1. Morwasinke natu liwapaikilira mahepeko ngesi?

KOMEHO Jesus va ka mu dipage, age kwa tente asi vantu navenye ava vana hara kukara varongwa vendi ngava va nyenga. (Joh. 17:14) Kutunda mosiruwo sina dogoro naina, vantu ava ava dili kukarera Jehova kuna kuhepeka Vakriste wovalimburukwi. (2 Tim. 3:12) Ngomu uhura wouzuni una kuhedera pepi, nonkore odo ngadi tu rwanesa unene kupitakana pwanare.—Mat. 24:9.

2-3. (a) Morwasinke utjirwe wa karera siponga? (b) Yisinke natu ka lironga mosirongwa esi?

² Ngapi omu natu liwapaikira mahepeko ngesi? Kapisi hepero tu gazadare kuhamena eyi ngayi tu horokera. Nsene tu yi rugana, ayo ngayi tu ninkisa tu kare noutjirwe ntani nosinka. Nsene tu gazadara unene kuhamena yininke yoyidona eyi ngayi tu horokera, ayo ngayi tu ninkisa tu kare nowoma ntani nokuhageka kukarera Jehova komeho maudigu ogo ngaga wize. (Yis. 12:25; 17:22) Utjirwe kuna kara sininke sosinene esi a ruganesa ‘nkore zetu Satana’ mokutuhagekesa kukarera Jehova. (1 Pet. 5:8, 9) Yisinke natu rugana ngesi yipo tu liwapaikire maheteko?

³ Mosirongwa esi, tatu ka lironga eyi natu rugana yipo tu nkondopeke ukaume wetu naJehova, ntani neyi yina karere nomulyo tu yi rugane ngesi. Natu ka lironga hena eyi natu rugana yipo tu twikire kukara nouradi. Ano konyima, natu ka lironga eyi natu rugana nsene vantu vana tu nyenge.

4. Kuliza noVahebeli 13:5, 6, yisinke twa hepa kupura nawa-nawa ntani morwasinke?

⁴ Yi pura nawa-nawa asi Jehova ga ku hara ntani kapi nga ku siga. (Resa Vahebeli 13:5, 6.) Nomvhura dononzi  dina ka pita, Ruhungu kwa tente asi: “Muntu ogu ga diva nawa Karunga, nga mu huguvara unene.” Nonkango odo usili! Mokulididimikira maudigu, twa hepa kuhara Jehova nokumuhuguvara ntani nokuyipura nawa-nawa asi age ga tu hara.—Mat. 22:36-38; Jak. 5:11.

5. Yisinke ngayi ku vatera o limonene eharo lyaJehova?

⁵ Resa Bibeli nkenye ezuva nositambo sokuhedera unene pepi naJehova. (Jak. 4:8) Ngomu ono kuresa, demenena koyikara yaJehova yoyiwa. Apa no resa kuhamena yininke eyi ga uyunga neyi ga rugana, hetekera ko kukwata egano omu ga ku hara unene. (Ex. 34:6) Vamwe kuvhura yi va karere udigu kuyipura asi Karunga ga va hara morwa kapi va va likida rumwe eharo. Nsene nove yimo ono kulizuvha ngoso, hetekera ko kutjanga nkenye ezuva nonkedi edi Jehova a ku likida nkenda. (Epis. 78:38, 39; Rom. 8:32) Ngomu ono kuteda ko kweyi wa pita ntani kweyi ono kuresa moNonkango daKarunga, ngayi ku vatera o gazadare yininke yoyinzi eyi ga ku ruganena. Nsene o kara norupandu kweyi ga ku ruganena Jehova, elikwatakano lyoge nage ngali nkondopara.—Epis. 116:1, 2.

6. Kuliza nEpisarome 94:17-19, uwa musinke no gwanena mo nsene o tantera Jehova yinka yoge nayinye?

⁶ Kanderera nkenye apa. Gazara kuhamena munonagona ogu ana kara momawoko goguhwe. Age kuvhura a kare nemanguruko lyokutantera oguhwe kuhamena yininke yoyiwa neyi yoyidona eyi yina mu horokere. Nove kuvhura o hafere elikwatakano lyangoso naJehova nsene o kanderera kwendi nkenye ezuva. (Resa Episarome 94:17-19.) Ngomu ono kukanderera kwaJehova, “zumbilira mutjima goge” kwendi nokumutantera yinka yoge nayinye. (Malira. 2:19) Uwa musinke ngo gwanena mo? Bibeli kutanta asi ove ngo gwana “mbili zaKarunga, ezi za pitakana unene nondunge nadinye.” (Fil. 4:6, 7) Nsene o kanderera kwaJehova monkedi ezi, ove ngo mu hedera unene pepi.—Rom. 8:38, 39.

7. Morwasinke no karera nepuro lyokupama momatumbwidiro gaKarunga kuhamena Uhompa asi ngaga ka sika mo?

⁷ Yi pura nawa-nawa asi matungiko goUhompa waKarunga ngaga ka sika mo. (Num. 23:19) Nsene kapi wa yi pura oyo, ayo ngayi kara ureru kwaSatana novantu vendi va ku tjilise. (Yis. 24:10; Heb. 2:15) Ngapi omu no nkondopeka epuro lyoge momatumbwidiro goUhompa waKarunga? Litulira po siruwo sokulironga kuhamena matumbwidiro goUhompa waKarunga neyi no karera nepuro asi ngaga ka sika mo. Koneka sihonena saStanley Jones ogu va tulire modorongo ure wonomvhura ntambali morwa epuro lyendi. * Yisinke ya mu vaterere a twikire kukara noulimburukwi? Age kwa tanta asi: “Epuro lyange  kwa peme morwa ame na divire kuhamena Uhompa waKarunga ntani neyi ngau ka rugana komeho. Ame kwa yi pulire nawa-nawa, yipo nye, kwato eyi ya vhulire kugusa nge ko kwaJehova. Nsene o kara nepuro momatumbwidiro gaKarunga, ove ngo mu hedera pepi ntani kwato eyi ngayi kutjilisa.—Yis. 3:25, 26.

8. Yisinke natu lirongera ko monkedi omu atu tara mapongo? Faturura.

⁸ Kara nkenye apa komapongo. Mapongo kutuvatera tu hedere pepi naJehova. Monkedi omu atu tara mapongo kulikida nsene ngayi ka tu tompoka kulididimikira mahepeko komeho ndi hawe. (Heb. 10:24, 25) Morwasinke tuna kuuyungira ngoso? Nsene ose kuna kupulisira ngesi maudigu gomanunu ga tu kondere mokudira kuza komapongo, ngoso ngayi ka tu tompoka nye kuza komapongo apa ngatu ka ligwanekera nomahepeko gomanene komeho ndi? Nsene tu litura mo ngesi mokukara nkenye apa komapongo, ngayi ka tu tompoka kutwikira kuponga kumwe novakwetu nampili apa varwanesi ngava ka heteka kutusilika. Twa hepa kurugana ko yuma ngesi yipo tu tunge po eharo lyokukara nkenye apa komapongo. Nsene tu hara mapongo, epangero kapi ngali vhura kutuhagekesa kulimburukwa Karunga kupitakana vantu.—Yirug. 5:29.

9. Morwasinke ya karera nomulyo tu kwate matjangwa gamwe momutwe komeho ngaga wize mahepeko?

⁹ Kwata momutwe matjangwa aga wa hara. (Mat. 13:52) Nampili ngomu atu divara-divara morwa kudira kusikilira mo, Jehova kuvhura a ruganese mpepo zendi zokupongoka mokutuvatera tu diworoke matjangwa ogo. (Joh. 14:26) Koneka eyi ga tente munazinyetu gumwe ogu ga kere gelike modorongo zomoNdovesiranda. Age kwa tente asi: “Ame kwa hefe sili unene kweyi na kwete momutwe matjangwa gomanzi. Nampili ngomu na kere nyamelike, ame ngani teda kuhamena yirongwa yomoBibeli.” Matjangwa ogo kwa vaterere munazinyetu a kare pepi naJehova nokutwikira kulimburukwa.

10. Morwasinke ya karera nomulyo tu kwate marusumo momutwe?

¹⁰ Kwata momutwe nokudimba marusumo gokuhamberera Jehova. Apa Paurusa naSirasa va kere modorongo moFilipi, awo kwa dimbire marusumo aga va kwete momutwe. (Yirug. 16:25) Mosiruwo setu, vanavazinyetu vamwe ava va kere moyirongo  eyi ngali pangere epangero lyaRusia, kwa va twere mounkwate koSiberia. Yisinke ya va vaterere va twikire kulididimika? Munazinyetu gomukadi Mariya Fedun, kwa tanta asi: “Ose ngatu dimbi marusumo nagenye aga twa divire mobuke zononsumo.” Age kwa tente hena asi marusumo ogo kwava korangedere nokuvavatera va hedere pepi naJehova. Nove yimo o lizuvhu ngoso apa o dimbi marusumo aga wa hara mobuke zononsumo ndi? Yipo nye, kwata marusumo ogo momutwe!—Tara kakende “ Jehova pe nge ko uradi.”

11-12. (a) Kuliza na-1 Samwere 17:37, 45-47, yisinke ya vaterere Ndafita a kare nouradi? (b) Yisinke natu lirongera ko kosihorokwa saNdafita?

¹¹ Mokupita momahepeko, wa hepa uradi. Yisinke no rugana nsene ono dimburura asi kapi wa kara nosikara oso? Diworoka asi uradi kapi wa korera kononkondo edi wa kara nado, ndi komusika goge ndi kevhuliko lyoge. Koneka eyi ga rugene Ndafita apa ga ka rwire naGolyata. Ndafita kwa kere mununu, kwato nonkondo ntani kapi ga kere noyirwiso ngwendi Golyata. Kapi ga kere hena nampili norufuro rooru. Nye nampili ngoso, Ndafita kwa kere nouradi. Age kwa zire a ka rwe nomugara ogo getundusika.

¹² Yisinke ya vaterere Ndafita a kare nouradi? Age ga yi pulire asi Jehova nage ga kere. (Resa 1 Samwere 17:37, 45-47.) Ndafita kapi ga demenene komusika gwaGolyata. Nye age kwa demenene omu Jehova ga tere Golyata. Yisinke natu lirongera ko kosihorokwa esi? Nose ngatu kara nouradi nsene tu yi pura asi Jehova nose ga kara, ntani nsene tu yi pura asi nonkore detu nayimwesi mokudihetakanesa naKarunga Munankondo nadinye. (2 Hist. 20:15; Epis. 16:8) Ngapi omu natu tunga po uradi ngesi komeho ngaga wize mahepeko?

13. Ngapi omu natu tunga po uradi? Faturura.

¹³ Kuvhura tu tunge po uradi nsene tu zuvhisa mbudi zongwa zoUhompa waKarunga. Ngapi omu kuzuvhisa aku tu vatere tu kare nouradi? Apa atu zuvhisa, ayo kutuvatera tu huguvare mwaJehova nokufunda po utjirwe. (Yis. 29:25) Ngwendi moomu tupu marutu getu aga pama apa atu ufena ndi atu liyomberesa, ose kuyakara nouradi wounene apa atu zuvhisa yi kare asi tunda embo zende embo ndi nkenye oku atu gwana vantu. Nsene tu tunga po uradi wokuzuvhisa ngesi, ayo ngayi tu vatera tu twikire  kuzuvhisa nampili sirugana setu va si hagekese.—1 Tes. 2:1, 2.

14-15. Yisinke natu lirongera ko kosihonena saNancy Yuen naValentina Garnovskaya?

¹⁴ Kuvhura tu lirongere ko kosihonena sovanavazinyetu wovakadi vavali ava va likidire uradi. Nancy Yuen kwa kere mukadi gouradi nampili ngomu ga kere musupi. * Age kwa nyokere kumuhagekesa kuzuvhisa mbudi zongwa. Eyi kwa mu ninkisire va mu ture modorongo moTjina ure wonomvhura 20. Vaporosi ava ngava mu puragere kwa tente asi age kwa kere “muntu gondino” mosirongo mudima.

¹⁵ Valentina Garnovskaya nage kwa mu tulire modorongo yikando yitatu, ano age kwa kere mo ure wonomvhura 21. * Morwasinke va mu tulilire modorongo? Age kwa tokomenene kudira kuhageka kuzuvhisa, ano eyi kwa ninkisire vaporosi va mu tumbure asi “mukorokotji gomunene.” Yisinke ya ninkisire vakadi ava vavali wovalimburukwi va kare nouradi? Awo kwa yi pulire nawa-nawa asi Jehova kwa kere nawo.

16. Yisinke nayi tu vatera tu kare nouradi wene-wene?

¹⁶ Ngomu tuna yi zogere, uradi kapi wa korera mononkondo nevhuliko lyetu, nye kwa korera mokupura nawa-nawa asi Jehova nose ga kara ntani yige ana kuturwira po. (Deut. 1:29, 30; Sak. 4:6) Eyi yiyo nayi tu vatera tu kare nouradi wene-wene.

17-18. Kuliza naJohanesa 15:18-21, erondoro musinke ga geve Jesus? Faturura.

¹⁷ Natuvenye kuyihafera apa vantu ava tu likida efumadeko. Nye kapisi tu lizuvhe asi ose kwato mulyo nsene vantu kapi vana tu hara. Jesus kwa tente asi: “One vanerago nsene vantu tava mu nyenge oku tava mu tjida-tjida va mu tumbure asi mu vadona, nye mokonda zaMunwaMuntu.” (Ruk. 6:22) Yisinke ga tembe Jesus?

¹⁸ Age kapi ga tente asi Vakriste ngava yi hafera apa vantu ngava va nyenga. Nye age  kwa geve erondoro kweyi ngayi tu horokera. Ose kapi twa hamena kouzuni ou. Ose kuparuka kuliza nomarongo gaJesus ntani kuzuvhisa mbudi ezi nga zuvhisa. Eyi kuninkisa vantu va tu nyenge. (Resa Johanesa 15:18-21.) Ose tuna hara kuhafesa Jehova. Yipo nye, ayo kapi ayi tu guvisa apa vantu ava tu nyenge morwa twa hara Jehova.

19. Ngapi omu natu honena vapositoli?

¹⁹ Kapisi tu pulisire eyi ava uyunga neyi ava rugana vantu yi tu ninkise tu life nomuga kukara gumwe goNombangi daJehova. (Mika 4:5) Kuvhura tu lirongere ko kudira kutjira vantu pokugazadara ko kweyi va rugene vapositoli moJerusarema konyima zonomfa daJesus. Awo va yi divire asi vampitisili womaukarelikarunga goVajuda kwa va nyengere. (Yirug. 5:17, 18, 27, 28) Nye nkenye ezuva awo ngava zi kontembeli ntani nokulidivisa kovantu asi awo varongwa vaJesus. (Yirug. 5:42) Awo kapi va pulisilire utjirwe u va hagekese kuzuvhisa. Nose kuvhura tu funde po utjirwe nsene tu lidivisa nkenye apa kovantu asi ose Nombangi daJehova, yi kare asi kosure ndi koyirugana ndi kovamusinda.—Yirug. 4:29; Rom. 1:16.

20. Yisinke ya ninkisire vapositoli va hafe nampili ngomu vantu va va nyengere?

²⁰ Morwasinke va haferere vapositoli vena? Awo va divire konda zeyi vantu va va nyengerere ntani awo kwa yi tere ngo mfumwa kuvahepekera sirugana saJehova. (Ruk. 6:23; Yirug. 5:41) Mupositoli Peturusa konyima kwa ya tjenge asi: “Nampili kuna mu hepekere uhungami, yilyo sa erago lyeni lyomu.” (1 Pet. 2:19-21; 3:14) Nsene tu yi kwata egano asi vantu kuna kutuhepekera morwa ose kurugana youhunga, ose kapi ngatu va pulisira va tu hagekese kukarera Jehova.

21-22. (a) Yisinke ono tokomene kurugana yipo o liwapaikire mahepeko gokomeho? (b) Yisinke ngatu ka lironga mosirongwa sokukwama ko?

²¹ Kapi tuna diva siruwo apa vantu ngava tameka kuturwanesa ndi apa epangero ngali tokora kuhagekesa sirugana setu. Nye twa yi diva asi twa hepa kuliwapaikira pokunkondopeka elikwatakano lyetu naJehova nokutunga po uradi ntani nokulironga kulididimikira nsene vantu vana tu nyenge. Nsene tu liwapikira ngesi, ayo ngayi tu vatera tu twikire kukarera Jehova nampili komeho.

²² Nye ngapi nsene ngava hagekesa sirugana setu komeho? Mosirongwa sokukwama ko, ngatu ka lironga nompango domoBibeli edi nadi tu vatera tu twikire kukarera Jehova nsene sirugana setu vana si hagekesa.