ບົດຄວາມສຶກສາທີ 27
ກຽມພ້ອມຮັບມືກັບການຂົ່ມເຫງຕັ້ງແຕ່ຕອນນີ້
“ຄົນທຸກຄົນທີ່ມີນ້ຳໃຈກະທຳການຊອບໃນພະຄລິດເຍຊູກໍຈະຖືກການຂົ່ມເຫງ.”—2 ຕີໂມ. 3:12
ເພງ 129 ເຮົາຈະອົດທົນຕໍ່ໄປ
ໃຈຄວາມສຳຄັນ *
1. ເປັນຫຍັງເຮົາຕ້ອງກຽມພ້ອມທີ່ຈະຮັບມືກັບການຂົ່ມເຫງ?
ໃນຄືນກ່ອນທີ່ພະເຍຊູຈະຕາຍ ເພິ່ນບອກວ່າທຸກຄົນທີ່ເຂົ້າມາເປັນລູກສິດຂອງເພິ່ນຈະຖືກກຽດຊັງ. (ໂຢ. 17:14) ຕັ້ງແຕ່ຕອນນັ້ນຈົນຮອດຕອນນີ້ ພະຍານພະເຢໂຫວາທີ່ສັດຊື່ກໍຖືກຄົນທີ່ບໍ່ໄດ້ນະມັດສະການພະເຢໂຫວາຂົ່ມເຫງ. (2 ຕີໂມ. 3:12) ໃນຂະນະທີ່ໂລກນີ້ໃກ້ຈະເຖິງຈຸດຈົບ ເຮົາຄາດໝາຍໄດ້ເລີຍວ່າສັດຕູຂອງເຮົາຈະຕໍ່ຕ້ານເຮົາຫຼາຍຂຶ້ນ.—ມັດ. 24:9
2-3. (ກ) ເປັນຫຍັງຄວາມຢ້ານຈຶ່ງເປັນອັນຕະລາຍ? (ຂ) ເຮົາຈະພິຈາລະນາຫຍັງໃນບົດຄວາມນີ້?
2 ເຮົາຄວນກຽມພ້ອມທີ່ຈະຮັບມືກັບການຂົ່ມເຫງຕັ້ງແຕ່ຕອນນີ້ໄດ້ແນວໃດ? ເຮົາບໍ່ຈຳເປັນຕ້ອງຄິດແຕ່ສິ່ງທີ່ບໍ່ດີທີ່ຈະເກີດຂຶ້ນກັບເຮົາ. ຖ້າເຮົາຄິດແບບນັ້ນ ເຮົາອາດຈະອຸກໃຈແລະຢ້ານຫຼາຍເກີນໄປຈົນເຊົາຮັບໃຊ້ພະເຢໂຫວາທັງໆທີ່ເລື່ອງນີ້ຍັງບໍ່ໄດ້ເກີດຂຶ້ນ. (ສຸພາ. 12:25; 17:22) ຄວາມຢ້ານເປັນອາວຸດທີ່ມີພະລັງຫຼາຍເຊິ່ງ ‘ພະຍາມານສັດຕູຂອງເຮົາ’ ມັກໃຊ້ເພື່ອໂຈມຕີເຮົາ. (1 ເປ. 5:8, 9) ແລ້ວເຮົາຈະເຮັດຫຍັງເພື່ອກຽມຕົວເຮົາໃຫ້ອົດທົນຕໍ່ການຂົ່ມເຫງ?
3 ໃນບົດຄວາມນີ້ ເຮົາຈະພິຈາລະນາວ່າ ເຮົາຈະເສີມສ້າງສາຍສຳພັນຂອງເຮົາກັບພະເຢໂຫວາໃຫ້ເຂັ້ມແຂງຂຶ້ນໄດ້ແນວໃດ ແລະເປັນຫຍັງການເຮັດແບບນັ້ນຕັ້ງແຕ່ຕອນນີ້ຈຶ່ງສຳຄັນ. ຈາກນັ້ນ ເຮົາຈະມາເບິ່ງວ່າເຮົາຈະມີຄວາມກ້າຫານຫຼາຍຂຶ້ນໄດ້ແນວໃດ ແລະສຸດທ້າຍເຮົາຈະມາເບິ່ງວ່າເຮົາຈະເຮັດແນວໃດເມື່ອມີຄົນຊັງເຮົາ.
ວິທີທີ່ເຮັດໃຫ້ສາຍສຳພັນຂອງເຮົາກັບພະເຢໂຫວາເຂັ້ມແຂງຂຶ້ນ
4. ຕາມທີ່ຂຽນໄວ້ໃນເຫບເລີ 13:5, 6 ເຮົາຕ້ອງໝັ້ນໃຈເລື່ອງຫຍັງ ແລະຍ້ອນຫຍັງ?
4 ໃຫ້ໝັ້ນໃຈວ່າພະເຢໂຫວາຮັກເຮົາ ແລະພະອົງຈະບໍ່ຖິ້ມເຮົາ. (ອ່ານເຫບເລີ 13:5, 6) ຫຼາຍປີທີ່ຜ່ານມາ ມີຫໍສັງເກດການ ສະບັບໜຶ່ງບອກວ່າ: “ຜູ້ທີ່ຮູ້ຈັກພະເຈົ້າເປັນຢ່າງດີຈະໄວ້ວາງໃຈພະອົງແທ້ໆເມື່ອເຈິການຂົ່ມເຫງ.” ແມ່ນແທ້! ເພື່ອຈະອົດທົນກັບການຂົ່ມເຫງ ເຮົາຕ້ອງຮັກແລະໄວ້ວາງໃຈພະເຢໂຫວາ ແລະບໍ່ຕ້ອງສົງໄສວ່າພະອົງຮັກເຮົາແທ້ຫຼືບໍ່.—ມັດ. 22:36-38; ຢໂກ. 5:11
5. ສິ່ງໃດຈະຊ່ວຍເຈົ້າໃຫ້ຮູ້ວ່າພະເຢໂຫວາຮັກເຈົ້າ?
5 ອ່ານຄຳພີໄບເບິນທຸກມື້ໂດຍມີເປົ້າໝາຍທີ່ຈະໃກ້ຊິດກັບພະເຢໂຫວາຫຼາຍຂຶ້ນ. (ຢໂກ. 4:8) ຕອນທີ່ເຈົ້າອ່ານຄຳພີໄບເບິນຂໍໃຫ້ສັງເກດເບິ່ງຄຸນລັກສະນະອັນອົບອຸ່ນຂອງພະເຢໂຫວາທີ່ສະແດງຕໍ່ເຈົ້າໂດຍທາງຄຳເວົ້າແລະການກະທຳ ແລະໃຫ້ພະຍາຍາມຄິດເບິ່ງວ່າພະອົງຮັກເຈົ້າຫຼາຍສ່ຳໃດ. (ອົບ. 34:6) ບາງຄົນກໍຍາກທີ່ຈະເຊື່ອວ່າພະເຈົ້າຮັກເຂົາເຈົ້າ ເພາະວ່າເຂົາເຈົ້າບໍ່ເຄີຍໄດ້ຮັບຄວາມຮັກ. ຖ້າເຈົ້າຮູ້ສຶກແບບນີ້ ລອງຂຽນລາຍການໃນແຕ່ລະມື້ວ່າພະເຢໂຫວາໄດ້ສະແດງຄວາມຮັກແລະຄວາມເມດຕາຕໍ່ເຈົ້າແນວໃດ. (ເພງ. 78:38, 39; ໂລມ 8:32) ເມື່ອຄິດເຖິງສິ່ງຕ່າງໆທີ່ເຈົ້າໄດ້ປະສົບດ້ວຍຕົວເອງ ແລະຄິດຕຶກຕອງກ່ຽວກັບສິ່ງທີ່ອ່ານໃນຄຳພີໄບເບິນ ເຈົ້າກໍຈະສາມາດຂຽນຫຼາຍສິ່ງທີ່ພະເຢໂຫວາເຮັດເພື່ອເຈົ້າໄດ້. ຖ້າເຈົ້າຮູ້ຄຸນຄ່າໃນສິ່ງທີ່ພະເຢໂຫວາເຮັດ ສາຍສຳພັນຂອງເຈົ້າກັບພະອົງກໍຈະເຂັ້ມແຂງຫຼາຍຂຶ້ນ.—ເພງ. 116:1, 2
6. ຈາກຄຳເພງ 94:17-19 ການອະທິດຖານຈາກໃຈຈະຊ່ວຍເຈົ້າໄດ້ແນວໃດ?
6 ອະທິດຖານເປັນປະຈຳ. ລອງນຶກພາບວ່າລູກຊາຍຄົນໜຶ່ງກຳລັງຢູ່ໃນອ້ອມກອດອັນອົບອຸ່ນຂອງພໍ່ ລາວຄົງຮູ້ສຶກປອດໄພແລະຢາກລົມທຸກເລື່ອງໃຫ້ພໍ່ຟັງວ່າເຈິຫຍັງມາແດ່ໃນມື້ນັ້ນ. ເຈົ້າກໍສາມາດໃກ້ຊິດກັບພະເຢໂຫວາແບບນັ້ນໄດ້ຄືກັນ ຖ້າເຈົ້າລົມກັບພະອົງໂດຍອະທິດຖານຈາກໃຈທຸກມື້. (ອ່ານຄຳເພງ 94:17-19) ຕອນທີ່ເຈົ້າອະທິດຖານຂໍໃຫ້ເຈົ້າ “ລະບາຍຄວາມໃນໃຈຕໍ່ພະເຢໂຫວາຄືກັບເທນ້ຳ” ແລະບອກພະເຢໂຫວາພໍ່ທີ່ຮັກຂອງເຈົ້າກ່ຽວກັບສິ່ງທີ່ເຈົ້າຢ້ານແລະກັງວົນ. (ຮ່ຳໄຮ. 2:19, ລ.ມ.) ຜົນຈະເປັນແນວໃດ? ຄຳພີໄບເບິນບອກວ່າ: ເຈົ້າຈະມີ “ສັນຕິສຸກຂອງພະເຈົ້າທີ່ເກີນຄວາມເຂົ້າໃຈທຸກຢ່າງ.” (ຟີລິບ 4:6, 7, ລ.ມ.) ເມື່ອເຈົ້າອະທິດຖານຈາກໃຈແບບນີ້ ເຈົ້າກໍຈະໃກ້ຊິດກັບພະເຢໂຫວາຫຼາຍຂຶ້ນ.—ໂລມ 8:38, 39
ເຮົາຈະເປັນຄົນກ້າຫານເມື່ອເຮົາໝັ້ນໃຈໃນພະເຢໂຫວາແລະລາຊະອານາຈັກຂອງພະອົງ
ສະແຕນລີ ຈອນສ໌ ເຮັດໃຫ້ຄວາມເຊື່ອຂອງຕົວເອງເຂັ້ມແຂງຂຶ້ນໂດຍໝັ້ນໃຈວ່າສິ່ງຕ່າງໆທີ່ລາຊະອານາຈັກຂອງພະເຈົ້າສັນຍາຈະເປັນຈິງ (ເບິ່ງຂໍ້ 7)
7. ເປັນຫຍັງເຈົ້າຄວນໝັ້ນໃຈວ່າຄຳສັນຍາຕ່າງໆກ່ຽວກັບລາຊະອານາຈັກຂອງພະເຈົ້າຈະເປັນຈິງ?
7 ໃຫ້ໝັ້ນໃຈວ່າຄຳສັນຍາຕ່າງໆກ່ຽວກັບລາຊະອານາຈັກຂອງພະເຈົ້າຈະເປັນຈິງ. (ຈົດເຊັນ. 23:19) ຖ້າເຈົ້າບໍ່ເຊື່ອແທ້ໆວ່າຄຳສັນຍາຂອງພະເຈົ້າຈະເປັນຈິງ ກໍເປັນເລື່ອງງ່າຍທີ່ຊາຕານແລະຜູ້ທີ່ຢູ່ຝ່າຍມັນຈະເຮັດໃຫ້ເຈົ້າຢ້ານ. (ສຸພາ. 24:10; ເຫບ. 2:15) ເຈົ້າຈະໝັ້ນໃຈໃນຄຳສັນຍາຕ່າງໆຂອງພະເຈົ້າຕັ້ງແຕ່ຕອນນີ້ໄດ້ແນວໃດ? ໃຫ້ຈັດເວລາສຶກສາຄົ້ນຄວ້າເລື່ອງຕ່າງໆທີ່ລາຊະອານາຈັກຂອງພະເຈົ້າຈະເຮັດໃຫ້ສຳເລັດ ແລະເບິ່ງເຫດຜົນວ່າເປັນຫຍັງເຈົ້າຈຶ່ງໝັ້ນໃຈວ່າເລື່ອງນັ້ນຈະເກີດຂຶ້ນແທ້. ການເຮັດແບບນີ້ຈະຊ່ວຍໄດ້ແນວໃດ? ຂໍໃຫ້ເບິ່ງຕົວຢ່າງຂອງສະແຕນລີ ຈອນສ໌ ລາວຕິດຄຸກຍ້ອນຄວາມເຊື່ອເປັນເວລາ 7 ປີ. * ອັນໃດຊ່ວຍລາວໃຫ້ອົດທົນໄດ້ຢ່າງສັດຊື່? ລາວບອກວ່າ: “ຍ້ອນຂ້ອຍມີຄວາມຮູ້ເລື່ອງລາຊະອານາຈັກຂອງພະເຈົ້າແລະບໍ່ເຄີຍສົງໄສໃນເລື່ອງນັ້ນ ຂ້ອຍຈຶ່ງມີຄວາມເຊື່ອທີ່ເຂັ້ມແຂງແລະຄົນອື່ນກໍບໍ່ສາມາດເຮັດໃຫ້ຂ້ອຍຖິ້ມພະເຢໂຫວາໄດ້.” ຖ້າເຈົ້າໝັ້ນໃຈໃນຄຳສັນຍາຂອງພະເຈົ້າ ເຈົ້າກໍຈະໃກ້ຊິດກັບພະເຢໂຫວາແລະບໍ່ຍອມໃຫ້ຄວາມຢ້ານມາເຮັດໃຫ້ເຈົ້າເຊົາຮັບໃຊ້ພະອົງ.—ສຸພາ. 3:25, 26
8. ຄວາມຮູ້ສຶກທີ່ເຮົາມີຕໍ່ການປະຊຸມບອກຫຍັງກ່ຽວກັບຕົວເຮົາ? ຂໍໃຫ້ອະທິບາຍ.
8 ເຂົ້າຮ່ວມການປະຊຸມຄລິດສະຕຽນເປັນປະຈຳ. ການປະຊຸມຊ່ວຍເຮົາໃຫ້ໃກ້ຊິດພະເຢໂຫວາຫຼາຍຂຶ້ນ. ເຮົາຈະຮັບມືກັບການຂົ່ມເຫງໃນອະນາຄົດໄດ້ສຳເລັດຫຼືບໍ່ນັ້ນກໍຂຶ້ນຢູ່ກັບວ່າເຮົາຮູ້ສຶກແນວໃດຕໍ່ການປະຊຸມ. (ເຫບ. 10:24, 25) ຍ້ອນຫຍັງ? ຖ້າເຮົາຍອມໃຫ້ອຸປະສັກເລັກໆນ້ອຍໆມາເຮັດໃຫ້ເຮົາບໍ່ໄປປະຊຸມໃນຕອນນີ້ ແລ້ວຈະເກີດຫຍັງຂຶ້ນໃນອະນາຄົດຖ້າເຮົາຕ້ອງສ່ຽງຊີວິດເພື່ອຈະໄປພົບພີ່ນ້ອງຮ່ວມຄວາມເຊື່ອ? ແຕ່ຖ້າເຮົາຕັ້ງໃຈໄປປະຊຸມເປັນປະຈຳ ເຮົາກໍຈະບໍ່ຍອມແພ້ເມື່ອຜູ້ຕໍ່ຕ້ານພະຍາຍາມເຮັດໃຫ້ເຮົາເຊົາປະຊຸມຮ່ວມກັນ. ຕອນນີ້ເປັນເວລາທີ່ເຮົາຕ້ອງເຮັດໃຫ້ຕົວເອງມັກການປະຊຸມ. ເມື່ອເຮົາມັກເຂົ້າຮ່ວມການປະຊຸມ ບໍ່ວ່າຈະມີການຕໍ່ຕ້ານຫຼືການສັ່ງຫ້າມຈາກລັດຖະບານແບບໃດກໍຕາມ ເຮົາກໍຍັງຈະເຊື່ອຟັງພະເຈົ້າຫຼາຍກວ່າຟັງມະນຸດ.—ກິດ. 5:29
ການຈື່ຂໍ້ພະຄຳພີແລະເພງສັນລະເສີນພະເຢໂຫວາໃນຕອນນີ້ ຈະຊ່ວຍເຈົ້າໄດ້ຫຼາຍແທ້ໆຕອນທີ່ຖືກຂົ່ມເຫງ (ເບິ່ງຂໍ້ 9) *
9. ເປັນຫຍັງການຈື່ຂໍ້ພະຄຳພີຈຶ່ງຊ່ວຍເຮົາໃຫ້ກຽມພ້ອມທີ່ຈະຮັບມືກັບການຂົ່ມເຫງ?
9 ພະຍາຍາມຈື່ຂໍ້ພະຄຳພີທີ່ເຈົ້າມັກ. (ມັດ. 13:52) ເຖິງວ່າເຈົ້າອາດຈະຈື່ບໍ່ເກັ່ງ ແຕ່ພະເຢໂຫວາສາມາດໃຊ້ພະລັງບໍລິສຸດເພື່ອຊ່ວຍເຈົ້າໃຫ້ຈື່ຂໍ້ພະຄຳພີໄດ້. (ໂຢ. 14:26) ຂໍໃຫ້ເບິ່ງຕົວຢ່າງຂອງພີ່ນ້ອງຊາຍຄົນໜຶ່ງທີ່ຕິດຄຸກຢູ່ເຢຍລະມັນຕາເວັນອອກ ແລະຖືກຂັງດ່ຽວເວົ້າວ່າ: “ຂ້ອຍມີຄວາມສຸກຫຼາຍແທ້ໆທີ່ຂ້ອຍຈື່ຂໍ້ພະຄຳພີຫຼາຍຮ້ອຍຂໍ້ໄດ້ຂຶ້ນໃຈ! ເຖິງວ່າຂ້ອຍຈະຢູ່ຄົນດຽວ ແຕ່ຂ້ອຍກໍຫຍຸ້ງຢູ່ກັບການຄິດກ່ຽວກັບຂໍ້ຄຳພີຫຼາຍໆຂໍ້.” ຂໍ້ພະຄຳພີເຫຼົ່ານີ້ຊ່ວຍພີ່ນ້ອງຂອງເຮົາໃຫ້ໃກ້ຊິດກັບພະເຢໂຫວາແລະອົດທົນໄດ້ຢ່າງສັດຊື່.
(ເບິ່ງຂໍ້ 10) *
10. ເປັນຫຍັງເຮົາຄວນຈື່ເພງສັນລະເສີນພະເຢໂຫວາໃຫ້ໄດ້?
10 ຮ້ອງເພງສັນລະເສີນພະເຢໂຫວາແລະຈື່ເນື້ອເພງ. ຕອນທີ່ໂປໂລກັບສີລາຖືກຂັງຄຸກຢູ່ເມືອງຟີລິບ ເຂົາເຈົ້າໄດ້ຮ້ອງເພງສັນລະເສີນພະເຢໂຫວາ. (ກິດ. 16:25) ຄ້າຍກັນ ເມື່ອພີ່ນ້ອງຂອງເຮົາໃນອະດີດສະຫະພາບໂຊວຽດຖືກເນລະເທດໄປຊີເບຣີ ເຂົາເຈົ້າເຮັດໃຫ້ຕົວເອງເຂັ້ມແຂງຂຶ້ນແນວໃດ? ພີ່ນ້ອງມາຣິຢາ ເຟດຸນບອກວ່າ: “ພວກເຮົາຮ້ອງທຸກເພງທີ່ເຮົາຈື່ຢູ່ໃນປຶ້ມເພງ.” ລາວເວົ້າວ່າເພງເຫຼົ່ານັ້ນໃຫ້ກຳລັງໃຈແລະຊ່ວຍເຂົາເຈົ້າທຸກຄົນໃຫ້ໃກ້ຊິດກັບພະເຢໂຫວາຫຼາຍຂຶ້ນ. ເຈົ້າຮູ້ສຶກເຂັ້ມແຂງຂຶ້ນບໍເມື່ອຮ້ອງເພງສັນລະເສີນພະເຢໂຫວາ? ຂໍໃຫ້ຈື່ເພງເຫຼົ່ານັ້ນຕັ້ງແຕ່ຕອນນີ້!—ເບິ່ງຂອບ “ ຂໍຊ່ວຍໃຫ້ຂ້ອຍກ້າຫານ.”
ວິທີທີ່ເຮົາຈະມີຄວາມກ້າຫານຫຼາຍຂຶ້ນ
11-12. (ກ) ຕາມທີ່ຂຽນໄວ້ໃນ 1 ຊາເມືອນ 17:37, 45-47 ເປັນຫຍັງດາວິດຈຶ່ງກ້າຫານ? (ຂ) ເຮົາໄດ້ບົດຮຽນຫຍັງຈາກຕົວຢ່າງຂອງດາວິດ?
11 ເຈົ້າຈຳເປັນຕ້ອງກ້າຫານເມື່ອເຈິການຂົ່ມເຫງ. ຖ້າເຈົ້າຮູ້ສຶກວ່າຕົວເອງບໍ່ກ້າຫານເດ ຈະເຮັດແນວໃດ? ຂໍໃຫ້ຈື່ວ່າ ຄວາມກ້າຫານທີ່ແທ້ຈິງບໍ່ໄດ້ຂຶ້ນຢູ່ກັບວ່າເຈົ້າຈະໂຕໃຫຍ່ສ່ຳໃດ ແຂງແຮງສ່ຳໃດ ຫຼືມີຄວາມສາມາດຫຼາຍສ່ຳໃດ. ຂໍໃຫ້ຄິດເຖິງດາວິດຕອນຍັງໜຸ່ມເມື່ອປະເຊີນໜ້າກັບໂຄລິອາດ. ຖ້າທຽບກັບຍັກໂຄລິອາດແລ້ວ ດາວິດໂຕນ້ອຍໆ ອ່ອນແອ ແລະບໍ່ມີອາວຸດສູ້ຮົບ. ແຕ່ດາວິດກ້າຫານຫຼາຍ ລາວແລ່ນໄປສູ້ກັບຄົນຮ່າງຍັກທີ່ຍິ່ງຈອງຫອງ.
12 ເປັນຫຍັງດາວິດຈຶ່ງກ້າຫານຫຼາຍຂະໜາດນັ້ນ? ລາວໝັ້ນໃຈວ່າພະເຢໂຫວາຢູ່ກັບລາວ. (ອ່ານ 1 ຊາເມືອນ 17:37, 45-47) ດາວິດບໍ່ໄດ້ເບິ່ງວ່າໂຄລິອາດໂຕໃຫຍ່ເມື່ອທຽບກັບລາວ ແຕ່ລາວເບິ່ງວ່າໂຄລິອາດໂຕນ້ອຍຈິດລິດເມື່ອທຽບກັບພະເຢໂຫວາ. ເຮົາໄດ້ບົດຮຽນຫຍັງຈາກເລື່ອງນີ້? ເຮົາຈະມີຄວາມກ້າຫານ ຖ້າເຮົາໝັ້ນໃຈວ່າພະເຢໂຫວາຢູ່ກັບເຮົາ ແລະເບິ່ງວ່າຜູ້ຕໍ່ຕ້ານເຮົາເປັນພຽງຄົນໂຕນ້ອຍໆເມື່ອທຽບກັບພະເຢໂຫວາຜູ້ມີລິດອຳນາດຍິ່ງໃຫຍ່. (2 ຂ່າວ. 20:15; ເພງ. 16:8) ດັ່ງນັ້ນ ກ່ອນທີ່ການຂົ່ມເຫງຈະເກີດຂຶ້ນ ເຮົາຈະເຮັດໃຫ້ຕົວເອງມີຄວາມກ້າຫານຫຼາຍຂຶ້ນໄດ້ແນວໃດ?
13. ເຮົາຈະກ້າຫານຫຼາຍຂຶ້ນໄດ້ແນວໃດ? ຂໍໃຫ້ອະທິບາຍ.
13 ເຮົາຈະເຮັດໃຫ້ຕົວເອງກ້າຫານຫຼາຍຂຶ້ນໂດຍການປະກາດຂ່າວດີເລື່ອງລາຊະອານາຈັກຂອງພະເຈົ້າ. ຍ້ອນຫຍັງ? ກໍຍ້ອນວ່າການປະກາດຊ່ວຍເຮົາໃຫ້ຮຽນຮູ້ທີ່ຈະວາງໃຈໃນພະເຢໂຫວາ ແລະເອົາຊະນະການຢ້ານຄົນ. (ສຸພາ. 29:25) ຄ້າຍຄືກັນ ກ້າມຈະແຂງແຮງຂຶ້ນໄດ້ກໍຕໍ່ເມື່ອເຮົາອອກກຳລັງກາຍ ເຮົາຈະກ້າຫານຫຼາຍຂຶ້ນໄດ້ຖ້າເຮົາໄປປະກາດເລື້ອຍໆ ບໍ່ວ່າຈະປະກາດຕາມບ້ານເຮືອນ ບ່ອນສາທາລະນະ ແບບບໍ່ເປັນທາງການ ແລະໃນເຂດທຸລະກິດ. ຖ້າເຮົາພັດທະນາຄວາມກ້າຫານໃນການປະກາດຕັ້ງຕອນນີ້ ເຮົາກໍພ້ອມທີ່ຈະປະກາດຕໍ່ໆໄປເຖິງວ່າວຽກຂອງເຮົາຈະຖືກສັ່ງຫ້າມ.—1 ເທ. 2:1, 2
ແນນຊີ້ ຢວນ ບໍ່ຍອມເຊົາປະກາດຂ່າວດີຂອງພະເຈົ້າ (ເບິ່ງຂໍ້ 14)
14-15. ເຮົາໄດ້ບົດຮຽນຫຍັງຈາກຕົວຢ່າງຂອງພີ່ນ້ອງແນນຊີ້ ຢວນ ແລະພີ່ນ້ອງວາລັນຕິນາ ການົບສະກາຢາ?
14 ເຮົາສາມາດຮຽນຈາກຕົວຢ່າງຂອງພີ່ນ້ອງຍິງສອງຄົນທີ່ກ້າຫານຫຼາຍ. ເຖິງວ່າພີ່ນ້ອງແນນຊີ້ຢວນ ຈະໂຕນ້ອຍເຊິ່ງສູງພຽງແຕ່ 150 ຊັງຕີແມັດ ແຕ່ລາວກໍເປັນຄົນທີ່ກ້າຫານ. * ເນື່ອງຈາກລາວບໍ່ເຊົາປະກາດຂ່າວດີເລື່ອງລາຊະອານາຈັກຂອງພະເຈົ້າ ລາວຈຶ່ງຕິດຄຸກເປັນເວລາ 20 ປີໃນປະເທດຈີນ. ເຈົ້າໜ້າທີ່ສອບສວນບອກວ່າ ລາວເປັນ “ຄົນທີ່ຫົວດື້ທີ່ສຸດ” ໃນປະເທດຂອງເຂົາເຈົ້າ!
ວາລັນຕິນາ ການົບສະກາຢາ ໝັ້ນໃຈວ່າພະເຢໂຫວາຢູ່ກັບລາວ (ເບິ່ງຂໍ້ 15)
15 ພີ່ນ້ອງວາລັນຕິນາ ການົບສະກາຢາກໍຄືກັນ ລາວຕິດຄຸກຢູ່ອະດີດສະຫະພາບໂຊວຽດ 3 ເທື່ອ ເຊິ່ງລວມແລ້ວກໍຕິດຄຸກປະມານ 21 ປີ. * ຍ້ອນຫຍັງ? ຍ້ອນລາວຕັ້ງໃຈທີ່ຈະປະກາດຕໍ່ໆໄປ. ດັ່ງນັ້ນ ເຈົ້າໜ້າທີ່ຈຶ່ງຕັດສິນວ່າລາວເປັນ “ອາຊະຍາກອນທີ່ອັນຕະລາຍຫຼາຍ.” ອັນໃດເຮັດໃຫ້ພີ່ນ້ອງສອງຄົນນີ້ກ້າຫານຫຼາຍ? ເຂົາເຈົ້າໝັ້ນໃຈວ່າພະເຢໂຫວາຢູ່ກັບເຂົາເຈົ້າ.
16. ເຄັດລັບທີ່ເຮັດໃຫ້ເຮົາມີຄວາມກ້າຫານທີ່ແທ້ຈິງແມ່ນຫຍັງ?
16 ດັ່ງທີ່ເຮົາໄດ້ຮຽນໄປແລ້ວວ່າ ຄວາມກ້າຫານບໍ່ໄດ້ມາຈາກຄວາມສາມາດຂອງເຮົາ. ແຕ່ເພື່ອຈະມີຄວາມກ້າຫານ ເຮົາຕ້ອງເຊື່ອວ່າພະເຢໂຫວາຢູ່ກັບເຮົາແລະພະອົງຈະສູ້ແທນເຮົາ. (ບັນຍັດ. 1:29, 30; ຊກາ. 4:6) ນັ້ນແມ່ນເຄັດລັບທີ່ເຮັດໃຫ້ມີຄວາມກ້າຫານທີ່ແທ້ຈິງ.
ວິທີຮັບມືເມື່ອມີຄົນຊັງເຮົາ
17-18. ພະເຍຊູເຕືອນເຮົາແນວໃດໃນໂຢຮັນ 15:18-21? ຂໍໃຫ້ອະທິບາຍ.
17 ຕາມປົກກະຕິແລ້ວເຮົາມັກເມື່ອມີຄົນນັບຖືເຮົາ ແຕ່ເຮົາບໍ່ຄວນຄິດວ່າຕົວເອງບໍ່ມີຄ່າເມື່ອມີຄົນຊັງເຮົາ. ພະເຍຊູບອກວ່າ: “ທ່ານທັງຫຼາຍກໍເປັນສຸກຫຼາຍເມື່ອຄົນທັງຫຼາຍຈະກຽດຊັງແລະຈະຂັບໄລ່ແລະຈະນິນທາທ່ານທັງຫຼາຍແລະຈະຖິ້ມນາມຊື່ຂອງທ່ານວ່າເປັນນາມຊື່ຊົ່ວເພາະເຫັນແກ່ບຸດມະນຸດ.” (ລືກາ 6:22) ພະເຍຊູໝາຍຄວາມວ່າແນວໃດ?
18 ພະເຍຊູບໍ່ໄດ້ໝາຍຄວາມວ່າ ຄລິດສະຕຽນຈະມີຄວາມສຸກເມື່ອມີຄົນຊັງເຂົາເຈົ້າ. ແຕ່ເພິ່ນກຳລັງເຕືອນກ່ຽວກັບສິ່ງທີ່ຈະເກີດຂຶ້ນກັບເຮົາ. ເນື່ອງຈາກເຮົາໃຊ້ຊີວິດແບບທີ່ພະເຍຊູສອນ ແລະປະກາດຂ່າວດີຄືກັບເພິ່ນ ເຮົາຈຶ່ງບໍ່ເປັນສ່ວນຂອງໂລກ ດັ່ງນັ້ນ ໂລກຈຶ່ງກຽດຊັງເຮົາ. (ອ່ານໂຢຮັນ 15:18-21) ເຮົາຢາກເຮັດໃຫ້ພະເຢໂຫວາພໍໃຈ. ເຮົາບໍ່ຕ້ອງເສຍໃຈຖ້າຄົນອື່ນຊັງເຮົາຍ້ອນເຮົາຮັກພະເຢໂຫວາ.
19. ເຮົາຈະຮຽນແບບພວກອັກຄະສາວົກໄດ້ແນວໃດ?
19 ຢ່າຍອມໃຫ້ສິ່ງທີ່ມະນຸດເວົ້າຫຼືເຮັດມາເຮັດໃຫ້ເຈົ້າຮູ້ສຶກອາຍທີ່ໄດ້ເປັນພະຍານພະເຢໂຫວາ. (ມີເກ 4:5) ເຮົາສາມາດເອົາຊະນະການຢ້ານຄົນໂດຍຮຽນແບບຕົວຢ່າງຂອງພວກອັກຄະສາວົກໃນເມືອງເຢຣຶຊາເລມກ່ຽວກັບສິ່ງທີ່ເຂົາເຈົ້າເຮັດຫຼັງຈາກພະເຍຊູຖືກຂ້າ. ເຂົາເຈົ້າຮູ້ວ່າຜູ້ນຳສາສະໜາຢິວກຽດຊັງເຂົາເຈົ້າຫຼາຍສ່ຳໃດ. (ກິດ. 5:17, 18, 27, 28) ແຕ່ເຂົາເຈົ້າຍັງໄປວິຫານແລະປະກາດເຊິ່ງເຮັດໃຫ້ເຫັນວ່າເປັນລູກສິດຂອງພະເຍຊູ. (ກິດ. 5:42) ເຂົາເຈົ້າບໍ່ຍອມໃຫ້ການຢ້ານຄົນອື່ນມາເຮັດໃຫ້ເຂົາເຈົ້າເຊົາປະກາດ. ພວກເຮົາກໍສາມາດເອົາຊະນະການຢ້ານຄົນໄດ້ຄືກັນໂດຍປະກາດເປັນປະຈຳບໍ່ວ່າຈະຢູ່ບ່ອນເຮັດວຽກ ຢູ່ໂຮງຮຽນ ຫຼືຢູ່ແຖວບ້ານເພື່ອໃຫ້ຄົນອື່ນຮູ້ວ່າເຮົາເປັນພະຍານພະເຢໂຫວາ.—ກິດ. 4:29; ໂລມ 1:16
20. ເປັນຫຍັງພວກອັກຄະສາວົກມີຄວາມສຸກເຖິງວ່າຈະຖືກກຽດຊັງ?
20 ເປັນຫຍັງພວກອັກຄະສາວົກມີຄວາມສຸກ? ເຂົາເຈົ້າຮູ້ວ່າເປັນຫຍັງຈຶ່ງຖືກກຽດຊັງ ແລະຖືວ່າເປັນກຽດທີ່ຖືກປະຕິບັດບໍ່ດີຍ້ອນເຮັດສິ່ງທີ່ພະເຢໂຫວາຕ້ອງການ. (ລືກາ 6:23; ກິດ. 5:41) ໃນເວລາຕໍ່ມາ ອັກຄະສາວົກເປໂຕຂຽນວ່າ: “ຖ້າແມ່ນທ່ານທັງຫຼາຍຖືກຄວາມທຸກເພາະເຫດກະທຳການຊອບທຳ ພວກທ່ານເປັນສຸກຫຼາຍ.” (1 ເປ. 2:19-21; 3:14) ເມື່ອເຮົາເຂົ້າໃຈວ່າ ເຮົາຖືກກຽດຊັງຍ້ອນເຮັດສິ່ງທີ່ຖືກຕ້ອງ ເຮົາກໍຈະບໍ່ຍອມເຊົາຮັບໃຊ້ພະເຢໂຫວາເພາະມີຄົນຊັງເຮົາ.
ການກຽມພ້ອມຈະເຮັດໃຫ້ເຈົ້າໄດ້ຮັບປະໂຫຍດ
21-22. (ກ) ເຈົ້າຈະເຮັດຫຍັງແດ່ເພື່ອກຽມພ້ອມທີ່ຈະຮັບມືກັບການຖືກຂົ່ມເຫງ? (ຂ) ເຮົາຈະພິຈາລະນາຫຍັງໃນບົດຄວາມຕໍ່ໄປ?
21 ເຮົາບໍ່ຮູ້ວ່າການຂົ່ມເຫງຈະເກີດຂຶ້ນເມື່ອໃດຫຼືການສັ່ງຫ້າມຈາກລັດຖະບານຈະສົ່ງຜົນແນວໃດຕໍ່ການນະມັດສະການພະເຢໂຫວາ. ແຕ່ເຮົາຮູ້ວ່າ ເຮົາສາມາດກຽມພ້ອມໄດ້ຕັ້ງແຕ່ຕອນນີ້ໂດຍສ້າງສາຍສຳພັນຂອງເຮົາກັບພະເຢໂຫວາໃຫ້ເຂັ້ມແຂງຂຶ້ນ ເຮັດໃຫ້ຕົວເອງມີຄວາມກ້າຫານຫຼາຍຂຶ້ນ ແລະຮຽນຮູ້ທີ່ຈະຮັບມືເມື່ອມີຄົນຊັງເຮົາ. ສິ່ງທີ່ເຮົາເຮັດໃນຕອນນີ້ຈະຊ່ວຍເຮົາໃຫ້ຮັບໃຊ້ພະເຢໂຫວາໄດ້ຕໍ່ໆໄປໃນອະນາຄົດ.
22 ແຕ່ຖ້າການສັ່ງຫ້າມເກີດຂຶ້ນແທ້ ເຮົາຈະເຮັດແນວໃດ? ໃນບົດຄວາມຕໍ່ໄປ ເຮົາຈະພິຈາລະນາຫຼັກການຕ່າງໆ ເຊິ່ງຈະຊ່ວຍເຮົາໃຫ້ຮັບໃຊ້ພະເຢໂຫວາຕໍ່ໆໄປເຖິງວ່າຈະຖືກສັ່ງຫ້າມ.
ເພງ 118 ‘ຊ່ວຍໃຫ້ພວກເຮົາມີຄວາມເຊື່ອຫຼາຍຂຶ້ນ’
^ ຂໍ້ 5 ເຮົາບໍ່ຢາກຖືກກຽດຊັງ. ແຕ່ບໍ່ຊ້າກໍໄວ ເຮົາທຸກຄົນຈະຕ້ອງເຈິກັບການຂົ່ມເຫງ. ບົດຄວາມນີ້ຈະຊ່ວຍເຮົາໃຫ້ເປັນຄົນກ້າຫານແລະກຽມພ້ອມທີ່ຈະຮັບມືກັບການຂົ່ມເຫງ.
^ ຂໍ້ 7 ເບິ່ງຫໍສັງເກດການ 15 ທັນວາ 1965 (ພາສາອັງກິດ) ໜ້າ 756-767.
^ ຂໍ້ 14 ເບິ່ງຫໍສັງເກດການ 15 ກໍລະກົດ 1979 ໜ້າ 4-7 ແລະວິດີໂອຜູ້ຄົນຈະຮູ້ຈັກຊື່ຂອງພະເຢໂຫວາ ໃນລາຍການໂທລະທັດ JW. ເບິ່ງຫົວຂໍ້ສຳພາດແລະປະສົບການ (ທັງສອງບໍ່ມີໃນພາສາລາວ).
^ ຂໍ້ 15 ເບິ່ງປຶ້ມປະຈຳປີ 2008 ຂອງພະຍານພະເຢໂຫວາ (ພາສາອັງກິດ) ໜ້າ 191-192
