1. Ịye tị́ du kọ baba kahị ka nwụlanọ gbe ọtụpyịpyị?

LODU ọlẹ kọ chịpwụrụ ene kịị nwụ iJisọsị Ayịbaba nyahị, ọ ya neeji nyori nyị ka ba angịlẹ wuu kị cheje nyọka ri angịjụgbẹyị nyọwa ẹtẹ. (Jọn. 17:14) Bwu ụka ọọwa gbee da wẹ alẹ, angịlẹ kị gbịgba ha iJihova ka, kaa tụ́ anchẹ nyamwụ ịlẹ kị godayị giri-giri pyịpyị. (2 Tim. 3:12) Jaabwọ kahị wẹẹ tụ́ ju ocheju nya odehe ọlẹ chwẹẹ ẹnẹnẹẹnụ, ahị yẹhị nọ ká aluji nyahị ka tụ́ụhị pyịpyị gụ ọwọwa ịnyịnyị.—Mat. 24:9.

2-3. (a) Ẹlịyẹ ahị tị́ baba nyọka jẹ́ u-uhye nya uhi ojuju? (b) Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọlẹ?

² Ịyẹ ahị tị́ ka họ lẹẹlẹẹ chajị kahị ka jẹ́-ẹ bọhụ ẹ-ẹpwụ nya ọtụpyịpyị? Áhị baba nyọka juwa kụ irya nya ang ịtịpyọ ịlẹ wuu kị ka họ tahị ka. Kori kahị họ ịnyị, uhi ojuju bala uko ọchịchị ka pwọọhị abwọ pwọọọ. Irya ọkụkụ ọlịnyị ka huhi abwọ la ọgbịgba ha iJihova myị́, ene ká akama ka dọmwụ wẹ chịhị ọgụ. (Etu 12:25; 17:22) Uhi ojuju ri ang-ẹga ọnyọọngịrị ọhẹ ọlẹ ká “Ohe Onyobyi oluji” nyahị kaa kpa ma uya tahị. (1 Pit. 5:8, 9) Ịyẹ ahị tị́ ka họ lẹẹlẹẹ nyọka ju ịlọhị ọngịrị?

³ Ám̀ ẹ-ẹpwụ nya ang ọjẹ́jẹ ọlẹ, ahị ka yẹ jaabwọ kahị ka bwu ju igu oriri nyahị bala iJihova ọngịrị, bala ang odudu ọlẹ kọ baba kahị ka họ ịnyị lẹẹlẹẹ. Ahị ka myịmyị-ị̀ kụ ẹhị yẹ ang ọlẹ kahị ka họ nyọka jẹ́-ẹ ju ugbodu gụ ọwọwa. Ohyẹẹkpẹ-ẹkpẹ, ahị ka yẹ ang ọlẹ kahị ka họ ụka ká angịnyị á juwa baahị ẹtẹ.

4. (a) Ẹlịyẹ ụpwụ nya Ala iHiburu 13:5, 6 à tị́ dahị ụbwọ nyọka jẹ́ myị̀myị̀? (b) Ịyẹ tị́ du kọ baba nyọka dahịhile ẹla ọwẹ?

⁴ Jẹ́ myị̀myị̀ nyori à há iJihova yẹẹyẹẹ, Ọ́ tị ka tụụbwọ hing ẹnẹnẹhẹ ka. (Wa Ala iHiburu 13:5, 6.) Ẹka lụmẹ-lụmẹ kẹkpẹ, ụpwụ nya Ẹpwang ọ-Kụ Gbeji yẹkẹẹ: “Ọngọlẹ kọ jẹ́ Ohe Oluhye  nyịlẹhị-ịlẹhị kaa dahịhiloo yẹẹyẹẹ ịnyịnyị ụka nya ọtụpyịpyị.” Ẹlịlẹhị ịnyị! Kori kahị ka bọhụ myị́ ẹ-ẹpwụ nya ọtụpyịpyị aalẹ, ahị baba nyọka la ọháha ha iJihova bala ọ-ka dahịhiloo la ọkịlẹtụ nyahị wuu. Áhị ka myịmyị-ị̀ la ịwẹẹ ọdada u-uhye nya ọháha ọlẹ kọ la hahị ẹnẹnẹhẹ ka.—Mat. 22:36-38; Jem. 5:11.

5. Ịyẹ à tị́ ka dang ụbwọ nyọka yẹ ọháha ọlẹ ká iJihova la u-uhye nyang?

⁵ Wa ịBayịbụụ ẹnụ myị́ ẹnụ la irya nyọka tụ́ ju iJihova chwẹẹ gụ ọwọwa. (Jem. 4:8) Jaabwọ ká wẹẹ wa, maga nyọka yẹ abwẹla ịnyịịla-ịnyịịla nya iJihova. Yẹ jaabwọ kọ la ọháha hang kaka ba, ụka ká juwa wa ẹla ọlẹ kọ ya bala ang ịlẹ kọ họ. (Ehe. 34:6) Ọhẹka, ọ ka la angịhyẹ ujwo nyọka myị nyori Ohe Oluhye la ọháha haa myị́, chajị angịkịla á mẹ ọháha jẹ ẹ-ẹga nyaa ẹnẹnẹhẹ lẹka. Kori kọ lang ịnyị, maga ká da agbẹyị ịlẹ ká Ohe Oluhye bwu mẹ ahyẹẹrwẹrwa bala ọnahị jẹ ẹ-ẹga nyang ju ụ-ụpwụ ẹnụ myị́ ẹnụ. (Eje. 78:38, 39; Rom. 8:32) Jaabwọ ká juwa kụ ẹhị yẹ ang ịlẹ kị họ ọ-ọhịhị nyang bala ọ-kụ irya kpori-kpori ju ẹla ọlẹ ká wẹẹ wa bwu Omyi Ẹla nya Ohe Oluhye, ịnyịnyị ọ ka chịkpẹẹ hang nyọka gu iru nya ang ịlẹ ká iJihova họ hang ẹnyị lẹ. Kori ká ang ịlẹ ká iJihova họ hang wuu á myịng lẹhị aalẹ, igu oriri nyang balọọ ka la ọngịrị gụ ọwọwa.—Eje. 116:1, 2.

6. Jaabwọ ká ụpwụ nya Eje Ọnyịịla 94:17-19 ya, ányị abwọ ọrịrị bwu ọkịlẹtụ à tị́ ka dang ụbwọ?

⁶ Raabwọ ụka myị́ ụka. Kụ irya nya onjwo ochiche ọlẹ ká adamwụ hu hụrụ ịlọmwụ a-ata wẹẹ. Ọnyị ọọwa á kaa juhi nyọka ya ẹla ịnyịịla bala ịtịpyọ ịlẹ kị họ tọọ la ahyẹẹnụ ọọwa je adamwụ ka. À ka jẹ́-ẹ ri igu bala iJihova ụ-ụgbẹyị ọlịịwẹ myị́, kori ka tụ́ jwoo chwẹẹ ẹnụ myị́ ẹnụ bwula abwọ ọrịrị bwu ọkịlẹtụ nyang. (Wa Eje Ọnyịịla 94:17-19.) Jaabwọ ká wẹẹ raabwọ ha iJihova, “ya ẹla ọlẹpwụ nyang” joo, tụ́ ang ịlẹ kị ri uhi bala uko ọchịchị nyang. (Ida. 2:19) Ịyẹ à tị́ ka ri apyobwuna nya ọọwa? À ka ye “okpunyi nya Ohe Oluhye ọlẹ kọ kaa kpoye nya ọ-jẹ́ myịmyị nya angịnyị ehe wuu.” (Filip. 4:6, 7) Kori ká juwa raabwọ ụ-ụgbẹyị ọlịịwẹ, a ka tụ́ ju iJihova chwẹẹ gụ ọwọwa ịnyịnyị.—Rom. 8:38, 39.

7. Ịyẹ tị́ du kọ baba nyọka dahịhile ehe ọchịchị nya Ohe Oluhye u-uhye nya Ịpyị-Adịrahụ nyamwụ?

⁷ La ahị ọdahile nyori Ịpyị-Adịrahụ nya Ohe Oluhye ka kpa ahị ọwawa wahị ịnyịlẹhị. (Ọwa. 23:19) Kori ká ọmyịmyị nyang u-uhye nya ehe ọchịchị ọwẹ á la dẹwụ-dẹwụ, ọ ka chịkpẹẹ ha Olegu Onyobyi bala angịnyị nyamwụ nyọka jung uhi-uhi. (Etu 24:10; Hib. 2:15) Ányị a tị́ ka bwu ju ọmyịmyị nyang ọngịrị lẹẹlẹẹ u-uhye nya Ịpyị-Adịrahụ nya Ohe Oluhye? Hu ụka nọ nyọka jẹ́ ang u-uhye nya ehe ọchịchị nya Ohe Oluhye chajị nya Ịpyị-Adịrahụ nyamwụ bala ang odudu ọlẹ á ka jẹ́ myị̀myị̀ nyori ẹla ọọwa ka họ jịra ịnyịlẹhị. Ányị ọọwa à tị́ ka bwu dang ụbwọ? Kụ ẹhị yẹ ẹla ọlẹ kọ họ ta Stanley Jones wẹẹ. Ị woo ju agba ẹ-ẹpwụ nya ẹka irwiye ọọlajị nya ọmyịmyị ọlala nyamwụ. * Ịyẹ à tị́ dọọ ụbwọ bọhụ pwụ ọbaba myị́? Ọ yẹkẹẹ:  “Ḿ tụụbwọ hi iJihova ka chajị m̀ la ẹla ọjẹ́jẹ kpori-kpori u-uhye nya Ịpyị-Adịrahụ nyamwụ, m̀ dahịhilọọ. Ḿ myịmyị la ịwẹẹ ọdada u-uhye nyamwụ kpong-kpong ka.” Kori ká la ọmyịmyị ọnyọọngịrị u-uhye nya ehe ọchịchị nya Ohe Oluhye, à ka tụ́ jwoo chwẹẹ gụ ọwọwa. Á ka ya ẹga da uhi ojuju ka hung abwọ la ọgbịgba họọ ka.—Etu 3:25, 26

8. Ẹlịyẹ abwẹla nyahị ẹ-ẹga nya ọjịra-jịra à tị́ ka mẹjẹ? Ịyẹ tị́ du kọ lịnyị?

⁸ Ka ọjịra-jịra nya Angịnyị nya ỊKịrayịsị ụka myị́ ụka. Ọjịra-jịra ka dahị ụbwọ nyọka tụ́ ju iJihova chwẹẹ gụ ọwọwa. Abwẹla nyahị ẹ-ẹga nya ọjịra-jịra ọkaka ka mẹjẹ kori kahị ka bọhụ myị́ ẹ-ẹpwụ nya ịtụpyịpyị ị-ịlahị. (Hib. 10:24, 25) Ịyẹ tị́ du kọ lịnyị? Kori kahị ya ẹga da ká ẹla ochiche-ochiche á huhi abwọ la ọ-ka ọjịra-jịra lẹẹlẹẹ, ányị ahị tị́ ka họ ị-ịlahị ụka kọ ka baba nyọka nwụlanọ nya igu ogbugbu myị́ chajị nyọka tụguru bala aanahị ịkịla? Ma, kori kahị tị chị eje la ọngịrị-ọngịrị nyọka ka ọjịra-jịra lẹẹlẹẹ, áhị ka ba la ọkaka ụka ká aluji á tịtọ nyọka huhi abwọ la ọtụguru lawụlẹ ka. Lẹẹlẹẹ à ri ụka ọlẹ ká ọjịra-jịra ọkaka ka kpụhị ịpyọ yẹẹyẹẹ lẹ. Kori ká ọjịra-jịra ọkaka á háahị, ọtụpyịpyị lee ehile nya iGomenti ọhẹ-lọhẹ á ka huhi abwọ la o-ju ihi nya Ohe Oluhye gụ angịnyị ehe ka.—Ụkụr. 5:29.

9. Ịyẹ tị́ du ká ụpwụ ịgọgọ ọ-kpa e-egbeju ri ụgbẹyị ọnyịịla ọhẹ ọlẹ kahị ka jẹ́-ẹ bwu nwụlanọ gbe ọtụpyịpyị?

⁹ Kpa ẹla ịlẹpwụ nya ụpwụ ịgọgọ ịlẹ kị kpụng ịpyọ gụgụ wuu e-egbeju. (Mat. 13:52) Á ka kpịtịya nya ẹla kpẹẹkpẹẹ ka myị́, iJihova tị ka jẹ́-ẹ kpa ọngịrị nya olegu ịgọgọ nyamwụ dang ụbwọ nyọka kpịtịya nya ẹla ịlụpwụ ịgọgọ ịlẹ ká wa. (Jọn. 14:26) Kụ ẹhị yẹ ẹla ọlẹ ká ọọnahị ọhẹ ọlẹ kị wu ju u-ube nya agba ụbwọmwụ-ụbwọmwụ ụ-ụwa ịị East Germany ya lẹẹ: “Ọ kpụm ịpyọ lụmẹ nyori, lụka ọwẹ lẹ, m̀ kpa ụpwụ ịgọgọ lala ohu ịmanyị tị́ e-egbeju lẹ. Nanana nyori m̀ la ụbwọọm, m̀ kaa kpa ụka nyam kụ irya ju ẹla ịlẹpwụ nya ụpwụ ịgọgọ.” Ụpwụ ịgọgọ ịịwa da ọọnahị ụbwọ nyọka tụ́ ju iJihova chwẹẹ bala ọ-bọhụ pwụ ọbaba.

10. Ịyẹ tị́ du kọ baba kahị ka jẹ́ eje nyahị la egbeju-egbeju?

¹⁰ Maga ká jẹ́ mwu eje ịlẹ kị kaa yogbo ha iJihova la egbju-egbeju. Ụka ọlẹ kị wu ịPọlụ bala ịSayịlasị ju agba i-iFilipayị, ị mwu eje ịlẹ kị jẹ́ la egbeju-egbeju nyọka gwogbo ha iJihova. (Ụkụr. 16:25) Ịnyịnyị, ányị aanahị ịlẹ kị ji ekpeleji nya eji ọkpakpa nya Soviet Union ene-ene à tị́ bwu ju awụlẹ ọngịrị ụka kị kwaa rụ ka Siberia? Ọọnahị Mariya Fedun ya ẹla ọlẹ kị họ. Ọ yẹkẹẹ, “Ahị mwu eje ịlẹpwụ nya ụpwụ nya eje nyahị ịlẹ kahị jẹ́ wuu kpẹng-kpẹng.” Ọ ya nyori eje ịịwa nyị ju ịwa ọhụ bala ọ-da ịwa ụbwọ  nyọka tụ́ ju iJihova chwẹẹ gụ ọwọwa. À kaa ye ọngịrị ụka ká mwu eje nyahị ịlẹ kị kpụng ịpyọ gụgụ wuu? Ó-ri ịnyị aalẹ, maga ka jẹ́ eje ịwẹ la egbeju-egbeju lẹẹlẹẹ mẹ!—Yẹ akpa ọlẹ kọ ri, “ Dam Ụbwọ Kám Ju Ugbodu.”

11-12. (a) Jaabwọ ká ụpwụ nya 1 ịSamwẹlụ 17:37, 45-47 ya, ịyẹ tị́ du ká iDevidi ju ugbodu myị́? (b) Ẹla ọkpọngchị oyina ahị tị́ jẹ́ bwu ẹga nya iDevidi?

¹¹ Kori á ka bọhụ ẹ-ẹpwụ nya ịtụpyịpyị myị́ aalẹ, à baba nya ugbodu ojuju. Ányị a tị́ ka họ kori ká yẹ nyori á la abwụma ọwẹ ka? Kpịtịya nyori u-uhye ọlala, lee ọngịrị ọlala, lee ang ọ-jụ họ myị́, à kaa ya ugbodu ojuju ha ọngịnyị ka. Kụ irya nya ụka ọlẹ ká iDevidi lẹẹ ka ma uya ta iGolayatị wẹẹ. Ọ ri ochiche dẹgẹ-dẹgẹ bala ọ-la dẹwụ-dẹwụ ị-ịlahị nya iGolayatị, ukpongka nya ọlẹng ọwẹ. Ọ́ myịmyị kpa ang-abwọ nya ẹwụ lala ọwa ka. IDevidi á dọmwụ la oge ka. Ma, ọ myị̀ la ugbodu ojuju. Ọ rụnyẹ jahị da ukpongka nya ọngọ wo ẹla ka ọwẹ nyọka ma uya tọọ, la o-juhi ka.

¹² Ịyẹ tị́ da iDevidi ụbwọ du kọ jẹ́ ju ugbodu myị́? Ọ jẹ́ myị̀myị̀ nyori iJihova juwa balọọ. (Wa 1 ịSamwẹlụ 17:37, 45-47.) Irya nya iDevidi á juwa u-uhye nya abwọlẹ ká iGolayatị ri ọtụka gwọọ kaka ba ka. Ọkọkọ nya ọọwa lẹ, ọ kụ irya jaabwọ ká iGolayatị la hịịnyẹẹ lala ụbwọ nya ọjị ị-ịlahị nya iJihova. Ẹlịyẹ ahị tị́ jẹ́ bwu oja ọwẹ? Ahị ka jẹ́-ẹ ju ugbodu kori kahị dahịhile nyori iJihova juwa balahị, bala ụka kahị jẹ́ myị̀myị̀ nyori angị tụ́ụhị pyịpyị la hịịnyẹẹ ị-ịlahị nya Ohe Oluhye Agụgụ ịnyịnyị. (2 Ego. 20:15; Eje. 16:8) Ányị ahị tị́ ka bwu la abwụma nya ugbodu ojuju gụ ọwọwa lẹẹlẹẹ, ene ká ọtụpyịpyị ka wẹ chịhị ọgụ?

13. Ányị ahị tị́ ka bwu la ugbodu ojuju gụ ọwọwa? Ịyẹ tị́ du kahị ya ịnyị?

¹³ Ahị ka jẹ́-ẹ la ugbodu ojuju gụ ọwọwa lẹẹlẹẹ bwula ọ-kpa oja ọnyịịla nya Ịpyị-Adịrahụ nya Ohe Oluhye pyẹ ya ju angịnyị. Ịyẹ tị́ du kahị ya ịnyị? Chajị ẹrụ ọnyịịla ọ-kpa pyẹ kaa mẹjẹ́ẹhị nyọka dahịhile iJihova bala ọ-ka kụrụ uhi nya angịnyị ojuju. (Etu 29:25) Jaabwọ ká ekpiiji nyahị kaa la ọngịrị ụka kahị họ ụkụrwọ, ịnyịnyị ugbodu ojuju nyahị à kaa la ọngịrị ụka kahị kpa ẹrụ ọnyịịla pyẹ bwu ẹpwa ka ẹpwa, ẹ-ẹpwụ nya alụma, lụka ọ-kpahị ju ka bala ẹga ọ-kpa ang ra lẹ. Kori kahị la ugbodu ojuju nyọka kpa ẹrụ ọnyịịla pyẹ lẹẹlẹẹ, ọ ka chịkpẹẹ hahị nyọka kịnyaa juwa kpa ẹrụ ọnyịịla pyẹ kori ká angịkpeji á maga nyọka huhi abwọ.—1 Tẹs. 2:1, 2.

14-15. Ẹlịyẹ ahị tị́ ka jẹ́ bwu ẹga nya Nancy Yuen bala Valentina Garnovskaya?

¹⁴ Ahị ka jẹ́ ang lụmẹ-lụmẹ bwu ọhịhị nya  aanahị anyang imiiye ịhyẹ ịlẹ kị mẹ ugbodu ojuju ọlam-ọlam jẹ. Nancy Yuen á luhye gụ apatẹ ịrụ kaka, ọ tịị juhi kpongkpong ka. * Ọ́ myị hwabwọ la ọ-kpa ẹrụ ọnyịịla pyẹ ka. Chajị nya ọọwa, ị woo ju agba gụ ẹka iwo imiiye ịị China. Idanggeri ịlẹ kị lọọ eje ya nyori ọọnahị ọwẹ nya-à “ri ọngọ la egbeju ọngịrị gụgụ wuu” ẹ-ẹpwụma nyaa ẹẹ.

¹⁵ Ịnyịnyị, ị wu Valentina Garnovskaya ju agba ịị Russia ụka ịta-ịta lala ẹka iwo imiiye kụrụ okpokpo. * Ịyẹ tị́ du? Ọ cheje bwu ọkịlẹtụ la ọngịri-ọngịrị nyọka kịnyaa juwa kpa ẹrụ ọnyịịla pyẹ gbee ká idanggeri wụrọọ nya “ọngọlẹ kọ tịpyọ gụgụ wuu bwu ẹpwụ nya angịlẹ kị́ wu.” Ịyẹ à tị́ du ká aanahị imiiye ịwẹ jẹ́ ju ugbodu ịịwẹ myị́? Ị jẹ́ myị̀myị̀ nyori iJihova juwa balaa.

16. Ịyẹ à tị́ kaa ya ugbodu ojuju nya ịlẹhị ha ọngịnyị?

¹⁶ Jaabwọ kahị jẹ́ wẹẹ, kori kahị tịtọ nyọka la abwụma nya ugbodu ojuju gụ ọwọwa aalẹ, áhị ka kpụnịrọ ọngịrị lee ang ọ-jụ họ myị́ nya ịlọhị ka. Ọkọkọ nya ọọwa lẹ, ahị ka dahịhile nyori iJihova jam balahị bala o-ri ọwa à kaa ma uya yẹẹhị dada lẹ. (Ehile. 1:29, 30; Sẹk. 4:6) Ang ọlẹ kọ kaa ya ugbodu ojuju nya ịlẹhị ha ọngịnyị à wẹ lẹ.

17-18. Ányị iJisọsị à tị́ dahị ọna ụ-ụpwụ nya ịJọn 15:18-21? Ẹla ọwẹ tị́ mẹ ẹlịyẹ jẹ́ẹhị?

¹⁷ Ọ kaa kpụhị ịpyọ ụka ká angịnyị á juhi ihi, ma áhị ka kụ irya nyori ụka ká angịnyị á baahị ẹtẹ lẹ aalẹ, áhị ju apyobwuna kaka lẹ ka. IJisọsị yẹkẹẹ: “Anụ ka [chị ọkẹkẹnị] ụka ká angịnyị juwa baanụ ẹtẹ, lee kị juwa gbanụ deeji hi ịlaa, lee kị juwa doonu, bala o-juwa ju ẹnyị nyanụ ugubyi ododu, chajị nyọlẹ kanụ myị lam am Ọnyị nya ọngịnyị ehe.” (Luk. 6:22) Ịyẹ à tị́ ri etu nya ẹla ọlẹ ká iJisọsị ya?

¹⁸ IJisọsị á ya nyori nyị ka kpụ angịnyị nyọwa ịpyọ ụka ká angịkịla á juwa baa ẹtẹ ka. Ọ wẹẹ dahị ọna u-uhye nya ẹla ọlẹ kọ ka họ tahị myị́ ịnyị. Áhị ri ụpa nya odehe ọlẹ ka. Ahị kaa ba ẹla ọmẹjẹ nya iJisọsị jẹ ọ-ọhịhị nyahị bala ọ-kpa ẹrụ ọnyịịla pyẹ jaabwọ kọ họ ịnyịnyị. Chajị nya ọọwa lẹ, ahị kaa wụ alodehe ẹjẹ. (Wa  ịJọn 15:18-21.) Ahị tịtọ nyọka họ ẹla kpụ iJihova ịpyọ. Kori kahị tị wụ́ angịnyị ehe ẹjẹ ọọlajị nya ọọwa aalẹ, ịwa à la akama lẹ, a-ahị ka.

19. Ụgbẹyị oyina ahị tị́ ka bwu gbịla ọgụ-ẹpẹtẹ nya angịjụgbẹyị nya iJisọsị?

¹⁹ A ju oyi nyọka ya ịlọng dodehe nya Alibeenu nya iJihova, chajị nya ẹlẹlẹhẹ ọlẹ ká angịnyị ehe kaa ya lee ọ-họ ka. (May. 4:5) Ahị ka jẹ́-ẹ kụrụ uhi nya ọngịnyị ehe ojuju bwula ọ-kụ ẹhị yẹ ang ọlẹ ká angịjụgbẹyị nya iJisọsị ịla iJerusalẹm họ ụka ọlẹ kị nwọọ kpá. Ị jẹ́ nyori ịwa nyị wụ́ alegbeju ị-mẹ ẹla nya Ohe jẹ nya ala iJuu ẹjẹ yẹẹyẹẹ. (Ụkụr. 5:17, 18, 27, 28) Ma, ahyẹẹnụ myị́ ahyẹẹnụ, ị kaa kele ka ube ịgọgọ bala o-ya ịlaa dodehe nya angịjụgbẹyị nya iJisọsị bwula o-ya ẹla nya Ohe. (Ụkụr. 5:42) Ị́ ya ẹga da uhi ojuju hwaa abwọ ka. Ahị ịnyịnyị ka jẹ́-ẹ kụrụ uhi nya ọngịnyị ehe ojuju nyahị bwula o-ya ịlọhị dodehe nyori ahị ri Alibeenu nya iJihova ẹ-ẹga myị́ ẹga kahị ji, ó ri ọlụkụrwọ riri, lee ube-ụpwụ, lee oye ẹpwa nyahị.—Ụkụr. 4:29; Rom. 1:16.

20. Ịyẹ tị́ du ká angịjụgbẹyị nya iJisọsị chị ọkẹkẹnị nanana nyori ị wụ angịnyị ẹjẹ?

²⁰ Ịyẹ tị́ du ká angịjụgbẹyị nya iJisọsị chị ọkẹkẹnị nanana nyori ị wụ angịnyị ẹjẹ? Ị jẹ́ ang odudu kị wu angịnyị ẹjẹ ịịwẹ, ị tị yọọ lala ihi nyọlẹ kị yaa akama chajị nya irya nya iJihova ọhọhọ. (Luk. 6:23; Ụkụr. 5:41) Nyọlẹ kọ nọ chẹẹ, iPita ọngọmyẹrụ da ụpwụ yẹkẹẹ: “Ọ́ tị dọmwụ riri kanụ yẹ akama yẹyẹ chajị nya abwẹla ọnyịịla ọhọhọ nyanụ tụbwọ aalẹ, ọ ka yẹ ri [ọkẹkẹnị] hanụ.” (1 Pit. 2:19-21; 3:14) Ụka kahị kpịtịya nyori ang ọnyịịla ọhọhọ nyahị à du kahị wụ angịnyị ẹjẹ lẹ, áhị ka yẹga da ẹtẹ ọbaba nya angịnyị ehe ka huhi abwọ la ọgbịgba ha iJihova ka.

21-22. (a) Ịyẹ a tị́ cheje á ka họ nyọka nwụlanọ gbe ịtụpyịpyị? (b) Ẹlịyẹ ahị tị́ ka kụ ẹhị yẹ a-ang ọjẹ́jẹ ọkịla?

²¹ Áhị jẹ́ ụka ọlẹ kpangga ká angịnyị ka dọmwụ nya ọ-baahị ẹtẹ, lee ụka ọlẹ ká alegbeju ka tịtọ nyọka huhi abwọ la ụkụrwọ nya iJihova ọhọhọ ka. Ma, ahị ka jẹ́-ẹ nwụlanọ lẹẹlẹẹ bwula o-ju igu nyahị bala iJihova ọngịrị, maga nyọka la ugbodu ojuju gụ ọwọwa, bala ọ-jẹ́ ang jaabwọ ahị ka bwu bọhụ ụka ká angịnyị á baahị ẹtẹ. Ọ-nwụlanọ lẹẹlẹẹ ka dahị ụbwọ nyọka kịnyaa juwa gbịgba ha iJihova ụka ká ịtụpyịpyị ka wẹ chịhị ọgụ.

²² Kori ká alegbeju á maga nyọka huhi abwọ hi ụkụrwọ nya Ohe Oluhye ọhọhọ tị bẹẹ? A-ang ọjẹ́jẹ nyahị ọkịla, ahị ka jẹ́ ang u-uhye nya ẹla ọmẹjẹ ịlẹpwụ nya ịBayịbụụ ịlẹ kị ka dahị ụbwọ, kori kị maga nyọka huhi abwọ hi ụkụrwọ nya iJihova.