1. Pine nemene matre nyipiewekë troa hnëkë kowe la icilekeu?

AME ngöne lo heji qëmekene troa meci hnei Iesu, atre hi nyidrëti laka, troa methinëne la itre ka xötrethenge nyidrë. (Ioane 17:14) Qane ju hi lai, kola kökötre la icilekeu. Kola methinëne la itre Keresiano hnene la itre atr ka tha nyihlue i Iehova kö. (2 Tim. 3:12) Tha sesëkötre kö së laka, kola icilekeu me imethinë hnene la itre ithupëjia me easë.—Mat. 24:9.

2-3. (a) Nemene la nyine tro sa atre göne la xou? (b) Nemene la hne së hna troa ce wang ngöne la tane mekun celë?

² Nemene la aqane tro sa hnëkë matre troa atreine xomihnine la icilekeu elany? Tha tro pi kö sa mekune la itre ewekë ka troa axouenyi së, wanga tro sa hnehengazo menu. Tro hë sa nanazij me nanyi qaathei Iehova, ngacama paatre palakö la itre jol. (Ite edomë 12:25; 17:22) Ketre, ka hetre ethanyine catre la xou. Celë hi jiane isi “Diabolo, lo ithupëjia” me easë. (1 Pet. 5:8, 9) Nemene la aqane tro sa isa hnëkë kowe la icilekeu?

³ Ame ngöne la tane mekun celë, tro sa ce wang la enyipiewekëne la troa acatrene la aqane imelekeu së me Iehova. Tro fe sa ce wang la nyine troa kuca matre troa catr, ngacama kola methinë së.

4. Nemene la hna qaja ngöne Heberu 13:5, 6, nge nemene la ka xecie koi së?

⁴ Troa xecie koi së laka, Iehova a hnimi së, nge tha tro jë kö Nyidrëti a nuaxöji së. (E jë la Heberu 13:5, 6.) Nyimu macatre ne qaja ngöne la Ita Ne Thup, ka hape: “Ame la atr ka atrepengöi Akötresieti hnyawa, tre, angeic a mejiune koi Nyidrë ngöne la itre ijine jol.” Eje hi, maine easa ajane troa cile catr ngöne la icilekeu, loi e tro sa catre hnimi  Iehova me mejiune koi Nyidrë. Tha luelue kö së laka, Nyidrëti a hnimi së.—Mat. 22:36-38; Iako. 5:11.

5. Nemene la ka amamane koi së laka, Iehova a hnimi së?

⁵ Troa e Tusi Hmitrötr, matre acatrene la aqane imelekeu së me Iehova. (Iako. 4:8) Ame la easa e Tusi Hmitrötr, loi e tro sa thel me lapa mekune la itre thiina i Iehova. Loi e tro sa pane mekune la etrune la ihnimi Iehova, ka mama ngöne la itre hnei Nyidrëti hna qaja me kuca. (Eso. 34:6) Ame koi itre xan, tha canga mama kö koi angatr la ihnimi Akötresie. Maine celë hi mekuna së, loi e tro sa sija ngöne pepa la itre aqane hnimi së hnei Iehova o drai. (Sal. 78:38, 39; Rom. 8:32) Maine tro sa mekune la itre hne së hna melën, me lapa mekune la itre hne së hna e qa hnine la Tusi Hmitrötr, tro ha mama koi së la nöjei ewekë hna kuca hnei Iehova. Tro hë sa hetre hni ne ole koi Iehova, nge catrecatre la aqane imelekeu së me Nyidrë.—Sal. 116:1, 2.

6. Thenge la hna qaja ngöne Salamo 94:17-19, nemene la eloin e tro sa catre thith?

⁶ Troa catre thith. Pane mekune jë la nekönatr hna xep hnei kem. Tingeting me lolo la mele i nyën. Pëkö xou thei nyën troa qaja koi kem la itre ewekë ka ngazo me ka loi ka traqa ngöne la drai. Ketre tune fe, maine tro sa catre thithi koi Iehova, tro hë sa easenyi koi Nyidrë. (E jë la Salamo 94:17-19.) Ame la easa thith, loi e tro sa ‘nenge la hni së kösë tim’ koi Iehova, me qaja kowe la Keme së ka tru ihnimin, la itre hne së hna xouen me hnehengazon. (Ite teije 2:19) Nemene la thangane lai? Öni Tusi Hmitrötr: “Tro ha thupëne la itre hni me mekuna i nyipunie hnene la tingetinge qaathei Akötresie.” (Fil. 4:6, 7) Eje hi, maine tro sa catre thith, tro hë sa easenyi catr koi Iehova.—Rom. 8:38, 39.

7. Pine nemene matre loi e troa xecie koi së laka, tro kö a eatre la itre hna thingehnaean hnei Akötresie?

⁷ Troa xecie koi së laka, tro kö a eatre la itre hna thingehnaean hnei Akötresie. (Num. 23:19) Maine tha mejiune kö së kowe la itre hna thingehnaean hnei Akötresie, tha jole hë koi Satana me itre dremoni troa axouenyi së. (Ite edomë 24:10; Heb. 2:15) Nemene la aqane tro sa acatrene la mejiune së kowe la Baselaia i Akötresie? Loi e tro sa xomi ijine troa inine la itre hna thingehnaeane hnei Akötresie, göne la Baselaia i Nyidrë, me thel la itre ewekë ka anyipicine laka, tro kö Nyidrëti a eatrën elany. Nemene la thangane lai? Hanawang la hna melën hnei Stanley Jones. Hna akalabusi angeic pi hmi koi sevene lao macatre. * Nemene la ka xatua angeic troa mele nyipici? Öni angeic: “Ka  catre la lapauneng ke, atre hi ni la hna troa kuca elany hnene la Baselaia i Akötresie, nge xecie hnyawa koi ni laka, tro kö a eatr. Pëkö ewekë ka atreine troa sewe ni troa nyihlue i Iehova.” Eje hi, maine ka catrecatre la lapaune së kowe la itre hna thingehnaean hnei Akötresie, tro hë sa easenyi koi Nyidrë, nge tha tro hë sa xou troa nyihlue i Nyidrë.—Ite edomë 3:25, 26.

8. Nemene la hne së hna amaman e tro palahi sa sine la itre icasikeu? Qejepengöne jë.

⁸ Tro palahi a sine la itre icasikeu. Celë hi ka xatua së troa acatrene la aqane imelekeu së me Iehova. Ketre, easa amamane laka, ijiji së hi troa cile catr ngöne la icilekeu, laka, calemi hë. (Heb. 10:24, 25) Eje hi, maine troa sewe së enehila troa sine la itre icasikeu hnene la itre jole ka co hi, hapeu, tro kö sa atreine cile catr elany, ngöne la kola wathebo së troa ce memine la itre trejin? Maine tro palahi sa wangatrune enehila la itre icasikeu, tha tro kö sa xouen elany la itre ka icilekeu. Haawe, loi e tro sa acatrene enehila la aja së troa sine la itre icasikeu. Eje hi lai laka, pëkö mus maine wathebo pena ka troa axouenyi së. Iehova la hne së hna troa dreng, ngo tha itre atr kö.—Itre hu. 5:29.

9. Pine nemene matre nyipiewekë troa hnehene la itre xötr ne la Tusi Hmitrötr?

⁹ Troa hnehene la itre xötr ne la Tusi Hmitrötr. (Mat. 13:52) Pine laka, ka canga thëthëhmi së, thatreine kö së troa hnehen asë la itre mekun. Ngo jëne la uati hmitrötre i Iehova, ijije hi tro Nyidrëti a amexeje la itre xötr. (Ioane 14:26) Önine la trejin qa Alema hna akalabusin: “Tru la madrineng ke, traqa koi itre hadredre lao xötr hnenge hna hnehen! Ngacama eni caas, ngo hnenge hna lapa mekune la itre hna qaja hnei Tusi Hmitrötr.” Celë hi ka xatuane la trejin troa lapa qale koi Iehova, me cile catr ngöne la icilekeu.

10. Pine nemene matre nyipiewekë troa hnehene la itre nyima nyine atrunyi Iehova?

¹⁰ Troa hnehene me thinge la itre nyima nyine atrunyi Iehova. Ame ngöne lo kola akalabusi Paulo me Sila e Filipi, hnei nyidroti hna thinge la itre nyima nyine atrunyi Iehova. (Itre hu. 16:25) Nemene la ka hamë trengecatr kowe la itre trejin ne Union soviétique (Russie) hna up a tro Sibérie? Öni Mariya Fedun: “Hne huni hna thinge la itre nyima nyine atrunyi Iehova.” Hna thue trengecatre i angatr me acatrene la mejiune i angatr koi Iehova.  Hapeu, kolo kö a aegöcatrenyi së ngöne la easa thinge la itre nyima nyine atrunyi Iehova? Haawe, canga inine jë la itre nyima!—Wange ju fe la hna eköhagen, hna hape, “ Hamë Ni Pi La Catr.”

11-12. (a) Thenge la hna qaja ngöne 1 Samuela 17:37, 45-47, pine nemene matre tha hnei Davita kö hna xou? (b) Nemene la ini hne së hna xom qa ngöne la tulu i Davita?

¹¹ Nyipiewekë tro sa catr matre troa atreine xomihnine la icilekeu. Nemene la nyine tro sa kuca matre troa hetre trengecatr? Eje hi laka, tha hnene kö la hmae së me trengecatre së, maine hne së hna atreine pena. Hanawang la tulu i Davita, ngöne lo angeic a cile koi Goliatha, ketre atr ka catr me ka hoea. Davita la ketre thöth, nge tha hnei angeice kö hna hnëkë troa isi ke, pëkö taua i angeic. Ngo ame pe, ka catre Davita. Tha hnei angeice kö hna xou troa isi me Goliatha.

¹² Pine nemene matre tha hnei Davita kö hna xou? Atre hnyawa hi Davita laka, ce Iehova me angeic. (E jë la 1 Samuela 17:37, 45-47.) Tha hnei Davita kö hna goeëne la eqea i Goliatha. Hnei angeice pe hna goeë Iehova. Nemene la ini koi së? Maine ka xecie koi së laka, ce Iehova me easë, tro hë lai a thue trengecatre së. Ketre, loi e troa xecie koi së laka, itre wanamamik la itre ka icilekeu koi Iehova, Akötresie Kapucatinasë. (2 A. l. ite jo. 20:15; Sal. 16:8) Haawe, nemene la aqane tro sa catr enehila?

13. Nemene la ketre aqane tro sa catr enehila? Qejepengöne jë.

¹³ Ame la ketre aqane tro sa catr enehila, tre, troa cainöjëne la itre maca ka lolo ne la Baselaia i Akötresie. Pine nemen? Ame la easa cainöj, easa inine troa mejiune koi Iehova me hnöthe la xou. (Ite edomë 29:25) Tune la easa egöcatr ngöne la easa enij me kuci elo, ketre tune fe, easa egöcatr ngöne la easa catre cainöj. Easa cainöj ngöne la itre hnalapa trootro, me ngöne la gaa tru atr, me e cahu gojeny me ngöne la hna huliwa. Maine tro sa catre cainöj enehila, tha tro kö sa xou troa cainöj elany, e traqa ju wathebone la huliwa së.—1 Thes. 2:1, 2.

14-15. Nemene la ini hne së hna xom qa ngöne la tulu i Nancy Yuen me Valentina Garnovskaya?

¹⁴ Nyimutre la itre ini hne së hna troa xom qa ngöne la tulu ne la lue trejin. Ame Nancy Yuen, tre, ka hopatr eahlo (1.5 m),  ngo ame pe, pëkö xou thei eahlo. * Tha hnei eahlo kö hna xou troa catre cainöj, ngacama hna wathebon. Ame la pune lai ke, hna akalabusi eahlo koi 20 lao macatre e Chine. Önine la ketre polis, ka hape, “pëkö atr ka catre he” tui eahlo ngöne la nöje i angatr.

¹⁵ Ame Valentina Garnovskaya ke, akönia akalabusi eahlo e Union soviétique, matre 21 lao macatre ne umë eahlo. * Pine nemen? Pine laka, hnei eahlo hna catre cainöj, matre hnene la itre mus hna xomi eahlo ceitu me “ketre ka ihumuth.” Nemene la ka thue trengecatre i nyidro? Xecie hnyawa hi koi nyidro laka, ce Iehova me nyidro.

16. Nemene la nyine tro sa kuca matre troa catr?

¹⁶ Tune lo hne së ce wang, maine easa ajane troa catr, tha tro kö sa mejiune kowe la sipu trengecatr me inamacane së. Loi e tro pe sa mejiune koi Iehova, nge Nyidrëti kö la ka troa isigöli së. (Deu. 1:29, 30; Zaka. 4:6) Celë hi nyipi trengecatre lai.

17-18. Thenge la hna qaja ngöne Ioane 15:18-21, nemene la ithuemacany hna hamën hnei Iesu? Qejepengöne jë.

¹⁷ Eje hi laka, easa madrine ngöne la kola metrötrë së. Ngo maine pëkö ka metrötrë së, tha tro pi kö sa mekun laka, tha ka nyipiewekë kö së. Öni Iesu: “Madrine nyipunie la kola methinë nyipunie, me xele ma wai nyipunie, me qaqa nyipunie, me qejegele nyipunie pine la Nekö i Atr.” (Luka 6:22) Nemene la aliene la hna qaja hnei Iesu?

¹⁸ Tha hnei Iesu kö hna qaja ka hape, ka madrine la itre Keresiano ngöne la kola methinë angatr. Hnei nyidrëti pe hna canga thuemacanyi së la itre ewekë ka troa traqa. Tha easë kö a sine la fene celë. Easa trongëne la itre ini hna hamën hnei Iesu, me catre tro fë la maca i nyidrë. Celë hi kepin matre, kola methinë së. (E jë la Ioane 15:18-21.) Easa ajane troa amadrinë Iehova. Maine kola methinë së pine la  ihnimi së koi Iehova, haawe, tha tro pi kö sa hnehengazo menu.

19. Nemene la aqane tro sa nyitipune la itre aposetolo ekö?

¹⁹ Tha tro kö sa nue la itre xan troa sewe së troa nyihlue i Iehova. Tha tro pi kö sa hmahma troa anyipici Iehova. (Mika 4:5) Maine tro sa lapa mekune la tulu ne la itre aposetolo thupene la kola humuthi Iesu, tha tro hë sa xou. Atre hi angatr laka, hna methinë angatr hnene la itre hene ne hmi. (Itre hu. 5:17, 18, 27, 28) Ngo hnei angatre palahi hna amamane ka hape, itretre drei Iesu angatr. Hnei angatr hna tro kowe la ēnē me catre cainöj. (Itre hu. 5:42) Tha hnei angatre kö hna xoue atr. Ketre tu së fe. Tha tro kö sa xou troa qaja ka hape, Itretre Anyipici Iehova së. Loi e troa mama ngöne la nöjei götrane la mele së, tune la hna huliwa, hna ini, me kowe fe la itre ka lapa easenyi së.—Itre hu. 4:29; Rom. 1:16.

20. Pine nemene matre ka madrine la itre aposetolo, ngacama kola methinë angatr?

²⁰ Pine nemene matre ka madrine la itre aposetolo ekö? Atre hi angatre la kepin matre kola methinë angatr. Ame koi angatr, ketre manathith ka tru troa akötre pi Iehova. (Luka 6:23; Itre hu. 5:41) Hnei Peteru aposetolo hna cinyihane ka hape: “Maine tro nyipunie a akötr pine la meköt, ka madrine hë nyipunie.” (1 Pet. 2:19-21; 3:14) Maine ka xecie hnyawa koi së la mekune celë, haawe, tro hë sa catre huliwa i Iehova.

21-22. (a) Nemene la aqane tro sa canga hnëkë kowe la icilekeu? (b) Nemene la hne së hna troa ce wang ngöne la ketre tane mekun?

²¹ Thatre kö së la ijine tro la itre atr maine itre mus a troa icilekeu me easë. Ngo ame pe, atre hi së laka, enehila hi la ijine troa canga hnëkë. Loi e tro sa acatrene la aqane imelekeu së me Iehova, me catr. Ketre, loi e tro sa canga thel la aqane troa cile catr, ngacama kola methinë së. Maine tro sa canga hnëkë enehila, haawe, tro hë sa catre nyihlue i Iehova elany.

²² Ngo tune kaa e kola sewe së troa atrunyi Iehova? Ame ngöne la ketre tane mekun, tro sa ce wang la itre trepene meköti ne la Tusi Hmitrötr, ka troa xatua së troa catre kuca la aja i Iehova, ngacama hna wathebo së.