1. Le yɛɛ naŋ nɔ yɛ miŋ bɛɛndiaŋ le nyɛpalaa?

TUUPA ma dii Masanɔɔ naa Chiisu, mbo dimul buɛiyaa nduaa nyumma o wa a nda latulu waŋ maa waŋnda nɔ le nda yɛleŋ tullo le sabu ndɔɔ. (Chɔŋ 17:​14) Chɔŋ a teleŋ koŋ mbo huŋ bii a paaleŋ hau, wanaa tul piɛile tonyaleŋ leyɛ wa tusi niŋ wanaa Chɛhowaa nyɛpalaa choo tau. (2 Timo. 3:​12) Nduyɛ mɛɛ naŋ sɔɔŋguu o mɛɛlula chieeŋndo hoo fau, ŋ nɔ miŋ kɛsiŋ o kɔl maa yaamɔɔwaa naa cho naa chɔɔlu nyɛpalaa tusi choo.—Maa. 24:​9.

2-3. (a) Yɛɛ naŋ nɔ yɛ miŋ sina a siooŋnde okɔɔ? (b) Yɛɛ naŋ cho yɛ yaasiaa o buŋgɛi hei niŋ?

² Vɛɛ naŋ bɛɛndiaŋ yɛ suŋ suŋ le nyɛpalaa cho naa komal o chilaŋ niŋndo biuwɔŋndo? Ŋ nɔ miŋ chal yiyaŋndo a sɔɔŋ yɔŋnuŋ niŋ naa woŋ kpou le. Kanifuule, hei tosa miŋ luɛi o buulaŋndo niŋ nduyɛ mi siooŋnde bii naa. Yiyaŋndo a sɔɔŋ palaŋ cho naa komal loŋ tosa miŋ mal Chɛhowa piɛiyo tuupa pɛŋ miŋ komal naa. (Pulɔ. 12:​25; 17:​22) Siooŋnde cho nyɔɔ opilɛ o “Masa Nyina Wɔɔŋnda, o cho yaamɔɔnɔ [naa] wo” soliŋ kpeku le naa chɔulabaa wo ni. (1 Pitɛ 5:​8, 9) Vɛɛ naŋ bɛɛndiaŋ yɛ suŋ suŋ le nyɛpalaa komal niŋ naa o chilaŋ niŋndo biuwɔŋndo?

³ O buŋgɛi hei niŋ, ŋ cho yaasiaa mɛɛ naŋ kindi chaŋyɛi nɛi poŋ a Chɛhowa yɛ, vɛlɛ a sabu i cho suɛi sɔvɛ le keŋ tosaa suŋ suŋndo. Ŋ cho vɛlɛ sina nyɛ naŋ nɔ miŋ tosa le miŋ nɔ kɔl sikpaa wo. O mɛɛlulaŋ, ŋ cho chɔ nyɛ naŋ nɔ miŋ tosa wo te waŋnda tul naa pɛ leyɛ.

4. A mɛɛ Hibuluiya 13:​5, 6 dimi yɛ, nɛɛnɛ naŋ nɔ yɛ miŋ tiindaŋ, nduyɛ le yɛɛ?

⁴ Nɔ tiindaŋndo maa Chɛhowa kaala num nduyɛ maa fɛŋ bɛɛ o mel num te. (Nuawɔ Hibuluiya 13:​5, 6.) Le wɔsila bɔɔbɔɔ niŋ, mi Bandu Mɛŋgɛlaa dimi aa, “Wana sina Mɛlɛka nyɛkɛndɛiyo hiau ndu tiindaŋ a teleŋ nyɛpalaa wa wo.” Hei cho bɔɔ tonya! Le  miŋ biunuŋ nyɛpalaa nda tusi naa choo le mɛɛ naŋ cho Chɛhowa piɛiyo yɛ, mɛɛ miŋ nɔ fɛŋ kaalaa le ndu, nduyɛ miŋ dɔu tiindaŋ naa kpou o ndu niŋ. Fɛŋ bɛɛ ŋ nɔ miŋ kiisaŋ a kaala o nɔ le naa wo le.—Maa. 22:​36-38; Chemi. 5:​11.

5. Yɛɛ mala yɛ num ma laalaŋ kɛsɛ maa Chɛhowa kaala num?

⁵ Veelu diomndaŋ lepaa o lepaa o Baabuiyo niŋ le ma sɔɔŋguu Chɛhowa ikɛi kpɛɛluŋ. (Chemi. 4:​8) Te a wa pɛ diomndaŋ veeloo o Baabuiyo niŋ, kɛsi kɔllo o suliŋnda Chɛhowalaŋ choo. Nduyɛ ma kindiŋ le sinaa mɛɛ kpɛ o kaala num yɛ. (Ɛsɔ. 34:​6) I cho ikala le mi waŋnda apum laalaŋ maa Mɛlɛka kaala nda kanifuule, paale pilɛ bɛɛ waŋndo chɔmndɔ nda kaalaa le. Lelaŋ, a sina nyɛ cho kaalaa wo le. Te num bɛɛ nɔ pɛ yiyaŋ waa naa, mɛɛ lepaa o lepaa, o bɛnda ma yiyaŋ a nɛila yɛ yɛla Chɛhowa chɔm num nyiɛɛye a kɛndɛi laŋ. (Sam 78:​38, 39; Luomaŋ. 8:​32) Yiyaŋndo a sɔɔŋ yɔŋnuŋ num o yoomoo niŋndoŋ vɛlɛ a nyɛ ŋ cho pɛɛkoo o Baabuiyo niŋndo okɔɔ, mala num ma loonuŋ sɔɔŋ kɛndɛŋ Chɛhowa tosal num niŋndoŋ. Mɛɛ ŋ chɔm balika melaa le sɔɔŋ kɛndɛŋ Chɛhowa tosal num ndoŋ fau, lende ko chaŋyɛi ŋ nɔ a ndu ve hiau lachi a kaloo ni.—Sam 116:​1, 2.

6. A mɛɛ Sam 94:​18, 19 dimi yɛ, vɛɛ piɛileŋ o Chɛhowa lo a kɔllo kpou mala yɛ num?

⁶ Piɛi o Chɛhowa lo teleŋ o teleŋ. Yiyaŋndɔ a poombɔ pɔmbɔ finya ndɔ bii o bɛŋgu wo. Le mɛɛ o cho hɛnɛkɛ finya ndɔ o bɛŋgu yɛ, siooŋii bii ndu le finya ndɔ chɔmndo sɔɔŋ kɛndɔŋ a ŋ wɔɔŋ yɔŋnuŋ ndu o paale leŋ niŋndoŋ te. Num bɛɛ nɔla ma tuei chaŋyɛi waa lende yeela a Chɛhowa, te a sɔɔŋguu ndu pɛ ikɛi kpɛɛluŋ o piɛileŋ niŋ lepaa o lepaa. (Nuawɔ Sam 94:​18, 19.) Te a wa pɛ piɛileŋ o Chɛhowa lo, piɛi ndu ‘a kɔl numndo kpou.’ Dimul Finya num kaalaa siooŋii cho num o kɔlle vɛlɛ a buulaŋnda numndaŋ kpou. (Chaŋ. 2:​19) Yɛɛ cho yɛ wa fulamakɔɔlioo te a tosa hei pɛ? A cho “kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo” sɔla. (Filipi. 4:​6, 7) Mɛɛ ŋ hiau lachi fau a piɛile waa naa o Chɛhowa lo yɛ, lende ko ŋ sɔɔŋguu ndu ikɛi kpɛɛluŋ ni.—Luomaŋ. 8:​38, 39.

7. Le yɛɛ naŋ nɔ yɛ miŋ nɔ tiindaŋ kala kalaa maa sɔɔŋ Mɛlɛka mɛi lediom le tosaa o Masale ndɔleŋ bɛŋgu woŋ cho peelɔŋ?

⁷ Nɔ tiindaŋndo maa salala Masale Mɛlɛkaleŋ le huŋ niŋ ndaŋ la cho yɔŋnɔŋ. (Nɔm. 23:​19) Te a nɔ tiindaŋ o sɔɔŋ Mɛlɛka mɛi lediom ndoŋ niŋ te, mɛɛ i cho wa tɛtɛlɛ le mi Setana a wanaa nduaa luei num siooŋnde. (Pulɔ. 24:​10; Hibu. 2:​15) Vɛɛ ŋ kindi yɛ tiindaŋ numndo o Masale Mɛlɛkaleŋ niŋ suŋ suŋ? Chua teleŋndo le pɛɛkoo a sɔɔŋ Mɛlɛka mɛi lediom le tosaa o Masale ndɔleŋ bɛŋgu woŋ okɔɔ. Nduyɛ ma sina sabula ŋ nɔ ma tiindaŋ kɛsɛ maa sɔɔŋ muŋ cho peelɔŋndo. Vɛɛ hei mala yɛ num? Tofawɔ taamasi Staŋle Choŋs o ndaa dɔu o chiɛi manyumndo niŋ wɔsilaŋ la ŋɔmmɛu le laalaŋ ndɔɔ wo. * Yɛɛ mala yɛ ndu mbo biuŋ? Mbo dimi aa, “Le mɛɛ ya pɛɛku a Masale Mɛlɛkaleŋ okɔɔ  nduyɛ mi nɔ tiindaŋndo o nyɛ ya pɛɛku wo niŋ yɛ, paale pilɛ bɛɛ kiisaŋ luei ya o kɔl te. Lelaŋ, nyɛ o nyɛ hiiluu ya le.” A sɔɔŋguu Chɛhowa ikɛi kpɛɛluŋ te a nɔ pɛ tiindaŋ kala kalaa o sɔɔŋ o mɛi lediom ndoŋ niŋ, nduyɛ nyɛ o nyɛ luei num isiooŋ ma mal ndu piɛiyo le.—Pulɔ. 3:​25, 26.

8. Te ŋ kaala pɛ kɔlaŋ o bɔŋaŋndaŋ suŋ suŋ, yɛɛ cho yɛ wa fulamakɔɔlioo? Tɛɛsiaawɔ.

⁸ Wa kɔlaŋ o bɔŋaŋnda leKilisiɔŋndaŋ lɔɔlɔɔ. Bɔŋaŋndaŋ la mala naa ni le sɔɔŋguu wo Chɛhowa ikɛi kpɛɛluŋ. Te o yɔŋ pɛ miŋ kaala kɔlaŋ o bɔŋaŋndaŋ, mɛɛ ŋ nɔla niŋ miŋ biuŋ nyɛpalaa komal niŋ naa o chilaŋ niŋndo. (Hibu. 10:​24, 25) Le yɛɛ naŋ dimi yɛ lende? Te o yɔŋ pɛ mi bahawɛila pɔmbɔlaŋ la kuuna naa kɔlaŋ o bɔŋaŋndaŋ suŋ suŋ, yɛɛ cho yɛ niko yɔŋnɔŋ te masaa waa dɔu pɛ sawaa maa ŋ kua lɛ o laŋ te? O baa pilɔɔ choo, te ŋ kɛɛsiaŋ pɛ o kɔl suŋ suŋ maa ŋ bindu bɔŋaŋndaŋ te, sawa o sawa kuuna naa niŋ kɔlaŋ o laŋ te. Suŋ suŋ naŋ nɔ ni miŋ kaala bɔŋaŋnda naalaŋ. Te ŋ kaala pɛ kɔlaŋ o bɔŋaŋndaŋ, nyɛ o nyɛ kuuna naa Mɛlɛka diikɔŋndo le. O yɔŋ bɛɛ a masaa waa dɔu sawaa ni maa a cha lɛ naa kɔlaŋ o bɔŋaŋndaŋ te, ŋ yeŋ nda lani le.—Walta. 5:​29.

9. Le yɛɛ bolii Baabuiye kɛsiŋndo o kɔl cho yɛ nɛiyo opilɛ le bɛɛndiaŋndo le nyɛpalaa komal niŋ naa wo?

⁹ Kindiŋ ma kɛsiŋ bolii Baabui ŋ hɛnaŋ tau ve o kɔl. (Maa. 13:​52) Mi che bɛɛ ma puɛɛnuŋ ipum mɛɛ teleŋndo hiau fau, kɛ Chɛhowa nɔla mbo soliŋ nyina ndɔ diandaa kpeku le num malaa ma loonuŋ ndi vɛlɛ. (Chɔŋ 14:​26) Mi puaapilɛnɔ pilɛ o ndaa dɔu o chiɛi manyumndo niŋ Chamani ba paaleŋ le chaŋndo dimi aa, “I wa bɔɔ a kɔl kɛndɛ le mɛɛ yaa bii bolii Baabuiye o kɔl tau yɛ! Mi soliŋ teleŋ ya wa koŋ o chiɛi manyumndo niŋndo kpeku le yiyaŋndo o sɔɔŋ ya pɛɛku niŋ o Baabuiyo niŋndoŋ choo.” Mi bolii Baabui keŋ mala puaapilɛnɔ naa hoo le sɔɔŋguu wo Chɛhowa ikɛi, nduyɛ mbo nɔla vɛlɛ biuwɔŋndo.

10. Le yɛɛ naŋ nɔ yɛ miŋ kɛsiŋ chondoŋ o kɔl?

¹⁰ Kindiŋ ma kɛsiŋ chonduŋ saŋgala Chɛhowa woŋ o kɔl nduyɛ ma wa muŋ solioo. Mɛɛ nda dɔu Pɔɔl nda Sailaa o chiɛi manyumndo niŋ Filipai, ma soli chonduŋ saŋgala Chɛhowa woŋ ŋ ndaa kɛsiŋ o lakɔl loŋ. (Walta. 16:​25) O nɛi pilɔɔ hoo choo, yɛɛ ndoo mala yɛ puaapiliaa a ndepiliaa naa nda soli sindɛ Lɔɔsiaa a lɛŋii balu ndu ve ma kua a nda o biyɔɔ niŋ Saibiiliaa wa? Mi yema Maliya Fɛduŋ dimi aa, “Miŋ soli chonduŋ naŋ sina woŋ kpede, ŋ wa o yau ŋchondoo niŋndoŋ.” Mbo dimi maa mi chonduŋ muŋ dɛɛniaa nda kpou nduyɛ miŋ mala nda le sɔɔŋguu wo Chɛhowa ikɛi kpɛɛluŋ. Baa ma sɔla pa kɔl dɛɛniaa te a soli pɛ chonduŋ ŋ hɛnaŋ tau  woŋ le Chɛhowa saŋgalaa? Te o wa lende pɛ, mɛɛ suŋ suŋ ŋ nɔ ni ma kɛsiŋ muŋ o kɔl!—Tofa kɔfoo hoo “ Ke Ya Kɔl Sikpaa.”

11-12. (a) A mɛɛ Saamiɛɛ Tasoo 17:​37, 45-47 dimi yɛ, yɛɛ ndoo ke yɛ Deeve kɔl sikpaa? (b) Suɛi sɔvɛ kuɛɛ naŋ pɛɛku yɛ o taamasi Deeve wo niŋ?

¹¹ Le ma sim yi a teleŋ nyɛpalaa, kɔl sikpaa yeemaŋ ni. Kɛ te a sina pɛ maa a cho wana nɔ kɔl sikpa le, yɛɛ ŋ nɔ yɛ ma tosa? Kɛsiŋ o kɔl maa kɔl sikpa kpeekpeiyo nɔɔ sim naa maa mɛɛ ma wa heu, ɔɔ ma nɔ kpaayaa a kɔl kaloo tau le. Yiyaŋndɔ a taamasi Deeve wo okɔɔ mɛɛ o simul Koolaya. Te wanaa simi Deeve pɛ nda Koolaya, chɛlɛkpɛ taaniŋndo o wa ni nduyɛ ndoo sul bɛɛ lɔɔ bɔta le Koolaya le. Ndoo nɔ pɛŋ imɔɔ le Koolaya chɔulaba le. Kɛ a koŋ kpou, Deeve ndoo nɔ bɔɔ kɔl sikpaa. Mi Deeve simul po yoŋga koŋ le sɔŋgɔɔ mi che bɛɛ o wa heu.

¹² Yɛɛ ndoo ke yɛ Deeve kɔl sikpa waa naa? Ndoo nɔ tiindaŋndo o kala poŋ maa Chɛhowa wa a ndu latulu. (Nuawɔ Saamiɛɛ Tasoo 17:​37, 45-47.) Deeve kɛsi kɔllo o mɛɛ kpɛ Koolaya wa o bɛndu heu yɛ choo le. Kɛ mbo kɛsi kɔllo o mɛɛ Koolaya wa poombɔ pɔmbɔ Chɛhowa o hɔl lɛ choo. Yɛɛ naŋ pɛɛku yɛ o hei niŋ? Ŋ nɔla miŋ nɔ kɔl sikpaa te ŋ nɔ pɛ tiindaŋndo maa Chɛhowa cho a naa latulu. Nduyɛ miŋ laalaŋ vɛlɛ maa wanaa simul naa wa cho nyɛ o nyɛ le, te ŋ tuu nda pɛ a Mɛlɛka Kpou Kpou wo. (2 Kolo. 20:​15; Sam 16:​8) Vɛɛ naŋ taŋgullɛ kɔl sikpa naa suŋ suŋ, teleŋ nyɛpalaa hiŋndɔ hoo le wo?

13. Vɛɛ naŋ taŋgullɛ kɔl sikpa naa? Tɛɛsiaawɔ.

¹³ Ŋ taŋgul kɔl sikpaa suŋ suŋ te ŋ wa pɛ acheleŋnda yooŋgu kɛndɔɔ dimullo a Masale Mɛlɛkaleŋ okɔɔ. Le yɛɛ naŋ dimi yɛ lende? Kanifuule, yooŋgu kɛndɔɔ dimioo tosa miŋ tiindaŋ Chɛhowa, nduyɛ mi siooŋii waŋnda fula naa o lakɔl. (Pulɔ. 29:​25) Te ŋ wa pɛ dialloŋ hiiluuwo lɔɔlɔɔ, koŋ tosa miŋ wa kpeŋkpeleŋ. Mɛɛ lende ko i cho a kɔl sikpa naa ni. Te ŋ wa pɛ yooŋgu kɛndɔɔ dimioo chiɛiyo a chiɛiyo, o luŋ kpendekele, o baltaŋ niŋ a fondaŋ leyulaa, keŋ tosa miŋ chɔɔlu kɔl sikpaa nɔ. Te ŋ nɔ pɛ kɔl sikpaa suŋ suŋ le yooŋgu kɛndɔɔ dimioo, mɛɛ ŋ cho wa a bɛɛndiaŋ le hiouwɔɔ lachi a ndu dimioo, o yɔŋ bɛɛ mi masaa waa kɛɛlu wali naa o chilaŋ niŋ.—1 Tɛsa. 2:​1, 2.

14-15. Yɛɛ naŋ pɛɛku yɛ o taamasi Naŋcy Yuɛŋ a Valɛŋtina Kanosikaya wo niŋ?

¹⁴ Taamasi ndepiliaa laalaŋnda a ŋiɔɔŋ a chɔm kɔl sikpa kpeekpeiyo wa pɛɛku naa tau. Mɛsɛlaa pila Naŋcy Yuɛŋ ndoo mɛsɛla ni.  Bandii nduɛi wa le nɛiyo le ŋuɛɛnu (mɛtɛlɔɔ opilɛ a tala), kɛ o ve wana isiooŋ kposoŋ te. * Mɛɛ masaa waa kuuna ndu yooŋgu kɛndɔɔ dimioo a Masale Mɛlɛkaleŋ okɔɔ, o yeŋ nda lani le. Le hei, ma duau ndu o chiɛi manyumndo niŋ Chaina le wɔsilaŋ hiouwɔɔ 20. Mi wanaa bii ndu wa dimi maa o lɛŋnde Chaina leŋ niŋ kpou, “ndu ndoo hiou bolle kalaleŋ nɔ!”

¹⁵ Lende koni i yɔŋnuŋ a Valɛŋtina Kanosikaya ni. Ma duau ndu o chiɛi manyumndo niŋ Lɔɔsiaa bɛmbɔɔ leyaa le wɔsilaŋ 21. * Le sabu yɛɛ? Mbo kɛɛsiaŋ o kɔl le hiouwɔɔ lachi a yooŋgu kɛndɔɔ dimioo. Le hei, mi wanaa bii ndu wa dimi maa “wana tɛɛmbaa sawa wɔɔŋ wɔɔŋndo pila o cho ni.” Yɛɛ ndoo ke yɛ waŋlaanduaa laalaŋaa ŋiɔɔŋ nda haa kɔl sikpa waa naa? Ndaa nɔ tiindaŋndo kɛsɛ maa Chɛhowa wa a nda latulu.

16. Yɛɛ cho yɛ puundule kɔl sikpa kpeekpeiyo?

¹⁶ A mɛɛ naŋ yaasiaa yɛ, le miŋ nɔ kɔl sikpaa, ŋ nɔ miŋ tiindaŋ kpaaya naa a kɔl kalu naa le. Kɛ ŋ nɔ miŋ laalaŋ maa Chɛhowa cho a naa latulu, nduyɛ maa ndu cho chɔulabaa le naa ni. (Ditɔnɔ. 1:​29, 30; Sɛka. 4:​6) Puundule kɔl sikpa kpeekpeiyo le cho leŋ ni.

17-18. A mɛɛ Chɔŋ 15:​18-21 dimi yɛ, sila yɛɛ Chiisu ndoo ke yɛ naa? Tɛɛsiaawɔ.

¹⁷ Miŋ naŋ kɔl tau te acheleŋnda ke naa pɛ bɛɛleŋ. Kɛ ŋ nɔ miŋ yiyaŋ maa te waŋnda ke naa lebɛɛ le mɛɛ ŋ cho wanaa sɔvɛ le le. Mi Chiisu dimi aa, “Nya waŋnda tul leyɛ, nduyɛ, ma kɛɛ nya wa, la pɛl tɔnɔɔ. A yiou nya, ma tosa mi diola nyalaŋ la simnuŋ diola wɔɔŋ waŋnda o hɔl. Le mɛɛ nya tol wana nda veelu aa, Po Wana Pɔnɔɔ wo kɔɔli yɛ, nda tosa keŋ ni.” (Luku 6:​22) Yɛɛ Chiisu ndoo yiyaŋ yɛ?

¹⁸ O cho dimi le Chiisu wa maa, Kilisiɔŋnda yeema mi waŋnda tul nda leyɛ le. Kɛ a nyɛ nɔ le naa yɔŋnɔŋndo wo okɔɔ o yɔŋgu silaa ni. Ŋ cho le chieeŋndo le. Nyɛ Chiisu pɛɛku naa wo naŋ tual kɔɔli ni, nduyɛ yooŋgu ndoo dimul waŋnda wo koni naŋ cho hau dimioo ni. Le saboo hoo waŋnda tul naa leyɛ ni. (Nuawɔ Chɔŋ 15:​18-21.) Ŋ yeema miŋ nɛŋi Chɛhowa kɔl. Te  waŋnda tul naa pɛ leyɛ le mɛɛ naŋ kaala Finya naa yɛ, ŋ nɔ miŋ tambu kɔl le keŋ te.

19. Vɛɛ naŋ tuula yɛ taamasi wanaa Chiisu vem hɔlte ndɔ wa?

¹⁹ Fɛŋ bɛɛ chɛl mi nyɛ waŋnda chieeyaa taaniŋnda tosa ɔɔ dimi wo, tosa ma yɔŋ siɔmbulaŋ le chɔmndo maa Sei Chɛhowaa le ŋ cho le. (Makal 4:​5) Taamasi wanaa Chiisu vem hɔlte ndɔ wa kɛsi o piɔm ndɔɔ kɔɔli wo mala naa tau le siooŋii wanachioo soliŋndo o kɔl. Ndaa sina maa simlachiaa lepiɛiyaa Chuuwa tul nda leyɛ tau. (Walta. 5:​17, 18, 27, 28) Kɛ lepaa o lepaa a wa kɔlaŋ o chiɛi Mɛlɛkaa niŋ, nduyɛ ma hiau lachi a yooŋgu kɛndɔɔ dimioo kpendekele le chɔmndo maa buɛiyaa Chiisuaa nda cho ni. (Walta. 5:​42) A chɛl mi siooŋii wanachioo kuuna nda wali Chiisu ke nda wo tosaa le. Naa bɛɛ nɔla miŋ soliŋ siooŋii wanachioo o kɔl te ŋ wa pɛ yooŋgu kɛndɔɔ dimioo lɔɔlɔɔ, nduyɛ miŋ chɔm kpendekele maa Seiyaa Chɛhowaa naŋ cho ni o naa naŋ tosa wallo wa, o sukuu a o chalta naalaŋ.—Walta. 4:​29; Luomaŋ. 1:​16.

20. Le yɛɛ wanaa Chiisu vem hɔlte ndɔ wa wa yɛ a kɔl kɛndɛ, mi che bɛɛ ndaa tul nda leyɛ?

²⁰ Le yɛɛ wanaa Chiisu vem hɔlte ndɔ wa wa yɛ a kɔl kɛndɛ? Ndaa sina le sabu waŋnda ndaa tul nda leyɛ wo. Kɛ ma cha maa bɛɛle bɛndeŋ pila i cho le hɛnaŋ Chɛhowaa tosaa ni, o yɔŋ bɛɛ mi waŋnda tɛɛmbuu nda labɛɛ. (Luku 6:​23; Walta. 5:​41) Mi Pitɛ poonyiaa pɛŋ aa, “Te o wa pɛ mi waŋnda tosa ma sɔla nyɛ palaa le suɛi bɛnda ve tosaa, mɛɛ a pɛl tɔnɔɔ.” (1 Pitɛ 2:​19-21; 3:​14) Te ŋ sina pɛ maa le ikɛndɛi naŋ cho tosaa ve nda tul naa leyɛ ni, mɛɛ fɛŋ bɛɛ ŋ chɛl mi keŋ kuuna naa Chɛhowa piɛi le.

21-22. (a) Yɛɛ num kɛɛsiaa yɛ le tosaa le ma bɛɛndiaŋ le nyɛpalaa nda tusi niŋ naa choo wo? (b) Yɛɛ naŋ cho yɛ yaasiaa o buŋgɛi cho lachi ve niŋ?

²¹ Ŋ sina wɔ teleŋ waŋnda tusi niŋ naa nyɛpalaa choo ɔɔ masaa waa kɛɛlu naa niŋ Chɛhowa piɛiyo wo le. Kɛ ŋ sina maa ŋ nɔla miŋ bɛɛndiaŋ suŋ suŋ te o wa pɛ, miŋ kindi chaŋyɛi nɛi poŋ a Chɛhowa, miŋ taŋgul kɔl sikpa naa, nduyɛ miŋ biunuŋ yɛle waŋnda tul naa leŋ. Bɛɛndiaŋ naŋ cho suŋ suŋndo cho naa mala o chilaŋ niŋ miŋ sim yi, nduyɛ miŋ hiou lachi a Chɛhowa piɛiyo.

²² Kɛ te o wa yɛ a lekɛndɛi mi masaa waa kɛɛlu naa Chɛhowa piɛiyo o chilaŋ niŋ? O buŋgɛi cho lachi ve niŋ, ŋ cho yaasiaa sawala mandaala Baabuiyo le sinaa mɛɛ naŋ hiau lachi a Chɛhowa piɛiyo yɛ, o yɔŋ bɛɛ ma kɛɛlu naa.