CHIHANDE CHAKULINANGULA 27
Lizangenu vyaLuyanjisa Luli Nakwiza Kulutwe
“Vosena vaze vafwila kuyoya mwaya muchima wakuzachila Kalunga hakulikata naKulishitu Yesu, navakiko navavayanjisanga.”—CHIMO. 2, 3:12.
MWASO 129 Natutwalaho Kukakachila
VYUMA NATUSHIMUTWILA *
1. Mwomwo ika twatela kulizanga vyaluyanjisa lunahase kutuwana?
HAUFUKU wamakumishilo shimbu kanda Yesu Kulishitu afwenga ambile ngwenyi, vosena vaze navasaka kupwa tumbaji twenyi navakavahunganga. (Yowa. 17:14) Makumbi ano nawa, Vinjiho jaYehova vanakuvayanjisa kuvatu vaze vahunga muchano. (Chimo. 2, 3:12) Omu tuli nakuyoyela mumakumbi akukuminyina, twatela kutachikiza ngwetu vaka-kole jetu navatuhunganga.—Mateu 24:9.
2-3. (a) Woma unahase kutunehela ukalu muka? (b) Vyuma muka natushimutwila muchihande chino?
2 Tunahase kulizanga ngachilihi oholyapwa vyaluyanjisa lunakwiza kulutwe? Katwatela kushinganyeka haukalu wosena uze naukatuwana kulutweko. Mwomwo chinahase kutwivwisa woma nakutuhombesa. Woma unahase kutulingisa tulizakamine nakulitwamina kuzachila Yehova shimbu kanda naukalu utuwane. (Vishi. 12:25; 17:22) ‘Muka-kole wetu Liyavolo’ eji kuzachisanga woma mangana atuhungumwise. (Petu. 1, 5:8, 9) Vyuma muka twatela kulinga mangana tumike?
3 Muchihande chino natushimutwila vyuma navitukafwa tuzamise usoko wetu naYehova, novyo nachipwila chachilemu kulinga ngocho oholyapwa. Natulinangula nawa vyuma twatela kulinga mangana tupwenga vakumika nge vaka-kole jetu vanatufumbukila.
VYUMA NAVITUKAFWA TUZAMISE USOKO WETU NAYEHOVA
4. Chisoneka chaWavaHepeleu 13:5, 6 chatulweza vyuma muka, kaha mwomwo ika twatela kufwelela mazu kana?
4 Tachikizenu chikupu ngwenu Yehova amizanga kaha nawa keshi kukamisezako. (Tangenu WavaHepeleu 13:5, 6.) Kaposhi Kakutalila umwe kunyima ambile ngwenyi: “Mutu uze atachikiza kanawa Kalunga, eji kumufwelelanga lwola lwosena numba ali muvyeseko.” Uno mazu kana amuchano tahi? Eyo. Hakusaka mangana tumike muluyanjisa, twatela kuzanga Yehova nakufwelela ngwetu naikiye atuzanga.—Mateu 22:36-38; Yako. 5:11.
5. Vyuma muka navimikafwa mumone ngwenu Yehova amizanga?
5 Tangenunga Mbimbiliya hakumbi hakumbi mupandame kuli Yehova. (Yako. 4:8) Omu namutanga Mbimbiliya, shinganyekenu havilinga vyaYehova, nakumona omu amizanga kweseka navyuma eji kuhanjikanga nakulinga. (Kulo. 34:6) Vatu vamwe veji kuchiwananga kupwa chachikalu kufwelela ngwavo Yehova avazanga, mwomwo kakweshi mutu numba umwe avasolwelaho lyehi zangiko. Kachi nge nayenu mweji kushinganyekanga ngocho, kaha sonekenu jijila jize Yehova namisolwelamo zangi nalikoji. (Samu 78:38, 39; Loma 8:32) Kushinganyeka nakuhunanana havyuma namilingila nevi namutanga muMazu enyi, nachimikafwa musoneke vyuma vyavivulu namilingila Yehova. Kaha usoko wenu naYehova nauzama mbe.—Samu 116:1, 2.
6. Kweseka naSamu 94:17-19, uno kulomba namuchima wenu wosena nachimikafwa ngachilihi?
6 Lombenunga shimbu yosena. Achishinganyekenu mwana walunga vanamupakata mukasamba kuli ise. Ou mwana mwapwa wakukasunuka kulweza ise kala vyuma naliwane navyo. Nayenu nawa munahase kupwa vakukasunuka kulweza Yehova ukalu wenu nge namupandama kuli ikiye kuhichila mukulomba. (Tangenu Samu 94:17-19.) Shikaho, omu namulombanga kuli Yehova mwatela ‘kuhingununa vyosena vili kumuchima wenu nge meya’ hakumulweza vyuma vyosena munalizakamina. (Lungu. 2:19) Vyuma muka navifumamo? Namupwa “[na]kuunda chaKalunga chize chahambakana kunangakana chosena.” (Fwili. 4:6, 7) Kulomba mujila kaneyi nachimikafwa mupandame kuli Yehova.—Loma 8:38, 39.
Kupwa nalufwelelo lwakukola muli Yehova namuWangana wenyi nachitukafwa tupwenga vakumika
Stanley Jones azamishile lufwelelo lwenyi hakutachikiza ngwenyi Wangana waKalunga wapwa fulumende nahayo (Talenu palangalafu 7)
7. Mwomwo ika mwatela kufwelela ngwenu jishiko atushika Kalunga najikatesamo?
7 Tachikizenu chikupu ngwenu vyuma vyosena vize vatushika kukatulingila muWangana waKalunga navikatesamo. (Kula. 23:19) Nge muli nakuhuhwasana ngwenu jishiko jaKalunga kajeshi kukatesamoko, kaha Satana nakaye kenyi vanahase kumivwisa woma. (Vishi. 24:10; Hepe. 2:15) Vyuma muka navimikafwa mufwelele Wangana waKalunga oholyapwa? Mwatela kulinangula jishiko jize atushika Kalunga kukatulingila muWangana wenyi nakushinganyeka ovyo vyatela kutukunyula tufwelele ngwetu najikatesamo chikupu. Chuma kana nachimikafwa ngachilihi? Talenu chakutalilaho chaStanley Jones, uze vakashile mukamenga hamyaka 7 mwomwo yalufwelelo lwenyi. * Uno vyuma muka vyamukafwile omike? Ambile ngwenyi: “Kupwa nachinyingi chavyuma vatushika muWangana, nakufwelela chikupu ngwami naukatesamo jishiko josena, changukafwile ngupwenga wakumika.” Nge namupwa nalufwelelo lwakukola mujishiko jaKalunga, kaha namupandama kuli ikiye, kakweshi chuma chimwe nachimivwisa woma kuzachila Kalungako.—Vishi. 3:25, 26.
8. Kupwanga kukukunguluka shimbu yosena nachikatukafwa ngachilihi? Lumbununenu.
8 Kungulukenunga shimbu yosena. Kupwanga kukukunguluka shimbu yosena nachitukafwa tupandame kuli Yehova. Echi nachisolola hatoma nge natukomika omu navakatuyanjisa kulutwe. (Hepe. 10:24, 25) Mwomwo ika tunahanjikila ngocho? Kachi nge ukalu waundende nautuhonesa kuyanga kukukunguluka makumbi ano, nyi ngachilihi omu natukapwa muukalu waunene, kutala natukahasa kuhaka myono yetu muponde hakuya kukukunguluka tahi? Chochimwe nawa, kachi nge natufwilanga kupwanga kukukunguluka oholyapwa, kaha katweshi kukecha kulikungulwila hamwe navandumbwetu omu vaka-kole jetu navakatukanyisa kulikungululwila hamweko. Luno lukiko lwola twatela kumona kukunguluka kupwa chachilemu. Nge natukungulukanga lwola lwosena, kaha kakweshi chuma chimwe chakufwana nge luyanjisa chipwe vene kukanyisa mulimo wetu kufulumende nachituhonesa kwononoka Kalunga kuhambakana vatuko.—Vili. 5:29.
Kulamina visoneka mumutwe namyaso yaWangana makumbi ano nachikatukafwa nge vanakutuyanjisa (Talenu palangalafu 9) *
9. Hakuwana nge kala lwola vanahase kutuyanjisa, mwomwo ika chapwila chachilemu kulamina visoneka mumutwe?
9 Laminenunga visoneka vimwe mumutwe. (Mateu 13:52) Twatachikiza ngwetu chinahase kumikaluhwila kulinga ngocho, oloze Yehova mwamikafwa nashipilitu yenyi yajila mangana mwanuke visoneka kana halwola namufwila kuvizachisa. (Yowa. 14:26) Achitalenu vyuma vyasolokele kuli ndumbwetu walunga vahakile mukamenga kauka wenyi muEast Germany. Ambile ngwenyi: “Ngwevwile kuwaha chikuma mwomwo ngwatachikijile visoneka vyavivulu shimbu kanda vangukase mukamenga. Ngocho omu vangukashile ngwashinganyekelenga hamijimbu yamuMbimbiliya yayivulu.” Chikupu vene, kutachikiza visoneka chakafwile ou ndumbwetu apandame kuli Yehova nakupwa lika wakumika.
(Talenu palangalafu 10) *
10. Mwomwo ika twatela kulaminanga myaso mumutwe?
10 Laminenunga myaso yakwalisa Yehova mumutwe. Omu Paulu naShilase vapwile mukamenga muFwilipi vembile myaso yakushipilitu yize valaminyinyine mumutwe. (Vili. 16:25) Chochimwe nawa, omu vandumbwetu vapwile muchiyulo chaSoviet Union, vavakashile muSiberia. Vyuma muka vyavakafwile vomike? Ndumbu Mariya Fedun ambile ngwenyi: “Twembilenga myaso yakushipilitu yize twalaminyine mumutwe.” Kaha nawa ahanjikile ngwenyi, myaso kana yavakolezezele vosena vapandame chikuma kuli Yehova. Uno kwimba myaso yakushipilitu yize mwazanga chikuma cheji kumikolezezanga tahi? Kaha yilaminenu jino mumutwe.—Talenu lipwata lyakwamba ngwavo, “Ngukafwe Ngumike.”
VYUMA NAVIMIKAFWA MUPWENGA VAKUMIKA
11-12. (a) Mwomwo ika Ndavichi apwililile wakumika kweseka namazu ahali Samwele 1, 17:37, 45-47? (b) Chishina muka chachilemu natulinangula kumujimbu waNdavichi?
11 Mwatela kupwa vakumika halwola navamiyanjisa. Vyuma muka mwatela kulinga nge munamono ngwenu kamwapwa vakumikako? Tachikizenu ngwenu, kumika kachapendamina haseteko yamutu chipwe hajingolo jenyi chipwe uhashi atwama nawoko. Chakutalilaho, omu Ndavichi apwile kanyike alindumwine Ngolyate. Chindume kana apwile kuluwa mukuzunga jita, oloze Ndavichi apwile kanyike kaha nawa kapwile kuluwa mukuzunga jitako. Tuyokutuyoku nawa, Ndavichi kapwile napoko yamukwaleko. Oloze apwile wakumika chikuma, ngocho alahile washi nakulukuka chindume Ngolyate.
12 Chuma muka chakafwile Ndavichi omike? Afwelelele chikupu ngwenyi Yehova mwamukafwa. (Tangenu Samwele 1, 17:37, 45-47.) Ndavichi kalyesekesele ivene kuli Ngolyateko. Oloze amwesekesele kuli Yehova nakumumona kupwa wamokomoko. Vyuma muka natulinangulako? Natupwa vakumika nge natufwelela ngwetu Yehova ali nayetu nakumona nawa vaka-kole jetu kupwa vamokomoko hakuvesekesa kuli Kalunga Wangolo Josena. (Miji. 2, 20:15; Samu 16:8) Vyuma muka navitukafwa tupwenga vakumika shimbu kanda luyanjisa?
13. Chuma muka nachitukafwa mangana tupwenga lika vakumika? Lumbununenu.
13 Tunahase kupwa vakumika kachi nge natwazananga mumulimo wakwambulula mujimbu. Mwomwo ika tunahanjikila ngocho? Mwomwo kwambulula cheji kutukafwanga tupendamine hali Yehova nakutulingisa tuhone kwivwa vatu woma. (Vishi. 29:25) Ngana muze mujimba weji kukwatanga ngolo kachi nge natulinyukanyuka, nakwazana mumulimo wakwambulula kuzuvo hizuvo, namukutulukila nakuvihela vyasanga cheji kutukafwanga tupwenga vakumika. Kachi nge makumbi ano natwambululanga chakuzeneka kwivwa woma, kaha nachikatukafwa tukatwaleho lika kwambulula numba nge mulimo wetu vanaukanyisa.—Teso. 1, 2:1, 2.
Nancy Yuen atwalileho lika kwambulula mujimbu wamwaza numba tuhu vamukanyishilenga (Talenu palangalafu 14)
14-15. Vishina muka natulinangula kuli Nancy Yuen naValentina Garnovskaya?
14 Tunahase nawa kulinangula kuli vandumbwetu vamapwevo vavali vakushishika vaze vapwile vakumika. Ndumbwetu Nancy Yuen apwile wamwihi jimita 1.5, oloze apwile wakumika. * Atwalileho lika kwambulula mujimbu wamwaza numba tuhu vamukanyishilenga. Ngocho vamukashile mukamenga muChina hamyaka yakuzomboka 20. Vaka-fulumende vaze vamuhulishile vihula vambile ngwavo apwile “mutu wamukalu muchima havatu vosena” mulifuchi kana.
Valentina Garnovskaya atachikijile ngwenyi Yehova apwile nakumukafwa (Talenu palangalafu 15)
15 Kaha nawa ndumbu Valentina Garnovskaya naikiye vamukashile mukamenga mapapa katatu kafwe myaka 21 * muchiyulo chaSoviet Union. Mwomwo ika vamukashililile? Mwomwo atwalileho lika kwambulula, ngocho vaka-fulumende vamuvulukile ngwavo “apwile chihwanga wamupi chikuma.” Uno chuma muka chakafwile ava vandumbwetu vakushishika vavali vapwenga vakumika? Mwomwo vafwelele ngwavo Yehova apwile navakiko.
16. Chuma muka nachikafwa mutu apwenga wakumika?
16 Nge tunakusaka kupwa vakumika kaha katwatela kufwelela hangolo jetu chipwe hauhashi wetuko. Oloze twatela kufwelela ngwetu Yehova ali nayetu kaha mwatwashila jita. (Lushi. 1:29, 30; Zeka. 4:6) Kufwelela Yehova chikiko nachitukafwa tupwenga vakumika.
VYUMA TWATELA KULINGA KACHI NGE VATU VANATUHUNGU
17-18. Kweseka namazu atwama hali Yowano 15:18-21, vyuma muka vize Yesu atulwezelele chimweza? Lumbununenu.
17 Tweji kwivwanga kuwaha kachi nge vatu navatuvumbika, oloze katwatela kulivwa kupwa vamokomoko nge kaveshi nakutuvumbikako. Yesu ambile ngwenyi: “Mwawahilila enu, omu navamihunga kuli vatu, nakumihanga mukachi kavo, nakumisaula, nakupihisa majina enu mwomwo yaMwanamutu.” (Luka 6:22) Uno Yesu atalishile mulihi?
18 Yesu kapwile nakulumbununa ngwenyi vaka-Kulishitu navakevwanga kuwaha kuvahungako. Oloze apwile nakutulweza mangana tulizange havyuma vinahase kutusolokela. Yetu katwapwa vaka-kayeko. Tweji kukavangizanga vyuma anangwilenga Yesu mukuyoya chetu chosena, kaha nawa tweji kwambululanga mujimbu uze ambulwilenga. Echi chikiko chalingisa kaye katuhunge. (Tangenu Yowano 15:18-21.) Twasaka kwivwisa Yehova kuwaha. Kachi nge vatu navatuhunga mwomwo yakuzanga Setu, kaha kacheshi naukaluko.
19. Tunahase kulondezeza ngachilihi vaposetolo?
19 Kanda kwivwilila vyuma navahanjika chipwe navalinga vatu vimivwise sonyi mwomwo yakupwa muVinjiho jaYehovako. (Mika 4:5) Tunahase kuhonesa woma hakushinganyeka havyuma valingile vaposetolo vaze vapwile muYelusalema omu alingile Yesu hivanamujihi lyehi. Vejivile ngwavo vatwamina vavaYuleya vavahungile. (Vili. 5:17, 18, 27, 28) Oloze hakumbi hakumbi vayilenga mutembele nakunangula, kulumbununa nge valisolwele hatoma ngwavo vapwile tumbaji twaYesu. (Vili. 5:42) Kavevwile woma wakwambululako. Nayetu nawa tunahase kuhonesa woma kachi nge natutwalaho lika kwambulula mangana tulisolole hatoma ngwetu tuVinjiho jaYehova, numba tupwa kumilimo, kushikola namungalila twatwama.—Vili. 4:29; Loma 1:16.
20. Mwomwo ika vaposetolo vawahililile numba tuhu vatu vavahungile?
20 Mwomwo ika vaposetolo vawahililile? Mwomwo vejivile ovyo vyalingishile vavahunge, kaha vamwene ngwavo chakwoloka kuvayanjishila hakulinga mwaya kujina chaYehova. (Luka 6:23; Vili. 5:41) Kutwala muze, kaposetolo Petulu asonekele ngwenyi: “Nge namuyanda mwomwo yakwoloka, kaha munapu vakuwahilila.” (Petu. 1, 2:19-21; 3:14) Kachi nge vatu navatuhunga mwomwo yakulinga vyuma vyakwoloka, kaha katwatela kulitwamina kuzachila Yehova mwomwo ngwetu navatujindako.
NAMUNGANYALA KACHI NGE NAMULIZANGILA CHIMWEZA
21-22. (a) Vyuma muka munakufwila kulinga mangana mulizangile chimweza vyaluyanjisa? (b) Vyuma muka natushimutwila muchihande chinakavangizaho?
21 Katwatachikijile lwola navakatufumbukila kuli vaka-fulumende chipwe vene kutukanyisa kulemesa Yehovako. Oloze twatela kulizangila chimweza, hakuzamisa usoko wetu naYehova, hakupwa vakumika nakuhona kwivwa woma nge vanatuhungu kuli vaka-kole jetu. Kulizangila chimweza nachikatukafwa tukatwaleho lika kupwa vakumika.
22 Nyi ngachilihi nge vaka-fulumende vanatukanyisa kulemesa Yehova? Muchihande chinakavangizaho natushimutwila jindongi jize najitukafwa tutwaleho lika kuzachila Yehova numba nge mulimo wetu vanaukanyisa.
MWASO 118 “Tukafwe Tupwenga naLufwelelo Lwalunene”
^ par. 5 Katwasaka vatu vatuhungeko. Oloze twatachikiza ngwetu kala lwola vanahase kutuyanjisa. Chihande chino nachitukafwa tumike nge vanakutuyanjisa.
^ par. 7 Talenu Kaposhi Kakutalila waDecember 15, 1965, mafwo 756-767.
^ par. 14 Talenu Kaposhi Kakutalila, waJuly 15, 1979, mafwo 4-7. Talenu nawa vindiyo yakwamba ngwavo Jehovah’s Name Will Be Made Known ha JW Broadcasting®. Talenu havanavuluka ngwavo INTERVIEWS AND EXPERIENCES.
^ par. 15 Talenu mukanda waYearbook of Jehovah’s Witnesses, wamu 2008 mafwo 191-192.
