú lan hibagari” (1 Fe. 2:19-21; 3:14). Dan le subudi wamani ladüga lan wadügüni le buídubei iyereegu wabéi houn gürigia, madügünti iyereehabúni ligía lun meseriwidun wamá lun Bungiu.

21, 22. a) Kaba hadüga lun gayara lan haranserun lubá éibaahouni? b) Kaba wakutihan lidan leweñegua arütíkulu?

²¹ Ibidiñeti woun ídaame lan wéibaahoun ni ídaame lan hararamei gumadimatiña wapurichihan. Le wasubudirubei gayara lan waranserun guentó ánhawa ederebudagüdei wamadagua luma Heowá, ánhawa awadigimarida lúntima ganigi wamá luma lun wafurendeiruni kaba lan wadüga danme iyereegu wamá houn amu. Ánhawa aransera guentó, líderagubadiwa lun úaragua wamá ámuñegü.

²² Kábati wadüga anhein achülüra aban dan lun hamahadun gumadimatiña lun wapurichihan? Lidan leweñegua arütíkulu wakutihabei adundehani le lunbei líderaguniwa lun wasigirun eseriwida lun Heowá laganagua éibaahouni.