1. Vim li cas peb yuav tsum npaj rau kev tsim txom?

HMO ua ntej peb tus Tswv Yexus raug tua nws qhia tias txhua tus uas txiav txim siab los ua nws cov thwjtim yuav raug kev ntxub ntxaug. (Yauhas 17:14) Txij thaum ntawd los txog niaj hnub no, cov tseem Khixatia yeej raug cov uas tsis pe hawm Yehauvas tawm tsam. (2 Timaute 3:12) Twb ze ze lub caij uas lub sim ceeb no yuav dua mus, yog li ntawd peb yeej paub tias peb cov yeeb ncuab yuav yimhuab tawm tsam peb ntxiv.​—Mathai 24:9.

2, 3. (1) Vim li cas tsis zoo rau peb ntshai dhau lawm? (2) Hauv zaj no peb yuav kawm txog dabtsi?

² Peb yuav ua li cas los npaj tamsim no, peb thiaj thev taus kev tsim txom? Tsis tas peb yuav txhawj txog ib puas tsav yam uas luag yuav ua los tawm tsam peb. Yog peb ua li ntawd ces tej zaum yuav ua rau peb nyuaj siab thiab ntshai dhau lawm lossis peb yuav cia li tso Yehauvas tseg ua ntej twb tsis tau raug teeb meem dabtsi. (Paj Lug 12:25; 17:22) Peb “tus yeeb ncuab uas yog Ntxwg Nyoog” yuav siv tej uas peb ntshai rov los hem thiab tawm tsam peb. (1 Petus 5:8, 9) Peb yuav txhawb peb txojkev ntseeg li cas tamsim no, peb thiaj thev taus kev tsim txom yav tom hauv ntej?

³ Hauv zaj no peb yuav kawm seb peb yuav tsav peb txojkev sib raug zoo nrog Yehauvas li cas thiab vim li cas thiaj tseem ceeb ua luaj rau peb ua li ntawd tamsim no. Tsis tas li ntawd xwb, peb yuav kawm seb yuav ua li cas peb thiaj muaj lub siab loj siab tuab ntxiv, thiab yuav ua li cas thaum luag ntxub peb.

4. Henplais 13:5, 6 qhia li cas rau peb, thiab vim li cas peb thiaj ntseeg tau li ntawd?

⁴ Koj yuav tsum ntseeg ruaj nreeg tias Yehauvas hlub koj thiab nws yeej yuav tsis tso koj tseg ib zaug li. (Nyeem Henplais  13:5, 6.) Muaj ib Phau Tsom Faj ntev los lawm hais tias: “Thaum raug sim siab, tus neeg uas paub Vajtswv zoo heev yuav tso siab plhuav rau Nws.” Yeej muaj tseeb li ntawd tiag! Yuav kom peb thev taus kev tsim txom, peb yuav tsum hlub thiab tso siab plhuav rau Yehauvas. Thiab peb yuav tsum ntseeg ruaj nreeg tias nws yeej hlub peb tiag.​—Mathai 22:36-38; Yakaunpau 5:11.

5. Dabtsi yuav pab koj pom tias Yehauvas hlub tshua koj?

⁵ Thaum koj nyeem phau Vajlugkub txhua hnub, ua tib zoo xav seb tej koj nyeem yuav pab tau koj txav ze rau Yehauvas dua qub li cas. (Yakaunpau 4:8) Thaum koj nyeem, xav txog tej uas Yehauvas ua thiab tej uas nws hais. Ua tib zoo xav seb nws hlub thiab khuvleej koj npaum li cas. (Khiav Dim 34:6) Yuav tsis yoojyim rau tus uas tsis tau muaj neeg hlub nws dua ntseeg tias Vajtswv hlub nws tiag. Yog koj zoo li hais no ces ua tib zoo xav seb koj puas nco tau tej yam uas Yehauvas tau ua rau koj lawm es muab sau cia txhua hnub. (Ntawv Nkauj 78:38, 39; Loos 8:32) Thaum koj ua tib zoo xav txog koj lub neej thiab tej uas koj nyeem hauv Vajtswv Txojlus ces koj yuav pom tias Yehauvas tau pab koj npaum li cas. Yog koj yimhuab ris Yehauvas txiaj ntsig ces koj yimhuab yuav txav ze rau nws.​—Ntawv Nkauj 116:1, 2.

6. Raws li Ntawv Nkauj 94:18, 19, thaum peb thov Vajtswv yuav pab tau peb li cas?

⁶ Thov Vajtswv tsis tu ncua. Xav txog ib tug metub uas nws txiv puag rawv nws ntawm xubntiag. Nws yeej tsis nco qab ntshai dabtsi thiab zoo siab hlo qhia nws txiv txog txhua yam uas nws tau ntsib hnub ntawd, tsis hais qhov zoo qhov phem tibsi. Yog koj thov Vajtswv txhua hnub thiab txav ze rau nws, koj yuav muaj txojkev sib raug zoo nrog Yehauvas ib yam li tus metub sib raug zoo nrog nws txiv. (Nyeem Ntawv Nkauj 94:18, 19.) Thaum koj thov Vajtswv, “cia li nchuav tej uas nyob hauv koj lub siab tawm los yam li dej ntws.” (Zaj Nkauj Ntsuag 2:19) Qhia Yehauvas txog txhua yam uas koj ntshai thiab txhawj txog. Yog koj ua li ntawd yuav pab tau koj li cas? Phau Vajlugkub hais tias koj yuav pom ‘Vajtswv txojkev siab tus uas ntau dhau li neeg nkag siab tau.’ (Filipi 4:6, 7) Yog koj rau siab thov Vajtswv li no, koj yuav hajyam txav ze rau nws ntxiv.​—Loos 8:38, 39.

7. Vim li cas peb yuav tsum ntseeg ruaj nreeg tias Vajtswv tej lus cog tseg yuav muaj tiav?

⁷ Ntseeg ruaj nreeg tias tej koob hmoov ntawm Vajtswv lub Nceeg Vaj yeej yuav muaj tiav. (Xwm Txheej Taug Kev 23:19) Yog koj tsis ntseeg ruaj nreeg tias Vajtswv tej lus cog tseg yuav muaj tiav ces yuav yoojyim rau Xatas thiab cov uas nws kav ua rau koj ntshai. (Paj Lug 24:10; Henplais 2:15) Yuav ua li cas koj thiaj txhawb tau koj txojkev ntseeg tamsim no? Koj yuav tau teem sijhawm los tshawb nrhiav Vajtswv tej lus cog tseg thiab kawm txog nws lub Nceeg Vaj. Ua tib zoo xav seb yog vim li cas koj thiaj ntseeg tias tej uas Vajtswv hais yuav muaj tiav. Qhov  no yuav pab tau koj li cas? Cia peb tham txog Xateelis Ntsoos (Stanley Jones) uas raug kaw vim nws txojkev ntseeg. Dabtsi pab tau nws thev dhau? Nws hais tias: “Vim kuv paub txog tej uas Vajtswv lub Nceeg Vaj yuav ua thiab kuv ntseeg ruaj nreeg tias yeej yuav muaj tiav xwb xwb li, thiaj tsis muaj leejtwg yuam tau kuv tso Yehauvas tseg.” Yog koj txojkev ntseeg nyob ruaj nreeg ces koj yuav yimhuab txav ze rau Yehauvas thiab koj yuav tsis cia tej uas koj ntshai ua rau koj tso nws tseg.​—Paj Lug 3:25, 26.

8. Yog peb nyiam mus kev sib txoos yuav pab tau peb li cas?

⁸ Mus kev sib txoos tsis tu ncua. Tej kev sib txoos yuav pab peb txav ze rau Yehauvas. Koj puas nyiam mus kev sib txoos? Yog koj nyiam ces thaum koj raug kev tsim txom yav tom hauv ntej, koj yuav thev taus dua. (Henplais 10:24, 25) Vim li cas thiaj hais li no? Rau qhov yog peb cia tej yam me me los tab kaum peb mus kev sib txoos tamsim no ces thaum nom tswv txwv, peb yuav tso tseg tsis mus lawm. Tiamsis yog peb txiav txim siab tuag nthi xyaum kom peb nyiam mus kev sib txoos tamsim no ces txawm luag txwv peb los peb yuav ua tau siab loj siab tuab tsis tso tseg. Thaum nom tswv txwv peb, peb yuav “mloog Vajtswv lus heev dua li mloog neeg lus.”​—Tubtxib Tes Haujlwm 5:29.

9. Yog peb cim xeeb tau tej nqe Vajlugkub ces thaum raug kev tsim txom yuav pab tau peb li cas?

⁹ Cim kom tau cov nqe Vajlugkub uas koj nyiam. (Mathai 13:52) Tej zaum peb yuav nco tsis tau txhua tsav txhua yam uas peb kawm. Tiamsis Yehauvas yeej siv tau nws lub hwj huam dawb huv pab peb nco qab tej nqe Vajlugkub uas peb twb kawm lawm. (Yauhas 14:26) Xws li peb tus kwvtij uas raug kaw nyob ib leeg hauv tebchaws Ntsaws Mes Nis (Germany). Nws hais tias: “Kuv zoo siab heev uas kuv cim tau 200 tawm nqe Vajlugkub! Txawm kuv nyob kuv ib leeg xwb los, kuv siv sijhawm los ua tib zoo xav txog ntau yam hauv phau Vajlugkub tsis txawj tag.” Tej nqe Vajlugkub uas tus kwvtij cim xeeb tau pab kom nws muab siab npuab Yehauvas tsis tseg thiab thev taus kev tsim txom.

10. Vim li cas thiaj zoo rau peb cim kom tau tej nkauj qhuas Vajtswv?

¹⁰ Cim kom tau tej nkauj qhuas Vajtswv rau nruab siab. Thaum Povlauj thiab Xila nkawd raug kaw hauv Filipi, nkawd hu cov nkauj qhuas Vajtswv uas nkawd twb cim tau lawm. (Tubtxib Tes Haujlwm 16:25) Ib yam li ntawd, thaum peb cov kwvtij hauv tebchaws Xauviaj (Soviet Union) raug xa mus nyob tebchaws Xainpelias (Siberia), lawv ua li cas xwb? Tus muam hu ua Madias Fiadoos (Mariya Fedun) hais tias:  “Peb hu tag nrho cov nkauj uas peb twb cim tau hauv nruab siab lawm.” Nws hais tias cov nkauj ntawd txhawb tau lawv lub zog heev thiab ua kom lawv yimhuab txav ze rau Yehauvas. Thaum peb hu tej nkauj qhuas Vajtswv, yeej txhawb siab heev thiab. Yog li ntawd, cia peb cim kom tau cov nkauj no!​—Saib lub ntsiab me “ Pab Kuv Ua Siab Loj Siab Tuab.”

11, 12. (1) Raws li 1 Xamuyee 17:37, 45-47, vim li cas Davi thiaj ua tau siab loj siab tuab? (2) Davi tus qauv qhia tau peb li cas?

¹¹ Thaum raug tsim txom koj yuav tsum ua siab loj siab tuab. Yog koj xav tias koj tsis muaj lub siab loj siab tuab, koj yuav ua li cas? Nco ntsoov tias tsis yog tus loj, tus muaj zog, thiab tus muaj peevxwm thiaj ua tau siab loj siab tuab xwb. Cia peb kawm txog Davi. Thaum nws tseem hluas nws nrog Kaulia sib tua. Davi me heev, tsis muaj zog npaum Kaulia, thiab twb tsis muaj cuab yeej ua rog li. Txawm li ntawd los nws tsis ntshai. Nws ua siab loj siab tuab dhia ceev nrooj mus rau ntawm tus Filixatee khav theeb ntawd.

¹² Vim li cas Davi thiaj ua tau siab loj siab tuab? Rau qhov nws ntseeg ruaj nreeg tias Yehauvas yeej nrog nraim nws. (Nyeem 1 Xamuyee 17:37, 45-47.) Davi tsis xav txog qhov uas Kaulia loj thiab siab dua nws. Tiamsis nws xav txog qhov uas Yehauvas muaj zog tshaj Kaulia. Peb kawm tau li cas? Yuav kom peb ua tau siab loj siab tuab, peb yuav tsum ntseeg ruaj nreeg tias Yehauvas yeej nrog nraim peb. Txawm peb cov yeeb ncuab muaj zog npaum li cas los, peb yuav tsis ntshai lawv vim Yehauvas muaj zog dua lawv. (2 Vaj Keeb Kwm 20:15; Ntawv Nkauj 16:8) Peb yuav tsum ua li cas tamsim no peb thiaj muaj lub siab loj siab tuab ua ntej muaj kev tsim txom?

13. Piav seb yuav ua li cas peb thiaj ua tau siab loj siab tuab?

¹³ Yog peb mus tshaj tawm txoj xov zoo txog Vajtswv lub Nceeg Vaj ces peb yuav yimhuab muaj lub siab loj siab tuab. Kev tshaj tawm yuav pab kom peb tso siab rau Yehauvas thiab tsis ntshai tibneeg. (Paj Lug 29:25) Piv txwv li yog peb nquag mus dhia, yuav ua rau peb muaj zog dua qub. Ib yam li ntawd, thaum peb nquag mus tshaj tawm ib lub tsev rau ib lub, tom tej chaw ua haujlwm, tom tej chaw muaj neeg coob dua kev, thiab thaum mus ub mus no yuav ua rau peb muaj lub siab loj siab tuab. Yog peb ua siab loj siab tuab mus tshaj tawm tamsim no ces peb yuav tsis ntshai mus tshaj tawm thaum nom tswv txwv.​—1 Thexalaunika 2:1, 2.

14, 15. Naxim Yuj thiab Vualeetxhina Nkaunaxakaiya nkawd 2 tug qauv pab tau peb li cas?

 ¹⁴ Cia peb kawm txog 2 tug muam uas ua tau siab loj siab tuab. Thawj tug yog Naxim Yuj (Nancy Yuen). Nws tsuas siab li 5 feet (1.5 meter) xwb, tiamsis nws tsis ntshai leejtwg li. * Txawm nom tswv txwv tsis pub tshaj tawm txog Vajtswv lub Nceeg Vaj los nws tsis tso tseg. Lawv thiaj muab nws kaw tau 20 lub xyoos hauv tebchaws Suav. Cov nom tswv uas thom nws hais tias hauv lawv lub tebchaws mas nws yog tus uas “tawv tshaj plaws.”

¹⁵ Ib yam li ntawd, tus muam Vualeetxhina Nkaunaxakaiya (Valentina Garnovskaya) raug kaw 3 zaug hauv tebchaws Xauviaj. Yog muab suav tag nrho ces nws raug kaw 21 xyoos diam. * Yog vim li cas? Vim nws txiav txim siab tuag nthi tias nws yuav tsum mus tshaj tawm xwb. Tej nom tswv muab nws hu ua “tus neeg txhaum cai uas txaus ntshai tshaj plaws.” Vim li cas 2 tug muam no thiaj ua tau siab loj siab tuab? Vim nkawd ntseeg ruaj nreeg tias Yehauvas nrog nraim nkawd.

16. Peb yuav tsum ntseeg li cas peb thiaj ua taus siab loj siab tuab?

¹⁶ Raws li peb tau kawm, peb yuav tsum tsis txhob vam peb tus kheej xwb. Tiamsis peb yuav tsum ntseeg ruaj nreeg tias Yehauvas yeej nrog nraim peb thiab yuav tuaj peb tog pab peb. (Kevcai 1:29, 30; Xekhaliya 4:6) Yog peb ntseeg li no, peb yuav ua tau siab loj siab tuab tiag tiag.

17, 18. Hauv Yauhas 15:18-21, Yexus hais li cas xwb? Piav seb.

¹⁷ Peb yeej zoo siab heev thaum luag saib taus peb. Tiamsis peb yuav tsum tsis txhob xav yuam kev tias peb tsis muaj nqes dabtsi thaum luag tsis nyiam peb. Yexus hais tias: “Thaum luag ntxub nej thiab ntiab nej khiav tawm hauv lawv cov, thiab thuam nej thiab iab hiam tias nej yog neeg phem vim yog tim Neeg leej Tub, nej tau nyob kaj siab lug.” (Luka 6:22) Yexus cov lus no txhais li cas?

¹⁸ Tsis yog Yexus hais tias cov Khixatia xav kom luag tej ntxub lawv. Nws hais tias peb tsis  yog ntiajteb li. Peb ua lub neej raws li Yexus qhia thiab tshaj tawm txoj xov uas nws tshaj tawm. Yog vim li ntawd lub qab ntuj neeg thiaj ntxub peb. (Nyeem Yauhas 15:18-21.) Yog tibneeg ntxub peb vim peb hlub peb Leej Txiv los peb yuav tsis tu siab li. Peb tsuas xav ua kom haum Yehauvas siab nyiam xwb.

19. Peb yuav xyaum Yexus cov tubtxib li cas?

¹⁹ Tibneeg yuav ua li ub li no kom koj txaj muag lees tias koj yog Yehauvas ib tug Timkhawv, tiamsis tsis txhob poob siab. (Mikha 4:5) Cia peb kawm txog Yexus cov tubtxib. Lawv tau ua li cas tom qab Yexus tuag lawm xwb? Cov tubtxib paub tias cov Yudai tej thawj coj ntxub lawv heev. (Tubtxib Tes Haujlwm 5:17, 18, 27, 28) Tiamsis lawv tsis ntshai kiag li. Hauv Yeluxalees lawv rau siab ntso mus tshaj tawm hauv lub tuam tsev txhua txhua hnub. Sawvdaws thiaj paub tias lawv yog Yexus cov thwjtim. (Tubtxib Tes Haujlwm 5:42) Peb los yeej ua tau li ntawd thiab. Yog peb qhia tias peb yog Yehauvas Cov Timkhawv rau cov uas peb ua haujlwm nrog, cov peb kawm ntawv nrog, thiab tej neeg zej zog ces yuav pab kom peb txhob ntshai tibneeg.​—Tubtxib Tes Haujlwm 4:29; Loos 1:16.

20. Txawm tibneeg ntxub cov tubtxib heev los, vim li cas lawv thiaj zoo siab ua luaj?

²⁰ Vim li cas cov tubtxib thiaj zoo siab ua luaj? Rau qhov lawv paub tias tibneeg ntxub lawv vim lawv ua raws li Yehauvas lub siab nyiam. (Luka 6:23; Tubtxib Tes Haujlwm 5:41) Tus tubtxib Povlauj thiaj hais tias: “Yog nej raug kev tsim txom vim qhov uas nej ua raug cai, nej yuav tau nyob kaj siab lug.” (1 Petus 2:19-21; 3:14) Txawm luag tej yuav ntxub peb npaum li cas los, peb yuav tsis tso Yehauvas tseg vim peb paub tias peb yeej ua haum Yehauvas siab lawm.

21, 22. (1) Ua ntej muaj kev tsim txom, koj yuav ua li cas? (2) Zaj tom ntej peb yuav kawm txog dabtsi?

²¹ Peb tsis paub tias thaum twg tibneeg yuav tawm tsam peb lossis thaum twg nom tswv yuav txwv peb tes haujlwm rau Yehauvas. Yog li ntawd, peb txojkev sib raug zoo nrog Yehauvas yuav tsum ruaj khov. Tsis tas li ntawd xwb, peb yuav tsum ua siab loj siab tuab thiab txhob ntshai tibneeg. Yog peb ua li no, ces yav tom hauv ntej peb yuav tsis tso Yehauvas tseg.

²² Tiamsis yog nom tswv txwv peb lawm ne, peb yuav ua li cas? Zaj tom ntej peb yuav kawm txog tej hauv paus ntsiab lus hauv phau Vajlugkub uas yuav pab kom peb teev tiam Yehauvas tsis tseg, txawm nom tswv txwv.