1. Ekuma tufwete kadila twakubama mu kuma kia lubangamu?

MUNA fuku wavitila lufwa lwandi, Yesu wa Mfumu eto wavova vo awonso ana kasola mu kala alongoki andi bangikwa besinga bangikwa. (Yoa. 17:14) Yamu wau, Akristu akieleka bebangikwanga kw’awana ke besambilanga Yave ko. (2 Tim. 3:12) Wau vo e mbaninu a nza yayi mu finama kaka ina, tufwete kala twakubama kadi e mbeni zeto besakisa kutubangika.—Mat. 24:9.

2-3. (a) Adieyi tufwete zaya mu kuma kia wonga? (b) Adieyi tulongoka mu longi diadi?

² Aweyi tulenda kubamena owau muna zizidila lubangamu? Ke dina kwandi mfunu ko mu yindula mambu mawonso malenda kutubwila. Avo tuvangidi wo, tulenda bakama kwa wonga ye ntokani. Ediadi dilenda kutuyoyesa vitila nkutu twawanana ye lubangamu. (Nga. 12:25; 17:22) O wonga i ntambu ketoma sadilanga o ‘Nkadi ampemba wa mbeni eto.’ (1 Pet. 5:8, 9) Adieyi tulenda vanga owau muna kala twakubama muna zizidila lubangamu?

³ Mu longi diadi, tulongoka una tulenda kumikina kikundi kieto yo Yave ye kuma dinina diamfunu mu vanga wo owau. Tuvovela mpe dina tulenda vanga muna siamisa unkabu weto. Kuna mfoko, tufimpa dina tulenda vanga vava mbeni zeto bekutubangikanga.

4. Landila e sono kia Ayibere 13:5, 6, nkia ziku tufwete kala kiau? Ekuma?

⁴ Kala ye ziku vo Yave otoma kuzolanga ye kesinga kubembola ko. (Tanga Ayibere 13:5, 6.) Se vioka mvu miayingi, Eyingidilu diavova vo: “Ndiona otomene zaya Nzambi, okumbunda e vuvu muna ntangw’a lubangamu.” Ediadi dialudi kikilu! Muna  zizidila lubangamu, tufwete zola Yave yo kumbund’e vuvu. Ke tufwete katikisanga ko kana vo Yave okutuzolanga.—Mat. 22:36-38; Yak. 5:11.

5. Adieyi dilenda kusadisa mu bakula vo Yave okuzolanga?

⁵ Tanganga Nkand’a Nzambi lumbu yawonso ye kani dia kumika kikundi kiaku yo Yave. (Yak. 4:8) Ekolo otanganga o Nkand’a Nzambi, sianga e sungididi muna fu ya Yave. Vava bakula o zola yo walakazi wa Yave muna mawonso kevovanga yo vanga. (Luv. 34:6) Diampasi dikalanga kwa akaka mu kwikila vo Nzambi okubazolanga kadi ke vena muntu ko okubasonganga o zola. Avo ngindu zazi okalanga zau, sonekanga konso lumbu e mambu mambote kevanganga o Yave mu kuma kiaku. (Nku. 78:38, 39; Roma 8:32) Avo oyindwidi mana mabwila kala muna zingu yo badika mana otanganga muna Diambu dia Nzambi, olenda soneka mambu mayingi mana Yave kevanganga muna wete diaku. O songa luyangalalu muna mawonso Yave kevanganga muna wete diaku dikumika e kikundi kiaku yo yandi.—Nku. 116:1, 2.

6. Landila e sono kia Nkunga 94:17-19, aweyi e sambu kilenda kusadisila?

⁶ Kwamanana samba. Yindula mwan’akete obimbakanuanga kwa se diandi. O mwana kena ye wonga ko wa zayisa kwa se diandi o mambu mambote ye mambu mambi mavangamene muna lumbu kiakina. Olenda kala ye kikundi kia mpila yayi yo Yave avo umfinamene lumbu yawonso muna sambu. (Tanga Nkunga 94:17-19.) Ekolo osambanga kwa Yave, “pongola ntim’aku nga maza” yo kunzayisa e mambu mekutwasilanga wonga ye ntelamw’a moyo. (Man. 2:19) Nkia nluta dikutwasila? Otambula luvuvamu luna Nkand’a Nzambi uyikilanga vo “luvuvamu lwa Nzambi luna luviokele umbakuzi wawonso.” (Fili. 4:6, 7) Avo osambidi muna mpila yayi, e kikundi kiaku yo Yave kiwokela.—Roma 8:38, 39.

7. Ekuma ofwete kadila ye ziku vo e nsilu mia Nzambi mu kuma kia Kintinu kiandi lungana kikilu milungana?

⁷ Kala ye ziku vo e nsilu mu kuma kia Kintinu kia Nzambi lungana kikilu milungana. (Nta. 23:19) Avo kuna ye ziku ko vo e nsilu mia Nzambi lungana kikilu milungana, diasazu dikala kwa Satana ye awana bena kuna nsi a wisa kiandi muna kumwesa wonga. (Nga. 24:10; Ayib. 2:15) Aweyi olenda kumikina lukwikilu lwaku muna Kintinu kia Nzambi owau? Vaulanga e ntangwa ya longoka e nsilu mia Nzambi mu kuma kia Kintinu ye kuma olenda kadila ye ziku vo e nsilu miami lungana kikilu milungana. Ekuma dinina diambote mu vanga wo? Badika e nona kia mpangi Stanley Jones, ona wasiwa muna pelezo mu mvu nsambwadi mu kuma kia lukwikilu lwandi. * Adieyi diansadisa mu sikila ye kwikizi? Wavova vo: “Lukwikilu lwame lwakumama lwakala mu kuma kia zayi wa Kintinu kia Nzambi ye mana kisinga lungisa. Kiakala ye lukatikisu ko. Muna kuma  kiaki, ke vakala muntu ko walenda kumvambanesa yo Yave.” Avo okumikini lukwikilu lwaku muna nsilu mia Nzambi, otoma finama Yave ye kuyambula kunsadila ko mu kuma kia wonga.—Nga. 3:25, 26.

8. E mpila tubadikilanga e tukutakanu tweto adieyi isonganga? Sasila.

⁸ Lungananga muna tukutakanu. O tukutakanu tukutusadisanga mu finama Yave. E mpila tubadikilanga tukutakanu tweto isonganga kana yamu nkia tezo tulenda zizidila lubangamu tusinga wanana lwau kuna ntwala. (Ayib. 10:24, 25) Ekuma tulenda wo vovela? Avo tuyambwidi vo e mambu makete-kete matukakidila mu kwenda muna tukutakanu owau, adieyi divangama kuna ntwala avo dikitukidi se dia vonza mu lungana vamosi ye mpangi zeto? Kuna diak’e sambu, avo twayibakila kala e nzengo za lembi kondwanga muna tukutakanu, ke tuyambula wo vanga ko avo atantu batusimini twayambula lungana ye mpangi zeto. Eyayi i ntangwa tufwete yima e fu kia yangalela tukutakanu tweto. Avo tuyangalelanga tukutakanu tweto, ke vekala mbeni ko ngatu nsiku wa luyalu ulenda kutufila mu yambula lemvokela Nzambi, vana fulu kia lemvokela wantu.—Mav. 5:29.

9. O lunda e sono ya Nkand’a Nzambi muna ntu i mpila yambote tulenda kubamena muna zizidila lubangamu. Ekuma?

⁹ Lundanga muna ntu e sono ya Nkand’a Nzambi otoma zolanga. (Mat. 13:52) Wau vo tomfo twaku ke twalunga ko, olenda vilakana. Kansi, Yave olenda sadila o mwand’andi avelela muna kusungamesa e sono yayi. (Yoa. 14:26) Mpangi mosi wakala mu pelezo kuna este ya Alemanha yo siwa mu suku dia yandi mosi kaka, wavova vo: “Kiese kiayingi yamonanga wau vo yalendanga sungamena sono yayingi. Wau vo mono mosi kaka yakala, yasadilanga e lau diadi muna badika mambu mayingi ma Nkand’a Nzambi.” E sono ina o mpangi eto kasungamenanga yansadisa mu finama Yave yo sikila ye kwikizi.

10. Ekuma dinina diambote mu sungamenanga e nkunga mia Kintinu muna ntu?

¹⁰ Sungamenanga yo yimbila e nkunga mikembelelanga Yave. Vava Filipi, Paulu yo Sila bakala muna pelezo, bayimbilanga e nkunga mina batoma zaya muna kembelela Nzambi. (Mav. 16:25) Diau dimosi mpe, vava ampangi kuna União Soviética banatwa muna kinkole kuna Sibéria, adieyi bavanga muna kumika lukwikilu lwau? Mpangi mosi ankento una ye nkumbu a Mariya Fedun wavova vo:  “Twayimbilanga e nkunga miawonso twazaya miakala muna nkand’eto a nkunga.” O mpangi wavova vo e nkunga miami miabakasakesanga yo kubasadisa mu toma finama Yave. Nga lukwikilu lwaku lukumamanga vava oyimbilanga e nkunga mia Kintinu otoma zolanga? Avo i wau, vanga mawonso muna lundanga e nkunga miami muna ntu.—Tala e babu “ Umpana Unkabu.”

11-12. (a) Landila e sono kia 1 Samuele 17:37, 45-47, ekuma Davidi kakadila ye unkabu? (b) Nkia diambu diamfunu tulenda longoka muna mbandu a Davidi?

¹¹ Muna zizidila lubangamu, unkabu ovuidi o mfunu. Adieyi olenda vanga avo mwene vo kuna ye unkabu ko? Sungamena vo unkabu wakieleka ke ukwizilanga mu kuma kia ntela ko yovo nkuma ngatu ngangu. Badika e nona kia nleke Davidi vava kanuana ye Ngoleyate. Avo tutezanese Davidi ye Ngoleyate, tumona vo Davidi wakete kikilu ye kakala watoma kubama ko muna nuana. Davidi kakala nkutu ye nsosolo ko. Kana una vo i wau, nkwa unkabu kakala. Kuna unkabu wawonso, Davidi wanuana ye Ngoleyate wakala vo bamb’a ngolo.

¹² Ekuma Davidi kakadila ye unkabu? Kadi wakwikilanga vo Yave wakala yandi. (Tanga 1 Samuele 17:37, 45-47.) Davidi kasia sungididi mu ntel’a Ngoleyate ko ngatu kuyitezanesa yo yandi. Kansi, wazaya wo vo Ngoleyate wakete kakala vana meso ma Yave. Adieyi tulenda longoka muna lusansu lwalu? Tulenda kala ye unkabu avo tukedi ye ziku vo Yave una yeto yo sungamena vo atantu eto akete bena vana meso ma Nzambi wa Mpungu-ngolo. (2 Tus. 20:15; Nku. 16:8) Aweyi tulenda kumikina o unkabu weto owau vitila lubangamu lwiza?

13. Aweyi tulenda kumikina o unkabu weto? Sasila.

¹³ Tulenda kumika o unkabu weto owau muna samunanga e nsangu zambote za Kintinu kia Nzambi. Aweyi e salu kia umbangi kikutuvaninanga unkabu? Kadi vava tusamunanga e nsangu zambote, tulongokanga bunda e vuvu muna Yave yo sunda o wonga wa wantu. (Nga. 29:25) Nze una e mianzi mikumamenanga vava tunananga e nitu, o unkabu weto mpe ukumamanga vava tusamunanga e nsangu zambote mu nzo ye nzo, mu fulu ya ndonga, sila umbangi kuna kinsalukisa ye muna fulu ya tekela. Avo tukedi ye unkabu wa samuna e nsangu zambote owau, tukala twakubama mu kwamanana sila umbangi kana nkutu vo e salu kieto kisiminu.—1 Tes. 2:1, 2.

14-15. Adieyi tulenda longoka muna nona kia mpangi Nancy Yuen yo mpangi Valentina Garnovskaya?

 ¹⁴ Tulenda longoka mayingi muna mbandu a mpangi zole z’amakento akwa kwikizi ana basonga unkabu. Kana una vo mpangi Nancy Yuen wankufi kikilu kakala (tezo kia meta mosi ye ndambu), kansi nkwa unkabu kakala. * Vava bansima vo kayambula samuna e nsangu zambote za Kintinu kia Nzambi, mpangi Nancy katonda ko. Muna kuma kiaki, wasiwa muna pelezo mu tezo kia 20 ma mvu kuna China. Mfumu za luyalu ana bafundisa mpangi Nancy bavova vo yandi i “muntu wasunda o lulendo” muna nsi yawonso.

¹⁵ E nona kiankaka kia mpangi Valentina Garnovskaya ona wasiwa mu pelezo kuna União Soviética mu nkumbu tatu, tezo kia mvu 21 kavanga muna pelezo. * Ekuma? Kadi wakala ye kani dia kwamanana samuna e nsangu zambote. E mfumu za luyalu banyikila nkutu vo “kimpumbulu.” Adieyi diasadisa mpangi zole zazi zakwikizi mu songa unkabu? Bakala ye ziku vo Yave wakala yau.

16. Azeyi i nsabi muna kala ye unkabu wakieleka?

¹⁶ Nze una tuvovele kala, muna kumika o unkabu weto, ke tufwete bunda vuvu mu ngolo ye ngangu za yeto kibeni ko. Kansi, tufwete kala ye ziku vo Yave una yeto ye okututanina. (Nsi. 1:29, 30; Zak. 4:6) Ezazi i nsabi muna kala ye unkabu wakieleka.

17-18. Landila e sono kia Yoane 15:18-21, nkia lulukisu katuvana o Yesu? Sasila.

¹⁷ Tukalanga ye kiese vava wantu bekutuzitisanga, kansi ke tufwete yindula ko vo ke tuna mfunu ko avo wantu ke bekutuzitisanga ko. Yesu wavova vo: “Nukala ye kiese konso ntangwa o wantu bekunumenga, kunubembola, kunuveza yo yivisa e nkumbu zeno nze yimpumbulu muna diambu dia Mwan’a muntu.” (Luka 6:22) Adieyi Yesu kazola vova?

¹⁸ Yesu kazola vova ko vo Akristu kiese kia  siwa kitantu bemonanga. Kansi, watulukisa mu kuma kia dina dilenda kutubwila. Wau vo yeto ke tu a nza ko, tulemvokelanga malongi ma Yesu muna zingu kieto yo samuna e nsangu zina kasamunanga. Muna kuma kiaki, e nza ikutumenganga. (Tanga Yoane 15:18-21.) Edi disundidi o mfunu kwa yeto i yangidika Yave. Muna kuma kiaki, avo wantu batusidi kitantu mu kuma kia zola kweto muna Yave, e diambu kwa yau dina.

19. Aweyi tulenda tanginina e mbandu ya ntumwa za Yesu?

¹⁹ Kuyambula ko vo e mvovo yovo mavangu ma wantu mafila mu mona nsoni za kala mosi muna Mbangi za Yave. (Mika 4:5) Tulenda sunda wonga wa wantu avo tubadikidi e mbandu batusisila antumwa kuna Yerusaleme vava Yesu kavondwa. Bazaya wo vo kitantu basiwanga kwa mfumu za nsambil’a Kiyuda. (Mav. 5:17, 18, 27, 28) Kana una vo i wau, e lumbu yawonso bayendanga kuna tempelo yo kuyisunzula vo alongoki a Yesu. (Mav. 5:42) Ke bayambula ko vo wonga wabakakidila. Yeto mpe tulenda sunda wonga wa wantu vava tukuyisunzulanga vo tu Mbangi za Yave kuna salu, sikola yovo kuna belo kieto.—Mav. 4:29; Roma 1:16.

20. Ekuma antumwa bakadila ye kiese kana una vo basiwanga kitantu?

²⁰ Ekuma antumwa bakadila ye kiese? Kadi bazaya e kuma basilwanga kitantu. Babadikilanga dio se lau diampwena dia mweswa e mpasi mu kuma kia vanga luzolo lwa Yave. (Luka 6:23; Mav. 5:41) Kuna kwalanda, Petelo wa ntumwa wasoneka vo: “Avo numwene mpasi mu kuma kia unsongi, nuyangalala.” (1 Pet. 2:19-21; 3:14) Avo tubakwidi vo tumengwanga mu kuma kia vanga oma mansongi, ke tuyambula sadila Yave ko mu kuma kia wonga wa wantu.

21-22. (a) Adieyi ozolele kwamanana vanga mu kala wakubama muna zizidila lubangamu? (b) Adieyi tuvovela muna longi dilanda?

²¹ Ke tuzeye ko kana nkia ntangwa o wantu beyantika kutubangika yovo sima e salu kieto. Kansi, tuzeye wo vo tulenda kubama tuka owau. Muna kuma kiaki, tufwete siamisa kikundi kieto yo Yave, kumika unkabu weto yo longoka una tulenda zizidila kitantu. O toma kubama owau dikutusadisa mu kwamanana sadila Yave muna lumbu ikwiza.

²² Kansi, adieyi tuvanga avo e salu kieto kisiminu? Muna longi dilanda, tuvovela e nkanikinu milenda kutusadisa mu kwamanana sadila Yave kana nkutu vo e salu kieto kisiminu.