1. Ongwaye tji matu hepa okurirongerera ondatumisire?

KOMURUNGU onḓiro ya Jesus, eye wa tja ovahongewa ve mave tondwa. (Joh. 17:14) Okuza koruveze ndo nga ku nai, ovakarere va Jehova ovaṱakame ve tatumisiwa i yovandu mbe ha karere Jehova. (2 Tim. 3:12) Tu undjira ko kutja ovanavita na eṱe mave tu pirukire tjinene, otja tji tu ri popezu nomaandero wouye.—Mat. 24:9.

2-3. (a) Matu sokutjiwa ye ohunga nokutira? (b) Matu ke rihonga ye morupa ndwi?

² Hapo matu rirongerisa vi nai kutja tu tuurunge ondatumisire? Kahepero okuripurira koviṋa ovivi mbi mape ya a vi tjitwa kweṱe. Eṱe tji twa tjiti nao, mape ya atu utu okutira nokurikenda. Tji twe ripuirire koviṋa avihe mbi, eṱe mape ya atu isa okukarera Jehova ngunda atu hiya muna omauzeu. (Omiano 12:25; 17:22) Okutira, otjirwise otjinamasa ‘omunavita Satan’ tje kondja okuungurisa kweṱe. (1 Petr. 5:8, 9) Hapo eṱe matu rirongere vi kutja tu yenene okutuurunga ondatumisire?

³ Morupa ndwi, matu ke rihonga kutja omomuano uṋe mu matu yenene okupamisa oupanga wetu kuna Jehova nokutja ongwaye tje ri ohepero okutjita nao nai. Nu wina matu ke rihonga kutja matu sokutjita vi kutja tu kare nouvanḓe. Korusenina, matu ke rihonga kutja matu yenene okutjita vi indu ovandu tji mave tu pirukire.

4. Ovaheberi 13:5, 6 ri tu raera tjike, nu ongwaye tji matu sokukara nongamburiro momambo ngo?

⁴ Kara nongamburiro kutja Jehova we ku suvera nokutja eye ke nokukwesa ko. (Lesa Ovaheberi 13:5, 6.) Ozombura ozengi nḓa kapita, okambo nga Oruhungu ka tja: “Omundu ngu tjiwa Mukuru nawa eye u kara nongamburiro yomasa mu ye indu  tje ri kehi yomarorero.” Imbo tjiri ouatjiri! Eṱe matu sokusuvera Jehova nokukambura mu ye okuura kutja tu tuurunge omarorero, nu katu sokukeyakeya kutja eye we tu suvera.—Mat. 22:36-38; Jak. 5:11.

5. Otjikwaye tji matji ku vatere okumuna kutja Jehova we ku suvera?

⁵ Lesa Ombeibela yoye eyuva arihe nondando yokutumbuka popezu na Jehova. (Jak. 4:8) Otja tji mo lese, yandja ombango kovikaṋena vya Jehova vyorusuvero. Nu wina tji mo lese ohunga noviṋa Jehova mbye tjita nokuhungira, kondja okuzuva nawa omuano Jehova mee ku suvera. (Eks. 34:6) Mape ya i rira ouzeu kovandu tjiva okukambura kutja Mukuru we ve suvera mena rokutja kape nomundu ngwe ve raisira orusuvero. Tji u ri mongaro otja indjo, kondja okutjanga omiano Jehova mee ku raisira ondjenda notjari. (Eps. 78:38, 39; Rom. 8:32) Otja tji mo ripurire koviṋa mbya tjitwa kove nokuripurira ko oukoto koviṋa mbi mo lese mEmbo ra Mukuru, ove mo yenene okumuna oviṋa ovingi Jehova mbye ku tjitira. Ove tji u nondangi tjinene koviṋa avihe Jehova mbye ku tjitira, oupanga woye kuna ye mau kurire ko.—Eps. 116:1, 2.

6. Otja kEpsalme 94:17-19, okukumba okuza komutima ma ku ku vatere vi?

⁶ Kumba aruhe. Ripura nokanatje okaṱiṱi okazandu ku ka handwa i ihe norusuvero. Okanatje okazandu nga make munu kutja ke rimondjeverero nu make hungire kuna ihe noupaturuke ohunga noviṋa ovivi noviwa mbya tjitwa ku ko eyuva ndo. Indu tji mo kumbu ku Jehova eyuva arihe ove mo yenene okukara noupanga wopopezu otjingewo. (Lesa Epsalme 94:17-19.) Otja tji mo kumbu, “tirahi omutima woye komurungu wa Muhona tjimuna omeva” nu raera Iho worusuvero ohunga nozongendo zoye noviṋa avihe mbi ma vi ku tirirsa. (Omiimbo 2:19) Mape tjitwa tjike? Ove mo munu ‘ohange ya Ndjambi ndja kapita ozondunge azehe.’ (Fil. 4:6, 7) Tji mo kumbu momuano mbwi, ove mo tumbuka popezu na Jehova.—Rom. 8:38, 39.

7. Ongwaye tji mo sokukara nongamburiro kutja omakwizikiro Mukuru nga tjita ohunga nOuhona we maye yenenisiwa?

⁷ Kara nongamburiro kutja ozondaya ohunga nOuhona wa Mukuru maze yenenisiwa. (Num. 23:19) Indu tji u hi nongamburiro kutja omakwizikiro wa Mukuru maye yenenisiwa, i rira oupupu ku Satan na imba mbe ri kehi ye okukutirisa. (Omiano 24:10; Hebr. 2:15) Hapo ove mokurisa vi ongamburiro yoye mOuhona wa Mukuru nai? Twapo oruveze okukonḓonona ohunga nomakwizikiro Mukuru nga tjita ohunga nOuhona we, nokutja ongwaye tji mo sokukara nongamburiro kutja owo maye yenenisiwa. Okutjita nao maku ku vatere vi? Tara kotjihorera tja Stanley Jones, ngwa patererwe monḓorongo oure wozombura 7 mena rongamburiro ye. * Otjikwaye tji tje mu vatera okutuurunga nouṱakame? Eye wa tja:  “Ongamburiro yandje ya ri nomasa mena rokutja ee tjiwa ohunga nOuhona wa Mukuru, nokutja owo mau yenenisa ye, nu ami kee keyakeya. Kunao ami hina mba isa Jehova.” Indu tji u nongamburiro yomasa momakwizikiro wa Mukuru, ove mo tumbuka popezu na Jehova nu kono yandjere otjiṋa tji matji kutirisa okukutjaera kutja o ha karere Jehova.—Omiano 3:25, 26.

8. Oumune mbu tu na wo ohunga nozombongarero zombongo u raisa tjike? Kahurura.

⁸ Kara pozombongarero zombongo aruhe. Ozombongarero zetu zombongo ze tu vatera okutumbuka popezu na Jehova. Oumune mbu tu na wo ohunga nokuyenda kozombongarero zombongo u raisa kutja matu yenene vi okutjinda ondatumisire moruyaveze. (Hebr. 10:24, 25) Ongwaye tji matu tja nao? Indu tji matu yandjere omauzeu omaṱiṱi okututjaera kutja atu ha kara pozombongarero zombongo nai, hapo nu tjike indu ohoromende tji ye tu tjaere okuhakaena ku novakambure ovakwetu moruyaveze? Nungwari, eṱe tji twe rimanene okuyenda kozombongarero zombongo, kamaatu isa okuyenda ku zo indu ovetupirukire tji mave kondjo okututjaera. Indwi ooruveze okusuvera okuyenda kozombongarero zombongo. Eṱe tji twa suvere okuyenda kozombongarero zombongo, kape novetupirukire poo ohoromende ndji mai tu tjaere, eṱe matu kara nonḓuviro ku Ndjambi komeho yokukara nonḓuviro kovandu.—Oviung. 5:29.

9. Ongwaye okutjiwa omatjangwa motjiuru tje ri omuano omuwa wokurirongerisira ondatumisire?

⁹ Tjiwa omatjangwa nge ku tjatera motjiuru. (Mat. 13:52) Mape ya o ha zemburuka nawa, posiya Jehova ma yenene okuungurisa ombepo ye ondjapuke kutja u zemburuke. (Joh. 14:26) Omurumendu omukambure ngwa ri motjovakamburwa koutjiro wa Germany, wa tja: “Ami mba ri nenyando tjinene kutja ee tjiwa omatjangwa omengi motjiuru! Nandarire kutja mba ri erike ami aruhe ee ripura nomapu omengi wOmbeibela.” Omatjangwa ngo ya vatera omurumendu omukambure ngo okukara popezu na Jehova, nokutuurunga nouṱakame.

10. Ongwaye tji matu sokutjiwa omaimburiro wetu motjiuru?

¹⁰ Tjiwa omaimburiro motjiuru nge yandja ohiviro ku Jehova. Paulus na Silas tji va ri motjovakamburwa moFilipi, aave imbura omaimburiro ngaave tjiwa motjiuru okuyandja ohiviro ku Jehova. (Oviung. 16:25) Momuano otjingewo, indu ovakambure ovakwetu mba ri momahi nga ri kehi yoSoviet Union tji va rambwa okuyenda ko Siberia, hapo owo va tjita vi  okuriyanḓiparisa? Omukazendu omukambure Mariya Fedun wa tja: “Eṱe aatu imbura omaimburiro ayehe ngaatu tjiwa okuza membo romaimburiro.” Eye wa tja omaimburiro ngo ye ve yanḓiparisa tjinene nu ye ve vatera okukara popezu na Jehova. Hapo okuimbura omaimburiro ngu wa suvera okuza membo retu romaimburiro na morungovi ku ku yanḓiparisa? Kunao rihonga omaimburiro ngo motjiuru nai!—Lesa okaongo nga “ Give Me Courage.”

11-12. (a) Otja ku 1 Samuel 17:37, 45-47, ongwaye David tjaa ri ombanḓe? (b) Otjikwaye otjinanḓengu tji matu rihongere kotjihorera tja David?

¹¹ Kutja u tuurunge omarorero, mo hepa ouvanḓe. Ove tji mo munu kutja ko notjikaṋena ho mo sokutjita vi? Zemburuka kutja ouvanḓe kauzikamene komasa woye, koviṋa mbi mo yenene okutjita poo ozombura zoye. Tara kotjihorera tja David indu tjaa sokukarwa kuna Goliat. David wa ri omuṱiṱi, kaari nomasa nu eye kena wa ri novirwise ovisemba okukarwisa navyo omurumendu omunene ngwi. David nandarire kaa ri nengaruvyo. Posiya, eye wa ri nouvanḓe. David wa tupuka okukarwisa omurumendu omunene omuritongamise ngo.

¹² Ongwaye David tjaari nouvanḓe? Eye wa ri nongamburiro yomasa kutja Jehova wa ri puna ye. (Lesa 1 Samuel 17:37, 45-47.) David kee ripurire komuano Goliat mbwe kurire okukapita ye. Posiya eye ee ripura kutja Goliat omuṱiṱi pu Jehova. Matu rihongere ko tjike kehungi ndi? Tji tu nongamburiro kutja Jehova u ri puna eṱe matu rire ozombanḓe. Na wina tji tu nongamburiro kutja ovetupirukire ovaṱiṱi pu Mukuru Omunamasa. (2 Ekuruh. 20:15; Eps. 16:8) Matu kara vi nouvanḓe nai ngunda atu hiya muna ondatumisire?

13. Matu kara vi nouvanḓe? Kahurura.

¹³ Matu yenene okukara nouvanḓe nai indu tji matu zuvarisa ombuze ombwa yOuhona wa Mukuru. Ongwaye tji matu tja nao? Mena rokutja tji matu zuvarisa tu rihonga okukara nongamburiro mu Jehova nokutja atu ha tira ovandu. (Omiano 29:25) Tjimuna ozombwini zetu tji ze kara nomasa indu tji matu rikuturisa orutu, ouvanḓe wetu u kara nomasa indu tji matu zuvarisa okuza kondjuwo nondjuwo, momivanda vyotjihuro, tji tu he ri motjiungura tjokuzuvarisa, poo tji matu zuvarisa pozongetjefa. Tji twa kara nouvanḓe wokuzuvarisa nai, eṱe matu kayenda komurungu okuzuvarisa nandarire ohoromende tji ya tjaere oviungura vyetu.—1 Tes. 2:1, 2.

14-15. Matu rihongere ko tjike kotjihorera tja Nancy Yuen na Valentina Garnovskaya?

 ¹⁴ Matu rihongere ko ovingi kovihorera vyovakazendu 2 ovaṱakame mba raisa ouvanḓe wapeke. Nancy Yuen wa ri nousupi wozombaze 5, posiya eye kaa tira. * Eye wa panḓa okuisa okuzuvarisa ombuze ombwa ohunga nOuhona wa Mukuru. Kunao, eye wa paterwa motjovakamburwa oure wozombura zokombanda 20, moChina. Ovahonapare mbe mu pangura va tja, “eye wa ri omundu wotjiuru otjikukutu tjinene” mehi rawo!

¹⁵ Valentina Garnovskaya wa paterwa motjovakamburwa moRussia povikando 3 pekepeke oure wozombura ape 21. * Omena raye? Eye wa kayenda komurungu okuzuvarisa nga ovahonapare tji va tja: “Eye omutjite wouvi omunaumba.” Otjikwaye tji tja vatera ovakazendu 2 ovaṱakame mba kutja ve kare nouvanḓe? Owo va ri nongamburiro yokutja Jehova wa ri puna wo.

16. Ovikwaye mbi matu hepa kutja tu rire ozombanḓe?

¹⁶ Otja tji twa hungire rukuru, kutja tu kare nouvanḓe katu sokukambura momasa wetu oveni. Nungwari, matu sokukara nongamburiro yokutja Jehova u ri puna eṱe nu ongu me tu rwire. (Deut. 1:29, 30; Sak. 4:6) Imbyo ooviṋa mbi matu hepa kutja tu kare nouvanḓe uatjiri.

17-18. Otja ku Johanes 15:18-21, erakiza riṋe Jesus nde tupa? Kahurura.

¹⁷ Eṱe tu kara nondjoroka ovandu tji mave tu raisire ondengero, posiya katu sokumuna kutja tu nonḓengu yokehi indu ovandu tji ve hi nokutuvanga. Jesus wa tja: “Mamu rire ovaṋingandu ovandu tji mave mu tondo, ave ha ningi ehore na eṋe, ave mu yamburura nu ave mu kuminine ngamwa otjiṋa otjivi motjimbe tjOmuna wOmundu!” (Luk. 6:22) Hapo Jesus aa hee tjike?

¹⁸ Jesus ka hee kutja Ovakriste mave suvere okutondwa. Posiya, ee tu rakiza kutja mape tjitwa tjike kweṱe. Eṱe kaweṱe vouye mbwi. Tu ṱakamisa oviṋa Jesus mbya hongo mehupo retu nu tu zuvarisa ombuze eye ndjaa zuvarisa. Mena ranao, ouye we tu tonda. (Lesa Johanes  15:18-21.) Eṱe tu vanga okuyorokisa Jehova. Kunao katu rimunu kutja tu ri navi, ovandu tji ve tu tondo mena rokusuvera Tate wetu Jehova.

19. Matu horere vi kovihorera vyovaapostele?

¹⁹ O roro oyandjere oviṋa ovandu mbi mave hungire nokutjita okukuṱisa ohoṋi kutja oove umwe wOvahongonone va Jehova. (Mika 4:5) Indu tji matu ripurire koviṋa ovaapostele mbi va tjita moJerusalem kombunda onḓiro ya Jesus, ihi matji tu vatere okuhinokutira ovandu. Owo aave tjiwa kutja ovanane vozongamburiro zOvajuda ve ve tondere tjinene. (Oviung. 5:17, 18, 27, 28) Nandarire nao, owo eyuva arihe aave i kondjuwo ondjapuke ya Muhona, nu aave ritjiukisa oveni kutja ovahongewa va Jesus. (Oviung. 5:42) Owo kaave yandjere okutira ovandu ku ve tjaere. Eṱe wina matu yenene okutaara okutira ovandu indu tji twe ritjiukisa kutja oweṱe Ovahongonone va Jehova poviungura, poskole, poo momaturiro mu tu kara.—Oviung. 4:29; Rom. 1:16.

20. Ongwaye ovaapostele tji va ri nondjoroka nandarire kutja va tonderwe?

²⁰ Ongwaye ovaapostele tji va ri nondjoroka? Owo aave tjiwa kutja ongwaye tji va tonderwe, nu ya ri ondjingonekero ku wo okutjindwa navi mokutjita ombango ya Jehova. (Luk. 6:23; Oviung. 5:41) Omuapostele Petrus kombunda wa katjanga kutja, “nandarire kutja mamu hihamisirwa ousemba mbu mamu tjiti, tjiri, oweṋe ovaṋingandu!” (1 Petr. 2:19-21; 3:14) Indu tji twa zuu nawa kutja ovandu mave tu tondo mena rokutjita ousemba, eṱe kamaatu isa okukarera Jehova.

21-22. (a) Ove wa tye kutja motjitivi okurirongerisira ondatumisire? (b) Morupa ndu maru kongorere ko matu ka tara ku tjike?

²¹ Eṱe katu nokutjiwa kutja oruṋe indu ovandu tji mave utu okututatumisa poo ohoromende tji mai tjaere oviungura vyetu. Nungwari, eṱe matu tjiwa kutja matu yenene okurirongerisa nai okukurisa oupanga wetu kuna Jehova, okuririra ko ozombanḓe nokurihonga okutjinda okuhinokuvangwa i yovandu. Omarongerisiro ngu matu tjiti nai maye tu vatere kutja tu kayende komurungu okukarera Jehova moruyaveze.

²² Hapo tjike omerikotameneno wetu ku Jehova tji ya tjaerwa? Morupa ndu maru kongorere ko, matu katara komirari vyOmbeibela mbi ma vi tu vatere okukayenda komurungu okukarera Jehova, nandarire indu omerikotameneno wetu tji ya tjaerwa.