អត្ថបទសិក្សា ២៧
ចូរត្រៀមខ្លួននៅឥឡូវនេះសម្រាប់ការបៀតបៀន
«អស់អ្នកណាដែលចង់រស់នៅដោយបង្ហាញភក្ដីភាពចំពោះព្រះក្នុងនាមជាអ្នកកាន់តាមគ្រិស្តយេស៊ូ នឹងទទួលការបៀតបៀន»។—២ធី. ៣:១២
ចម្រៀងលេខ១២៩ យើងនឹងស៊ូទ្រាំ
សេចក្ដីសង្ខេប *
១. ហេតុអ្វីយើងត្រូវត្រៀមខ្លួនសម្រាប់ការបៀតបៀន?
នៅយប់មុនលោកម្ចាស់យេស៊ូបានត្រូវគេសម្លាប់ លោកបានមានប្រសាសន៍ថាអស់អ្នកដែលសម្រេចចិត្តធ្វើជាអ្នកកាន់តាមលោកនឹងត្រូវគេស្អប់។ (យ៉ូន. ១៧:១៤) ចាប់ពីពេលនោះរហូតដល់សព្វថ្ងៃនេះ គ្រិស្តសាសនិកដ៏ស្មោះត្រង់ដែលជាសាក្សីបញ្ជាក់អំពីព្រះយេហូវ៉ាបានទទួលការបៀតបៀនពីពួកអ្នកដែលប្រឆាំងនឹងការគោរពប្រណិប័តន៍ពិត។ (២ធី. ៣:១២) កាលដែលទីបញ្ចប់នៃរបៀបរបបពិភពលោកនេះកាន់តែខិតជិតមកដល់ យើងរំពឹងថាសត្រូវរបស់យើងនឹងប្រឆាំងយើងកាន់តែខ្លាំងឡើង។—ម៉ាថ. ២៤:៩
២-៣. (ក) តើយើងគួរទទួលស្គាល់អ្វីអំពីការភ័យខ្លាច? (ខ) តើយើងនឹងពិចារណាអ្វីខ្លះក្នុងអត្ថបទនេះ?
២ តើយើងអាចត្រៀមខ្លួនយ៉ាងដូចម្ដេចនៅឥឡូវនេះដើម្បីប្រឈមមុខនឹងការបៀតបៀន? យើងមិនចាំបាច់ស្រមៃគិតអំពីអ្វីៗទាំងអស់ដែលអាចកើតឡើងចំពោះយើងនោះទេ។ បើយើងធ្វើដូច្នេះ យើងប្រហែលជាភ័យខ្លាចនិងខ្វល់ខ្វាយជាខ្លាំងរហូតដល់យើងឈប់បម្រើព្រះយេហូវ៉ា ទោះជាអ្វីទាំងនោះមិនទាន់កើតឡើងចំពោះយើងក៏ដោយ។ (សុភ. ១២:២៥; ១៧:២២) ការភ័យខ្លាចគឺជាអាវុធមួយដ៏មានប្រសិទ្ធភាពដែល«មេកំណាច ដែលជាសត្រូវ»របស់យើងព្យាយាមប្រើដើម្បីវាយប្រហារមកលើយើង។ (១ពេ. ៥:៨, ៩) តើយើងអាចធ្វើអ្វីនៅឥឡូវនេះដើម្បីត្រៀមខ្លួនឲ្យចេះស៊ូទ្រាំពេលមានការបៀតបៀន?
៣ ក្នុងអត្ថបទនេះ យើងនឹងពិចារណាអំពីរបៀបដែលយើងអាចពង្រឹងចំណងមិត្តភាពរបស់យើងជាមួយនឹងព្រះយេហូវ៉ា និងមូលហេតុដែលការធ្វើដូច្នេះគឺសំខាន់ចាំបាច់នៅឥឡូវនេះ។ យើងក៏នឹងពិចារណាអំពីអ្វីដែលយើងអាចធ្វើដើម្បីមានចិត្តក្លាហានកាន់តែខ្លាំងឡើង។ ម្យ៉ាងទៀត យើងនឹងពិចារណាអំពីអ្វីដែលយើងអាចធ្វើពេលយើងត្រូវគេស្អប់។
របៀបពង្រឹងចំណងមិត្តភាពរបស់អ្នកជាមួយនឹងព្រះយេហូវ៉ា
៤. យោងទៅតាមហេប្រឺ ១៣:៥, ៦ តើយើងត្រូវជឿជាក់អំពីអ្វី ហើយហេតុអ្វី?
៤ ចូរជឿជាក់ថាព្រះយេហូវ៉ាស្រឡាញ់អ្នក ហើយថាលោកនឹងមិនបោះបង់ចោលអ្នកឡើយ។ (សូមអាន ហេប្រឺ ១៣:៥, ៦) ច្រើនឆ្នាំមុន ទស្សនាវដ្ដីប៉មយាមបានចែងថា៖ «បុគ្គលដែលស្រឡាញ់ព្រះយ៉ាងខ្លាំង នឹងទុកចិត្តលោកយ៉ាងខ្លាំងពេលមានការបៀតបៀន»។ នេះពិតជាត្រឹមត្រូវមែន! ដើម្បីទទួលជោគជ័យពេលប្រឈមមុខនឹងការបៀតបៀន យើងត្រូវស្រឡាញ់ព្រះយេហូវ៉ានិងទុកចិត្តលោកទាំងស្រុង ហើយយើងក៏ត្រូវជឿជាក់ទាំងស្រុងថាលោកមានមនោសញ្ចេតនាដ៏ជ្រាលជ្រៅចំពោះយើង។—ម៉ាថ. ២២:៣៦-៣៨; យ៉ា. ៥:១១
៥. តើអ្វីនឹងជួយអ្នកឲ្យយល់ថាព្រះយេហូវ៉ាស្រឡាញ់អ្នក?
៥ ចូរអានគម្ពីរជារៀងរាល់ថ្ងៃដោយមានគោលបំណងចូលកាន់តែជិតព្រះយេហូវ៉ា។ (យ៉ា. ៤:៨) កាលដែលអ្នកអានគម្ពីរសូមផ្ដោតអារម្មណ៍ទៅលើគុណសម្បត្ដិរបស់ព្រះយេហូវ៉ាដែលបង្ហាញអំពីមនោសញ្ចេតនាដ៏ជ្រាលជ្រៅរបស់លោក។ ពេលដែលអ្នកអានអ្វីដែលលោកបានមានប្រសាសន៍និងអ្វីដែលលោកបានធ្វើ សូមព្យាយាមយល់អំពីសេចក្ដីស្រឡាញ់ដ៏ធំធេងដែលលោកមានចំពោះអ្នក។ (និក្ខ. ៣៤:៦) អ្នកខ្លះប្រហែលជាពិបាកជឿថាព្រះស្រឡាញ់ពួកគេ ដោយសារពួកគេមិនធ្លាប់ទទួលសេចក្ដីស្រឡាញ់ពីអ្នកឯទៀតទេ។ បើអ្នកមានអារម្មណ៍បែបនេះ សូមសរសេរបញ្ជីមួយជារៀងរាល់ថ្ងៃអំពីរបៀបផ្សេងៗដែលព្រះយេហូវ៉ាបានបង្ហាញសេចក្ដីមេត្ដាករុណានិងសេចក្ដីសប្បុរសចំពោះអ្នក។ (ទំនុក. ៧៨:៣៨, ៣៩; រ៉ូម ៨:៣២) កាលដែលអ្នកគិតអំពីបទពិសោធន៍របស់អ្នក និងរំពឹងគិតអំពីអ្វីដែលអ្នកបានអានក្នុងបណ្ដាំរបស់ព្រះ អ្នកទំនងជាអាចនឹកឃើញអ្វីៗជាច្រើនដែលព្រះយេហូវ៉ាបានធ្វើសម្រាប់អ្នក។ បើអ្នកកាន់តែឲ្យតម្លៃចំពោះអ្វីៗដែលព្រះយេហូវ៉ាធ្វើ ចំណងមិត្តភាពរបស់អ្នកជាមួយនឹងលោកនឹងកាន់តែរឹងមាំ។—ទំនុក. ១១៦:១, ២
៦. យោងទៅតាមទំនុកតម្កើង ៩៤:១៧-១៩ តើសេចក្ដីអធិដ្ឋានអស់ពីចិត្តអាចជួយអ្នកយ៉ាងដូចម្ដេច?
៦ ចូរអធិដ្ឋានជាទៀងទាត់។ សូមស្រមៃគិតអំពីក្មេងប្រុសម្នាក់ដែលនៅក្នុងរង្វង់ដៃដ៏កក់ក្ដៅរបស់ឪពុក។ ក្មេងនោះមានអារម្មណ៍កក់ក្ដៅណាស់ ដូច្នេះគាត់ប្រាប់ឪពុករបស់គាត់ទាំងរឿងល្អទាំងរឿងអាក្រក់ដែលបានកើតឡើងចំពោះគាត់នៅថ្ងៃនោះ។ អ្នកក៏អាចមានទំនាក់ទំនងបែបនេះជាមួយនឹងព្រះយេហូវ៉ាដែរ បើអ្នកចូលទៅជិតលោកដោយអធិដ្ឋានអស់ពីចិត្តជារៀងរាល់ថ្ងៃ។ (សូមអាន ទំនុកតម្កើង ៩៤:១៧-១៩) កាលដែលអ្នកអធិដ្ឋានទៅព្រះយេហូវ៉ា សូម‹ចាក់ចិត្តអ្នកចេញដូចជាទឹក› ដោយប្រាប់បិតាដែលប្រកបដោយសេចក្ដីស្រឡាញ់អំពីការខ្វល់ខ្វាយនិងការភ័យខ្លាចទាំងអស់របស់អ្នក។ (បរិ. ២:១៩) តើនេះនឹងនាំឲ្យមានលទ្ធផលអ្វី? អ្នកនឹងទទួលអ្វីដែលគម្ពីរហៅថា«សេចក្ដីសុខសាន្តរបស់ព្រះដែលហួសពីការនឹកស្មាន»។ (ភី. ៤:៦, ៧) កាលដែលអ្នកកាន់តែអធិដ្ឋានបែបនេះ អ្នកនឹងកាន់តែមានអារម្មណ៍ជិតស្និទ្ធជាមួយនឹងព្រះយេហូវ៉ា។—រ៉ូម ៨:៣៨, ៣៩
ចិត្តក្លាហានមកពីការមានទំនុកចិត្តលើព្រះយេហូវ៉ានិងរាជាណាចក្ររបស់លោក
បងស្ទេនលី ចូនបានពង្រឹងជំនឿរបស់ខ្លួនដោយមានការជឿជាក់ថារាជាណាចក្ររបស់ព្រះគឺមានពិតប្រាកដ (សូមមើលវគ្គ៧)
៧. ហេតុអ្វីអ្នកត្រូវជឿជាក់ថាសេចក្ដីសន្យារបស់ព្រះស្តីអំពីរាជាណាចក្ររបស់លោកនឹងក្លាយជាការពិត?
៧ ចូរជឿជាក់ថាពរនៃរាជាណាចក្រព្រះនឹងកើតឡើងពិតមែន។ (ជន. ២៣:១៩) បើជំនឿរបស់អ្នកទៅលើសេចក្ដីសន្យាទាំងនោះគឺខ្សោយ សាថាននិងពួកអ្នកដែលនៅក្រោមអំណាចរបស់វាងាយស្រួលធ្វើឲ្យអ្នកភ័យខ្លាច។ (សុភ. ២៤:១០; ហេ. ២:១៥) តើអ្នកអាចពង្រឹងជំនឿរបស់អ្នកទៅលើរាជាណាចក្ររបស់ព្រះយ៉ាងដូចម្ដេចនៅឥឡូវនេះ? សូមលៃទុកពេលដើម្បីសិក្សាអំពីសេចក្ដីសន្យារបស់ព្រះស្តីអំពីរាជាណាចក្រលោក និងមូលហេតុដែលអ្នកអាចជឿជាក់ថាសេចក្ដីសន្យាទាំងនោះនឹងក្លាយជាការពិត។ តើនេះនឹងជួយអ្នកយ៉ាងដូចម្ដេច? សូមពិចារណាអំពីគំរូរបស់បងប្រុសស្ទេនលី ចូនដែលបានជាប់គុកអស់រយៈពេល៧ឆ្នាំដោយសារជំនឿ។ តើអ្វីបានជួយគាត់ឲ្យស៊ូទ្រាំយ៉ាងស្មោះត្រង់? គាត់និយាយថា៖ «មូលហេតុដែលខ្ញុំមានជំនឿរឹងមាំគឺដោយសារខ្ញុំមានចំណេះអំពីរាជាណាចក្រព្រះ និងអ្វីដែលរាជាណាចក្រនោះនឹងសម្រេច ហើយខ្ញុំមិនមានការសង្ស័យទាល់តែសោះចំពោះរឿងនេះ។ យ៉ាងនេះ គ្មានអ្នកណាអាចធ្វើឲ្យខ្ញុំចាកចេញពីព្រះយេហូវ៉ាបានឡើយ»។ បើអ្នកមានជំនឿរឹងមាំទៅលើសេចក្ដីសន្យារបស់ព្រះ អ្នកនឹងចូលកាន់តែជិតព្រះយេហូវ៉ា ហើយអ្នកនឹងមិនអនុញ្ញាតឲ្យការភ័យខ្លាចធ្វើឲ្យអ្នកឈប់បម្រើលោកឡើយ។—សុភ. ៣:២៥, ២៦
៨. តើទស្សនៈរបស់យើងចំពោះការចូលរួមកិច្ចប្រជុំបង្ហាញយ៉ាងណាអំពីយើង? សូមពន្យល់។
៨ ចូរចូលរួមកិច្ចប្រជុំរបស់គ្រិស្តសាសនិកជាទៀងទាត់។ កិច្ចប្រជុំជួយយើងឲ្យចូលកាន់តែជិតព្រះយេហូវ៉ា។ ទស្សនៈរបស់យើងចំពោះកិច្ចប្រជុំបង្ហាញថាយើងនឹងស៊ូទ្រាំខ្លាំងយ៉ាងណាពេលយើងប្រឈមមុខនឹងការបៀតបៀននៅថ្ងៃអនាគត។ (ហេ. ១០:២៤, ២៥) ហេតុអ្វី? ពីព្រោះ បើយើងអនុញ្ញាតឲ្យរឿងតូចតាចរារាំងយើងពីការចូលរួមកិច្ចប្រជុំនៅឥឡូវនេះ តើអ្វីនឹងកើតឡើងនៅថ្ងៃអនាគត ពេលយើងត្រូវប្រថុយគ្រោះថ្នាក់ដើម្បីជួបជុំជាមួយនឹងបងប្អូនរួមជំនឿរបស់យើង? ប៉ុន្តែ បើយើងតាំងចិត្តយ៉ាងមុតមាំដើម្បីចូលរួមកិច្ចប្រជុំនៅឥឡូវនេះ យើងនឹងមិនឈប់ចូលរួមពេលដែលអ្នកប្រឆាំងព្យាយាមបញ្ឈប់យើងពីការជួបជុំគ្នាឡើយ។ ឥឡូវនេះគឺជាពេលដែលយើងត្រូវឲ្យតម្លៃយ៉ាងខ្លាំងទៅលើការជួបជុំគ្នាដើម្បីគោរពប្រណិប័តន៍ព្រះជាទៀងទាត់។ ពេលយើងឲ្យតម្លៃទៅលើកិច្ចប្រជុំ គ្មានអ្វីអាចបញ្ឈប់យើងពីការស្ដាប់បង្គាប់ព្រះជាជាងមនុស្សឡើយ មិនថាមានការបៀតបៀន ឬរដ្ឋាភិបាលហាមឃាត់យើងមិនឲ្យប្រជុំគ្នាក្ដី។—សកម្ម. ៥:២៩
ការទន្ទេញចាំបទគម្ពីរនិងចម្រៀងនៅឥឡូវនេះ អាចជួយអ្នកឲ្យនឹកចាំអ្វីទាំងនោះ ហើយទទួលកម្លាំងចិត្តពេលអ្នកត្រូវគេបៀតបៀន (សូមមើលវគ្គ៩) *
៩. ហេតុអ្វីការទន្ទេញចាំបទគម្ពីរគឺជារបៀបដ៏ល្អមួយដើម្បីត្រៀមខ្លួនសម្រាប់ការបៀតបៀន?
៩ ចូរទន្ទេញចាំបទគម្ពីរដែលអ្នកចូលចិត្ត។ (ម៉ាថ. ១៣:៥២) ការចងចាំរបស់អ្នកប្រហែលជាមិនល្អឥតខ្ចោះទេ ប៉ុន្តែព្រះយេហូវ៉ាអាចប្រើសកម្មពលបរិសុទ្ធដ៏ខ្លាំងក្លារបស់លោកដើម្បីធ្វើឲ្យអ្នកនឹកឃើញបទគម្ពីរទាំងនោះ។ (យ៉ូន. ១៤:២៦) សូមកត់សម្គាល់អំពីអ្វីដែលបងប្រុសម្នាក់បានរៀបរាប់។ គាត់បានជាប់គុកនៅប្រទេសអាល្លឺម៉ង់ភាគខាងកើត ហើយបានត្រូវឃុំឲ្យនៅតែឯង។ គាត់និយាយថា៖ «ខ្ញុំសប្បាយចិត្តណាស់ដែលខ្ញុំបានទន្ទេញចាំបទគម្ពីររាប់រយ! យ៉ាងនេះ ទោះជាខ្ញុំបានត្រូវឃុំឲ្យនៅតែឯងក៏ដោយ ខ្ញុំបានរំពឹងគិតអំពីប្រធានបទផ្សេងៗពីគម្ពីរ»។ បទគម្ពីរទាំងនោះបានជួយបងប្រុសនេះឲ្យនៅជាប់នឹងព្រះយេហូវ៉ា ហើយស៊ូទ្រាំយ៉ាងស្មោះត្រង់។
(សូមមើលវគ្គ១០) *
១០. ហេតុអ្វីយើងគួរទន្ទេញចាំចម្រៀងរបស់យើង?
១០ ចូរទន្ទេញចាំនិងច្រៀងចម្រៀងពីសៀវភៅចម្រៀងយើង និងពីគេហទំព័ររបស់យើង។ ពេលប៉ូលនិងស៊ីឡាសបានជាប់គុកនៅក្រុងភីលីព ពួកគាត់បានច្រៀងចម្រៀងដែលពួកគាត់បានចងចាំដើម្បីសរសើរព្រះយេហូវ៉ា។ (សកម្ម. ១៦:២៥) ពេលបងប្អូនរបស់យើងនៅអតីតសហភាពសូវៀតបានត្រូវចាប់យកទៅតំបន់ស៊ីបេរី តើពួកគេបានធ្វើអ្វីដើម្បីពង្រឹងកម្លាំងរបស់ពួកគេ? បងស្រីម៉ារីយ៉ា ហ្វេឌូនបាននិយាយថា៖ «យើងបានច្រៀងចម្រៀងទាំងអស់ដែលយើងបានចងចាំពីសៀវភៅចម្រៀងរបស់យើង»។ គាត់និយាយថាចម្រៀងទាំងនោះបានលើកទឹកចិត្តពួកគេទាំងអស់គ្នា ហើយបានជួយពួកគេឲ្យមានអារម្មណ៍កាន់តែជិតស្និទ្ធជាមួយនឹងព្រះយេហូវ៉ា។ តើអ្នកទទួលកម្លាំងចិត្តឬទេ នៅពេលអ្នកច្រៀងចម្រៀងដែលអ្នកចូលចិត្តពីសៀវភៅចម្រៀងយើង និងពីគេហទំព័ររបស់យើង? ដូច្នេះ សូមទន្ទេញចាំបទចម្រៀងទាំងនោះនៅឥឡូវនេះ (សូមមើលប្រអប់ដែលមានចំណងជើងថា « សូមជួយខ្ញុំឲ្យក្លាហាន»)។
របៀបដែលអ្នកអាចមានចិត្តក្លាហានកាន់តែខ្លាំង
១១-១២. (ក) យោងទៅតាមសាំយូអែលទី១ ១៧:៣៧, ៤៥-៤៧ ហេតុអ្វីដាវីឌមានចិត្តក្លាហានខ្លាំងដល់ម្ល៉េះ? (ខ) តើយើងរៀនមេរៀនដ៏សំខាន់អ្វីពីគំរូរបស់ដាវីឌ?
១១ ដើម្បីប្រឈមមុខនឹងការបៀតបៀន អ្នកត្រូវមានចិត្តក្លាហាន។ បើអ្នកគិតថាអ្នកខ្វះចិត្តក្លាហាន តើអ្នកអាចធ្វើអ្វី? សូមចាំថាចិត្តក្លាហានពិតប្រាកដមិនអាស្រ័យទៅលើមាឌ កម្លាំង ឬសមត្ថភាពរបស់អ្នកទេ។ សូមពិចារណាអំពីគំរូរបស់ដាវីឌពេលគាត់ប្រឈមមុខនឹងកូលីយ៉ាតកាលដែលគាត់នៅក្មេង។ បើប្រៀបធៀបនឹងបុរសដ៏ធំសម្បើមនោះ ដាវីឌគឺតូចជាង ខ្សោយជាង និងគ្មានអាវុធគ្រប់គ្រាន់ដើម្បីច្បាំងទេ។ សូម្បីតែដាវក៏ដាវីឌគ្មានដែរ។ ប៉ុន្តែ គាត់ពោរពេញដោយចិត្តក្លាហាន។ ដាវីឌរត់ចូលដោយចិត្តក្លាហានទៅប្រយុទ្ធនឹងបុរសធំសម្បើមដែលមានអំណួតនោះ។
១២ ហេតុអ្វីដាវីឌមានចិត្តក្លាហានខ្លាំងដល់ម្ល៉េះ? គាត់ជឿជាក់យ៉ាងមុតមាំថាព្រះយេហូវ៉ានៅជាមួយនឹងគាត់។ (សូមអាន សាំយូអែលទី១ ១៧:៣៧, ៤៥-៤៧) ដាវីឌមិនបានផ្ដោតអារម្មណ៍ទៅលើមាឌរបស់កូលីយ៉ាតថាធំជាងគាត់យ៉ាងណាទេ។ ផ្ទុយទៅវិញ គាត់ផ្ដោតអារម្មណ៍ទៅលើភាពតូចល្អិតរបស់កូលីយ៉ាត បើប្រៀបធៀបនឹងព្រះយេហូវ៉ា។ តើយើងរៀនអ្វីពីកំណត់ហេតុនេះ? យើងនឹងមានចិត្តក្លាហាន បើយើងមានទំនុកចិត្តថាព្រះយេហូវ៉ានៅជាមួយនឹងយើង ហើយបើយើងជឿជាក់ថាពួកអ្នកដែលប្រឆាំងយើងគឺតូចតាចណាស់ បើប្រៀបធៀបនឹងព្រះដ៏មានឫទ្ធានុភាពខ្លាំងក្លាបំផុត។ (២រប. ២០:១៥; ទំនុក. ១៦:៨) តើយើងអាចពង្រឹងភាពក្លាហានរបស់យើងយ៉ាងដូចម្ដេចនៅឥឡូវនេះមុនការបៀតបៀនមកដល់?
១៣. តើយើងអាចធ្វើអ្វីដើម្បីមានចិត្តក្លាហានកាន់តែខ្លាំង? សូមពន្យល់។
១៣ យើងអាចមានចិត្តក្លាហានកាន់តែខ្លាំងនៅឥឡូវនេះដោយផ្សព្វផ្សាយដំណឹងល្អអំពីរាជាណាចក្ររបស់ព្រះ។ ហេតុអ្វី? ពីព្រោះការផ្សព្វផ្សាយបង្រៀនយើងឲ្យទុកចិត្តព្រះយេហូវ៉ា ហើយឲ្យយើងយកឈ្នះការភ័យខ្លាចចំពោះមនុស្ស។ (សុភ. ២៩:២៥) ដូចសាច់ដុំរបស់យើងកាន់តែរឹងមាំពេលយើងហាត់ប្រាណ យើងនឹងមានចិត្តក្លាហានកាន់តែខ្លាំងឡើង ពេលយើងផ្សព្វផ្សាយពីផ្ទះមួយទៅផ្ទះមួយ ផ្សព្វផ្សាយនៅកន្លែងសាធារណៈ ក្រៅផ្លូវការ និងនៅតំបន់ពាណិជ្ជកម្ម។ បើយើងមានចិត្តក្លាហានកាន់តែខ្លាំងក្នុងកិច្ចការផ្សព្វផ្សាយនៅឥឡូវនេះ យើងនឹងត្រៀមខ្លួនជាស្រេចដើម្បីបន្តផ្សព្វផ្សាយ ទោះជាកិច្ចការរបស់យើងបានត្រូវគេដាក់បម្រាមក៏ដោយ។—១ថែ. ២:១, ២
បងនែនស៊ី យឿនមិនព្រមឈប់ផ្សព្វផ្សាយដំណឹងល្អទេ (សូមមើលវគ្គ១៤)
១៤-១៥. តើយើងអាចរៀនអ្វីពីបទពិសោធន៍របស់បងនែនស៊ី យឿន និងបងវ៉ាលិនទីណា កាណូស្ខាយ៉ា?
១៤ យើងអាចរៀនមេរៀនជាច្រើនពីគំរូរបស់បងស្រីដ៏ស្មោះត្រង់ពីរនាក់ដែលបានបង្ហាញចិត្តក្លាហានដែលគួរឲ្យកោតស្ងើច។ បងស្រីនែនស៊ី យឿន មានកម្ពស់ប្រហែលមួយម៉ែត្រកន្លះប៉ុណ្ណោះ ទោះជាយ៉ាងនេះក៏ដោយគាត់មិនងាយភ័យខ្លាចទេ។ គាត់មិនព្រមឈប់ផ្សព្វផ្សាយដំណឹងល្អអំពីរាជាណាចក្ររបស់ព្រះឡើយ។ ហេតុនេះហើយ គាត់បានត្រូវគេដាក់គុកអស់រយៈពេលប្រហែលជា២០ឆ្នាំ នៅក្នុងរបបកុម្មុយនីស្តរបស់ប្រទេសចិន។ មន្ត្រីរដ្ឋាភិបាលដែលបានសួរចម្លើយគាត់បាននិយាយថា គាត់ជា«មនុស្សដែលក្បាលរឹងបំផុត»ក្នុងប្រទេសរបស់ពួកគេ។
បងវ៉ាលិនទីណា កាណូស្ខាយ៉ាជឿជាក់ថាព្រះយេហូវ៉ានៅជាមួយនឹងគាត់ (សូមមើលវគ្គ១៥)
១៥ ស្រដៀងគ្នាដែរ បងស្រីវ៉ាលិនទីណា កាណូស្ខាយ៉ាបានជាប់គុកនៅអតីតសហភាពសូវៀតអស់បីដង បើសរុបទៅគាត់ជាប់គុកអស់២១ឆ្នាំ។ * ហេតុអ្វី? ពីព្រោះគាត់បានតាំងចិត្តយ៉ាងមុតមាំក្នុងការបន្តផ្សព្វផ្សាយ រហូតដល់មន្ត្រីរដ្ឋាភិបាលហៅគាត់ថា«ឧក្រិដ្ឋជនដ៏គ្រោះថ្នាក់»។ តើអ្វីបានធ្វើឲ្យស្ត្រីដ៏ស្មោះត្រង់ទាំងពីរនាក់នេះមានចិត្តក្លាហានដូច្នេះ? ពួកគាត់ជឿជាក់ថាព្រះយេហូវ៉ានៅជាមួយនឹងពួកគាត់។
១៦. តើអ្វីជាគន្លឹះដើម្បីមានចិត្តក្លាហាន?
១៦ ដូចដែលយើងបានពិចារណារួចមកហើយថា ដើម្បីមានចិត្តក្លាហានកាន់តែខ្លាំង យើងមិនត្រូវផ្ដោតអារម្មណ៍លើកម្លាំងនិងសមត្ថភាពរបស់ខ្លួនទេ។ ផ្ទុយទៅវិញ យើងត្រូវជឿជាក់ថាព្រះយេហូវ៉ានៅជាមួយនឹងយើង ហើយថាលោកជាបុគ្គលដែលច្បាំងជំនួសយើង។ (ចោ. ១:២៩, ៣០; សាក. ៤:៦) នេះជាគន្លឹះដើម្បីមានចិត្តក្លាហាន។
អ្វីដែលអ្នកអាចធ្វើពេលមនុស្សស្អប់អ្នក
១៧-១៨. តើលោកយេស៊ូបានផ្ដល់ឲ្យយើងនូវការព្រមានអ្វីនៅយ៉ូហាន ១៥:១៨-២១? សូមពន្យល់។
១៧ យើងសប្បាយចិត្តពេលអ្នកឯទៀតគោរពយើង ប៉ុន្តែបើអ្នកឯទៀតមិនចូលចិត្តយើង យើងមិនគួរគិតថាយើងគ្មានតម្លៃនោះទេ។ លោកយេស៊ូបានមានប្រសាសន៍ថា៖ «កាលណាមនុស្សស្អប់អ្នករាល់គ្នា ឈប់រាប់អាន ជេរប្រមាថ និងបង្ខូចឈ្មោះអ្នក ទុកជាមនុស្សទុច្ចរិត ដោយសារកូនមនុស្ស នោះអ្នកមានសុភមង្គលហើយ!»។ (លូក. ៦:២២) តើពាក្យរបស់លោកយេស៊ូមានន័យយ៉ាងណា?
១៨ លោកយេស៊ូមិនចង់មានន័យថាគ្រិស្តសាសនិកនឹងចូលចិត្តការដែលអ្នកឯទៀតស្អប់ពួកគេទេ។ ផ្ទុយទៅវិញ លោកព្រមានយើងអំពីអ្វីដែលនឹងកើតឡើង។ យើងត្រូវគេស្អប់ដោយសារយើងមិនរួមចំណែកក្នុងពិភពលោកទេ។ យើងក៏មានរបៀបរស់នៅស្របតាមសេចក្ដីបង្រៀនរបស់លោកយេស៊ូ ហើយផ្សព្វផ្សាយដំណឹងដែលលោកបានផ្សព្វផ្សាយ។ (សូមអាន យ៉ូហាន ១៥:១៨-២១) សម្រាប់យើងអ្វីដ៏សំខាន់បំផុតគឺការធ្វើឲ្យព្រះយេហូវ៉ាពេញចិត្ត។ បើមនុស្សស្អប់យើងដោយសារយើងស្រឡាញ់បិតារបស់យើង នោះជាបញ្ហារបស់ពួកគេ។
១៩. តើយើងអាចធ្វើតាមគំរូរបស់ពួកសាវ័កយ៉ាងដូចម្ដេច?
១៩ សូមកុំឲ្យអ្វីដែលមនុស្សនិយាយឬធ្វើ នាំឲ្យអ្នកអៀនខ្មាសចំពោះការធ្វើជាសាក្សីព្រះយេហូវ៉ាឡើយ។ (មីកា ៤:៥) យើងអាចរៀនទប់ទល់នឹងការខ្លាចមនុស្ស ដោយពិចារណាអំពីគំរូរបស់ពួកសាវ័កនៅក្រុងយេរូសាឡិមមិនយូរក្រោយពីលោកយេស៊ូបានត្រូវគេសម្លាប់។ ពួកគេបានដឹងថាអ្នកដឹកនាំសាសនាយូដាស្អប់ពួកគេយ៉ាងខ្លាំង។ (សកម្ម. ៥:១៧, ១៨, ២៧, ២៨) ប៉ុន្តែជារៀងរាល់ថ្ងៃ ពួកគេបានបន្តទៅវិហារ ហើយតាមរយៈកិច្ចបម្រើផ្សាយ ពួកគេបានបង្ហាញថាពួកគេជាអ្នកកាន់តាមលោកយេស៊ូ។ (សកម្ម. ៥:៤២) ពួកគេមិនអនុញ្ញាតឲ្យការភ័យខ្លាចបញ្ឈប់ពួកគេទេ។ យើងក៏អាចយកឈ្នះការភ័យខ្លាចមនុស្ស ដោយប្រាប់គេថាយើងជាសាក្សីព្រះយេហូវ៉ា ទោះជាយើងនៅកន្លែងធ្វើការ នៅសាលារៀន ឬក្នុងតំបន់ដែលយើងរស់នៅក្ដី។—សកម្ម. ៤:២៩; រ៉ូម ១:១៦
២០. ហេតុអ្វីពួកសាវ័កត្រេកអរ ទោះជាពួកគេបានត្រូវគេស្អប់ក្ដី?
២០ ហេតុអ្វីពួកសាវ័កត្រេកអរ? ពីព្រោះពួកគេបានដឹងអំពីមូលហេតុដែលពួកគេបានត្រូវគេស្អប់ ហើយពួកគេបានចាត់ទុកថាការរងអំពើអាក្រក់ដោយសារពួកគេបានធ្វើតាមបំណងប្រាថ្នារបស់ព្រះយេហូវ៉ាគឺជាកិត្ដិយស។ (លូក. ៦:២៣; សកម្ម. ៥:៤១) សាវ័កពេត្រុសបានសរសេរក្រោយមកថា៖ «ទោះជាអ្នករាល់គ្នារងទុក្ខដោយសារសេចក្ដីសុចរិតក៏ដោយ ក៏អ្នករាល់គ្នាមានសុភមង្គលដែរ»។ (១ពេ. ២:១៩-២១; ៣:១៤) ពេលយើងយល់ថាយើងបានត្រូវគេស្អប់ដោយសារយើងធ្វើអ្វីដែលត្រឹមត្រូវ យើងនឹងមិនឲ្យការស្អប់ពីមនុស្សធ្វើឲ្យយើងឈប់បម្រើព្រះយេហូវ៉ាឡើយ។
អ្នកនឹងទទួលប្រយោជន៍ពីការត្រៀមខ្លួន
២១-២២. (ក) តើអ្នកបានសម្រេចចិត្តធ្វើអ្វីដើម្បីត្រៀមខ្លួនសម្រាប់ការបៀតបៀន? (ខ) តើយើងនឹងពិចារណាអ្វីក្នុងអត្ថបទបន្ទាប់?
២១ យើងមិនដឹងថាមនុស្សនឹងចាប់ផ្ដើមបៀតបៀនយើងនៅពេលណា ឬថាពេលណាដែលរដ្ឋាភិបាលនឹងដាក់បម្រាមទៅលើកិច្ចការរបស់យើងទេ។ ប៉ុន្តែ យើងដឹងថាយើងអាចត្រៀមខ្លួននៅឥឡូវនេះដោយពង្រឹងចំណងមិត្តភាពរបស់យើងជាមួយនឹងព្រះយេហូវ៉ា ដោយមានចិត្តក្លាហានកាន់តែខ្លាំងឡើង និងដោយរៀនឲ្យចេះស៊ូទ្រាំនឹងការស្អប់ពីមនុស្ស។ អ្វីដែលយើងធ្វើនៅឥឡូវនេះនឹងជួយយើងឲ្យបន្តបម្រើព្រះយេហូវ៉ានៅពេលអនាគត។
២២ ប៉ុន្តែចុះបើគេដាក់បម្រាមលើការគោរពប្រណិប័តន៍របស់យើង? ក្នុងអត្ថបទបន្ទាប់ យើងនឹងពិចារណាអំពីគោលការណ៍ដែលនឹងជួយយើងឲ្យបន្តបម្រើព្រះយេហូវ៉ា ទោះជាមានបម្រាមក្ដី។
ចម្រៀងលេខ១១៨ «សូមផ្ដល់ជំនឿមកយើងថែមទៀត»
^ វគ្គ 5 យើងមិនចង់ឲ្យគេស្អប់យើងទេ។ ប៉ុន្តែមិនយូរមិនឆាប់ យើងទាំងអស់គ្នានឹងត្រូវប្រឈមមុខនឹងការបៀតបៀន។ អត្ថបទនេះនឹងជួយយើងឲ្យប្រឈមមុខនឹងការបៀតបៀនដោយមានចិត្តក្លាហាន។
^ វគ្គ 65 ការពណ៌នាអំពីរូបភាព: ក្នុងអំឡុងពេលគោរពប្រណិប័តន៍ជាក្រុមគ្រួសារ ឪពុកម្ដាយជួយកូនរបស់ពួកគេឲ្យទន្ទេញចាំបទគម្ពីរដោយប្រើកាតមួយចំនួន។ នៅម្ខាងនៃកាតនោះ មានឈ្មោះខគម្ពីរ ហើយម្ខាងទៀតមានពាក្យដែលដកស្រង់ពីខគម្ពីរនោះ។
^ វគ្គ 68 ការពណ៌នាអំពីរូបភាព: ក្រុមគ្រួសារមួយជិះឡានទៅកិច្ចប្រជុំ ហើយហាត់ច្រៀងចម្រៀងរាជាណាចក្រជាមួយគ្នា។
