1. Ngatta mawag tu preparadu ittam ta kadara-darum?

TA GABI nige na patay ni Yafu Jesus, kinagina nga mekalussaw noka i ngamin nga maya mabbalin tu disipulosna. (Juan 17:14) Adde ta maddaggun, dara-daruman lagapa na mangokkontra ta fustu nga paddayaw i matalo ira nga Saksi ni Jehova. (2 Tim. 3:12) Durante nga aranni ngana nga manuppal i sistema na ganna-gannug, ekspektattam nga mas paga nga maggrabe i pangontra na kalabattam ira.​—Mat. 24:9.

2-3. (a) Ngatta delikadu i assing? (b) Anni i ikonsidera tam taw nga artikulo?

² Kunnasi tam iprepara i baggi tam sangawe tapenu marubang i panara-darum? Ari kawagan nga agga-nono tam i ngamin nga posible nga mesimmu nittam. Nu kuattam yatun, baka pakkafian ittam na assing anna vuru-vurung. Baka ipamavuluttam nga affutan ittam na marake ira nga gannug nige paga duttal i kurug nga kapurueba. (Prov. 12:25; 17:22) I anassing ay mafuersa nga armas nga usu-usan na “Demonio nga kontra” tam tapenu patulukan ittam. (1 Ped. 5:8, 9) Anni i makua tam sangawe tapenu nakaprepara ittam nga arubangan i panara-darum?

³ Taw nga artikulo, ikonsidera tam nu kunnasi tam paladdan i relasiottam kani Jehova anna nu ngatta importante nga kuattam ngana yatun sangawe. Gigiammuattam paga nu anni i kuattam tapenu makonnug tu gutu. Ta ultimuna, ammuattam nu anni i kuattam nu ikalussaw ittam na tolay.

4. Anni i kagian na Hebreo 13:5, 6 nittam anna ngatta kumbinsidu ittam nakuan tatun?

⁴ Kumbinsidu ka nakuan nga ayatan naka ni Jehova anna ariannaka vuluvuga nga pagurayan. (Bibbigan i Hebreo 13: 5, 6.) Piga dagun ngana i nappasa, kinagi na Passifusifutan: “I tolay nga feffermi nga makannammu ta Dios i mattalo noka nisa ta tiempo na kapurueba.” Talaga kurug yatun! Tapenu maattamman i panara-darum, mawag tu ayatattam si Jehova, buu i pattalo tam nisa, anna ari vuluvuga nga paddudan i ayana nittam.​—Mat. 22:36-38; Sant. 5:11.

5. Anni i makoffun nikaw tapenu matageno mu i aya ni Jehova?

⁵ Inaggaw nga bibbigan i Biblia anna igakkag nga mapeggan tu mas madukko nga relasion kani Jehova. (Sant. 4:8) Ta pabbibbig mu, maffokus ta meddu ira nga kualidad ni Jehova. Alippawatan nu kunnasi kadakal i ayana nikaw nu bibbigammu i gannug ira nga kakkagianna anna kukukuanna. (Ex. 34:6) Ari kumbinsidu i karuan nga ayatan ira na Dios megafu ta ariadda paga vuluvuga nga nakatageno tu aya na tanakuan. Nu kunnatun i matageno mu, puruebammu nga ilista i allo anna sippo nga nipasingan ni Jehova nikaw ta kada aggaw. (Sal. 78:38, 39; Roma 8:32) Durante nga pannonopammu tu mapia i mismu nga ekspiriensam anna i nabibbig mu ira ta Biblia, siguradu nga makalista ka tu aru nga gannug nga kingngua ni Jehova para nikaw. Kada maappresiam i kukukuan ni Jehova, mas maddukko i relasiommu nisa.​—Sal. 116:1, 2.

6. Segun ta Salmo 94:17-19, anni i meyuffun nikaw na napafutuan nga pakimallo?

⁶ Regular nga makimallo. Nonopan i tadday nga abbing nga lalaki nga agga-gakko na meddu nga yamana. Kampante i panageno na abbing yatutta makagina i ngamin ta yamana, makasta man onu marake nga gannug nga nesimmu nisa tatun nga aggaw. Awayyam gapa mapeggan tu kunnatun nga klase na relasion nu umaranni ka kani Jehova gukaban na napafutuan nga pappakimallo nisa kadaggaw. (Bibbigan i Salmo 94:17-19.) Durante nga makimallo ka kani Jehova, “ivuvvu mu i futum nga gitta na danum” anna ikagim ta meddu nga Yamam i ngamin nga mamaganassing anna mamavvurung nikaw. (Sila. 2:19) Anni i resulta natun? Matageno mu i kakkagian na Biblia nga ‘imammo na Dios nga ari malippawa na tolay.’ (Fil. 4:6, 7) Nu sanayammu i baggim nga makimallo tu kunnatun, mas maddukko ka kani Jehova.​—Roma 8:38, 39.

7. Ngatta mawag nga kumbinsidu ka nga matuppal noka i bendision ira na Pappatulan nga nepromesa na Dios?

⁷ Kumbinsidu ka nakuan nga matuppal noka i bendision ira na Pappatulan na Dios. (Num. 23:19) Nu makafi i pangurug mu tatun ira nga promesa, mas mabi naka laman nga ananassingan ni Satanas anna na aliporesna. (Prov. 24:10; Heb. 2:15) Kunnasim mapaladda i pangurug mu ta Pappatulan na Dios sangawe? Kuammu nga proyekto ta paggigiammu i pangusito ta promesa ira na Dios meyannung ta Pappatulanna anna i rason ira nu ngatta siguradu ka nga mesimmu danatun. Kunnasi makoffun yatun? Ikonsidera i ekspiriensa ni Stanley Jones, nga nefuku tu pitu ragun  megafu ta pangurugna. * Anni i nakoffun nisa nga sigga-matalo nga magattam? Kunna: “Masikan i pangurug ku megafu ta pakannammù ta pappatulan na Dios, kumbinsidu ngà tatun, anna kakku vuluvuga pinaddudan yatun, yatutta awan vuluvuga tu makafuersa nio nga panawan si Jehova.” Nu masikan i pangurug mu ta promesa ira na Dios, mas paga nga maddukko ka kani Jehova anna kammu vuluvuga mappaffu ta assing.​—Prov. 3:25, 26.

8. Anni i ipasingan na pagimamma tam ta pagatende ta study ira? Ipakanawag.

⁸ Regular nga magatende ta study ira. Uffunan ittam na study ira tapenu mas maddukko kani Jehova. I pagimamma tam ta pagatende ta study ira ay makasta nga aggukuran nu mawayya tam noka nga arubangan i panara-darum ta mappange. (Heb. 10:24, 25) Ngatta makagi tam yatun? Nu mappefugag ittam sangawe ta simple ira nga gannug ta pagatende ta study ira, kunnasi tamma ta mappange sonu mawag nga makipaggarammammung ittam ta wawwaragi ngem mappeligro i inango tam? Nu determinadu ittam sangawe nga magatende ta study ira, ari ittam noka nga mappefugag maski sonu ipeyemmang na mangokkontra ira i paggarammammung tam. Sangawe ngana i tiempo nga gigiammuattam nga tagibaloran i study tam ira. Nu kakayà tam nga makistudy, awan tu maski anni nga pangokkontra onu pangibawal na gobiernu i mamagimmang nittam nga tuppalan i Dios imbes tu tolay.​—King. 5:29.

9. Ngatta makasta nga preparasion ta panara-darum i pakkabisadu ta teksto ira?

⁹ Kabisaduan i paboritom ira nga teksto. (Mat. 13:52) Maski nu ari perfekto i memoriam, mawayya nga usan ni Jehova i makapangngua nga masanto nga espirituna tapenu meperaddam nikaw danatun nga teksto. (Juan 14:26) Kunnaw i kinagi na brother nga solo nga nefuku ta selda ta East Germany: “Kitessaya ngà gafu ta tatun nga tiempo, maturu tu 200 ngana nga teksto na Biblia i memoriadù! Maski nu magitetadday ngà, okupadu kanayun i nono ku gukaban na pannono ta aru nga topiko na Biblia.” Nakoffun danatun nga teksto ta brother tam tapenu mattalupaddian nga madukko kani Jehova anna matalo nga makapagattam.

10. Ngatta mawag tu kabisaduattam i kansiottam ira?

¹⁰ Kabisaduan anna kansionan i kansion ira ta paddayaw kani Jehova. Turi ta nefuku da Pablo anni Silas ta Filipos, nakkansion ira  tu memoriaduda nga espiritual ira nga kansion. (King. 16:25) Kunne na gapa, turi ta i wawwaragi tam ta dati nga Soviet Union ay netabbo ta Siberia, kunnasida pinagaram i kataggi-tadday? Neraddamman ni Sister Mariya Fedun: “Kinansiommi i ngamin nga kansion nga ammumi, i kansion ira ta songbook.” Niyistoriana nga danatun nga kansion i namagaram nira ngamin anna nanguffun nira nga matageno nga mas madukko ira kani Jehova. Mapatuyag ka kari kada kansionammu i paboritom ira nga kansion ta songbook anna ta website tam? Kabisaduammu ngana gafu sangawe danatun nga kansion!​—Innan i kahon nga “ Ennà Paggutukan.”

11-12. (a) Segun ta 1 Samuel 17:37, 45-47, ngatta magutu si David? (b) Anni i importante nga leksion nga magigiammu tam ta ehemplo ni David?

¹¹ Tapenu marubammu i panara-darum, mawag mu i gutu. Nu matageno mu nga makkurakka tu gutu, anni i makuam? Daddamman nga i kinagutu ay ari tu nakadepende ta kadakal mu, sikammu, onu abilidad mu. Ikonsidera i ehemplo na mabbing nga si David turi ta kinalabanna si Goliat. Kumpara tatun nga higante, si David ay mas baddi, mas makafi, anna ari tu konsu armas. Awan paga lagu tu espada ni David. Ngem fermi i gutuna. Magutu nga nilabanan ni David yatun nga opog nga higante.

¹² Ngatta kunnatun ngana laman kagutu si David? Dakal i pangurugna nga kavuluna si Jehova. (Bibbigan i 1 Samuel 17:37, 45-47.) Ari nga naffokus si David ta kadakal ni Goliat kumpara nisa, nu ari, nakafokus yayya ta kabaddi ni Goliat kumpara kani Jehova. Anni i magigiammu tam taw? Maggutu ittam nu komfiansa ittam nga kavulu tam si Jehova anna nu siguradu ittam nga mas balabaddi i kalabattam ira kumpara ta Makapangngua-sa-ngamin nga Dios tam. (2 Cro. 20:15; Sal. 16:8) Kunnasi ittam nga makonnug tu gutu sangawe pagalaman​—nige duttal i panara-darum?

13. Kunnasi ittam magunnug tu gutu? Iyesplika.

¹³ Makonnug ittam tu gutu sangawe nu ilayyagayya tam ta tanakuan i mapia nga dumug na Pappatulan na Dios. Ngatta? Megafu ta duffunan ittam na pallayyagayya nga mattalo kani Jehova anna ari maganassing ta totolay. (Prov. 29:25) Nu kunnasi nga massikan i baggi tam nu ma-ehersisio ittam, mas maggutu ittam nu mallayyagayya ittam ta bala-balay, ta publiko ira nga lugar, anna ta lugar na negosio. Nu magutu ittam ngana nga mallayyagayya sangawe, mas preparadu ittam  nga tulu-tuloy nga mallayyagayya noka sonu megamma ngana yatun.​—1 Tes. 2:1, 2.

14-15. Anni ira nga leksion i magigiammu tam kada Nancy Yuen anni Valentina Garnovskaya?

¹⁴ Aru i magigiammu tam ta ehemplo na dua nga matalo nga sister nga magutu-gutu. Mallima piye laman i katannang ni Nancy Yuen, ngem ari yayya nga mabi nga matantalaw. * Manakina nga iyemmang i pallayyagayya tu mapia nga dumug na Pappatulan na Dios. Megafu tatun, nefuku yayya tu maturu 20 dagun ta China. Kinagi na ofisiales nga naginteroga nisa nga yayya “i pinakamatagga i uluna nga tolay” ta nasiodda!

¹⁵ Namittallu gapa nga nefuku si Valentina Garnovskaya ta dati nga Soviet Union anna nu pakkirivuan i nikefukuna ay ma-21 dagun. * Ngatta? Kuruga determinadu yayya nga ari magimmang nga mallayyagayya, adde ta punto nga inagalan yayya na ofisiales nga “kuruga peligroso nga kriminal.” Ngatta kitaggutu yaw nga dua nga matalo nga babbay? Kumbinsidu ira nga kavuluda si Jehova.

16. Anni i sekreto na kurug nga gutu?

¹⁶ Gitta na nagigiammu tam, tapenu makonnug tu gutu, mawag tu ariattam mattalo ta kalalakian anna ta abilidad tam ira. Lallagu, mawag tu mangurug ittam nga kavulu tam si Jehova anna yayya i makillaban para nittam. (Deut. 1:29, 30; Zac. 4:6) Yatun i sekreto na kurug nga gutu.

17-18. Segun ta Juan 15:18-21, anni i niyabiso ni Jesus nittam? Ipakanawag.

¹⁷ Kayà tam tu irespeto ittam na totolay, ngem ariattam nakuan nonopan nga awan tu serbi tam nu ikalussoda ittam. Kinagi ni Jesus: “Mapalag kamu nu ikalussaw dakamu, pappana-panakitad-dakamu, pasa-pasiranad-dakamu megafu ta tumuttul kamu ta Ana na Tolay!” (Luc. 6:22) Anni i kayà kagian ni Jesus?

¹⁸ Ari kayà kagian ni Jesus nga guggustu na Cristiano ira nga mekalussaw. Abisowanna ittam laman nu anni i mesimmu nittam. Ari  ittam nga parte na mundo. Mattolay ittam segun ta tuttuddu ni Jesus anna ilayyagayya tam i mensahe nga nilayyagayyana. Megafu tatun, ikala-kalussaw ittam na mundo. (Bibbigan i Juan 15:18-21.) Kayà tam nga mapagayayya si Jehova. Nu ikalussaw ittam na totolay megafu ta ayatattam i Yama tam, problemada ngana yatun.

19. Kunnasi tam maparigan i ehemplo na apostoles?

¹⁹ Ariammu vuluvuga ipasiran nga Saksi ka ni Jehova megafu laman ta kagian onu kuan na tolay. (Mik. 4:5) Malabanattam i assing ta tolay nu ikonsidera tam i ehemplo nga nipasingan na apostoles ta Jerusalem ari nabbayag kabalin na patay ni Jesus. Ammuda nga ikala-kalussaw ira na Judio ira nga relihioso nga lider. (King. 5:17, 18, 27, 28) Ngem, kadaggaw ariadda lagapa nagimmang ta paggangay ta templo anna ipakilala ta tanakuan nga disipulos ira ni Jesus. (King. 5:42) Ariadda nipamavulun nga pagimmangan ira na assing. Maffu tam gapa i assittam ta tolay nu kanayuttam nga ipakilala ta tanakuan nga Saksi ni Jehova ittam—ta trabahu, ta eskuela, anna ta lugar tam.​—King. 4:29; Roma 1:16.

20. Ngatta magayayya i apostoles maski nu mekalussaw ira?

²⁰ Ngatta magayayya i apostoles? Ammuda gare nu ngatta mekalussaw ira, anna nikwentada nga pribilehio i ari katratu tu makasta megafu ta pangnguada ta uray ni Jehova. (Luc. 6:23; King. 5:41) Nitura ni apostol Pedro: “Maski nu mazziga-riga kamu ta pangngua tu mapia, magayayya kamu.” (1 Ped. 2:19-21; 3:14, NW ) Nu ammu tam nga mekalussaw ittam megafu ta pangngua tu fustu, ariattam vuluvuga nga ipamavulun nga mapagimmang ittam na assing ta totolay ta passerbi kani Jehova.

21-22. (a) Anni i planom nga kuan tapenu makapapprepara ta panara-darum? (b) Anni i ikonsidera tam ta tumunug nga artikulo?

²¹ Ariattam ammu nu sonu anni duttal i pamegafu na panara-darum nittam na totolay onu sonu anni nga igamma na gobiernu i trabahu tam. Ngem, ammu tam nga makapapprepara ittam ngana sangawe gukaban na pamaladda ta relasiottam kani Jehova, pagunnug tu gutu, anna i pakannammu ta kuattam nu ikalussaw ittam na totolay. Makoffun i preparasion ira nga kukukuattam ta maddaggun tapenu ariattam magimmang ta passerbi kani Jehova ta mappange.

²² Ngem anni i kuattam sonu megamma i paddayaw tam? Ta tumunug nga artikulo, gigiammuattam i prinsipio ira nga makoffun nittam tapenu ari magimmang ta passerbi kani Jehova maski ta tiempo na pangigamma.