1. Na cava meda vakarautaki keda kina ena veivakacacani?

ENA bogi me vakamatei kina o Jisu, e kaya nira na cati o ira kece na digia mera nona tisaipeli. (Joni 17:14) Me yacova mai nikua, era se vakacacani tiko ga na lotu vaKarisito yalodina vei ira na sega ni qaravi Jiova. (2 Tim. 3:12) Sa voleka na icavacava, meda namaka ni na kaukaua sara na nodra veivakacacani na meca.—Maciu 24:9.

2-3. (a) Na cava meda kila tiko me baleta na rere? (b) Cava eda na vulica ena ulutaga qo?

² Eda na vakarautaki keda vakacava ena veivakacacani? E sega ni dodonu meda lomaleqataka na ka dredre eda na rairai sotava. Ke da cakava qori, eda na rere se nuiqawaqawa. Ena tarova tale ga noda qaravi Jiova ni bera mada ga nida vakatovolei. (Vkai. 12:25; 17:22) Na rere e dua na ivadi mana e vakayagataka tiko na keda “meca, na Tevoro” me vakaleqai keda. (1 Pita 5:8, 9) Eda na dei gona vakacava?

³ Eda na vulica ena ulutaga qo na sala meda vaqaqacotaka kina noda veiwekani kei Jiova, kei na vuna e bibi kina meda cakava ena gauna qo. Eda na vulica tale ga na sala meda yaloqaqa tiko ga kina, kei na sala meda vosota kina na nodra cati keda eso tale.

4. Na cava meda vakadeitaka ena Iperiu 13:5, 6? Na vuna?

⁴ Mo vakadeitaka ni lomani iko o Jiova, ena sega tale ga ni biuti iko. (Wilika Iperiu 13:5, 6.) Ena vica na yabaki sa oti, e kaya na Vale ni Vakatawa: “O koya e kila vinaka na Kalou ena nuitaki koya vakaoti ni vakatovolei.” Ka dina taucoko! Meda vosota na veivakacacani, e dodonu  meda lomani Jiova da qai nuitaki koya vakaoti. Meda kua tale ga ni vakatitiqataka ni kauaitaki keda o koya, e lomani keda.—Maciu 22:36-38; Jeme. 5:11.

5. Na cava mo cakava mo vakila kina na loloma i Jiova?

⁵ Wilika e veisiga na iVolatabu, me nomu inaki mo volekati Jiova. (Jeme. 4:8) Ni o wiliwili tiko, saga mo kila na itovo vinaka i Jiova. Vakasamataka na sala e vakaraitaka kina na nona lomani iko kei na nona kauaitaki iko ena ka e tukuna se cakava. (Lako 34:6) Eso e dredre mera vakabauta ni lomani ira na Kalou ni sega ni bau vakaraitaki vei ira na loloma. Ke o sotava tiko qori, tovolea mo vakavola e veisiga na sala e vakaraitaka kina vei iko o Jiova na nona loloma kei na nona yalovinaka. (Same 78:38, 39; Roma 8:32) Ni o dikeva na kemu ituvaki salavata kei na nomu vakasamataka vakatitobu na ka o wilika ena Vosa ni Kalou, o na kila kina na levu ni ka vinaka sa cakava o Jiova ena vukumu. Na levu ga ni nomu vakavinavinakataka na ka e cakava, ena qai dei ga nomudrau veiwekani.—Same 116:1, 2.

6. Me vaka e cavuti ena Same 94:17-19, ena yaga vakacava ni o masu mai vu ni lomamu?

⁶ Masu wasoma. Raitayaloyalotaka mada e dua na tama ni mokoti luvena tagane lailai. E nuidei o gone me tukuna kece vei tamana na ka vinaka kei na ka ca e sotava ena siga ya. Ena dei tale ga nomu veiwekani kei Jiova ni o masu vua mai vu ni lomamu e veisiga. (Wilika Same 94:17-19.) Ni o masu vei Jiova, “mo sova na lomamu me vaka na wai,” tukuna vua na Tamamu dauloloma na ka kece o nuiqawaqawataka se lomaleqataka. (Lele 2:19) Na cava o na vakila? E kaya na iVolatabu ni o na vakila “na vakacegu ni Kalou e uasivia na vakasama kece.” (Fpai. 4:6, 7) Ni o masu wasoma mai vu ni lomamu, drau na veivolekati kei Jiova.—Roma 8:38, 39.

7. Na cava mo vakabauta kina na yalayala ni Kalou me baleta na nona Matanitu?

⁷ Mo vakabauta na veivakalougatataki ni Matanitu ni Kalou. (Tiko 23:19) Ke o vakatitiqataka ni na yaco dina na vosa ni yalayala ni Kalou, ena rawarawa sara ni vakarerei iko o Setani kei ira na nona ito. (Vkai. 24:10; Iper. 2:15) Ena dei vakacava nomu vakabauta na Matanitu ni Kalou? Mo vulica vakataki iko na yalayala ni Kalou me baleta na nona Matanitu, kei na vuna o vakadeitaka kina ni na yaco dina. Ena yaga vakacava qori? Dikeva mada na ivakaraitaki i Stanley Jones, a vesu me vitu na yabaki ena vuku ni nona vakabauta. * E vosota rawa vakacava na ituvaki qori?  E kaya: “E vakaukauataki au na ka au kila me baleta na Matanitu ni Kalou, au vakabauta dei, au sega ni vakatitiqataka vakalailai. E dreve gona nodra mari au meu tawayalodina.” Ke o vakabauta dei na vosa ni yalayala ni Kalou, o na veivolekati kei Jiova, o na sega tale ga ni rere ni qaravi koya.—Vkai. 3:25, 26.

8. Na cava e vakaraitaka nida tiko ena soqoni? Vakamacalataka.

⁸ Mo dau tiko wasoma ena soqoni vaKarisito. Ena uqeti keda na soqoni meda veivolekati kei Jiova. Nida tiko kina, e vakaraitaka nida rawa ni vosota na veivakacacani se bera mai. (Iper. 10:24, 25) Ena sala cava? Ke tarova noda lai soqoni na veika lalai ena gauna qo, ena rawa vakacava nida bolemate ena gauna se bera mai meda soqoni kei ira na tacida? Ia ke da vakadeitaka meda tiko wasoma ena soqoni ena gauna qo, era na sega ni tarova rawa na dauveitusaqati na noda tiko ena soqoni. Qo na gauna meda vakaraitaka kina nida taleitaka na soqoni. Nida cakava qori, eda na talairawarawa tiko ga kina vua na Kalou sega vua na tamata ke tarovi na noda soqoni.—Caka. 5:29.

9. E yaga vakacava nomu wiligusutaka na tikinivolatabu ni bera na veivakacacani?

⁹ Wiligusutaka na nomu tikinivolatabu taleitaki. (Maciu 13:52) De dua o dau guiguileca, ia e kaukaua na yalo tabu i Jiova ni na vakalesuya tale mai ena nomu vakasama na tikinivolatabu o sa vulica. (Joni 14:26) Qori na ka e cakava e dua na tacida tagane e vesu ena Tokalou kei Jamani qai sogo duadua tu ena dua na rumu. E kaya: “Dua na ka noqu marau ena gauna oya niu sa wiligusutaka rawa tu e vicanadrau na tikinivolatabu. Au vakayagataka na loma ni gauna qori meu vakasamataka kina na veiusutu vakaivolatabu.” E yaga vua na tacida qori na nona wiligusutaka e vicanadrau na tikinivolatabu ni veivolekati kina kei Jiova, e vosota tale ga ena yalodina.

10. Na cava meda kila vinaka kina na noda sere?

¹⁰ Kila vinaka na qaqanisere e vakacaucautaki Jiova qai lagata. Ni rau vesu tu e Filipai o Paula kei Sailasa, rau lagata na sere vakayalo rau sa kila tiko. (Caka. 16:25) Qori tale ga na sala era kaukaua tiko ga kina vakayalo na tacida ena Matanitu Makawa kei Rusia nira kau  vakavesu i Siberia. E vakasamataka lesu o Sister Mariya Fedun: “Keimami lagata vata na sere keimami kila ena noda ivolanisere.” E kaya ni vakayaloqaqataki ira dina, e vukei ira tale ga mera veivolekati kei Jiova. Vakacava o dau vakayaloqaqataki tale ga ni o lagata nomu sere taleitaki ni isoqosoqo? Saga gona mo kila vinaka na sere qori ena gauna qo!—Raica na kato “ Meu Yaloqaqa.”

11-12. (a) Me vaka e cavuti ena 1 Samuela 17:37, 45-47, na cava e yaloqaqa kina o Tevita? (b) Na cava eda vulica ena nona ivakaraitaki?

¹¹ Ena vinakati mo yaloqaqa mo vosota kina na veivakacacani. Ke o sega ni dau yaloqaqa, cava mo cakava? Nanuma tiko ni sega ni vakatau nomu yaloqaqa ena kemu levu, kaukaua, se ka o rawata. Vakasamataki Tevita mada ni lai valuti Koliaci. Ni vakatauvatani kei na tuawa qori, e ka somidi o Tevita, e malumalumu qai sega ni vakaiyaragi vinaka. E sega mada ga nona iseleiwau, ia e yaloqaqa. E doudou ni vala kei na tuawa viavialevu ya.

¹² Na cava e yaloqaqa kina o Tevita? E vakabauta dei ni tokoni koya o Jiova. (Wilika 1 Samuela 17:37, 45-47.) E sega ni vakasamataka vakalevu o Tevita na levu kei Koliaci ni vakatauvatani kei koya. Ia e kauaitaka ga ni somidi o Koliaci ni vakatauvatani kei Jiova. Na cava eda vulica ena ivakaraitaki qori? Eda na yaloqaqa ke da vakabauta ni tokoni keda tiko o Jiova, meda vakadeitaka tale ga nira ka somidi sara na dauveitusaqati ni vakatauvatani kei na Kalou Kaukaua Duadua. (2 Vei. 20:15; Same 16:8) Eda na yaloqaqa tiko ga vakacava ni se bera na veivakacacani?

13. Na cava e dua na sala eda na yaloqaqa tiko ga kina? Vakamacalataka.

¹³ Dua na sala meda yaloqaqa tiko ga kina oya nida vunautaka na itukutuku vinaka ni Matanitu ni Kalou. Na vuna? Nida lai vunau, eda vulica meda dau nuitaki Jiova meda kua ni rerevaki ira na tamata. (Vkai. 29:25) Me vaka ga noda masela, ena kaukaua ke da vakaukauayago. Eda na yaloqaqa tale ga nida vunau e veivale, matanalevu, tawalokuci, kei na yalava ni bisinisi. Ke da yaloqaqa rawa qo meda vunau, eda na doudou ni vunau ke vakatabui mada ga noda cakacaka.—1 Ces. 2:1, 2.

14-15. Na cava eda vulica vei Nancy Yuen kei Valentina Garnovskaya?

 ¹⁴ E vakasakiti dina na nodrau yaloqaqa e rua na tacida yalewa. Eda vuli vakalevu ena nodrau ivakaraitaki. Dua o Nancy Yuen. E marama lekaleka, ia e sega ni rerere. * Ni vakaroti me kua ni vunautaka na itukutuku vinaka ni Matanitu ni Kalou, e vunau tiko ga. Cava e yaco? E vesu me sivia ni 20 na yabaki ena matanitu vaKominisi o Jaina. Era kaya na vakailesilesi era vakatarogi koya ni dua dina na “tamata yalodredre” mera raica e Jaina.

¹⁵ Na ikarua ni tacida o Valentina Garnovskaya, a vesu vakatolu ena Matanitu Makawa kei Rusia me rauta ni 21 na yabaki. * Na vuna? Ni vunau tiko ga ni vakatabui na noda cakacaka. Era vakatokai koya na vakailesilesi me dua “na daubasulawa rerevaki.” Na cava e uqeti rau na tacida yalewa qori me rau yaloqaqa tiko ga? Rau vakabauta ni tokoni rau tiko o Jiova.

16. Eda na yaloqaqa tiko ga vakacava?

¹⁶ Eda na yaloqaqa tiko ga vakacava? Me vaka eda sa vulica mai, meda kua ni nuitaka na noda kaukaua kei na ka eda rawata. Ia e bibi meda vakabauta ni tokoni keda tiko o Jiova, ena vala tale ga ena vukuda. (Vkru. 1:29, 30; Saka. 4:6) Qori ga na sala eda na rawata kina na yaloqaqa.

17-18. Na cava na ivakasala nei Jisu ena Joni 15:18-21? Vakamacalataka.

¹⁷ Eda dau vinakata mera dokai keda eso tale. Ia nida cati, meda kua ni nanuma nida tawayaga. E kaya o Jisu: “Moni marau ni oni cati, oni vakaduiduitaki, oni vakasewasewani, qai vosavakacacataki na yacamuni ena vukuna na Luve ni tamata.” (Luke 6:22) Na cava e kaya tiko o Jisu?

¹⁸ E sega ni kaya o Jisu nida vinakata meda cati. E tukuna ga na ka meda  namaka. Ena cati keda o vuravura. Na vuna? Nida sega ni vakavuravura. Eda muria tale ga na ka e vakavulica o Jisu, da qai vunautaka. (Wilika Joni 15:18-21.) Eda vinakata me marau o Jiova. Ke ra cati keda eso nida lomani Jiova, qori qai nodra leqa.

19. Eda na muria vakacava na nodratou ivakaraitaki na yapositolo?

¹⁹ Ke ra tusaqati keda na tamata ena ka era tukuna se cakava, meda kua vakadua ni maduataka nida iVakadinadina i Jiova. (Maika 4:5) Eda na sega ni rerevaka na tamata nida dikeva na ka eratou cakava na yapositolo e Jerusalemi ni oti ga vakalailai nona mate o Jisu. Eratou kila ni o ira na iliuliu ni lotu vakaJiu era cati ratou vakalevu. (Caka. 5:17, 18, 27, 28) Vakacava eratou rere? Sega, ratou lako e veisiga e valenisoro qai vakaraitaka e matanalevu ni ratou tisaipeli i Jisu. (Caka. 5:42) Eda na sega tale ga ni rerevaki ira na tamata ke da tukuna vakadodonu nida iVakadinadina i Jiova e vanua ni cakacaka, koronivuli, se itikotiko.—Caka. 4:29; Roma 1:16.

20. Eratou cati na yapositolo, ia na cava eratou marau tiko ga kina?

²⁰ Na cava eratou marau kina na yapositolo? Ratou kila na vuna eratou cati kina, ratou okata tale ga me ka dokai ni ratou vakacacani ena vuku ni itukutuku vinaka. (Luke 6:23; Caka. 5:41) Sa qai vola o Pita ena dua na gauna emuri: “Ke oni vakararawataki mada ga ena vuku ni ka dodonu, oni na marau ga.” (1 Pita 2:19-21; 3:14) Nida cati ena vuku ni ka e dodonu, eda na sega ni rere, eda na qaravi Jiova tiko ga.

21-22. (a) Na cava o na cakava mo vakarautaki iko ena veivakacacani? (b) Cava eda na vulica ena ulutaga e tarava?

²¹ Eda sega ni kila na gauna eda na vakacacani kina, se vakatabui na noda cakacaka me vakadredretaka noda qaravi Jiova. Na ka ga eda kila oya nida rawa ni vakavakarau yani qo meda vaqaqacotaka na noda veiwekani kei Jiova, meda yaloqaqa tiko ga, meda vosota tale ga nira cati keda eso tale. Nida vakavakarau rawa qo, eda na tudei ena gauna se bera mai.

²² Ia vakacava ke vakatabui na noda sokalou? Eda na vulica ena ulutaga e tarava eso na ivakavuvuli vakaivolatabu ena uqeti keda meda qaravi Jiova tiko ga.