1. Pwata a lamot ach sipwe ammólnakichetá fán iten riáfféúmwáál?

LÓN ewe pwinin me mwen án ach we Samol Jesus epwele ninniiló, a erá pwe meinisin mi mochen tapweló mwirin repwe kúna koput. (Joh. 17:14) Tori lón ach ei fansoun, ekkewe Chón Kraist mi tuppwél ra kúna riáfféúmwáál seni chókkewe mi oput ewe fel mi enlet. (2 Tim. 3:12) Atun a kkanoto sópwólóón ei ótót, sia silei pwe epwe fen lallapóló án chón oputakich ú ngenikich.​—Mat. 24:9.

2-3. (a) Met a lamot sipwe mirititi usun ewe mettóch niwokkus? (b) Met sipwele káé lón ei lesen?

² Ifa usun sipwe tongeni ammólnakichetá iei fán iten riáfféúmwáál? Ese lamot ach sipwe anchangei meinisin ekkewe mettóch mi ngaw eli epwe tongeni fis ngenikich. Ika sia féri ena, iwe niwokkus me aúrek repwe tongeni chounikichetiw me eli ena niwokkus epwe pwal mwo nge tongeni aúkúkichetiw seni ach angang ngeni Jiowa me mwen an esaamwo fen fis ngenikich sókkun sóssót. (SalF. 12:25; 17:22) Niwokkus ina eú pisekin maun mi manaman ewe ‘Tefil, ewe chon oputakich’ a áeá le ú ngenikich. (1 Pet. 5:8, 9) Met sipwe tongeni féri iei le apéchékkúlakich?

³ Lón ei lesen, sipwe káé ifa usun sipwe apéchékkúla ach riri ngeni Jiowa me pwata a mmen lamot ach sipwe féri ena iei. Sipwe pwal pwóróus wóón met sia tongeni féri le ámááraatá ach tipepwora. Me sáingolóón, sipwe etittina ifa usun sipwe tongeni likiitú fán koput seni chón oputakich.

4. Me ren Ipru 13:5, 6, met a lamot sipwe fókkun lúkúlúkú, me pwata?

⁴ Lúkú pwe Jiowa a tongeok me esap fókkun likitukoló. (Álleani Ipru 13:5, 6.) Fite ier a ló, The Watchtower a erá: “Ika  emén a silefichi Kot, iwe epwe fókkun lúkúlúk wóón i atun fansoun riáfféúmwáál.” A ifa me pwúngún ena! Ren ach sipwe sópwéch le likiitú fán riáfféúmwáál, a lamot sipwe enletin tongei Jiowa me unusen lúkúlúk wóón me sisap lúkúlúkúmmang ngeni an tongekich.​—Mat. 22:36-38; Jas. 5:11.

5. Met epwe álisuk le meefi án Jiowa tongeok?

⁵ Állea Paipel iteiten rán ren óm kopwe ririéch ngeni Jiowa. (Jas. 4:8) Atun ka állea Paipel, nefótófót wóón napanapen Jiowa kewe mi múrinné. Achocho le weweiti úkúkún watteen an tongeok atun ka álleani minne a apasa me féri. (Eks. 34:6) A weires ngeni ekkóch ar repwe lúkú pwe Kot a tongeer pokiten rese kan kúna tonger. Ika a ina meefiom, achocho iteiten rán le eiteitaatiw ifa usun Jiowa a pwári an úméúméch me kirekiréch ngonuk. (Kölf. 78:38, 39; Rom 8:32) Atun ka ekieki usun met a pwisin fis ngonuk me atun ka ekilonei minne ka álleani seni án Kot we Kapas, ese mwáál kopwe tongeni ekieki usun chómmóng mettóch Jiowa a fen féri fán itom. Lapólóón óm aúcheani minne Jiowa a fen féri, epwe pwal ina lapólóón óm riri ngeni.​—Kölf. 116:1, 2.

6. Ifa usun óm iótek seni letipom epwe álisuk me ren Kölfel 94:17-19?

⁶ Ikkiótek. Anchangei emén át, seman we a foropachei fán tong. Ena át a fókkun meefi núkúnúkéch iwe ese pireir le fós ngeni seman we wóón met mi éch are met mi ngaw a fis ngeni lón ena rán. Ka pwal tongeni pwapwaiti ena sókkun riri ika ka akkarap ngeni Jiowa ren óm iótek seni letipom iteiten rán. (Álleani Kölfel 94:17-19.) Atun ka iótek ngeni Jiowa, kopwe “ninawu masouen lelukom . . . usun eman a ninawu koluk,” me ereni Semom na mi tong meinisin met ka eáni niwokkus me aúrek. (KölK. 2:19) Epwe met mwirilóón? Kopwe meefi met ewe Paipel a eita ngeni “än Kot kinamwe mi tekia seni ach tongeni weweiti.” (Fil. 4:6, 7) Lapólóón óm eáni ena esin iótek, epwe pwal ina lapólóón óm ririéch ngeni Jiowa.​—Rom 8:38, 39.

7. Pwata a lamot kopwe fókkun lúkú pwe minne Kot a pwonei usun an we Mwú repwe pwénútá?

⁷ Lúkúlúk pwe feiéch seni án Kot we Mwú repwe pwénútá. (Num. 23:19) Ika ese péchékkúl óm lúkú pwe ekkewe feiéch seni Kot repwe pwénútá, iwe epwe mecheres án Satan me chókkewe mi nóm fán nemenian repwe eniwokkusuk. (SalF. 24:10; Ipru 2:15) Ifa usun kopwe tongeni apéchékkúla óm lúkúlúk wóón án Kot we Mwú iei? Awora fansoun le káé me etittina án Kot kewe pwon usun an we Mwú me ekkewe popun ka tongeni unusen lúkú pwe repwe pwénútá. Ifa álillisin óm féri ena? Ekieki pwóróusen Stanley Jones, ewe a kalapus ren úkúkún fisu ier pokiten an lúkú. * Met a álisi an epwe likiitú fán tuppwél? A erá: “A péchékkúl ai lúkú pokiten ua silei usun án Kot we Mwú me met epwe apwénúetá, me ese  fókkun wor ai tipemwaramwar. Iwe, ese fókkun wor emén epwe tongeni efisi ai upwe siwili ai ekiek.” Ika a péchékkúl óm lúkúlúk wóón án Jiowa kewe pwon, epwe lapóló óm riri ngeni me kosap mut ngeni niwokkus an epwe eppetuk le angang ngeni i.​—SalF. 3:25, 26.

8. Úkúkún ach aúcheani ach kewe mwich iei a pwári met usuch? Áweweei.

⁸ Fiffiti án Chón Kraist kewe mwich iteitan. Ach kewe mwich ra álisikich le ririéch ngeni Jiowa. Úkúkún ach aúcheani ach fiffiti mwich iei a pwári ifa usun sipwe likiitú fán riáfféúmwáál lón ekkan rán repwe feito. (Ipru 10:24, 25) Pwata? Ika sia mut ngeni ekis minen eppet an epwe eppetikich seni ach fiti mwich iei, met epwe fis lón mwachkkan ika ach mwichfengen me pwiich kewe epwe tongeni atolongakich lón feiengaw? Nge ika sia úppós le fiffiti meinisin ach kewe mwich, iwe sisap fangetá atun chón oputakich repwe sótun pinei ach mwichfengen. Iei ewe fansoun ach sipwe ámááraatá ach mochen fiffiti ach kewe mwich. Atun sia aúcheani le fiffiti ach kewe mwich, iwe riáfféúmwáál, pwal mwo nge pinepin seni mwú, esap tongeni efisi ach sipwe álleasochisi aramas lap seni Kot.​—Föf. 5:29.

9. Pwata ach amwéchúlúkú ekkewe wokisin epwe álisikich le ammólnakichetá fán iten riáfféúmwáál?

⁹ Amwéchúlúkú ekkewe wokisin ka kon sani. (Mat. 13:52) Esap mwéch mettóch meinisin lón mékúrom, nge Jiowa a tongeni áeá an we ngún mi fel * le álisuk le chechchemeni ekkena wokisin. (Joh. 14:26) Nengeni alon emén chienach mwán Chón Kraist mi áláeménúló lón kalapus me East Germany: “A ifa me feiéchúi pwe ua fen amwéchúlúkú fitepúkú wokisin! Inaamwo ika ua áláeménúló, nge ua kan chék ekkekieki sókkopaten pwóróus lón Paipel.” Ekkewe wokisin pwiich na a amwéchúlúkúúr a álisi le ririéch ngeni Jiowa me likiitú fán tuppwél.

10. Pwata a lamot ach sipwe amwéchúlúkú ach kewe kél?

¹⁰ Amwéchúlúkú me kélú ach kewe kélún mwareiti Jiowa. Atun Paulus me Silas ra kalapus lón Filipi, ra eáni ekkewe kélún lúkú ra amwéchúlúkú. (Föf. 16:25) Pwal ina met pwiich kewe seni ewe Soviet Union me lóóm mi eoló Siberia ra féri ren ar repwe apéchékkúlafengeniir. Chienach we fefin itan Mariya Fedun, a erá: “Aua kélú ekkewe kél aua chechchemeniir, ekkewe kél seni néúch we puken  kél.” A erá pwe ekkena kél ra apéchékkúler meinisin me a álisiir le arap ngeni Jiowa. Ka péchékkúletá atun ka kélú ekkewe kélún lúkú ka kon saniir? Iwe kopwe amwéchúlúkú ekkena kél iei!​—Ppii ewe pwóór “ Jiowa, Apworaei.”

11-12. (a) Me ren 1 Samuel 17:37, 45-47, pwata Tafit a pwora? (b) Ifa ewe lesen mi kon lamot sia káé seni án Tafit leenien áppirú?

¹¹ A lamot tipepwora ren óm kopwe likiitú fán riáfféúmwáál. Ika ka meefi pwe ese naf óm tipepwora, met kopwe tongeni féri? Chechchemeni pwe enletin tipepwora ese lóngólóng wóón péchékkúlen emén are tufichin. Ekieki pwóróusen ewe alúwél Tafit atun an we epwele fiu ngeni Koliat. Ena mwánemmong a kon péchékkúl, sipeéch le fiu, me chómmóng an pisekin maun lap seni Tafit. Me ese pwal mwo nge wor néún Tafit ketilas. Nge a fókkun pwora. Fán pwora a ssá ngeni ena mwánemmong mi lamalamtekia pwe epwe fiu ngeni.

¹² Pwata Tafit a fókkun tipepwora? A fókkun lúkú pwe Jiowa a peni. (Álleani 1 Samuel 17:37, 45-47.) Tafit ese nefótófót wóón watteen Koliat lap seni. Nge a fen nefótófót wóón wakkatteen Jiowa lap seni Koliat. Met sia káé seni ena pwóróus? Sipwe tipepwora ika sia lúkú pwe Jiowa a penikich, me ika sia lúkúlúkú pwe Ewe mi Unusen Manaman a wakkatte seni chókkewe mi oputakich. (2 Kron. 20:15; Kölf. 16:8) Ifa usun sipwe tongeni ámááraatá ach tipepwora iei me mwen ach sipwe kúna riáfféúmwáál?

13. Ifa usun sipwe tongeni alapaaló ach tipepwora? Áweweei.

¹³ Sia tongeni alapaaló ach tipepwora iei ren ach afalafala ngeni aramas pwóróus allimen án Kot we Mwú. Pwata? Pokiten atun sia afalafal ngeni aramas sia káé le lúkúlúk wóón Jiowa me ach sisap niweiti aramas. (SalF. 29:25) Inisich a péchékkúleló atun sia kan taiso, iwe pwal ina chék usun, ach tipepwora a kan lapóló atun sia afalafal imw me imw, afalafal ikewe aramas ra soun nóm ie, afalafal sereseréch, me lón leenien angang. Ika sia ámááraatá ach pwora le afalafal iei, iwe sipwe mmólnéch le chék akkafalafal pwal mwo nge atun ekkewe mwú ra pinei.​—1 Tes. 2:1, 2.

14-15. Ikkefa ekkewe lesen sia káé seni Nancy Yuen me Valentina Garnovskaya?

¹⁴ Sia tongeni káé chómmóng lesen seni pwóróusen án rúúemén chienach fefin Chón Kraist tipepwora. Nancy Yuen emén fefin mi chék péréngaw nge ese fangetá lón an  tipepwora. * Ese úkútiw le afalafala pwóróus allimen án Kot we Mwú. Iwe pokiten ena, a kalapus lap seni 20 ier lón China. Ekkewe néúwisin mwú mi kapas eis ngeni ra erá pwe i ewe “mi kon tipeférea seni meinisin” lón fénúer we.

¹⁵ Valentina Garnovskaya a pwal kalapus fán úlúngát lón Russia, nge kapachelapen ierin an kalapus úkúkún 21 ier. * Pwata a kalapus? Pún a fókkun úppós le chék afalafal, iwe ekkewe néúwisin mwú ra erá pwe i “emén chón atai allúk mi fókkun efeiengaw.” Met a efisi án ekkena rúúemén fefin Chón Kraist mi tuppwél tipepwora? Ra fókkun lúkú pwe Jiowa a peniir.

16. Ifa kiien enletin tipepwora?

¹⁶ Usun met sia fen káé pwe ren ach sipwe ámááraatá tipepwora, a lamot ach sisap nefótófót wóón pwisin ach péchékkúl me tufichich. Nge sipwe fen lúkúlúk pwe Jiowa a penikich me i ewe epwe wisen fiu fán itach. (Tut. 1:29, 30; Sek. 4:6) Ina ewe kii fán iten enletin tipepwora.

17-18. Ifa án Jesus kapasen éúréúr ngenikich me ren Johannes 15:18-21? Áweweei.

¹⁷ Sia kan sani án aramas repwe ésúfélúkich, nge itá sisap ekieki pwe ese wor aúcheach ika aramas rese sanikich. Jesus a erá: “Oua feiöch are aramas ra oputakemi o likitikemi, are ra aitengauakemi o kapasingau usumi pokiten oua lükü Nöün Aramas.” (Luk. 6:22) Met weween alon Jesus na?

¹⁸ Esap weween pwe Jesus a erá pwe Chón Kraist repwe pwapwa ika ra kúna koput. Nge a éúréúrakich ren met epwe tongeni fis. Sise pekini fénúfan nge sia kan álleasochisi áitien Jesus kewe me afalafala minne a eáni afalafal. Iwe pokiten ena, chón ei fénúfan ra oput kich. (Álleani Johannes 15:18-21.) Sia mochen apwapwaai Jiowa. Ika aramas ra oputakich pokiten sia tongei Semach we, iwe sisap pwal ekieki.

19. Ifa usun sipwe tongeni áppirú án ekkewe aposel leenien áppirú?

¹⁹ Kosap mut ngeni met aramas ra erá are  féri an epwe efisi óm sáwásini óm emén Chón Pwáraatá Jiowa. (Mik. 4:5) Sia tongeni ú ngeni ach niwokkusiti aramas ren ach ekieki minne ekkewe aposel lón Jerusalem ra féri mwirin chék ninilóón Jesus. Ra silei pwe ekkewe néúwisin lamalamen chón Jus ra wesewesen oputer. (Föf. 5:17, 18, 27, 28) Nge iteiten rán ra chék sópweló le feiló ngeni ewe imwenfel me pwári pwe iir néún Jesus chón káé. (Föf. 5:42) Rese mut ngeni ar niwokkus an epwe eppetiir. Sia pwal tongeni okkufu ach niwokkusiti aramas ren ach affata pwe kich Chón Pwáraatá Jiowa lón ach leenien angang, lón sukul, are lón sópwuch we.​—Föf. 4:29; Rom 1:16.

20. Pwata ekkewe aposel ra pwapwa inaamwo ika ra kúna koput?

²⁰ Pwata ekkewe aposel ra pwapwa? Ra silei ewe popun aramas ra oputer, me ra ekieki pwe ar riáfféú ina eú feiéch pokiten ra féri letipen Jiowa. (Luk. 6:23; Föf. 5:41) Mwirin och fansoun ewe aposel Petrus a makkeei: “Are oupwe fen küna riaföü pokiten ämi föri mine a pwüng, oupwe feiöch.” (1 Pet. 2:19-21; 3:14) Ika sia weweiti pwe sia kúna koput pokiten ach féri minne mi pwúng, iwe sisap fókkun mut ngeni koput an epwe aúkúkichetiw seni ach angang ngeni Jiowa.

21-22. (a) Met ka filatá le féri pwe kopwe mmólnetá ngeni riáfféúmwáál? (b) Met sipwe káé lón en lesen mwirin ei?

²¹ Sise silei ineet aramas repwe poputá le eriáfféúkich, are ineet mwúún aramas repwe pinei ach angang ngeni Jiowa. Nge, sia silei pwe sia tongeni ammólnakichetá iei ren ach apéchékkúla ach riri ngeni Jiowa, ámááraatá tipepwora, me káé le likiitú fán koputach. Minne sia féri iei le mmólnetá, epwe álisikich le úppós lón ekkan rán repwe feito.

²² Nge ifa usun ika epwe pinepin ach fel ngeni Jiowa? Lón en lesen mwirin ei, sipwe káé án Paipel kewe kapasen emmwen repwe álisikich le sópweló lón ach angang ngeni Jiowa inaamwo ika a pinepin ach angang.