1. Ɔdiya nɛ ó cɛgbá ku alɔ tutu lɛyikwu owe amāŋ o ya ŋmo a?

OTU gbɔbu ɛɛ kéē ŋmo Ondu alɔ Ujisɔsi a, ó ka ka ācɛ géē wɔtu ɛjɛɛji ācɛ nōo géē dɔka ō wɛ ayikpo ku nu a. (Ujɔ́n. 17:14) Ŋmiifi eko ɔɔma jaa kwu icɛ, ācɛ nɛ ó gē gba Ujehofa ɛ̄gbā ŋ ma humayi miya ācɛ ō gba Ujehofa ɛ̄gbā owe nɛhi. (2 Utím. 3:12) Abɔ oŋmɛyi ku ɛcɛ obɔbi nyā kē yɔ i ba a, alɔ leyice ka aolɛla ku alɔ géē miyɛ alɔ owe nɛhi fiyɛ.—Umát. 24:9.

2-3. (a) Ɔdi nɛ alɔ cika ō jé lɛyikwu ufi a? (b) Ɔdi nɛ alɔ géē nwu ipu ikpɛyi ɛlā nyā a?

² Ɔdi nɛ alɔ cika ō ya babanya, o ya ɛɛ ku alɔ tutu ō lɔtu owe amāŋ o ya ŋmo a? Ó cɛgbá ku alɔ yaajɛ yɔ i ceyitikwu ō gbɛla lɛyikwu ɛjɛɛji aɔdobɔbi nōo lɔfu ya alɔ a ŋ. Ohigbu ka ɔdaŋ ku alɔ gē ya lɛ a, alɔ lɔfu gbɔɔ ō lɛ ɔtu ō plico klla gbɔɔ ō yuufi nɛɛnɛhi, nōo géē ya ku alɔ habɔ ɛ̄gbā ō gba ku Ujehofa ta gbɔbu ɛɛ ku owe amāŋ o ya ŋmo abɔyi nu a kóō gā. (Aíit. 12:25; 17:22) Ufi wɛ iyɛfu nɛhi nɛ “olɛlā” ku alɔ nōo wɛ “Ebilíi” gē bi le nuunu ta alɔ. (1 Upít. 5:8, 9) Ɔdi nɛ alɔ cika ō ya babanya, o ya ɛɛ ku alɔ tutu ō lɔtu owe amāŋ o ya ŋmo a?

³ Ipu ikpɛyi ɛlā nyā, alɔ géē nwu ɔdā nɛ alɔ cika ō ya ku ɛma ku alɔ mla Ujehofa kóō lɔfu mla ɔdā nōo ya ɛɛ nɛ ó cɛgbá ku alɔ ya ku ɛma a kóō lɔfu babanya. Alɔ klla géē kɛla lɛyikwu ɔdā nɛ alɔ lɔfu ya ku alɔ lɛ ɔtu tōōtɔ̄ɔ̄. Amoomɛ a, alɔ géē leyi yɛ aɔdā nɛ alɔ cika ō ya, ɔdaŋ ka ācɛ gbɔɔ ō wɔtu alɔ.

4. Ɔdi nɛ ɔkpá ku Ācɛ Uhíbru 13:5, 6 ka alɔ kpɔtuce ɔ a, ɔdiya nɛ ɔɔma kē cɛgbá a?

⁴ Kpɔtuce ka Ujehofa yihɔtu uwɔ nɛhi ka ó klla gáā cigbihi kwu uwɔ gboogboo ŋ. (Jé Ācɛ Uhíbru 13:5, 6.) Ɔda Ō Gbaajɛ ku Ɔya  Ɔmɛhili ku ihayi ku 1963 ka kahinii: “Ɔcɛ nōo jé Ɔwɔico lɔɔlɔhi géē lɛ ɔtuce ɔ nɛɛnɛhi eko duuma néē gbɔɔ ō miya ɔ owe.” Ɛla ɔɔma kē wɛ ɔkwɛyi! Ɔdaŋ ku alɔ dɔka ō lɔtu ipu owe amāŋ o ya ŋmo, alɔ cika ō yihɔtu ku Ujehofa klla lɛ ɔtuce ɔ nɛhi. Alɔ kóō hii taafu ka a jé ŋ, Ujehofa i yihɔtu alɔ ŋ.—Umát. 22:36-38; Ujɛ́m. 5:11.

5. Ɔdi gáā ta uwɔ abɔ ku a má ɛgɛ nɛ Ujehofa yihɔtu uwɔ lɛ a?

⁵ Bēē jé Ubáyíbu ɛ̄cī doodu o ya ɛɛ ku ɛma ku uwɔ mla Ujehofa kóō lɔfu fiyɛ. (Ujɛ́m. 4:8) Ɔdaŋ ku a yɔ i jé Ubáyíbu, bēē lɔtu ku uwɔ kwu uce ō lɔhi ku Ujehofa, bɛɛka ihɔtu, eyinyinyi mla ogbonɛnɛ. Ceyitikwu ku a má ɛgɛ nɛ ó yihɔtu uwɔ lɛ, ɔdaŋ ka gē jé aɛlā nɛ ó ka mla aɔdā nɛ ó ya a. (Oyɛb. 34:6) Ó gē tɔɔtɛ lɛ ācɛ ōhī ō kpɔtuce ka Ɔwɔico yihɔtu uwa ŋ, ohigbu ka ɔcɛ duuma i mafu ihɔtu lɛ uwa jejee ɛ ŋ. Ɔdaŋ ka ó gē ya uwɔ lɛ a, ceyitikwu ɛ̄cī doodu ku a bēē ta ɔwɛ ɛyɛɛyɛyi nɛ Ujehofa gē meyinyinyi gā uwɔ a taajɛ mla ɛgɛ nɛ ó gbonɛnɛ gā uwɔ lɛ a. (Aíjē 78:38, 39; Uróm 8:32) Ó géē tɔɔtɛ gā uwɔ ō ta ɔdā alɛwa nɛ Ujehofa ya gā uwɔ ɛ ma taajɛ, ɔdaŋ ka gbɛla lɛyikwu aɔdā nɛ a yɔ i má ipu oyeeyi ku uwɔ mla aɛlā nɛ a gē jé ŋma ipu Ubáyíbu a. Ɛma ku uwɔ mla Ujehofa géē lɔfu fiyɛ, ɔdaŋ ka ɛjɛɛji ɔdā nɛ Ujehofa ya gā uwɔ a jɛ uwɔ eyī nɛhi.—Aíjē 116:1, 2.

6. Oŋma ɛlā nōo yɔ Aíjē Kú Ɛ̄gbā 94:17-19 a, itene nyá nɛ a géē lɛ ɔdaŋ ku a gē gbɔɔkɔ ŋma ɔtu a?

⁶ Bēē gbɔɔkɔ eko doodu. Gbɛla tu ɛlā nyā ka a, ɔdaŋ ka adā nōo yihɔtu ɔyi nu lɛ ɔyi nu nɔnyilɔ nɛ̄ŋcɛ́ kwu bɔtu, ɔyi a géē yuufi ō da adā nu lɛyikwu aɔdā olɔhi mɛmla aɔdobɔbi nɛ ó má ɛ̄cī ɔɔma nɛɛ? Ehee, ɔyi a i gáā yuufi ŋ. A lɔfu lɛ ɛdɔ ɛma ɛgɔɔma mla Ujehofa ɔdaŋ ku a gē tubla ɔ ajaajɛ ipu ɔkɔ ō gba lɛ ɔ ŋma ɔtu ku uwɔ ɛ̄cī doodu. (Jé Aíjē Kú Ɛ̄gbā 94:17-19.) Ujehofa wɛ Adā nōo yihɔtu uwɔ nɛhi, ohigbu ɛnyā a, ɔdaŋ ku a gē gbɔɔkɔ, “lɛ ɔtū kú uwɔ piya klá ɛcɛ” lɛ ɔ, da ɔ lɛyikwu ɛjɛɛji ɔdā nōo gē ta uwɔ ufi mla aɔdā nōo gē lɛ ɔtu ku uwɔ plico a. (Ikwū 2:19) Itene nyá nɛ a gáā lɛ ɔdaŋ ku a gē ya lɛ a? Éyi ku nu wɛ ka Ujehofa géē je “ɛbɔ́ kú nū nōó tōō jɛ́ɛyí nū ŋ́ mā” gā uwɔ. (Ufíl. 4:6, 7) Ɔhá ku nu wɛ ka abɔ a gē gbɔɔkɔ lɛ Ujehofa ɔwɛ ɛgɛnyā tōōtɔ̄ɔ̄ a, ɛgɔɔma nɛ a gáā bēē tubla ɔ ajaajɛ fiyɛ a.—Uróm 8:38, 39.

7. Ɔdiya nɛ a cika ō kpɔtuce lɔfu lɔfu ka aokonu ō ce ku Ɔwɔico lɛyikwu Ajɔɔcɛ ku nu géē ya jila a?

⁷ Lɛ ɔtu okpoce ka Ujehofa géē ya ɛjɛɛji ɔdā nɛ ó cokonu lɛyikwu Ajɔɔcɛ ku nu a. (Áluk. 23:19) Ó géē tɔɔtɛ lɛ Ebilii mɛmla ayikpo ku nu kéē tu uwɔ ufi, ɔdaŋ ku á kpɔtuce ka aokono ō ce ku Ɔwɔico géē ya jila ŋ. (Aíit. 24:10; Uhíb. 2:15) Ɔdi nɛ a cika ō ya babanya o ya ɛɛ ku a kpɔtuce Ajɔɔcɛ ku Ɔwɔico lɔfu lɔfu a? Lɛ eko taajɛ lɔɔlɔhi ku a bēē leyi yɛ aokonu ō ce ku Ɔwɔico lɛyikwu Ajɔɔcɛ ku nu mla aɔdā nōo ya nɛ a cika ō kpɔtuce kéē géē ya jila a. Ɛgɛnyá nɛ ɛnyā gáā ta uwɔ abɔ a? Leyi yɛ ocabɔ mafu ka ɔyinɛ alɔ nɔnyilɔ Stanley Jones. É lɛ ɔyinɛ alɔ nɔnyilɔ nyā ta inu agba ihayi ahaapa  ohigbu ɔtu okpoce ku nu. * Ɔdi ta ɔ abɔ kóō lɔtu a? Ó kahinii: “Ɔtu okpoce ku um lɔfu ohigbu ku um jé lɛyikwu Ajɔɔcɛ ku Ɔwɔico a, n klla jé aɔdā nɛ Ajɔɔcɛ a géē ya a. N lɛ aafu ipu ɔtu ku um lɛyikwu Ajɔɔcɛ a ŋ. Ohigbu ɛnyā a, ɔcɛ duuma i lɔfu ya ka n ma Ujehofa ta gla ŋ.” Ɔdaŋ ku a kpɔtuce aokonu ō ce ku Ɔwɔico, ó géē ya ku a tubla ɔ ajaajɛ, ó klla géē ya ku a hii cɛ lɛ ufi kóō ci uwɔ ŋma ō gba Ujehofa ɛ̄gbā ŋ.—Aíit. 3:25, 26.

8. Ɛgɛ nɛ alɔ gē gā ōjila ku Ujɔ a géē mafu ɔdi? Lɛ ɛlā a teyi peee.

⁸ Bēē gā ōjila ku ujɔ eko doodu. Ō gā ōjila ku ujɔ gē ta alɔ abɔ ku alɔ tubla Ujehofa ajaajɛ. Ɛgɛ nɛ alɔ gē gā ōjila ku ujɔ géē mafu ɛgɛ nɛ alɔ géē lɔtu eko néē gbɔɔ ō miya alɔ owe ɛcɔbu. (Uhíb. 10:24, 25) Ɔdiya nɛ alɔ ka lɛ a? Ɔdaŋ ku alɔ gē cɛ ku odee ligii kóō ci alɔ ŋma ō gā ōjila ku ujɔ babanya, ɛgɛnyá nɛ alɔ gáā ya lɛ ɛcɔbu, ɔdaŋ ka ō nyɔ i jila mla ayinɛ alɔ géē cɛgbá ku alɔ lɛ oyeeyi ku alɔ kwu ikwū ajaajɛ a? Amáŋ, ɔdaŋ ku alɔ lɛ ɔtu ku alɔ ya ekponu ō bēē gā ōjila ku ujɔ, ɔdā duuma i gáā ci alɔ ō nyɔ ŋ, eko duuma nɛ aolɛla gbɔɔ ō ceyitikwu kéē ci alɔ ŋma ōjila tɔha. Babanya foofonu nɛ alɔ lɛ, ō ya ku ō gā ōjila ku ujɔ kóō he alɔ ɔtu a. Ɔdaŋ ka ō gā ōjila ku ujɔ gē he alɔ ɔtu, ó lɛ owe duuma nɛ alɔ géē má, amāŋ íne duuma nɛ igɔmɛnti le kwajɛ nōo géē ci alɔ gla ŋ. Alɔ géē yɔ i po ɛlā ku Ɔwɔico fiyɛ aku alɛɛcɛ.—Ācot. 5:29.

9. Ɔdiya nōo jé aɛga ku Ubáyíbu tu ɛyi wɛ ɔwɛ olɔhi ō tutu lɛyikwu owe amāŋ o ya ŋmo a?

⁹ Bēē jé ɛga ku Ubáyíbu ɛyɛɛyɛyi nōo he uwɔ ɔtu a tu ɛyi. (Umát. 13:52) A lɔfu mlanyi odee fiya, ohigbu ku alɔ wɛ ācɛ nōó jila iyē ŋ, amáŋ Ujehofa lɔfu bi alelekwu ihɔ ku nu le ta alɔ abɔ ku alɔ blakwu aɛga ku Ubáyíbu nɛ alɔ jé tu ɛyi a. (Ujɔ́n. 14:26) Ɔyinɛ alɔ nɔnyilɔ éyi néē je ta inu éyi foofunu ipu inu agba nōo yɔ East Germany a kahinii: “N gweeye nɛhi ohigbu ka um lɛ ɛga ku Ubáyíbu alɛwa jé tu ɛyi gbɔbu ɛɛ néē je um ta inu agba ā! Naana nɛ um yɔ foofu um a, eko duuma n gē gbɛla tu aɛlā ɛyɛɛyɛyi nɛ Ubáyíbu gē nwu a.” Aɛga ku Ubáyíbu nɛ ɔyinɛ alɔ nɔnyilɔ ɔɔma jé tu ɛyi a ta ɔ abɔ kóō yɔ kwu Ujehofa ajaajɛ, ó klla ta ɔ abɔ kóō lɔtu.

10. Ɔdiya nɛ alɔ cika ō jé aijé ku alɔ tu ɛyi a?

¹⁰ Bēē gwo aijé nɛ alɔ gē bi le cɛtra Ujehofa ku a klla jé uwa tu ɛyi. Eko néē lɛ Upɔlu mla Usayilasi ta inu agba ipu Ufilipayi a, é gbɔɔ ō gwo aijé néē i bi le cɛtra Ɔwɔico néē jé tu ɛyi a. (Ācot. 16:25) Ɔdā ekponu ɔɔma nɛ ayinɛ alɔ ya eko néē nu uwa ŋma ipu éwo néē tɛtɛ gē hi ka Soviet Union a gā Siberia a.  Ɛgɛnyá néē ta iyi uwa ɔtu kwu ɔtu a? Ɔyinɛ alɔ nɔnya Mariya Fedun kahinii: “Alɔ gwo ɛjɛɛji ijé nɛ alɔ jé a, aijé nōo yɔ ɔkpá ijé ku alɔ a.” Ó ka aijé a ta ɛjɛɛji uwa ɔtu kwu ɔtu klla ta uwa abɔ kéē tubla Ujehofa ajaajɛ fiyɛ. A gē lɔfu iyē eko duuma nɛ a gē gwiije ku alɔ duuma nōo he uwɔ ɔtu fiyɛ duu a? Ó lɛ a, ceyitikwu ku a jé ō gwo uwa tu ɛyi babanya!—Má ikpati nōo kahinii “ Ya Ku Um Lɛ Ɔtu.”

11-12. (a) Oŋma ɛlā nɛ alɔ jé ŋma ipu ɔkpá ku 1 Usámuwɛ̄lu 17:37, 45-47 a, ɔdiya nɛ Udefidi lɛ ɔtu a? (b) Ɔdā ō cɛgbá nɛhi nyá nɛ alɔ nwu ŋma ocabɔ ku Udefidi a?

¹¹ Ɛjɛɛji alɔ cɛgbá ɔtu ō lɛ, o ya ɛɛ ku alɔ lɔtu ipu owe amāŋ o ya ŋmo. Amáŋ, ɔdi nɛ a cika ō ya ɔdaŋ ku a má ku a wɛ ɔcɛ ō lɛ ɔtu ŋ? A hii mlanyi ŋ, ɔcɛ i gē lɛ ɔtu ohigbu ɛgɛ nɛ ó nyinyi, ɛgɛ nɛ ó jɔkwu lɛ, ɛgɛ nɛ ó lɛ ɔfu amāŋ ohigbu ɔdā nɛ ó jé ō ya a nóó. Alɔ má ɔkwɛyi ku ɛlā ɔɔma ipu ɔ̄kā ku Udefidi eko nɛ ó dɔka ō nuunu ta Ugoliyati a. Ɔdaŋ ku a lɛ Ugoliyati miya mla Udefidi, a géē má ka Ugoliyati wɛ agwu nɛhi, amáŋ Udefidi a kē lɛ ligii, ó lɛ ɔfu iyē ŋ, ó kóō bi ɔkpacaŋgeli duuma amāŋ ɔdā ɔlamu duuma ō bi le nuunu ta Ugoliyati ŋ. Amáŋ, Udefidi lɛ ɔtu nɛhi. Ɔtu nɛ Udefidi lɛ a cɛ lɛ ɔ kóō kwinya gáā nuunu ta agwu nɛhi ɔɔma a.

¹² Ɔdiya nɛ Udefidi lɛ ɔtu nɛhi a? Ó lɛ ɔtu ohigbu ka ó kpɔtuce ka Ujehofa yɔ mla anu. (Jé 1 Usámuwɛ̄lu 17:37, 45-47.) Udefidi i lɛ ɔtu ku nu kwu ɛgɛ nɛ Ugoliyati nwune fiyɛ ɔ a ŋ. Amáŋ ó lɛ ɔtu ku nu kwu ɛgɛ nɛ Ugoliyati lɛ ligii ɛgiyi Ujehofa a. Ɔdi nɛ alɔ nwu ŋma ɔ̄kā nyā a? Alɔ géē lɛ ɔtu ɔdaŋ ku alɔ kpɔtuce ku Ujehofa yɔ mla alɔ. Alɔ klla géē lɛ ɔtu ɔdaŋ ku alɔ jé kpɔcii ku aolɛla ku alɔ lɛ ligii ɛgiyi Ɔwɔico nōo lɔfu fiyɛ duu a. (2 Úklɔ́ 20:15; Aíjē 16:8) Ɛgɛnyá nɛ alɔ géē ya ku alɔ lɛ ɔtu babanya gbɔbu ɛɛ ku owe amāŋ o ya ŋmo kóō wa a?

13. Ɔdi nɛ alɔ géē ya ku alɔ lɛ ɔtu babanya a? Je ocabɔ mafu éyi.

¹³ Alɔ lɔfu ya ku alɔ lɛ ɔtu babanya ŋma lɛ ō yɔ i tɔɔna ɔkoolɔhi lɛyikwu Ajɔɔcɛ ku Ɔwɔico a lɛ ācɛ ɔhá. Ɔdiya nɛ alɔ ka lɛ a? Ohigbu ka ɔna ō ta gē nwu alɔ ɛgɛ nɛ alɔ géē lɛ ɔtuce Ujehofa mla ɛgɛ nɛ alɔ i gáā yuufi ācɛ ŋ. (Aíit. 29:25) Ɛgɛ nɛ ikpokwu ku ɔcɛ gē lɔfu eko duuma nɛ ó gē na iyē daa a, ɛgɔɔma nɛ ɔtu ō lɛ ku alɔ géē lɔfu duu a, eko duuma nɛ alɔ gē tɔɔna ŋma ɔlɛ gā ɔlɛ, ɛga nɛ ɛwa gē ba, eko nɛ alɔ i yɔ i tɔɔna ŋ mɛmla ɛga nɛ ācɛ gē tɔhi a. Ɔdaŋ ku alɔ gē ya ku alɔ lɛ ɔtu nōo géē cɛ lɛ alɔ tɔɔna babanya, ó géē ta alɔ abɔ ku alɔ le tutu ō yɔ i tɔɔna kpɔ, ɔdaŋ ku aigɔmɛnti kóō lɛ uklɔ ku alɔ ci.—1 Utɛs. 2:1, 2.

14-15. Ɔdi nɛ alɔ nwu ŋma ɔ̄kā ku Nancy Yuen mla Valentina Garnovskaya a?

 ¹⁴ Alɔ lɔfu nwu ɔdā alɛwa ŋma ɛgiyi ayinɛ alɔ nɔnya ɛpa nōo mafu ka é lɛ ɔtu nɛhi. Éyi ku uwa wɛ Nancy Yuen. Ɔyinɛ alɔ nɔnya nyā i jɛ lɛ a ŋ, ō jɛ ku nu lɛbɛɛka ikpo ɛhɔ a, amáŋ odee i gē ta ɔ ufi fiyɛ a ŋ. * Ó ta ku anuɔ i gáā lɛ abɔ ci uklɔ ku ɔna ō ta a ŋ. Ohigbu ɛnyā a, é kwu ɔ u ta inu agba ipu China. Ó yɔ inu agba a fiyɛ ihayi ofu. Aalagba nōo gē da ɔ ɔka a ka ku ɔyinɛ alɔ nyā “wɛ ɔcɛ ō ya ikpɛyi olɔfu fiyɛ duu” ipu éwo ku uwa a!

¹⁵ Valentina Garnovskaya wɛ ɔyinɛ alɔ nɔnya ɔhá néē je ta inu agba ipu Russia igbo ɛta. Ɔdaŋ ka lɛ ɛjɛɛji ihayi néē lɛ ɔ ta inu agba a gbaluka, ó géē lɛbɛɛka ihayi ofu ce eyi (21) a. * Ɔdiya néē je ɔ ta inu agba a? Ohigbu ka ó lɛ ɔtu ku nu ya ekpo lɔfu lɔfu ka anuɔ géē yɔ i tɔɔna. Ó tɔɔna jaa gbeeko nɛ ācɛ ō yuklɔ lɛ aIgɔmɛnti gbɔɔ ō hi ɔ ka “ɔcɛ ō ya ɔdobɔbi nɛhi.” Ɔdiya nɛ ɔyinɛ alɔ nɔnya ɛpa nyā lɛ ɔtu nɛhi a? É lɛ ɔtu nɛhi ohigbu kē kpɔtuce ka Ujehofa ɔɔ yɔ mla uwa.

16. Ɔdi nɛ alɔ cika ō ya ɔdaŋ ku alɔ dɔka ō lɛ ɔtu ɔkwɔɔkwɛyi a?

¹⁶ Oŋma ɛlā nɛ alɔ humayi ka a, alɔ le má ka ɔdaŋ ku alɔ dɔka ō lɛ ɔtu, alɔ i cika ō kpɔtuce ɔfu ku abɔyi alɔ ŋ. Ó lɛ a, ɔdi nɛ alɔ cika ō ya, o ya ɛɛ ku alɔ lɛ ɔtu ɔkwɔɔkwɛyi a? Alɔ cika ō kpɔtuce ku Ujehofa yɔ mla alɔ, ku anu klla i nuunu lɛ alɔ a.—Obla. 1:29, 30; Usak. 4:6.

17-18. Ɛdɔ ahɔ̄ ō pi nyá nɛ Ujisɔsi pi alɔ ipu ɔkpá ku Ujɔ́ni 15:18-21 a? Lɛ ɛlā a teyi peee.

¹⁷ Ó gē he ɛjɛɛji alɔ ɔtu eko duuma nɛ ācɛ ɔhá lɛ ojilima ce alɔ, amáŋ, ɔdaŋ ka ācɛ i dɔka alɔ ŋ, alɔ kóō hii gbɛla ku alɔ i tiile ŋ. Ujisɔsi kahinii: “Eko nɛ̄ ācɛ ī wɔ́tū aá, klla í tá ɛlā kú aá, gē cá aá ɛcá, gē ŋmó aá okónu ka aá wɛ ācɛ oyá ɔdōōbɔ̄bí, ohígbū ka aá gē tá ami, Ɔyínɔ̄nyīlɔ kú Ɔ̄cɛ ɔkwu ā, ákú aá lɔhi.” (Ulúk. 6:22) Ɔdi wɛ ɛyi ɛlā ku Ujisɔsi nyā a?

¹⁸ Ujisɔsi i yɔ i ka ka ācɛ nōo gē yɛce ɔ a géē dɔka nu ɔdaŋ ka ācɛ gē wɔtu uwa nóó. Amáŋ, ó yɔ i pi alɔ ahɔ̄ lɛyikwu ɔdā nōo géē ya alɔ a. Alɔ i wɛ ācɛ ku ɛcɛ nyā ŋ. Alɔ gē bi aɛlā nɛ  Ujisɔsi nwu a le yuklɔ ipu oyeeyi ku alɔ, alɔ klla gē tɔɔna ɛdɔ olɛhɔ nɛ Ujisɔsi tɔɔna a duu. Aɔdā nōo ba nyā ya ɛɛ nɛ ācɛ ku ɛcɛ gē wɔtu alɔ á. (Jé Ujɔ́ni 15:18-21.) Alɔ dɔka ō ya ɔdā nōo géē he Ujehofa ɔtu. Amáŋ, ɔdaŋ ku ācɛ gē wɔtu alɔ ohigbu ku alɔ yihɔtu ku Ujehofa, ɔɔma wɛ ɛlā uwa, ó wɛ ɛlā ku alɔ fluflu ŋ.

19. Ɛgɛnyá nɛ alɔ gáā gbla acocɛhɔ ku Ujisɔsi ya a?

¹⁹ A hii cɛ ku ɛlā nɛ ācɛ gē ka, amāŋ ɛdɔ ɔdā néē i ya a kóō ya ku a gbɔɔ ō ya uweyi ō cɛ ka wɛ Ɔcɛ Ocijali Ku Ujehofa ŋ. (Umáy. 4:5) Alɔ lɔfu nwu ɛgɛ nɛ alɔ i gáā bēē yuufi alɛɛcɛ ŋ, ɔdaŋ ku alɔ gbɛla lɛyikwu ɔdā nɛ acocɛhɔ nōo yɔ Ujerusalɛm a ya, boobu néē ŋmo Ujisɔsi a. Acocɛhɔ ku Ujisɔsi eko ɔɔma a jé ɛgɛ nɛ aotrɛyi ku ācɛ Ujiyu gē wɔtu uwa lɛ a. (Ācot. 5:17, 18, 27, 28) Naana a, ɛ̄cī doodu é gē gā agbliihɔ nɛhi a klla gē ma iyi uwa fu kéē wɛ ayikpo ku Ujisɔsi, ohigbu kē gē tɔɔna duu. (Ācot. 5:42) É cɛ lɛ ufi kóō ya kéē lɛ abɔ ci uklɔ a ŋ. Alɔ icɛ bɛ? Alɔ i gáā bēē yuufi alɛɛcɛ ŋ, ɔdaŋ ku alɔ gē cɛ lɛ ācɛ jé ku alɔ wɛ Ācɛ Ocijali Ku Ujehofa, kwu ācɛ nɛ alɔ gē yuklɔ mla uwa, ayipɛ inɔkpa ku alɔ mɛmla aoladogbe ku alɔ.—Ācot. 4:29; Uróm 1:16.

20. Ɔdiya nɛ acocɛhɔ ku Ujisɔsi gweeye naana nɛ ācɛ gē wɔtu uwa a?

²⁰ Ɔdiya nɛ acocɛhɔ a gweeye, naana nɛ ācɛ gē wɔtu uwa a? É gweeye ohigbu ka é jé ɔdā nōo ya ɛɛ nɛ ācɛ yɔ i wɔtu uwa a, é klla má ɔ ka ó wɛ ɔdā ojilima kéē miya uwa owe ohigbu ka é yɔ i ya ɔdā nɛ Ujehofa tine a. (Ulúk 6:23; Ācot. 5:41) Igbihaajɛ a, Upɔlu nōo wɛ ɔcocɛhɔ ku Ujisɔsi kahinii: “Ɔ́dāŋ́ ka aá kōō móowe ohígbū ɔdā olɔhi nɛ̄ aá yá ā, ákú aá le lɔhi ɛɛ́.” (1 Upít. 2:19-21; 3:14) Alɔ i gáā habɔ ō gba Ujehofa ɛ̄gbā ohigbu ka ācɛ gē wɔtu alɔ ŋ.

21-22. (a) Ɔdi nɛ a miya ō ya babanya o ya ɛɛ ku a tutu lɛyikwu owe amāŋ o ya ŋmo a? (b) Ɔdi nɛ alɔ géē kɛla lɛyikwu ɔ ipu ikpɛyi ɛlā nōo gboce ɛnyā a?

²¹ Alɔ i jé eko nɛ ācɛ géē gbɔɔ ō miya alɔ owe amāŋ eko nɛ aIgɔmɛnti géē je uklɔ ku alɔ ci a ŋ. Amáŋ, alɔ jé ku alɔ géē tutu babanya ŋma lɛ ō yɔ i ya ku ɛma ku alɔ mla Ujehofa kóō lɔfu, ō yɔ i ya ku alɔ lɛ ɔtu tōōtɔ̄ɔ̄, mɛmla ō yɔ i nwu ɛgɛ nɛ alɔ géē lɔtu ɔdaŋ ka ācɛ gē wɔtu alɔ. Otutu duuma nɛ alɔ ya babanya géē ta alɔ abɔ ku alɔ kóō yɔ i gba Ujehofa ɛ̄gbā ɛcɔbu.

²² Amáŋ, ɔdaŋ ka é gáā lɛ uklɔ ku alɔ ci bɛ? Ipu ikpɛyi ɛlā nōo gboce ɛnyā a, alɔ géē kɛla lɛyikwu aukɔ́ ku Ubáyíbu nōo géē ta alɔ abɔ ku alɔ kóō yɔ i gba Ujehofa ɛ̄gbā eko néē lɛ uklɔ ku alɔ ci.