1. Mun na an ka ɲi k’an yɛrɛ labɛn kɔrɔbɔli kama?

YEZU ka suu laban na, a y’a fɔ ko mɔgɔw bena a ka kalandenw kɔniya (Zan 17:14). Kabi o wagati, tiɲɛn batoli man di minw ye, olu be kerecɛn kantigiw tɔɔrɔ (2 Tim. 3:12). An b’a lɔn ko an juguw bena to ka fariya an ma kosɔbɛ sabu duniɲa nin laban be surunyana.—Mat. 24:9.

2-3. a) An ka ɲi ka mun lo lɔn siranya koo la? b) An bena mun lo lajɛ barokun nin na?

² Kabi sisan, an be se k’an yɛrɛ labɛn cogo di kɔrɔbɔli kama? Koo jugu minw bɛɛ be se k’an sɔrɔ, kuun t’a la an ka to ka miiri o la. N’o tɛ, an bena siran ani ka hami kojugu. O be se k’a to an be Jehova sago kɛli dabila sanni kɔrɔbɔli yɛrɛ ka cun an kan (Talenw 12:25; 17:22). Siranya ye kɛlɛkɛminan barikaman ye, an “jugu Sutana” be tɛmɛ min fɛ k’an kɛlɛ (1 Piyɛri 5:8, 9). Walisa k’an yɛrɛ labɛn kɔrɔbɔli kama, an ka ɲi ka mun lo kɛ kabi sisan?

³ Jɛnɲɔgɔnya min b’an ni Jehova cɛ, an be se k’o sabati cogo di? Mun na a kɔrɔtanin lo kosɔbɛ an k’o kɛ kabi sisan? An bena o ɲiningaliw lajɛ barokun nin na. An bena a ye fana an be se ka min kɛ walisa ka dɔ fara an ka jagwɛlɛya kan. A laban, an bena a filɛ an be se ka min kɛ ni mɔgɔw b’an kɔniya.

4. Ka kɛɲɛ ni Eburuw 13:5, 6 ye, an ka ɲi ka la mun lo la ani mun na?

⁴ La a la ko Jehova b’i kanu ani ko a tɛna i bila abada (Eburuw 13:5, 6 kalan). A saan caaman ye nin ye, a tun fɔra Kɔrɔsili Sangaso dɔ kɔnɔ ko: “Mɔgɔ min be Ala lɔn ka ɲɛ, a b’a jigi la Ala kan kosɔbɛ kɔrɔbɔli tuma na.” O ye tiɲɛn yɛrɛ lo ye! Walisa ka lɔ kelen kan kɔrɔbɔli tuma na,  an ka ɲi ka Jehova kanu kosɔbɛ ani k’an jigi bɛɛ la a kan. An man ɲi ka siga ko a b’an kanu.—Mat. 22:36-38; Zaki 5:11.

5. Jehova b’i kanu cogo min na, mun lo bena i dɛmɛ k’o faamu?

⁵ Bibulu kalan loon o loon walisa jɛnɲɔgɔnya min be e ni Jehova cɛ, o ka sabati (Zaki 4:8). Bibulu kalantɔ, i janto Jehova ka jogow la, i n’a fɔ a ka kanuya, a ka makari n’a ka ɲumanya. A ye min fɔ ani a ye min kɛ, tɛmɛ o fɛ walisa k’a faamu a b’i kanu cogo min na (Ɛkiz. 34:6). A be se ka gwɛlɛya dɔw ma ka la a la ko Ala b’u kanu sabu mɔgɔ ma deli k’a yira u la ko a b’u kanu. N’ele fana b’o lo miiri, Jehova b’a ka ɲumanya n’a ka makari yira i la cogo min na loon o loon, o sɛbɛ (Zab. 78:38, 39; Ɔrɔm. 8:32). Koo minw kɛra i ka ɲɛnamaya kɔnɔ ani i ye min kalan Bibulu kɔnɔ, miiri o kan. O la, Jehova ye fɛɛn minw bɛɛ kɛ i ye, i hakili bena to u fanba la. Jehova be fɛɛn minw bɛɛ kɛ i ye, n’i b’a waleɲuman lɔn o kosɔn, aw ka jɛnɲɔgɔnya bena sabati.—Zab. 116:1, 2.

6. Ka kɛɲɛ ni Zaburuw 94:17-19 ye, n’i b’i kɔnɔ gwɛ ka Jehova deli loon o loon, i bena nafa juman lo sɔrɔ o la?

⁶ Delili kɛ tuma o tuma. Miiri cɛdennin dɔ koo la: A faa kanulen melekera a la. O cɛdennin b’a ye ko a latanganin lo ani a tɛ siran k’a fɔ a facɛ ye min y’a sɔrɔ tile kɔnɔ. I bena o jɛnɲɔgɔnya ɲɔgɔn lo kɛ ni Jehova ye n’i b’i kɔnɔ gwɛ k’a deli loon o loon (Zaburuw 94:17-19 kalan). Delili kɛtɔ, i “kɔnɔnako fɔ” i Faa kanutigi ye. Koo o koo be siranya ni hami bila i la, o fɔ a ye (Dusukas. 2:19). I bena nafa juman lo sɔrɔ o la? “Ala ka hɛrɛ min tɛmɛna mɔgɔw ka faamuyali ma,” i bena o sɔrɔ (Filip. 4:6, 7). N’i tora ka delili kɛ o cogo la, i bena a ye ko i magwɛrɛnin lo Jehova la kosɔbɛ.—Ɔrɔm. 8:38, 39.

7. Ala ye layidu minw ta a ka Masaya koo la, mun na i ka ɲi ka la a la ko u bena dafa?

⁷ La a la ko Ala ka Masaya bena dugaw lase an ma tiɲɛn na (Nɔnb. 23:19). N’i lanin t’a la sɔbɛ la ko Ala ka layiduw bena dafa, Sutana n’a kɔmɔgɔw bena se k’i lasiran cogo nɔgɔman na (Talenw 24:10; Eburuw 2:15). Kabi sisan, i be se k’i ka limaniya sabati Ala ka Masaya koo la cogo di? Wagati ta ka sɛgɛsɛgɛri kɛ koo nunu kan: Ala ye layidu minw ta a ka Masaya koo la ani fɛɛn minw kama i be se ka la a la k’o layiduw bɛɛ bena dafa. O bena i nafa cogo di? An ka Stanley Jones ka koo lajɛ. U y’a don kaso la saan wolonfila a ka limaniya kosɔn. * Mun lo y’a dɛmɛ ka to kantigiya la? A ko: “N’ ka limaniya barika tun ka bon sabu n’ tun be koo caaman lɔn Ala ka Masaya koo la. N’ tun b’a lɔn fana o Masaya bena min kɛ  ani n’ tun tɛ sigasiga hali dɔɔni o koo la. O kama, mɔgɔ si ma se ka n’ lasun ka bɔ Jehova kɔ.” N’i lanin b’a la sɔbɛ la ko Ala ka layiduw bena dafa, i bena i magwɛrɛ a la kosɔbɛ ani i tɛna a to siranya k’i bali k’a sago kɛ.—Talenw 3:25, 26.

8. N’an be to ka taga lajɛnw na, o be mun lo yira? A ɲɛfɔ.

⁸ To ka taga lajɛnw na. O b’an dɛmɛ k’an magwɛrɛ Jehova la. An be lajɛntaga koo ta cogo min na, o b’a yira n’an bena se ka kɔrɔbɔliw muɲu ka ɲɛ wala n’an tɛna se (Eburuw 10:24, 25). Yala an b’a to koo den-denninw k’an bali ka taga lajɛnw na sisan wa? N’o lo, an bena mun lo kɛ sini ma n’an ka ɲi k’an niin bila farati la walisa ka jɛn n’an balimaw ye? Nka, n’an jijanin lo kosɔbɛ ka to ka taga lajɛnw na, an tɛna lajɛntaga dabila hali n’an kɛlɛbagaw b’an waajibiyara k’o kɛ. Sisan yɛrɛ le lajɛntaga ka ɲi ka diya an ye. O la, bali si tɛna a to an be ban Ala ta ma ka adamadenw sago kɛ.—Kɛw. 5:29.

9. Ka vɛrisew to an hakili la, mun na o ye fɛɛrɛ ɲuman ye walisa k’an yɛrɛ labɛn kɔrɔbɔli kama?

⁹ I diyanye vɛrisew to i hakili la (Mat. 13:52). N’a sɔrɔ i hakili tɛna to u la bɛrɛbɛrɛ. Nka, Jehova be se ka tɛmɛ a ka hakili senu fɛ k’i hakili jigi o vɛrisew bɛɛ la (Zan 14:26). U tun ye balimacɛ dɔ don kaso la a kelen n’a kelen, Alemaɲi kɔrɔn fan fɛ. A filɛ a ye min fɔ: “N’ ninsɔn tun ka di sabu n’ tun ye vɛrise 200 ni kɔ to n’ hakili la! Hali ni n’ tun be n’ kelen na, n’ tora ka miiri Bibulu ka barokun caaman kan.” O vɛrisew y’an balimacɛ dɛmɛ a magwɛrɛnin tora Jehova la ani a tora kantigiya la.

10. Mun na an ka ɲi ka dɔnkiliw degi an kunfɛ?

¹⁰ An be Jehova tando ni dɔnkili minw ye, u degi i kunfɛ ani u la. Tuma min na Pol ni Silasi tun be kaso la Filipi dugu la, u tora ka dɔnkiliw la walisa ka Ala tando. U tun b’o dɔnkiliw lɔn u kunfɛ (Kɛw. 16:25). An balima minw tun be Soviyetiki mara la ani u tagara n’u ye fanga baarakɛyɔrɔ la Siberi, olu y’u ka limaniya barika bonya cogo di? Balimamuso Mariya Fedun ko: “An tun be dɔnkili minw lɔn an ka dɔnkili gafe kɔnɔ, an tun b’u bɛɛ la.” A k’o dɔnkiliw y’u bɛɛ jija ani k’u dɛmɛ k’a ye ko u magwɛrɛnin lo Jehova la. An ka dɔnkili minw ka di i ye kosɔbɛ, n’i b’u lara, yala o t’i barika bonya wa? N’u b’i barika  bonya, u degi i kunfɛ sisan!—Koorilen nin lajɛ: “ Jagwɛlɛya di n’ ma.”

11-12. a) Ka kɛɲɛ ni 1 Samuyɛli 17:37, 45-47 ye, mun na Dawuda jaa tun ka gwɛlɛ? b) Dawuda ka ɲɛyirali b’an dɛmɛ ka koo nafaman juman lo faamu?

¹¹ Walisa ka lɔ kelen kan kɔrɔbɔli tuma na, i mako be jagwɛlɛya la. N’a b’i ɲɛɛ na ko i jaa man gwɛlɛ, i be se ka mun lo kɛ do? A to i hakili la ko jagwɛlɛya sɔbɛ tɛ bɔ i bonya, i janya, i fanga wala i ka setigiya la. Miiri kanbelenin Dawuda koo la tuma min na a ye Goliyati kɛlɛ. Ale ni Goliyati tun tɛ kelen ye fewu: Dawuda tun ka dɔgɔ, fanga tun t’a la ani kɛlɛkɛminan barikamanw tun t’a fɛ. Hali murujan yɛrɛ tun t’a fɛ. Nka, a jaa tun ka gwɛlɛ kosɔbɛ. Goliyati tun ka jan kosɔbɛ ani kuncɛba tun lo. O n’a ta bɛɛ, Dawuda y’a jaa gwɛlɛya ka taga a kɛlɛ.

¹² Mun na Dawuda jaa tun ka gwɛlɛ ten? A jaa tun ka gwɛlɛ sabu a tun lanin b’a la kosɔbɛ ko Jehova be n’ale ye (1 Samuyɛli 17:37, 45-47 kalan). A m’a yɛrɛ suma ni Goliyati ye. Nka, a y’a jati ko Goliyati tɛ bɛrɛ ye Jehova ɲɛɛ kɔrɔ. An be kalan juman lo sɔrɔ o maana na? An jaa bena gwɛlɛya n’an lanin b’a la ko Jehova be n’an ye ani ko an kɛlɛbagaw tɛ bɛrɛ ye Sebagayabɛɛtigi Ala ɲɛɛ kɔrɔ (2 Til. Kib. 20:15; Zab. 16:8). An be se ka dɔ fara an ka jagwɛlɛya kan cogo di kabi sisan sanni kɔrɔbɔli ka cun an kan?

13. An be se ka dɔ fara an ka jagwɛlɛya kan cogo di? A ɲɛfɔ.

¹³ An be se ka dɔ fara an ka jagwɛlɛya kan kabi sisan, n’an be Masaya kibaro diiman fɔ tɔɔw ye. Waajuli b’a to an b’an jigi la Jehova kan ani an tɛ siran mɔgɔw ɲɛ (Talenw 29:25). Ɲɛyirali fɛ, an fasaw be barika sɔrɔ n’an be spɔr kɛ. O cogo kelen na, n’an be waajuli kɛ soo ni soo, jamayɔrɔw la, sababu dɔw sen fɛ wala jagokɛyɔrɔw la, dɔ be fara an ka jagwɛlɛya kan. N’an b’an jaa gwɛlɛya ka waajuli kɛ kabi sisan, an bena to k’o kɛ hali ni faamanw ye bali sigi an ka baara kan.—1 Tes. 2:1, 2.

14-15. An be kalan jumanw lo sɔrɔ Nancy Yuen ani Valentina Garnovskaya koo la?

¹⁴ An be kalan caaman sɔrɔ an balimamuso kantigi fila dɔw koo la. U jaa tun ka gwɛlɛ kosɔbɛ. Nancy Yuen janya tun ma tɛmɛ mɛtɛrɛ kelen ni tilan kan.  Nka a jaa tun ka gwɛlɛ kosɔbɛ. * A banna ka Masaya kibaro diiman fɔli dabila. O kama, u y’a don kaso la saan 20 ni kɔ kɔnɔ Sinuwa jamana na. Faaman minw y’a ɲininga, olu y’a fɔ ko a “ɲɔgɔn tulogwɛlɛn tɛ sɔrɔ” u ka jamana na.

¹⁵ U ye Valentina Garnovskaya fana don kaso la Soviyetiki mara la. U y’o kɛ siɲɛ saba ani a ye saan 21 lo kɛ kaso la. * U y’a don kaso la sabu a tun jijanin lo kosɔbɛ ka to ka waajuli kɛ fɔɔ polisiw tun b’a weele ko “kojugukɛla fariman.” Mun lo y’a to o muso kantigi fila jaa tun ka gwɛlɛ ten do? U jaa tun ka gwɛlɛ sabu u tun lanin b’a la kosɔbɛ ko Jehova be n’u ye.

16. Mun lo bena an dɛmɛ ka jagwɛlɛya sɔbɛ sɔrɔ?

¹⁶ I ko an y’a ye ka tɛmɛ cogo min na, n’an b’a fɛ ka dɔ fara an ka jagwɛlɛya kan, an man ɲi k’an jigi la an yɛrɛ ka fanga n’an ka setigiya kan. Nka, an ka ɲi ka la a la ko Jehova be n’an ye ani ko ale lo be kɛlɛ kɛ an nɔɔ na (Deter. 1:29, 30; Zak. 4:6, Biblu Ala ta Kuma). O lo bena an dɛmɛ ka jagwɛlɛya sɔbɛ sɔrɔ.

17-18. Ka kɛɲɛ ni Zan 15:18-21 ye, Yezu y’an lasɔmi mun lo la? A ɲɛfɔ.

¹⁷ An b’a fɛ mɔgɔw k’an bonya. Nka, n’an koo man di mɔgɔw ye, an man ɲi k’a miiri ko nafa t’an na. Yezu ko: “Ni mɔgɔw b’aw kɔniya ka ban aw la, k’aw nɛni ani k’aw tɔgɔjugu fɔ Mɔgɔ Dencɛ kosɔn, o tuma na, aw dagamunin lo.” (Luka 6:22). Yezu tun b’a fɛ ka mun lo fɔ do?

¹⁸ Yezu tun t’a fɔra ko a bena diya kerecɛnw ye mɔgɔw k’u kɔniya. Nka, koo minw tun bena an sɔrɔ, a tun b’an lasɔmina o lo la. An tɛ duniɲa ta ye. An be ɲɛnamaya kɛ ka kɛɲɛ ni Yezu ka kalanw ye. Yezu ye waajuli kɛ koo minw na, an be waajuli kɛ o lo koo la fana (Zan 15:18-21 kalan). An b’a fɛ k’an koo diya  Jehova ye. Ni mɔgɔw b’an kɔniya sabu an b’an Faa kanu, olu ka koo lo.

19. An be se ka cidenw ladegi cogo di?

¹⁹ Adamaden gwansan be min fɔ wala a be min kɛ, kana a to abada o b’a kɛ i be maloya k’a fɔ ko i ye Jehova Seere dɔ ye (Mise 4:5). Dɔɔni Yezu sanin kɔ, cidenw ye min kɛ Zeruzalɛmu, an ka miiri o la. O be se k’an dɛmɛ ka see sɔrɔ adamaden ɲɛsiran kan. O cidenw tun b’a lɔn Yahutuw ka diinan kuntigiw b’u kɔniya cogo min na (Kɛw. 5:17, 18, 27, 28). O n’a ta bɛɛ, u tun be to ka taga Alabatosoba kɔnɔ loon o loon ka waajuli kɛ. O cogo la, u tun b’a yira k’u ye Yezu ka kalandenw ye (Kɛw. 5:42). U m’a to siranya ka see sɔrɔ u kan. An fana be se ka see sɔrɔ adamaden ɲɛsiran kan, n’an b’a to mɔgɔw k’a lɔn ko an ye Jehova Seerew ye. An ka ɲi k’o kɛ an mana kɛ baarakɛyɔrɔ, lakɔliso wala an sigida la.—Kɛw. 4:29; Ɔrɔm. 1:16.

20. Mun na cidenw ninsɔn tun ka di k’a sɔrɔ mɔgɔw tun b’u kɔniya?

²⁰ Bibulu b’a fɔ ko cidenw ninsɔn tun ka di. Mun na do? Sabu u tun b’a lɔn fɛɛn min kama mɔgɔw b’u kɔniya. U tun b’a jati nɛɛma ye fana ka tɔɔrɔ Jehova sago kɛli kosɔn (Luka 6:23; Kɛw. 5:41). Ciden Piyɛri y’a sɛbɛ ko: “Hali n’aw be tɔɔrɔ sɔrɔ aw ka koɲuman kosɔn, dagamu ye aw ta ye.” (1 Piyɛri 2:19-21; 3:14). N’an b’a faamu ko an be koo ɲuman min kɛ, u b’an kɔniya o lo kosɔn, an tɛna a to u k’an lasun ka Jehova sago kɛli dabila.

21-22. a) I y’a latigɛ k’i yɛrɛ labɛn cogo di kɔrɔbɔli kama? b) An bena mun lo lajɛ barokun nata la?

²¹ An t’a lɔn tuma min na mɔgɔw bena a daminɛ k’an kɛlɛ wala tuma min na faamanw bena bali sigi an ka baara kan. Nka, an b’a lɔn ko an be se k’an yɛrɛ labɛn kabi sisan. An be se k’o kɛ cogo di? Jɛnɲɔgɔnya min b’an ni Jehova cɛ, an k’o sabati, an ka dɔ fara an ka jagwɛlɛya kan ani an k’a lɔn an ka ɲi ka min kɛ ni mɔgɔw b’an kɔniya. N’an b’an yɛrɛ labɛn kabi sisan, o bena an dɛmɛ ka lɔ kelen kan kɔrɔbɔli tuma na.

²² Nka, ni faamanw ye bali sigi an ka baara kan do? Barokun nata la, an bena sariyakolo dɔw lajɛ minw bena an dɛmɛ an ka to ka Jehova sago kɛ o wagati la.