1. Saide u mu seeka fosi tesi miti u?

A NETI fosi den kii Yesesi, a be sabi taki sama be o buuse ala den bakaman fi en (Yoh. 17:14). Fanafu a ten fu Yesesi te anga a ten ya, den sama di á lobi a tuu biibi e du omen ogii anga den sama di e dini Yehofa (2 Tim. 3:12). Moo a kaba e koosube, moo den feyanti fu a tuu biibi o du ogii anga u.​—Mat. 24:9.

2-3. (a) San sa pasa te wi e feele? (b) San wi o luku aini a artikel ya?

² Fa u sa teke seeka nownow fosi tesi miti u? A á de fanowdu fu e sidon pakisei ala den ogii di sama sa du anga u. Efu u du a sani ya wi o go e booko wi ede sosokaali. A sani ya sa meke u gwe fika Yehofa soso fu di wi e feele taki tesi o miti u (Odo 12:25; 17:22). Feele a wan fu den sani di a „feyanti fu u di den e kai Didibii” e koboloiki fu kisi u (1 Peit. 5:8, 9). Fa u sa seeka fu man holidoo te tesi miti u?

³ Aini a artikel ya, wi o luku san u mu du fu wi anga Yehofa toon bun mati. Wi o luku saide a nownow u mu du a sani ya. Wi o luku tu san u mu du fu abi deki-ati anga san u sa du te taawan e buuse u.

4. Enke fa Hebrewsama 13:5, 6 e soi, da san u mu biibi? Saide u mu biibi a sani ya?

⁴ I mu biibi taki Yehofa lobi i, a ná o gwe fika i noiti. (Leisi Hebrewsama 13:5, 6.) Omen yali pasa a be sikiifi  aini wan Wakititolen taki: „Wan sama di sabi Gadu bun o moo fitoow en te tesi e miti en.” A sani ya a tuu. Efu u wani holidoo te tesi e miti u, u mu lobi Yehofa anga u hii ati. U mu e biibi tu taki a lobi u.​—Mat. 22:36-38; Yak. 5:11.

5. San o yeepi i fu si taki Yehofa lobi i?

⁵ Leisi Beibel ala dei fu kon moo koosube a Yehofa (Yak. 4:8). Te yu e leisi Beibel, poti pakisei a den fasi fu Yehofa. Meke moiti fu si fa Yehofa lobi i te yu e leisi den sani di a du anga den sani di a taki (Ek. 34:6). Kande ai taanga gi son sama fu biibi taki Yehofa lobi den, fu di noiti taa sama soi den taki den lobi den. Efu a so yu e fii, meke moiti ala dei fu sikiifi wantu sani di Yehofa du gi i fu soi taki ai booko en ede anga i (Ps. 78:38, 39; Rom. 8:32). Te i luku ala den fasi fa Yehofa soi taki a lobi i, da i teke ten pakisei den sani di i leisi aini Beibel, i musu fende wantu sani di e soi taki Yehofa e booko en ede anga i. Efi yu e teke den sani di Yehofa e du gi i fu bigi, yu anga en o toon moo bun mati.​—Ps. 116:1, 2.

6. Enke fa Psalm 94:17-19 e soi, da sowtu wini yu o fende te yu e begi anga i hii ati?

⁶ Begi ala yuu. Pakisei fa wan boi di lobi en dda e fii te ai baasa en. A sabi taki en dda lobi en, neen meke a nai feele fu taki anga en. Ai taigi en ala den sani di miti en a dei de. Efi yu e taigi Yehofa san de a yu ati ala dei, yu o si en enke i Dda. (Leisi Psalm 94:17-19.) Te yu e begi, taigi Yehofa „ala san de a yu ati”. Taigi en ala den sani di e gi i booko-ede (Tyali 2:19). Sowtu wini yu o fende te yu e du a sani ya? Yu o kon abi „a freide fu Gadu di libisama á poi fusutan” (Filip. 4:6, 7). Te yu e begi na a fasi ya, yu o fii taki yu e kon moo koosube a Yehofa.​—Rom. 8:38, 39.

7. Saide u mu e biibi anga u hii ati taki den sani di Gadu paamisi wi o pasa tuu?

⁷ I mu biibi anga i hii ati taki den sani di Gadu paamisi wi o pasa tuu (Num. 23:19). Efi i nai kaba biibi taki den sani ya o pasa tuu, a o moo makiliki gi Saatan fu kisi i (Odo 24:10; Heb. 2:15). San o yeepi i fu biibi taki den sani di a Kownukondee fu Gadu o du gi wi o pasa tuu? Teke ten ondoosuku den sani di Gadu paamisi u taki en Kownukondee o du anga saide u sa biibi taki den sani ya o pasa tuu. Sowtu wini yu o fende fu a sani ya? Luku a toli fu Stanley Jones, di be koti sitaafu seibin yali fi en biibi ede. San yeepi en fu holidoo? A taki: „Mi be sabi san a Kownukondee fu Gadu o du aini a ten di e kon. Mi be e biibi tu taki a o du san a paamisi. Na a sani ya yeepi mi fu holidoo.” Efi yu e biibi den sani di  Gadu paamisi wi anga i hii ati, yu anga en o toon moo bun mati. Nawan sani o poi tapu i fu dini en.​—Odo 3:25, 26.

8. San a fasi fa wi e si den komakandaa nownow e soi?

⁸ Yu á mu e misi komakandaa. Den komakandaa e yeepi u fu kon moo koosube a Yehofa. A fasi fa wi e si den komakandaa nownow, e soi san wi o du te tesi miti wi aini a ten di e kon (Heb. 10:24, 25). Saide u sa taki a sani ya? Efu a nownow kaba wi e meke pikinpikin sani tapu u fu go a den komakandaa, da fa wi o du te sama wani du ogii anga u fu di wi e go a komakandaa? Ma efu u nai misi komakandaa, wi o tan go a komakandaa winsi sama wani du ogii anga u. A nownow u mu abi a gwenti fu e go a komakandaa. Efu u lobi go a komakandaa nownow, da winsi sama wani du ogii anga wi, winsi lanti tapu a wooko, den ná o poi tapu u fu du san Gadu wani.​—Toli 5:29.

9. Saide a bun fu leli tekisi a ede fosi tesi miti u?

⁹ Leli den tekisi di i lobi a ede (Mat. 13:52). Wi a sondu libisama neen meke a ná ala yuu a makiliki gi u fu holi sani a ede. Ma Yehofa poi yeepi wi anga en santa yeye fu membee den sani di u be leisi aini Beibel (Yoh. 14:26). Luku a toli fu wan baala di den be sooto a Doisilikondee. Den be sooto a baala ya wawan aini wan kambaa. A taki: „Ai bigi gi mi taki mi be leli omen ondoo tekisi a ede fosi a tesi ya miti mi. Winsi a mi wawan be de mi be e pakisei den tekisi ya.” Den tekisi ya yeepi a baala fu a á gwe fika Yehofa. Den yeepi en fi en biibi á swaki.

10. Saide u mu leli Kownukondee singi a ede?

¹⁰ Leli Kownukondee singi a ede. Di den be sooto Pawlesi anga Silas na a foto Filipi, den be e singi den singi di den be sabi a ede fu gafa Yehofa (Toli 16:25). San den baala anga sisa fu Soviyet Unie be e du fu taanga den biibi di den be tyai den go a sitaafuman kampu a Siberiya? Sisa Mariya Fedun taki: „U be e singi ala den singi fu a singi buku di u be sabi a ede.” A taki den singi ya gi ala den taanga-sikin. Den yeepi den fu kon moo koosube a Yehofa. Yu e fende taanga-sikin te yu e singi den Kownukondee singi di i lobi? Neen meke i mu  meke moiti nownow fu leli den singi ya a ede.​—Luku a faki di den e kai „ Gi mi deki-ati”.

11-12. (a) Enke fa 1 Samuweli 17:37, 45-47 e soi, da san be yeepi David fu abi deki-ati? (b) San a toli fu David e leli u?

¹¹ Efi i wani holidoo te tesi e miti i, i mu abi deki-ati. San i sa du te yu e fii enke i ná abi deki-ati? Holi a pakisei taki a ná te wan sama bigi, taanga efuso koni da dati wani taki a abi deki-ati. Luku a toli fu David anga Goliyat. Goliyat be bigi gadyaa, ma David be moo nyoni, a be moo swaki, a á be abi omen fetisani tu. Wan fetihow seefi a á be abi. Ma toku a be abi tuutuu deki-ati. David lon go feti anga Goliyat, a gaan gadyaa suudati di be abi bigifasi.

¹² San be yeepi David fu abi deki-ati? A be e biibi taki Yehofa be o holibaka gi en. (Leisi 1 Samuweli 17:37, 45-47.) David á be poti pakisei na a fasi fa Goliyat be bigi moo en, ma a be e pakisei fa Goliyat be nyoni te i be o maiki en anga Yehofa. San a sani ya e leli u? Efu u wani abi deki-ati, u mu e biibi taki Yehofa de anga u. U mu e maiki Yehofa anga den feyanti fu u, da wi o si taki Yehofa taanga dyow moo den (2 Kolon. 20:15; Ps. 16:8). San o yeepi u fu abi moo deki-ati fosi tesi miti u?

13. San o yeepi u fu moo abi deki-ati?

¹³ Wan sani di o yeepi u fu abi deki-ati nownow, a te wi e paati a bun nyunsu fu Gadu Kownukondee. Fa a sani ya o yeepi u? A peleikiwooko e yeepi u fu moo fitoow Yehofa. Ai yeepi u fu wi á feele libisama tu (Odo 29:25). Leti enke fa den tetei fu u sikin e kon moo taanga te wi e du sport, a letiso wi e kon moo abi deki-ati te wi e peleiki osu fu osu, te wi e peleiki a pe tyaipi sama e pasa anga te wi e peleiki a peesi pe den e du bisnis. Efu wi e meke moiti nownow fu abi deki-ati te wi e peleiki, a sani ya o yeepi u fu tan du a peleikiwooko te lanti tapu a wooko.​—1 Tes. 2:1, 2.

14-15. San a toli fu Nancy Yuen anga Valentina Garnovskaya e leli u?

¹⁴ U sa leli omen sani fu tu sisa aini a ten ya di be abi deki-ati. Nancy Yuen a be wan satu sisa, ma toku a á be e feele  sama. * Winsi fa tesi miti en, a á tapu anga a peleikiwooko. A fu a sani ya ede den sooto en moo enke 20 yali langa a China. Den sikowtu di be e poti akisi gi en taigi en taki en „na a moo taanga ede sama fu a kondee”.

¹⁵ Na a sani ya be miti Valentina Garnovskaya tu. Den be sooto en dii leisi a Soviyet Unie (Rosiyakondee). Ala anga ala a sooto wan sani fu 21 yali. * Saide? A á be wani tapu anga a peleikiwooko, neen meke den sikowtu be kai en „wan kofaliki ogiiman”. San be yeepi den sisa ya fu abi deki-ati so? Den be e biibi anga den hii ati taki Yehofa be de anga den.

16. San o yeepi u fu abi tuutuu deki-ati?

¹⁶ Enke fa u be si kaba, da a ná te u taanga efuso koni da dati wani taki wi abi deki-ati. Ma u mu e biibi taki Yehofa de anga u. U mu biibi tu taki neen o feti gi u (Deit. 1:29, 30; Sak. 4:6). Na a sani ya o yeepi u fu abi tuutuu deki-ati.

17-18. San Yesesi be taigi wi a Yohanisi 15:18-21?

¹⁷ Wi e fii bun te sama e lesipeki u, ma wi á mu fii enke wi á bun te son sama á lobi u. Yesesi taki: „U mu piisii te sama e buuse u, te den á wani paa anga u, te den e poli u nen, anga te den e taki omen sani fu u di á bun fu di wi e waka na a Manpikin fu libisama baka” (Luk. 6:22). San Yesesi be wani taki anga a sani ya?

¹⁸ Yesesi á be wani taki a be o switi gi den bakaman fi en te sama e buuse den, ma na a tuu a be wani soi den. Wi a ná wan pisi fu a goontapu. Wi e wooko anga den sani di Yesesi leli u. Wi e paati a nyunsu di a be e paati di a be de a goontapu, neen meke a goontapu e buuse u. (Leisi Yohanisi 15:18-21.) U lobi Yehofa, neen meke a nai hati u te sama e buuse u fu di wi e du san Yehofa taki.

19. Fa u sa waka a den apostel baka?

 ¹⁹ Wi á mu meke sani di libisama e du efuso taki, meke sen kisi u taki wi a wan Kotoigi fu Yehofa (Mika 4:5). Te u luku a fasi fa den apostel be soi taki den e aliki Gadu moo libisama baka di sama be kii Yesesi, da a sani ya sa gi u deki-ati. Den be sabi taki den Dyu keliki fesiman be e buuse den (Toli 5:17, 18, 27, 28). Tokuso den á be e feele fu meke ala sama sabi taki den a disipel fu Yesesi, neen meke den be e go na a tempel ala dei fu peleiki (Toli 5:42). Den á be meke a buuse di sama be e buuse den tapu den fu du san Gadu wani. U sa waka a den baka. Te wi e meke den sama a wookope, sikoo, anga a peesi pe wi e tan sabi taki wi a Kotoigi, da u ná o feele sama moo.​—Toli 4:29; Rom. 1:16.

20. Saide den apostel be e piisii winsi sama be e buuse den?

²⁰ Saide den apostel be e piisii? Den be sabi taki sama e buuse den, ma den be e si en enke wan gaandi fu nyan pina fu Yehofa nen ede (Luk. 6:23; Toli 5:41). Bakaten apostel Peitilisi sikiifi taki: „Winsi den e pina i fu di yu e du sani enke fa Gadu wani, i mu piisii” (1 Peit. 2:19-21; 3:14). Te u fusutan taki a fu di wi e du san Gadu wani meke sama e buuse wi, u ná o meke a sani de tapu u fu dini Yehofa.

21-22. (a) San yu o du fu de seekaseeka te tesi miti i? (b) San wi o luku aini a taa artikel?

²¹ Wi á sabi on ten sama o bigin du ogii anga u fu a biibi fu wi ede, efuso on ten lanti o tapu a wooko aini a kondee pe wi e tan. Ma u sabi taki u mu teke seeka nownow. U mu meke moiti nownow fu kon moo koosube a Yehofa anga fu abi deki-ati. Wi á mu meke a buuse di sama e buuse u tapu u fu dini Yehofa tu. Efu u meke moiti fu du den sani ya nownow, u ná o gwe fika Yehofa te moo gaan tesi miti wi aini a ten di e kon.

²² San u mu du efu lanti tapu a wooko a pe wi e tan? Aini a taa artikel wi o luku wantu leli fu Beibel di o yeepi u fu dini Yehofa go doo te lanti tapu a wooko.