1. ¿Chucoch yom mi lac wʌn chajpan lac bʌ chaʼan jiñi ticʼlʌntel?

TI JIÑI acʼʌlel cheʼ mach jalix yom chaʼan miʼ chʌmel (sajtel) Jesús, tsiʼ yʌlʌ chaʼan ili pañimil (mulawil) mi caj i tsʼaʼlen pejtelel yomoʼ bʌ sujtel ti xcʌntʼan i chaʼan (Jn. 17:14). Cʼʌlʌl ti jiñi bʌ ora, jiñi añoʼ bʌ tiʼ contra jiñi i sujm bʌ chʼujutesaya tsaʼ caji i ticʼlañob jiñi xucʼul bʌ xñoptʼañob (2 Ti. 3:12). I mi lac pijtan chaʼan mi lac ñumen contrajintel cheʼ lʌcʼʌlix i jilibal ili pañimil (Mt. 24:9).

2, 3. a) ¿Chucoch añʌch i wocolel jiñi bʌqʼuen? b) ¿Chuqui mi caj laj qʼuel ti ili temaj?

² ¿Bajcheʼ miʼ mejlel lac wʌn chajpan lac bʌ chaʼan jiñi ticʼlʌntel? Mach yomic mi la cʌcʼ ti lac pensar chuqui tac miʼ mejlel i yujtel ti lac tojlel. Mi tsaʼ lac mele jiñi, miʼ mejlel laj cʌy lac chʼujutesan Jehová cheʼ maxto añic lac ñusa jumpʼejl wocol, come jiñi bʌqʼuen yicʼot jiñi cʌlʌx pensal miʼ mejlel i mʌlbeñonla (jotbeñonla) (Pr. 12:25; 17:22). Jiñi Satanás, ‹jiñi laj contra›, miʼ cʼʌn jiñi bʌqʼuen ti lac tojlel (1 P. 5:8, 9). Jin chaʼan, ¿chuqui miʼ mejlel lac mel chaʼan mi lac pʼʌtʼesan lac bʌ?

³ Ti ili temaj, mi caj laj qʼuel chuqui yom mi lac mel chaʼan mi lac ñumen pʼʌtʼesan bajcheʼ añonla la quicʼot Jehová yicʼot chucoch ñuc i cʼʌjñibal mi lac mel ili ora. Cheʼ jeʼel, mi caj lac tsajin chuqui miʼ mejlel lac mel chaʼan mi lac ñumen taj lac chʼejlel yicʼot cheʼ jiñi wiñicob xʼixicob (quixtañujob) miʼ tsʼaʼleñoñobla.

4. Cheʼ bajcheʼ miʼ yʌl Hebreos 13:5, 6, ¿chuqui yom mi lac wen ñop, i chucoch ñuc i cʼʌjñibal?

⁴ Laʼ lac ñop chaʼan Jehová miʼ cʼuxbiñonla yicʼot chaʼan maʼañic baʼ ora mi caj i cʌyonla (pejcan Hebreos 13:5, 6). Añix ñumen cabʌl jab cheʼ bʌ jiñi Lac Tsictesʌbentel tsiʼ yʌlʌ: «Jiñi quixtañu i ñumen cʌñʌ bʌ Dios jiñʌch muʼ bʌ caj i ñumen ñopben i coltaya cheʼ baʼ ora miʼ taj cabʌl wocol». I sujmʌch ili tʼan. Chaʼan mi  laj cuch jiñi ticʼlʌntel, yom mi laj cʼuxbin Jehová yicʼot mi lac ñop tiʼ tojlel tiʼ pejtelel lac pusicʼal, i yom mi lac wen cʼajtesan chaʼan miʼ cʼuxbiñonla (Mt. 22:36-38; Stg. 5:11).

5. ¿Chuqui mi caj i coltañonla lac ñumen cʌmben i cʼuxbiya Jehová?

⁵ Laʼ lac pejcan jiñi Biblia ti jujumpʼejl qʼuin chaʼan mi lac ñumen lʌcʼtesan lac bʌ ti Jehová (Stg. 4:8). Cheʼ woli (choncol) lac pejcan, laʼ lac ñumen ñaʼtʌben i melbal tac Jehová, bajcheʼ jiñi cʼuxbiya, pʼuntaya yicʼot i yutslel i pusicʼal. Laʼ laj cʌn bajcheʼ miʼ pʌs i cʼuxbiya tiʼ melbal (chaʼleya) yicʼot tiʼ tʼan (Éx. 34:6). An wocol bʌ miʼ ñopob chaʼan Dios miʼ cʼuxbiñob come tajol maʼañic majqui an i pʌsbeyob cʼuxbiya. Mi cheʼ mi lac ñaʼtan bajcheʼ iliyi, laʼ lac tsʼijbun jumpʼejl lista bajcheʼ an i pʌsbeyonla i pʼuntaya yicʼot i yutslel i pusicʼal Jehová (Sal. 78:38, 39; Ro. 8:32). Tajol cabʌl chuqui miʼ mejlel lac tsʼijbun cheʼ mi lac wen ñaʼtan chuqui ñusʌbil lac chaʼan yicʼot am bʌ lac pejca ti Biblia. Cheʼ mi lac ñumen qʼuel ti ñuc chuqui miʼ mel Jehová, mi caj lac ñumen pʼʌtʼesan bajcheʼ añonla la quicʼot (Sal. 116:1, 2).

6. Cheʼ bajcheʼ miʼ yʌl Salmo 94:17-19, ¿bajcheʼ miʼ coltañonla cheʼ mi lac luʼ suben ti oración Jehová chuqui an ti lac pusicʼal?

⁶ Laʼ lac chaʼlen oración ti bele ora. La lac ñaʼtan juntiquil chʼiton. Jiñi i papá miʼ loch mecʼ yicʼot i cʼuxbiya. Wen cʌntʌbil miʼ yubin i bʌ, jin chaʼan miʼ suben i papá pejtelel chuqui ti ñusa ti jiñi qʼuin, chuqui wem bʌ tsiʼ mele yicʼot mach bʌ weñic. Cheʼ mi caj i yujtel ti lac tojlel jeʼel mi ti bele ora mi lac luʼ suben Jehová chuqui an ti lac pusicʼal (pejcan Salmo 94:17-19). Laʼ lac jamben lac pusicʼal «cheʼ bajcheʼ miʼ bejqʼuel loqʼuel jaʼ» i laʼ lac suben jiñi cʼuxbibil bʌ lac Tat chuqui tac mi lac bʌcʼñan yicʼot mi laj cʼojoʼtan (Lm. 2:19). Cheʼ jiñi mi caj lac taj muʼ bʌ yʌl jiñi Biblia: ‹I ñʌchʼtʌlel lac pusicʼal chʼoyol bʌ ti Dios mi caj i cʌntan lac pusicʼal yicʼot lac ñaʼtʌbal› (Fil. 4:6, 7). Cheʼ ti bele ora mi lac pejcan ti oración Jehová ñumen lʌcʼʌl mi caj la cajñel la quicʼot (Ro. 8:38, 39).

7. ¿Chucoch yom mi lac wen ñop chaʼan mucʼʌch caj i tsʼʌctiyel jiñi bendición tac chaʼan bʌ i Yumʌntel Dios?

⁷ Laʼ lac ñop chaʼan mucʼʌch caj i tsʼʌctiyel jiñi bendición tac muʼ bʌ caj i chʼʌm tilel i Yumʌntel Dios (Nm. 23:19). Mi mach wen pʼʌtʌlic lac ñopoñel (chʼujbiya) chaʼan jiñi, Satanás yicʼot i xibajob mach wocolic mi caj i yubiñob chaʼan miʼ yotsañob lac bʌqʼuen (Pr. 24:10; He. 2:15). ¿Chuqui miʼ mejlel lac mel ili ora chaʼan mi lac pʼʌtʼesan lac ñopoñel tiʼ Yumʌntel Dios? Laʼ la cʌqʼuen i yorajlel chaʼan mi lac wen pejcan jiñi albil tac bʌ i chaʼan Jehová chaʼan jiñi i Yumʌntel yicʼot chucoch miʼ mejlel lac ñop chaʼan mucʼʌch i caj i tsʼʌctiyel. Chaʼan mi lac ñumen chʼʌmben i sujm chaʼan ñucʌch i cʼʌjñibal iliyi, laʼ laj qʼuel chuqui tsaʼ ujti tiʼ tojlel jiñi Stanley Jones, tsaʼ bʌ ajñi ti cárcel cheʼ bʌ wucpʼejl jab chaʼan chuqui ñopol i chaʼan. * Tsiʼ yʌlʌ  chuqui tsiʼ colta chaʼan xucʼul miʼ yajñel: «Jiñi j cʌñʌ bʌ chaʼan i Yumʌntel Dios, muʼ bʌ c wen ñop chaʼan mucʼʌch i caj i tsʼʌctiyel, tsiʼ yʌqʼueyon c pʼʌtʌlel. Maʼañic tsiʼ mʌlbeyoñob». Mi pʼʌtʌlʌch lac ñopoñel ti jiñi albil tac bʌ i chaʼan Dios, mi caj lac ñumen lʌcʼtesan lac bʌ tiʼ tojlel yicʼot maʼañic mi caj i mʌlbeñonla jiñi bʌqʼuen (Pr. 3:25, 26).

8. Tsictesan chuqui mi lac pʌs ti bajcheʼ yilal mi laj qʼuel jiñi tempa bʌ tac.

⁸ Mach yomic mi laj cʌy majlel ti jiñi tempa bʌ tac. Jiñʌch muʼ bʌ i coltañonla lac ñumen lʌcʼtesan lac bʌ ti Jehová. Cheʼ bajcheʼ yilal mi laj qʼuel jiñi tempa bʌ tac, jiñʌch muʼ bʌ caj i pʌs mi mucʼʌch caj laj cuch cheʼ baʼ ora miʼ tilel jiñi ticʼlʌntel (He. 10:24, 25). Laʼ laj qʼuel chucoch. Mi tsaʼ la cʌcʼʌ chaʼan ili ora chuqui tac jach miʼ mʌctañonla majlel ti tempa bʌ, ¿chuqui mi caj lac mel cheʼ baqui ora wocolix chaʼan mi lac tempan lac bʌ? Pero mi wen ñaʼtʌbilix lac chaʼan chaʼan maʼañic mi caj laj cʌy majlel ti lac tempa bʌ tac, jiñi laj contrajob maʼañic mi caj i mejlel i mʌctañoñobla. Jin chaʼan, yomix mi lac chaʼlen wersa ili ora chaʼan mi lac chʼʌm ti ñuc jiñi lac tempa bʌ. Mi mucʼʌch lac mel, jiñi laj contrajintel yicʼot i mʌctʌntel lac tempa bʌ ti yumʌlob maʼañic mi caj i mʌctañonla chaʼan mi lac jacʼben i tʼan Dios (Hch. 5:29).

9. Chaʼan mi lac chajpan lac bʌ chaʼan jiñi ticʼlʌntel, ¿chucoch wen cheʼ mi laj cʌy ti lac jol texto tac?

⁹ Laʼ laj cʌy texto tac ti lac jol (Mt. 13:52). Tajol miʼ mejlel i ñajʌyel lac chaʼan, pero Jehová miʼ mejlel i cʼʌn jiñi pʼʌtʌl bʌ i yespíritu chaʼan mi laj cʼajtesan (Jn. 14:26). Juntiquil hermano tsaʼ bʌ ajñi yaʼ ti cárcel ti Alemania oriental, tsiʼ yʌlʌ: «Tsiʼ wen coltayon cheʼ tsaʼ j cʌyʌ tic jol ñumen ti 200 texto tac, come cabʌl chuqui tsaʼ c ñaʼta tiʼ chaʼan bʌ Biblia cheʼ bʌ maʼañic mij cʌjqʼuel loqʼuel». Jiñi texto tac jiñʌch tsaʼ bʌ i wen colta chaʼan lʌcʼʌl yicʼot xucʼul miʼ yajñel ti Jehová.

10. ¿Chucoch yom mi laj cʌy ti lac jol jiñi cʼay tac chaʼan i ñuclel Jehová?

¹⁰ Laʼ laj cʌy ti lac jol jiñi cʼay tac am bʌ ti laj cʼʌyoñib yicʼot ti Internet i laʼ laj cʼʌyin. Cheʼ bʌ Pablo yicʼot Silas tsaʼ otsʌntiyob ti cárcel yaʼ ti Filipos, tsaʼ caji i cʼʌyiñob jiñi cʼay tac yujilobix bʌ (Hch. 16:25). Jiñi la quermañojob ti Unión Soviética (ili ora Rusia) tsaʼ bʌ chojquiyob majlel ti Siberia lʌcʼʌ lajal tsiʼ meleyob chaʼan miʼ pʼʌtʼesañob i ñopoñel. Jiñi hermana Mariya Fedun tsiʼ cʼajtesa: «Tsaʼ caji lon j cʼʌyin pejtelel jiñi cʼay tac lon cujilix bʌ tsaʼ bʌ loqʼui ti lac jun». Tsiʼ yʌlʌ chaʼan jiñi cʼay tac tsiʼ ñuqʼuesʌbeyob i pusicʼal i tsiʼ coltayob chaʼan ñumen lʌcʼʌl miʼ yubiñob i bʌ tiʼ tojlel Jehová. ¿Muʼ ba  i ñuqʼuesan lac pusicʼal cheʼ mi laj cʼʌyin jiñi cʼay tac muʼ bʌ lac wen mulan ti laj cʼʌyoñib yicʼot ti Internet? Mi cheʼʌchi, laʼ laj cʌy ti lac jol ili ora (qʼuele jiñi recuadro « Coltañon chaʼan mic pʌs c chʼejlel»).

11, 12. a) Cheʼ bajcheʼ miʼ yʌl 1 Samuel 17:37, 45-47, ¿chucoch tsiʼ pʌsʌ i chʼejlel David? b) ¿Chuqui ñuc bʌ mi laj cʌn tiʼ tojlel David?

¹¹ Chaʼan mi laj cuch jiñi ticʼlʌntel, yom an lac chʼejlel. ¿Chuqui miʼ mejlel lac mel cheʼ mi laj qʼuel chaʼan mach wen añic lac chʼejlel? Laʼ laj cʼajtesan chaʼan jiñi lac chʼejlel mach yaʼic cʌyʌl ti lac chanlel, lac pʼʌtʌlel o chuqui tac la cujil. Laʼ laj qʼuel tiʼ tojlel David. Cheʼ bʌ xcolelto, tsiʼ contraji jiñi chan bʌ wiñic i cʼabaʼ Goliat. David ñumen pecʼ yicʼot mach wen pʼʌtʌlic bajcheʼ jiñi filisteo. Cheʼ jaʼel, mach wen chajpʌbilic chaʼan miʼ majlel i contrajin i maʼañic i yespada. Pero tsiʼ pʌsʌ i chʼejlel i tsaʼ majli i contrajin jiñi Goliat.

¹² ¿Chucoch tsiʼ wen pʌsʌ i chʼejlel jiñi David? Come tsiʼ wen ñopo chaʼan an yicʼot i coltaya Jehová (pejcan 1 Samuel 17:37, 45-47). David maʼañic tsiʼ ñaʼta chaʼan maʼan i cʼʌjñibal tiʼ tojlel Goliat, cojach tsiʼ yʌcʼʌ tiʼ ñaʼtʌbal chaʼan Jehová ñumen pʼʌtʌlto bajcheʼ jiñi Goliat. Ti ili relato an chuqui ñuc bʌ mi laj cʌn: Mi caj lac ñumen pʌs lac chʼejlel cheʼ mi lac ñop chaʼan an la quicʼot i coltaya Jehová yicʼot cheʼ mi lac ñop chaʼan maʼañobic i pʼʌtʌlel laj contrajob cheʼ mi lac lajiñob yicʼot lac Dios, jiñi maʼañic bʌ i pʼisol i pʼʌtʌlel (2 Cr. 20:15; Sal. 16:8). ¿Chuqui yom mi lac mel ili ora, cheʼ maxto tejchi laj contrajintel, chaʼan mi lac ñumen taj lac chʼejlel?

13. ¿Chuqui miʼ mejlel lac mel chaʼan mi lac ñumen taj lac chʼejlel? Tsictesan.

¹³ Mi caj i coltañonla lac ñumen taj lac chʼejlel cheʼ mi lac sub jiñi wen tʼan chaʼan i Yumʌntel Dios. ¿Chucoch? Come miʼ cʌntesañonla chaʼan mi lac ñumen ñop ti Jehová i chaʼan maʼañic mi lac bʌcʼñan jiñi quixtañujob (Pr. 29:25). Cheʼ bajcheʼ jiñi lac bʌcʼtal miʼ ñumen pʼʌtʼan cheʼ mi lac mel ejercicio, mi lac ñumen taj lac chʼejlel jaʼel cheʼ mi lac chaʼlen subtʼan ti jujumpʼejl otot, yaʼ baqui miʼ ñumel cabʌl quixtañujob, baqui jach añonla yicʼot ti choñoñibʌl tac. Mi tsaʼ lac chaʼle subtʼan yicʼot lac chʼejlel ili ora, chajpʌbilonla mi caj la cajñel chaʼan mi lac bej mel anquese miʼ mʌctʌntel jiñi lac subtʼan (1 Ts. 2:1, 2).

14, 15. ¿Chuqui mi laj cʌn tiʼ tojlel jiñi Nancy Yuen yicʼot Valentina Garnovskaya?

¹⁴ An chuqui ñuc bʌ mi laj cʌn tiʼ tojlel  chaʼtiquil xucʼul bʌ hermanajob tsaʼ bʌ i pʌsʌyob cabʌl i chʼejlel. Juntiquil jiñʌch Nancy Yuen. An jach i chanlel jumpʼejl metro yicʼot ojlil, pero mach yujilic bʌqʼuen. * Maʼañic tsiʼ jacʼʌ i cʌy i sub jiñi wen tʼan, jin chaʼan tsaʼ otsʌnti ti cárcel cheʼ bʌ 20 jab yaʼ ti China. Jiñi añoʼ bʌ i yeʼtel tsaʼ bʌ i melbeñob cʼajtiya tac, tsiʼ yʌlʌyob chaʼan ti jiñi tejclum, «juntiquilʌch mach bʌ mejlic i qʼuextʌbentel i pensar».

¹⁵ Jiñi yambʌ hermana jiñʌch Valentina Garnovskaya. 21 jab tsaʼ ajñi ti cárcel yaʼ ti Unión Soviética come uxyajl tsaʼ otsʌnti. * Maʼañic tsiʼ mulaj i cʌy jiñi subtʼan, jin chaʼan jiñi añoʼ bʌ i yeʼtel tsaʼ cʼoti i yʌlob chaʼan «juntiquil xñusatʼan wen jontol bʌ». ¿Chucoch tsiʼ wen pʌsʌyob i chʼejlel ili xucʼul bʌ hermanajob? Come tsiʼ wen ñopoyob chaʼan an yicʼotob i coltaya Jehová.

16. ¿Baqui chucul jiñi i sujm bʌ lac chʼejlel?

¹⁶ Cheʼ bajcheʼ tsaʼ laj qʼuele, chaʼan mi lac pʌs lac chʼejlel mach yʌlʌyic bajcheʼ cʼamel lac pʼʌtʌlel o chuqui la cujil melol. Yom bʌ mi lac mel jiñʌch cheʼ mi lac ñop chaʼan Jehová miʼ coltañonla yicʼot miʼ yʌcʼ i bʌ ti lac tojlel (Dt. 1:29, 30; Zac. 4:6). Yaʼʌch chucul jiñi i sujm bʌ lac chʼejlel.

17, 18. Cheʼ bajcheʼ miʼ yʌl Juan 15:18-21, ¿chuqui ti wocol tsiʼ yʌlʌ Jesús chaʼan mi caj lac ñusan, i chucoch?

¹⁷ Mi lac mulan chaʼan mi laj qʼuejlel ti ñuc, pero mach lac pensalin chaʼan maʼañic laj cʼʌjñibal cheʼ jiñi quixtañujob mach yomic i qʼueloñobla. Jesús tsiʼ yʌlʌ: «Tijicñayetla cheʼ miʼ tsʼaʼleñetla winicob, cheʼ miʼ choquetla, cheʼ mi wajleñetla, cheʼ miʼ pʼajob laʼ cʼabaʼ chaʼan tsaʼ laʼ ñopo i Yalobil Winic» (Lc. 6:22). ¿Chuqui yom i yʌl ili tʼan tac?

¹⁸ Jesús maʼañic tsiʼ yʌcʼʌ ti ñaʼtʌntel chaʼan jiñi xcʌntʼañob i chaʼan mi caj lac mulañob chaʼan mi lac tsʼaʼlentelob, cojach tsiʼ yʌlʌ ñuc bʌ i sujmlel. Mi lac tsʼaʼlentel come maʼañic mi la cotsan lac bʌ ti ili pañimil, mi lac chʼʌm ti ñuc jiñi i cʌntesa tac Jesús ti laj cuxtʌlel yicʼot  mi lac sub jiñi wen tʼan (pejcan Juan 15:18-21). La com lac mel muʼ bʌ i mulan Jehová. Mi jiñi quixtañujob miʼ tsʼaʼleñoñobla chaʼan mi laj cʼuxbin jiñi lac Tat, mach lac wentajic.

19. ¿Bajcheʼ mi caj lac lajin i melbal jiñi apóstolob?

¹⁹ Maʼañic baʼ ora yom mi laj quisñin chaʼan i testigojonla Jehová tiʼ cajach chuqui miʼ yʌlob o miʼ melob jiñi quixtañujob (Mi. 4:5). Muʼ bʌ caj i coltañonla chaʼan mi lac mʌlben i bʌcʼñʌntel wiñicob jiñʌch cheʼ mi lac tsajin jiñi ejemplo tsaʼ bʌ i pʌsʌyob jiñi apóstolob yaʼ ti Jerusalén cheʼ bʌ maxto jalic tsaʼ tsʌnsʌnti jiñi Jesús. Yujilob chaʼan miʼ wen tsʼaʼlentelob tiʼ tojlel jiñi judíojob ñucoʼ bʌ i yeʼtel ti ñopbalʌl (Hch. 5:17, 18, 27, 28). Pero maʼañic baqui ora tsiʼ cʌyʌyob majlel yaʼ ti templo, i tsiʼ yʌcʼʌyob i bʌ ti cʌñol bajcheʼ xcʌntʼañob i chaʼan Jesús tiʼ tojlel jiñi quixtañujob (Hch. 5:42). Maʼañic tsiʼ yʌcʼʌyob chaʼan jiñi bʌqʼuen miʼ mʌctañob. Mi caj lac mʌlben jaʼel jiñi bʌqʼuen mi tiʼ pejtelel ora mi lac sub chaʼan i testigojonla Jehová, ti lac troñel, ti escuela o yaʼ baqui chumulonla (Hch. 4:29; Ro. 1:16).

20. ¿Chucoch tsiʼ tajayob i tijicñʌyel jiñi apóstolob anquese tsaʼ tsʼaʼlentiyob?

²⁰ Jiñi apóstolob tsiʼ tajayob i tijicñʌyel come yujilob chucoch woli (yʌquel) i tsʼaʼlentelob. I cheʼ jaʼel, tsiʼ qʼueleyob ti ñuc cheʼ miʼ ticʼlʌntelob chaʼan tiʼ melol chuqui yom Jehová (Lc. 6:23; Hch. 5:41). Ti wiʼil, jiñi apóstol Pedro tiʼ tsʼijbu: «Mi woli laʼ ticʼlʌntel chaʼan tiʼ melol chuqui toj, tijicñayetla» (1 P. 2:19-21; 3:14). Cheʼ mi cʼotel lac ñaʼtan chaʼan jiñi quixtañujob miʼ tsʼaʼleñoñobla chaʼan tiʼ melol chuqui toj, maʼañic mi caj i mʌctañonla chaʼan mi lac bej melben i yeʼtel (troñel) Jehová.

21, 22. a) ¿Chuqui a wom a mel chaʼan maʼ chajpan a bʌ chaʼan jiñi ticʼlʌntel? b) ¿Chuqui mi caj lac tsajin yaʼ ti yambʌ temaj?

²¹ Mach la cujilic baqui ora mi caj lac ticʼlʌntel o jalaqui mi caj i mʌctañob lac subtʼan jiñi yumʌlob. La cujil bʌ jiñʌch cheʼ miʼ mejlel lac chajpan lac bʌ ili ora mi mucʼʌch lac pʼʌtʼesan bajcheʼ añonla la quicʼot Jehová, mi mucʼʌch lac chaʼlen wersa chaʼan mi lac ñumen taj lac chʼejlel yicʼot laj cʌn chuqui yom mi lac mel cheʼ bʌ jiñi quixtañujob miʼ tsʼaʼleñoñobla. Cheʼ mi lac chajpan lac bʌ ili ora, mi caj i coltañonla chaʼan xucʼul mi la cajñel ti talto bʌ qʼuin.

²² Pero ¿chuqui mi caj lac mel mi ti jumpʼejl bʌ qʼuin jiñi añoʼ bʌ i yeʼtel miʼ mʌctañob lac subtʼan? Ti jiñi yambʌ temaj, mi caj lac tsajin principio tac muʼ bʌ caj i coltañonla lac chʌn melben i yeʼtel Jehová cheʼ woliʼ mʌctʌntel lac subtʼan.