1. Dahaka dainai dagedage totona ita hegaegae be namo?

ISEDA Lohiabada Iesu be ia do mase lasi hanuaboina ai, ia gwau ena hahediba taudia be taunimanima ese do idia inai henidia. (Ioa. 17:14) Unai nega amo ema bona hari tomadiho momokanina idia ura henia lasi taudia ese Iehova ena Witnes taudia idia dagedage henia noho. (2 Tim. 3:12) Inai nega oromana ena dokona ia kahirakahira noho lalonai, ita diba ita idia inai henia taudia ese edia dagedage karadia do idia habadaia.​—Mat. 24:9.

2-3. (a) Bema ita gari dahaka ia vara diba? (b) Inai stadi atikol ai dahaka do ita herevalaia?

² Hari edena dala ai dagedage totona do ita hegaegae? Namo lasi ita dekenai do idia vara gau dikadia ibounai ita lalohadailaia. Bema unai gaudia ita lalohadailaia, do ita gari bona lalohekwarahi bada. Danu, unai ia vara dainai Iehova hesiai henia karana ita hadokoa diba. (Aon. 12:25; 17:22) Iseda “inai tauna, Diabolo” ese ia gaukaralaia kara badana ta be, gari. (1 Pet. 5:8, 9) Ita hegaegae totona hari dahaka do ita karaia be namo?

³ Inai stadi atikol ai, iseda hetura karana Iehova ida ita hagoadaia daladia do ita herevalaia bona dahaka dainai hari unai ita karaia be mai anina bada. Bona ita goada noho daladia do ita herevalaia danu. Bona stadi ena dokonai do ita diba dahaka do ita karaia bema taunimanima be ita idia inai henia.

4. Heberu 13:5, 6 ese ita dekenai dahaka ia hadibaia, bona dahaka dainai unai ita abia dae momokani?

⁴ Namona be oi abia dae momokani Iehova ese oi ia lalokau henia bona oi do ia rakatania lasi. (Heberu 13:5, 6 duahia.) Lagani momo gunanai Gima Kohorona ta ia gwau: “Dirava ia diba namonamo tauna ta be hahetoho badadia ia davaria neganai,  Ia do ia abidadama henia.” Edena dala ai? Dagedage karadia ita haheaukalaia totona, namona be mai kudouna ibounai ida Iehova ita lalokau henia bona abidadama henia, bona ita abia dae momokani Ia be ita ia lalokau henia.​—Mat. 22:36-38; Iam. 5:11.

5. Dahaka ese oi do ia durua unai amo do oi diba Iehova be oi ia lalokau henia?

⁵ Dina iboudiai Baibel oi duahia neganai emu hetura karana Iehova ida be do ia goada. (Iam. 4:8) Baibel oi duahia neganai, Iehova ena kara idauidau oi laloa. Ia gwauraia bona ia karaia gaudia oi laloa neganai do oi laloparara ia be oi ia lalokau henia bada. (Eso. 34:6) Taunimanima haida be Dirava ena lalokau karana idia lalopararalaia lasi, badina haida ese idia dekenai unai kara idia hahedinaraia lasi. Bema oi be unai bamona oi mamia, Iehova ese dina ta ta ai oi dekenai ena hebogahisi bona ena kara namo ia hahedinaraia dala idauidau mani oi torea. (Sal. 78:38, 39; Roma 8:32) Oi dekenai idia vara ekspiriens idauidau bona Dirava ena Hereva amo oi duahia gaudia oi laloa neganai, do oi itaia Iehova be oi totona gau momo ia karaia vadaeni. Iehova ese oi totona ia karaia gaudia ibounai oi laloa bada neganai emu hetura karana ia ida do ia goada.​—Sal. 116:1, 2.

6. Salamo 94:17-19 ena hereva bamona, mai kudouna ibounai ida guriguri karana ese edena dala ai oi do ia durua?

⁶ Hanaihanai oi guriguri. Mani inai oi laloa. Tama ta be mai lalokau ida ena natuna merona ia rosia. Unai mero ia gari lasi dainai, unai dina lalonai idia vara gau namodia bona dikadia be ena tamana dekenai ia gwauraia hedinarai. Unai bamona lalokau karana oi mamia diba, bema dina ta ta ai mai kudouna ibounai ida Iehova oi guriguri henia. (Salamo 94:17-19 duahia.) Iehova oi guriguri henia neganai, emu gari mamina bona oi lalohekwarahilaia gaudia ibounai be ia dekenai oi gwauraia hedinarai. (Lal. 2:19) Edena dala ai unai ese oi do ia hagoadaia? Baibel ia gwau: “Dirava ena maino, laloparara ibounai ia hereaia gauna, ese emui kudouna bona lalona do ia gimaia.” (Fili. 4:6, 7) Unai bamona dala ai Iehova oi guriguri henia neganai, Ia kahirakahira do oi lao.​—⁠Roma 8:38, 39.

7. Dahaka dainai oi abia dae momokani Dirava ena Basileia ese ia gwauhamatalaia gaudia be do idia vara?

⁷ Namona be oi abia dae Dirava ena Basileia ese do ia havaraia hahenamo ibounai be do idia vara momokani. (Num. 23:19) Bema unai gwauhamata oi abia dae lasi, Satani bona ena taunimanima be oi do idia hagaria diba. (Aon. 24:10; Heb. 2:15) Edena dala ai hari inai negai Dirava ena Basileia abidadama henia karana oi hahedinaraia diba? Nega oi atoa, Dirava ena gwauhamata ena Basileia ese do ia karaia gaudia bona unai oi abia dae ena badina oi stadilaia totona. Unai ese edena dala ai oi do ia durua? Stanley Jones mani oi laloa. Ia be ena abidadama dainai lagani seven lalonai dibura ruma ai ia noho. * Dahaka ese ia durua mai  abidadama ida ia haheauka totona? Ia gwau: “Egu abidadama be ia goada badina Dirava ena Basileia lau diba bona unai Basileia ese do ia havaraia gaudia lau abia dae momokani, unai lau daradaralaia lasi bona tau ta eiava gau ta dainai Iehova do lau rakatania lasi.” Bema Dirava ena gwauhamata oi abia dae momokani, Iehova kahirakahira do oi lao bona gau ta dainai do oi gari lasi.​—Aon. 3:25, 26.

8. Keristani heboudia dekenai ita lao hanaihanai karana ese ita dekenai dahaka ia hadibaia? Gwauraia hedinarai.

⁸ Hanaihanai Keristani heboudia dekenai oi lao. Hebou lao henia karana ese ita ia durua Iehova kahirakahira ita lao totona. Unai bamona ita karaia neganai, ia hahedinaraia ita be vaira negai do idia vara dagedage karadia totona ita hegaegae. (Heb. 10:24, 25) Dahaka dainai unai bamona ita gwau? Namo lasi hari inai negai anina lasi gaudia ese iseda hebou lao henia karana idia koua. Bema vaira negai dagedage karadia idia vara, oi be iseda tadikaka taihu ida hebou karana do oi laloa bada, a? Ma danu, bema iseda lalona ita hadaia hebou ibounai ita lao henia totona, do ita gari lasi ena be ita idia inai henia taudia idia ura iseda hebou karana idia koua. Hari be nega namona iseda hebou lao henia karana ita laloa bada. Unai bamona ita karaia neganai, dagedage karadia eiava gavamani ena taravatu ese iseda Dirava badinaia karana do ia hadikaia lasi.​—Kara 5:29.

9. Dahaka dainai Baibel siridia laloatao karana be dala namona dagedage negadia ai oi hegaegae totona?

⁹ Oi ura henia Baibel siridia oi laloaboio lasi. (Mat. 13:52) Reana siri ibounai do oi laloatao diba lasi, to Iehova ena lauma helaga ese oi do ia durua oi ura henia siri ibounai oi laloatao totona. (Ioa. 14:26) East Germany ena dibura ruma ai ia noho tadikaka ta mani oi laloa. Ia gwau: “Lau moale badina Baibel ena siri momo lau diba bona lau laloaboio lasi! Herevana dibura ruma ai sibona lau noho, to unai nega lau gaukaralaia Baibel ena hereva haida lau laloa dobu totona.” Unai siri ese iseda tadikaka ia durua Iehova kahirakahira ia lao totona bona mai abidadama ida ia haheauka.

10. Dahaka dainai Iehova hanamoa anedia ita laloaboio lasi be namo?

¹⁰ Iehova hanamoa anedia oi laloaboio lasi bona ane oi abia. Filipi ai, Paulo bona Sila be dibura ruma dekenai idia noho neganai, Iehova hanamoa anedia idia abia. (Kara 16:25) Unai hegeregerena, iseda tadikaka taihu be guna idia gwauraia Soviet Union amo Siberia ena dibura ruma dekenai idia abidia lao neganai, edena dala ai idia ta ta idia hagoadaia? Taihu Mariya Fedun ia gwau: “Ane buka lalonai  idia noho ane haida ai laloatao bona unai ane ai abia.” Ia gwau ane abia karana ese idia ibounai ia hagoadaia bona durua Iehova kahirakahira idia lao totona. Oi ura henia anedia oi abia neganai, unai ese oi ia hagoadaia, a? Namona be hari unai ane ibounai oi laloatao!​—Maua ladana, “ Oi Goada!” itaia.

11-12. (a) Samuela Ginigunana 17:37, 45-47 ena hereva bamona, dahaka dainai Davida be ia gari lasi? (b) Davida ena haheitalai amo dahaka mai anina bada gauna ta ita dibaia?

¹¹ Dagedage karadia oi haheaukalaia totona oi goada be namo. Bema oi laloa oi be oi goada lasi, vadaeni dahaka do oi karaia? Herevana oi be tau goadana eiava emu diba be bada, unai ese ia hahedinaraia lasi oi be goada tauna. Mero matamata Davida mani oi laloa. Ia be Goliata ia tuari henia. To, Davida be Goliata bamona lasi, ia be mero matamata sibona bona ia be tuari kohudia ia hahedokilaia lasi. Danu Davida be tuari kaia ia dogoatao lasi. To ia be mai gari lasi ida Goliata ia tuari henia.

¹² Dahaka dainai Davida be ia gari lasi? Ia abia dae momokani Iehova be ia ia durua. (1 Samuela 17:37, 45-47 duahia.) Herevana Goliata be tau badana momokani, to Davida be unai ia laloa lasi. Ia laloa gauna be Iehova ena matanai, Goliata be tau maragina momokani. Unai sivarai amo dahaka ita dibaia? Do ita gari lasi bema ita abia dae momokani Iehova be ita do ia durua bona ita diba Siahu Ibounai Diravana ena vairanai ita idia inai henia taudia be goada lasi. (2 Siv. 20:15; Sal. 16:8) Dagedage karadia idia do vara lasi neganai, hari edena dala ai ita hahedinaraia ita gari lasi?

13. Edena dala ai ita hahedinaraia ita gari lasi? Gwauraia hedinarai.

¹³ Hari Dirava ena Basileia sivarai namona ita harorolaia karana amo ita hahedinaraia ita gari lasi. Dahaka dainai? Badina haroro gaukara amo Iehova abidadama henia karana ita dibaia bona ita ia durua taunimanima ita gari henia lasi totona. (Aon. 29:25) Mani inai oi laloa, ita eksasais neganai iseda masolo ia goada. Unai hegeregerena, ruma-ta-ruma-ta gaukara, pablik gabudiai, nega bona gabu idauidau ai, bona bisinesi gabudia ai haroro karana amo goada ita abia diba. Bema hari haroro gaukara ita goadalaia, herevana gavamani ese iseda haroro gaukara do ia taravatua to mai gari lasi ida do ita haroro noho.​—1 Tes. 2:1, 2.

14-15. Nancy Yuen bona Valentina Garnovskaya edia ekspiriens amo dahaka ita dibaia?

¹⁴ Taihu rua edia haheitalai ese ita do ia durua gari lasi karana ita hahedinaraia totona.  Nancy Yuen be taihu kwadogina ta, to ia be gari lasi karana ia hahedinaraia. * Herevana dahaka ia vara, to Dirava ena Basileia ena sivarai namona ia harorolaia noho. Unai dainai China ena dibura ruma ai lagani 20 mai kahana ia noho. Unai tano ena gavamani ai idia gaukara taudia ese ia idia gwauraia, ia be “kamonai diba lasi hahinena.”

¹⁵ Valentina Garnovskaya be nega toi Soviet Union ena dibura ruma ai idia atoa, bona lagani 21 mai kahana unuseniai ia noho. * Dahaka dainai? Herevana gavamani ai idia gaukara taudia ese ia idia koua to haroro gaukara ia hadokoa lasi, unai dainai ia idia gwauraia “taravatu utua hahinena.” Dahaka ese unai taihu rua ia durua dainai idia gari lasi? Badina idia abia dae momokani Iehova be idia ia durua.

16. Goada abia dalana tamona be dahaka?

¹⁶ Ataiai ita herevalaia bamona, ita gari lasi totona namo lasi iseda goada bona diba dekenai ita tabekau. To, namona be ita abia dae momokani Iehova be ita ia durua noho bona ia sibona be ita totona do ia tuari. (Deu. 1:29, 30; Sek. 4:6) Unai dala tamona sibona amo goada ita abia.

17-18. Ioane 15:18-21 ena hereva bamona, Iesu ena hereva ena anina be dahaka? Gwauraia hedinarai.

¹⁷ Taunimanima be ita idia matauraia neganai ita moale, to ita idia inai henia neganai namo lasi ita laloa ita be anina lasi. Iesu ia gwau: “Taunimanima ena Natuna dainai umui idia inai henia, idia lulua, idia gwauraia dika bona emui ladana idia hadikaia neganai, do umui moale.” (Luka 6:22) Iesu ena hereva ena anina be dahaka?

¹⁸ Iesu ena hereva ese ia hahedinaraia lasi Keristani taudia be taunimanima ese idia inai henidia neganai do idia moale. To, Iesu ena hereva ena anina be ita be inai tanobada ena lasi. Badina ita be Iesu ena hahediba herevadia ita badinaia bona ia harorolaia herevana ita harorolaia danu. Unai dainai taunimanima be ita idia inai henia. (Ioane 15:18-21 duahia.) Ita ura Iehova ita hamoalea. Iseda Tamana ita lalokau  henia dainai taunimanima be ita idia inai henia.

19. Edena dala ai aposetolo taudia edia haheitalai ita tohotohoa diba?

¹⁹ Taunimanima be edia kara bona idia gwauraia herevadia amo oi do idia hahemaraia, to namona be oi hahedinaraia oi be Iehova ena Witnes ta. (Mika 4:5) Iesu ia mase murinai Ierusalema ai idia noho aposetolo taudia be taunimanima idia gari henia lasi. Edia haheitalai ita tohotohoa diba. Badina idia diba Iuda ena tomadiho gunalaia taudia ese idia inai henidia bada. (Kara 5:17, 18, 27, 28) To, hanaihanai dubu helaga dekenai idia lao bona edia haroro gaukara amo idia hahedinaraia idia be Iesu ena hahediba taudia. (Kara 5:42) Idia gari lasi dainai idia hunia lasi. Ita danu, herevana moni gaukara gabunai, sikuli gabunai bona edeseniai ita noho, to namona be hanaihanai mai gari lasi ida taunimanima dekenai ita hahedinaraia ita be Iehova ena Witnes taudia.​—Kara 4:29; Roma 1:16.

20. Dahaka dainai aposetolo taudia idia moale ena be taunimanima ese idia inai henidia?

²⁰ Dahaka dainai aposetolo taudia be idia moale? Badina idia diba taunimanima ese do idia inai henia, bona idia diba Iehova ena ura idia karaia dainai idia dekenai unai ia vara. (Luka 6:23; Kara 5:41) Aposetolo Petero ia gwau: “Bema kara maoromaoro dainai hisihisi umui abia, do umui moale.” (1 Pet. 2:19-21; 3:14) Bema ita diba kara maorodia ita karaia dainai taunimanima be ita idia inai henia, unai ese ita do ia koua lasi Iehova ita hesiai henia totona.

21-22. (a) Dagedage ia do vara lasi lalonai oi hegaegae totona dahaka do oi karaia? (b) Stadi atikol 28 ai dahaka do ita herevalaia?

²¹ Ita diba lasi edena nega ai dagedage karadia do idia vara eiava ita diba lasi edena nega ai gavamani ese Iehova tomadiho henia karana do ia taravatua. Namona be hari iseda hetura karana Iehova ida ita hagoadaia, ita goada noho, bona taunimanima gari henia karana ita hanaia, unai amo ita hahedinaraia ita hegaegae. Unai ita karaia neganai, unai ese ita do ia durua Iehova ita hesiai henia noho totona.

²² To, bema gavamani ese iseda tomadiho karana ia taravatua be edena bamona? Herevana iseda tomadiho karana idia taravatua to Baibel ena hakaua herevadia ese ita idia durua Iehova ita hesiai henia noho totona. Unai be stadi atikol 28 ai do ita herevalaia.