1. Pamodi ki nu meste pripara pa pirsigison?

NA KEL noti antis di Jizus móre, el fla ma tudu kes ki skodje ser se disiplus ta sérba odiadu. (João 17:14 ) Ti gósi, kes algen ki é kóntra adorason verdaderu sta ta pirsigi kes ki é Tistimunha fiel di Jeová. (2 Tim. 3:12) Sima fin di es sistéma sta ta txiga, nu ta spéra ma nos inimigus ta pirsigi-nu inda más txeu. — Mat. 24:9.

2-3. (a) Kuzê ki nu debe sabe sobri medu? (b) Kuzê ki nu sta ben odja na kel studu li?

² Modi ki nu pode pripara gósi pa nfrenta pirsigison? Nu ka meste fika ta pensa na tudu kuza mariadu ki pode kontise ku nos. Si nu faze kel-li, nu pode fika ku txeu medu ki nu pode para di sirbi Jeová mésmu antis di nu pasa pa kalker prubléma. (Pro. 12:25; 17:22) Medu é un arma poderozu ki nos ‘inimigu, ki é Diabu,’ ta tenta uza kóntra nos. (1 Ped. 5:8, 9) Kuzê ki nu pode faze gósi pa nu pripara pa nfrenta pirsigison?

³ Na kel studu li nu sta ben odja modi ki nu pode bira nos amizadi ku Jeová más fórti i pamodi ki é inportanti nu faze kel-li gósi. Tanbê nu sta ben prende kuzê ki nu pode faze pa ten más koraji. I dipôs, nu sta ben odja modi ki nu pode lida ku ódiu di kes ki é kóntra nos.

4. Di akordu ku Hebreus 13:5, 6, di kuzê ki nu debe ten sertéza, i pamodi?

⁴ Ten sertéza ma Jeová ta ama-u i ma nunka el ka ta bandona-u. (Lé Hebreus 13:5, 6.) Dja ten txeu anu ki un Sentinéla fla: “Un algen ki konxe Deus dretu, ta kúnfia na  el inda más na ténpu di próva.” Kel-li é verdadi! Pa nu mante firmi óras ki nu pasa pa pirsigison, nu meste ama Jeová i kúnfia na el di tudu korason i nunka ka duvida ma el ta ama-nu. — Mat. 22:36-38; Tia. 5:11.

5. Kuzê ki ta djuda-u xinti amor di Jeová?

⁵ Lé Bíblia tudu dia pa bu ten un amizadi más fórti ku Jeová. (Tia. 4:8) Óras ki bu ta lé Bíblia, konsentra na kes kualidadi bunitu di Jeová. Tenta xinti se amor na kuzas ki el fla i ki el faze. (Êxo. 34:6) Alguns ta atxa difísil kridita ma Deus ta ama-s pamodi nunka es ka mostradu amor. Si bu ta xinti si, tenta tudu dia faze un lista di maneras ki Jeová mostra mizerikórdia i bondadi pa bo. (Sal. 78:38, 39; Rom. 8:32) Si bu pensa na kuzas ki bu pasa pa el i na kuzas ki bu lé na Palavra di Deus, talvês bu ta pode odja txeu kuza ki Jeová faze pa bo. Si bu ta da txeu valor pa kuzê ki Jeová ta faze, nhos amizadi ta fika más fórti. — Sal. 116:1, 2.

6. Di akordu ku Salmo 94:17-19, modi ki faze orason di korason pode djuda-u?

⁶ Faze orason sénpri. Imajina un mininu na brasu di se pai ki ta ama-l txeu. Kel mininu ta xinti txeu suguru ki el ka ten medu di pâpia ku se pai sobri kuzas dretu i mariadu ki kontise ku el na kel dia. Bu pode xinti kel mésmu tipu di amizadi pa Jeová, si bu faze orason pa el di korason tudu dia. (Lé Salmo 94:17-19.) Óras ki bu ta faze orason, abri bu korason pa Jeová sima óras ki bu ta baza agu. Fla bu Pai, ki ta ama-u txeu, sobri bus medu i bus preokupason. (Lam. 2:19) Kal ki ta ser rezultadu? Bu ta pasa ta sabe kuzê ki Bíblia ta txoma di ‘pas di Deus, ki ningen ka ta konsigi ntende’. (Fil. 4:6, 7) Kantu más bu faze orason di kel manera li, bu amizadi ku Jeová ta fika más fórti. — Rom. 8:38, 39.

7. Pamodi ki bu debe ten sertéza ma promésas di Deus sobri Reinu ta ben kunpri?

⁷ Ten sertéza ma kes benson di Reinu di Deus ta ben kunpri. (Núm. 23:19) Si bu fé na kes promésa li é fraku, ta ser más fásil pa Satanás ku kes ki é kontroladu pa el pô-u ta xinti medu. (Pro. 24:10; Heb. 2:15) Modi ki bu pode ten más kunfiansa na Reinu di Deus gósi? Faze un prugrama di studu pa ntende kes promésa di Deus sobri se Reinu i pamodi ki bu pode ten sertéza ma es ta ben kunpri. Modi ki kel-li pode djuda-u? Odja izénplu di Stanley Jones, ki podu na kadia pa 7 anu pamodi se fé. * Kuzê ki djuda-l mante fiel? El fla: “Nha fé éra fórti pamodi kuzê ki N sabia sobri Reinu di Deus i sobri kuzê ki el ta ben fazeba. I nunka N ka  duvida di kel-la. Nton ningen ka ta konsigiba pô-m ta bandona Jeová.” Si bu ten un fé fórti na promésas di Deus, bu ta bira más amigu di Jeová i bu ka ta dexa medu toma kónta di bo. — Pro. 3:25, 26.

8. Valor ki nu ta da pa nos runion ta djuda-nu sabe kuzê sobri nos kabésa? Splika.

⁸ Sisti tudu runion. Runions ta djuda-nu ser más amigu di Jeová. I valor ki nu ta da pa nos runion, ta djuda-nu sabe si nu ta konsigi lida ô nau ku pirsigison na futuru. (Heb. 10:24, 25) Pamodi ki nu ta fla kel-li? Si gósi nu ta dexa kalker kuza pikinoti pô-nu ka ta bai runion, kuzê ki ta kontise na futuru si nu ten ki poi nos vida na prigu pa nu sisti runion? Má, si dja nu sta disididu na sisti tudu runion, nu ka ta xinti medu óras ki nos inimigus tenta inpidi-nu di faze kel-la. Gósi é ténpu di nu prende ama nos runions. Si nu ta ama nos runions, ninhun opozison, nen proibison di govérnus, ka ta inpidi-nu di obi ku Deus antis di nu obi ku ómis. — Atos 5:29.

9. Pamodi ki dikora testus di Bíblia é un bon manera di pripara pa pirsigison?

⁹ Dikora testus di Bíblia ki más bu ta gosta. (Mat. 13:52) Bu ka ta konsigi lenbra di tudu kuza, má Jeová pode uza se spritu santu pa djuda-u lenbra di kes testu di Bíblia ki bu dikora. (João 14:26 ) Un irmon ki staba na kadia, na un séla el sô, na Alimanha Oriental, fla: “N fika kontenti pamodi dja N dikoraba más di 200 testu di Bíblia! Mésmu ki N staba mi sô, nha menti staba okupadu ta pensa na txeu asuntu di Bíblia.” Kes testu di Bíblia djuda nos irmon kontinua amigu di Jeová, i el aguenta firmi.

10. Pamodi ki nu debe dikora kántikus?

¹⁰ Dikora i kanta kántikus ki ta lova Jeová. Kantu Polu ku Silas staba na kadia na sidadi di Filipus, es kanta kántikus ki es tinha dikoradu pa lova Deus. (Atos 16:25 ) Di mésmu manera, kantu nos irmons na antigu Union Suviétika mandadu prézu pa Sibéria, kuzê ki djuda-s lida ku kel situason? Un irman ki txoma Mariya Fedun ta lenbra: “Nu ta kantaba tudu kes kántiku ki nu sabia, kes kántiku ki staba na nos livru di kántiku.” El fla ma kes kántiku djuda-s es tudu xinti más nkorajadu i djuda-s fika más amigu di  Jeová. Bu ta xinti más nkorajadu óras ki bu ta kanta kes kántiku ki más bu gosta? Nton dikora kes kántiku gósi! — Odja kuadru “ Da-m koraji”.

11-12. (a) Di akordu ku 1 Samuel 17:37, 45-47, pamodi ki Davidi tinha koraji? (b) Ki lison inportanti nu ta prende di izénplu di Davidi?

¹¹ Bu meste ten más koraji pa lida ku pirsigison. Si bu ta atxa ma bu ka ten koraji, kuzê ki bu pode faze pa bu ten kel kualidadi li? Ka bu skese ma koraji di verdadi ka ta dipende di tamanhu, forsa ô kapasidadi. Odja izénplu di Davidi kantu el nfrenta Gulias. Konparadu ku kel jiganti, Davidi éra pikinoti, más fraku i el ka staba mutu priparadu pa géra. I nen el ka tinha un spada. Má, el tinha txeu koraji. Pur isu, Davidi ba luta kóntra kel jiganti orgulhozu.

¹² Pamodi ki Davidi tinha txeu koraji? El tinha sertéza ma Jeová staba ku el. (Lé 1 Samuel 17:37, 45-47.) Davidi ka fika ta pensa ma Gulias éra mutu más grandi ki el. Má, el fika ta pensa ma Gulias, konparadu ku Jeová, ka éra nada. Kuzê ki nu ta prende ku kel stória li? Nu ta ten más koraji, si nu kúnfia ma Jeová sta ku nos i si nu ten sertéza ma nos inimigus é pikinoti konparadu ku Deus Tudu-Poderozu. (2 Cró. 20:15; Sal. 16:8) Modi ki nu pode ten más koraji gósi, antis di pirsigison ben?

13. Kuzê ki ta djuda-nu ten más koraji? Splika.

¹³ Un kuza ki ta djuda-nu ten más koraji gósi é prega notísias sábi di Reinu. Pamodi ki kel-li ta djuda-nu? Pamodi óras ki nu ta prega nu ta prende kúnfia na Jeová i nu ka ta xinti medu di pesoas. (Pro. 29:25) Sima nos múskulu ta fika más fórti óras ki nu ta trena, nos koraji ta fika más fórti óras ki nu ta prega di kaza en kaza, na públiku, na lugaris di komérsiu i na da tistimunhu informal. Si nu omenta nos koraji di prega gósi, nu ta sta más priparadu pa kontinua ta prega, mésmu ki govérnu proíbi nos óbra. — 1 Tes. 2:1, 2.

14-15. Kuzê ki nu pode prende ku spiriénsas di Nancy Yuen i di Valentina Garnovskaya?

¹⁴ Nu pode prende txeu ku izénplu di dôs irman fiel ki mostra txeu koraji. Nancy Yuen ta midiba 1,5 métru di altura,  má el tinha txeu koraji. * El nega para di prega notísias sábi di Reinu di Deus. I pamodi kel-la, el podu prézu pa 20 anu na Xina. Kes pulísia ki fika ta faze-l pergunta, fla-l ma el éra “kel algen más temozu” na ses país.

¹⁵ Otu izénplu é di irman Valentina Garnovskaya ki podu prézu três bês, na antigu Union Suviétika, duránti uns 21 anu. * Pamodi ki el podu prézu? El staba disididu na kontinua ta prega i kes autoridadi fla ma el éra “un kriminozu prigozu”. Kuzê ki poi kes dôs mudjer di fé li, ta ten txeu koraji? Es tinha sertéza ma Jeová staba ku es.

16. Kal ki é segredu pa nu ten koraji di verdadi?

¹⁶ Sima dja nu odja, pa nu ten koraji nu ka debe konsentra na nos forsa ô kapasidadi. Envês di kel-li, nu debe kridita ma Jeová sta ku nos i ma el é úniku ki ta luta pa nos. (Deut. 1:29, 30; Zac. 4:6) Kel-li ki é segredu pa nu ten koraji di verdadi.

17-18. Ki avizu Jizus da-nu na João 15:18-21 ? Splika.

¹⁷ Nos tudu nu gosta pa algen ruspeta-nu. Má si nu ta pensa ma nos valor ta dipende di kuzê ki otus ta atxa di nos, nu sta pensa mariadu. Jizus fla: ‘Filís nhos ta ser óras ki gentis ka gosta di nhos, es tra nhos di ses meiu, es koba nhos, i es fla ma nhos é mau pamodi nhos ten fé na Mi, Fidju di Ómi.’ (Lúkas 6:22, Bíblia na Prugrésu di Traduson pa Lingua Kabuverdianu, BPK ) Kuzê ki Jizus krê flaba?

¹⁸ Jizus ka staba ta fla ma kristons gosta di ser odiadu. Má, el staba ta fla kuzê ki pode kontise ku nos. Nu ka ta faze párti di mundu. Nu ta vive di akordu ku kuzas ki Jizus inxina i nu ta prega mensaji ki el pregaba. Pamodi kel-li, mundu ta odia-nu. (Lé João 15:18-21.) Nu krê  agrada Jeová. Si ómis ta odia-nu pamodi nu ta ama nos Pai, kel-li é ses prubléma.

19. Modi ki nu pode imita izénplu di kes apóstlu?

¹⁹ Nunka ka bu dexa kuzas ki ómis ta fla ô ta faze pô-u ta xinti vergónha di ser un Tistimunha di Jeová. (Miq. 4:5) Bu pode prende lida ku medu di ómi óras ki bu ta lenbra di izénplu di kes apóstlu na Jiruzalen. Lógu dipôs ki Jizus móre, es sabia ma kes xéfi di relijion di judeus ta odiaba es. (Atos 5:17, 18, 27, 28 ) Má simé, es kontinua ta bai pa ténplu na Jiruzalen tudu dia i ta mostra klaru ma es éra disiplus di Jizus. (Atos 5:42 ) Es ka dexa medu di ómi inpidi-s di prega. Nos tanbê, nu pode vense medu di ómi óras ki, na trabadju, na skóla i na lugar ki nu ta mora, nu ta dexa pesoas sabe ma nos é Tistimunhas di Jeová. — Atos 4:29; Rom. 1:16.

20. Pamodi ki apóstlus staba kontenti mésmu ki es éra odiadu?

²⁰ Pamodi ki apóstlus staba kontenti? Es sabia pamodi ki es staba ta ser odiadu. I pa es éra un ónra ser maltratadu dja ki es staba ta faze vontadi di Jeová. (Luc. 6:23; Atos 5:41 ) Dipôs, apóstlu Pedru ben skrebe: ‘Mésmu ki nhos sufri pamodi justisa, nhos ta ser filís.’ (1 Ped. 2:19-21; 3:14) Óras ki nu ta ntende ma nu ta odiadu pamodi nu sta faze kel ki é dretu, nunka nu ka ta dexa di sirbi Jeová pamodi pesoas ta odia-nu.

21-22. (a) Kuzê ki bu sta disididu na faze pa pripara pa pirsigison? (b) Kuzê ki nu ta ben odja na kel otu studu?

²¹ Nu ka ta pode sabe ki óra ki nu ta pasa pa txeu pirsigison ô ki óra ki govérnu ta proíbi nos óbra. Má, nu sabe ma nu pode pripara désdi gósi. Nu ta faze kel-li, óras ki nu ta bira nos amizadi ku Jeová más fórti, óras ki nu ta ten más koraji i óras ki nu ta sabe lida ku ódiu di nos inimigus. Si nu pripara désdi gósi, kel-li ta djuda-nu fika firmi na futuru.

²² Má i si govérnu proíbi nos óbra? Na kel otu studu, nu ta ben odja alguns prinsípiu di Bíblia ki ta djuda-nu kontinua ta sirbi Jeová sikrê govérnu proíbi nos óbra.